Munrowa wooniherya sai wiira munnixukhurela yoowoopola?

1-2. Mukuttho wa Yesu ohaana oniiriha opaka exeeni? (2 Akorinto 5:​14, 15) (Nwehe efootu.)

NKUUPUWELANI vaakhanle wiira moomoreliwa empa muhinawerya okhuma mekhinyu. Vano onarwa mutthu oowoopolani, niireke khimwaarowa omuxukhurela mutthu owo? Hata empa eyo yaamorenle atthu akina ni yoopoliwa, nyuwo mwammuxukhurela ole owooponleni ni khimwaarowa oliyala etthu opanke awe.

² Ntoko niwehale ahu mwaha ovinre, Muluku oomuruma Yesu wiira orwe onoopole itthu sinikhumelela mwaha wa etampi. Nto mukuttho wa Yesu onoowerya onoopola, mwaha woowi onninivaha eparakha ya 1) oleveleliwa itampi, 2) nlipelelo na okhala atthu oohittheka ni 3) otthikela okhalana ompatthani wooloka ni Muluku. Nave mukuttho wa Yesu, onninivaha nlipelelo na okhala mahiku ootheene elapo esya. Moohaanyiherya, mukuttho wa Yesu onnooniherya wiira Yesu onnaaphenta atthu, ophenta weiwo oonihenrye awe ohinatthi orwa valaponi. (Mir. 8:​30, 31) Murummwa Paulo olempe wiira “ophenta wa Kristu tonnitumererya”. (Mmusome 2 Akorinto 5:​14, 15.) Moolumo ala, annooniherya wiira oniphenta wawe Yesu, ohaana oniiriha opaka etthu wiira nooniherye oxukhurela wahu. Nave khaninrowa oliyala mukuttho ovahale awe.

3. Xeeni oxukhurela wanyu mukuttho woowoopola onivirikana aya ni atthu akina?

³ Etthu xeeni mukhanle anyu oopaka wiira mooniherye oxukhurela wanyu mukuttho woowoopola? Waakhula wanyu nikoho nla, pooti ovirikana ni moota atthu akina yaarowa aya waakhula. Moota xeeni? Muupuwele wiira atthu araru anooviyaxari para esitati emosa. Masi khula mutthu onrowa okhuma esitati awe. Nave, atthu awo anrowa ovira iphiro soovirikana. Hata vari siiso, awo anoophiya esitati anrowa aya. Mwa enamuna emosa-ru, etthu munrowa anyu opaka wiira mooniherye oxukhurela wanyu mukuttho wa Yesu, enlipa ni ephiro aahiiso opuro muri anyu, eyo piiyo, ompatthani murina anyu ni Yehova niinaano-va. Nuupuwelaka eyo, mwaha ola ninrowa othokorerya ikurupu 3 sa atthu: 1) Anaskola a Biibiliya; 2) makristau oopatisiwa ni 3) ale ahiyale olaleerya ni orowela mithukumano.

ANASKOLA A BIIBILIYA

4. Yehova oniwoonela sai anaskola a Biibiliya?

⁴ Vakhala wiira mwa naskola a Biibiliya, nkuupuwelani ela: Mwaha wa opacerya wanyu wiixutta voohimya sa Yehova ni omusoma Biibiliya, eyo enooniherya wiira Yehova oniphavela wiira mukhale mpatthani awe. (Yoh. 6:44; Mit. 13:48) Biibiliya onihimya wiira “Yehova tonitokosa mirima sa atthu.” Eyo enooniherya wiira Yehova onniweha wiimananiha wanyu wiira mmusuwele ni onnihakalala okathi munipaka anyu marukunuxo wiira mukhale mpatthani awe. (Mir. 17:3; 27:11) Ompatthani owo onniweryaneya mwaha wa mukuttho wa Yesu. (Arom. 5:​10, 11) Nto muhikhala-khale muliyalaka eyo.

