Mareferensiya Ya Xibukwana Xa Mintlhanganu Ya Mahanyelo Ni Ntirho
© 2023 Watch Tower Bible and Tract Society of Pennsylvania
1 KU YA KA 7 KA JANEIRO
XUMA XI NGA KA RITO LA XIKWEMBU | YOBO 32-33
Tiyisa Lava Va Vilelaka
Perspicaz vol. 1 paj. 799
Elihu
Elihu a a nga na xikheto, funtshi nkama lowu a nga vulavula a nga vulanga swilo swa ku xonga ntsena swaku a tsakisa vanghanu va yena. Yena a a swi tiva swaku ku fana na Yobo, a yendliwe hi vumba ni swaku Yehovha Xikwembu xa Matimba Hinkwawu hi yena a nga va yendla. Elihu a a nga lavi ku chavisela Yobo, kambe leswi a nga swi vula swi kombise swaku a i li munghanu wamunene hikusa a vulavule na Yobo hi ku tirhisa vito la yena, ku nga nchumu wa ku Elifazi, Bilidadi na Zofari a va swi yendlanga. — Yb 32:21, 22; 33:1, 6.
Murindzi 15/06/14 paj. 25 mapar. 8-10
Vona Vanhu Van’wani Xileswi Yehovha A Va Vonisaka Xiswona
Lexi nga hi pfunaka ku twelawusiwana vamakwerhu i ku khumbuka swaku van’wani va vona va hele matimba hileswi va vabyaka, hileswi makaya ka vona ku nga li hinkwavu lava va nga Timboni kumbe hi mhaka depressão. Se ku khumbuka swaku na hina swi nga tshuka swi hi yendlekela swilo swa ku fana ni leswo swi nga hi pfuna ku va twela wusiwana. Hi swona leswi Yehovha a nga swi byela Vayisrayele nkama a va li kusuhi ni ku nghena ka Tiko la Xitshembiso. A va byele swaku a va fanele va va khoma kahle vamakwerhu va vona lava a va li swisiwana ni lava a va hele matimba; a va nga fanelanga va tshika ku va pfuna hikusa na vona a va hluphekile aGibita.2 — Det. 15:7, 11; Lev. 25:35-38.
9 Loko makwerhu a kumana ni swikarhatu a hi fanelanga hi mu yavanyisa hi mhaka leswi swi mu humelelaka, kambe hi fanele hi tirhisa Bibele swaku hi mu tiyisa. (Yobo 33:6, 7; Mat. 7:1) Hi xikombiso, loko munhu lweyi a fambisaka mota kumbe xithuthuthu a kumana ni nghozi a wa swi mu vavisa, loko a fika xibelhela a vadotori kumbe va enfermeiro a va zami ku lavetela swaku a ni nandzu ke hi leswi a nga wa a vavisiwa. Kambe hi xihantla va tekela ku mu pfuna swaku va mu daha. Se swi hi ku fana na hina. Loko makwerhu a kumana ni swikarhatu leswi mu yendlaka a godola ku tirhela Yehovha a xa lisima hintamu lexi hi faneleke hi xi yendla i kuva hi mu pfuna swaku a tlhela a va ni wunghanu lalinene na Yehovha. — Lerha 1 Vatesalonika 5:14.
10 Loko hi tinyika nkama wa ku pimisa hi vamakwerhu lava swi nga ha vonekaka ingi va hele matimba, hi nga vona swaku va ni lipfumelo la ku tiya, hikusa van’wani ka vona swi nga yendleka va ni maxaka lawa ma kalaka ma nga swi tsakeli ku va vona va li Timboni. Va nga ha voneka ingi a va na matimba kumbe va ni lipfumelo la ku kala li nga tiyanga, kambe a ku va va tiyisela swiyimu swa ku fana ni leswo swi kombisa swaku va ni lipfumelo la ku tiya. Hi xikombiso, pimisa hi mamani lweyi a wundlaka vana a li yexe, kambe a kotaka ku va kona mintlhanganwini nkama ni nkama. Leswo swi kombisa swaku a ni lipfumelo la ku tiya funtshi a tinyimisele ku tirhela Yehovha. Kumbe majovhem lawa ma tamaka ma tirhela Yehovha hambileswi a xikola ma xengeteliwaka ku yendla minchumu ya ku biha. Kutani loko hi tinyika nkama wa ku pimisa hi vamakwerhu va nga ka swiyimu swa ku fana ni leswo, swi nga hi yendla hi vona swaku vanhu lava va vonekaka ingi va ni lipfumelo la ku kala li nga tiyanga va ni lipfumelo la ku tiya ku fana ni vanhu lava va nga ka swiyimu swa ku yampsa ku tlula swa vona. — Yak. 2:5.
Murindzi 03/20 paj. 23 mapar. 17-18
Hi Wihi Nkama wa Wunene wa Kuvulavula?
17 Mun’wana lweyi anga pfuxela Yobo aku li Elihu, xaka la Abrahamu. Elihu a yingisele Yobo ni vavanuva lava 3 loko va vulavula. Kukomba swaku a ayingisela kahle, ankama vavanuna lava ava vulavula, a kote kupfuna Yobo kucinca mavonelo ya yena lawa ama hoxile. (Yobo 33:1, 6, 17) A xa lisima hintamu ka Elihu aku li kudzunisa Yehovha, kunga li kutidzunisa yena n’winyi kumbe munhu mun’wana. (Yobo 32:21, 22; 37:23, 24) Ka xikombiso xa Elihu, hi djondza swaku ku ni nkama wa kumiyela hi yingisela. (Yak. 1:19) Nakambe hi djondza swaku loko hi pfuna van’wana, a xa lisima hintamu ka hina kufanele kuva kutlakusa Yehovha kunga li hina.
18 Hinga kombisa swaku hayi tlangela nyiko ya kuvulavula hi kutirhisa matshinya ya minawu ya Bibele lawa mahi pfunaka kutiva nkama wa kuvulavula ni leswi hi faneleke hiswi vula. Solomoni, Hosi ya kutlhariha, hi kupfuniwa hi Xikwembu, a tsale marito lawa: “Rito leli vuliwaka hi nkama lowunene li fana ni mansaa ya woru ka xibya xa silivhere.” (Swi. 25:11) Loko hiva yingisela kahle van’wana na hingase na vulavula, marito ya hina mata fana ni mansaa ya woru. Matava ya lisima ma tlhela ma saseka. Kutani hambi loko hi vulavula hintamu kumbe hi li vanhu va kumiyela, marito ya hina mangava tiyisa van’wana ma tlhela ma tsakisa Yehovha. (Swi. 23:15; Efe. 4:29) Aku na makombiselo man’wana ya kutlangela nyiko leyi ya kuvulavula kutlula kuva hiyi tirhisela kutsakisa Xikwembu.
