“Jẹn Avwanre Nene Uwe”

1, 2. (a) Die yen Jihova tare nẹ ọ cha phia vwẹ ọke rẹ avwanre nana? (b) Enọ vọ yen a cha kpahenphiyọ vwẹ uyovwinrota nana? (Ni uhoho rẹsosuọ na.)

JIHOVA tare nẹ vwẹ ọke rẹ avwanre nana, “eshare ihwe che ne ẹgborho rẹ ephẹre kephẹrẹ rhe cha yọnre ewun rẹ ohwo rẹ Ju, ta nẹ, Jẹn avwanre nene uwe, kidie me nyori nẹ Ọghẹnẹ vẹ ovwan herọ.” (Zekaraya 8:23) “Ohwo rẹ Ju” na mudiaphiyọ ihwo rẹ Ọghẹnẹ vwẹ ẹwẹn ọfuanfon rọyen vwọ jẹreyọ na. E ji se ayen “Izrẹl rẹ Ọghẹnẹ.” (Galesha 6:16) “Eshare ihwe” na mudiaphiyọ ihwo ri vwo iphiẹrophiyọ rẹ ayen vwọ dia otọrakpọ na bẹdẹ. Ayen riẹnre nẹ Jihova ku ebruphiyọ rọyen ku ẹko rẹ ihwo ra jẹreyọ na, jẹ ọghọ rọde rẹ ayen vwo kuomakugbe ihwo nana vwọ ga.

² Kerẹ ọmraro Zekaraya, Jesu je tanẹ ihwo rẹ Ọghẹnẹ che kuomakugbe ga. O se ihwo re rhẹro rẹ akpeyeren vwẹ odjuvwu “imigegede,” o de rhe se i ri vwo iphiẹrophiyọ re vwọ dia akpọ na “igodẹ efa.” Jẹ Jesu tare nẹ ayen eje cha dia “ekru rẹ igodẹ ọvo,” ri nene ọyen rọ dia “osuigegede ọvuọvo” rayen. (Luk 12:32; Jọn 10:16) Rọ vwọ dianẹ ẹko ivẹ yen herọ na, ihwo evo se roro: (1) Ofori nẹ igodẹ efa na riẹn edẹ rẹ ihwo ra jẹreyọ na eje? (2) Ubiẹro vọ yen ofori nẹ Inenikristi ra jẹreyọ vwo ni oma rayen? (3) Ọ da dianẹ ohwo ọvo vwẹ ukoko mẹ ria emu ovwọnvwọn na, ẹro vọ mi vwo no? (4) Siẹrẹ uchunu rẹ ihwo re ria emu ovwọnvwọn na de buẹnphiyọ, ofori ọnana vwo kpokpo ẹwẹn mẹ? Uyovwinrota nana cha kpahenphiyọ enọ nana.

 3. Avwanre cha sa riẹn ihwo re cha dia usun rẹ 144,000 na-a, diesorọ?

³ Ofori rẹ igodẹ efa na vwọ riẹn edẹ rẹ ihwo ra jẹreyọ na eje re jehẹ otọrakpọ na? Ẹjo. Diesorọ? Kidie avwanre che se vwo imuẹro kokoroko nẹ ihwo nana che ghini kpo odjuvwu-u.^[1] (Ni eta rẹ odjefiotọ.) Dede nẹ Ọghẹnẹ durhie ayen kpo odjuvwu, uphẹn nana che te ayen obọ siẹrẹ ayen da fuevun te oba. Eshu riẹn ọnana, kọyen sorọ ọ vwọ reyọ “emraro rẹ efian” vwọ davwẹngba rọ vwọ “phiẹn ayen.” (Matiu 24:24) Jihova yen che brorhiẹn sẹ ihwo ra jẹreyọ na fuevun, tavwen ayen ki vwo imuẹro nẹ ayen che ghini kpo odjuvwu. Jihova cha vwẹ ute nana te ayen tavwen ayen ki ghwu yẹrẹ bẹsiẹ “ukpokpogho rode na” ke tonphiyọ.—Ẹvwọphia 2:10; 7:3, 14.

 4. Ọ da dianẹ avwanre cha sa riẹn edẹ rẹ ihwo ra jẹreyọ na eje rehẹ otọrakpọ na nonẹna-a, kẹ mavọ avwanre se vwo “nene” ayen?

