Mareferensiya Ya Xibukwana Xa Mintlhanganu Ya Mahanyelo Ni Ntirho
7 KU YA KA 13 KA MARÇO
XUMA XI NGA KA RITO LA XIKWEMBU | 1 SAMUWELE 12-13
“Ku Tibyela Swi Bihile”
Murindzi 01/08/00 paj. 13 par. 17
Ku Tibyela Swi Bihile
Leswi Sawulo a a swi yentxa a swi tikomba ingi i swinene. Phela, vanhu va Xikwembu a va li ka “xiyimu xa ku karhata hintamu,” a va chava va tlhela va hela ntamu. (1 Samuwele 13:6, 7) Ku vula ntiyiso, a swi bihanga ku yentxa swiboho loko swiyimu leswi hi kumanaka na swona swi sindzisa. Kambe, i swa lisima ku khumbuka swaku Yehovha wa swi kota ku vona leswi nga ka timbilu ta hina naswona wa swi tiva leswi hi lavaka ku swi yentxa. (1 Samuwele 16:7) Hi mhaka leyo, swi nga yentxeka ku ni leswi Yehovha a nga swi vona ka Sawulo, leswi kalaka swi nga vuliwi hi ku kongoma ka Bibele. Hi xikombiso, Yehovha a nga ha va a vone leswaku Sawulo a a nga lehisi mbilu naswona a a tibyela hileswi a a ganyile. Leswi Sawulo a a li hosi ya Israyele, swi nga yentxeka a tibyele leswaku yena a a nga li na yona mfanelo ya ku nyimela muprofeta wa Yehovha, lweyi yena a a mu vona a nga li wa nchumu hileswi a nga guga. Phela leswi Samuwele a nga hlwela ku fika, swi nga yentxeka Sawulo a a tivona a li ni mfanelo ya ku yentxa swilo leswi Nawu a wu vula hi ku kongoma swaku a a nga fanelanga a swi yentxa. Leswi Sawulo a nga swi yentxa, a swi mu tsakisanga Samuwele, funtshi a game a byela Sawulo a ku: “Wuhosi la wena li ta hela . . . hikusa wena a wu swi yingisanga leswi Yehovha a nga ku byela swona.” (1 Samuwele 13:13, 14) Ku tibyela swi yentxe Sawulo a dana.
Murindzi 15/06/07 paj. 27 par. 8
Yehovha Wa Tsaka Loko Hi Mu Yingisa
Leswi Bibele li swi vulaka hi Hosi Sawulo, swi kombisa swaku ku yingisa i swa lisima. Nkama Sawulo a nga sungula ku fuma a a tiveka hansi, naswona a a tivona a nga “pfuni nchumu.” Kambe hi ku famba ka nkama, leswi a a tibyela a sungule ku yentxa swiboho swa ku kala swi nga li swinene. (1 Samuwele 10:21, 22; 15:17) Siku lin’wana, Sawulo a a fanele a ya lwa ni Vafilista. Se Samuwele a mu byele leswaku na a nge se ya nyimpini, a a fanele a mu nyimela leswaku a ta yentxela Yehovha magandzelo a tlhela a mu byela leswi a a fanele a swi yentxa. Kambe Samuwele a hlwele ku fika, naswona vanhu va sungule ku hangalaka. Loko Sawulo a vona swaku vanhu vo hangalaka, ‘a yentxe gandzelo la ku hisiwa.’ Leswi Sawulo a nga swi yentxa a swi mu tsakisanga Yehovha. Nkama lowu Samuwele a nga fika, Sawulo a tinyimelelile a vula swaku a ze a nyikela gandzelo hileswi Samuwele a nga hlwela ku fika leswaku a ta tsakeliwa hi Yehovha. Phela ka Sawulo, a ku nyikela gandzelo a swi li swona swa lisima ku tlula ku yingisa nkongomiso wa ku nyimela Samuwele swaku a ta yentxa gandzelo. Hi mhaka leyo, Samuwele a byele Sawulo a ku: “Leswi u nga swi yentxa i wuphunta. A wu yingisanga nawu lowu Yehovha Xikwembu xa wena a nga ku nyika wona.” Leswi Sawulo a kalaka a nga mu yingisanga Yehovha, a luzekeliwe hi wuhosi la yena. — 1 Samuwele 10:8; 13:5-13.
Lavetela Xuma Ka Rito La Xikwembu
Murindzi 15/07/11 paj. 14 par. 15
U Tinyimiselile Ku Yingisa Nkongomiso Wa Yehovha Wa Lirhandzu?
