Mintlhanganu Ya Timboni Ta Yehovha Yi Nga Ku Pfunisa Ku yini?

U tshama u ya ka mintlhanganu ya Timboni ta Yehovha? Loko u nga se ya, ku pimisa hi ku ya swi nga ku yendla u chava. Swi nga yendleka u tivutisa leswi: ‘Ku yendleka yini ka mintlhanganu ya kona? Hi mhaka muni yi li ya lisima? Hi mhaka muni ni fanele ni ya?’ Ka djondzo leyi u ta vona swaku mintlhanganu yi nga ku pfunisa ku yini swaku u tshinela ka Xikwembu ni swaku yi nga ku pfunisa ku yini ka wutomi la wena la siku ni siku.

1. Hi mhaka muni Timboni ta Yehovha ti ya mintlhanganwini?

Mutsali mun’wani wa Bibele a te: “Ni ta dzunisa Yehovha ka nhlengeletanu yayikulu.” (Tipisalema 26:12) Marito lawa ma tlhamusela lisima la mintlhanganu. Phela Timboni ta Yehovha amisaveni hinkwayu ta tlhangana vhiki ni vhiki swaku ti dzunisa Xikwembu, ti yimbelela ti tlhela ti khongela. Minkama yin’wani hi lembe ti tlhangana na ti li tinyingi ka mintlhanganu yayikulu. Phela Timboni ta Yehovha ti swi rhandza hintamu ku ya mintlhanganwini.

2. U ta djondza yini ka mintlhanganu ya hina?

Ka mintlhanganu hi djondza Rito la Xikwembu naswona li ‘tlhamuseliwa kahle . . . li twisiseka.’ (Lerha Nehemiya 8:8.) Loko u ya mintlhanganwini u ta djondza hi Yehovha ni wumunhu la yena lalinene. Loko u ya u djondza hi leswi Yehovha a ku rhandzisaka xiswona, u ta ya u tshinela ka yena. U ta vona swaku a nga ku pfunisa ku yini swaku u va ni wutomi la ku tsakisa. — Esaya 48:17, 18.

3. U ta pfunekisa ku yini hi ku tiva vanhu van’wani amintlhanganwini?

Yehovha a li: “A hi hlayisaneni leswaku hi tiyisana, hi rhandzana hi tlhela hi yendla mintirho yayinene, hi nga tshikeni ku tlhangana”. (Vaheberu 10:24, 25) Ka mintlhanganu u ta tiva vanhu lava va nga ni mhaka ni van’wani hikakunene, u ta twa vanhu na va vulavula hi swilo swa ku tsakisa leswi nga ka Bibele. (Lerha Varoma 1:11, 12.) Phela ku fana na wena, vanhu lava va swi lava ku djondza hi Xikwembu. Naswona u ta tlhela u tiva vanhu va ku hambanahambana lava va nga tsaka hambileswi va kumanaka ni swikarhatu. Phela swa twala kuva Yehovha a hi byela swaku hi ya mintlhanganwini!

DJONDZA SWIN’WANI

4. Leswi yendlekaka ka mintlhanganu ya Timboni ta Yehovha

Ka nkama wa vapostolo, Vakreste a va tlhangana nkama ni nkama swaku va gandzela Yehovha. (Varoma 16:3-5) Lerhani Vakolosa 3:16, mi gama mi bula hi xivutiso lexi landzelaka:

• Ka nkama wa vapostolo, Vakreste a va mu gandzelisa ku yini Yehovha?

VHIDIYO: Ku Yentxiwa Yini Ka Yindlo Ya Wugandzeli? (2:12)

• Ka vhidiyo i mpsini leswi u nga swi vona na swi yendleka ka Yindlo ya Wugandzeli, leswi fanaka ni leswi u nga swi lerha ka Vakolosa 3:16?

• Ka vhidiyo kumbe ka mufoto lowu nga lani henhla i mpsini leswi nga ku tsakisa leswi yendliwaka mintlhanganwini?

Lerhani 2 Vakorinto 9:7, mi gama mi bula hi xivutiso lexi landzelaka:

• Hi mhaka muni Timboni ta Yehovha ti nga kombeli male ka mintlhanganu ya tona?

