SAMBIRO 37
Ivyo Baibolo Likuyowoya pa Nkhani ya Ntchito na Ndalama
Kasi nyengo yinyake muli kufipapo mtima umo mungasangira ntchito panji ndalama? Nyengo zinyake chingaŵa chakusuzga kuti tisange vyakukhumbikwa pa umoyo na kuteŵetera Yehova mwakugomezgeka. Kweni Baibolo lili na ulongozgi uwo ungatovwira pa nkhani iyi.
1. Kasi Baibolo likuti wuli pa nkhani ya ntchito?
Chiuta wakukhumba kuti tikondwenge na ntchito iyo tikugwira. Baibolo likuti “palije chiwemi kuluska kuti munthu . . . [wasangwe] na mulimo wake.” (Mupharazgi 2:24) Yehova wakulimbikira chomene ntchito. Iyo wakukondwa chomene para nase tikulimbikira ntchito ndipo nase tikujipulika makora chomene.
Ntchito njiwemi waka. Kweni tikwenera yayi kuzomerezga kuti ntchito ndiyo yiŵe yakuzirwa chomene kuluska kusopa Yehova. (Yohane 6:27) Iyo wali kulayizga kuti para tikumuŵika pakwamba mu umoyo withu, watipenge vyose ivyo tikukhumbikwira mwakuthupi.
2. Kasi tingachita wuli kuti tiwonenge ndalama mwakwenelera?
Baibolo likuti ‘ndalama ntchivikiliro,’ kweni likutiso ndalama pazekha zingawovwira yayi munthu kuti waŵe wakukondwa. (Mupharazgi 7:12) Lekani nyengo zose tikuchiskika kuti tingatemwanga chomene yayi ndalama, kweni ‘tikhorwenge na vinthu ivyo vilipo.’ (Ŵazgani Ŵahebere 13:5.) Para tikukhorwa na ivyo tili navyo, tenjerwenge yayi kuti tisange vinthu vinandi chomene. Tinganjira yayi mu ngongole zambura kwenelera. (Zintharika 22:7) Tingatchova yayi njuga panji kuchita vinthu vyambura kwenelera kuti tisambazge luŵiro.
3. Kasi tingachita wuli kuti tipengeko ŵanyithu vinthu?
Yehova ni Chiuta uyo wakupeleka mwawanangwa, ndipo wakukondwa chomene para nase ‘tikupeleka mwawanangwa, kweniso kuŵa ŵakunozgeka kugaŵana na ŵanyithu.’ (1 Timote 6:18) Tikupeleka mwawanangwa ndalama zithu kuti ziwovwire mu mpingo, kovwira awo ŵakukhumbikwira wovwiri, chomenechomene Ŵakhristu ŵanyithu. Yehova wakukondwa na unandi wa ndalama izo tikupeleka yayi, kweni chifukwa icho tikupelekera. Para tikupeleka kufumira pasi pamtima tikuŵa ŵakukondwa, ndipo Yehova nayo wakukondwa chomene.—Ŵazgani Milimo 20:35.
MANYANI VINANDI
Wonani uwemi wa kuwona ntchito mwakwenelera kweniso wa kukhorwa na ivyo tili navyo.
4. Ntchito yinu yichindikenge Yehova
Umo tikugwilira ntchito vikwenera kulongora kuti tili paubwezi wakukhora na Yehova. Wonelerani VIDIYO, kufuma apo dumbiskanani mafumbo agha.
Kuyana na ivyo mwawona mu vidiyo, kasi ntchivichi chamukondweskani umo Jason wakugwilira ntchito kweniso umo wakuchitira vinthu?
Kasi wakachita wuli kuti wawonenge ntchito mwakwenelera?
Ŵazgani Ŵakolose 3:23, 24, kufuma apo dumbiskanani fumbo ili:
Chifukwa wuli ntchakuzirwa chomene kuti tiwonenge ntchito mwakwenelera?
