Mareferensiya Ya Xibukwana Xa Mintlhanganu Ya Mahanyelo Ni Ntirho
© 2023 Watch Tower Bible and Tract Society of Pennsylvania
4 KU YA KA 10 KA MARÇO
XUMA XI NGA KA RITO LA XIKWEMBU | TIPISALEMA 16-17
‘Yehovha I Xihlovo Xa Mina Xa Minchumu Yayinene’
Murindzi 12/18 paj. 26 par. 11
Vampsha, Minga Tsaka Awuton’wini la N’wina
YENDLA VANGHANU LAVANENE
11 Lerha Tipisalema 16:3. Davhida aaswi tiva kuyendla vanghanu lavanene. A ahlawula vanghanu lava rhandzaka Yehovha naswona kuyendla leswo swimu nyike ‘ntsako’ wa wukulu. A avona vanghanu va yena tani hi “vakwetsimi lavanga misaveni” hikuva ava zama kuhanya hi minawu ya Yehovha ya mahanyelo lamanene. Mupisalema mun’wana a titwe hi ndlela leyi fanaka loko a vulavula hi mhaka ya kuhlawula vanghanu. A tsale leswi: “Ni munghanu wa hinkwavo lavakuchavaka, ni wa lava vahlayisaka swileriso swa wena.” (Tipisalema 119:63) Hilaha hi buleke ha kona ka djondzo leyi hundzeke, ungaswi kota kuva ni vanghanu lavanene, lava va rhandzaka va tlhela va yingisa Yehovha. Hambileswo, aswi bohi leswaku vanghanu va wena va va vanhu va ntanga ya wena.
Murindzi 15/02/14 paj. 29 par. 4
“Vona Wunene La Yehovha”
Davhida a tshame a yimbelelela Yehovha a mu byela leswi: “Hinkwaswu leswi ni nga na swona swi ta hi ka Yehovha ni minkateko leyi nga ka kopo ya mina. Wena u vhikela tshomba la mina. Ni nyikiwe tindhawu tatinene.” (Ps. 16:5, 6) Phela Davhida a a mu khensa hintamu Yehovha hileswi a a li ndhawu ya yena ya ku tumbela ka yona. Leswo swi vula swaku Davhida a a mu khensa Yehovha hileswi a a ni wunghanu lalikulu na yena funtshi a a mu khensa hileswi a a ni lunghelo la ku mu tirhela. Phela ku fana na Davhida, na hina Yehovha wa hi katekisa hambiloko hi kumana ni swikarhatu. Hi mhaka leyo, hi fanele hi swi nyika lisima hi tlhela hi swi khensa ku tirhela Yehovha ka tempele ya yena.
Murindzi 15/02/08 paj. 3 mapar. 2-3
A Hi Tameni Hi Tshemba Yehovha
2 Hinkwerhu hi nga pfuneka hintamu loko hi djondza hi swikombiso swa vanhu lava ku vulavuliwaka hintamu hi vona ka Bibele. Swa ku fana ni xa Abrahamu, Sara, Moxe, Ruti, Davhida, Estere, mupostolo Pawulo ni van’wani. Kambe hi nga tlhela hi djondza funtshi ka swikombiso swa vanhu lava ku kalaka ku nga vulavuliwi hintamu hi vona ka Bibele. Phela ku pimisa hi swikombiso swoleswi swi nga hi pfuna akuva hi yendla swilo hi ku ya hi leswi mupisalema a nga swi vula ka Tipisalema 16:8 leyi nge: “Ni tshamela ku pimisa hi Yehovha. Hikusa a le ka voko la mina la xinene, a ni nge tshuki ni tsekatsekisiwa.” Ma lava ku vula yini marito lawa?
3 A khale loko sonchwa li li ku lweni, a li tolovela ku khoma xipada hi voko la xinene. Leswo a swi yendla swaku a tlhelo leli la xinene li nga vhikeleki hikusa a li khoma a xivhikelo hi voko la ximatsi. Hambileswo, a li ta vhikeliwa ntsena loko ku ni sonchwa lin’wani leli lwaka ka tlhelo la yena la xinene. Hi ku fana, loko hi rhangisa Yehovha hi tlhela hi pimisa hi yena a ta hi vhikela.
Lavetela Xuma Ka Rito La Xikwembu
Perspicaz vol. 2 paj. 350
Ndzololo Ya Tihlo
A tihlo li ni wunyenyeti hintamu funtshi hambi hi xisisana xaxitsongo kumbe savanyana wawutsongo loko wo nghena ka lona wu za wu ya fika hala ndzeni ka lona swi nga yendla swaku li vava hintamu. A ndzololo ya tihlo yi fanele yi vhikeliwa hintamu hikusa loko yo tshuka yi vavisiwanyana swi nga yendla swaku tihlo hinkwalu li nga ha voni kahle kumbe li fa. A Bibele li vulavula hintamu hi “ndzololo ya tihlo” swaku li fanekisela a swilo leswi lavaka ku vhikeliwa hintamu. Phela hi leswi hi faneleke hi li vonisa xiswona a Bibele. (Swiv 7:2) Ka buku la Deteronoma 32:10 ku vulavuliwa hi “ndzololo ya tihlo” swaku ku tlhamuseliwa leswi Yehovha a a va hlayisisa xiswona Vayisrayele hileswi a va li vanhu va yena. Davhida a khongelile a kombela ka Yehovha swaku a mu vhikela ku fana ni “ndzololo ya tihlo.” (Ps 17:8) Hi ku yendla leswo, Davhida a a kombela swaku Yehovha a mu pfuna hi xihantla loko a hlaseliwa hi vanhu lava a va mu nyenya. — Vona Zak 2:8.
11 KU YA KA 17 KA MARÇO
XUMA XI NGA KA RITO LA XIKWEMBU | TIPISALEMA 18
“Yehovha . . . Hi Yena A Ni Ponisaka”
Murindzi 01/05/09 paj. 14 mapar. 4-5
Ku Tsaka Loku Taka Hi Ka Yehovha Hi Kona Ku Hi Vhikelaka
Bibele minkama yin’wani li fananisa Yehovha ni swilo leswi kalaka swi nga hanyi. Hi xikombiso, Bibele li vula swaku Yehovha i “Ribye la Israyele” ni “ndhawu ya ku tumbela.” (2 Samuwele 23:3; Tipisalema 18:2; Deteronoma 32:4) Kambe hi mhaka muni? Ku fana ni leswi ribye la ku tiya li kalaka li nga tsekatsekisiwi, Yehovha Xikwembu a nga va Xihlovo xa xivhikelo ka wena.
