Sapta 25

Tupela Man Bilong Autim Tok i Kirap Bek

 1. Strongpela ensel i tokim Jon long mekim wanem?

TAIM namba 2 bikpela hevi i no pinis yet, strongpela ensel i tokim Jon long mekim narapela wok i makim samting bilong bihain, na em i samting bilong haus bilong God. (KTH 9:12; 10:1) Jon i stori olsem: “Orait ol i givim mi stik bilong metaim ol samting, em i olsem stik bilong wokabaut, na ol i tokim mi olsem: ‘Yu kirap na metaim haus bilong God wantaim alta. Na yu kaunim namba bilong ol manmeri i save mekim lotu long dispela haus.’ ”​—KTH 11:1.

Haus Bilong God

 2. (a) Wanem narapela haus bilong God i mas i stap inap long taim bilong yumi? (b) Husat i Hetpris bilong dispela haus? Olsem wanem long Rum Tambu Tru bilong en?

² Dispela haus bilong God i no wanpela haus lotu long Jerusalem, long wanem, ol Rom i bagarapim laspela haus lotu bilong Jerusalem long yia 70. Tasol olsem aposel Pita i tok, taim dispela haus bilong God i no bagarap yet, narapela haus bilong God i kamap na em i stap inap long taim bilong yumi, em wanpela bikpela haus lotu bilong spirit. Haus lotu sel na ol narapela haus lotu long Jerusalem i bin makim dispela bikpela haus lotu bilong spirit. Dispela “em haus tru bilong God. Dispela haus ol man i no bin sanapim. Nogat. Bikpela yet i bin sanapim,” na Jisas i Hetpris bilong en, na Pol i tok, Jisas “i sindaun pinis long han sut bilong sia bilong Namba Wan King long heven.” Jehova i stap long Rum Tambu Tru bilong dispela haus lotu long heven.​—Hibru 8:​1, 2; 9:​11, 24.

 3. Long haus bilong God long bipo, (a) laplap i stap namel long Rum Tambu na Rum Tambu Tru i makim wanem samting? (b) na ol animal ol i mekim ofa long en i makim wanem samting? (c) na alta bilong wokim ofa long en i makim wanem samting?

³ I gat bikpela laplap i bin hangamap i stap namel long Rum Tambu na Rum Tambu Tru na i bilong brukim tupela olsem banis, na Pol i tok dispela laplap i makim skin bilong Jisas. Taim Jisas i givim laip bilong em olsem ofa na em i dai, dispela laplap i bruk namel, na dispela i makim olsem rot i op na Jisas inap i go long ples Jehova i stap long en long heven. Ol namba tu pris em God i makim ol na ol i lain bilong Jisas, ofa bilong Jisas i helpim ol, na sapos ol i stap gut long God i go inap long ol i dai, bihain ol inap i go insait long heven. (Matyu 27:​50, 51; Hibru 9:3; 10:​19, 20) Bipo long olgeta taim ol i save kisim ol animal na wokim ofa long haus lotu, na Pol i tok dispela i makim ofa Jisas bai mekim long bihain​—em bai givim nambawan gutpela laip bilong em olsem ofa. Na alta bilong wokim ofa long en insait long banis bilong haus lotu em i makim ol samting Jehova i mekim long laik bilong em bilong kisim ofa bilong Krais, em Krais i bin givim bilong helpim “planti manmeri,” olsem lain em God i bin makim, na bihain ol narapela sipsip​—‘ol i wetim em i kam bilong kisim bek ol.’​—Hibru 9:28; 10:​9, 10; Jon 10:16.

 4. (a) Rum Tambu i makim wanem samting? (b) Namba tu banis bilong haus bilong God i makim wanem samting?

⁴ Yumi skelim ol dispela tok na nau yumi save, Rum Tambu long haus bilong God i makim olsem Krais na bihain dispela lain 144,000 ol i stap holi taim ol i stap yet long graun na ol i no go yet long “baksait long bikpela laplap” na i go insait tru long Rum Tambu Tru, olsem heven. (Hibru 6:​19, 20; 1 Pita 2:9) Dispela samting, olsem lain 144,000 i stap holi taim ol i stap yet long graun, em i makim olsem ol i kamap pikinini bilong God. Na Jisas tu​—taim em i bin kisim baptais long wara Jordan long yia 29, God i tokaut olsem Jisas i Pikinini bilong em. (Luk 3:22; Rom 8:15) Na i gat namba tu banis bilong haus lotu na ol Israel i no pris ol inap lukim dispela hap tasol bilong haus bilong God; ol pris i save wokim ol ofa long dispela hap. Dispela ples i makim gutpela man Jisas, em i no gat sampela asua o rong samting, olsem na em inap givim em yet olsem ofa bilong helpim ol man. Na dispela ples i makim tu lain 144,000 taim ol i stap yet long graun, na ofa bilong Jisas i bin mekim ol i kamap stretpela man long ai bilong God.a​—Rom 1:7; 5:1.

Jon i Metaim Haus

 5. (a) Taim Olpela Testamen i toktok long metaim Jerusalem, dispela i makim wanem samting? (b) Esekiel i lukim ol i metaim haus bilong God, na dispela i mak bilong wanem samting?