Lavetela Xuma Ka Rito La Xikwembu
Murindzi 15/01/13 paj. 19 par. 10
Tama U Va Kusuhi Na Yehovha
10 I swa lisima swaku hi ti hlayisa swaku muzimbha wa hina wu tshama na wu li kahle kambe a hi fanelanga hi karhateka hintamu lakakuva hi yendla minchumu ya yinyingi swaku swi nga tikombi swaku se hi gugile. Phela Bibele li vula swaku kuva munhu a gugile swi nga ha kombisa swaku i munhu wa ku xonga hi le ndzeni funtshi swi nga ha tlhela swi kombisa swaku a wupfile.Hi xikombiso loko li vulavula hi mhaka leyi Bibele li li: “Misisi ya ku basa i harhi ya ku saseka loko yi kumeka ka ndlela ya ku lulama.” (Swi. 16:31) Phela Yehovha a hi vona na hi li va lisima hintamu hina se hi nga guga; se na hina hi fanele hi tivonisa xileswi Yehovha a hi vonisaka xiswona. (Lerha 1 Pedru 3:3, 4.) Se xivutiso hi lexi: Swi nga va swinene mpela kuva hi zama ku operariwa swaku hi voneka ingi hi majovhem kuve se hi gugile? Phela ka Yehovha a xa lisima hintamu i ku va hi xongile kumbe hi va vanhu vavanene hi le ndzeni ku nga na mhaka swaku a ntanga ya hina hi yini. (Neh. 8:10) Funtshi swaku vanhu lava nga guga va tlhela va va majovhem swi ta yendleka ntsena ka misava ya nyuwani. (Yobo 33:25; Esa. 33:24) Kambe na ha ha nyimela swaku leswo swi yendleka, hi fanele hi kombisa wutlharhi hi tlhela hi va ni lipfumelo leli nga ta hi pfuna ku tama hi va kusuhi hintamu na Yehovha, na hi yendla hinkwaswu leswi hi nga swi kotaka swaku hi mu tirhela ku nga na mhaka swaku hi gugile kumbe hi majovhem. — 1 Tim. 4:8.
8 KU YA KA 14 KA JANEIRO
XUMA XI NGA KA RITO LA XIKWEMBU | YOBO 34-35
Loko Minchumu Ya Ku Biha Yi Yendleka
Murindzi N.o 1 wa 2019 paj. 8 par. 2
Xikwembu Xi Tshamise Kuyini?
Xikwembu xi yendla swilo hi wululami minkama hinkwayo. Kunene, Bibele li li: “Swi kule swinene ni Xikwembu xa ntiyiso kuyendla hi ndlela leyibiheke, ni Lweyi wa Matimba Hinkwawo kuyendla swobiha!” (Yobo 34:10) Xi yavanyisa hi wululami hi laha mutsali wa pisalema a byeleke Yehovha ha kona a ku: “Utayavanyisa vanhu hi kululama”. (Tipisalema 67:4) Leswi ‘Yehovha a langutaka mbilu’, ange kanganyisiwi hi munhu hikuva waswi kota kuvona ntiyiso ni kuyavanyisa hi ndlela ya ntiyiso. (1 Samuwele 16:7) Kuyengetela kolaho, Xikwembu xaswi tiva leswaku misava hinkwayo yi tale hi wukanganyisi ni kukala wululami naswona xi tshembisa leswaku kungali khale “lavobiha vatahelisiwa la misaveni”. — Swivuriso 2:22.
Murindzi 04/17 paj. 10 par. 5
Loko Mfumu Wa Xikwembu Wu Ta Sungula Ku Fuma, I Vamani Lava Nga Ta Helisiwa?
5 Ku ta yendleka yini hi vanhu lava yendlaka swilo swa ku biha? Swoswi Yehovha a ha nyika nkama vanhu lava hanyaka lani misaveni leswaku va txintxa. (Esa. 55:7) A nkama wa ku a va yavanyisa a wu se fika, naswona hambileswi vanhu va pimisaka swaku a misava leyi hi hanyaka ka yona hi yona yi nga ta helisiwa, Bibele li kombisa swaku vanhu va ku biha lava va hanyaka ka yona hi vona lava nga ta helisiwa, ku nga li misava leyi hi hanyaka ka yona. Se vanhu hinkwavu lava yendlaka swaku biha va ta helisiwa. (Lerha Tipisalema 37:10.) Vanhu va vanyingi namuntlha va zama ku fihla swilo leswi va swi yendlaka. Hi xikombiso, loko va yendla swilo swa ku biha leswi swi lavaka swaku va khatisiwa hi mimfumu, va yendla hinkwaswu leswi va nga swi kotaka leswaku va swi fihla ivi va nga khatisiwi hi mhaka ya swilo swoleswo. (Yobo 21:7, 9) Kambe Yehovha a hambanile ni mimfumu leyi. Bibele li vula swaku “matihlo ya Xikwembu ma vona tindlela hinkwatu ta munhu, xi vona hinkwaswu leswi a swi yendlaka. A ku na munyama kumbe ndzhuti wawukulu lani lava yendlaka swa ku biha va nga tumbelaka kona.” (Yobo 34:21, 22) Se a nga kona lweyi a nga tumbelaka swaku Yehovha a nga mu voni kumbe lweyi a nga mu kanganyisaka. Yehovha a vona swilo hinkwaswu leswi yendlekaka lani misaveni naswona loko a Armajedoni yi ta fika, vanhu hinkwavu lava yendlaka swilo swa ku biha va ta helisiwa. — Pis. 37:12-15.
Murindzi 05/21 paj. 7 mapar. 19-20
U Nga Pfumeleli Nchumu Xi Ku Tshikisa Ku Landzela Yesu
19 Ni namuntlha hi kumana ni xikarhatu lexi fanaka. Vanhu va vanyingi namuntlha a va hi rhandzi hikusa a hi li ngheneleli politika. Naswona va lava swaku hi vhota. Kambe, ha swi tiva swaku loko hi langa munhu swaku a hi fuma, hi ta va na hi yala ku fumiwa hi Yehovha. (1 Sam. 8:4-7) Leswi vanhu va vanyingi va lavaka ku hi vona na hi seketela ku yaka ka swikola, swibedlele ni ku pfuna vanhu lava nga swisiwana, va kwata hintamu loko va hi vona na hi chumayela mahungu ya ku tsakisa ku nga li ku lulamisa swikarhatu swa misava leyi.
20 I yini lexi nga hi pfunaka ku hlula xikarhatu lexo? (Lerha Matewu 7:21-23.) Xa lisima ka hina i ku yentxa ntirho lowu Yesu a nga hi rhuma swaku hi wu yentxa. (Mat. 28:19, 20) A hi fanelanga hi pfumelela swaku politika kumbe ku zama ku lunghisa swilo swa misava leyi swi hi phazamisa ku hetisisa ntirho lowu Yesu a nga hi nyika wona. Ha va rhandza vanhu, naswona hi va twela wusiwana loko va humeleliwa hi swikarhatu, kambe ndlela ya yinene ya ku va pfuna i ku va djondzisa hi Mfumu wa Xikwembu ni ku va pfuna swaku va va ni wunghanu la kusuhi na Yehovha.