5 Buku la Tipisalema li tale hi swilo leswi tlhamuselaka wumunhu la Yehovha. Hi xikombiso, buku la Tipisalema 84:11 li vula swaku Yehovha i dlambu ni xivhikelo. Leswo swa twala hikusa Yehovha i xihlovo xa ku vonakala, wutomi ni xivhikelo. Buku la Tipisalema 121:5 li li: “Yehovha i ndzhuti ka voko la wena la xinene.” Ku fana ni leswi ndzhuti wu nga hi pfunaka swaku hi nga pshi hi mumu, Yehovha a nga vhikela vanhu va yena ka swikarhatu funtshi leswo swi fana ni loko a va hlayisa ka timpapa ta yena. — Esaya 51:16; Tipisalema 17:8; 36:7.
Perspicaz vol. 2 paj. 1219 par. 5
Rito
Yehovha wa va twa vanhu va yena loko va vulavula na yena hi xikhongelo. A vanhu lava tirhelaka Yehovha hi mbilu hinkwayu va nga khongela ka yena va kombela ku pfuniwa na va tiyiseka swaku yena a ta va twa ku nga na mhaka swaku vona va vulavula lirimi lini. Hambiloko swikhongelo swa vona va nga swi yendli hi rito la ku twala kambe va swi yendla hi ndzeni ka mbilu, Yehovha wa va twa funtshi minkama hinkwayu a tinyimisele ku swi hlamula swikhongelo swa vona. (Ps 66:19; 86:6; 116:1; 1Sa 1:13; Neh 2:4) Phela Yehovha wa va twa vanhu va yena loko va kombela ku pfuniwa loko va kumana ni swikarhatu a tlhela a twisisa leswi va titwisaka xiswona, leswi nga timbilwini ta vona. Funtshi wa va vona vanhu lava tshamelaka ku hamba maplanu swaku va va yendla swilo swa ku biha vanhu va yena. — Gen 21:17; Ps 55:18, 19; 69:33; 94:9-11; Yer 23:25.
Leswi Hi Nga Swi Yentxaka Swaku Hi Hlula Ku Vilela
2. Pimisa hi leswi Yehovha a nga tshama a ku pfunisa xiswona. Wa khumbuka ndlela leyi Yehovha a nga ku pfuna hi yona ku hlula swikarhatu leswi u nga kumana na swona? Ku pimisa hi leswi Yehovha a nga tshama a hi pfunisa xiswona khale ni leswi a nga va pfunisa xiswona vanhu va yena khale, swi hi nyika matimba swi tlhela swi hi pfuna ku tama hi mu tshemba. (Ps. 18:17-19) Makwerhu Joshua lweyi i nga doda, a te: “Ni hambe lixta la swikhongelo hinkwaswu leswi Yehovha a nga ni hlamula. Leswo swi ni pfuna ku khumbuka leswi Yehovha a nga swi hlamulisa xiswona swikhongelo swa mina leswi ni nga swi yentxa hi ku kongoma.” Ku pimisa hi leswi Yehovha se a nga hi yentxela swona, swi hi nyika ntamu swi tlhela swi hi pfuna ku hlula ku vilela.
Lavetela Xuma Ka Rito La Xikwembu
Perspicaz vol. 2 paj. 768 par. 3
Kerubu
Makerubu a ma yelana ni ku va Yehovha a li kona ka ndhawu yoleyo. Hi xikombiso, Bibele li li: “Ni ta tikombisa ka wena kolanu se ni ta khuluma na wena na ni li henhla ka tampa. Ni ta ku byela hinkwaswu leswi ni nga ta ku rhuma swona swaku u swi byela Vayisrayele na ni li xikarhi ka makerubu mambirhi lawa ma nga henhla ka areka ya Wumboni.” (Eks 25:22; Tin 7:89) Hi mhaka leyo, a ku vuliwa swaku “Yehovha a tshame henhla ka makerubu” kumbe a khwele ka makerubu. (1Sa 4:4; 2Sa 6:2; 2Tih 19:15; 1Tik 13:6; Ps 80:1; 99:1; Esa 37:16) Makerubu a ma fanekisela movha lowu Yehovha a a famba hi wona (1Tik 28:18), funtshi timpapa ta wona a ti tlhela ti yendla swaku movha lowu wu tsutsuma hintamu. Hi leswo swi nga yendla swaku ka lisimu la yena, Davhida a vula swaku Yehovha a te hi ku kahlula a ta mu pfuna na a khwele henhla ka kerubu, a haha hi “timpapa ta ntsumi.” — 2Sa 22:11; Ps 18:10.
18 KU YA KA 24 KA MARÇO
XUMA XI NGA KA RITO LA XIKWEMBU | TIPISALEMA 19-21
“Matilo Ma Twalisa Ku Dzuneka Ka Xikwembu”
Murindzi 01/01/04 paj. 8 mapar. 1-2
A Ntumbuluku Wa Mu Dzunisa Yehovha!
DAVHIDA, n’wana wa Yese a kulele kusuhi ni Betlehema naswona a a li murisi ku sukela na wa ha li mutsongo. Minkama ya yinyingi loko a risa tinyempfu ta papayi wa yena niwusiku, a hi kanakani swaku a a txuvuka matilo lawa a ma tale hi tinyeleti. A hi kanakani swaku nkama lowu a nga kongomisiwa hi moya wa ku kwetsima swaku a yimbelela marito ma nga ka Tipisalema 19 a swi khumbukile swilo swoleswo hinkwaswu. Tipisalema 19:1, 4 yi li: “Matilo ma twalisa ku dzuneka ka Xikwembu; ma huwelela ntirho wa mavoko ya xona. Kambe rito la wona li twakale misaveni hinkwayu, ni rungula la wona li fike hinkwaku amisaveni. Xi gwimbe tende amatilweni xi gwimbela dlambu.”
2 Matilo lawa ma nga yendliwa hi Yehovha a ma vulavuli kambe siku ni siku ma mu dzunisa swinene. Phela loko hi pimisa hi swilo leswi Yehovha a nga swi yendla swi hi yendla hi tivona na hi li vatsongo swinene funtshi minchumu leyi Yehovha a nga yi yendla ya mu dzunisa. Phela hina vanhu hi fanele hi mu dzunisa hintamu Yehovha hi minomo ya hina. Mun’wani lweyi a nga tsala a buku la Tipisalema a vule leswi: “Hloniphani Yehovha hi mhaka ya ku phatima ni matimba ya yena, dzunisani Yehovha hi mhaka ya vito la yena la ku phatima.” (Tipisalema 96:7, 8) Vanhu lava va nga ni wunghanu lalikulu na Yehovha va tsaka hintamu hi ku yendla leswo. Kambe i mpsini swin’wani hi faneleke hi swi yendla swaku hi dzunisa Yehovha?
Murindzi 01/06/04 paj. 11 mapar. 8-10
A Ntumbuluku Wa Mu Dzunisa Yehovha!
8 Davhida a game a vulavula hi nchumu wun’wani lowu Yehovha a nga wu yendla lowu wu mu dzunisaka. Yena a te: ‘Xi gwimbe tende amatilweni xi gwimbela dlambu; li fana ni muteki lweyi a phatimaka loko a huma kwartu ka yena. Li tsaka ku fana ni wanuna wa matimba lweyi a tsutsumaka ka mpalisanu. Li huma ka magamu ya matilo, li famba li za li ya fika ka magamu man’wani. A ku na nchumu lexi nga tumbelaka ku hisa ka lona.’ — Tipisalema 19:4-6.