⁵ Ensel i tokim Jon long “metaim haus bilong God wantaim alta. Na yu kaunim namba bilong ol manmeri i save mekim lotu long dispela haus.” Wanem insait bilong dispela tok? Taim ol tok profet long Olpela Testamen i toktok long metaim samting, dispela i makim pasin bilong bihainim stret nambawan gutpela lo bilong Jehova na skelim stret ol man. Taim man nogut Manase i stap king ol i metaim Jerusalem, na dispela i makim Jerusalem i mas kisim bagarap. (2 King 21:13; Krai 2:8) Tasol bihain Jeremaia i lukim ol i metaim Jerusalem, na dispela i makim olsem ol bai sanapim gen Jerusalem. (Jeremaia 31:39; lukim tu Sekaraia 2:​2-8.) Na long driman Esekiel tu i lukim ol i metaim stret olgeta samting long haus bilong God, na dispela i mak na bai ol Juda i stap kalabus long Babilon ol i ken save, trupela lotu bai kirap gen tru long as ples bilong ol, na tu, ol i mas tingim ol rong ol i bin mekim bipo, na nau ol i mas bihainim stret ol lo holi bilong God.​—Esekiel 40:​3, 4; 43:10.

 6. Jon i gat wok long metaim haus bilong God na ol pris i stap insait na mekim lotu, na ol dispela samting i makim wanem samting? Stori long dispela samting.

⁶ Olsem na taim ensel i tokim Jon long metaim haus bilong God wantaim ol pris i lotu insait long en, dispela samting i makim olsem i no gat wanpela samting inap pasim laik bilong Jehova long ol samting bilong dispela haus na ol man i stap insait long en, na klostu nau Jehova bai kamapim ol dispela laik bilong em. Olgeta samting i stap aninit pinis long lek bilong strongpela ensel bilong Jehova, olsem na nau em taim bilong “dispela maunten, haus bilong Bikpela i sanap long en, em bai i stap antap tru na i winim olgeta arapela maunten.” (Aisaia 2:​2-4) Ol lotu i gat nem Kristen ol i bin bikhet na givim baksait long God inap planti handet yia, na nau gutpela lotu bilong Jehova i mas i go antap. Na nau em taim tu bilong ol gutpela brata bilong Jisas ol i dai pinis, ol i mas kirap bek na go insait long “ples tambu tru.” (Daniel 9:24; 1 Tesalonaika 4:​14-​16; KTH 6:11; 14:4) Na i gat hap lain bilong “ol wokman” bilong God em i bin putim “mak” long ol na ol i stap yet long graun, na God i mas skelim pasin bilong ol, olsem “metaim”​—pasin bilong ol i stret long mak bilong God o nogat; pasin bilong ol i mas stret na bai ol inap kisim ples bilong i stap oltaim long haus bilong God olsem pikinini spirit bilong em. Jon i piksa bilong dispela lain, na ol i save long ol dispela lo holi ol i mas bihainim, na ol i strong long bihainim.​—KTH 7:​1-3; Matyu 13:​41, 42; Efesus 1:​13, 14; skelim wantaim Rom 11:20.

Ol Bai Krungutim Ples Bung

 7. (a) Bilong wanem i tambu long Jon i metaim ples bung? (b) Wanem taim ol i bin krungutim taun bilong God inap 42 mun? (c) Ol pris pasto bilong ol lotu ol i mekim wanem inap 42 mun na ol i no bihainim ol stretpela lo bilong Jehova?

⁷ Olsem wanem na i tambu long Jon i metaim namba tu banis? Jon i tok: “Tasol yu no ken metaim dispela ples bung i stap ausait long banis i raunim haus bilong God. Em yu mas lusim, long wanem, em ples bung bilong ol man bilong ol arapela lain, na ol dispela lain bai i kam krungutim taun bilong God i go inap long 42 mun.” (KTH 11:2) Yumi stori pinis olsem namba tu banis bilong haus bilong God i makim ol Kristen em God i bin makim ol long spirit na ol i olsem stretpela man long ai bilong God. Na dispela 42 mun em i makim 42 mun tru, kirap long Disemba 1914 na i go inap Jun 1918, em taim bilong Namba Wan Pait na long dispela taim God i skelim pasin bilong ol lain i tok ol i Kristen. Bai ol i holimpas ol stretpela lo bilong Jehova long taim bilong pait o nogat? Klostu olgeta ol i no bin mekim. Ol pris pasto i helpim ol kantri bilong ol, em namba wan wok bilong ol, na ol i no tingting liklik long bihainim lo bilong God. Klostu olgeta insait long pait em ol i bilong ol lain i gat nem Kristen, na ol pris pasto bilong ol i kirapim ol yangpela long go insait long pait. Planti milion i kisim bagarap. Long 1918 taim bikpela kot i kirap long haus bilong God, Amerika i insait pinis long pait na em tu i kapsaitim blut bilong planti man, na ol pris pasto i gat bikpela asua long blut i lus long dispela pait, na dispela blut i wetim God i bekim dispela rong. (1 Pita 4:17) God i sakim ol dispela lotu na em i makim ol bilong kisim bagarap, na em i no ken senisim tingting bilong em.​—Aisaia 59:​1-3, 7, 8; Jeremaia 19:​3, 4.

 8. Long taim bilong Namba Wan Pait, klostu olgeta Sumatin Bilong Baibel ol i save long wanem samting? Tasol ol i no klia tumas long wanem samting?

⁸ Tasol olsem wanem long liklik lain Sumatin Bilong Baibel? God bai skelim kwik ol long 1914, olsem metaim ol? Nogat. Tasol God i mas skelim na traim ol long wanpela taim, olsem em i mekim long ol narapela lotu. Olsem na God i larim “ol man bilong ol arapela lain” i mekim nogut long ol. Klostu olgeta ol i save i no stret long i go insait long pait na kilim i dai narapela man. Tasol long dispela taim ol i no klia tumas long samting ol Kristen i mas mekim, olsem helpim pait o nogat. (Maika 4:3; Jon 17:​14, 16; 1 Jon 3:15) Taim ol lain bilong graun i putim hevi long ol, sampela i pundaun.