5. Anaskola a Biibiliya anrowa weettela sai miruku siri Afilipi 3:16?

⁵ Nyuwo anaskola a Biibiliya, munrowa wooniherya sai wiira munnixukhurela mukuttho woowoopola? Enamuna emosa eri otthara miruku murummwa Paulo aavahale awe makristau a oFilipi oriki: “Hata nironwe ene vahoolo, nitepeke weetta ephiro emosa-ru.” (Afil. 3:16) Eversiikulu ela, Biibiliya mukina otaphuleliwe so: “Nroweke ohoolo neettaka ephiro emosa yeeyo yeettenle-ahu mpakha vano.” Nto mweetteleke miruku iya ni muhimuhiye mutthu nnakhala etthu, yookhoottiheryakani weetta ephiro ela yookumi. — Math. 7:14; Luka 9:62.

6. Etthu xeeni anaskola a Biibiliya akhanle aya oopaka vakhala wiira vannaaxankiha opaka marukunuxo? (Otumererya 30:​11-14) (Nwehe eteseenyu.)

⁶ Ankhi vakhala wiira yookhala etthu mwiixuntte anyu mbiibiliyani muhineemererya anyu? Mutokoseke mmurumeelaka Biibiliya ni iliivuru sahu sinimutthokiherya Biibiliya. Nave munvekeleke Yehova wiira ookhaliheryeni wiiwexexa mwaha owo. (Esal. 86:11) Vakhala wiira nuumala opaka eyo, nlelo vannooxankihani wiiwexexa, muhikhulumuwe nave muhihiye omusoma Biibiliya. Ankhi vakhala wiira vannooxankihani ottharuwa etthu Biibiliya onikhoottiha awe? Akhala wira ti siiso, muhiliyale wiira Yehova khonnivekela opaka itthu nihiniwerya ahu. Nyuwo munoowerya weettela malamulo awo ari mbiibiliyani wiira mmusivelihe. (Mmusome Otumererya 30:​11-14.) Mwiimananiheke omwiiwelela Yehova. (Yes. 41:​10, 13; 1 Akor. 10:13) Nave Yehova onnileiherya wiira onimookhaliheryani. Ohiya owehexexaka mixankiho sinoophwanyani, mwiimananiheke omuxukhurela Yehova mwaha wa itthu sootheene onoopakelaaweni, ohela muhina mukuttho woowoopola. Nto okathi omphenta wanyu Yehova onrowa aya otepaka olipa, munimoona wiira “sooruma sawe khasinvila weettela.” — 1 Yoh. 5:3.a

7. Etthu xeeni amiravo ayariwe etthoko ya Anamoona a Yehova anireerela aya wuupuwelela?

⁷ Ankhi nyuwo amiravo muyariwe etthoko ya Anamoona a Yehova? Nave nyuwo mwa anaskola a Biibiliya. Tthiri nyuwo mwa anaskola a Biibiliya, arina efaita yinceene para anamuyari anyu. Biibiliya onihimya so: “Mmwaattameleke Muluku, vano owo onoowaattamelani.” (Yak. 4:8; 1 Wah. 28:9) Okathi munipaka anyu itthu wiira mukhale mpatthani a Yehova, nave owo onoopaka etthu emosa-ru wiira okhale mpatthani anyu. Owo khonoothokoreryani ntoko ekurupu ya atthu. Yehova khoniwaattamelani mwaha woowi muyariwe etthoko ya Anamoona a Yehova, maana owo onnimwaattamela khula mutthu. Etthu xeeni Yehova opanke awe wiira mukhalane ompatthani woolipa ni yena? Yehova oonivaha Mwanawe. Muhiliyale wiira yoovaha ela ti ya efaita Yehova opanke awe para nyuwo. (Arom. 5:​1, 2) Nto muhinatthi orowa muthukumano wa Wuupuwelela, munoonela sai wiivaha okathi wiira muupuwele etthu Yehova ni Yesu apanke aya para nyuwo? Nuumala-vo, muupuweleke moota mukhanle anyu oorumeela okumi anyu ni soolukama munireerela anyu okhalana wiira mmooniherye Yehova omuxukhurela wanyu mwaha wa yoowoopola.b