Swi nga yentxeka Vayisrayele a va pimisa leswaku va nga tshemba hosi leyi nga munhu ku tlula ku tshemba Yehovha. Loko ku li swaku a va pimisa leswo, a vo tikanganyisa. Leswi a va tshemba swilo swa ku kala swi nga pfuni nchumu, a swi ta va vevukela leswaku va tshemba swilo swin’wana swa ku tala leswi humaka ka Sathana. Hi xikombiso, hosi leyi nga munhu a yi ta va yentxa va gandzela swikwembu swa mavunhwa. Phela vanhu lava nga ka wukhongeli la mavunhwa va pimisa swaku swifaniso leswi va nga na swona swa ku yentxiwa hi maribye ni mapulangu, va nga swi tshemba hileswi va kotaka ku swi vona. Kambe a va mu tshembi Yehovha, Xikwembu lexi va kalaka va nga swi koti ku xi vona, lexi nga yentxa swilo hinkwaswu. Mupostolo Pawulo a vule leswaku swifaniso a hi swa “nchumu.” (1 Kor. 8:4) Phela swifaniso a swi voni, a swi twi, a swi vulavuli naswona a swi koti ku yentxa nchumu. Hi mhaka leyo, i wuphunta ku gandzela swifaniso hi mhaka ya leswi hi kotaka ku swi vona ni ku swi khoma. Swifaniso a swi nge swi koti ku pfuna vanhu hikusa a hi swa nchumu naswona lava va swi tshembaka va ta fana na swona. — Pis. 115:4-8.
14 KU YA KA 20 KA MARÇO
XUMA XI NGA KA RITO LA XIKWEMBU | 1 SAMUWELE 14-15
“Ku Yingisa Swa Yampsa Ku Tlula Magandzelo”
Murindzi 15/06/07 paj. 26 par. 4
Yehovha Wa Tsaka Loko Hi Mu Yingisa
Leswi Yehovha a nga yentxa swilo hinkwaswu, swilo hinkwaswu leswi hi nga na swona i swa yena. Loko ku li leswo, ku nga va swaku ku ni nchumu lowu hi nga wu nyikaka Yehovha? Ina, hi nga mu nyika nchumu wa lisima swinene. I yini nchumu wa kona? Nhlamulu hi nga yi kuma ka marito lama nge: “Tlhariha n’wananga, u tsakisa mbilu ya mina, leswaku ni ta hlamula lweyi a ni tlhontlhaka.” (Swivuriso 27:11) Nchumu wa lisima lowu hi nga nyikaka Yehovha i ku mu yingisa. Hambiloko swiyimu swa hina ni ndlela leyi hi nga kulisiwa hi yona swi hambanile, loko hi yingisa Yehovha hi ta va hi kaneta mavunhwa ya Sathana ya ku vanhu a va nge tshembeki ka Xikwembu loko va kumana ni miringo. Ku yentxa leswo i swa lisima!
Perspicaz vol. 2 paj. 500 par. 2
Ku Yingisa
Ku yingisa Xikwembu i swa lisima hintamu, naswona a swi nge koteki ku xi tsakisa loko hi nga xi yingisi. Hi mhaka leyo, Samuwele a byele Sawulo a ku: “Yehovha a tsakisiwa hi yini: Hi ku hisa swiharhi swaku swi va magandzelo kumbe hi ku yingisa rito la Yehovha? Tiyiseka hi leswi: Ku yingisa swa yampsa ku tlula magandzelo naswona ku yingisa kahle swa yampsa ku tlula mafurha ya tihomu.” (1Sa 15:22) Munhu lweyi a kalaka a nga yingisi a kombisa swaku a nga mu tshembi Yehovha, naswona a nga na lipfumelo ka leswi a mu byelaka swona. Phela loko munhu a nga mu yingisi Yehovha, swo fana ni loko a gandzela swikwembu swa mavunhwa. (1Sa 15:23; vona ni Rm 6:16.) Ku va munhu a twa nawu a gama a nga wu yingisi a swi sizi nchumu. Phela munhu lweyi a kalaka a nga yingisi a nga mu tshembi naswona a nga mu hloniphi lweyi a nga nyikela nawu. (Mt 21:28-32) Vanhu lava va twaka Rito la Xikwembu va tlhela va pfumela leswaku lona li vulavula ntiyiso kambe va nga hanyi hi leswi li swi vulaka, vo tikanganyisa naswona a va nga ta yi kuma minkateko ya Yehovha. (Yk 1:22-25) Yesu a vule leswaku vanhu lava va tikombaka ingi i vanene a va nga ta nghena ka Mfumu wa Xikwembu, naswona a va nga ta yamukeliwa hi Xikwembu. — Mt 7:15-23.
Lavetela Xuma Ka Rito La Xikwembu
Perspicaz vol. 1 mapaj. 519-520
Timpsalu
Loko hi va komba timpsalu vanhu van’wana na Yehovha a nga swi lavi, swi nga hi tisela swikarhatu. Leswo swa tikomba ka leswi nga humelela Hosi Sawulo. Yehovha a byele Sawulo leswaku a a fanele a dlaya vanhu va tiko la Amaleke a tlhela a nga va kombi timpsalu, hikusa va dumele Vayisrayele nkama va nga huma Gibita hambileswi a va nga na nandzu. Leswi Sawulo a a lava ku tsakisa Vayisrayele, a nga swi yentxanga leswi Yehovha a nga mu byela swona hikusa a va kombe timpsalu Vaamaleke. Hi mhaka leyo, Yehovha a nga ha mu pfumelelanga Sawulo leswaku a tama a va hosi. (1Sa 15:2-24) Phela munhu lweyi a hloniphaka minawu ya Yehovha, wa tshembeka ka swilo hinkwaswu leswi a swi yentxaka naswona Yehovha a ta tama a mu yamukela.