 9. Dispela taun bilong God em ol man i krungutim, em i wanem taun? Husat lain bilong en nau ol i stap long graun?

⁹ Na olsem wanem “ol man bilong ol arapela lain . . . i kam krungutim taun bilong God”? Dispela taun i no dispela Jerusalem i bin kisim bagarap 25 yia paslain long taim Jon i raitim ol dispela tok, nogat. Dispela “taun bilong God” em Nupela Jerusalem, em narapela hap bilong Kamapim Tok Hait i stori long en. Hap lain bilong dispela taun bilong God ol i stap yet long graun, em ol dispela Kristen God i bin makim ol long spirit na i olsem ol i stap insait long namba tu banis bilong haus bilong God. Bihain ol bai go i stap long dispela taun holi long heven. Olsem na taim ol man i mekim nogut long ol, olsem krungutim ol, i olsem ol i krungutim dispela taun holi yet.​—KTH 21:​2, 9-​21.

Tupela Man Bilong Autim Tok

10. Ol witnes bilong Jehova i stap gut long em ol i mas mekim wanem long taim ol man i wok long krungutim ol?

¹⁰ Maski ol man i krungutim ol dispela lain, ol i stap yet olsem ol gutpela witnes bilong Jehova na ol i no lusim wok bilong autim tok, olsem na dispela tok profet i tok moa olsem: “ ‘Mi bai salim dispela tupela man bilong autim tok bilong mi. Tupela bai i pasim klos bilong sori, na tupela bai i autim tok bilong mi i go inap long 1,260 de.’ Dispela tupela man i olsem dispela tupela diwai oliv na tupela lam i sanap long pes bilong Bikpela bilong olgeta hap bilong graun.”​—KTH 11:​3, 4.

11. Olsem wanem ol Kristen em God i makim ol, ol i mas “pasim klos bilong sori” na autim tok?

¹¹ Ol dispela gutpela Kristen em God i bin makim ol, ol i mas inap long sanap strong long olgeta taim na no ken les, long wanem, ol i mas “pasim klos bilong sori” na ol i mas autim tok. Olsem wanem long dispela tok “pasim klos bilong sori”? Long bipo, sapos man i gat bikpela hevi, em i save kisim hap bek na pasim olsem laplap bilong sori. (Stat 37:34; Jop 16:​15, 16; Esekiel 27:31) Long bipo, sapos profet bilong God i mas tokim ol man long bikpela hevi o strafe bai painim ol, em i save “pasim klos bilong sori.” (Aisaia 3:​8, 24-​26; Jeremaia 48:37; 49:3) Na sapos man i mekim rong na God i givim strongpela tok long em na em i mekim pasin daun o tanim bel, em i save pasim klos bilong sori. (Jona 3:5) Orait, “dispela tupela man bilong autim tok” ol i “pasim klos bilong sori,” na dispela i makim olsem ol i bihainim pasin daun na ol i no les long autim strongpela tok bilong Jehova long strafe bai painim ol lain bilong dispela graun. Ol i tokaut long De bilong Jehova bilong bekim nogut long ol lain man na ol bai kisim bikpela hevi.​—Lo 32:​41-​43.

12. Olsem wanem yumi save ol i bin krungutim taun bilong God inap long ol dispela de o mun stret?

¹² Lain em Jon i piksa bilong ol, ol i mas autim dispela tok long ol man inap 1,260 de, em i olsem 42 mun, na dispela hap taim i wankain olsem hap taim ol bai krungutim taun bilong God. Jon i harim tupela kain pasin bilong makim dispela hap taim, olsem hamas mun, na hamas de, olsem na yumi ken save, ol i mas mekim dispela wok insait long dispela taim stret. Na taim de bilong Bikpela i kirap, hevi i bungim lain bilong God, na dispela hevi i stap inap long 3 na hap yia​—kirap long Disemba 1914 na i go inap long Jun 1918, na ol dispela samting i painim ol i stret wantaim dispela tok profet long ol bai krungutim taun bilong God. (KTH 1:10) Long dispela taim bipo lain bilong God i bin autim tok na tokim ol man long strafe bilong Jehova bai painim ol dispela lotu i holim nating nem Kristen na ol lain bilong dispela graun tu, na i olsem ol i “pasim klos bilong sori” taim ol i autim dispela kain tok.

13. (a) Dispela tupela man bilong autim tok i makim ol Kristen em God i bin makim ol long spirit holi, na dispela tok “tupela” i makim wanem samting? (b) Taim Jon i kolim dispela tupela man bilong autim tok olsem “tupela diwai oliv na tupela lam” yumi tingim wanem tok profet bilong Sekaraia?

¹³ Jon i tok i gat tupela man bilong autim tok, na dispela tok “tupela” i makim olsem tok ol Witnes i autim, em i stret na i gat as bilong en. (Lukim Lo 17:6; Jon 8:​17, 18.) Na Jon i tok, “dispela tupela man i olsem dispela tupela diwai oliv na tupela lam i sanap long pes bilong Bikpela bilong olgeta hap bilong graun.” Em i wankain tok olsem tok profet bilong Sekaraia, em i bin driman na lukim lam i gat 7-pela han na tupela diwai oliv. Tupela diwai oliv i makim ‘tupela man em God i bin makim,’ em Nambawan Gavman Serubabel na Hetpris Josua i sanap klostu long “Bikpela bilong olgeta hap bilong graun.”​—Sekaraia 4:​1-3, 14.