9 A dlambu i litsongo hintamu loko li fanisiwa ni tinyeleti letin’wani, kambe lona i nyeleti ya ku hlamalisa hintamu leyi yi nga yikulu ku tlula maplaneta lawa ma rhendzelekelaka kusuhi na lona. A buku lin’wani li vula swaku a dlambu li ni pezu ya 99,9% loko li pimanisiwa ni maplaneta man’wani lawa ma nga kusuhi na lona. A ntamu lowu dlambu li nga na wona wu yendla leswaku misava yi tama yi rhendzelekela na yi nga tshineli kusuhi ni dlambu kumbe ku chovanyana ndzhaku, hambileswi yi nga ka mpfhuka wa kolomu ka 150 milhões wa makilometru ni dlambu. Phela a ku hisa ka dlambu loku fikaka lani misaveni i kutsongo swinene, kambe hi kona ku yendlaka swaku swilo leswi nga kona lani misaveni swi tama swi hanya.
10 Davhida a vulavule hi dlambu hi ndlela ya ku fanekisela. A vule swaku li fana ni “wanuna wa matimba” lweyi a tsutsumaka ninhlikanhi, se niwusiku a fika a humula ka tende. Loko dlambu li pela swo fana ni loko li nghena ka tende swaku li humula, se nimixo loko li xa li fana ni muteki loko a huma hi ka kwartu la yena. Leswi Davhida a a li murisi a a swi tiva swaku niwusiku minkama yin’wani a ku titimela swinene. (Genesa 31:40) A a khumbuka leswi dlambu a li mu kufumetisa xiswona hi xihantla ni swilo swin’wani. Swa tikomba swaku a dlambu a li nga karhali hi ku suka wuxeni li ya wupeladlambu ku fana ni wanuna lweyi a tsutsumaka a suka ka ndhawu yin’wani a ya ka yin’wani na a nga karhali.
Khindlimuka! 08/11/95 paj. 7 par. 3
Muyendli Wa Swilo Lweyi A Kalaka A Nga Nyikiwi Lisima
Loko hi swi nyika lisima swilo leswi nga kona ka ntumbuluku, swi nga hi pfuna hintamu kuva hi mu tiva ku yampsa Yehova Muyendli wa swona, hikusa swilo swoleswo leswi a nga swi yendla swi kola kusuhi na hina. Khambi lin’wani Yesu a byele vadjondzisiwa va yena swaku va djondza ka maflori lawa a ma tolovela ku kula aGalileya. Yena a vule leswi: “Djondzani ka leswi swiluva leswi vitaniwaka makhon’wa swi kulisaka xiswona; a swi tirhi naswona a swi rhungi mpahla, kambe na mi byela swaku hambi Solomoni lweyi a a ni minchumu ya yinyingi ya ku saseka, a nga zanga a yambala ku fana ni xin’we xa swona.” (Matewu 6:28, 29) Phela ku pimisa hi leswi maflori lawa ma vitaniwaka makhon’wa ma nga xongisa xiswona, swi hi khumbukisa swaku Yehovha a nge tsandzeki ku hi hlayisa hina vanhu.
Lavetela Xuma Ka Rito La Xikwembu
Minawu Ya Yehovha
Tiyiseka swaku minawu ya Yehovha ya ku pfuna. Hinkwaswu leswi Yehovha a ku byelaka swaku u swi yentxa swa ku pfuna. Hinkwavu lava yingisaka minawu ya Yehovha va tshama va tsakile ka wutomi la vona. (Pis. 19:7-11) Kambe lava kalaka va nga hanyi hi minawu ya Yehovha va hlupheka swinene hi mhaka ya mahanyelo ya vona ya ku biha. Vona leswi Elie, wanuna lweyi a nga kulisiwa hi vapsali lava rhandzaka Yehovha a nga swi vula hi ku tshika ku hanya hi minawu ya Yehovha. Nkama na a ya a kula a ve ni vanghanu va ku biha lava nga mu yentxa a sungula ku dzaha timbangi, a va ni mahanyelo ya ku biha a tlhela a yiva. Yena a vula swaku a sungule ku kala a nga ha hlweli ku kwata a tlhela a holovisa vanhu. Funtshi hinkwaswu leswi a nga djondzisiwa hi vapsali va yena na a ha li mutsongo a a nga ha swi yentxi. Kambe Elie a nga swi khohlwanga hinkwaswu leswi vapsali va yena va nga mu djondzisa na a ha li mutsongo. Hi mhaka leyo, a tlhele a sungulisa ku djondza Bibele a tlhela a txintxa mahanyelo ya yena naswona a tsakamisiwile hi 2000. Se ku hanya hi leswi Bibele li swi vulaka swi mu pfunise ku yini Elie? Yena a vula leswi: “Swoswi ni ni ku rhula, funtshi lipfalu la mina a la ha ni karhati.” Xikombiso xa Elie, xi hi djondzisa swaku loko hi nga yi yingisi minawu ya Yehovha hi ta hlupheka. Xi tlhela xi hi djondzisa swaku minkama hinkwayu Yehovha a tinyimisele ku hi pfuna loko hi lava ku txintxa mahanyelo ya hina.
25 KU YA KA 31 KA MARÇO
XUMA XI NGA KA RITO LA XIKWEMBU | TIPISALEMA 22
Bibele Se A Li Swi Vulile Swaku Yesu A A Ta Fisa Ku Yini
Murindzi 15/08/11 paj. 15 par. 16
Hi Kume Mesiya!
16 Hi ku ya hi wuprofeta li nga ka Bibele, Mesiya a a ta tshikiwa hi Xikwembu. (Lerha Tipisalema 22:1.) Hi ku ya hi wuprofeta lolelo “hi ma 15, Yesu a huwelela hi rito la le henhla a ku: ‘Eli, Eli, lama sabaktani?’ leswi loko swi hundzuluxeliwa swi vulaka swaku: ‘Xikwembu xanga, Xikwembu xanga, u ni tshikele yini?’” (Mar. 15:34) Phela leswo a swi vuli swaku Yesu a a yo heleliwa hi lipfumelo ka Papayi wa yena Yehovha, kambe ku va a vule swaku Xikwembu xi mu tshikile a swi tlhamusela swaku Yehovha a tshike Yesu ka mavoko ya valala va yena a tlhela a nga mu vhikeli leswaku a ku tshembeka ka yena ku ringiwa hi ku helela. Se, hi nga vula na hi tiyiseka swaku leswi Yesu a nga swi vula nkama na a li kusuhi ni ku fa a swo hetisisa wuprofeta leli nga ka Tipisalema 22:1.
Murindzi 15/08/11 paj. 15 par. 13
Hi Kume Mesiya!