⁴ Ọ da dianẹ avwanre cha sa riẹn edẹ rẹ ihwo ra jẹreyọ na eje rehẹ otọrakpọ na nonẹna-a, kẹ mavọ igodẹ efa na se vwo “nene” ayen? Baibol na tare nẹ “eshare ihwe” cha “yọnre ewun rẹ ohwo rẹ Ju, ta nẹ, Jẹn avwanre nene uwe, kidie me nyori nẹ Ọghẹnẹ vẹ ovwan herọ.” Ẹkpo rẹ Baibol nana djunute ohwo rẹ Ju. Ẹkẹvuọvo, “uwe” vẹ “ovwan,” djerephia nẹ ọ ghwa dia ohwo ọvo-o. Ọtiọyena, ohwo rẹ Ju na mudiaphiyọ ẹko rẹ ihwo ra jẹreyọ na eje. Igegede ri chekọ na riẹn ọnana, ayen ji kuomakugbe ihwo nana vwọ ga Jihova. O rhe fo nẹ ayen riẹn edẹ rẹ ihwo nana ayen mi nene ayen ọvuọvo-o. Jesu yen Osun avwanre, Baibol na vuẹ avwanre nẹ ọyen ọvo yen e nene.—Matiu 23:10.

 5. Orhọ-esio vọ yen ihwo ra jẹreyọ na nabọ roro kokodo kpahen, kẹ diesorọ?

⁵ Ofori nẹ ihwo ra jẹreyọ na nabọ roro kokodo kpahen orhọ-esio rọhẹ 1 Kọrẹnt 11:27-29. (Se.) Mavọ yen ohwo ra jẹreyọ vwọ ria emu ovwọnvwọn na “vwẹ idjerhe ro je fo”? Ọ da dianẹ ọ rha sẹro rẹ ọyerinkugbe rọyen vẹ Jihova-a, ọ da ria emu ovwọnvwọn na, kọyen ọ rerọ vwẹ idjerhe ro je fo. (Hibru 6:4-6; 10:26-29) Orhọ-esio ọgangan nana karophiyọ e ra jẹreyọ na nẹ ofori ayen vwọ fuevun te oba, siẹrẹ ayen da guọnọ rhiabọreyọ “use na vwẹ obenu vwẹ evun ri Kristi Jesu.”—Filipae 3:13-16.

 6. Ubiẹro vọ yen ofori nẹ Inenikristi ra jẹreyọ vwo ni oma rayen?

⁶ Pọl da vuẹ ihwo ra jẹreyọ na: “Mẹvwẹ, rọ hẹ uwodi fiki rẹ Ọrovwohwo na, nabọ rẹ ovwan rere ovwan yere eyere ro fori kẹ use nana re se ovwan phihọ na.” Mavọ yen ayen che ru ọnana wan? Pọl da ta: “Vẹ omaevwokpotọ kugbe edẹndẹn, vẹ akoechiro, ohwohwo chirako rẹ ohwohwo vwẹ evun rẹ ẹguọnọ, pharhe ra vwọ yọnre okugbe rẹ [‘ẹwẹn,’ NW] na vwẹ ẹguọnọ rẹ ufuoma.” (Ẹfesọs 4:1-3) Ẹwẹn ọfuanfon rẹ Jihova chọn idibo rọyen uko vwo vwo omaevwokpotọ ukperẹ ayen vwọ kparoma. (Kọlose 3:12) Ọtiọyena, e ra jẹreyọ na ni oma rayen nẹ ayen yovwin vrẹ ihwo efa-a. Ayen riẹnre nẹ ẹwẹn ọfuanfon rẹ Jihova vwọ kẹ ayen vrẹ ọ rẹ ihwo efa-a. Ayen ji roro nẹ ayen vwo ẹruọ rẹ Baibol na vrẹ ihwo efa-a. Ayen cha sa vuẹ ohwo ọfa nẹ a je jẹreyọ, ọtiọyena ọ rhe re emu ovwọnvwọn na-a. Ukperẹ ọtiọyen, ayen vwẹ oma vwo kpotọ, ayen je riẹn nẹ Jihova yen durhie ihwo ri che kpo odjuvwu.

7, 8. Die yen e ra jẹreyọ na rhẹro rọye-en, kẹ diesorọ?