21 KU YA KA 27 KA MARÇO
XUMA XI NGA KA RITO LA XIKWEMBU | 1 SAMUWELE 16-17
“A Nyimpi I Ya Yehovha”
Murindzi wa N.o 5 wa 2016 paj. 11 mapar. 2-3
“A Nyimpi I Ya Yehovha”
Leswaku Davhida a tiyisekisa Sawulo swaku a a ta swi kota ku dlaya Goliyadi, a mu byele swaku a tshame a dlaya nghonyama ni ursu. Phela Davhida a nga vulanga leswo hileswi a a tibyela, kambe a a swi tiva swaku hi Yehovha lweyi a nga mu pfuna kuva a dlaya swiharhi swoleswo. Yena a te: “Yehovha lweyi a nga ni ponisa ka ursu ni nghonyama, hi yena lweyi a nga ta ni ponisa ka Mufilista lweyi.” Hambileswi Sawulo a a mu vonela hansi Davhida a vule leswi : “Famba, ingi Yehovha a nga va na wena.” — 1 Samuwele 17:37.
Se, hina hi nga li tekelelisa ku yini lipfumelo la Davhida? Phela swi teke nkama swaku Davhida a va ni lipfumelo la ku tiya, hikusa swi lave a rhanga hi ku djondza hi leswi Yehovha a nga swi yentxa. Naswona leswi nga mu yentxekela ka wutomi la yena swi mu pfune ku va ni lipfumelo la ku tiya. A a swi tiva leswaku Yehovha wa va vhikela vanhu va yena naswona a hetisisa leswi a swi tshembisaka. Leswaku hi tiyisa lipfumelo la hina, hi fanele hi djondza hi Yehovha ka Bibele. Loko hi hanya hi leswi hi swi djondzaka, hi ta va ni wutomi la ku tsakisa naswona lipfumelo la hina li ta ya li tiya. — Vaheberu 11:1.
Murindzi wa N.o 5 wa 2016 mapaj. 11-12
“A Nyimpi I Ya Yehovha”
Davhida a hi vekele xikombiso xa xinene namuntlha. Davhida a txuvuke Goliyadi a gama a vula leswi hi rito la ku tlakuka: “U ta ka mina hi xipada ni tlhari, kambe mina ni ta ka wena hi vito la Yehovha murhangeli wa tintsumi, Xikwembu lexi rhangelaka masonchwa ya Vayisrayele lexi u lwaka na xona.” Davhida a a swi tiva leswaku matimba ya munhu ni matlharhi a swi nga li swa nchumu. Yehovha Xikwembu a a ta khatisa Goliyadi hileswi a a nga mu hloniphi funtshi Davhida se a a vulile leswaku “nyimpi i ya Yehovha.” — 1 Samuwele 17:45-47.
I ntiyiso swaku Davhida a a swi vona leswaku Goliyadi a a lehile ni swaku a a ni matlharhi, hambileswo a nga mu chavanga. A nga fananga na Sawulo ni masonchwa ya Israyele lava a va chava Goliyadi. Davhida a nga tifananisanga na Goliyadi, kambe a fananise Goliyadi na Yehovha. Phela Goliyadi a a lehe kolomu ka 3 wa mametru naswona a ku nga na munhu mun’wana lweyi a a lehe ku fana na yena. Goliyadi a a nga li wa nchumu loko hi mu fananisa ni Muyentxi wa swilo hinkwaswu. Funtshi ka Yehovha a a fana ni sokoti naswona Yehovha a a tinyimisele ku mu helisa!
Murindzi wa N.o 5 wa 2016 paj. 12 par. 4
“A Nyimpi I Ya Yehovha”
Namuntlha vanhu va Xikwembu a va ha lwi tinyimpi ku fana ni khale. (Matewu 26:52) Kambe hi fanele hi tekelela lipfumelo la Davhida. Ku fana na Davhida, hi fanele hi vona Yehovha a li Xikwembu xa ntiyiso naswona hi fanele hi hlonipha yena ntsena hi tlhela hi mu tirhela. Minkama yin’wana swikarhatu swa hina swi nga ha va swikulu hintamu, kambe matimba ya Yehovha ma ta hi pfuna ku hlula swikarhatu swoleswo. Loko hi tekelela Davhida lweyi a nga tshemba Yehovha a tlhela a va ni lipfumelo ka yena, a ku na xikarhatu lexi nga ta hi chavisa, hikusa a xi kona lexi nga hlulaka matimba ya Yehovha.
