Xeeni Yehova ohalaka onivaha yoowoopola?

1-2. Xeeni ootheene ahu nimpirisari ahu woopoliwa? (Aroma 7:​22-24) (Nwehe efootu.)

NKUUPUWELANI etthu ela: Empa enniphweeya mutthu mmosa ori ene mpaani! Mutthu owo khokhwiiye, masi khoniwerya okhuma. Etthu eniwerya awe, okhuwela paahi ovekelaka okhaliheriwa.

² Ootheene ahu, nnoolikana ni mutthu owo. Moota xeeni? Mwaha woowi, okathi Adamu yahaamwiiwelenle aya Yehova, awo yaahittheka. Okhala wiira na anamwane a Adamu, ootheene ahu noottheka. Mwaha waivaavo, apinaatamu ootheene aarava etampi, ntoko siisaale mulopwana ole omoreliwe empa. Tivonto, nimpirisari ahu woopoliwa. Okathi murummwa Paulo aalepenle awe ekarta aroma, aahitthokiherya mukhalelo ahu mwaha wa etampi. (Mmusome Aroma 7:​22-24.) Tivonto aavekenle awe wiira: “Ti pani onrowa okoopola erutthu ela enikiroiha mookhwaani?” Paulo aahoona wiira etampi aaravihiwe awe ni Adamu, yaamuroiha wookhwaani. (Arom. 6:23) Nave hiyo nirina muxankiho mmosa-ru. Ootheene ahu, ninnipirisari woopoliwa!

3. Mukuttho woowoopola onnikhaliherya sai?

³ Ti vooreera oweha wiira, nuumala murummwa Paulo olavula muxankiho aarina awe, aahihimya etthu aalipelela awe. Nuumala okoha wiira: “Ti pani onrowa okoopola erutthu ela enikiroiha mookhwaani?” Paulo aahaakhula nikoho nlo ni moolumo oolipiherya, oriki: “Kinnimuxukhuru Muluku, okhala wiira owo onookoopola omurumeelaka Yesu Kristu, Pwiya ahu!” (Arom. 7:25) Moolumo ala, Paulo onnooniherya wiira Yehova onninoopola orumeelaka mukuttho wa Yesu.a Mukuttho owo onninoopola wiira 1) nleveleliwe itampi sahu, 2) onikhaliherye okhala oohittheka ni 3) okhalana waataana wooloka ni Yehova. Okathi ninrowa ahu othokoreryaka iponto iya, omphenta wahu Yehova “Muluku, yoowo onivaha nlipelelo” onimuncerereya. (Arom. 15:13) Nave-tho, ninrowa otepaka omuxukhurela Yesu, “mwaha wa onoopola”. — Akol. 1:14.

MUKUTTHO WA YESU ONNIKHALIHERYA OLEVELELIWA ITAMPI

4-5. Xeeni ootheene ahu nimpirisari ahu mukuttho wa Yesu? (Musuweli 7:20)

⁴ Ninnipirisari mukuttho wa Yesu, wiira Yehova onlevelele itampi sahu. Ootheene ahu ninnittheka, okhale ni moolumo aahiiso ni miteko sahu. (Mmusome Musuweli 7:20.) Itampi sikina ti suulupale. Mwa ntakiheryo, nlamulo na Moise naahimya wiira akhala wiira mwiisarayeli aamuraruwa aahiiso ammwiiva mutthu, aahaana wiiviwa. (Onam. 20:10; Mmr. 35:​30, 31) Itampi sikina saamukhaani, nalikanyiha ni iye nilavunle ahu. Hata vari siiso, itampi. Mwa ntakiheryo, Davidi aahimmye so: “Wiira kihittheke ni itthu kinilavula aka. Kinoowalaka eyano aka”. (Esal. 39:1) Eyo enooniherya wiira, hiyo pooti ottheka ni moolumo ahu. — Yak. 3:2.

⁵ Niireke mootoko olavula etthu mwahaareerela anyu olavula? Niireke mootoko opaka etthu muhoolo mwaya muthanana? Moohaanyiherya, munaakhula makoho ala wiira aayo. Biibiliya onihimya so: “Naahimyaka wiira: ‘Hiyo khanrina etampi’, nnimwiiwoka, nto ekeekhai khekhanle ni hiyo.” — 1 Yoh. 1:8.

6-7. Etthu xeeni Yehova opake awe wiira onilevelele itampi sahu? (Nwehe eteseenyu.)

⁶ Mwaha wa mukuttho wa Yesu, Yehova onninlevelela itampi sahu. (Aef. 1:7) Masi eyo khenitaphulela wiira khonicala itampi. Yehova khonisiveliwa okathi nimpaka ahu itampi. (Yes. 59:2) Tivonto, okhala wiira Yehova Muluku a xariya, oonivaha mukuttho wa Yesu wiira onilevelele itampi sahu.