14. (a) Tupela diwai oliv long driman bilong Sekaraia i makim wanem samting? Na lam i makim wanem samting? (b) Wanem samting i mas painim liklik lain Kristen long taim bilong Namba Wan Pait?

¹⁴ Sekaraia i bin stap long taim ol i laik sanapim gen ol haus bilong taun, na tupela diwai oliv em i bin lukim long driman, i makim Jehova bai givim spirit bilong em long Serubabel na Josua, na bai tupela i ken strongim ol man long mekim dispela wok. Na taim Sekaraia i driman na i lukim lam, em i ken tingim tok bilong Jehova olsem: Sapos wok i no kamap gut hariap em i no ken bel hevi o les, long wanem, samting Jehova i laik kamapim em bai kamapim tru, olsem Jehova i tok: “Yu no inap mekim wok long strong bilong ami o long strong bilong yu yet. Nogat. Strong bilong spirit bilong mi bai i stap wantaim yu, na long dispela strong tasol bai yu mekim wok.” (Sekaraia 4:​6, 10; 8:9) Liklik lain Kristen i no les long autim tok i tru long ol man long taim bilong Namba Wan Pait, olsem kamapim lait long ol, na dispela wok i kain olsem wok bilong sanapim gen haus olsem i kamap long taim bilong Sekaraia. Ol i mas strongim narapela narapela long mekim dispela wok. Ol i no planti, olsem na ol tu i mas tingim Jehova bai strongim ol, na ol i no ken bel hevi o les sapos wok bilong ol i no kamap gut hariap.

15. (a) Tupela man bilong autim tok ol i olsem piksa na i makim liklik lain Kristen, olsem na yumi tingim wanem samting? Stori long dispela samting. (b) Tupela i gat strong long mekim wanem?

¹⁵ Long driman Jon i lukim tupela man bilong autim tok, na dispela i kirapim yumi long tingim taim bodi bilong Krais i kamap narapela kain. Long dispela samting olsem piksa, 3-pela aposel i lukim Jisas i kisim namba olsem King bilong Kingdom, na Moses tupela Elaija i kam bung wantaim em. Dispela i makim taim Jisas bai sindaun long sia king bilong em long heven long 1914 na mekim wok olsem Moses na Elaija i bin makim. (Matyu 17:​1-3) Orait, nau dispela tupela man bilong autim tok i mekim ol samting olsem Moses tupela Elaija i bin mekim. Jon i stori long tupela na i tok: “Sapos ol man i laik mekim nogut long tupela, orait paia bai i kamap long maus bilong tupela na kukim tru ol birua bilong tupela. Olsem na wanem man i laik mekim nogut long tupela, em bai i dai long dispela pasin tasol. Tupela i gat strong bilong pasim skai, bai ren i no ken pundaun long olgeta taim tupela i wok long autim tok profet bilong God.”​—KTH 11:​5, 6a.

16. (a) Jon i toktok long paia, na yumi tingim wanem samting i painim ol Israel taim ol i bikhet na sakim tok bilong Moses? (b) Olsem wanem ol pris pasto i bikhet long lain Sumatin Bilong Baibel long taim bilong Namba Wan Pait na dispela i putim hevi long dispela lain? Tasol dispela lain i mekim wanem?

¹⁶ Yumi harim dispela tok na yumi tingim taim ol Israel i sakim tok bilong Moses. Moses i bin givim strongpela tok long ol i olsem paia, na Jehova i salim paia i kam daun na kukim ol bikhetman na 250 i dai. (Namba 16:​1-7, 28-​35) Na olsem tasol ol bikman bilong ol misin ol i bin sakim tok bilong ol Sumatin Bilong Baibel, na ol i tok, ol dispela lain i no bin skul long ol bikpela skul bilong lotu na kisim “pas” olsem namba bilong mekim dispela wok. Tasol lain bilong God i gat planti “pas” i givim dispela namba long ol, winim bilong ol dispela bikman bilong misin​—ol dispela “pas” em ol planti planti manmeri i gat gutpela bel na ol i harim tok bilong Baibel em lain bilong God i autim. (2 Korin 3:​2, 3) Long 1917 ol Sumatin Bilong Baibel i wokim wanpela buk (The Finished Mystery) i gat strongpela tok bilong Kamapim Tok Hait na Esekiel. Na bihain ol i tilim 10,000,000 liklik nius (The Bible Students Monthly) i gat 4-pela pes, het-tok bilong en i olsem: “Babilon i Pundaun​—Ol Misin i Mekim Rong na Ol i Mas Kisim Strafe​—Ol Samting Bihain Bai Kamap.” Long Amerika ol pris pasto i kros long dispela buk. Long dispela taim Namba Wan Pait i stap, olsem na ol misin i kirapim gavman long tambuim dispela buk. Na gavman i mekim olsem tu long sampela ol narapela kantri. Tasol lain bilong God i wok yet long givim strongpela tok long ol misin long rot bilong wanpela nius, nem bilong en Kingdom News (Tok Bilong Kingdom), na tok bilong en i olsem paia i kukim ol. Bihain moa ol Witnes i wokim sampela buk moa i kamapim tok i klia na bai ol man i ken save ol misin i sot long ol samting bilong spirit na i olsem ol i bagarap.​—Lukim Jeremaia 5:14.

