Yumi Inap Tru Long Stap Olsem Ol Tisa Bilong Tok Bilong God
‘God yet i bin mekim mipela inap long i stap wokman.’—2 KORIN 3:5, 6.
1, 2. Sampela taim ol man i traim long mekim wanem wok bilong autim tok? Bilong wanem planti taim wok bilong ol i no kamap gutpela?
YU BAI ting olsem wanem sapos ol i givim yu wanpela wok yu no gat save long mekim? Tingim dispela: Ol i givim long yu ol samting bilong mekim dispela wok na ol tul i stap bilong yu ken yusim. Tasol yu no save liklik long olsem wanem bai yu mekim dispela wok. Na em wanpela bikpela wok yu mas mekim hariap. Ol manmeri i wet long yu mas mekim dispela samting. Ating bai yu tingting planti!
2 Kain hevi olsem inap kamap. Tingim dispela: Sampela taim wanpela misin bilong Kristendom i bin traim long mekim wok autim tok long ol haus. Tasol planti taim kain wok olsem bilong ol i no kamap gutpela, na insait long sampela wik o mun em i pinis olgeta. Bilong wanem? Long wanem, Kristendom i no bin helpim lain bilong en long kisim save inap long ol i ken mekim dispela wok. Ol pris pasto tu i no gat save inap long ol i ken mekim wok autim tok, maski ol i bin skul inap planti yia long ol bikpela skul. Olsem wanem yumi ken tok olsem?
3. Long 2 Korin 3:5, 6, wanem tok i kamap tupela taim? Wanem mining bilong en?
3 Tok Bilong God i kamapim klia wanem samting i mekim na man inap tru long autim gutnius. Spirit bilong God i kirapim aposel Pol long tok: “Tru, mipela yet i no inap long mekim dispela wok, olsem na mipela i no ken tok mipela yet i bin mekim wanpela samting. Nogat. God wanpela tasol i save mekim mipela inap long dispela wok. Na em yet i bin mekim mipela inap long i stap wokman.” (2 Korin 3:5, 6) Lukim wanpela tok ol dispela ves i kamapim inap tupela taim—em “mipela inap.” Wanem mining bilong dispela tok? Em i makim olsem ol trupela wokman bilong gutnius ol inap tru long mekim wok autim tok. Ol i gat save bilong mekim dispela wok.
4. (a) Olsem wanem Pol i soim olsem i no wan wan man tasol inap kisim save bilong mekim wok Kristen? (b) Long wanem tripela rot Jehova i save inapim yumi long kamap wokman bilong em?
4 Tasol ol i kisim we dispela save? Long save bilong ol yet? Long bikpela save ol i bin kisim long wanpela skul i gat nem? Aposel Pol i bin kisim olgeta dispela samting. (Aposel 22:3; Filipai 3:4, 5) Tasol long pasin daun em i tok olsem save bilong em long mekim wok bilong God i no kam long ol bikpela skul, nogat; em i kisim dispela save long God Jehova. Olsem wanem? Wan wan man tasol inap kisim dispela kain save? Pol i raitim pas long kongrigesen Korin na tok ‘mipela inap long mekim dispela wok.’ Dispela i makim olsem Jehova i stretim rot bambai olgeta gutpela wokman bilong em ol inap tru long mekim dispela wok em i bin givim long ol. Olsem wanem Jehova i save inapim ol Kristen tru long mekim dispela wok long nau? Yumi ken stori long tripela samting em i save mekim wok long en bilong inapim yumi: (1) Tok bilong em, (2) spirit holi bilong em, na (3) oganaisesen bilong em long graun.
Tok Bilong Jehova Em Inapim Yumi
5, 6. Tok bilong Baibel i mekim wanem long ol Kristen tru?
5 Olsem wanem Tok Bilong God i save inapim yumi long kamap wokman bilong God? Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:16, 17) Olsem na Baibel inap mekim na yumi “i redi” long mekim “gutpela wok” bilong lainim ol man long Tok Bilong God. Tasol olsem wanem long ol man bilong ol misin bilong Kristendom? Ol i gat Baibel. Tasol olsem wanem wanpela buk inap helpim sampela manmeri long winim mak bilong kamap wokman bilong God na sampela nogat? Bekim bilong dispela i olsem: Sampela i bilip olsem Baibel em i tok bilong God, na sampela nogat.