Lavetela Xuma Ka Rito La Xikwembu
Murindzi 04/17 paj. 29 par. 3
Yendla Hinkwaswu Leswi U Nga Swi Kotaka Swaku U Dzunisa Yehovha
3 Nkama lowu 3 wa vanghanu va Yobo a va vulavula, Elihu a a yingisela hinkwaswu leswi va nga swi vula. Se a game a vutisa Yobo a ku: “Loko u lulamile, u xi nyika yini [Xikwembu], xi kuma yini ka leswi taka hi ka wena?” (Yobo 35:7) Hi marito lawa, Elihu a a nga lavi ku vula swona swaku minzamu leyi hi yi yendlaka swaku hi gandzela Yehovha a hi ya nchumu. Hi vula leswo hikusa loko Elihu a a pimisisa xileswo, Yehovha ina a mu lulamisile. Kambe a a lava ku vula swaku Yehovha a nga dependeri hi ku va hina hi mu gandzela, hikusa Yehovha a helelile, funtshi a ku na nchumu lexi hi nga xi yendlaka swaku hi mu nyika matimba kumbe hi yendla swaku a ganya. Ku vula ntiyiso, hi yena Yehovha lweyi a yendlaka swaku hi va ni wumunhu lalinene, a hi nyika ntamu a tlhela a hi pfuna swaku hi kota ku yendla swilo swa ku hambanahambana. Kambe minkama hinkwayu Yehovha wa swi vona leswi hi swi tirhisisaka xiswona swilo leswi a nga hi nyika swona.
15 KU YA KA 21 KA JANEIRO
XUMA XI NGA KA RITO LA XIKWEMBU | YOBO 36-37
Wa Kholwa Swaku Xikwembu Xi Ta Ku Nyika Wutomi La Ku Kala Li Nga Heli?
Murindzi 01/10/15 paj. 13 mapar. 1-2
Indjhe Swa Koteka Ku Xi Tiva Xikwembu?
XIKWEMBU XI KONA MINKAMA HINKWAYU: Bibele li djondzisa swaku Yehovha, i “Xikwembu hi masiku ni masiku.” (Tipisalema 90:2) Leswi vulaka swaku xona a xi na masungulu funtshi a xi na magamu. Se hina vanhu a hi nge swi koti ku swi twisisa leswo hi mimpimiso ya hina hikusa yi gomile. — Yobo 36:26.
Kambe ku tiva leswo swi nga hi pfunisa ku yini? Swi nga hi pfuna hikusa Xikwembu xi hi tshembisa ku hi nyika wutomi la ku kala li nga heli. (Yohani 17:3) Se loko a ku li swaku xona a xi kona minkama hinkwayu a hi nga ta kholwa ka xitshembiso xa xona. Kambe leswi hi swi tivaka swaku xona xi kona minkama hinkwayu, ha tshemba swaku ni wutomi la ku kala li nga heli xi nga hi nyika lona. — 1 Timotiya 1:17.
Waswi Tlangela Leswi Xikwembu Xingaku Nyika Swona?
6 Kuza kukumeka mati laha misaveni hi mhaka leswi misava yi kumekaka ka mpfhuka lowunene ni dlambu. Phela loko misava ayova kusuhi ni dlambu, mati amata hela hi kuvila. Loko ayova kulenyana, mati hinkwawu amata woma mava jelu, naswona misava hinkwayu ayita hamba xibuvu xa kutala hi jelu matlhelo hinkwawu. Kambe leswi Yehovha anga veka misava ka ndhawu leyinene, hi ni mati lawa ma lavekaka kuva hi hanya. Loko dlambu li hisa mati lawa manga lwandle ni ka tindhawu tin’wana ma psha ma vhaporara ma ya hamba marhefu. Loko se kuhundze kolomu ka 10 wa masiku, marhefu lawa ma gama ma va mpfula kumbe ma va mberha. Mati ya kona ma gama ma tlhelela lwandle kumbe ka tindhawu tin’wana. Swilo leswi swi tshamela kuyendleka nkama ni nkama leswaku kuva ni mpfula. Leswi yendlekaka leswaku kutshama na kuni mati, swi komba swaku Yehovha ani wutlharhi ni matimba. — Yobo 36:27, 28; Ekl. 1:7.
Murindzi 10/22 paj. 28 par. 16
Tiyisa Ntshembo Wa Wena
16 Ntshembo lowu hi nga na wona wa ku kuma wutomi la ku kala li nga heli, i xihiwa xa lisima lexi taka hi ka Xikwembu. Hi wu nyimele hintamu nkama lowu switshembiso hinkwaswu swa Yehovha swi nga ta hetiseka. Ntshembo wa hina wu fana ni nsimbi leyi tiyisaka boti. Wu hi yentxa hi tiya loko hi kumana ni swikarhatu, hi hluphiwa kumbe hi langutana ni lifu. Wona wu fana ni kapasete, wu hi vhikela ka mimpimiso ya ku biha ivi hi khomelela ka leswi nga swinene. Ntshembo wa hina lowu kumekaka ka Bibele wu hi tshineta kusuhi hintamu na Yehovha, wu tlhela wu hi komba ku kula ka lirhandzu leli Yehovha a nga na lona hi hina. Loko hi tiyisa ntshembo wa hina, Yehovha a ta hi katekisa.
Lavetela Xuma Ka Rito La Xikwembu
Perspicaz vol. 1 paj. 522
Mahungu
Aminkameni ya Bibele, a vanhu a va byela vanhu van’wani mahungu hi nomo hikusa a va nga na tindlela tin’wani ta ku yendla leswo. (2Sa 3:17, 19; Yb 37:20) Swi nga na mhaka swaku a mahungu wolawo a ma li ya ndhawu ya le kule kumbe a ma li ya lomu a va tshama kona, a va byelana hi nomo. Vanhu lava a va yendza va ya ka tindhawu tin’wani va heleketa swilo, loko va fika ka n’wandhawu va lava ku humula swaku va kuma ka ku yetlela, swakudla kumbe mati a va byela mahungu ya ndhawu leyi a va ta hi ka yona a vanhu va ndhawu leyi a va li ka yona. Leswi vanhu va África, Ásia ni Europa a va hundza hi ka tiko la Palestina loko va ya lomu a va ya kona kumbe va ta hi lomu va taka hi kona, a vanhu va Palestina a va tiva swilo swa swinyingi swa tindhawu ta ku hambanahambana. Se a mahungu ya leswi nga yendleka ku nga ha va ya lomu tikweni kumbe ya le handle a ma tolovela ku kumiwa amabazara.
22 KU YA KA 28 KA JANEIRO
XUMA XI NGA KA RITO LA XIKWEMBU | YOBO 38-39
Indjhe Wa Tinyika Nkama Wa Ku Pimisa Hi Swilo Leswi Yehovha A Nga Swi Hamba?
U Ta Nyimela Yehovha Minkama Hinkwayu?
