Yehovha A Tshamise Ku Yini?

U pimisa swaku Yehovha i munhu wa ku tshamisa ku yini? U vona swaku a le kule na wena ku fana ni tinyeleti leti nga matilweni? Kumbe u vona swaku a hi munhu o va nchumu xa matimba xa ku fana ni ku dzindza ka tilu? Kasi i mani Yehovha? Bibele li hi byela hi wumunhu la Xikwembu, li tlhela li hi byela swaku xi ni mhaka na wena.

1. Hi mhaka muni hi nga swi koti ku vona Xikwembu?

Ka Yohani 4:24, Bibele li vula swaku “Xikwembu i munhu wa ku kala a nga voneki.” Yehovha a hi munhu wa nyama ni ngati kambe i munhu wa ku kala a nga voneki, lweyi a tshamaka matilweni ka ndhawu ya ku a hi nge swi koti ku yi vona.

2. Hi lini wumunhu la Yehovha?

I ntiyiso swaku a swi koteki ku vona Yehovha, kambe loko hi ya hi djondza hi yena hi tsumbula swaku i munhu wa ntiyiso, lweyi a nga ni wumunhu la ku hlamalisa. Bibele li li: “Yehovha a rhandza ku lulama naswona a nge va tshiki lava tshembekaka ka yena.” (Tipisalema 37:28) Naswona “Yehovha a ni ntwelawusiwana ni timpsalu,” leswi vulaka swaku wa va tsetsa vanhu ngopfungopfu lava va hluphekaka. (Yakobo 5:11) “Yehovha a kusuhi ni lava tshovekeke mbilu, wava ponisa lava pfotlokeke mbilu.” (Tipisalema 34:18) A wu swi tiva swaku leswi hi swi yentxaka swi khumba ndlela leyi Yehovha a titwaka hi yona? Loko munhu a langa ku yentxa minchumu ya ku biha a swi mu tsakisi Yehovha. (Tipisalema 78:40, 41) Kambe Yehovha wa tsaka loko munhu a langa ku yentxa leswi swi mu tsakisaka. — Lerha Swivuriso 27:11.

3. Yehovha a swi kombisisa ku yini swaku wa hi rhandza?

Nchumu wa wukulu lowu Yehovha a nga na wona i lirhandzu, hambi hi Bibele li vula swaku “Xikwembu i lirhandzu.” (1 Yohani 4:8) Hi nga vona lirhandzu la Yehovha ku nga li loko hi lerha Bibele ntsena, kambe ni ka minchumu leyi a nga yi yentxa. (Lerha Mintirho 14:17.) Hi xikombiso, pimisa hi leswi a nga hi yentxisa xiswona. A hi yentxe na hi swi kota ku vona tikori ta ku xonga, ku yingisela tinsimu ni ku dla swakudla swa ku nandzika. Phela a lava hi tsaka.

DJONDZA SWIN’WANA

4. Moya wa ku kwetsima i matimba lawa Xikwembu xi ma tirhisaka

Loko hi yentxa mintirho ya hina hi tirhisa mavoko, se Yehovha ke? A tirhisa yini? A tirhisa moya wa ku kwetsima. Bibele li vula swaku moya wa ku kwetsima a hi munhu kambe i matimba lawa Xikwembu xi ma tirhisaka swaku xi yentxa leswi xi swi lavaka. Lerhani Luka 11:13 ni Mintirho 2:17, mi gama mi bula hi swivutiso leswi landzelaka:

• Xikwembu xi “ta nyika” moya wa ku kwetsima lava va wu kombelaka. Se u vona swaku a moya wa ku kwetsima i munhu kumbe i matimba lawa Xikwembu xi ma tirhisaka? Loko u swi vonisa xileswo, hi mhaka muni?

Yehovha a tirhisa moya wa yena wa ku kwetsima swaku a yentxa minchumu ya ku hlamalisa. Lerhani Tipisalema 33:6 ni 2 Pedru 1:20, 21, mi gama mi bula hi xivutiso lexi landzelaka:

• I mpsini swin’wana leswi Yehovha a nga swi yentxa hi ku tirhisa moya wa ku kwetsima?