13 Davhida a profete swaku Mesiya a a ta rhuketeliwa. (Lerha Tipisalema 22:7, 8.) Yesu a rhuketeliwile nkama lowu a a li ka mhandzi ya nxaniso hikusa Matewu a te: “Kutani lava hundzaka hi ndlela va sungula ku mu rhuketela ni ku hlakahla tinhloko va ku: ‘Wena lweyi a wu ku u nga diliza tempele u tlhela u yi yaka hi masiku manharhu, tiponise ka! Loko u li n’wana wa Xikwembu, xika ka mhandzi ya nxaniso!’ Na vona vaprista vavakulu ni vatsali ni madoda va sungula ku mu poyilela va ku: ‘A ponise van’wani kambe yena a nga swi koti ku tiponisa! I Hosi ya Israyele, a a xiki swoswi ka mhandzi ya nxaniso, kutani hi ta kholwa ka yena!’ A tshembe Xikwembu; a xi mu ponise swoswi loko xi mu rhandza, hikusa a te: ‘Mina ni N’wana wa Xikwembu.’” (Mat. 27:39-43) Hambileswi Yesu a nga kumana ni swilo leswi hinkwaswu a tiyiselile hi ku tshembeka. Phela Yesu i xikombiso xaxinene ka hina!
Murindzi 15/08/11 paj. 15 par. 14
Hi Kume Mesiya!
14 A ku ta hoxiwa swiribyani swaku masonchwa ma yavelana mpahla ya Mesiya. Mupisalema a tsale leswi: “Va yavelane tinguvu ta mina, naswona va hoxe swiribyani swaku va yavelana mpahla ya mina.” (Ps. 22:18) Phela wuprofeta leli li hetisekile ka Yesu hikakunene, hikusa “nkama [masonchwa] ma nga mu gongondzela ka mhandzi, ma hoxe swiribyani swaku ma yavelana mpahla ya yena.” — Mat. 27:35; lerha Yohani 19:23, 24.
Lavetela Xuma Ka Rito La Xikwembu
Murindzi 01/11/06 paj. 29 par. 7
Kombisa Swaku Wa Yi Hlonipha Mintlhanganu
7 Ku ni leswi hi nga swi yendlaka swaku hi kombisa swaku ha yi hlonipha mintlhanganu. Xin’wani hi nga xi yendlaka i ku va hi fika hi nkama swaku hi yimbelela tinsimu ta Mfumu. Ku tala ka tona ti tsaliwe ingaku i swikhongelo, hi mhaka leyo swi lava hi ti yimbelela hi xihlonipho tinsimu leti. Na a vulavula hi marito ya Tipisalema 22, mupostolo Pawulo a vule leswi hi Yesu: “Ni ta vula vito la wena ka vamakwerhu; ni ta ku dzunisa hi lisimu xikarhi ka nhlengeletanu.” (Vaheberu 2:12) Hi mhaka leyo, na mintlhanganu yi nge se sungula, hi fanele hi tshamiseka ka tindhawu ta hina funtshi nkama lowu hi yimbelelaka hi fanele hi pimisa hi leswi marito ya lisimu ma vulaka swona. Nkama lowu hi yimbelelaka hi lava hi ku titwa ku fana ni leswi mupisalema a nga titwisa xiswona nkama lowu a nga te: “Ni ta dzunisa Yehovha hi mbilu ya mina hinkwayu lani ntlawa wa vanhu va ku lulama wu hlengeletanaka kona.” (Tipisalema 111:1) A hi kanakani swaku ku yimbelelela Yehovha i xivangelo xa ku twala lexi faneleke xi hi yendla hi hantla hi fika mintlhanganwini hi tlhela hi tshama anze yi hela.
Murindzi 01/09/03 paj. 20 par. 1
Dzunisa Yehovha Amintlhanganwini
Ninamuntlha nhlengeletanu ya Yehovha yi lunghiselela mintlhanganu leswaku hi vula leswi hi titwisaka xiswona loko hi li bandleni. Hi xikombiso, hi pfulekeliwa hi nkama wa ku yendla leswo loko hi nyikela tinhlamulu ta swivutiso leswi yendliwaka loko hi li mintlhanganwini ya bandla. Phela u nga swi tekeli hansi ku hlamula loko u li mintlhanganwini. A tinhlamulu leti u nga ti nyikelaka ta leswi u nga swi hlulisa xiswona swikarhatu leswi u nga kumana na swona, ti nga yendla leswaku vamakwerhu van’wani na vona va tinyimisela ku tama va tirhisa leswi va swi djondzaka ka Bibele. Funtshi loko ka tinhlamulu ta hina hi tlhamusela ndzimana ya Bibele kumbe hi vula swilo swin’wani leswi hi nga swi pexkizara hi ndzimana yoleyo, swi nga yendla leswaku ni vamakwerhu van’wani lava va hi yingiselaka va navela ku ya va li djondza hintamu Bibele swaku va li twisisa.
1 KU YA KA 7 KA ABRIL
XUMA XI NGA KA RITO LA XIKWEMBU | TIPISALEMA 23-25
“Yehovha I Murisi Wa Mina”
Murindzi 01/05/11 paj. 31 par. 3
“Yehovha I Murisi Wa Mina”
Yehovha wa ti kongomisa tinyempfu ta yena. Loko tinyempfu ti nga na murisi ti nga lahleka hi ku vevuka. Hi ku fana, na hina hi lava ku pfuniwa swaku hi kuma ndlela ya wutomi. (Yeremiya 10:23) Hi lani Davhida a vulaka hi kona Yehovha a kongomisa vanhu va yena ka ‘tindhawu ta ku humula ka tona leti regariwaka kahle; ‘a hi kongomisa ka tindlela ta ku lulama.’ (Tipisalema 23:2, 3) Leswi Davhida a vulavulaka hi swona ka tindzimana leti, leswi murisi a swi yendlaka ka tinyempfu ta yena swi hi pfuna ku vona swaku hi nga xi tshemba Xikwembu. Loko hi yingisa leswi Yehovha a hi byelaka swona ka Bibele hi ta va ni wutomi la ku tsakisa hi tlhela hi titwa na hi vhikelekile.
Murindzi 01/05/11 paj. 31 par. 4
“Yehovha I Murisi Wa Mina”
Yehovha wa ti vhikela tinyempfu ta yena. A tinyempfu loko ti nga na murisi wa tona kusuhi ta chava funtshi a ti xi tivi ni xa ku xi yendla. Kambe Yehovha a vula swaku a vanhu va yena a va fanelanga va chava “hambiloko vo famba ka nkova lowu nga mphuma hintamu,” leswi vulaka swaku hambiloko va kumana ni swikarhatu awuton’wini a va fanelanga va chava. (Tipisalema 23:4) Yehovha wa va hlayisa vanhu va yena funtshi minkama hinkwayu a tinyimisele ku va pfuna. Yena a nga nyika vanhu va yena wutlharhi ni ntamu lowu va wu lavaka swaku va tiyisela swikarhatu leswi va kumanaka na swona. — Vafilipiya 4:13; Yakobe 1:2-5.