7 Loko Bibele li vulavula hi ndlela leyi Yehovha a nga yi yentxa hi yona misava, li vula swaku ‘a yi pimile,’ a tlhela a ‘dzima,’ leswi tiyisaka misava naswona hi yena a nga “veka ribye a magamu ka yona.” (Yobo 38:5, 6) Phela Yehovha a tlhele a tinyika ni nkama wa ku kambela ntirho lowu a nga wu yentxa. (Gen. 1:10, 12) Tintsumi ti nga va ti titwise ku yini loko ti vona swaku hinkwaswu leswi Yehovha a nga swi yentxa a swi xongile? Ti tsake hintamu! Naswona Bibele li vula swaku tintsumi ti ‘kulungele hi ku tsaka.’ (Yobo 38:7) Hi djondza yini ka mhaka leyi? Swi teke malembe ya manyingi swaku Yehovha a heta ntirho lowu a a wu sungulile, kambe kuva a yentxe swilo hi kutsongokutsongo ni hi ndlela ya yinene swi pfune hintamu. Phela nkama lowu a nga heta ntirho wa yena, a vone swaku hinkwaswu leswi a nga swi yentxa “swi sasekile hintamu.” — Gen. 1:31.
Ku Pfuxiwa Ka Vafi Swi Hi Komba Ku Lehisa Mbilu, Wutlharhi Ni Lirhandzu La Xikwembu
2 Yehovha a rhange hi ku yentxa Yesu lweyi a nga gama a tirha na yena swaku va yentxa ‘swilo hinkwaswu’ kupatsa ni tintsumi. (Kol. 1:16) Phela Yesu swi mu tsakise hintamu kutirha ni Papayi wa yena. (Swi. 8:30) Tintsumi ti ti twise ku yini loko Yehovha na Yesu va yentxa matilo ni misava? Loko se ku yentxiwe misava, tintsumi ti ‘sungule kukulungela hi swidzunisu’ naswona ti tame ti ba mavoko hi ku tsaka loko tivona Yehovha a yentxa swilo swin’wana ku patsa ni vanhu. (Yobo 38:7; Swi. 8:31) Hinkwaswu leswi swi kombisa lirhandzu ni wutlharhi la Yehovha. — Pis. 104:24; Rhom. 1:20.
Djondza Hi Yehovha Ka Leswi A Nga Swi Yendla
8 Hi nga mu tshemba Yehovha. Nkama a nga bula na Yobo, Yehovha a mu pfune ku vona leswaku yena i munhu wa ku tshembeka. (Yobo 32:2; 40:6-8) Ka mabulu wolawo, Yehovha a vulavule hi minchumu yinyingi leyi a nga yi yendla ya ku fana ni tinyeleti, marhefu ni ku hatima ka tilo. A tlhele a vulavula na yena hi swiharhi swa ku fana ni homu ni kavhalu. (Yobo 38:32-35; 39:9, 19, 20) Hinkwaswu leswi swi pfune Yobo ku vona swaku Yehovha a ni matimba yamakulu swinene, i munhu wa lirhandzu naswona a ni wutlharhi swinene. Mabulu lawa Yehovha a nga va na wona na Yobo ma mu pfune kuva a mu tshemba hintamu swinene Yehovha. (Yobo 42:1-6) Swa fana na hina namuntlha, loko hi djondza hi swilo leswi Yehovha a nga swi yendla hi ta swi vona swaku hikakunene Yehovha a tlharihe swinene, a ni matimba yamakulu hintamu swinene naswona hambiloko ho kumana ni swikarhatu swa ku tikisa ku yini yena a ta hi pfuna. Leswo swi ta yendla swaku hi ya hi mu tshemba Yehovha.
Lavetela Xuma Ka Rito La Xikwembu
Perspicaz vol. 2 paj. 199
Munyiki Wa Nawu
Yehovha hi yena Munyiki wa nawu. Yehovha hi yena a nga yendla minawu leyi nga kona lani misaveni. Swilo hinkwaswu leswi yena a nga swi yendla swi landza minawu leyi a nga yi veka. (Yb 38:4-38; Ps 104:5-19) Hambi hi swiharhi na swona swi landza minawu leyi a nga yi veka. (Yb 39:1-30) Na hina vanhu hi fanele hi yingisa minawu leyi Yehovha a nga yi veka ka ntumbuluku; funtshi leswi hi kotaka ku pimisa hi tlhela hi va vanghanu va Xikwembu hi fanele hi yingisa minawu leyi Xikwembu xi nga yi veka ya leswi hi faneleke hi hanyisa xiswona. (Rm 12:1; 1Ko 2:14-16) Kambe ku nga li hina ntsena, hambi tintsumi leti nga na yena tilweni ku ni minawu leyi ti faneleke ti yi landza. — Ps 103:20; 2Pe 2:4, 11.
A minawu leyi Yehovha a nga yi veka ka swilo leswi a nga swi yendla a yi nge txintxiwi hi munhu. (Yr 33:20, 21) Phela swilo hinkwaswu leswi Yehovha a nga swi yendla swi tirha hi ku ya hi minawu leyi se a nga yi veka. Funtshi hambi hi vasiyentixta va yi tirhisa minawu yoleyo swaku va vona leswi a n’weti, maplaneta ni swilo swin’wani leswi hi kalaka hi nga swi voni leswi nga tilweni swi tirhisaka xiswona. Loko vanhu va zama ku yendla swilo leswi kalaka swi nga fambisani ni minawu yoleyo, va tshovela ku vava. Swi hi ku fana ni hi minawu leyi Xikwembu xi nga yi veka ya leswi vanhu va faneleke va hanyisa xiswona, hikusa loko hi nga yi yingisi a swilo a swi nge hi fambeli kahle hambiloko swo hlwela. Phela hi leswo swi yendlaka swaku Bibele li vula swaku “Xikwembu a hi xa ku kanganyisiwa. Lexi munhu a xi byalaka, a ta tlhela a tshovela xolexo.” — Ga 6:7; 1Tm 5:24.
29 KA JANEIRO KU YA KA 4 KA FEVEREIRO
XUMA XI NGA KA RITO LA XIKWEMBU | YOBO 40-42
Hi Djondza Yini Ka Leswi Nga Humelela Yobo?
Murindzi 15/10/10 mapaj. 3-4 mapar. 4-6
“I Mani Lweyi A Tivaka Mimpimiso Ya Yehovha?”
4 Loko hi pimisa hi leswi Yehovha a swi yendlisaka xiswona swilo, a hi fanelanga hi mu yavanyisa hi ku ya hi leswi hina hi swi tivaka kumbe hi ku ya hi leswi hina hi swi yendlisaka xiswona swilo. Phela Yehovha a tshama a hlaya swaku hina a hi nge fani na yena. (Pis. 50:21) Naswona ntivi yin’wani ya Bibele yi tsale leswi fanaka ka 175 wa malembe ni ku tlula lawa ma nga hundza. Yona yi te: “Vanhu va talisa ku yavanyisa Xikwembu hi ku ya hi minawu leyi vona va nga yi tolovela, hileswi va pimisaka swaku Xikwembu xi fanele xi kongomisiwa hi minawu ya vona.”
