Niireke muhiilokiherya wiira muxintte mixankiho nuumala opatisiwa?

1-2. Nipakeke exeeni wiira nixintte mixankiho sikhanle ookhumelela nuumala opatisiwa? Nvahe ntakiheryo.

OLUMWENKU ola wa Satana, ootheene ahu sinooniphwanyaka mixankiho. Yesu aahaaleela awiixutti awe wiira: “Khivanweryaneya ohikhala [itthu] sinatthekiha atthu”. (Math. 18:​7, Biblia Solempwa Sowarya.) Moolumo awo, anooniherya wiira nnookhalanaka mixankiho, seiyo sikhanle oovukula waamini wahu. Mwa ntakiheryo, hiyo pooti okhalana muxankiho aahiiso ohiiwanana ni munna wala murokora. Masi nihaana wiilokiherya wiira niwerye oxintta ni ohihiya omwaattamela Yehova.

² Nkahaya muupuwele ela: Ikwaha sinceene arumeyi a Yehova annitumereriwa wiilokiherya sihinatthi okhumelela ihasara sa ephattu. Masi ninwerya sai wiilokiherya? Wanipacerya, ninniphavela osuwela ihasara sa ephattu sikhanle ookhumelela muttetthe ahu. Ti vootepexa oloka opaka eyo, vakhala wiira niphiyale niinaano muttetthe owo. Nuumala osuwela ihasara sikhanle ookhumelela, ninnimpaka palano wiira nisuwele etthu nikhanle ahu oopaka wiira niikhapelele sakhumelela vale. (Mir. 21:5) Mwa enamuna emosa-ru, ti vooloka osuwela mixankiho sikhanle ookhumelela nuumala opatisiwa. Opaka eyo, enoonikhaliherya osuwela etthu nikhanle ahu oopaka wiira nixintte mixankiho iyo. Niira siiso, nnoowerya ovilela mixankiho iyo ni ohihiya omwaattamela Yehova. (Esal. 17:5) Mwaha ola, ninrowa othokorerya mixankiho 3, woonasa wene sikhanle ookhumelela nuumala opatisiwa. Nave, nnooweha etthu nikhanle ahu oopaka wiira nixintte mixankiho iyo.a

OKATHI MUNNA AAHIISO MUROKORA ONOOPAKELAAWENI ETTHU YOOHILOKA

3. Nuumala opatisiwa, muxankiho xeeni okhanle ookhumelela?

³ Niireke munnuupuwela ekwaha yoopacerya mwaarowenle anyu mithukumano, nweha ophentana wa Anamoona a Yehova? Niireke eyo khiyookhalihenryeni okupali wiira moophwanya ekeekhai? (Yoh. 13:35; Akol. 3:12) Eyo ti etthu yaamwiiranenle Blanca.b Masi nuumala Blanca opatisiwa, yaahimwiiraneela etthu ekina ahaalipelela awe. Owo onihimya so: “Murokora mmosa aahikithokorerya voohiloka. Nave aanikaapa okathi aakhala awe ni atthu akina a mmulokoni. Kaahixanka vanceene, maana kaahiixutta wiira Anamoona a Yehova atthu a murettele ni aniphentana.” Ekeekhai wiira Anamoona a Yehova, anniimananiha okhala atthu a murettele ni oophenta. Masi, okhala wiira ootheene ahu nniyariwa nirina ene etampi, ikwaha sikina pooti olavula aahiiso opaka etthu yoohiloka. (Aef. 4:​23, 24; 1 Yoh. 1:8) Tivonto, okathi mukina munna aahiiso murokora pooti olavula wala opaka etthu, enrowa woowereyani. (Yak. 3:8) Mooriipiha murima, anna ni arokora akina, annihiya omurumeela Yehova mwaha wa mixankiho iyo.

4. Etthu xeeni mukhanle anyu oopaka, vakhala wiira munna aahiiso murokora onimoonyoonyihani? (Aefeso 4:32)

⁴ Etthu xeeni mukhanle anyu oopaka, vakhala wiira munna aahiiso murokora onimoonyoonyihani? Khula okathi, mwiimananiheke weettela malakiheryo ari Aefeso 4:32. (Mmusome.) Vakhala wiira munimwiimananiha okhala mutthu ooreera murima ni oowoona othunku, mukupaliki wiira eyo enimookhaliheryani oxintta mixankiho. Nave mwiimananiheke waalevelela atthu akina okathi anootthekelaayani. Etthu xeeni enrowa wookhaliheryani opaka eyo? Etthu enrowa wookhaliheryani, ori waalevelela atthu akina. Muhiliyale wiira ikwaha sinceene munninvekela Yehova wiira ooleveleleni. Nto, owo onnoolevelelani ni murima wootheene. (Math. 6:12) Wuupuwelela ikwaha sootheene Yehova onoolevelelaaweni, eyo enimookhaliheryani waalevelela atthu akina.