Ntchito njiwemi waka. Kweni tikwenera yayi kuzomerezga kuti ntchito ndiyo yiŵe yakuzirwa chomene kuluska kusopa Yehova
5. Tikutumbikika para tikukhorwa na ivyo tili navyo
Ŵanthu ŵanandi mazuŵa ghano ŵakuŵikapo mtima chomene kuti ŵasange ndalama zinandi. Kweni Baibolo likutipa ulongozgi wakuzirwa chomene. Ŵazgani 1 Timote 6:6-8, kufuma apo dumbiskanani fumbo ili:
Kasi Baibolo likutichiska kuchitachi?
Tingaŵa ŵakukondwa nanga tingaŵa na vinthu vichoko waka. Wonelerani VIDIYO, kufuma apo dumbiskanani fumbo ili.
Kuyana na ivyo mwawona mu vidiyo, kasi ntchivichi chikawovwira mabanja agha kuti ghaŵe ghakukondwa nangauli ghakasanganga ndalama zichoko?
Kweni wuli usange tili kale na ndalama zinandi mbwenu tikukhumbaso zinyake? Yesu wakayowoya ntharika iyo yikulongora uheni wakukhumba ndalama zinandi. Ŵazgani Luka 12:15-21, kufuma apo dumbiskanani fumbo ili:
Kasi mwasambira vichi mu ntharika ya Yesu?—Wonani vesi 15.
Ŵazgani Zintharika 10:22 na kuyaniska na 1 Timote 6:10. Kufuma apo dumbiskanani mafumbo agha:
Kasi mukuwona kuti chakuzirwa chomene ntchivichi? Kuŵa paubwezi na Yehova panji kuŵa na ndalama zinandi? Chifukwa wuli?
Kasi munthu wakusangana na masuzgo wuli para wakusuŵilira waka kupenja ndalama zinandi?
6. Yehova watipenge ivyo tikukhumbikwira
Ntchito kweniso kusoŵa kwa ndalama vingayezga chipulikano chithu mwa Yehova. Wonelerani VIDIYO kuti mumanye ivyo mungachita para mwayezgeka pa nkhani ya ndalama panji ntchito, kufuma apo dumbiskanani mafumbo agha.
Kuyana na ivyo mwawona mu vidiyo, kasi mubali wakasangana na masuzgo wuli?
Kasi wakachita wuli kuti wamalane na masuzgo agho wakakumananga nagho?
Ŵazgani Mateyu 6:25-34, kufuma apo dumbiskanani fumbo ili:
Kasi Yehova waŵalayizga vichi wose awo ŵakuŵika iyo pa malo ghakwamba?
IVYO ŴANYAKE ŴAKUYOWOYA: “Nkhwenera kulimbikira chomene ntchito kuti nipwelelere banja lane. Ntheura ningakwaniska yayi kuwungana sabata yiliyose.”
Kasi ni lemba wuli ilo likumukhozgani kuti kudangizga kusopa Yehova nyengo zose nkhwakuzirwa chomene?
MWAKUDUMURA
Ntchito na ndalama ni viwemi waka, kweni tikwenera yayi kuzomerezga kuti vititondeske kuteŵetera Yehova.
Kuweleramo
Kasi ntchivichi chingamovwirani kuti muwonenge ntchito mwakwenelera?
Kasi mukutumbikika wuli para mukukhorwa na ivyo muli navyo?
Kasi mungalongora wuli kuti mukugomezga layizgo la Yehova lakuti wapwelelerenge ŵanthu ŵake?
SANGANI FUNDO ZAKUSAZGIKIRA
Wonani usange Baibolo likuti ndalama ni ziheni.
“Kasi Ndalama Ni Msisi wa Mtundu Uliwose wa Vinthu Vyakupweteka?” (Nkhani ya pa Intaneti)
Wonani ivyo tingachita kuti tichindikenge Chiuta na ndalama zithu.
“Kasi Baibolo Likuti Wuli pa Nkhani ya Kupa?” (Nkhani ya pa Intaneti)
Kasi kutchova njuga nkhuheni?
“Kasi Baibolo Likuti Wuli pa Nkhani ya Kutchova Njuga?” (Wukani!, Malichi 2015)
Wonani ivyo vikawovwira mwanalume munyake kuti waleke kutchova njuga na kwiba.
“Nkhakhumbanga Kuchita Maseŵero Ghakuphalizgana pa Mahachi” (Gongwe la Mulinda, Novembala 1, 2011)