5 Hi fanele hi tivonela leswaku hi nga nyimeli swaku Yehovha a yendla swilo hi ku ya hi leswi hina hi swi lavaka kumbe leswi hi swi vonisaka xiswona. I swa lisima ku yendla leswo hikusa loko hi djondza Matsalwa minkama yin’wani hi mhaka ya leswi hi kalaka hi nga hetisekanga, hi nga ha pimisa swaku ndlela leyi Yehovha a nga yendla hi yona swilo yi hoxile. Hi swona leswi Vayisrayele va nga swi yendla ka nkama lowu nga hundza. A va pimisa swaku ndlela leyi Yehovha a nga va khoma hi yona a yi bihile. Se Yehovha a va byele leswi: “Kambe n’wina mi ta ku: ‘Ndlela ya Yehovha a yi lulamanga.’ Ni kombela mi yingisa, n’wina Vayisrayele. I ndlela ya mina yi kalaka yi nga lulamanga? A hi tindlela ta n’wina leti kalaka ti nga lulamanga?” — Ezek. 18:25.
6 Lexi xi nga hi pfunaka ku kala hi nga weli ka xihoxo xa ku yavanyisa Xikwembu, i ku twisisa swaku mimpimiso ya hina yi gomile ni leswaku hi ni xidjoho. Phela Yobo a a wile ka xihoxo lexo xa ku yavanyisa Xikwembu. Nkama a a hlupheka a a pimisa hi yena, a tshika ku pimisa hi swilo swin’wani leswi a swi li swa lisima ku tlula ku hlupheka ka yena, kambe Yehovha a mu pfunile hi ku mu yendla ku tlula 70 wa swivutiso leswi ni xa xin’we lexi a nga xi kota ku xi hlamula. Yehovha a mu kombile swaku mimpimiso ya yena yi tlakukile hintamu swinene ni leswaku Yobo a nge swi koti ku yi twisisa. Xa ku tsakisa hi leswaku Yobo a pfumelile ku pfuniwa naswona a txintxile mimpimiso ya yena. — Lerha Yobo 42:1-6.
Murindzi 06/17 paj. 25 par. 12
U Nga Khohlwi Swilo Swa Lisima Hintamu
12 Indjhe Yehovha a nga tikisanga hintamu hi ndlela leyi a nga vulavula hi yona na Yobo, kuve yena a a li ku hluphekeni? Ihim, Yehovha a nga mu tikiselanga, naswona hambi hi yena Yobo a nga swi vonanga na swi li ku tikiseliwa hi leswi Yehovha a nga vulavulisa xiswona, kambe yena a swi yamukelile hikusa Yehovha a kongome mhaka kambe a swi yendle hi lirhandzu. Ku kombisa swaku Yobo a a xi yamukelile xitsundzuxu lexi a xi ta hi ka Yehovha a te: “Se na tisola hi leswi ni nga swi hlaya, ni tshame ka nkuma ni ka wuthulu.” (Yobo 42:1-6) Naswona na Yehovha a nge se mu pfuna, Yobo se a a pfuniwe hi Elihu naswona a a swi yamukelile ni swoleswo. (Yobo 32:5-10) Handle ka leswo, loko Yobo se a tisolile Yehovha a swi kombisile ka vanhu van’wani swaku a a tsake hintamu hi ndlela leyi Yobo a a tshembeke hi yona. — Yobo 42:7, 8.
Murindzi 06/22 paj. 25 mapar. 17-18
“Tshemba Yehovha”
17 Yobo o va mun’we ka vanhu va Yehovha lava nga tama va tshembeka hambiloko va kumana ni swikarhatu swa swinyingi. Ka karta leli mupostolo Pawulo a nga li tsalela Vaheberu, ku tala ka vona a va vitane swaku i “rhefu la likulu la timboni.” (Heb. 12:1) Hinkwavu va kumane ni swikarhatu swa swikulu hintamu, kambe va tame va tshemba Yehovha. (Heb. 11:36-40) Ku nga va swaku ku tiyisela ku ve nyuku wa mbyana? Ihim! Hambileswi switshembiso swa Yehovha swi kalaka swi nga hetisekanga hinkwaswu ka nkama wa vona, a va tshemba swaku siku lin’wana swi ta hetiseka. (Heb. 11:4, 5) Xikombiso xa vona xi nga hi pfuna ku tama hi tshemba Yehovha.
18 Ka misava leyi hi hanyaka ka yona, wubihi lo yengeteleka siku ni siku. (2 Tim. 3:13) Sathana a nga se heta ku ringa vanhu va Yehovha. Ku nga na mhaka swaku i swikarhatu muni leswi hi nga ta kumana na swona ka nkama lowu taka, a hi tinyimiseleni ku tama hi tshembeka na hi tiva leswaku “hi tshemba Xikwembu lexi hanyaka”. (1 Tim. 4:10) Khumbuka swaku leswi Yehovha a nga mu katekisisa xiswona Yobo, swi kombisa swaku Yena “a ni ntwelawusiwana ni timpsalu.” (Yak. 5:11) Ku fana na Yobo, a hi tameni hi tshembeka ka Yehovha na hi tiyiseka swaku a ta hakela ‘lava mu lavaka hi mbilu hinkwayu.’ — Lerha Vaheberu 11:6.
Lavetela Xuma Ka Rito La Xikwembu
Perspicaz vol. 1 paj. 831
Ku Hlekiwa
Yobo a a li munhu wa ku tshembeka ka Yehovha hambileswi minkama yin’wani a a hlekiwa. Kambe a game a sungula ku tivona na a li wamunene hintamu lakakuva a phazama ka ku vulavula, leswi nga yendla swaku Elihu a za a mu laya. A te: “I mani lweyi a fanaka na Yobo, lweyi a mintaka xisolo ku fana ni loko a minta mati?” (Yb 34:7) Yobo a sungule ku karhateka hintamu hileswi vanghanu va yena vanharhu a va mu byela swona lakaku a vona swilo leswiyani swa ku biha leswi a va swi vula na swi byeliwa yena ku nga li Xikwembu. Akuva a pimisise xileswo swi yendle swaku a tivona a li munene hintamu ku tlula Xikwembu. (Yb 35:2; 36:24) Leswo swa fana ni loko munhu lweyi a pfukiwaka hi vanhu van’wanyani, handle ka ku va a miyela a tama a va hlamula lakakuva vanhu volavo va nga tshiki ku mu pfuka kambe va tama va vulavula swilo swa ku biha. Se hi swona leswi swi nga yendlekela Yobo. Leswi yena tama a a va hlamula, a a fana ni vanghanu va yena vanharhu, naswona a a swi rhandza. Kambe Yehovha a game a tlhamusela Yobo swaku vanghanu va yena a va nga lumbeti yena Yobo, kambe a va lumbeta Yehovha. (Yb 42:7) Hi leswo swi nga tlhela swi yendleka nkama Vayisrayele va nga byela Samuwele swaku a va lava swaku a va lavela hosi. Nkama lowu leswo swi nga yendleka Yehovha a mu byele swaku “a va tshikanga wena, va tshike mina swaku ni nga ha vi hosi ya vona.” (1Sa 8:7) Naswona Yesu Kreste a tlhele a byela vadjondzisiwa va yena ka khambi lin’wani a ku: “Vanhu va ta mi xanisa va tlhela va mi dlaya, naswona mi ta nyenyiwa hi matiko hinkwawu hi mhaka ya vito la mina.” (Mt 24:9) Se na hina loko hi kumana ni swikarhatu kumbe loko hi tshuka hi hlekiwa, loko hi khumbuka swaku swilo swoleswo swi yendleka hi mhaka leswi hi tirhelaka Yehovha kumbe hi mhaka leswi hi nyimelaka vito la yena, swi ta hi pfuna ku tama hi tshembeka ka yena ni ku va swi koteka swaku ka nkama lowu taka hi kuma minkateko leyi Yehovha a hi tshembisaka yona. — Lk 6:22, 23.