⁷ Nlamulo Yehova anvahale awe Moise, naahimya wiira aisarayeli yaahaana ovaha mikuttho sa inama wiira aleveleliwe itampi saya. (Onam. 4:​27-31; 17:11) Mikuttho iyo saanooniherya wiira apinaatamu yaanipirisari mukuttho wootepexa oloka, ovikana wa inama. Nto okhwa wa Yesu onnimwiiriha Yehova onlevelela itampi sahu. Ekarta aalepenle awe makristau a oKorinto, ennooniherya wiira murummwa Paulo aanisuwela efaita orina aya mukuttho wa Yesu. Nuumala ohimya itthu soohiloka yaapaka aya khalai, Paulo aalenle so: “Moorapihiwa, mooreerihiwa, mookhalihiwa anaxariya ni nsina na Pwiya Yesu Kristu ni ikuru sa Muluku ahu.” — 1 Akor. 6:​9-11.

8. Etthu xeeni mukhanle anyu oopaka okathi muniilokiherya anyu para Wuupuwelela okhwa wa Yesu?

⁸ Okathi muniilokiherya anyu para Wuupuwelela okhwa wa Yesu, mwiivaheke okathi wiira muupuwelele ele olevelela wa Yehova enitaphulela aya para nyuwo. Mwa ntakiheryo, mukuttho wa Yesu onninikhaliherya ohiivaha nthowa mwaha wa itampi nipanke ahu khalai nittharuwa. Ankhi vakhala wiira nlelo khamunikupali wiira Yehova ohoolevelelani? Woonasa wene, nyuwo pooti wuupuwelaka so: ‘Kinnisuwela wiira Yehova pooti okilevelela, masi miyo nkiniwerya ohiya wiivaha nthowa.’ Akhala wiira munuupuwela siiso, muhiliyale ela: Yehova tonnilevelela ni oomuthanla Yesu wiira okhale mphuki. Yehova khoovahaleni nyuwo nnakhala atthu akina eparakha ya othanla tani anireerela oleveleliwa. Biibiliya onihimya so: “Neettaka moowaaryani ntoko Muluku ori awe moowaaryani, hiyo ninnaataana mukina ni mukhwaawe, vano ephome ya Yesu, Mwaana a Muluku, ennittipiha itampi sahu sootheene.” (1 Yoh. 1:​6, 7) Hiyo nihaana okupali eyo, ntoko ninkupali ahu ikeekhai sikina sa mbiibiliyani. Nave orumeelaka mukuttho wa Yesu, Yehova ookhalana etireitu ya onilevelela itampi sahu. — Esal. 86:5.

MWAHA WA MUKUTTHO WA YESU, NNOOKHALA ATTHU OOHITTHEKA

9. Mbiibiliyani, nuulumo noowi “etampi” nintaphulela exeeni? (Esaalimu 51:5 ni enoota)

⁹ Mbiibiliyani nuulumo noowi “etampi”, khanintaphulela paahi itthu soohiloka nimpaka ahu, masi-tho nintaphulela etampi eniyaraniwa ahu. (Musome Esaalimu 51:5 ni enoota.) Okhala wiira apinaatamu ootheene anikhuma wa Adamu, awo aniyariwa arina ene etampi. Nto, mwaha wa etampi eyo eniyaraniwa ahu, ohiya paahi oniiriha opaka itthu soohiloka, masi-tho, enniiriha erutthu ahu ohivara ntoko Yehova aaphavela awe, maana ninniwereiwa, ninnuuluvala ni ninnookhwa. Ti nthowa naya anamwane ayariwe niinaano ni ahipanke etthu yoohiloka, aniwereiwa aya ni okhwa. Nave eyo ti etthu eniwiiriha atthu ootakhala murima ni ooreera murima ohaawa ni okhwa.

10. Etthu xeeni yaakhumelenle Adamu ni Eva nuumala ottheka?

¹⁰ Etthu xeeni yaakhumelenle Adamu ni Eva nuumala ottheka? Etampi yaahaafetari muupuwelo aya ni moonelo aya. Nuumala ohimwiiwelela Muluku, Adamu ni Eva yaahipacerya oweha mixankiho saakhumelela mwaha wa ohiiwelela nlamulo na Muluku ni nlamulo naalempwe “vamurimani vaya.” (Arom. 2:15) Awo yaahipacerya woona wiira itthu kisaaweettela saana. Nto yaahiwara makukhu ni yiipitha ntoko anakirime wiira Muluku ohaawehe. (Maph. 3:​7, 8) Waanipacerya, Adamu ni Eva yaaniivaha nthowa, yaanixanka, yaaniixoona okhala oohivareleleya, yaanoona owereya ni yaanuuliwa muru. Nto okhuma okathi ole, itthu iyo saanaahaaxa mpakha okhwa. — Maph. 3:​16-19.