17. (a) Long taim bilong Elaija, wanem ol samting bilong bikpela san na bilong paia em i bin kamap? (b) Olsem wanem paia i kamap long maus bilong tupela man bilong autim tok? Na olsem wanem long dispela taim bilong bikpela san?

¹⁷ Na olsem wanem long Elaija? Em i bin stap long taim bilong ol king bilong lain Israel, na em i tokim ol long Jehova i kros long ol na em bai pasim ren, long wanem, ol i bin lotuim Bal. Olsem na i no gat ren inap 3 na hap yia. (1 King 17:1; 18:​41-​45; Luk 4:25; Jems 5:17) Bihain, bikhetman King Ahasia i salim sampela lain soldia bilong kisim Elaija i kam long em, na Elaija i beten long Jehova na Jehova i salim paia i kam daun na kukim ol soldia na ol i pinis. Orait, nau wanpela kepten bilong ami em i kam askim Elaija long i go wantaim em long lukim king, tasol em i mekim pasin daun long Elaija, olsem na Elaija i orait long i go wantaim em. (2 King 1:​5-​16) Na i olsem tu long 1914 i go inap 1918​—ol misin i gat nem Kristen ol i sot olgeta long ol gutpela tok na save bilong ol samting bilong spirit, na i olsem lain bilong ol i stap long taim bilong bikpela san, no gat ren. Liklik lain Witnes i tokaut long dispela samting, na ol i givim strongpela tok long ol man, olsem paia, na ol i tokim ol long strafe bai painim ol long bikpela De bilong Jehova, em De bilong mekim “olgeta manmeri i pret nogut tru.”​—Malakai 4:​1, 5; Amos 8:11.

18. (a) Tupela man bilong autim tok i kisim strong bilong mekim wanem ol samting? Olsem wanem na i kain olsem strong Moses i bin kisim? (b) Olsem wanem tupela man bilong autim tok i kamapim long ples klia giaman bilong ol misin?

¹⁸ Jon i stori moa long tupela man hia na i tok: “Na tupela i gat strong bilong mekim olgeta wara i kamap blut, na bilong mekim ol kain kain samting nogut i kamap bilong bagarapim ol manmeri bilong graun. Tupela i ken mekim ol dispela kain samting i kamap long laik bilong tupela.” (KTH 11:6b) Jehova i wok long kirapim king bilong Isip long larim ol Israel i go, na long rot bilong Moses, Jehova i salim ol samting nogut long Isip, na wanpela em ol wara i tanim i kamap blut. Sampela handet yia bihain, ol birua bilong ol Israel, em lain Filistia, ol i tingim ol samting Jehova i bin mekim long ol Isip na ol i singaut krai na i tok: “Nau bai yumi lus tru. Husat bai i helpim yumi na bai . . . dispela strongpela [God] i no inap bagarapim yumi? . . . Dispela [God] tasol i bin salim ol kain kain samting nogut i kam long ol Isip na kilim ol i dai long ples drai.” (1 Samuel 4:8; Song 105:29) Moses i makim Jisas, na Jisas i gat namba inap long kolim ol strafe God bai givim long ol bikman bilong lotu i bin stap long taim bilong em. (Matyu 23:13; 28:18; Aposel 3:22) Na long taim bilong Namba Wan Pait ol brata bilong Krais​—em dispela tupela man bilong autim tok i makim ol​—ol i autim tok na kamapim long ples klia olsem dispela “wara” ol misin i givim long lain bilong ol em i “wara” nogut na em inap kilim man i dai.

Tupela Man Bilong Autim Tok i Dai

19. Olsem Baibel i tok, wanem samting i kamap taim tupela i pinisim wok bilong ol long autim tok?

¹⁹ Tupela man hia bilong autim tok ol i pasim klos bilong sori na ol i mekim save long kamapim ol rong na giaman bilong ol misin inap 42 mun, na nau ol dispela misin i kirapim ol gavman long “kilim tupela i dai.” Jon i tok: “Taim tupela i pinisim wok bilong autim tok bilong God, orait dispela wel abus bilong hul i no gat as, em bai i lusim hul na i kam antap. Na em bai i pait long tupela. Na em bai i daunim tupela na kilim tupela i dai. Na bodi bilong tupela bai i stap long bikrot bilong dispela bikpela taun, yumi save tok bokis na kolim em olsem, Sodom na Isip. Em dispela taun tasol bipo ol i bin nilim Bikpela bilong tupela long diwai . . . na kilim em i dai. Ol man bilong olgeta kain skin na bilong olgeta kantri na bilong olgeta tok ples na bilong olgeta lain manmeri, ol bai i lukim bodi bilong tupela inap long 3 na hap de. Na ol bai i no larim ol man i planim bodi bilong tupela. Na ol manmeri bilong graun bai i amamas long lukim tupela i dai pinis, na ol bai i singsing na kaikai na givim presen long ol pren bilong ol. Long wanem, dispela tupela profet i bin givim pen nogut long olgeta manmeri i stap long graun.”​—KTH 11:​7-10.

20. “Dispela wel abus . . . i lusim hul na i kam antap,” em i wanem samting?

²⁰ Kamapim Tok Hait i kolim dispela tok “wel abus” inap 37 taim, na long KTH 11 ves 7 hia em namba wan taim. Bihain bai yumi stori moa long dispela “wel abus” na sampela animal moa. Tasol “dispela wel abus bilong hul i no gat as, em bai i lusim hul na i kam antap” em i samting bilong Satan na i makim ol wok politik.b​—Lukim Kamapim Tok Hait 13:1; Daniel 7:​2, 3, 17.

