Wohwɛ a Nyamesom Betumi De Asomdwoe Aba?

NEA ENTI A EBINOM TE NKA SAA

Wɔgye di sɛ nyamesom akannifo betumi aboa ama asomdwoe aba. Asɔfo pii taa kyerɛkyerɛ nkurɔfo nea wɔyɛ a ɛbɛma asomdwoe aba. Enti nkurɔfo bebree wɔ adwene sɛ, ntɔkwa-ntɔkwa a atena hɔ akyɛ paa mpo, sɛ asɔfo no ba mu a, ɛto betumi atwa.

Wɔgye di sɛ, sɛ nkurɔfo de nea wɔn som kyerɛkyerɛ wɔn no bɔ wɔn bra a, ebetumi aboa ama asomdwoe aba. Ɔbenfo bi kaa sɛ, wɔn a wɔrebɔ mmɔden sɛ wɔbɛma asomdwoe aba wiase no, wɔn mu dodoɔ no ara “hu wɔn ho sɛ wɔreyɛ nyame adwuma.” Saa adwene no ma wɔnya ahoɔden de toa so hwehwɛ asomdwoe, na ɛma wɔnya anidaso kɛse sɛ asomdwoe betumi aba.

WUDWEN HO SƐN?

Ebia wobɛka sɛ nyamesom betumi ama asomdwoe aba wiase, nanso nea akɔ so wɔ abakɔsɛm mu no ama yɛahu sɛ, mpɛn pii no, nyamesom mmom na epiapia nkurɔfo ma wɔko.

• Ɛsono ɔsom biara ne nea wɔgye di ne nea wɔka, enti wohwɛ a, ɔsom betumi de asomdwoe aba wiase?

• Wohwɛ sɛnea nyamesom piapia nkurɔfo ma wɔko no a, yebetumi aka paa sɛ ebetumi aka nkurɔfo abom ama wɔayɛ baako?

  

  Benkum: Danil Semyonov/AFP via Getty Images; nifa so wɔ ase hɔ: Dmytro Smolyenko/Ukrinform/Future Publishing via Getty Images

  Ɔsom a ɛhyɛ nkurɔfo kutupa ma wɔtentan wɔn ho na wɔdi ako no, ɛrentumi mfa asomdwoe mma asaase so da

NEA BIBLE AKA

Ɔsom a wɔmfa nea Bible kyerɛkyerɛ mmɔ wɔn bra no, Adiyisɛm nwoma no frɛ wɔn “Babilon Kɛse.”a (Adiyisɛm 17:5) Nnipa a wɔn ho nni asɛm a wɔawuwu wɔ wiase no, bebree wɔ hɔ a wɔn wuo no, Babilon Kɛse no na ɛhyɛ akyi.

Ɛnnɛ ne nnɛ nyinaa, akokoakoko a ɛkɔ so no, nyamesom na ɛtaa kɔfa ba. Nyamesom akannifo taa piapia wɔn akyitaafo ma wɔne ɔsom afoforo a ɛsono wɔn gyidi kɔko. Ɛtɔ da mpo a, wɔpiapia wɔn som mufo ma wɔne wɔn som mufo a wɔte kuro foforo so kɔko. Ɔsom a ɛhyɛ nkurɔfo kutupa ma wɔtan wɔn ho na wɔdi ako no, ɛrentumi mfa asomdwoe mma asaase so da!

Nanso ɔsom a wɔde nea Bible kyerɛkyerɛ bɔ wɔn bra no deɛ, Bible kaa wɔn ho asɛm sɛ, “wɔde wɔn mfoa bɛyɛ nsɔw.” (Yesaia 2:​2-4) Saa asɛm no yɛ kasakoa a ɛkyerɛ sɛ, akokoakoko a ɛrekɔ so wɔ wiase no, wɔremfa wɔn ho nhyem. Afei nso, wɔbɔ mmɔden sɛ wɔbenya suban a ɛyɛ fɛ te sɛ ɔdɔ, ayamye, ne ahohyɛso.—Galatifo 5:​22, 23.

Yehowa Adansefo fi aman ne mmusua ahorow ahorow mu, nanso Bible a wɔsua no aboa wɔn ma wɔhu wɔn ho sɛ wɔyɛ anuanom, na wɔne wɔn ho wɔn ho te asomdwoe mu. Sɛ ɛyɛ den ma wo sɛ wubegye adi a, kɔ nhyiam a wɔyɛ no bi, na fa w’ani kɔhwɛ.