Lavetela Xuma Ka Rito La Xikwembu
Perspicaz vol. 2 paj. 974 par. 5
Sawulo
Nkama lowu Yehovha a nga langa Davhida swaku a va hosi ya Israyele, moya wa yena a wa ha tamanga wu tirha ka Sawulo. Ku sukela kolanu, “moya wa ku biha lowu taka hi ka Xikwembu” wu sungule ku hlupha Sawulo. Leswi moya wa ku kwetsima a wu nga ha tirhi ka Sawulo, Yehovha a pfumelele leswaku moya wa ku biha wu hlupha Sawulo. Leswo swi yentxe swaku Sawulo a nga ha vi na ku rhula, a tlhela a va ni mimpimiso ya ku biha. Leswi Sawulo a nga tshika ku yingisa Yehovha, swi yentxe swaku Yehovha a nga ha wu tirhisi moya wa yena wa ku kwetsima swaku a vhikela mimpimiso ni mbilu ya yena. Leswi Yehovha a nga susa moya wa yena wa ku kwetsima ka Sawulo a tlhela a pfumelela swaku moya wa ku biha wu mu hlupha, swi yentxe swaku moya wolowo wu voniwa na wu li “moya wa ku biha lowu taka hi ka Xikwembu,” lakakuva hambi hi vatirhi va Sawulo va vule leswaku a hluphiwa hi “moya wa ku biha lowu taka hi ka Xikwembu.” Mun’we wa vatirhi va Sawulo a mu byele swaku a vitana Davhida swaku a mu chayela lisimu leswaku a rhula, loko a hluphiwa hi “moya wa ku biha”. — 1Sa 16:14-23; 17:15.
28 KA MARÇO KU YA KA 3 KA ABRIL
XUMA XI NGA KA RITO LA XIKWEMBU | 1 SAMUWELE 18-19
“Tama U Tiveka Hansi Hambiloko Swi Ku Fambela Kahle”
Murindzi 01/04/04 paj. 15 par. 4
Tshemba Yehovha Loko Wutomi La Wena Li Txintxa
Hi nkamanyana Davhida a a ta sungula ku va ni ndhuma ka tiko hinkwalu la Israyele. A vitaniwile leswaku a ya tirhela hosi a tlhela a yi chayela lisimu. A dlaye Goliyadi, wanuna wa ku leha lweyi a a ni matimba hintamu a tlhela a chaviwa hambi hi masonchwa ya Israyele lawa a ma yi lwa kahle nyimpi. Leswi Davhida a a li yena lweyi a a rhangela masonchwa, a lwe ni Vafilista a tlhela a va hlula. Phela vanhu a va mu rhandza Davhida naswona va yimbelele tinsimu ta ku mu dzunisa. Na swi nge se yentxeka leswo, mutirhi wa hosi Sawulo a vule leswaku hambileswi Davhida a a li mutsongo, a a ‘chaya kahle’ harpa naswona i “musonchwa wa matimba lweyi a kalaka a nga chavi, a vulavula kahle, a sasekile naswona Yehovha a na yena.” — 1 Samuwele 16:18; 17:23, 24, 45-51; 18:5-7.
Murindzi 01/18 paj. 28 mapar. 6-7
Tiveki Hansi Loko U Tirhisana Ni Van’wana
Vanhu van’wana va sungula ku tibyela hi mhaka ya leswi va nga xonga, va tivaka ku swi yentxa kahle swilo, va nga ni ndhuma kumbe hileswi va nga ganya. Phela Davhida a a li na swona swilo leswo hinkwaswu kambe a tame a tiveka hansi wutomi la yena hinkwalu. Loko Davhida a dlaye Goliyadi, Hosi Sawulo a mu nyike n’wana wa yena leswaku a va nsati wa yena. Kambe leswi a a tiveka hansi, Davhida a te: “No va mani mina, naswona maxaka ya mina ni ndjangu wa papayi i vamani aIsrayele leswaku ni va mukon’wana wa hosi?” (1 Sam. 18:18) I yini lexi nga pfuna Davhida swaku a tiveka hansi minkama hinkwayu? Hikusa a a swi tiva swaku swilo hinkwaswu leswi a a li na swona, wutivi leli a a li na lona ni mintirho leyi a a li na yona a a nyikiwe hi Xikwembu hikusa xi tiveke hansi leswaku xi kota ku tirhisana na yena. (Pis. 113:5-8) Davhida a a swi tiva leswaku swilo hinkwaswu swa swinene leswi a a li na swona a swi huma ka Yehovha. — Vona ni 1 Vakorinto 4:7.