MAKRISTAU OOPATISIWA

8. Ale apatisiwe yoonihenrye sai wiira annixukhurela yoowoopola?

⁸ Vakhala wiira moopatisiwa, nyuwo muhooniherya mwa inamuna soovirikana wiira munnixukhurela yoowoopola. Mwa ntakiheryo, moopaka marukunuxo mookumini mwanyu, wiira mmusiveliheke Yehova ni okhala mpatthani awe. Nave munniiwelela yooruma ya Yesu ya olaleerya ni waapaka awiixutti. Muhiivahererya wa Yehova ni moopatisiwa. Woonasa wene, atthu akina yaanoolupatthani mwaha woothanla omukokhorela Yehova. (2 Tim. 3:12) Masi khimwaahiyale omurumeela Yehova moororomeleya, nto muhooniherya wiira munnimphenta Yehova ni munnixukhurela mukuttho woowoopola. — Ahep. 12:​2, 3.

9. Hata nipatisiwe ene, xeeni ninreerela ahu okhalana ephoole?

⁹ Hata nipatisiwe ene, nihaana okhalana ephoole. Mwaha wa xeeni? Mwaha woowi, hiyo pooti ohiya ovaha efaita mukuttho woowoopola. Eyo yaarowa wiiraneya sai? Nkahaya nwuupuwele makristau a muloko wa wEefeso. Nuumala ohihimuxiwa, Yesu aahaattottopela mwaha wa ovilela waya. Masi-tho aahaaleela wiira: “Kinnoopwapwelani mwaha wa etthu ela: Nyuwo moohiya ophenta mwaarina anyu woopaceryani.” (Wis. 2:​3, 4) Moolumo ala a Yesu, annooniherya wiira vakhaani-vakhaani, mukristau pooti ohiya okhalela nthiti omukokhorela Yehova. Owo pooti onvekelaka Yehova, orowela mithukumano ni olaleerya. Masi yena pooti opakaka itthu iyo murima awe ohikhanle vaavo. Maana khonipaka itthu iyo mwaha wa omphenta Yehova. Etthu xeeni mukhanle anyu oopaka moona wiira omphenta wanyu Yehova kholimpe ntoko khalai?

10. Ninrowa weettela sai miruku murummwa Paulo anvahale awe Timootheyo? (1 Timootheyo 4:​13, 15)

¹⁰ Murummwa Paulo aahimuleela Timootheyo wiira “muupuweleleke” ni “mukhaleleke nthiti” ovara miteko sa Muluku. (Mmusome 1 Timootheyo 4:​13, 15.) Nave nyuwo muupuweleke itthu mukhanle anyu oopaka wiira nvareke muteko moowiilipiha mmukokhorelaka Yehova. (Arom. 12:11) Mwa ntakiheryo, nyuwo pooti oviriha okathi mulokiheryaka mithukumano. Nto eyo enimookhaliheryani ovaha ephoole okathi wa mithukumano. Nave nyuwo pooti waavya opuro woomaaleleya wiira mmusome Biibiliya ni wuupuwelela ele munisoma anyu. Opaka eyo, enimookhaliheryani ottottela mureerelo yoosoma anyu. Eyo enoolikana ni ohela ikhuni vaikho wiira mooro ohiciphe. Nto nyuwo pooti opaka itthu iya wiira mulipihe ompatthani anyu ni Yehova ni mooniherye oxukhurela wanyu itthu Yehova opanke awe para nyuwo, ohela muhina yoowoopola. Nave-tho, isumana vakhaani nihinatthi ophiya nihiku na Wuupuwelela, mwaavyeke okathi wiira muupuwelele mareeliho nimphwanya ahu mwaha wookhala Anamoona a Yehova. Eyo enimookhaliheryani wunceererya oxukhurela wanyu mukuttho woowoopola, yoowo onnikhaliherya okhala apatthani a Yehova.