Wena ni lweyi a ku djondzisaka Bibele, vonani xiyimisu xa mintlhanganu leyi landzelaka.

• Hi xini xiyenge lexi u vonaka swaku xi ta ku tsakisa kumbe xi ta ku pfuna ka mintlhanganu leyi taka?

Indjhe a wu swi tiva?

Ka jw.org, u nga kuma ndhawu ni nkama wa mintlhanganu ya bandla leli u li lavaka amisaveni hinkwayu.

1. Ka mintlhanganu ya hina ku vekiwa madixkursu, minkombiso ni mavhidiyo. Mintlhanganu ya hina yi sungula yi tlhela yi gama hi lisimu ni xikhongelo

2. Ka swiyenge swin’wani swa mintlhanganu, vanhu va nga hlamula loko va swi tsakela

3. Vanhu hinkwavu va yamukeliwa ka mintlhanganu. Mindjangu, lava kalaka va nga chadanga, swivanani ni lava nga guga va nga va kona ka mintlhanganu

4. Ka mintlhanganu ya Timboni ta Yehovha, ku ngheniwa mahala funtshi a ku kombeliwi minhlengo kumbe ku sindzisiwa vanhu swaku va humesa male

5. Swi lava hi tikarhata leswaku hi ya mintlhanganwini

Vona xikombiso xa ndjangu wa Yesu. Phela lembe ni lembe a va suka hi Nazareta va ya Yerusalema ka ntlhanganu wa ku hlawuleka. Liyendzo la vona a li nga vevuki hikusa a swi lava va famba kolomu ka 100 wa makilometru, ku nga mpfhuka lowu ringanaka masiku manharhu na va famba ka switaratu leswi a swi ni maganga. Lerhani Luka 2:39-42, mi gama mi bula hi swivutiso leswi landzelaka:

• U vona swaku a swi lava va tikarhata leswaku va yendla liyendzo leli?

• Hi mhaka muni swi nga ha lavaka swaku na wena u tikarhata leswaku u ya mintlhanganwini?

• U vona swaku swa pfuna? Hi mhaka muni?

• Hi mhaka muni hi fanele hi ya mintlhanganwini nkama ni nkama?

LESWI HI NGA SWI DJONDZA

Ku ya mintlhanganwini swi ta ku pfuna swaku u djondza hi Yehovha, naswona swi ta ku pfuna swaku u kulisa wunghanu la wena na yena. Handle ka leswo, loko u ya mintlhanganwini u ta gandzela Xikwembu na u li xikan’we ni vanhu van’wani.

Ku kambela leswi hi nga swi djondza

• Hi mhaka muni Yehovha a lava swaku hi ya mintlhanganwini?

• U ta djondza yini ka mintlhanganu ya Timboni ta Yehovha?

• Ku ni minchumu yin’wani leyi u pimisaka swaku mintlhanganu yi nga ku pfuna ka yona?

LOKO U LAVA KU TIVA SWIN’WANI

Loko u pimisa hi ku ya mintlhanganwini swi nga yendleka u chava. Phela leswo swi yendlekele wanuna mun’wani, vona leswi nga mu pfuna kuva a sungula ku swi tsakela ku ya mintlhanganwini.

A Hi Nge Khohlwi Leswi Va Nga Hi Yamukelisa Xiswona (4:16)

Vona leswi nga pfuna jovhem lin’wani swaku li tsakela mintlhanganu ni swaku i mpsini leswi li nga swi yendla swaku li nga lovhi mintlhanganwini.

Ni Yi Rhandze Hintamu Mintlhanganu! (4:33)

Vona leswi vanhu van’wani va swi pimisaka hi ku ya mintlhanganwini.

“Hi Mhaka Muni Swi Li Swinene Ku Ya Mintlhanganwini Ka Yindlo Ya Wugandzeli?” (Nhlokomhaka leyi nga ka site la jw.org)

Djondza hi wanuna lweyi a a li xigevenga a tlhela a lumba ntlawa wa swigevenga. Vona swaku wutomi la yena li txintxise ku yini nkama a nga ya ka ntlhanganu wa Timboni ta Yehovha.

“A Ni Nga Humi Hi Kaya Na Ni Nga Na Xibamu” (Murindzi wa 1 ka Julho wa 2014)