Yehovha A Tshamise Ku Yini?

U pimisa swaku Yehovha i munhu wa ku tshamisa ku yini? U vona swaku a ni matimba hintamu naswona a le kule na wena, ku fana ni leswi tinyeleti ti nga kule swinene amatilweni? Kumbe u vona swaku a hi munhu, o va ntsena nchumu xa matimba xa ku fana ni ku dzindza ka tilo? Kasi i mani Yehovha? Bibele li hi byela hi wumunhu la Xikwembu ni swaku xi ni mhaka na wena.

1. Hi mhaka muni hi nga swi koti ku vona Xikwembu?

Ka Yohani 4:24 Bibele li vula swaku “Xikwembu i Moya.” Yehovha a hi munhu wa ku fana na hina kambe i munhu lweyi a nga ni muzimbha wa ku kala wu nga voneki, lweyi a tshamaka matilweni ka ndhawu ya ku a hi nge swi koti ku yi vona.

2. Hi lini wumunhu leli Yehovha a nga na lona?

I ntiyiso swaku a hi swi koti ku mu vona Yehovha kambe loko hi ya hi djondza hi yena hi ta tsumbula swaku a kona hikakunene naswona a ni wumunhu la ku hlamalisa. Bibele li li: “Yehovha a rhandza wululami, a nge va tshiki vanhu va yena va ku tshembeka.” (Tipisalema 37:28) Naswona “Yehovha a ni ntwelawusiwana wawukulu ni timpsalu,” leswi vulaka swaku a va twela wusiwana vanhu ngopfungopfu lava hluphekaka. (Yakobe 5:11) “Yehovha a kusuhi ni lava nga tshoveka timbilu; a ponisa lava nga hetiwa matimba”. (Tipisalema 34:18) A wu swi tiva swaku leswi hi swi yendlaka swa mu khumba Yehovha? Phela loko munhu a langa ku yendla minchumu ya ku biha Yehovha wa vaviseka. (Tipisalema 78:40, 41) Kambe loko munhu a langa ku yendla minchumu yayinene Yehovha wa tsaka.  — Lerha Swivuriso 27:11.

3. Yehovha a swi kombisisa ku yini swaku wa hi rhandza?

A wumunhu la lisima hintamu leli Yehovha a nga na lona i lirhandzu. Bibele li li: “Xikwembu i lirhandzu.” (1 Yohani 4:8) Hi nga vona lirhandzu la Yehovha ku nga li loko hi lerha Bibele ntsena kambe ni ka swilo leswi a nga swi yendla. (Lerha Mintirho 14:17.) Pimisa hi leswi a nga hi yendlisa xiswona. A hi yendle na hi swi kota ku vona tikori ta ku saseka, ku yingisela mamuzika ya ku tsakisa ni ku dla swakudla swa ku nandzika; a lava swaku hi tsaka hintamu.

DJONDZA SWIN’WANI

4. Moya wa ku kwetsima i matimba ya Xikwembu

Loko hi yendla mintirho ya hina hi tirhisa mavoko. Se Xikwembu ke, xi tirhisa yini? Xi tirhisa moya wa ku kwetsima. Vanhu van’wani va pimisa swaku moya wa ku kwetsima i Xikwembu. Kambe Bibele li vula swaku moya wa ku kwetsima i matimba ya Xikwembu lawa xi ma tirhisaka swaku xi yendla leswi xi swi lavaka. Lerhani Luka 11:13 ni Mintirho 2:17, mi gama mi bula hi xivutiso lexi landzelaka:

• Hi swi vonile swaku Xikwembu xi ta ‘nyika’ moya wa ku kwetsima lava va wu kombelaka. Se u swi vonisa ku yini, moya wa ku kwetsima i Xikwembu kumbe i matimba ya Xikwembu? Hi mhaka muni u swi vonisa xileswo?

Yehovha a tirhisa moya wa yena wa ku kwetsima swaku a yendla minchumu ya ku hlamalisa. Lerhani Tipisalema 33:6 ni 2 Pedru 1:20, 21, mi gama mi bula hi xivutiso lexi landzelaka:

• I mpsini leswi Yehovha a nga tshama a swi yendla hi ku tirhisa moya wa yena wa ku kwetsima?