11-12. Niireke ohikhalela nthiti omukokhorela Yehova, enooniherya wiira khonnivaha ikuru soowaarya? Mutthokiherye. (Nwehe efootu.)

¹¹ Vakhala wiira woovira okathi munceene muhikhalelaka nthiti omukokhorela Yehova, muhikhulumuwe. Eyo khenitaphulela wiira Yehova khonoovahani ikuru sawe soowaarya. Muupuweleke etthu murummwa Paulo aalempe awe sa muteko awe woolaleerya oKorinto, oriki: “Hata kipakaka eyo kihiphavelaka, nlelo kinniroromeliwa ni Muluku wiira kivare muteko ola.” (1 Akor. 9:17) Moolumo ala a murummwa Paulo, anniixuttiha exeeni?

¹² Ikwaha sikina, saanikhala itthu saamwiiriha murummwa Paulo ohikhalela nthiti muteko woolaleerya. Hata vari siiso, Paulo khaahiyale olaleerya moohicikha itthu saamukhumelela okathi owo. Nave nyuwo pooti opaka etthu emosa-ru. Nto muhaana okhalela nthiti opaka itthu sooloka, hata vooxankihakani. Munvekeleke Yehova wiira oovaheeni “ophavela ni owerya ovara muteko.” (Afil. 2:13) Muhihiye okhalela nthiti ovara miteko sa Muluku. Mukupaliki wiira vakhaani-vakhaani, itthu iyo sinimookhaliheryani olipiha omphenta wanyu Yehova.

13. Ninrowa wiivarerya sai wiira niwehe vakhala wiira ninneettela waamini?

¹³ Ikwaha sikina ti vooloka wiivarerya, nittharaka malakiheryo ari 2 Akorinto 13:​5, yaawo ani: “Okathi wootheene mwiiweheke akhala wiira nlelo munneettela waamini. Mwiivareryeke wiira musuwele omutthu anyu.” Mwa ntakiheryo, mwiikoheke so: Kiireke kinnihela nipuro noopacerya Omwene wa Muluku? (Math. 6:33) Kiireke matthekulelo aka annooniherya wiira kinninyokha itthu sootakhala? (Esal. 97:10) Kiireke itthu kinilavula aka ni kinipaka aka, sinnikhaliherya muloko okhala woowiiraana? (Aef. 4:​2, 3) Ti vooreera wuupuwelela itthu iyo okathi wa Wuupuwelela. Okathi nnuupuwelela ahu etthu Yehova ni Yesu anipakenle aya, eyo enoonikhaliherya omuxukhurela Yehova ni wooniherya wiira khanniisiveliha mmansihu masi nimmusiveliha Kristu.c

ALE AHIYALE OLALEERYA NI OROWELA MITHUKUMANO

14. Itthu xeeni siniwiiriha anna ni arokora akina ohiya olaleerya ni orowela mithukumano?

¹⁴ Anna ni arokora akina, aahiya olaleerya ni orowela mithukumano, hata avirihale ene iyaakha sinceene amukokhorelaka Yehova moororomeleya. Mwaha wa xeeni? Mwaha woowi akina annitepa “oxankela itthu siniphavela” aya. (Luka 21:34) Akina aakhulumuwa mwaha wa etthu munna aahiiso murokora olavunle awe aahiiso opanke awe. (Yak. 3:2) Nave akina aahiya mwaha woowi aapaka etampi yuulupale, nto mwaha wa wuuliwa muru, anoovelela ovekela nikhaliheryo. Akhala wiira itthu iya nilavunle ahu yookhala ewiirihaleni ohiya olaleerya ni orowela mithukumano, etthu xeeni mukhanle anyu oopaka? Mukuttho woowoopola ohaana owiirihani opaka exeeni?