Ku fana na Davhida, vanhu va Yehovha namuntlha va tikarhatela ku tiveka hansi. Phela swa hlamalisa ku tiva swaku hambi Yehovha lweyi a nga yentxa swilo hinkwaswu a tiveka hansi. (Pis. 18:35) Hi yingisa marito lama nge: “Yambalani timpsalu ni lirhandzu, wunene, ku tiveka hansi, ku rhula ni ku lehisa mbilu.” (Kol. 3:12) Nchumu wun’wana lowu hi pfunaka ku tiveka hansi i lirhandzu, hikusa lona “a li tibyeli, a li tikulisi.” (1 Kor. 13:4) Loko hi tiveka hansi, swi nga yentxa swaku vanhu van’wana va tsakela ku djondza hi Yehovha. Hi xikombiso, ku fana ni leswi wanuna a nga ha tirhelaka Yehovha hi ku vona mahanyelo ya manene ya nsati wa yena, na hina loko vanhu va hi vona hi tiveka hansi va ta lava ku djondza hi Yehovha. — 1 Ped. 3:1.
Lavetela Xuma Ka Rito La Xikwembu
Perspicaz vol. 2 paj. 727 par. 2
Muprofeta
Hambileswi vaprofeta a va langiwa hi moya wa ku kwetsima wa Yehovha, a hi minkama hinkwayu leyi loko va vulavula a va kongomisiwa hi moya wa ku kwetsima. Kambe minkama yin’wana moya wa Yehovha a wu ‘fika henhla ka vona’ leswaku wu va yentxa va vulavula leswi Yehovha a a lava ku swi byela vanhu. (Ezk 11:4, 5; Mk 3:8) Phela moya wa ku kwetsima a wu pfuna vaprofeta leswaku va vulavula leswi Yehovha a swi lavaka. (1Sa 10:10; Yr 20:9; Am 3:8) Vaprofeta a vo ngo yentxa swilo swaku kala swi nga tolovelekanga ntsena, kambe mavulavulelo ya vona ni leswi a va swi yentxa a swi hlamalisa. Hi mhaka leyo, a swi twala loko vanhu va vula swaku van’wana a va “tiyentxa vaprofeta” hikusa leswi a va swi yentxa a swi nga tolovelekanga. (1Sa 10:6-11; 19:20-24; Yr 29:24-32; vona ni Min 2:4, 12-17; 6:15; 7:55.) Leswi vaprofeta a va tinyimisele ku wu yentxa hi ku hiseka ni xihlonipho ntirho lowu Yehovha a nga va nyika wona, minkama yin’wana a va yentxa swilo swaku a swi nga tolovelekanga. Phela vanhu van’wana a va va vona ingi vo hlanya hi mhaka ya leswi a va swi yentxa. Leswo swi yentxekile nkama muprofeta mun’wana a nga sungula ku vulavula phambeni ka masonchwa loko Yehu a totiwa. Nkama va nga vona leswi a a swi yentxa, va tsumbule swaku a a li muprofeta va tlhela va pfumela leswi a nga swi vula. (2Th 9:1-13; vona ni Min 26:24, 25.) Nkama Sawulo na a hlongolisa Davhida, a yentxe swilo ingi i muprofeta, Sawulo a hlivile mpahla “a yetlela kolanu na a nga yambalanga nchumu siku lolelo hinkwalu ni wusiku la kona,” naswona hi mhaka ya leswo, Davhida a swi kotile ku baleka. (1Sa 19:18–20:1) Leswo a swi vuli swona swaku vaprofeta a va tshamela ku hlivila mpahla hikusa Bibele a li swi vuli leswo. Kambe Bibele li tlhela li vulavula hi makhambi mambirhi lani muprofeta a nga hlivila mpahla leswaku a ta tiyisekisa mhaka leyi a a lava ku yi vula. (Esa 20:2-4; Mk 1:8-11) Bibele a li vuli swaku hi mhaka muni Sawulo a hlivile mpahla, swi nga yentxeka a hlivile mpahla leswaku a danisiwa, leswaku a hlivilisiwa mpahla ya yena ya wuhosi, leswaku a vona swaku Yehovha a ni matimba ku mu tlula kumbe hi mhaka ya swivangelo swin’wana.
4 KU YA KA 10 KA ABRIL
XUMA XI NGA KA RITO LA XIKWEMBU | 1 SAMUWELE 20-22
“Leswi U Nga Swi Yentxaka Swaku U Va Munghanu Wa Munene”
Lava Vanghanu Va Ntiyiso Na Magamu Ma Nga Se Fika
Namuntlha wa siku, vamakwerhu va kumana ni swikarhato swa ku hambanahambana. Hi xikombiso votala va kumana ni timhangu ta ntumbuluku kumbe tinghozi leti vangiwaka hi vanhu. Loko swoleswo swi humelela, van’wana va hina hingahaswi kota kuva yamukela amakaya ya hina, kasi van’wana vangahava pfuna hi kuva nyika male. Kambe hinkwerhu ka hina hingaswi kota kukombela Yehovha leswaku a pfuna vamakwerhu lava. Swinga yendleka hingaswi tivi swaku hita yendla yini loko hi vona makwerhu wokarhi na a hele ntamu kumbe na a godolile. Kambe hingaswi kota kumu pfuna. Hi xikombiso, hinga tinyika nkama wa kubula na yena, himu yingisela kahle loko a vulavula. Naswona hingamu komba tsalwa lokarhi leli hili rhandzaka leswaku himu chavelela. (Esa. 50:4) Xalisima hintamu, i kuva hiva kusuhi ni vanghanu va hina loko va lava kupfuniwa. — Lerha Swivuriso 17:17.