6 Sori tru, planti man husat i save go long lotu ol i no bilip olsem tok bilong Baibel em i “tok tru bilong God.” (1 Tesalonaika 2:13) Kristendom i bin pundaun tru long dispela samting. Ol pris pasto i bin skul inap planti yia long ol bikpela skul bilong lotu, tasol yu ting ol inap tru long skulim ol man long Tok Bilong God? Yumi ken tok nogat. Taim sampela sumatin i kirap long skul, ol i bilip long Baibel, tasol taim ol i pinis long skul, ol i no bilip tumas long en! Olsem na bihain ol i no autim tok long Baibel—em planti bilong ol i no bilip moa long en—ol i kirap mekim narapela kain wok. Ol i tok pait long ol samting bilong wok politik, toktok long ol samting bilong helpim sindaun bilong ol man, o ol i kamapim save bilong ol man bilong dispela graun taim ol i mekim tok long haus lotu. (2 Timoti 4:3) Tasol ol Kristen tru i bihainim pasin bilong Jisas Krais.
7, 8. Olsem wanem tingting bilong Jisas long Tok Bilong God i narapela kain long tingting bilong ol bikman bilong lotu bilong taim bilong em?
7 Jisas i no larim ol bikman bilong lotu long taim bilong em i stiaim tingting bilong em. Maski em i lainim liklik lain man—olsem ol aposel bilong em—o bikpela lain man, Jisas i mekim gutpela wok long ol tok bilong Baibel. (Matyu 13:10-17; 15:1-11) Dispela pasin i mekim na em i narapela kain long ol bikman bilong lotu bilong dispela taim. Ol i strong long ol man nating i no ken traim long kisim save long ol strongpela tok bilong God. Long dispela taim ol tisa i bilip olsem sampela tok bilong Baibel i strong tumas, olsem na ol i ken toktok tasol long ol dispela ves wantaim sumatin ol i laikim tru—na taim ol i toktok wantaim em ol i mas daunim strong bilong nek na karamapim laplap long het. Sampela bilip kranki i mekim na ol dispela bikman bilong lotu i pret long toktok long sampela hap bilong Baibel, wankain olsem ol i pret long kolim nem bilong God!
8 Jisas Krais i no olsem. Em i ting olgeta manmeri—na i no wan wan man tasol—i mas tingim “olgeta tok bilong God.” Jisas i no tingting long givim ki bilong kisim save long wanpela lain saveman. Em i tokim ol disaipel bilong em olsem: “Tok mi mekim long yupela long tudak, em yupela i mas autim long san. Na tok yupela i harim isi tasol long yau, em yupela i mas sanap antap long haus na autim long ol manmeri.” (Matyu 4:4; 10:27) Jisas i gat bikpela laik long helpim planti man long kisim save long God.
9. Ol Kristen tru i save mekim wanem wok long Baibel?
9 Tok Bilong God em i nambawan samting yumi mas tingting long en taim yumi mekim wok tisa. Olsem: Taim yumi mekim wanpela tok long Haus Kingdom bilong ol Witnes Bilong Jehova, i no inap long yumi ritim tasol sampela ves bilong Baibel. Yumi mas stori gut long mining bilong ol ves, mekim tok piksa, na soim olsem wanem yumi ken bihainim dispela tok. Yumi laik bai tok bilong Baibel i ken i go daun long bel bilong ol man i harim tok. (Nehemia 8:8, 12) Yumi mas kamapim ol tok bilong Baibel taim yumi mas givim sampela tok kaunsel o stretim man. Maski lain bilong Jehova i gat narapela narapela tok ples na ol i bilong kain kain sindaun, olgeta i rispektim nambawan gutpela buk—em Baibel.
10. Tok bilong Baibel inap mekim wanem long yumi?
10 Taim yumi mekim kain wok olsem long Baibel, tok bilong en i gat strong. (Hibru 4:12) Tok bilong en i stiaim ol manmeri long mekim ol bikpela senis long laip bilong ol. Ol i lusim ol pasin nogut em Baibel i no orait long en, olsem pasin pamuk, bagarapim marit, pasin bilong lotu long ol god giaman, pasin bilong spak, na stil. Baibel i bin helpim planti man long rausim ol pasin bilong olpela bel na kamap nupela man. (Efesus 4:20-24) Em nau, sapos yumi ting Baibel i winim olgeta tingting na save bilong ol man, na yumi mekim stretpela wok long en, orait tok bilong Baibel bai mekim na yumi inap tru long stap olsem tisa bilong Tok Bilong God.