Murindzi 01/05/11 paj. 31 par. 5
“Yehovha I Murisi Wa Mina”
Yehovha wa ti hlayisa tinyempfu ta yena. Swaku ti kota ku dla a tinyempfu ti nyimele ku heleketiwa lani ku nga ni byanyi hi murisi wa tona. Hina vanhu hi yendliwe na hi ni ku navela kakukulu ka ku va vanghanu va Xikwembu, funtshi ku navela koloko hi ngo pfuniwa hi Xikwembu ntsena swaku hi kota ku ku yenelisa. (Matewu 5:3) Lexi tsakisaka hi leswaku Yehovha wa nyikana funtshi wa hi hlayisa. Yena a va lunghiselela meza wa ku tala hi swakudla lava va mu tirhelaka. (Tipisalema 23:5) A Bibele ni mabuku ya nhlengeletanu ku patsa ni revhixta leli u li lerhaka, i swakudla leswi Yehovha a swi lunghiselelaka leswi swi hi pfunaka ku tiva swaku hi hanyela yini ni swaku hi xini xikongomelo xa Xikwembu hi hina vanhu.
Lavetela Xuma Ka Rito La Xikwembu
Murindzi 15/02/11 paj. 24 mapar. 1-3
Rhandza Swa Ku Lulama Hi Mbilu Ya Wena Hinkwayu
YEHOVHA a tirhisa Bibele ni moya wa yena wa ku kwetsima swaku a kongomisa vanhu va yena ka “tindlela ta ku lulama.” (Ps. 23:3) Kambe leswi hi nga ni xidjoho a hi minkama hinkwayu swi hi vevukelaka ku tama hi famba ka ndlela yoleyo; hi tshuka hi phazama. Se swi lava minzamu yayikulu swaku hi tama hi famba ka ndlela ya ku lulama. Lexi nga ta hi pfuna i ku va hi tekelela Yesu: Hi rhandza swa ku lulama. — Lerha Tipisalema 45:7.
2 I yini “tindlela ta ku lulama”? Tindlela leti i minawu ya Yehovha ya ku lulama. Hi Xiheberu ni hi Xigriki rito “wululami” li vula nchumu xaxinene, leswi vulaka ku yi yingisa hi ku helela minawu ya mahanyelo. Leswi Yehovha a nga ndhawu ya ku tshama ka yona ya ku lulama, lava mu tirhelaka va mu pfumelela swaku a vula minawu leyi vona va faneleke va hanya hi yona. — Yer. 50:7.
3 Leswaku hi mu tsakisa hi ku helela Yehovha hi fanele hi tinyimisela ku hanya hi ku ya hi minawu ya yena. (Det. 32:4) Leswaku leswo swi koteka hi fanele hi djondza hi Yehovha ka Rito la yena, ku nga Bibele. Se loko hi ya hi mu tiva ku yampsa Yehovha hi tlhela hi va kusuhi hintamu na yena, hi ta ya hi swi rhandza hintamu swilo swa ku lulama. (Yak. 4:8) Xin’wani hi faneleke hi xi yendla i ku va hi yingisa nkongomiso wa Yehovha lowu a hi nyikaka wona hi ku tirhisa Rito la yena ku nga Bibele, nkama lowu hi yendlaka swiboho swa lisima hintamu awuton’wini.
8 KU YA KA 14 KA ABRIL
XUMA XI NGA KA RITO LA XIKWEMBU | TIPISALEMA 26-28
Davhida A Yendle Yini Swaku A Tama A Tshembeka Ka Yehovha?
Murindzi 01/12/04 paj. 14 mapar. 8-9
A Hi Fambeni Hi Ku Tshembeka
8 Davhida a khongelile a ku: “Yehovha Xikwembu xa mina, ni kambisise u ni kambela; basisa mimpimiso ya mina ni mbilu ya mina.” (Tipisalema 26:2) Mimpimiso yi nyimela leswi munhu a swi pimisaka ni leswi a titwisaka xiswona hi le ndzeni kambe mbilu yi nyimele munhu wa le ndzeni, leswi susumetelaka munhu swaku a yendla xanchumu ni leswi a titwisaka xiswona. Nkama Davhida a nga khongela a kombela Yehovha swaku a mu kambisisa a a lava swaku leswi yena a a swi pimisa ni leswi a a titwisa xiswona swi kambeliwa hi ku helela.
9 Davhida a khongelile a kombela swaku mimpimiso ya yena ni mbilu ya yena swi basisiwa. Kasi Yehovha a hi basisisa ku yini? Davhida a yimbelelile a ku: “Ni ta dzunisa Yehovha, lweyi a ni layaka. Hambi niwusiku mimpimiso ya mina ya ni laya.” (Tipisalema 16:7) Davhida a a lava ku vula yini hi marito lawa? A a lava ku vula swaku switsundzuxu swa Yehovha swi mu khumbe hi ku helela swi tlhela swi tsakisa mbilu ya yena, swi lulamisa leswi Davhida a a titwisa xiswona ni leswi a a pimisa swona. Phela na hina swi nga hi yendlekela leswo loko hi swi nyika lisima switsundzuxu leswi hi swi kumaka ka Bibele ni leswi taka hi ka nhlengeletanu ya Yehovha ni loko hi pfumelela switsundzuxu swoleswo swaku swi tshama ka mbilu ya hina. Ku khongela swaku Yehovha a hi basisa hi ndlela leyo, swi ta hi pfuna swaku hi famba hi ku tshembeka.
Murindzi 01/12/04 paj. 15 mapar. 12-13
A Hi Fambeni Hi Ku Tshembeka
12 Loko a vulavula hi nchumu wun’wani lowu nga mu pfuna swaku a tama a tshembeka, Davhida a te: “A ni tshami ni vanhu va mavunhwa, funtshi ni fambela kule ni vanhu lava fihlaka leswi va nga swona. Na swi nyenya ku tshama ni vanhu va ku biha, a ni hungati ni vanhu lava yendlaka swa ku biha.” (Tipisalema 26:4, 5) Davhida a a nga pfumeli ku tshama ni vanhu lava va yendlaka swilo swa ku biha. Phela yena a a va nyenya vanghanu va ku biha.