Murindzi 15/02/08 paj. 8 par. 7
Famba Ka Tindlela Ta Yehovha
Yehovha a lava swaku hi va vanghanu va ku tshembeka. (Swi. 17:17) Yonathani n’wana wa Hosi Sawulo a a li munghanu wa Davhida. Loko Yonathani a twe leswaku Davhida a dlaye Goliyadi, ‘Yonathani na Davhida va ve vanghanu va vakulu naswona Yonathani a rhandze Davhida ku fana ni leswi a a tirhandzisa xiswona.’ (1 Sam. 18:1, 3) Yonathani a byele Davhida swaku Sawulo a lava ku mu dlaya. Loko Davhida a balekile, Yonathani a tlhele a ya tlhangana na yena a gama a yentxa xipfumelelwanu na yena. Phela a ku sale katsongo swaku Sawulo a dlaya Yonathani hi mhaka ya leswi a nga byela Davhida swaku papayi wa yena Sawulo a a lava ku mu dlaya. Hambileswo, Yonathani na Davhida va tlhele va kumana va tiyisa wunghanu la vona. (1 Sam. 20:24-41) Ka siku la wugamu leli va nga tlhangana hi lona, Yonathani a tiyise Davhida a tlhela a mu byela swaku a fanele a tshemba Xikwembu. — 1 Sam. 23:16-18.
Murindzi 15/10/09 paj. 19 par. 11
Kuma Vanghanu Va Vanene Ka Misava Leyi Kalaka Yi Nga Na Lirhandzu
Tshembeka. Solomoni a tsale leswi: “Munghanu wa ntiyiso a kombisa lirhandzu minkama hinkwayu naswona i makwenu wa ntiyiso loko u ni swikarhatu.” (Swi. 17:17) Loko Solomoni a tsala marito wolawo, swi nga ha yentxeka a a pimisa hi wunghanu leli papayi wa yena Davhida a a li na lona na Yonathani. (1 Sam. 18:1) Hosi Sawulo a a lava leswaku n’wana wa yena Yonathani a mu pfaleta a va hosi ya Israyele. Kambe Yonathani a a swi tiva leswaku Yehovha a a lange Davhida leswaku a va hosi. Ku hambana na Sawulo, Yonathani a nga mu kweletanga Davhida naswona a nga kwatanga loko Davhida a dzunisiwa naswona a nga ma pfumelanga mavunhwa lawa Sawulo a nga ma vula hi Davhida. (1 Sam. 20:24-34) Se hina hi nga mu tekelelisa ku yini Yonathani? Loko vanghanu va hina va kuma mintirho abandleni, ku nga va swaku hi ta tsaka na vona? Loko va kumana ni swikarhatu, hi ta va tiyisa hi tlhela hi va seketela? Loko hi twa munghanu wa hina a hleviwa, ku nga va swaku hi ta swi kholwa leswi vanhu va swi vulaka, kumbe hi ta vhikela munghanu wa hina hi ku tshembeka, ku fana na Yonathani?
Lavetela Xuma Ka Rito La Xikwembu
Murindzi 15/03/05 paj. 24 par. 5
Tipontu Ta Lisima Ta Buku La Samuwele Wa Ku Sungula
21:12, 13. Yehovha a nyimela swaku hi tirhisa mimpimiso ya hina hi ndlela ya yinene leswaku hi lwisana ni swikarhatu leswi hi nga ha kumanaka na swona ka wutomi la hina. A hi nyike Bibele leswaku hi va ni wutlharhi, hi va ni wutivi li tlhela li hi pfuna swaku hi pimisa kahle. (Swivuriso 1:4) Naswona a hi nyike madoda swaku ma hi pfuna.
18 KU YA KA 24 KA ABRIL
XUMA XI NGA KA RITO LA XIKWEMBU | 1 SAMUWELE 23-24
“Lehisa Mbilu U Nyimela Yehovha”
Murindzi 01/04/04 paj. 16 par. 8
Tshemba Yehovha Loko Wutomi La Wena Li Txintxa
Davhida a yalile ku mu yentxela swilo swaku biha Sawulo. Leswi a a ni lipfumelo a tlhela a lehisa mbilu, a swi vone swi yampsa swaku Yehovha a li yena a lunghisaka timhaka. Nkama lowu Sawulo a nga suka hi lani a a li kona, Davhida a mu byele leswi: “Yehovha a a yavanyisi axikarhi ka mina na wena funtshi Yehovha a a ku hakelisi, kambe voko la mina a li nge lwi na wena.” (1 Samuwele 24:12) Hambileswi a a swi tiva leswaku leswi a swi yentxiwa hi Sawulo a swi nga fanelanga, Davhida a nga lwanga na yena, naswona a nga vulavulanga hi ndlela ya ku biha na Sawulo. Minkama yin’wana Davhida a tikhomile swaku a nga mu yentxeli swa ku biha Sawulo, kambe a a tshemba swaku Yehovha hi yena a nga ta lulamisa timhaka. — 1 Samuwele 25:32-34; 26:10, 11.
