زبور

 2 میری غلطی پوری طرح دھو دے

اور مجھے میرے گُناہ سے پاک کر

 3 کیونکہ مجھے اچھی طرح اپنے گُناہوں کا احساس ہے

اور میرا گُناہ ہمیشہ میرے ذہن میں*‏ رہتا ہے۔‏

 4 مَیں نے تیرے خلاف، ہاں، تیرے ہی خلاف گُناہ کِیا ہے؛‏

مَیں نے وہ کام کِیا ہے جو تیری نظر میں بُرا ہے۔‏

اِس لیے تُو اپنی باتوں میں سچا*‏ ہے

اور تیرا فیصلہ صحیح ہے۔‏

 5 دیکھ، مَیں پیدائش سے ہی گُناہ‌گار ہوں؛‏

گُناہ کی حالت میں میری ماں کے پیٹ میں میری زندگی وجود میں آئی۔‏

 6 دیکھ، تُو اُن لوگوں سے خوش ہوتا ہے جو دل کے سچے ہیں؛‏

میرے دل کو*‏ سچی دانش‌مندی سکھا۔‏

 7 میرے گُناہ کو زوفے*‏ سے صاف کر تاکہ مَیں پاک ہو جاؤں؛‏

مجھے دھو تاکہ مَیں برف سے زیادہ سفید ہو جاؤں۔‏

 8 مجھے خوشی اور جشن کی آوازیں سننے دے

تاکہ میری ہڈیاں جو تُو نے کچل دی ہیں، خوش ہو سکیں۔‏

 9 میرے گُناہوں سے اپنا مُنہ پھیر لے*‏

اور میری ساری غلطیاں مٹا*‏ دے۔‏

10 اَے خدا!‏ مجھے پاک‌دل عطا کر

اور میرے اندر ایک نیا اور مضبوط جذبہ*‏ پیدا کر۔‏

11 مجھے اپنے حضور سے نہ نکال

اور اپنی پاک روح*‏ مجھ سے نہ ہٹا۔‏

12 تُو نے مجھے نجات دِلا کر جو خوشی بخشی تھی، وہ مجھے لوٹا دے؛‏

میرے اندر یہ خواہش*‏ جگا کہ مَیں تیری فرمانبرداری کروں۔‏

13 مَیں گُناہ‌گاروں کو تیری راہوں کی تعلیم دوں گا

تاکہ وہ تیرے پاس لوٹ آئیں۔‏

14 اَے خدا!‏ مجھے نجات دِلانے والے خدا!‏

مجھے خون کے جُرم سے چھڑا تاکہ میری زبان خوشی خوشی تیری نیکی کا اِعلان کرے۔‏

15 اَے یہوواہ!‏ میرے لب کھول دے

تاکہ میرا مُنہ تیری بڑائی کر سکے

16 کیونکہ تُو قربانی نہیں چاہتا ورنہ مَیں تیرے حضور قربانی پیش کر دیتا؛‏

تُو بھسم ہونے والی سالم قربانی سے خوش نہیں ہوتا۔‏

17 پشیمان دل*‏ ایسی قربانی ہے جس سے خدا خوش ہوتا ہے؛‏

اَے خدا!‏ تُو دُکھی اور ٹوٹے دل کو نہیں ٹھکرائے گا۔‏*‏

18 اپنا کرم فرما اور وہ کام کر جن میں صِیّون کی بھلائی ہے‏؛‏

یروشلم کی دیواریں بنا۔‏

19 پھر تُو نیکی کی قربانیوں، بھسم ہونے والی قربانیوں اور سالم قربانیوں سے خوش ہوگا

اور تیری قربان‌گاہ پر بیل قربان کیے جائیں گے۔‏