13 Se hina ke! Indjhe ha fambela kule ni vanhu lava va yendlaka swilo swa ku biha lava va nga ha vaka kona ka televhizori, mavhidiyo, mafilmi, interneti kumbe swilo swin’wani swa ku fana ni leswi? Indjhe ha fambela kule ni vanhu lava va fihlaka leswi va nga swona hikakunene? Phela vanhu van’wani lava hi djondzaka na vona xikola ni lava hi tirhaka na vona va nga ha tikomba va li vanghanu vavanene kambe va fihla leswi va nga swona hi le ndzeni. Se, hina a hi swi lavi ku va ni wunghanu ni vanhu lava yendlaka ingi i vanhu vavanene kambe na va nga mu tirheli Yehovha. Phela vanhu lava nga djikela nhlengeletanu ya Yehovha va nga ha vula marito ya ku xonga lawa ma tikombaka na ma li manene, kambe xikongomelo xa vona i ku hi tshikisa ku tirhela Yehovha. Se swi li yini loko ku ni vamakwerhu bandleni lava va tifihlaka leswi va nga swona hi le ndzeni? Vona xikombiso xa Jayson, lweyi swoswi i nga mupfunisi wa bandla. Nkama lowu na a ha li jovhem a a ni vanghanu va ku kala va nga li vanene. Yena a li: “Siku lin’wani mun’we wa vanghanu va mina a te: ‘A swi na mhaka swaku hi yendla yini swoswi hikusa loko misava ya nyuwani yi fika, hina hi ta va se na hi file. Se, a hi nga ta swi tiva swaku hi luze yini.’ Phela mabulu wolawo ma ni pfule matihlo hikusa mina ni lava ku hanya ka misava ya nyuwani.” Hi wutlharhi, Jayson a tekele ku tihambanisa ni vanghanu volavo. Mupostolo Pawulo a tsale leswi leswaku a hi basopisa: “Mi nga kanganyisiwi. Vanghanu va ku biha va wonha mintirho yayinene.” (1 Vakorinto 15:33) Phela leswo swi kombisa lisima la kuva hi tihambanisa ni vanghanu va ku biha.
Murindzi 01/12/04 paj. 16 mapar. 17-18
A Hi Fambeni Hi Ku Tshembeka
17 A tabernakela ni altari ya yona ya ku nyikela magandzelo, a ku li ndhawu leyi Yehovha a a gandzeliwa ka yona aIsrayele. Davhida a byele Yehovha hi xikhongelo leswi a a titwisa xiswona hi ndhawu leyi. A te: “Yehovha, na yi rhandza yindlo leyi u tshamaka ka yona, ndhawu leyi nga ni ku phatima ka wena.” — Tipisalema 26:8.
18 Ku nga va swaku ha swi rhandza ku tlhangana ni vamakwerhu swaku hi djondzisiwa hi Yehovha? Yindlo ya Wugandzeli ni leswi swi djondzisiwaka kona i ndhawu leyi Yehovha a gandzeliwaka hi ntiyiso kona amugangeni. Handle ka leswo lembe ni lembe hi ni kongresu ni masembleya. Leswi hi djondzisiwaka swona ka mintlhanganu leyi swi ta hi ka Yehovha. Funtshi loko hi rhandza switsundzuxu swa Yehovha hi ta swi lava hintamu ku va kona ka mintlhanganu leyi hi tlhela hi swi yingisela kahle leswi hi djondzisiwaka swona ka yona. (Tipisalema 119:167) Swi tsakisa hintamu ku tlhangana ni vamakwerhu lava va nga ni mhaka na hina va tlhela va hi pfuna ku tama hi tshembeka. — Vaheberu 10:24, 25.
Lavetela Xuma Ka Rito La Xikwembu
Murindzi 15/07/06 paj. 28 par. 15
Yehovha A Pfuna Lweyi A Karhatekaka
15 Davhida a tshame a yimbelela a ku: “Hambiloko papayi na mamani vo ni tshika, Yehovha a ta ni teka.” (Tipisalema 27:10) Phela swi tsakisa hintamu ku tiva swaku Yehovha a hi rhandza hintamu ku tlula hambi hi ndlela leyi vapsali va hina va hi rhandzisaka xiswona. Hambileswi swi vavaka hintamu ku hluphiwa kumbe ku tsukuliwa hi papayi kumbe hi mamani lweyi a nga ku psala, Yehovha a ku rhandza hintamu. (Varoma 8:38, 39) Khumbuka swaku Yehovha a yendle swaku u mu tiva hileswi a ku rhandzaka. (Yohani 3:16; 6:44) Ku nga na mhaka swaku vanhu van’wani va ku khomise ku yini, Yehovha Papayi wa wena a ku rhandza hintamu!
15 KU YA KA 21 KA ABRIL
XUMA XI NGA KA RITO LA XIKWEMBU | TIPISALEMA 29-31
Yehovha A Laya Lweyi A Mu Rhandzaka
Perspicaz vol. 1 paj. 929 par. 12
Kara
Ku va Yehovha a ‘fihla kara’ kumbe a txuvuka kule swi nga ha vula swilo swa ku hambanahambana hi ku ya hi xiyimu lexi munhu a nga ka xona. Phela ku va Yehovha a txuvuka kule, minkama ya yinyingi swi vula ku va a nga hi tenderi hi nkama wolowo kumbe ku hi vhikela. Leswo swi nga ha yendleka loko hi nga mu yingisi Yehovha, ku fana ni leswi nga yendlekela Vayisrayele. Yehovha a txuvuke kule na vona nkama lowu va nga tshika ku mu yingisa. (Yob 34:29; Ps 30:5-8; Esa 54:8; 59:2) Kambe minkama yin’wani ku va Yehovha a txuvuka kule swi nga ha vula ku kala a nga hi hlamuli hi nkama lowu hi lavaka leswi hi mu kombelaka swona, hikusa a nyimela nkama wawunene leswaku a swi hlamula. (Ps 13:1-3) Se nkama lowu Davhida a nga kombela swaku Yehovha a ‘txuvuka kule swaku a nga swi voni swidjoho swa yena’ a a kombela Yehovha swaku a mu rivalela a tlhela a tima swidjoho swa yena. — Ps 51:9; vona Ps 10:11.
Murindzi 01/03/07 paj. 19 par. 1
Nyimela Yehovha Na U Tsakile
Ndlela leyi hi pfunekaka hi yona loko Yehovha a hi laya, yi nga fananisiwa ni ndlela leyi fruta li kulaka hi yona li za li wupfa. Loko Bibele li vulavula hi ku layiwa hi Xikwembu, li li: “[Ku layiwa] swi yendla [swaku vanhu] va hanya hi ndlela yayinene ni hi ku rhula”. (Vaheberu 12:11) Ku fana ni leswi fruta li lavaka nkama swaku li za li wupfa, na hina swi nga ha lava nkama swaku hi txintxa mahanyelo ya hina loko hi layiwa hi Yehovha. Hi xikombiso, loko ho yendla xidjoho hi gama hi luzekeliwa hi mintirho leyi a hi li na yona bandleni, ku lehisa mbilu hi nyimela Yehovha swi ta hi pfuna swaku hi nga heli ntamu kumbe ku godola. Loko swoleswo swo hi yendlekela, marito lawa Davhida a nga kongomisiwa hi Yehovha swaku a ma tsala ma nga hi pfuna. Ma li: ‘Kambe [Yehovha] a ta mi rhandza wutomi hinkwalu. Mi ta rila nimadlambu kambe nimixo mi ta ba minkulungwana.’ (Tipisalema 30:5) Loko hi lehisa mbilu hi nyimela Yehovha, hi tirhisa switsundzuxu leswi hi swi kumaka ka Bibele ni ka nhlengeletanu ya yena, nkama wa hina wa ‘ku ba nkulungwana’ wu ta fika.