⁷ Dede nẹ ihwo ra jẹreyọ niro nẹ ọyen uphẹn rode rẹ ayen vwo kpo odjuvwu, ayen rhẹro nẹ e muọghọ oghẹresan kẹ aye-en. (Ẹfesọs 1:18, 19; se Filipae 2:2, 3.) Ayen je riẹn nẹ ọke rẹ Jihova vwọ jẹ ayen reyọ, ọ vuẹ ohwo ọfa kpahọ-ọn. Ọtiọyena, siẹrẹ ihwo efa rhe vwo imuẹro nẹ a jẹ ayen reyọ-ọ, o rhe gbe ayen unu-u. Ohwo ra jẹreyọ riẹnre nẹ Baibol na vuẹ avwanre nẹ a fobọ vwo imuẹro kpahen ohwo rọ tare nẹ Ọghẹnẹ kẹ ọyen uphẹn rẹ oghẹresa-an. (Ẹvwọphia 2:2) Rọ vwọ dianẹ ohwo ra jẹreyọ guọnọ nẹ ihwo muọghọ rẹ oghẹresan kẹ na-a, ọ rha vuẹ ihwo nẹ a jẹrẹ reyọ ẹsosuọ-ọ. Vwọrẹ uyota, ọkiọvo ọ cha tobọ vuẹ ohwo vuọvo-o. Ọ je cha vwẹ erọnvwọn ro che ru vwẹ odjuvwu vwọ yoma-a.—1 Kọrẹnt 1:28, 29; se 1 Kọrẹnt 4:6-8.

⁸ Ihwo ra jẹreyọ na ọvo siomakoko kerẹsiẹ a da mrẹ nẹ ayen vwo ukoko romobọ raye-en. Ayen je guọnọ e ra jẹreyọ efa rere ayen ta ota kpahen uphẹn rayen na yẹrẹ yono Baibol na komobọ-ọ. (Galesha 1:15-17) E ra jẹreyọ na de ru ọnana, ukoko na cha sa dia ọvuọvo-o. Kọyen ayen gbevwọsuẹ ẹwẹn ọfuanfon na, rọ chọn idibo Ọghẹnẹ uko vwo vwo ufuoma vẹ oyerinkugbe.—Se Rom 16:17, 18.

 9. Diesorọ ro vwo fo nẹ wọ jomaotọ kpahen ubiẹro wo vwo nẹ ihwo re ria emu ovwọnvwọn na? (Ni ekpeti na “Ẹguọnọ ‘Muẹ Ruẹ-ẹ.’”)

⁹ Ẹro vọ yen ofori nẹ wo vwo ni iniọvo ra jẹreyọ na? Jesu da vuẹ idibo rọyen nẹ ayen eje “imoni.” Ọ da je ta: “Kohwo kohwo rọ kpare oma kpenu, ke vwo kpotọ; ọ rọ vwẹ oma kpotọ ke vwo kpenu.” (Matiu 23:8-12) Ọtiọyena, ọ chọre re vwo titi ohwo ọvo gegerege, ọ da dianẹ ọyen oniọvo rẹ Kristi ra jẹreyọ. Baibol na vwọ ta ota kpahen ekpako, ọ da vuẹ avwanre nẹ a vwẹrokere esegbuyota rayen, ẹkẹvuọvo, ọ diẹ ọ vuẹ avwanre nẹ a vwẹ ohworakpọ vuọvo vwo ruẹ onini-i. (Hibru 13:7) Vwọrẹ uyota, Baibol na tare nẹ e mu “omamọ rẹ ọghọ” kẹ evo, kidie ayen “riẹn sun,” ayen je “wian owian rẹ eghwoghwo kugbe uyono,” ọ diẹ kidie nẹ a jẹ ayen reyọ-ọ. (1 Timoti 5:17) Siẹrẹ e de jiri ihwo ra jẹreyọ gan nọ, oma cha vwerhen aye-en. Ọ sa tobọ nẹrhẹ ayen phuoma. (Rom 12:3) Avwanre guọnọ ru emu vuọvo rọ sa nẹrhẹ iniọvo rẹ Kristi ra jẹreyọ na she ro uruemu ọtiọyena-a!—Luk 17:2.

