Аллоҳ сизни эшитиши учун қандай ибодат қилишингиз керак?

«Мендан ўзга худоларингиз бўлмасин. Ўзингиз учун... ҳеч бир нарсанинг ўйма тасвири ёки шаклини ясаманглар». (Чиқиш 20:3, 4)

Баъзи инсонларнинг фикрича, Худога топинишда тасвирлардан фойдаланиш ва фаришталар, аждодлар ёки авлиёларнинг исмларини тилга олиш уларни Унга яқинлаштиради. Аммо Муқаддас Китобда Аллоҳга Исо алайҳиссалом номи билан ибодат қилишимиз кераклиги ҳақида аниқ қилиб айтилган. Ҳазрати Исо биз учун кўп яхшиликлар қилганини тушунганимиз сабабли, унинг номи билан ибодат қиламиз. Унинг ўзи ҳам шундай деганди: «Менсиз ҳеч ким Отамнинг олдига кела олмайди». (Юҳанно 14:6)

«Юрагингизни Унга тўкиб солинг». (Забур 62:8)

Яҳовага ибодат қилганимизда, меҳрибон отамиз билан гаплашгандай гаплашишимиз керак. Ибодатларни дуолар тўпламидан ўқиш ёки ёддан такрорлашнинг ўрнига, уларни эҳтиром ила ва ўз сўзларимиз билан айтишимиз даркор.

«Аллоҳга мурожаат қилиб Унинг иродасига мувофиқ нимаики сўрасак, У бизни эшитади». (1 Юҳанно 5:14)

Муқаддас Китобда Аллоҳ Яҳова биз учун нималар қилиши ва биздан нималарни кутаётгани ҳақида ёзилган. Дуоларимиз Худога маъқул келишини истасак, «Унинг иродасига мувофиқ» тарзда ибодат қилишимиз керак. Бунинг учун Муқаддас Ёзувларни тадқиқ қилиб, Аллоҳни яхшироқ таниб-билишимиз лозим. Шундай йўл тутсак, ибодатларимиз Унга манзур бўлади.

Эҳтиёжларингиз ҳақида ибодат қилинг. Ибодатда кундалик эҳтиёжларимиз — егулик, кийим ва бошпана тўғрисида сўрасак бўлади. Шунингдек, тўғри қарор чиқариш учун донолик ва синовларда сабр-бардошли бўлиш учун куч сўраб ибодат қилишимиз мумкин. Қолаверса, Худодан имон, кечирим ва ёрдам сўрасак бўлади. (Луқо 11:3, 4, 13; Ёқуб 1:5, 17)

Бошқалар учун дуо қилинг. Фарзандлар бир-бирини яхши кўрса, меҳрибон ота-она бундан мамнун бўлади. Шу сингари Яҳова ҳам Унинг ердаги фарзандлари бир-бирига ғамхўрлик қилишини истайди. Демак, умр йўлдошимиз, фарзандларимиз, қариндошларимиз ва дўстларимиз учун ибодат қилиш мақсадга мувофиқ бўлади. Муқаддас Китоб ёзувчиларидан бири Ёқуб ҳам: «Бир-бирингиз учун ибодат қилинглар»,— деб бежизга айтмаган. (Ёқуб 5:16)

Миннатдорчилик билдиринг. Муқаддас Ёзувларда Парвардигоримиз тўғрисида шундай дейилган: «Аллоҳ сизларга осмондан ёмғир ёғдириб, серҳосил мавсумларни тақдим этган. Шунингдек, озиқ-овқатни мўл-кўл бериб, қалбларингизни қувончга тўлдирган». (Ҳаворийлар 14:17) Худо биз учун қилган барча яхшиликлари ҳақида ўйлаш Унга ибодатда миннатдорчилик билдиришга ундайди. Қолаверса, Аллоҳдан миннатдор эканимизни ҳаёт тарзимиз билан ҳам кўрсатишимиз керак. (Колосаликларга 3:15)

Гоҳида самимий ибодатларимизга дарҳол жавоб олмаганимиз учун, руҳимиз тушиши мумкин. Бу Худо бизга бефарқ эканини англатадими? Асло бундай эмас! Баъзан шунчаки ибодат қилишда давом этишимиз керак бўлади. Келинг, буни кўрсатувчи айрим мисолларни кўриб чиқайлик.

Биринчи мақолада тилга олинган Стив шундай тан олди: «Агар бир неча йил аввал ибодат қилишни тўхтатганимда, яшашдан умидимни узган бўлардим». Қизиқ, Стивнинг нуқтаи назари ўзгаришига нима сабаб бўлди? У Муқаддас Китобни тадқиқ қилишни бошлади ва ибодатни канда қилмаслик кераклигини билиб олди. Стив қуйидагича деди: «Дўстларим менга меҳр кўрсатиб, қўллаб-қувватлашгани учун Худога ибодатда миннатдорчилик билдираман. Ҳозир ҳар қачонгидан ҳам бахтлироқман».

Худо уни тинглашига ўзини нолойиқ деб билган Жени шундай бўлишди: «Ўзимни бутунлай кераксиздай ҳис қилганимда, Аллоҳдан нега ўзимни бундай ҳис қилаётганимни тушунишга ёрдам беришини ёлвориб сўрардим». Бу унга қай йўсин кўмаклашди? «Ибодат ўзимга Худонинг нуқтаи назари билан қарашга ва ҳатто қалбим мени айбласа ҳам, У мени айбламаётганини тушунишимга ёрдам берди ва таслим бўлмасликка ундади»,— деди Жени. Бунинг натижаси қандай бўлди? У шундай қўшиб қўйди: «Ибодат Яҳовага мавжуд Шахс, меҳрибон, ғамхўр Аллоҳ, Ота ва Дўст каби қарашимга ёрдам берди. Агар Унга маъқул ишларни қилишда давом этсам, У доим мени қўллаб-қувватлашини тушундим».

Келинг, Изабелнинг мисолини ҳам кўриб чиқайлик. У ҳомиладор пайтида шифокор унга фарзанди ногирон туғилишини айтганди. Ўшанда Изабел қаттиқ тушкунликка тушганди. Баъзилар ҳатто унга аборт қилдиришни маслаҳат берганди. «Қалбимдаги дард-аламлардан адо бўламан, деб ўйлагандим»,— деди Изабел. Лекин у нима қилди? Изабел қайта-қайта Яҳовага ибодат қилиб ёрдам сўради. Вақти келиб у ўғилли бўлди ва ўғли Жерард ногирон бўлиб туғилди. Изабел Худо унинг ибодатларига жавоб берди, деб ҳисоблайдими? Ҳа! Қизиқ, Яҳова унга қай йўсин жавоб берди? Изабел шундай деди: «Ҳозир ўғлим 14 ёшда ва у ногиронлигига қарамай, ҳаётдан завқ олиб яшаяпти. У мен учун энг катта барака. Унга қараганимда Яҳова ибодатларимга энг аъло тарзда жавоб берганини тушунаман».

Юқорида тилга олинган кишиларнинг самимий сўзлари Забур китобидаги мана шу оятни ёдимизга соляпти: «Сен, эй Яҳова, камтарларнинг ўтинчини эшитасан. Сен уларнинг қалбини собит қилиб, уларга қулоқ тутасан». (Забур 10:17) Худога ибодат қилишда давом этишимиз учун нақадар ажойиб сабаблар!

Муқаддас Китобда Исо пайғамбарнинг кўплаб ибодатлари ёзилган. Айниқса, у шогирдларига ўргатган ибодат кўпчиликка таниш. Бу ибодатдан нимани ўрганишимиз мумкин?