5. Yehovha a ni wumunhu la ku hlamalisa

Moxe a a li mutirhi wa ku tshembeka wa Xikwembu, hambileswo a a lava ku tiva swin’wana hi xona. Hi mhaka leyo, Moxe a byele Yehovha a ku: “Ni tivise tindlela ta wena, leswaku ni ta ku tiva”. (Eksoda 33:13) Se Yehovha a byele Moxe wumunhu lin’wana leli a nga na lona. Lerhani Eksoda 34:4-6, mi gama mi bula hi swivutiso leswi landzelaka:

• Hi lini wumunhu la Yehovha leli Moxe a nga li djondza?

• Hi lini wumunhu la Yehovha leli u li rhandzaka hintamu?

6. Yehovha a ni mhaka ni vanhu

A Vaheberu a va li vanhu va Yehovha ka minkama ya khale, naswona va ve swikarawa aGibita. Yehovha a titwise ku yini nkama a nga vona vanhu va yena na va hlupheka? Yingiselani AUDIYO mi tlhela mi fambisana na lona kumbe mi lerha Eksoda 3:1-10. Mi gama mi bula hi swivutiso leswi landzelaka.

AUDIYO: Yehovha A A Ni Mhaka Ni Loko A Va Vona Na Va Hlupheka (2:45)

• Mhaka leyi yi hi djondzisa yini hi leswi Yehovha a titwisaka swona loko a vona vanhu va hlupheka? — Vona tindzimana 7 ni 8.

• Wa kholwa swaku Yehovha wa swi lava ku pfuna vanhu hikakunene? Wa kholwa swaku a ni matimba ya ku swi yentxa leswo? Loko u kholwa, hi mhaka muni?

7. Minchumu hinkwayu leyi nga kona yi hi djondzisa hi wumunhu la Yehovha

Hi nga djondza hi wumunhu la Yehovha loko hi vona minchumu hinkwayu leyi a nga yi yentxa. Sixtirani VHIDIYO. Mi gama mi lerha Varoma 1:20, se mi bula hi xivutiso lexi landzelaka.

VHIDIYO: Ntumbuluku Wu Kombisa Ndlela Leyi Yehovha A Hi Rhandzaka Hi Yona — Miri Wa Munhu (1:57)

• Hi lini wumunhu la Yehovha leli u li vonaka ka minchumu leyi a nga yi yentxa?

LESWI HI NGA SWI DJONDZA

A hi nge swi koti ku vona Yehovha hikusa i munhu wa ku kala a nga voneki. A ni wumunhu la ku hlamalisa kambe la likulu ka hinkwalu i lirhandzu.

Ku kambela leswi hi nga swi djondza

• Hi mhaka muni hi nga swi koti ku vona Yehovha?

• I yini moya wa ku kwetsima?

• Hi lini wumunhu lin’wana la Yehovha?

LOKO U LAVA KU TIVA SWIN’WANA

Ku ni wumunhu lin’wana la Yehovha la lisima hintamu. Djondza hi lona ka nhlokomhaka leyi.

“Xikwembu Xi Tshamise Kuyini?” (Murindzi wa N.^o 1 wa 2019)

Vona leswi kombisaka swaku Yehovha a hi matimba lawa ma nga ka tindhawu hinkwatu.

“Xikwembu Xi Ka Tindhawu Hinkwatu Hi Nkama Wolowu Wa Wun’we?” (Nhlokomhaka leyi nga ka site la jw.org)

Vona swaku hi mhaka muni Bibele li vula swaku a moya wa ku kwetsima wu fananisiwa ni mavoko ya Xikwembu?

“Moya Wa Ku Kwetsima I Yini?” (Nhlokomhaka leyi nga ka site la jw.org)

Wanuna wa ku fa matihlo, a swi mu karhatela ku kholwa swaku Xikwembu xi ni mhaka na yena. Vona lexi nga mu pfuna swaku a txintxa mavonelo.

“Na Mina Se Na Swi Kota Ku Pfuna Van’wana” (Murindzi wa 1 ka Outubro wa 2015)