5. Yehovha a ni wumunhu la ku hlamalisa

Moxe a a li mutirhi wa ku tshembeka wa Yehovha, hambileswo a a lava ku djondza swin’wani hi yena. Hi mhaka leyo, a byele Yehovha a ku: “Ni byeli tindlela ta wena leswaku ni ta ku tiva”. (Eksoda 33:13) Se Yehovha a byele Moxe wumunhu la yena. Lerhani Eksoda 34:4-6, mi gama mi bula hi swivutiso leswi landzelaka:

• I mpsini leswi Moxe a nga swi djondza hi Yehovha?

• I ntxini lexi u xi rhandzaka hintamu ka leswi Yehovha a nga tshamisa xiswona?

6. Yehovha a ni mhaka ni vanhu

Vaheberu a va li vanhu va Yehovha ka minkama ya khale, naswona va ve swikarawa ka tiko la Gibita. Yehovha a titwise ku yini nkama a nga va vona na va hlupheka? Yingiselani AUDIYO mi tlhela mi fambisana na lona kumbe mi lerha Eksoda 3:1-10. Mi gama mi bula hi swivutiso leswi landzelaka.

AUDIYO: Yehovha A A Ni Mhaka Ni Loko A Va Vona Na Va Hlupheka (2:45)

• Yehovha a titwisa ku yini loko a vona vanhu va hlupheka? — Vona tindzimana 7 ni 8.

• Wa kholwa swaku Yehovha wa swi lava ku pfuna vanhu hikakunene? Wa kholwa swaku a na wona matimba ya ku yendla leswo? Loko u kholwa, hi mhaka muni?

7. Swilo leswi Yehovha a nga swi yendla swi hi djondzisa hi wumunhu la yena

Hi nga djondza hi wumunhu la Yehovha loko hi vona swilo hinkwaswu leswi a nga swi yendla. Sixtirani VHIDIYO. Mi gama mi lerha Varoma 1:20, se mi bula hi xivutiso lexi landzelaka.

VHIDIYO: Ntumbuluku Wu Kombisa Ndlela Leyi Yehovha A Hi Rhandzaka Hi Yona — Miri Wa Munhu (1:57)

• Hi lini wumunhu la Yehovha leli u li vonaka ka minchumu leyi a nga yi yendla?

LESWI HI NGA SWI DJONDZA

A hi nge swi koti ku mu vona Yehovha hikusa i Moya, yena a ni wumunhu la ku hlamalisa kambe lalikulu hintamu i lirhandzu.

Ku kambela leswi hi nga swi djondza

• Hi mhaka muni hi nga swi koti ku mu vona Yehovha?

• I yini moya wa ku kwetsima?

• Hi lini wumunhu leli Yehovha a nga na lona?

LOKO U LAVA KU TIVA SWIN’WANI

Djondza hi 4 wa wumunhu la lisima leli Yehovha a nga na lona.

“Xikwembu Xi Tshamise Kuyini?” (Murindzi wa N.° 1 wa 2019)

Vona leswi kombisaka swaku Yehovha a hi matimba lawa ma nga kona ka tindhawu hinkwatu.

“Xikwembu Xi Ka Tindhawu Hinkwatu Hi Nkama Wolowu Wa Wun’we?” (Nhlokomhaka leyi nga ka site la jw.org)

Vona swaku hi mhaka muni Bibele li fananisa moya wa ku kwetsima ni mavoko ya Xikwembu.

“Moya Wa Ku Kwetsima I Yini?” (Nhlokomhaka leyi nga ka site la jw.org)

Wanuna wa ku fa matihlo a swi mu karhatela ku kholwa swaku Xikwembu xi ni mhaka na yena. Vona leswi nga mu pfuna ku txintxa mavonelo.

“Na Mina Se Na Swi Kota Ku Pfuna Van’wana” (Murindzi wa 1 ka Outubro wa 2015)