Murindzi 01/06/04 mapaj. 22-23
Minkama Hinkwayu Tshemba Yehovha
Minkama hinkwayu hi fanele hi tirhisa Bibele leswaku hi lulamisa swikarhatu swa hina hi tlhela hi nyimela Yehovha. Yakobo a te: “Kambe tshikani ku tiyisela ku yentxa ntirho wa kona, leswaku mi ta hetiseka mi tlhela mi va va ku lulama ka hinkwaswu, mi nga pfumali nchumu.” (Yakobo 1:4) Hi fanele hi pfumelela ku tiyisela ku “yentxa ntirho wa kona” hi ku lwisana ni swikarhatu anze magamu, na hi nga zami ku swi lulamisa hi ku ya hi mavonelo ya hina kambe na hi tirhisa leswi Bibele li hi byelaka swona. Loko hi yentxa leswo, lipfumelo la hina li ta tiya. Phela Yosefa na Davhida na vona va tiyisele swikarhatu. A va zamanga ku lulamisa swikarhatu hi ku ya hi mavonelo ya vona kambe va tshembe Yehovha va tlhela va yentxa leswi a swi lavaka. Hi mhaka leyo, a va katekisile a tlhela a va tirhisa swaku va ponisa ni ku rhangela vanhu va yena. — Genesa 41:39-41; 45:5; 2 Samuwele 5:4, 5.
Na hina hi nga ha kumana ni swikarhatu leswi nga hi yentxaka hi pimisa ku swi lulamisa na hi nga tirhisi Bibele. Hi xikombiso, swa ku karhatela ku kuma munhu wa munene wa ku chada na yena? Loko ku li leswo, yentxa hinkwaswu leswi u nga swi kotaka swaku u yingisa nawu wa Yehovha lowu nge hi fanele hi chada “aHosini ntsena.” (1 Vakorinto 7:39) U kumana ni swikarhatu ka wukati la wena? Handle ka ku zama ku hambana ni lweyi u nga chada na yena kumbe ku dlaya wukati, zamani ku bulisana swaku mi lulamisa xikarhatu lexi mi kumanaka na xona. (Malakiya 2:16; Vaefeza 5:21-33) Swa ku karhatela ku kuma male ya ku yenela swaku u hlayisa ndjangu wa wena? Tshemba Yehovha hi ku kala u nga tipeti ka mintirho leyi kalaka yi nga mu tsakisi naswona u nga kanganyisi swaku u kuma male. (Tipisalema 37:25; Vaheberu 13:18) Hinkwerhu hi fanele hi yentxa hinkwaswu leswi hi nga swi kotaka swaku hi yentxa swilo hi ku ya hi leswi Yehovha a swi lavaka. Loko hi yentxa leswo, Yehovha a ta hi pfuna swaku hi lulamisa swikarhatu swa hina a tlhela a hi katekisa. — Mikiya 7:7.
Lavetela Xuma Ka Rito La Xikwembu
Murindzi 11/17 paj. 27 par. 11
U Nga Pfumeleli Nchumu Xi Ku Sivela Ku Kuma Hakelo
Loko hi tikarhatela ku va ni lirhandzu ni wunene a hi nge vi na lona a wukwele. Bibele li li: “Lirhandzu li lehisa mbilu naswona li ni wumbilu. Lirhandzu a li na wukwele.” (1 Kor. 13:4) Hi fanele hi tikarhatela ku vona swilo hilani Yehovha a swi vonaka hi kona hi vona vamakwerhu na va li swirho swa miri wun’we ku nga bandla. Loko hi yentxa leswo a hi nga ta va ni wukwele, naswona swi ta hi yentxa hi tsaka ni vamakwerhu, hilani Bibele li vulaka hi kona loko li ku: “Loko xirho xin’wana xi dzunisiwa, swirho leswin’wana hinkwaswu swi tsaka na xona.” (1 Kor. 12:16-18, 26) Hi mhaka leyo, handle ka ku va ni wukwele, hi ta tsaka loko van’wana swi va fambela kahle. Pimisa hi leswi Yonathani n’wana wa Hosi Sawulo a nga swi yentxa. A nga vanga ni wukwele loko a twa swaku Davhida hi yena a nga ta va hosi, kambe a tsake na yena. (1 Sam. 23:16-18) Na hina hi fanele hi va ni lirhandzu ni wunene ku fana na Yonathani.