5 KU YA KA 11 KA FEVEREIRO
XUMA XI NGA KA RITO LA XIKWEMBU | TIPISALEMA 1-4
Seketela Mfumu Wa Xikwembu
“Ni Ta Tsekatsekisa Matiko Hinkwawu”
8 Se vanhu va titwise ku yini hi mahungu wolawo ya ku tsakisa? Ku tala ka vona va ma yala. (Lerha Tipisalema 2:1-3.) Matiko ma kwatile ma tlhela ma nga yi pfumeli Hosi leyi nga vekiwa hi Yehovha swaku yi fuma. Ka vona, mahungu ya Mfumu lawa ma chumayeliwaka a ma tsakisi. Leswo swa tikomba hikusa matiko man’wana ma nyimise ntirho wa ku chumayela! Hambileswi tihosi ta tinyingi ta matiko wolawo ti vulaka swaku ti tirhela Xikwembu, a ti swi lavi ku tshika mimfumu ya tona, kambe ti lava ku tama ti fuma. Ku fana ni leswi swi nga yentxiwa hi tihosi ta masiku ya Yesu, ni namuntlha tihosi ta matiko a ti nyimi na yena Yesu Kreste, naswona ti hlupha valandzeli va yena. — Mint. 4:25-28.
Murindzi 04/16 paj. 29 par. 11
Tshama U Tshembekile Ka Yehovha Ka Misava Leyi Ya Ku Yavana
11 Ku rhandza ku ganya. Phela loko hi rhandza hintamu swilo leswi hi nga na swona, swi nga ha hi karhatela ku tshama hi tshembekile ka Yehovha loko hi tshuka hi kumana ni swikarhatu. Leswo hi leswi makwerhu Ruti wa le Malawi a nga swi vona na swi yendlekela Timboni ta tinyingi ta Yehovha hi ma 1970 nkama ti nga hluphiwa. Yena a li: “A ku ni vamakwerhu lava a swi va karhatela ku tshika wutomi la kahle leli a va li na lona. Kambe ku sunguleni hinkwerhu a hi hlongoliwile naswona hambi vamakwerhu volavo a va sukile na hina tikweni hi ya ka tiko lin’wani. Kambe nkama hi nga fika kohala va sungule ku tipatsa ni mintlawa yin’wani ya politika leswaku va kota ku muka kaya. Ka vona a swi va karhatela ku va ni swilo swoleswiyani swaswitsongo leswi a hi li na swona, lani a hi tshama kona hinkwerhu.” Kambe swa hi tsakisa ku tiva swaku vamakwerhu va vanyingi namuntlha va ha tama va tshembeka ka Yehovha hambiloko va txonile kumbe va luzekeliwe hi swilo swa vona. — Heb. 10:34.
Lavetela Xuma Ka Rito La Xikwembu
Perspicaz vol. 2 pag. 689
Muhungu
A muhungu hi leswi a swi kumiwa loko ku phephetiwa kumbe ku huliwa tindzoho ta ku fana ni trigu ni maxalani. Hambileswi loko Bibele li vulavula hi muhungu li fanekiselaka nchumu xin’wanyani, a ntirho lowu wa ku phepheta a wu yendliwa hintamu ka nkama wolowuyani. Loko va tshovela a va phepheta tindzoho swaku va ti hambanisa ni muhungu naswona loko se ti hambanisiwe ni muhungu, muhungu lowo a wu nga ha li wanchumu naswona a va nga toloveli ku wu dla funtshi a wu voniwa na wu nchumu xa ku kala xi nga sizi nchumu lexi a xi fanele xi txukumetiwa. Se swa twala leswi Bibele li wu fanisaka ni nchumu xa ku kala xi nga sizi nchumu.
Hi nkama wolowo a va phepheta tindzoho swaku va ti hambanisa ni muhungu naswona a muhungu wolowo a wu gama wu biwa hi moya wu famba. Leswo swi swi kombisa kahle leswi Yehovha a va hambanisaka xiswona vanhu va yena ni vanhu van’wani lava va kalaka va nga mu yingisi va tlhela va djikela nhlengeletanu ya yena. (Yb 21:18; Ps 1:4; 35:5; Esa 17:13; 29:5; 41:15; Hs 13:3) Phela Yehovha a ta tirhisa Mfumu wa yena swaku a helisa vanhu volavo lava lwaka na yena, ku fana ni muhungu lowu biwaka hi moya. — Dn 2:35.
Loko se wu phephetiwile a muhungu a wu gama wu hlengeletiwa ka ndhawu yoleyi ya yin’we wu gama wu hisiwa leswaku wu nga tlheli wu biwa hi moya wu tlhela wu ta patsana ni tindzoho leti se a ti phephetiwile. Hilani ku fanaka, Yohani Mutsakamisi a profete hi ku helisiwa ka Vayuda lava a va yendla swilo swa ku biha, hi ku fanisa Yesu ni Muphepheti wamukulu lweyi a hlengeletaka trigu kambe ‘a muhungu a wu hisa hi ndzilu wa ku kala wu nga timeki.’ — Mt 3:7-12; Lk 3:17.
12 KU YA KA 18 KA FEVEREIRO
XUMA XI NGA KA RITO LA XIKWEMBU | TIPISALEMA 5-7
Tama U Tshembeka Ka Yehovha Hambiloko Van’wani Va Phazama
Murindzi 03/21 paj. 15 mapar. 7-8
Ku Lerha Bibele Swi Nga Ku Pfunisa Ku Yini Ku Tiyisela Swikarhatu?
7 Ku nga va swaku u ni munghanu kumbe xaka leli nga ku kwatisa? Loko a li kona a nga ku kwatisa u ta tsaka hintamu hi ku djondza hi xikombiso xa Absalomu n’wana wa Hosi Davhida, lweyi a nga zama ku kanganyisa papayi wa yena, a tlhela a zama ku mu tekela mfumu. — 2 Sam. 15:5-14, 31; 18:6-14.
8 1) Khongela. Khumbuka swaku i swa lisima ku byela Yehovha leswi u titwisaka xiswona hi mhaka ya leswi u nga kwatisiwa. (Pis. 6:6-9) Mu byeli kahle Yehovha leswi u titwisaka xiswona, u nga djikadjiki. U gama u mu kombela a ku pfuna ku kuma swilo leswi nga ta ku pfuna ku hlula xikarhatu lexo.