15. Yehova oniwoonela sai ale ahiyale olaleerya ni orowela mithukumano? (Ezekiyeli 34:​11, 12, 16)

¹⁵ Yehova oniwoonela sai ale ahiyale olaleerya ni orowela mithukumano? Yehova onnaaphenta ni khonaaliyala. Owo onniwaavya ni onnaakhaliherya ohokolowela wa yena. (Mmusome Ezekiyeli 34:​11, 12, 16.) Niireke Yehova onnipaka eyo para nyuwo? Aayo! Akhala wiira munnisoma mwaha ola, eyo enooniherya wiira munniphavela ohokolowela wa yena. Yehova ooweha mikhalelo sooloka murina anyu, nto ohookhaliheryani omusuwela ni wiirela mpantta mutthenkeso awe. Nto Yehova oniphavela wiira mutthikele olaleerya ni orowela mithukumano.

16. Etthu xeeni enrowa waakhaliherya otthikela wa Yehova, ale ahiyale olaleerya ni orowela mithukumano? (Nwehe efootu.)

¹⁶ Ebroxuura eni Muhokolowele wa Yehova, aakhala moolumo oovara murima ani: “Mukupaliki wiira Yehova onoowaakhelani mwamuhokolowela. Onimookhaliheryani ovilela oxankiheya, moota woomaliha owereya onoona anyu mwaha wooveehiwa ni mukristau mukhwiinyu, ni okhalana murettele mmupuweloni ni vamurimani mwaha wookhalana yoowuupuxerya ya murima yooloka. Nto nyuwo pooti ophavelaka otthikela omurumeela Yehova ni anninyu.” Nave muhiliyale wiira axitokweene anniphavela wookhaliheryani. Awo pooti okhala “ntoko nipuro nootthyawela okathi wa epheyo, nipuro nootthyawela okathi wa epula yinceene”. (Yes. 32:2) Wiira mooniherye oxukhurela wanyu yoowoopola, mwiikoheke so: ‘Etthu xeeni kikhanle aka oopaka wiira kitthikele wa Yehova?’ (Yes. 1:18; 1 Ped. 2:25) Mwa ntakiheryo, nyuwo pooti orowela mithukumano Empa ya Omwene. Nave pooti orowa olavula ni axitokweene wiira yookhaliheryeni otthikela okhalana ompatthani woolipa ni Yehova. Yoona oreerela, awo pooti wookhaliheryani wiira mutthikele omusoma Biibiliya. Vakhala wiira munoovekela voohimya sa mwaha owo ni wiimananiha wooniherya oxukhurela mukuttho wa Yesu, mukupaliki wiira Yehova onimookhaliheryani.

ETTHU XEENI MUKHANLE ANYU OOPAKA?

17-18. Etthu xeeni nikhanle ahu oopaka nihinatthi ophiya nihiku na Wuupuwelela?

¹⁷ Yesu ohimyale wiira oovaha okumi awe, “wiira ootheene ale anooniherya omwaamini yoowo, ahipwetexiwe, masi akhalane okumi woohimala.” (Yoh. 3:16) Mukuttho wa Yesu, enamuna Yehova orumenle awe wiira onoopole etampi ni okhwa. Nto nihihiye wooniherya oxukhurela wahu mukuttho owo. (Arom. 3:​23, 24; 2 Akor. 6:1) Nihinatthi ophiya nihiku na Wuupuwelela, niivaheke okathi wiira nuupuwelele ophenta Yehova ni Yesu anoonihenrye aya. Vaavo ninrowa ahu wuupuwelaka ophenta iwo, ninrowa otepaka opaka itthu sinooniherya oxukhurela wahu yoowoopola.

¹⁸ Munrowa wooniherya sai oxukhurela wanyu, yoowoopola? Moota munrowa anyu waakhula nikoho nla, pooti ovirikana ni moota atthu akina anrowa aya waakhula. Masi mukupaliki wiira Yehova onookhaliherya wiimananiha wanyu ni wiimananiha wa atthu akina, yaawo ahiniisiveliha mmansaya, masi animusiveliha Kristu, yoowo okhwiiye mwaha wa atthu awo. — 2 Akor. 5:15.