11. Itthu xeeni sinniiraneela mwaha wa etampi?

¹¹ Okhala wiira ootheene ahu nniyariwa nirina ene etampi, ninniivaha nthowa, ninnuuliwa muru ni oxanka. Nave etampi enniniiriha owereiwa. Hata niimananihaka olokiherya makhalelo a okumi ahu, khaninwerya osyaka mixankiho sootheene. Tivonto, ikwaha sikina pooti okhumelela mixankiho nihinwerya ahu omaliha mekhihu. Mwaha wa xeeni? Mwaha woowi Biibiliya onihimya wiira okhuma okathi Adamu ni Eva atthenke aya, apinaatamu annikhalana mixankiho. (Arom. 8:20) Mwaha ola, onninvara khula mmosa a hiyo, nave-tho, onnaavara apinaatamu ootheene. Mwa ntakiheryo, nkuupuwelani itthu sinceene atthu anipaka aya wiira alokiheriwe makhalelo a elapo, amala-malihe ikirime, ohaawa ni wiira akhalihe murettele. Hata atthu awo yiimananihaka vanceene, khaniwerya omaliha mixankiho iyo. Masi mwaha wa mukuttho wa Yesu, hiyo nookhalana nlipelelo. Nlipelelo xeeni?

12. Nlipelelo xeeni mukuttho woowoopola onnivaha aya?

¹² Mwaha wa mukuttho woowoopola, ninnilipelela wiira “soopattuxiwa khasinrowa-tho okhala ipottha sa etampi ni okhwa”. (Arom. 8:21) Eyo enitaphulela wiira, nuumala okela elapo esya nikhala atthu ahirina etampi, khaninrowa-tho owereiwaka nnakhala oriipiwa murima. Khaninrowa-tho wiivahaka nthowa aahiiso oxanka. Nave-tho, Mukhulupale a Murettele, eyo piiyo, Yesu, yoowo onooponle, tonrowa olamulelaka. Yesu onimwaakhaliherya apinaatamu ophuka mixankiho sootheene ahiniwerya aya. — Yes. 9:​6, 7.

13. Itthu xeeni munireerela anyu wuupuwelela vaavo muniilokiherya anyu wiira murowele muthukumano wa Wuupuwelela?

¹³ Itthu sinlipelela ahu muhoolo ni murettele nirina ahu olelo-va, sinniweryaneya mwaha wa mukuttho woowoopola Yesu ovahale awe. Nkuupuwelani moota ninrowa ahu okhalaka nuumala etampi omalihiwa. Nyuwo ni atthu munaaphenta anyu, munrowa ovenyaka khula voosiisu muri ene saana, muhixankaka mwaha wa etala, owereiwa nnakhala okhwa! Olelo-va, hiyo pooti ophwanya murettele okathi ninvarexexa ahu “nlipelelo nrina ahu . . . nenno nri ntoko nankura a okumi ahu, ninnikhaliherya okhala oolipa, nihihoveryaka etthu.” (Ahep. 6:​18, 19) Ntoko siisaale nankura onivarelela awe ekalawa, wuupuwelela itthu ninlipelela ahu, sinoolipiha waamini wahu ni onikhaliherya ovilela khula muxankiho onniphwanya vano. Mweekeekhai, mukupaliki wiira Yehova onrowa waatthuvela “ale animwaavya ni murima aya wootheene.” — Ahep. 11:6.

YOOWOOPOLA ENNINIKHALIHERYA WAATAANA NI MULUKU

14. Etampi ehononne sai waataana naarina ahu ni Mpattuxa ahu ni mwaha wa xeeni?

¹⁴ Nuumala Adamu ni Eva omutthekela Yehova, apinaatamu yaahiperteri waataana yaarina aya ni Muluku. Biibiliya onihimya wiira apinaatamu ootheene, aarakamelana ni Mpattuxa aya. (Arom. 8:​7, 8; Akol. 1:21) Xeeni ohimyaka siiso? Mwaha woowi Yehova khorina etampi ni malamulo awe khaneemererya etampi. Omulavulaka Yehova, Biibiliya onihimya wiira: “Maitho anyu aatepa okhala ooloka vahimphwanela aya oweha etthu yootakhala, nave nyuwo khamunwerya ovilela otakhala.” (Hab. 1:13) Tivonto, etampi yoowiiriha atthu ovalaana ni Muluku. Khuuvo mutthu aarowa owerya okhala mpatthani a Muluku, vahikhanle wiira erookumihiwa etthu enaavalaanya aahiiso arimwaataanihiwa ni Muluku. Nto mukuttho woowoopola, tonnikhaliherya waataana-tho ni Muluku.