Spirit Bilong Jehova Em Inapim Yumi
11. Bilong wanem i stret long tok olsem spirit holi bilong Jehova i olsem “helpim”?
11 Namba tu samting, em yumi ken stori long wok bilong spirit holi bilong Jehova, o strong bilong em, long helpim yumi na yumi inap tru long mekim wok bilong God. Yumi no ken lusim tingting olsem spirit bilong Jehova em i nambawan bikpela strong, winim olgeta narapela strong. Jehova i bin givim namba long Pikinini bilong em long mekim wok long dispela bikpela strong bilong helpim ol Kristen tru. Olsem na i stret Jisas i kolim spirit holi olsem “helpim.” (Jon 16:7, NW ) Em i tokim ol disaipel bilong em long beten askim Jehova long givim dispela strong long ol, na em i tok Jehova bai amamas long mekim olsem.—Luk 11:10-13; Jems 1:17.
12, 13. (a) Bilong wanem em i bikpela samting long yumi beten askim God long spirit holi i ken helpim yumi long wok autim tok? (b) Olsem wanem ol Farisi i soim olsem spirit holi i no mekim wok long bel bilong ol?
12 Yumi mas beten askim God long givim spirit holi long yumi long olgeta de, na bilong helpim yumi long mekim wok autim tok. Dispela strong inap mekim wanem long yumi? Em inap stiaim tingting na bel bilong yumi, helpim yumi long senisim sampela pasin bilong yumi, helpim yumi long kamap strong long ol samting bilong spirit, na long lusim pasin bilong olpela bel na kamap nupela man. (Kolosi 3:9, 10) Em inap helpim yumi long kamapim ol gutpela pasin olsem bilong Jisas. Planti bilong yumi inap tingim na kolim tok bilong Galesia 5:22, 23. Ol dispela ves i kolim ol pasin spirit holi bilong God i save kamapim. Namba wan pasin em pasin bilong laikim tru ol narapela. Dispela pasin i bikpela samting long wok autim tok bilong yumi. Bilong wanem?
13 Pasin bilong laikim ol narapela i save kirapim yumi. Pasin bilong laikim tru Jehova na ol narapela man i kirapim ol Kristen tru long autim gutnius. (Mak 12:28-31) Sapos yumi no gat dispela pasin, yumi no inap i stap olsem tisa bilong Tok Bilong God. Skelim pasin bilong Jisas wantaim pasin bilong ol Farisi. Matyu 9:36 i tok long Jisas olsem: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” Ol Farisi i ting olsem wanem long ol man nating? Ol i tok: “Dispela lain manmeri ol i no save long lo. God i tok pinis long ol bai i bagarap.” (Jon 7:49) Ol dispela Farisi i no sori long ol man, ol i daunim ol. Tru tumas, spirit bilong Jehova i no mekim wok long bel bilong ol Farisi.
14. Pasin bilong Jisas long kamapim pasin sori long wok bilong em i mas kirapim yumi long mekim wanem?
14 Jisas i pilim hevi bilong ol man. Em i save long pen na hevi ol i karim. Em i save ol man i bin mekim nogut long ol, na ol i stap nogut olsem ol sipsip i no gat wasman. Jon 2:25 i tok, Jisas “i save pinis long tingting bilong ol man.” Em i Saveman i Bosim Wok taim Jehova i wokim ol samting, olsem na Jisas i save gut long pasin bilong man. (Sindaun 8:30, 31) Dispela samting i mekim na em i laikim ol man moa yet. Oltaim dispela kain pasin sori i mas kirapim yumi long mekim wok autim tok! Sapos yumi pilim olsem yumi mas wok long kamap gutpela moa long dispela samting, orait yumi mas beten askim Jehova long givim spirit holi long yumi na yumi mas mekim ol samting i stret wantaim beten bilong yumi. Jehova bai harim beten bilong yumi. Em bai salim dispela gutpela strong bilong helpim yumi long bihainim moa yet pasin bilong Krais, em dispela man em inap tru long autim gutnius.