21. (a) Ol birua bilong tupela man bilong autim tok ol i mekim wanem long tupela long taim bilong pait? (b) Ol i larim skin bilong tupela i stap ples klia na ol i no planim, na dispela i makim wanem samting? (c) Olsem wanem long dispela hap taim olsem 3 na hap de? (Lukim sta i gat liklik rait, i stap long pes 168.)

²¹ Kirap long 1914 na i kam inap long 1918 ol kantri i tingting tasol long dispela Namba Wan Pait i stap long dispela taim. Olgeta man i givim bel long litimapim kantri bilong ol. Orait, long 1918 ol birua i mekim wok long dispela samting na ol i kirapim ol gavman long daunim dispela “tupela man bilong autim tok.” Ol i putim ol wasman bilong ol Sumatin Bilong Baibel long kot na sutim tok giaman long ol na tok, ol Witnes i bikhet long gavman, olsem na ol dispela brata i kalabus. Ol gutpela wanwok bilong ol i kirap nogut na ol i no strong moa long autim tok. I olsem wok bilong autim tok bilong Kingdom i dai pinis. Long bipo, sapos man i dai pinis na ol i no planim em long matmat, dispela i bagarapim nem bilong dispela man. (Song 79:​1-3; 1 King 13:​21, 22) Olsem na taim ol i larim skin bilong “tupela man bilong autim tok” i stap long ples klia na ol i no planim, dispela i semim tru tupela. Ples Palestain em i ples hat, na sapos man i dai na ol i larim skin bilong em i slip long rot na san i holim inap 3 na hap de, smel nogut bai kamap.c (Lukim Jon 11:39.) Dispela tok i makim bikpela sem “tupela man bilong autim tok” i mas karim. Ol brata i kalabus, na taim ol i apil na wetim kot, gavman i no larim ol i baim ofis, olsem beil. Ol i kalabus i stap, na olgeta man i harim, na i olsem ol i sting na smel nogut long ai bilong olgeta man “bilong dispela bikpela taun.” Dispela “bikpela taun” i makim wanem samting?

22. (a) Dispela bikpela taun i makim wanem samting? (b) Taim ol misin i “kilim” wok bilong dispela tupela man bilong autim tok na nau ol misin i amamas, ol nius i mekim wanem na i olsem ol tu i amamas? (Lukim blok.)

²² Sampela tok bilong Jon i helpim yumi long save long dispela samting. Em i tok, ol i bin kilim Jisas i dai long dispela taun, olsem na yumi tingim taun Jerusalem. Tasol Jon i tok, nem bilong taun hia em Sodom na Isip. Bipo ol i kolim Jerusalem olsem Sodom, long wanem, lain bilong en i bin mekim ol pasin i gat sem. (Aisaia 1:​8-​10; lukim tu Esekiel 16:​49, 53-​58.) Na Isip em namba wan bikpela gavman, na sampela taim em i makim pasin bilong dispela graun. (Aisaia 19:​1, 19; Joel 3:19) Olsem na “dispela bikpela taun” i makim “Jerusalem” long taim ol man bilong en i tok ol i lotuim God tasol ol i mekim pasin nogut olsem ol man bilong Sodom i bin mekim, na ol i bihainim pasin bilong dispela graun em Satan i bosim, olsem Isip. Na dispela “Jerusalem” i no bin i stap gut long God, em i makim ol lotu i holim nating nem Kristen, em ol i amamas taim ol i “kilim” wok bilong dispela tupela man bilong autim tok.

Kirap Bek!

23. (a) Taim 3 na hap de i pinis, olsem wanem long dispela tupela man bilong autim tok? Na olsem wanem long ol birua taim ol i lukim dispela samting? (b) Kamapim Tok Hait 11:​11, 12 na Esekiel i tok profet long Jehova i givim win long ol bun i drai pinis na i stap long baret, na truim bilong dispela samting i kamap long wanem taim?

²³ Ol nius i helpim ol misin long toknogutim lain bilong God. Wanpela nius i tok: “Dispela buk (The Finished Mystery) bilong ol i pinis.” Tasol nogat! Dispela tupela man bilong autim tok i kirap bek. Jon i tok: “Dispela 3 na hap de i pinis, orait God i salim win bilong laip i go insait long tupela, na tupela i kirap na i sanap. Na ol man i lukim tupela, ol i pret nogut tru. Na tupela i harim maus bilong wanpela man i singaut strong long heven na i tokim tupela olsem: ‘Yutupela kam antap long hia.’ Orait ol birua i lukim tupela i stap, na tupela i go insait long klaut na i go antap long heven.” (KTH 11:​11, 12) Esekiel tu i bin driman na i lukim wankain samting. Em i lukim wanpela baret em planti bun bilong ol man i pulap long en, na Jehova i putim win i go long ol dispela bun i drai pinis na ol i kirap na ol i kamap man i gat laip, na dispela i makim lain Israel, ol i bin stap kalabus long Babilon inap 70 yia, na nau ol i lusim kalabus, olsem kamap laip gen. (Esekiel 37:​1-​14) Truim bilong dispela tok profet long Esekiel na long Kamapim Tok Hait em i kamap long 1919 taim Jehova i kirapim lain Witnes bilong em na ol i wok strong gen long autim tok.