10. Mavọ yen avwanre se vwo muọghọ kẹ ihwo ra jẹreyọ na?

¹⁰ Mavọ yen avwanre se vwo muọghọ kẹ ihwo rẹ Jihova jẹreyọ na? Ofori nẹ a nọ ayen kpahen obo ra jẹ ayen reyọ wa-an. Ọyen ota romobọ rayen, o te avwanre-e. (1 Tẹsalonaika 4:11; 2 Tẹsalonaika 3:11) O ji fo re vwo roro nẹ a je jẹ ọshare yẹrẹ aye, ọsẹ vẹ oni, yẹrẹ ihwo rẹ orua rayen reyọ-ọ. Ọnana dia uku rẹ ohwo ria mie orua rọye-en. (1 Tẹsalonaika 2:12) E jẹ a je kẹnoma kẹ enọ re sa nẹrhẹ ihwo muomaphiyọ. Kerẹ udje, ofori nẹ a nọ aye rẹ oniọvo ra jẹreyọ kpahen obo rọ cha dia kẹ vwẹ iparadaisi na siẹrẹ ọshare rọyen de kpo odjuvwu nu-u. Kidie, avwanre vwo imuẹro nẹ vwẹ akpọ kpokpọ na, Jihova cha “vwẹ obo ri kohwo kohwo ọkpokpọ guọnọre kẹ.”—Une Rẹ Ejiro 145:16.

11. Mavọ yen avwanre sa vwọ kẹnoma kẹ re vwo “brugun hẹ ihwo oma”?

¹¹ Avwanre rhe muọghọ rẹ oghẹresan kẹ ihwo ra jẹreyọ na-a, ọnana jẹ ochọnvwe vwọ kẹ avwanre. Vwẹ idjerhe vọ? Baibol na vuẹ avwanre nẹ “imoni rẹ efian” sa dia evunrẹ ukoko na, enana sa tobọ tanẹ a jẹ ayen reyọ. (Galesha 2:4, 5; 1 Jọn 2:19) Vwọba, ọ sa dianẹ evo usun ra jẹreyọ na cha fuevun te oba-a. (Matiu 25:10-12; 2 Pita 2:20, 21) Ofori nẹ a kẹnoma kẹ re vwo “brugun hẹ ihwo oma.” Avwanre che nene ihwo-o, tobọ te e ra jẹreyọ dede yẹrẹ e re ga Jihova krẹ re. Ọke yena, ayen de she nẹ ukoko na, ọnana rhe che se djobọte esegbuyota rẹ avwanre vwo kpahen Jihova-a.—Jude 16.

12, 13. Diesorọ uchunu rẹ ihwo re ria emu ovwọnvwọn na vwo jẹ ẹwẹn avwanre ekpokpo?

¹² Vwẹ ikpe buebun re wan re, uchunu rẹ ihwo re ria emu ovwọnvwọn na shekpotọ. Ẹkẹvuọvo vwẹ ikpe evo rhire na, uchunu rẹ ihwo na ke rhoma buẹnphiyọ kukpe kukpe. Ofori nẹ ọnana kpokpo uwe ẹwẹn? Ẹjo. Ẹ jẹ a mrẹ oboresorọ.

¹³ “Ọrovwohwo riẹn otu re dia ọrọye.” (2 Timoti 2:19) Vwọ fẹnẹ Jihova, iniọvo ri kere ihwo re ria emu ovwọnvwọn na riẹn e ra ghene jẹreyọ-ọ. Ọtiọyena, ihwo ri rorori nẹ a jẹ ayen reyọ jehẹ ukeri nana. Kerẹ udje, evo re ria emu na jovwo, dobọji enẹna. Efa riọ kidie iroro rayen gbare-e, ọtiọyena, kọ nẹrhẹ ayen roro nẹ ayen che nene Kristi sun vwẹ odjuvwu. Vwọrẹ uyota, avwanre ghwa riẹn uchunu rẹ ihwo ra jẹreyọ rehẹ akpọ na nonẹna-a.