15. Olsem wanem tok bilong Aisaia 61:1-3 i stret long Jisas, na i kamapim klia pasin tru bilong ol saveman bilong Lo na ol Farisi?
15 Orait, olsem wanem Jisas inap tru long mekim wok bilong God? Em i tok, “Spirit bilong Bikpela i kam i stap long mi.” (Luk 4:17-21) Em nau, Jehova yet i makim Jisas long rot bilong spirit holi. I no olsem Jisas i mas kisim setifiket samting i tokaut olsem em inap tru long mekim dispela wok. Olsem wanem long ol bikman bilong lotu long taim bilong Jisas? Spirit holi i bin makim ol? Nogat. Na tu, ol i no inap long truim tok bilong Aisaia 61:1-3, em Jisas i bin ritim na tok dispela tok i makim em. Plis ritim ol dispela ves, na lukim olsem ol Farisi na ol saveman bilong Lo i gat tupela maus ol i no winim mak ol ves i kolim. Ol i no gat gutnius bilong autim long ol rabisman. Na olsem wanem ol inap tokim ol man i kalabus long ol samting, olsem ol bai kamap fri o tokim ol aipas olsem ol bai lukluk gen? Long ol samting bilong spirit, ol dispela man yet ol i aipas na kalabus long ol pasin tumbuna! Tasol olsem wanem long yumi? Yumi inap tru long skulim ol man?
16. Lain bilong Jehova long nau inap bilip olsem wanem long wok bilong ol olsem wokman bilong God?
16 Tru, yumi no bin skul long ol bikpela skul bilong Kristendom. Yumi no bin go long bikpela skul bilong lotu na kisim namba bilong stap olsem tisa. Tasol olsem wanem? Yumi sot long ol samting na yumi no inap mekim wok tisa? Nogat tru! God Jehova yet i bin makim yumi long stap olsem ol Witnes bilong em. (Aisaia 43:10-12, NW ) Sapos yumi beten askim em long givim spirit holi long yumi na yumi mekim ol samting i stret wantaim beten bilong yumi, orait yumi inap tru long mekim wok bilong God. Tru, yumi gat sin na yumi no inap bihainim stret pasin bilong Bikpela Tisa, em Jisas. Tasol yumi tok tenkyu tru long Jehova i mekim wok long spirit holi bilong em bilong inapim yumi long stap olsem ol tisa bilong Tok bilong em, a?
Oganaisesen Bilong Jehova Em Inapim Yumi
17-19. Olsem wanem 5-pela miting em oganaisesen bilong Jehova i redim i helpim yumi na yumi inap tru long mekim wok bilong God?
17 Orait nau yumi ken stori long namba tri samting Jehova i mekim wok long en bilong inapim yumi long stap olsem ol tisa bilong Tok bilong em—em oganaisesen bilong em long graun i save skulim yumi long mekim wok bilong God. Olsem wanem em i mekim? Tingim gutpela skul yumi wok long kisim! Yumi save go long 5-pela miting Kristen long olgeta wik. (Hibru 10:24, 25) Yumi bung olsem ol liklik grup long ol Buk-Stadi Bilong Kongrigesen bilong stadi gut long Baibel long rot bilong wanpela buk em oganaisesen bilong Jehova i redim. Taim yumi putim yau na bekim tok, narapela i lainim na strongim narapela. Wasman i lukautim Buk-Stadi i save givim gutpela tok long yumi olgeta wan wan na tingim gut yumi. Long Pablik-Tok na Stadi Wastaua, yumi kisim sampela gutpela kaikai moa bilong spirit.
18 Skul Tiokratik Bilong Autim Tok i bilong lainim yumi long pasin bilong skulim man. Taim yumi redim ol tok, yumi lain long pasin bilong mekim wok long Baibel bilong skulim ol man long planti kain kain tok. (1 Pita 3:15) Olsem wanem? Wanpela taim ol i bin makim yu long mekim tok long wanpela samting yu save gut long en, tasol taim yu redim tok yu lain long sampela nupela samting? Dispela samting i save painim planti brata. Taim yumi skulim narapela long wanpela tok, dispela i helpim yumi long save gut moa yet long dispela tok. Maski yumi yet i no mekim tok, yumi inap lain long kamap gutpela tisa. Yumi lukim gutpela pasin bilong olgeta wan wan sumatin bilong skul, na yumi tingim olsem wanem yumi ken bihainim ol dispela pasin.