I Yini Ku Tisola Ka Ntiyiso?
18 Ku ni swilo leswi munhu lweyi a nga susiwa bandleni a faneleke a swi yentxa kuva a kombisa swaku a tisolile hikakunene. A fanele a ya mintlhanganwini nkama ni nkama a tlhela a yentxa leswi madoda ma mu byelaka swona, ku nga ku khongela ni ku djondza Bibele. A fanele a zama ku fambela kule ni swilo leswi nga mu yentxaka a djoha. Loko a zama ku tlhela a va ni wunghanu la linene na Yehovha a nga tiyiseka swaku Yehovha a ta mu rivalela naswona madoda ma ta mu pfumelela swaku a tlhelela bandleni. I ntiyiso swaku loko madoda ma pfuna munhu lweyi a nga djoha, ma fanele ma khumbuka swaku a mhaka ni swiyimu swa vanhu lava nga djoha a swi fani naswona ma fanele ma yavanyisa mhaka hi ndlela ya yinene.
Lavetela Xuma Ka Rito La Xikwembu
Murindzi 15/05/06 paj. 19 par. 13
Tipontu Ta Lisima Ta Buku La Tipisalema
31:23 — Yehovha a mu khatisisa ku yini munhu lweyi a tibyelaka? Munhu lweyi a tibyelaka, leswi a kalaka a nga tisoli ka swidjoho swa yena leswi a nga swi yendla, Yehovha a mu khatisa hi ndlela ya yikulu, ya ku vava. Kambe, Yehovha a nga swi yendli leswo ka munhu wa ku lulama, hikusa munhu wa ku lulama leswi a djohelaka Yehovha hi ku phazama, Yehovha o mu laya leswaku a djondza ka swidjoho swa yena a tlhela a va ni wunghanu lalinene na Yehovha. — Swivuriso 11:31; 1 Pedru 4:18.
22 KU YA KA 28 KA ABRIL
XUMA XA RITO LA XIKWEMBU | TIPISALEMA 32-33
Hi Mhaka Muni Hi Fanele Hi Hlaya Swidjoho Swa Hina?
Murindzi 15/03/93 paj. 9 par. 7
Ntwelawusiwana Wa Yehovha Wu Hi Yendla Hi Va Ni Lipfalu La Ku Basa
7 Loko hi yendle xidjoho xaxikulu hi ku kala hi nga wu yingisanga a nawu wa Yehovha, swi nga yendleka swi hi karhatela hambi hi ku hlaya xidjoho xa hina, hi xi byela Yehovha. Se hi nga ha titwisa ku yini ka xiyimu lexi? Mupisalema Davhida a vule leswi ka buku la Tipisalema 32: “Loko ni miyela marhambu ya mina a ma hela ntamu, hi mhaka ya ku konya ka mina siku hinkwalu. Hikusa voko la wena a li ni peza wusiku ni nhlikanhi. Ntamu wa mina wu hele ku fana ni mati lama hisiwaka hi dlambu la malanga.” (Tindzimana 3, 4) Phela akuva Davhida a zame ku fihla a xidjoho xa yena swi yendle leswaku a karhateka hintamu a tlhela a nga ve ni lipfalu la ku basa. Leswo swi yendle Davhida a hela ntamu funtshi a a titwa ku fana ni nsinya lowu nga woma. Phela a hi kanakani swaku Davhida a a nga na ku rhula ka mimpimiso funtshi a a nga ha tsakanga. Se loko hi li ka xiyimu xa ku fana ni xa Davhida, i yini leswi hi nga swi yendlaka?
Tshinela Ka Xikwembu paj. 262 par. 8
Xikwembu Lexi Nga “Lunghekela Ku Rivalela”
8 Nkama Davhida a nga tisola, a te: ‘Hi wugamu ni ku byele xidjoho xa mina. A ni xi fihlanga . . . naswona wena u ni rivalele xona.’ (Tipisalema 32:5) A rito la Xiheberu le li nge “rivalele” li nga ha vula “ku tlakula” kumbe “ku susa”. Leswi li nga tirhisisiwa xiswona ka ndzimana leyi, li vula “ku tima nandzu, xihoxo kumbe xidjoho”. A swo fana ni loko Yehovha a yo tlakuka a teka swidjoho swa Davhida a famba na swona. A hi kanakani swaku leswo swi yendle swaku Davhida a nga ha titwi nandzu. (Tipisalema 32:3) Na hina hi nga xi tshemba hi ku helela Xikwembu hikusa xi teka swidjoho swa lava kombelaka ku rivaleliwa hi xona xi famba kule na swona, se va titwa va nga ha peziwi. — Matewu 20:28.
Murindzi 01/06/01 paj. 30 par. 1
Loko U Hlaya Swidjoho Swa Wena U Ta Titwa Kahle
Loko Davhida se a ta va a vule swidjoho swa yena, a nga ha titwanga a nga pfuni nchumu. Phela marito lawa Davhida a nga ma vula ma kombisa swaku se a a rhulile ni leswaku a a tinyimisele ku tama a tshembeka ka Yehovha. Hi xikombiso, ka Tipisalema 32:1 a vule leswi: “Wa tsaka lweyi a nga rivaleliwa xihoxo xa yena, lweyi xidjoho xa yena xi nga mbhonyiwa.” Phela ku nga na mhaka swaku munhu a mahe xidjoho xa ku fikela kwini, swi nga koteka swaku a rivaleliwa a tlhela a tsaka loko a tisola hi mbilu ya yena hinkwayu. A nga kombisa swaku wa tisola hi ku tiveka hansi, a pfumela swaku a phazamile, ku fana ni leswi Davhida a nga swi yendla. (2 Samuwele 12:13) Phela Davhida a nga tinyimelelanga ka Yehovha, kumbe a nyika nandzu van’wani hi mhaka ya leswi a nga swi yendla. Kambe, yena a vule leswi: “Hi wugamu ni ku byele xidjoho xa mina, a ni xi fihlanga. Ni te: ‘Ni ta byela Yehovha swidjoho swa mina’ naswona wena u ni rivalele swona.” (Tipisalema 32:5) Phela loko munhu a vula swidjoho swa yena, swi yendla swaku a rhula, naswona lipfalu la yena a li nga ha ta mu karhata hi mhaka ya swidjoho swa yena.
Lavetela Xuma Ka Rito La Xikwembu
Murindzi 15/05/06 paj. 19 par. 13
Tipontu Ta Lisima Ta Buku La Tipisalema
33:6 — I yini “moya” lowu ku vulavuliwaka hi wona ka ndzimana leyi? A moya lowu ku vulavuliwaka hi wona lani i ntamu wa Xikwembu, kumbe moya wa ku kwetsima, lowu xi nga wu tirhisa leswaku xi hamba matilo. (Genesa 1:1, 2) Ku vuliwa swaku i moya hikusa Xikwembu xi nga wu rhumela kun’wani ni kun’wani lomu xi ku lavaka swaku xi yendla ku rhandza ka xona.