Murindzi 07/20 mapaj. 8-9 mapar. 3-4
Tiyiseka Swaku U Kume Ntiyiso
3 A lipfumelo la hina ali fanelanga li dependera hi lirhandzu leli vamakwerhu vanga lona. Hi mhaka muni? Hikusa loko hi dependera hi vamakwerhu hingaha tshuka hi wa. Hi xikombiso loko makwerhu abandleni, kungaha va doda kumbe mupfuli wa ndlela a yendla xidjoho xaxikulu na hina hingaha tshika kutirhela Yehovha. Naswona hingaha tshika kutirhela Yehovha loko hi kwatisiwa hi makwerhu bandleni kumbe loko munhu lweyi anga tshika nhlengeletanu, a sungula kuvulavula kubiha hi leswi hiswi kholwaka. Hi mhaka leyo swaku hiva ni lipfumelo la kutiya hi fanele hi tiyisa wunghanu la hina na Yehovha. Phela loko lipfumelo la wena li dependera hi leswi vanhu van’wana vaswi yendlaka, linga dependeri hi wunghanu leli unga na lona na Yehovha, alingata tiya. I ntiyiso swaku kurhandza Yehovha ni vamakwerhu swingaku pfuna kutiyisa lipfumelo la wena. Kambe xalisima hintamu i kuva uli djondza kahle Bibele, u twisisa leswi uswi djondzaka u tlhela u kambisisa akuva u tiyiseka swaku leswi uswi djondzaka hi Yehovha i ntiyiso. Leswi vulaka leswaku u fanele u tiyiseka swaku leswi Bibele lihi djondzisaka swona hi Yehovha i ntiyiso. — Rhom. 12:2.
4 Yesu a vule swaku van’wana avata yamukela ntiyiso hi “kutsaka” kambe avata godola loko va kumana ni swikarhatu. (Lerha Matewu 13:3-6, 20, 21.) Swinga yendleka vanhu volavo avangaswi tivi swaku loko va landzela Yesu avata kumana ni swikarhatu. (Mat. 16:24) Kumbe ava pimisa swaku Yehovha aatava susela swikarhatu hinkwaswu, kambe swoleswo aswinge yendleki ka misava leyi hikusa minchumu ya txintxa. Hambiloko hi tsakile, minkama yin’wana ha vaviseka. — Pis. 6:6; Ekl. 9:11.
Lavetela Xuma Ka Rito La Xikwembu
Perspicaz vol. 2 paj. 1004
Sirha
Ka Varoma 3:13, mupostolo Pawulo a vulavula hi marito lawa ma nga ka Tipisalema 5:9, loko a fananisa a minkolo ya vanhu lava va yendlaka swilo swa ku biha ni “sirha la ku pfuleka.” Hi marito lawa a a lava ku vula swaku ku fana ni leswi a sirha la ku pfuleka li nga yendleliwa ku peta vanhu lava nga fa, ni swilo leswi vuliwaka hi vanhu lava va nga ni mavulavulelo ya ku biha a swi pfuni nchumu funtshi swi yendla swaku wutomi la vanhu van’wani li va nghozini. — Vona Mt 15:18-20.
19 KU YA KA 25 KA FEVEREIRO
XUMA XI NGA KA RITO LA XIKWEMBU | TIPISALEMA 8-10
“Yehovha, Ni Ta Ku Dzunisa”!
Swi Nyiki Lisima Ku Lumba Ndjangu Wa Yehovha
6 Yehovha a hi nyike ndhawu ya ku xonga ya ku tshama ka yona. Na a nge se yentxa vanhu, Yehovha a lunghiselele misava leswaku yi va kaya la vona. (Yobo 38:4-6; Yer. 10:12) Leswi Yehovha a nga ni lirhandzu a tlhela a nyikana, a yentxe minchumu ya yinyingi ya yinene leswaku hi tikhorisa hi yona lani misaveni. (Pis. 104:14, 15, 24) A game a vona swaku hinkwaswu leswi a nga swi yentxa a swi “sasekile hintamu.” (Gen. 1:10, 12, 31) Yehovha a kombise swaku vanhu i va lisima ka yena hi ku va nyika ntirho wa ku fuma misava ni swilo hinkwaswu leswi nga kona lani misaveni. (Pis. 8:6) Phela, Yehovha a lava swaku vanhu lava kalaka va nga na xidjoho va hanya wutomi la ku tsakisa va tlhela va tsaka hi ntirho lowu a nga va nyika wona wa ku hlayisa swilo lani misaveni. Indje wa mu khensa Yehovha hi swilo hinkwaswu leswi a hi tshembisaka swona?
Murindzi 05/20 paj. 23 par. 10
Waswi Tlangela Leswi Xikwembu Xingaku Nyika Swona?
10 Hinga kombisa swaku ha mutlangela Yehovha hi nyiko ya kuvulavula, hi kudjondzisa ntiyiso wa Xikwembu ka lava kholwaka swaku swilo swiyo tiyendlekela. (Pis. 9:1; 1 Pet. 3:15) Lava djondzisaka djondzo leyi, va lava hi kholwa swaku misava ni wutomi swiyo tiyendlekela. Loko hi tirhisa Bibele ni tipontu tin’wana leti se hinga bula hi tona ka djondzo leyi hita kota kunyimela Papayi wa hina wa le matilweni, hi tlhela hi tlhamusela lavaswi tsakelaka leswihi yendlaka hi kholwa swaku Yehovha hi yena anga yendla matilo ni misava. — Pis. 102:25; Esa. 40:25, 26.
Indjhe U Xikombiso Xa Xinene Ka Ku Vulavula?
13 Yimbelela na swi suka mbilwini. Nchumu wa lisima lowu hi yentxaka hi yimbelela loko hi li mintlhanganwini i ku dzunisa Yehovha. Makwerhu lweyi a vitaniwaka Sara a nga tivoni na a yimbelela kahle kambe a swi lava hintamu ku dzunisa Yehovha hi ku yimbelela. Hi mhaka leswo, loko a li kaya na lunghiselela mintlhanganu, a tlhela a lunghiselela ni tinsimu leti ti nga ta yimbeleliwa mintlhanganwini. Nkama a lunghiselelaka a zama ku vona swaku lisimu leli a li lunghiselelaka li twananisa ku yini ni leswi nga ta djondziwa mintlhanganwini. Makwerhu Sara a li: “Ku pimisa hi leswi lisimu li swi hlayaka swi yentxa swaku ni nga vileli hi leswi rito la mina li nga tshamisa xiswona loko ni yimbelela.”
Lavetela Xuma Ka Rito La Xikwembu
Perspicaz vol. 1 paj. 664
Litiho La Xikwembu
Hi ndlela ya ku fanekisela, Bibele li vula swaku a Xikwembu xi tirhise a litiho la xona swaku xi tsala 10 Wa Minawu (Eks 31:18; Dt 9:10), xi yendla masingita (Eks 8:18, 19) xi tlhela xi vumba matilo (Ps 8:3). Leswo swi hi yendla hi kholwa swaku a litiho la Xikwembu li fanekisela a moya wa ku kwetsima wa Xikwembu. Hi nga tiyiseka hi leswo loko hi vona leswi buku la Genesa li swi vulaka hi ku tumbuluxiwa ka matilo ni misava. Lona li vula swaku na ku nge se va ni nchumu lani misaveni, a moya wa Xikwembu a wu ya hala ni hala henhla ka mati. (Gn 1:2; ntlhamuselo ya le hansi.) Ka Matsalwa ya Xigriki hi tlhela hi tlhamuseliwa kahle mhaka leyi, loko ka buku la Matewu ku vuliwa swaku Yesu a a hlongola madimoni hi ku tirhisa moya wa ku kwetsima wa Xikwembu, naswona Luka a vule swaku hinkwaswu leswo a swi yendliwa hi “litiho la Xikwembu.” — Mt 12:28; Lk 11:20.