24. Taim tupela man bilong autim tok i kirap bek, olsem wanem long ol birua bilong ol?

²⁴ Taim tupela man bilong autim tok ol i kirap bek, ol birua i kirap nogut! Bipo tupela i dai, tasol wantu ol i kamap laip gen na ol i mekim wok gen. Ol dispela pris pasto i bel nogut long dispela samting; pastaim ol i bin wok long daunim na kalabusim ol, tasol nau ol dispela Witnes i no kalabus moa​—ol i raun mekim wok bilong ol na i no gat samting i pasim ol, na bihain moa kot i tokaut olsem ol i no gat asua, na nem bilong ol i kamap gutpela gen. Na long Septemba 1919 ol Sumatin Bilong Baibel i kibung long Sida Poin long Ohaio long Amerika, na ol birua i bel nogut tru long dispela. Pastaim J. F. Rutherford i stap kalabus, tasol bihain em i lusim kalabus na em i givim bikpela tok long ol man i bung long dispela kibung, nem bilong tok em “Autim Tok Bilong Kingdom,” na dispela tok i kirapim bel bilong ol. Em i stori long Kamapim Tok Hait 15:2 na Aisaia 52:7. Lain em Jon i piksa bilong ol, ol i kirap gen long “autim tok” long ol man. Ol i wok long kamap strong, na ol i no pret long kamapim ol giaman bilong ol misin.

25. (a) Wanem taim Jehova i bin tokim tupela man: “Yutupela kam antap long hia”? Ol i “kam antap” olsem wanem? (b) Olsem wanem long ol man bilong bikpela taun taim tupela man i kamap strong gen?

²⁵ Ol misin i traim traim planti taim long daunim gen ol Witnes olsem ol i bin mekim long 1918, tasol ol i no inap. Ol misin i kirapim ol man long paitim ol na raunim ol na putim ol long kot na kalabusim ol na kilim i dai sampela, tasol ol i stap strong yet. Bihain long 1919 “tupela man bilong autim tok,” olsem ol Witnes, ol i kamap strong long spirit na ol misin i no inap pundaunim ol gen. Long 1919 Jehova i tokim ol: “Yutupela kam antap long hia,” na i olsem ol i kamap strong long spirit na ol misin inap lukim ol, tasol ol i no inap holim ol o mekim nogut long ol moa. Dispela samting i bagarapim tru bel bilong ol man bilong bikpela taun, olsem Jon i tok: “Long dispela taim stret bikpela guria i kamap, na wanpela hap bilong taun em i bagarap, na 9-pela hap i stap yet. Na 7,000 manmeri i dai long dispela guria. Na ol manmeri i stap yet, ol i pret nogut tru na ol i litimapim nem bilong God bilong heven.” (KTH 11:13) Lain bilong ol misin ol i olsem guria na seksek taim ol Witnes i kamap strong gen. Ol bikman bilong lotu i guria long taim ol i lukim ol dispela Kristen i kirapim gen wok bilong ol. “Wanpela hap bilong taun” bilong ol misin, olsem “7,000 manmeri,” ol i pilim tru dispela senis i kamap taim ol Witnes i kirap bek na i kamap strong gen, na dispela samting i mekim bikpela senis i kamap long bel bilong ol, na i olsem ol “i dai.”

26. Dispela tok “wanpela hap bilong taun” na dispela “7,000 manmeri” long Kamapim Tok Hait 11:13 em i makim husat? Stori long dispela.

²⁶ Yumi lukim dispela tok “wanpela hap bilong taun,” na yumi tingim tok profet Aisaia i mekim long Jerusalem i mas bagarap, tasol em i tok “liklik lain,” olsem “wanpela hap bilong taun,” bai abrusim dispela bagarap na ol bai i stap olsem ‘lain holi.’ (Aisaia 6:13) Na yumi tingim Elaija, em i ting em wanpela tasol i stap gut long Jehova, tasol Jehova i tokim em long 7,000 man moa ol i no bin lotuim Bal. (1 King 19:​14, 18) Aposel Pol i tok, dispela 7,000 man i makim hap lain bilong Israel ol i harim gutpela tok bilong Krais. (Rom 11:​1-5) Ol dispela tok bilong Baibel i helpim yumi long save, dispela “wanpela hap bilong taun” na dispela “7,000 manmeri” long Kamapim Tok Hait 11:13 i makim ol man i harim tok bilong “tupela man bilong autim tok” na ol i lusim dispela “bikpela taun” i gat rong. I olsem ol i dai pinis long ai bilong ol dispela misin. Ol i rausim nem bilong ol long ol dispela misin, olsem na long ai bilong ol misin i olsem ol i no i stap moa.d

27, 28. (a) “Ol manmeri i stap yet,” ol i mekim wanem na i olsem “ol i litimapim nem bilong God bilong heven”? (b) Ol pris pasto i save long wanem samting, maski ol i no tokaut long en?

²⁷ Olsem wanem ‘ol manmeri i stap yet ol i litimapim nem bilong God’? Ol i no lusim lotu bilong ol i bin givim baksait long God, na ol i no kamap wokman bilong God. Wanpela buk (Word Studies in the New Testament bilong Vincent) i stori long dispela hap tok “litimapim nem bilong God bilong heven,” na i tok: “I no olsem man i tanim bel o em i hevi long rong em i bin mekim o em i tenkyu long God, nogat; i olsem man i save tasol long dispela. Lukim Jos 7:19; Jo 9:24; Ap 12:23; Ro 4:20.” Ol misin i bel nogut long ol Sumatin Bilong Baibel i kamap strong gen, tasol nau ol i save, God bilong ol dispela Sumatin Bilong Baibel em yet i bin helpim ol na ol i kirap gen long mekim wok Kristen bilong ol, na dispela samting God i bin mekim em i bikpela samting tru. Ol dispela misin i lukim pinis na ol i save long dispela samting, maski ol i no amamas long en.