29 KA ABRIL KU YA KA 5 KA MAIO
XUMA XI NGA KA RITO LA XIKWEMBU | TIPISALEMA 34-35
“Dzunisa Yehovha Minkama Hinkwayu”
Murindzi 01/03/07 paj. 22 par. 11
A Hi Dzuniseni Yehovha Minkama Hinkwayu
11 “Ni ta dzunisa Yehovha minkama hinkwayu; a ni nge tshiki ku mu dzunisa.” (Tipisalema 34:1) Leswi Davhida a a hanya hi ku baleka, swi nga yendleka a a ta va a karhateke hintamu hi swaku a ta tihlayisisa ku yini. Kambe, hilani marito ya ndzimana leyi ma swi kombisaka hi kona, lexi Davhida a a xi lava hintamu a ku li ku dzunisa Yehovha. Phela Davhida i xikombiso xaxinene loko hi kumana ni swikarhatu. Ku nga na mhaka swaku hi kwini, kumbe i xikola, antirhweni, ni vamakwerhu kumbe a ku chumayeleni, lexi hi faneleke hi xi lava hintamu ku fanele ku va ku dzunisa Yehovha. Pimisa hi swivangelo swa swinyingi leswi hi nga na swona swa ku mu dzunisa Yehovha. Hi xikombiso, minkama hinkwayu hi ta tsumbula swilo swa nyuwani ka swilo swa ku hlamalisa leswi Yehovha a nga swi yendla. Pimisa hi leswi Yehovha a swi yendlaka hi ku tirhisa nhlengeletanu ya yena ya lani misaveni. Yehovha a djondzisa vanhu lava nga ni xidjoho swaku va yendla swilo swa ku hlamalisa. Phela leswi Yehovha a swi yendlaka a swi nge fananisiwi ni nchumu. A wu pfumelelani ni marito ya Davhida nkama a nga tsala a ku: “A ku na xikwembu lexi fanaka na wena, wena Yehovha a ku na mintirho leyi fanaka ni ya wena.” — Tipisalema 86:8.
Murindzi 01/03/07 paj. 22 par. 13
A Hi Dzuniseni Vito La Yehovha
13 “Ni ta tibuma hi Yehovha; lava ku rhula va ta swi twa, va tlhela va tsaka.” (Tipisalema 34:2) Phela Davhida a a nga tibyeli hi swilo leswi yena a nga swi yendla. Hi xikombiso, Davhida a nga zanga a tibyela nkama a nga kota ku kanganyisa hosi ya Gati. Davhida a a swi tiva swaku i Yehovha lweyi a nga mu vhikela a tlhela a mu ponisa swaku a nga dlayiwi hi hosi liyani. (Swivuriso 21:1) Ka swilo hinkwaswu leswi, Davhida a nga tibyelanga kambe a dzunise Yehovha. Hi mhaka leyo, vanhu van’wani na vona va mu dzunisile Yehovha. Hi ku fana, na yena Yesu nkama na a li lani misaveni a a dzunisa vito la Xikwembu. Leswo swi yendle swaku vanhu vanyingi va ku tiveka hansi va tinyimisela ku djondza hi Yehovha. Ni namuntlha, vanhu va ku tala amisaveni hinkwayu va djondzisiwa hi Yehovha amabandleni lawa ma rhangeliwaka hi Yesu Kreste. (Vakolosa 1:18) Vanhu volavo va ku tiveka hansi va ku rhula va tsaka hintamu loko va vona vito la Xikwembu na li dzunisiwa, funtshi va tsaka hintamu loko moya wa ku kwetsima wa Xikwembu wu tama wu va pfuna ku va va twisisa leswi va djondzisiwaka swona ka Bibele. — Yohani 6:44; Mintirho 16:14.
Murindzi 01/03/07 paj. 23 par. 15
A Hi Dzuniseni Vito La Yehovha
15 Ka Tipisalema 34:4, Davhida a vule leswi: “Ni khongelile ka Yehovha funtshi a ni hlamulile. A ni ponisile ka ku chava ka mina hinkwaku.” Ku va Davhida a humeleliwe hi swilo leswi swi mu pfunile hintamu. Hi mhaka leyo, loko se a vule marito lawo, a game a vula leswi: “Xisiwana xi vitane Yehovha, naswona a xi twile. A xi ponisile ka mahlomulu ya xona hinkwawu.” (Tipisalema 34:6) Se na hina loko hi ya mintlhanganwini swaku hi ya tlhangana ni vamakwerhu, hi pfulekeliwa hi nkama wa ku va hi va tiyisa, hi ku va byela leswi Yehovha a nga hi pfunisa xiswona kuva hi lwisana ni xikarhatu lexi hi nga tshama hi kumana na xona. Leswo swi va tiyisa hintamu vamakwerhu, ku fana ni leswi marito ya Davhida ma nga tiyisa vanhu lava a va mu seketela. Lava a va mu tshemba ‘va tsakile, a va danisiwanga’. (Tipisalema 34:5) Hambileswi hi nkama wolowo a va baleka ku dlayiwa hi hosi Sawulo, a swi nga va danisi ku baleka. A va tshemba swaku Yehovha a a mu seketela Davhida. Phela hi leswo swi nga va yendla va tsaka. Se swa fana na hina namuntlha. Swi nga na mhaka swaku ho ho sungula ku djondza ntiyiso swoswi kumbe se i khale na hi li ka ndlela ya ntiyiso, minkama hinkwayu hi kombela ku pfuniwa hi Yehovha. Leswi minkama ya yinyingi hi mu vonaka Yehovha na a hi pfuna, ha tsaka hintamu naswona hi tinyimisele ku tama hi tshembeka ka yena.
Lavetela Xuma Ka Rito La Xikwembu
Murindzi 15/08/11 paj. 14 par. 9
Tipontu Ta Lisima Ta Buku La Tipisalema
35:11 — A wuprofeta leli li nga ka Tipisalema 35:11 li kombisa swaku a ku ta humelela timboni leti a ti ta vulavula swilo swa mavunhwa hi Mesiya. Wuprofeta leli li li: “Ku ta timboni ta mavunhwa ti ni vutisa swaku kala ni nga swi tivi.” Indjhe wuprofeta leli li hetisekile? Buku la Matewu 26:59 li li: “Kutani vaprista vavakulu ni Tribunali Lalikulu la Vayuda a va lavetela vanhu lava a va ta vula mavunhwa hi Yesu swaku va mu dlaya.” Naswona buku la Marka 14:56 li li: “Phela va ku tala a va mu lumbeta hi ku vula wufakazi la mavunhwa, kambe wufakazi la vona a li nga twanani.” Vanhu lava a va mu nyenya hintamu Yesu funtshi a va lava ku mu dlaya a va nga na mhaka swaku leswi vanhu a va mu lumbeta hi swona a ku li mavunhwa.