26 KA FEVEREIRO KU YA KA 3 KA MARÇO
XUMA XI NGA KA RITO LA XIKWEMBU | TIPISALEMA 11-15
Tivoni Na Se U Hanya Ka Misava Ya Nyuwani Ya Ku Rhula
Murindzi 15/05/06 paj. 18 par. 2
Tipontu Ta Lisima Ta Buku La Tipisalema
11:3 — I masungulu wani lawa ma nga ta diliziwa? I swilo leswi nga vekiwa hi vanhu swaku swi va pfuna, ku nga minawu, leswi yendlaka swilo swi yendliwa hi nawu wa kona ni hi ku lulama. Se loko ku nga na nawu kumbe minchumu yi nga yendliwi hi ndlela ya kona ku ni mpfilumpfilu ni maguwa hintamu swinene. Se leswo swi yendla swaku minchumu yi nga yendliwi hi ku lulama. Loko hi li ka xiyimu xa ku fana ni lexo, hi fanele hi tshemba hi ku helela swaku Yehovha Xikwembu a ta hi pfuna. — Tipisalema 11:4-7.
Murindzi N.o 4 wa 2016 paj. 11
Hi Ta Hanya Ka Misava Ya Ku Kala Yi Nga Na Tinyimpi
Bibele li vula swaku Xikwembu xi ta helisa vanhu lava rhandzaka tinyimpi. Phela xona se xi veke siku ni nkama lowu xi nga ta va helisa vanhu volavo. (2 Pedru 3:5-7) Se loko vanhu lava rhandzaka tinyimpi va helisiwa, na kona ku hlupheka ku ta va na ku helile. Kambe i ntxini lexi xi nga hi tiyisekisaka swaku hikakunene Xikwembu xa swi lava ku helisa vanhu lava rhandzaka tinyimpi?
Bibele li vula swaku Xikwembu xi “nyenya mun’wani ni mun’wani lweyi a rhandzaka ku lwa [kumbe swa tinyimpi].” (Tipisalema 11:5) Xona xi rhandza ku rhula ni ku lulama. (Tipisalema 33:5; 37:28) Hi mhaka leyo, xi ta va helisa vanhu lava rhandzaka swa tinyimpi. Phela ku yo sala ka kutsongo swaku Yehovha a helisa vanhu lava rhandzaka swa ku lwa. Loko leswo swi yendleka, hi ta hanya ka misava ya ku rhula. (Tipisalema 37:11; 72:14) U swi vonisa ku yini kuva u zama ku tiva leswi u nga swi yendlaka swaku u hanya ka misava ya ku rhula?
Murindzi 08/17 paj. 7 par. 15
U Tinyimiselile Ku Lehisa Mbilu?
15 I mpsini leswi nga pfuna Davhida ku tama a lehisa mbilu? Ka buku la Tipisalema ndzima 13, Davhida a vutise Yehovha ka 4 a ku: “Anze siku muni?” Kambe ka ndzima yoleyi a tlhele a vula swaku i mpsini leswi nga mu pfuna ku tama a lehisa mbilu. Yena a te: “Phela mina, ni tshemba lirhandzu la wena; mbilu ya mina yi ta tsaka nkama u nga ta ni ponisa. Ni ta yimbelelela Yehovha, hikusa yena a ni katekisile swinene.” (Pis. 13:5, 6) Davhida a a tshemba lirhandzu leli Yehovha a a mu kombisa lona; yena a a swi vona hinkwaswu leswi Yehovha Xikwembu a a mu yendlele swona. A ku tshamela ku khumbuka swilo swoleswo a swi mu pfuna ku tama a nyimela siku leli Yehovha Xikwembu a a ta mu ponisa hi lona. A a swi tiva swaku a a ngo tihetela nkama hi ku nyimela Yehovha, siku lelo a li ta fika.
Mfumu Wa Xikwembu paj. 236 par. 16
Mfumu Wa Xikwembu Wu Yendla Ku Rhandza Ka Xona Lani Misaveni
16 Ku hanya hi ku rhula na va nga chavi nchumu. A marito lawa ma nga ka Esaya 11:6-9 ma ta hetiseka hikakunene, ku nga li hi ndlela ya ku fanekisela. Vavanuna, vavasati ni vana va ta hanya hi ku rhula na va nga chavi nchumu kun’wani ni kun’wani lomu va nga ta va kona. A ku na xiharhi lexi xi nga ta tshuka xi va dumela kumbe munhu a tshuka a va yendla xa ku biha. Phela misava hinkwayu yi ta va kaya la hina. Hi ta famba hi hlambela malwandle, ka minambu, hi famba hi djikadjika ka tintshava kumbe ndhawu yin’wani ya ku tala hi minsinya; funtshi hambi ko tshuka ku mphuma a hi nge te chava nchumu. Leswo swi ta yendleka hikusa hi ku ya hi buku la Ezekiyele 34:25, Yehovha a ta yendla swaku loko vanhu va yena va lava ku yetlela makhwatini va yetlela, loko va lava ku hanya mananga va hlayiseka koseniyani.
Lavetela Xuma Ka Rito La Xikwembu
Murindzi 15/09/13 paj. 19 par. 12
Indjhe Wena U Txintxile?
12 Vanhu vanyingi lava hi hanyaka na vona namuntlha, va fana ni lava Pawulo a nga vulavula hi vona. Vanyingi va tibyela swaku ku landza minawu i swa xikhale, naswona vapsali ni vaprofesori van’wani va vula swaku munhu mun’wani ni mun’wani a nga yendla lexi a xi lavaka ni leswaku nchumu xaxinene xi dependera hi munhu ni munhu. Munhu a nga ha hlaya swaku lexi hi xona xaxinene kambe mun’wani a nga ha hlaya swaku i nchumu xin’wani lexi xi nga xinene, hinkwaswu swi kahle. Naswona hambi hi vanhu lava va tibyelaka swaku i vakhongeli na vona va pimisa hi ndlela yoleyo. Hi mhaka leyo a va yi yingisi minawu ya Xikwembu naswona a va yi nyiki lisima. (Pis. 14:1) Hambileswi mapimiselo lawa ma nga tala namuntlha, hina Vakreste hi fanele hi fambela kule na wona hikusa leswo swi nga yendla swaku hi nga vi na mhaka ni malulamiselo lawa ma yendliwaka bandleni naswona nchumu xin’wani ni xin’wani lexi yendliwaka bandleni hi nga ha tshuka hi tibyela swaku hi mhaka muni swilo swi tshamise xiswoleswo ke; hi mani a nga hlaya swaku swoleswo swi fanele swi yendliwa. Hi xikombiso, hi nga ha hlaya leswo loko hi tshuka hi tsundzuxiwa ka ndlela leyi hi faneleke hi tlanga hi yona kumbe hi nghena ka interneti, kumbe loko hi lava ku ya univhersidadi.