15. Okhwa wa Yesu onaakhaliherya sai apinaatamu?

¹⁵ Eliivuru ya 1 Yohani 2:​2, Biibiliya onihimya wiira Yesu “tori mukuttho oniliverya itampi sahu”. Moota xeeni mukuttho wa Yesu onaakhaliherya aya apinaatamu otthikela waataana ni Yehova? Okhwa wa Yesu, onnimwiiriha Muluku otthikela waataana ni apinaatamu. (Arom. 3:​23-26) Nave atthu yaale amurumenle Yehova moororomeleya, Yesu ohinatthi okhwa, Muluku onrowa waathokorerya okhala anaxariya. (Maph. 15:​1, 6) Moota xeeni? Mwaha wa mukuttho woowoopola. Yehova aanikupali wiira Yesu aamurowa oleva okumi awe wiira owoopole atthu. (Yes. 46:10) Tivonto, mukuttho woowoopola onniwiiriha apinaatamu otthikela waataana ni Muluku.

16. Itthu xeeni sikina munireerela anyu wuupuwelela vaavo muniilokiherya anyu wiira murowele muthukumano wa Wuupuwelela? (Nwehe eteseenyu.)

¹⁶ Nkahaya muupuwele moota okumi anyu ori aya vano mwaha wa waataana ni Yehova. Mwa ntakiheryo, ntoko Yesu oniixuttihale awe, nyuwo pooti omuhimya Yehova okhala “Tiithi” anyu. (Math. 6:9) Nave ikwaha sikina, nyuwo pooti omwiitthana Yehova okhala “Mpatthani” anyu. Okathi nimmwiitthana ahu Yehova okhala “Tiithi” aahiiso “Mpatthani”, nihaana opaka eyo nooniheryaka nttittimiho ni wiiyeviha. Mwaha wa xeeni? Mwaha woowi na anatampi. Etampi enninikhoottiherya waataana ni Muluku nihikhaliheriwaka ni mutthu mukina. Tivonto, mukuttho Yesu ovahale awe, tonnikhaliherya waataana ni Yehova. Omurumeelaka Yesu, Yehova ohiiriha oweryaneya “waataana-tho ni itthu sootheene sikina sa vathi ni sa wiirimu, okhalihaka murettele ni ephome ya Yesu, emwarexiwe vamwirini wa nihaaxeryo.” (Akol. 1:​19, 20) Tivonto, olelo-va vanniweryaneya waataana ni Yehova hata niri ene anatampi.

YOOWOOPOLA ENNOONIHERYA WIIRA YEHOVA TOOMORIWA IKHARARI

17. Yoowoopola enooniherya sai wiira Yehova toomoriwa ikharari vanceene? (Aefeso 2:​4, 5)

¹⁷ Yoowoopola ennooniherya wiira Yehova “toomoriwa ikharari vanceene”. Nave ennooniherya wiira “oonikhaliha akumi . . . nnaamwi naari ookhwa ene mwaha wa itampi sahu.” (Mmusome Aefeso 2:​4, 5.) Ntoko siisaale mutthu omoreliwe ni empa onipirisari awe okhaliheriwa, ale arina murima wooloka wiira “yaakhele okumi woohimala”, annisuwela wiira ahaana woopoliwa mwaha wa etampi. (Mit. 13:48) Nto Yehova onnaakhaliherya orumeelaka ihapari sooreera sa Omwene, seiyo sinaakhaliherya omusuwela yena ni Mwanawe. (Yoh. 17:3) Vakhala wiira Satana uupuwela wiira aahihonona ele Muluku aaphavela awe nuumala Adamu ni Eva ottheka, owo aahiiwoka.

18. Okathi nnuupuwela ahu yoowoopola, etthu xeeni nihinreerela ahu oliyala?

¹⁸ Okathi nnuupuwela ahu itthu sooreera nimphwanya ahu mwaha wa yoowoopola, nihaana ohiliyala etthu yuulupale emwiirihale Yehova onivaha yoowoopola. Ohiya wuupuwela wiira yoowoopola enikumiherya mureerelo ahu paahi, masi-tho nihaana wuupuwela wiira enamuna Yehova onaakhula awe nikoho Satana aakumihenrye awe oxarti ya wEdeni. (Maph. 3:​1-5, 15) Nave orumeelaka mukuttho woowoopola, Yehova onnitteeliha nsina nawe, mwaha wa itthu sootheene onootheriwa awe ni Satana. Nave-tho, mwaha wa onoopola etampi ni okhwa, Yehova ohooniherya wiira Muluku oophenta. Hata nahaaphwanela, mwaha wa oreera wawe murima, Yehova ooneemererya omukhaliherya wooniherya wiira Satana nawoothe. (Mir. 27:11) Munrowa wooniherya sai wiira munnixukhurela yoowoopola? Nikoho nla, ninrowa waakhula mwaha onittharelana.