25 KA ABRIL KU YA KA 1 KA MAIO
XUMA XI NGA KA RITO LA XIKWEMBU | 1 SAMUWELE 25-26
“Pimisa Kahle Na U Nge Se Yentxa Leswi U Swi Lavaka”
Tekelela mapaj. 78-79 mapar. 10-12
A Yentxe Swilo Hi Wutlharhi
Kasi i yini leswi masonchwa ya Davhida ma nga swi yentxela varisi va tinyempfu ta Nabali? Leswi masonchwa ya Davhida a ma ni matimba, loko a mo swi lava, a ma ta va ma teke tinyempfu ta Nabali leswaku ma tidlela. Kambe a va swi yentxanga leswo. Handle ka leswo, va pfune varisi va Nabali ku vhikela tinyempfu ta vona. (Lerha 1 Samuwele 25:15, 16.) Phela, a tinyempfu letiyani ni varisi va tona a va kumana ni swikarhatu, hikusa hi nkama wolowo a ku ni swiharhi swa nhova, funtshi a va ta dumeliwa hi swigevenga swa matiko man’wana leswaku swi yiva tinyempfu.
Nkama a va li mananga, Davhida a swi mu karhatela ku kuma swakudla leswaku a nyika masonchwa ya yena siku ni siku. Hi mhaka leyo, siku lin’wana Davhida a rhumele 10 wa vanhu swaku va ya kombela ku pfuniwa hi Nabali. Phela Davhida a ye a ya kombela ku pfuniwa hi nkama wa wunene hikusa a ku li nkama lowu tinyempfu a ti tsemetiwa mavoya hi wona naswona hi nkama wolowo vanhu a va rhandza ku nyikana, naswona vanhu a va tolovela ku hamba mafexta. Leswi Nabali a a li mukulu ka Davhida, loko Davhida a vulavula na yena a tiveke hansi a ku hi mina “Davhida n’wana wa wena.” Se Nabali a yentxe yini? — 1 Sam. 25:5-8.
Handle ka ku mu pfuna, a mu kwatelile. Nabali a va layile hi ku kwata lava Davhida a nga va rhuma. Nabali a a nga swi lavi ku va nyika swakudla swa yena, mati ni swin’wana. A a vona Davhida na a nga li wa nchumu hileswi a a tshamela ku baleka. Nabali a a yentxa swilo ku fana na Sawulo hikusa hinkwavu a va mu nyenya Davhida. Funtshi hi vambirhi a va nga swi yentxi leswi Yehovha a swi lavaka. Kambe Yehovha a a mu rhandza Davhida naswona a a mu vona a li wa lisima, funtshi a mu langile leswaku a fuma Israyele. — 1 Sam. 25:10, 11, 14.
Tekelela paj. 80 par. 18
A Yentxe Swilo Hi Wutlharhi
Loko Abigayele a ya ka Davhida a fike a kombela ku rivaleliwa ingi hi yena a nga djoha. A nga yalanga swaku nuna wa yena Nabali a yentxe swilo hi ku pfumelelana ni leswi vito la yena li vulaka swona, funtshi swi nga yentxeka a byele Davhida leswaku a swi nga ta pfuna nchumu ku khatisa munhu wa ku fana na Nabali. Leswi Abigayele a a swi tiva leswaku Davhida a rhumiwe hi Yehovha ni swaku a lwa “tinyimpi ta Yehovha,” a mu hloniphile. Marito lawa a nga gama a ma vula ma kombisa swaku a a swi tiva swaku Yehovha a lava swaku Davhida a va hosi ya Israyele. Yena a te: “Yehovha . . . a ta ku veka swaku u va murhangeli wa Israyele.” Abigayele a game a kombela Davhida leswaku a nga yentxi nchumu lexi nga ta mu yentxa a va ni nandzu wa ngati a tlhela a biwa hi lipfalu. (Lerha 1 Samuwele 25:24-31.) Impela marito ya Abigayele ma khumba mbilu!
Lavetela Xuma Ka Rito La Xikwembu
Tekelela paj. 80 par. 16
A Yentxe Swilo Hi Wutlharhi
Ku nga va swaku leswi Abigayele a nga swi yentxa swi vula swaku a a nga li hloniphi wunhloko la nuna wa yena? Ihim. Nabali a nga mu kombanga wunene mutotiwa wa Yehovha Davhida, naswona a ku sale kutsongo leswaku swilo swa ku biha leswi a swi yentxiwa hi Nabali swi yentxa swaku vanhu va ku kala va nga na nandzu va dlayiwa va nga dlanga xa munhu. Loko Abigayele a a nga swi nghenelanga, ku nga va swaku na yena a a ta va ni nandzu hi mhaka ya leswi nuna wa yena a nga swi yentxa? Phela ka hinkwaswu leswi Abigayele a a swi yentxa, a a fanele a hlonipha Xikwembu ku tlula nuna wa yena.