²⁸ Ating long tingting tasol ol dispela pris pasto i tok ol i lus na God bilong ol Witnes i win, o ating namel long ol yet ol i tok olsem, tasol i no gat wanpela i tokaut long ol man na i tok, God bilong ol Witnes i bin helpim ol Witnes long kamap strong gen. Tasol tok profet bilong Jehova em Jon i kamapim, em i helpim yumi na bai yumi save long tingting i stap long bel bilong ol dispela misin, na yumi ken save, ol i bin kirap nogut long samting i bin kamap long 1919 na ol i kisim bikpela sem long en. Bihain long 1919 dispela “7,000 manmeri” i lusim ol dispela lotu, maski lotu i wok strong long pasim ol. Ol dispela lotu i ting ol dispela sipsip i bilong ol yet, tasol nau ol i mas save, God bilong ol Witnes i moa strong na i winim god bilong ol. Na bihain moa ol bai save gut long dispela samting taim planti planti sipsip moa i lusim ol. I olsem long taim Elaija i daunim ol bikman bilong god Bal long maunten Karmel, na ol man i amamas na i tok: “[Jehova] tasol em i God tru. [Jehova] tasol em i God tru.”​—1 King 18:39.

29. Jon i tok, liklik taim tasol na wanem samting bai kamap? Wanem samting moa bai painim ol dispela misin na ol bai guria tru?

²⁹ Tasol harim Jon i toktok moa: “Orait namba 2 bikpela hevi em i pinis. Tasol harim. Liklik taim tasol na namba 3 bikpela hevi bai i kamap.” (KTH 11:14) Dispela samting i bin painim ol misin long 1919, sapos dispela i bin bagarapim bel bilong ol na mekim ol i guria, orait, taim namba 3 bikpela hevi i bungim ol na namba 7 ensel i winim biugel bilong em na God i kamapim long ples klia tok hait bilong em, ol dispela misin bai mekim wanem? Ating ol bai guria moa yet, a?​—KTH 10:7.

[Ol Futnot]

[Blok long pes 168]

Dispela Amamas Long Kamapim Tok Hait 11:10

Long 1933 ol i bin kamapim wanpela buk (Preachers Present Arms) bilong Ray H. Abrams, em i stori long ol pris pasto i bel nogut long wanpela buk (The Finished Mystery) bilong ol Sumatin Bilong Baibel na em i stori long ol samting ol pris pasto i mekim bilong daunim ol Sumatin Bilong Baibel na tok bilong ol. Kot i kamap, na J. F. Rutherford na 7-pela Witnes moa i kisim bikpela kalabus. Abrams i tok, ‘Ol samting i kamap ples klia tru olsem ol misin na pris pasto i bin kirapim gavman na gavman i bin wok long pinisim lain bilong Russell (ol Sumatin Bilong Baibel). Long Februeri 1918 long Kanada ol misin i wok long daunim ol wantaim ol buk bilong ol, na dispela buk (The Finished Mystery) tu. Wanpela nius (Tribune) bilong Winipek i tok, ol pris pasto i as na gavman i tambuim dispela buk.’

Abrams i tok, ‘Taim ol man bilong raitim nius bilong ol misin i harim olsem ol dispela Witnes i mas kalabus inap 20 yia, tok bilong ol long ol dispela nius i kamapim klia tru olsem ol i amamas long dispela hevi i bin painim ol Witnes. Mi bin kaunim ol nius bilong ol na mi no lukim wanpela tok bilong ol i tok sori long ol dispela Witnes. Upton Sinclair i tok, “Tru tumas, ol bikpela misin i bel nogut long ol dispela Witnes.” Pastaim ol misin i no inap daunim ol Witnes, tasol gavman i helpim ol misin na nau ol i daunim ol Witnes.’ Abrams i kolim sampela tok bilas ol misin i bin mekim long ol Witnes, na nau em i stori long Kot Bilong Apil i senisim tok bilong kot bilong pastaim na i tok, ol Witnes i no gat rong na ol i ken lusim kalabus, na Abrams i tok, taim ol misin i harim olsem ol Witnes i winim kot, ol i pasim maus na ol i no amamas long dispela samting.

[Piksa long pes 163]

Jon i metaim haus bilong God​—lain pris em God i makim ol pinis ol i mas winim mak

[Ol Piksa long pes 165]

Serubabel na Josua i bin sanapim gen ol haus, na dispela i makim ol samting bai kamap long de bilong Bikpela​—pastaim wok i liklik, tasol bihain lain Witnes Bilong Jehova i go bikpela, olsem na ol i mas wokim ol bikpela haus olsem yu lukim hia long Bruklin long Nu Yok, na bihain moa ol i mas skruim ol dispela haus i go bikpela moa

[Ol Piksa long pes 166]

Wok bilong Moses na Elaija i olsem piksa na i makim wok tupela man bilong autim tok ol i mekim, em ol i mas autim strongpela tok bilong God i olsem paia

[Ol Piksa long pes 169]

Esekiel sapta 37 i stori long samting i painim ol bun i drai pinis, na dispela i wankain long samting i painim tupela man bilong autim tok​—ol i kisim bek strong na ol i kirap gen long autim tok