14. Die yen Baibol na vuẹ avwanre kpahen uchunu rẹ ihwo ra jẹreyọ ri che chekọ ọke rẹ ukpokpogho rode na da tonphiyọ nu?

¹⁴ A cha mrẹ ihwo ra jẹreyọ na vwẹ ẹkuotọ buebun ọke rẹ Jesu cha vwọ rhe, rhe reyọ ayen kpo odjuvwu. Baibol na tare nẹ Jesu che “ji emakashe rọye vẹ owanre rode, ayen ki che se ihwo ra sanọ reyọ ejobi na, nẹ igogo ẹne rẹ akpọ na rhe, nẹ oba rẹ akpọ ọvo re te ọrivẹ.” (Matiu 24:31) Baibol na ji djephia nẹ vwẹ ọke rẹ oba na, a je cha mrẹ imihwo ri chekọ usun rẹ e ra jẹreyọ na vwẹ otọrakpọ na. (Ẹvwọphia 12:17) Ẹkẹvuọvo, ọ vuẹ avwanre uchunu ri che chekọ siẹrẹ ukpokpogho rode na da tonphiyọ-ọ.

15, 16. Die yen ofori nẹ avwanre riẹn kpahen ihwo 144,000 rẹ Jihova jẹreyọ na?

¹⁵ Jihova yen che brorhiẹn rẹ ọke rọ cha vwọ sane ihwo ra jẹreyọ na. (Rom 8:28-30) Jihova ton ẹsanọ rẹ ihwo ra jẹreyọ na phiyọ vwo nẹ ọke ra vwọ rhọvwọn Jesu nẹ ushi. Ọhọhọre nẹ Inenikristi eje rẹ ẹgbukpe ujorin ẹsosuọ yen a jẹreyọ. Ikpe ujorin evo vwọ wan nu, buebun re tare nẹ ayen Inenikristi, ghini nene Kristi-i. Dedena, Jihova je sane imihwo re dia Inenikristi uyota re herọ vwẹ ọke yena. Ayen pha kerẹ irosu rẹ Jesu tare nẹ e rho kugbe vẹ ego na. (Matiu 13:24-30) Vwẹ ọke rẹ oba na, Jihova je sane ihwo re cha dia usun rẹ 144,000 na.^[2] (Ni eta rẹ odjefiotọ.) Ọtiọyena, Ọghẹnẹ da sane ihwo nana ọmọke krẹn tavwen oba na ki te, avwanre riẹnre nẹ o brorhiẹn rọ chọre-e. (Aizaya 45:9; Daniẹl 4:35; se Rom 9:11, 16.)^[3] (Ni eta rẹ odjefiotọ.) E jẹ avwanre jomaotọ re vwo jẹ dia kerẹ ewiowian ri brenu kidie onini rayen hwosa kẹ ihwo re rhe owian vwẹ unọke rọ koba.—Se Matiu 20:8-15.

¹⁶ Ọ dia ihwo ri che kpo odjuvwu eje yen ẹbẹre ọvo rẹ “omamọ rẹ odibo esiri” na-a. (Matiu 24:45-47) Kirobo rọ hepha vwẹ ẹgbukpe ujorin ẹsosuọ, Jihova vẹ Jesu vwẹ imihwo vwọ ghẹrẹ yẹrẹ yono ihwo buebun nonẹna. Vwẹ ẹgbukpe ujorin ẹsosuọ, imihwo vwẹ usun rẹ e ra jẹreyọ na, yen si Ẹbẹre rẹ Baibol na ra vwẹ Grik vwo si. Nonẹna, imihwo vwẹ usun rẹ e ra jẹreyọ na yen vwẹ “emu” kẹ ihwo rẹ Ọghẹnẹ vwẹ “ọke” ro fori.

17. Die wo yono nẹ uyovwinrota nana rhe?

¹⁷ Die yen avwanre yono nẹ uyovwinrota nana rhe? Jihova tare nẹ ọ cha vwẹ arhọ ri bẹdẹ vwọ kẹ idibo rọyen buebun vwẹ otọrakpọ na, ọ je tanẹ ihwo evo che nene Jesu sun vwẹ odjuvwu. Jihova cha hwosa kẹ idibo rọyen eje, “ohwo rẹ Ju” na vẹ “eshare ihwe” na. Ọ guọnọre nẹ ayen yọnrọn irhi rọyen, je fuevun ga. Ofori nẹ ayen eje vwomakpotọ, ji kuomakugbe ga. Ayen je sẹro rẹ ufuoma vwevunrẹ ukoko na. Rẹ oba na vwo siẹkẹrẹ na, e jẹ avwanre eje ga Jihova ji nene Jesu Kristi kerẹ ekrun rẹ igodẹ ọvo.