19 Miting Bilong Wok tu i bilong helpim yumi long kamap tisa bilong Tok Bilong God. Long olgeta wik yumi harim ol gutpela tok, ol brata i toktok wantaim, na mekim ol soim i stori long ol samting bilong wok autim tok. Bai yumi mekim wanem tok long ol man bilong haus? Yumi ken mekim wanem bilong winim ol hevi bilong wok autim tok? Wanem ol rot bilong autim tok i op na ating yumi gat wok yet long lain long mekim? Wanem samting bai helpim yumi long kamap gutpela tisa moa taim yumi mekim ol gobek na Baibel-stadi? (1 Korin 9:19-22) Long Miting Bilong Wok ol i save skelim gut ol dispela kain askim. Ol i kisim planti hap bilong miting long Wok Kingdom Bilong Yumi, em wanpela narapela tul ol i redim bilong inapim yumi long mekim dispela bikpela wok bilong yumi.
20. Yumi ken mekim wanem na bai ol miting na kibung i helpim gut yumi?
20 Yumi kisim gutpela skul taim yumi redim ol tok bilong miting, na yumi go long ol miting, na bihainim ol tok yumi lain long en bilong mekim wok tisa. Tasol i no ol dispela miting tasol i skulim yumi. Yumi gat ol bikpela bung tu—ol kibung sekit na bikpela de kibung na kibung distrik—em ol i gat wok long inapim yumi long kamap tisa bilong Tok Bilong God. Na yumi amamas tru long wet long putim gut yau na bihainim ol dispela gutpela tok!—Luk 8:18.
21. Wanem samting i soim olsem wok bilong yumi long skulim ol man i karim gutpela kaikai? Husat i mekim na dispela samting i kamap?
21 Olsem wanem? Ol skul Jehova i redim i bin helpim gut ol man? Ol samting i wok long kamap i ken bekim dispela askim. Long olgeta yia, planti handet tausen manmeri i kisim save long ol bikpela tok bilong Baibel, na ol i lain long bihainim laik bilong God long i stap bilong ol. Lain bilong yumi i wok long i go bikpela, tasol i no gat wanpela bilong yumi inap tok olsem yumi yet i mekim na dispela samting i kamap. Yumi mas kisim stretpela tingting long ol samting, olsem Jisas i bin mekim. Em i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” Olsem ol aposel bilong bipo, planti bilong yumi i man nating i no bin go long ol bikpela skul. (Jon 6:44; Aposel 4:13) Jehova i mekim na wok bilong yumi i kamap gutpela—em i save kirapim ol man i gat gutpela bel na bringim ol i kam long tok i tru. Pol i tok: “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap.”—1 Korin 3:6.
22. Bilong wanem yumi no ken bel hevi tumas long mekim wok Kristen bilong yumi?
22 Em nau, God Jehova i helpim yumi long mekim wok bilong yumi olsem ol tisa bilong Tok bilong em. Ating sampela taim yumi pilim olsem yumi no gat save inap long mekim wok tisa. Tasol tingim, Jehova i save pulim ol man i kam long em na Pikinini bilong em. Long rot bilong Tok bilong em, na spirit holi bilong em, na oganaisesen bilong em long graun, Jehova yet i save inapim yumi long helpim ol dispela nupela man. Yumi mas larim Jehova i skulim yumi, na bihainim ol gutpela samting em i givim nau bilong yumi inap tru long stap olsem ol tisa bilong Tok Bilong God!
Bai Yu Bekim Olsem Wanem?
• Olsem wanem Baibel i helpim yumi long mekim wok autim tok?
• Spirit holi i mekim wanem na yumi inap tru long mekim wok bilong God?
• Long wanem ol rot oganaisesen bilong Jehova long graun i bin helpim yu long kamap man bilong autim gutnius?
• Bilong wanem yumi ken ting yumi inap tru long mekim wok autim tok?
[Piksa long pes 25]
Jisas em i tisa bilong Tok Bilong God na em i kamapim klia olsem em i laikim tru ol manmeri