5. Malakiheryo xeeni a mbiibiliyani, anrowa onikhaliherya okathi munna aahiiso murokora onninyoonyiha awe? (Miruku 19:11) (Nwehe ifootu.)

⁵ Musome Miruku 19:11. Biibiliya onihimya wiira nakhala atthu a ankhilic ni osuwela mikhalelo sa atthu akina, eyo enoonikhaliherya opixa murima okathi nintthekeliwa ahu. Yoolepa ela yaahimukhaliherya Rima, yoowo opatisiwe iyaakha vakhaani sivinre. Owo onihimya so: “Okathi anna ni arokora anilavula aya aahiiso anipaka aya etthu yoohiloka, kinnuupuwelela yoolepa ya Miruku 19:11. Nave kinnuupuwela itthu siwiiranenle khalai ni etthu ewiirihale olavula wala opaka etthu eyo yoohiloka. Nave-tho, kinnaalattula wiira nalaleerye hoothe. Nto opaka eyo, ennikikhaliherya waasuwela saana.” Tthiri ti vooloka osuwela mikhalelo sa anna ni arokora niinaano-va. Nasuwela vale, eyo enoonikhaliherya waalevelela okathi anilavula aya aahiiso anipaka aya etthu enninyoonya.

6. Etthu xeeni enrowa onikhaliherya okhalana waataana wooloka ni anna ni arokora?

⁶ Etthu xeeni enrowa wookhaliheryani wiira mukhalane waataana wooloka ni anna ni arokora? Okathi munivaanela anyu, mwiimananiheke oweha mikhalelo saya sooloka. (Mulikanyihe ni Miruku 10:12; Arom. 12:10; Afil. 2:​2, 3) Nwehe moota opaka eyo, yaamukhalihenrye aya munna opatisiwe niinaano oniihaniwa Mark. Nuumala opatisiwa, owo aaniviriha okathi munceene ori ene ni anna ni arokora a mmulokoni. Nto, aahipacerya oweha mikhalelo soohiloka anna ni arokora awo arina aya. Exeeni yaamukhalihenrye Mark ohihiya omwaattamela Yehova ni okhalana ompatthani wooloka ni anna ni arokora? Munna Mark, onihimya so: “Miyo kaahiweha wiira soovonya sa anna ni arokora, khahiyo suulupale kalikanyiha ni itthu sootakhala sinipakiwa ni atthu ahinimurumeela Yehova. Nto kaahoona wiira ti voohiloka owehexexa soovonya sa anna ni arokora. Ohiya opaka eyo, kaahipacerya owehexexa mikhalelo saya sooloka ni wuupuwelela mikhalelo iyo.” Mwa enamuna emosa-ru, vakhala wiira munoowehaka mikhalelo sooloka sa anna ni arokora, eyo enimookhaliheryani okhalana ompatthani wooloka naawo.

WUUPUWELA ITTHU MUHIYALE ANYU MOOLUMWENKUNI

7. Etthu xeeni yaarowa oniiriha otthikela opaka itthu nihiyale ahu?

⁷ Nuumala okhala Namoona a Yehova, nyuwo mwaahilakela ohiirela-tho mpantta khula etthu enivarihana ni olumwenku ola wa Satana. Woonasa wene, nyuwo munuupuwela so: Miyo nkinitthikela-tho opaka itthu sinivarihana ni olumwenku. Masi okathi sinoophwanyaayani mixankiho, nyuwo pooti opaceryaka wuupuwela itthu mwaapaka anyu muhinatthi okhala Namoona a Yehova. Nto murima anyu pooti wunlelaka itthu iyo. (Mulikanyihe ni eliivuru ya Mammeru 11:​4-6.) Mwa ntakiheryo, anna ni arokora akina aahiya muteko yaaliviwa aya musurukhu munceene, masi waawiiyerya okathi yaarowa aya ovaraka miteko sa Muluku. Nave akina ahaahiya apatthani aya nuumala opacerya omusoma Biibiliya. Nave-tho, akina aahiya soolema saasivela, seiyo Yehova oninyokha awe. Tthiri yaarowa okhala etthu yooriipiha murima, mukristau ohiya omurumeela Yehova mwaha wa otthikela opaka itthu iye aahiyale awe! Etthu xeeni mukhanle anyu oopaka wiira okathi munikhalana anyu mixankiho, muhitthikele opaka itthu muhiyale anyu?

8. Ntakiheryo na Abrahamu ni Sara, ninniixuttiha exeeni?

⁸ Mbiibiliyani, aakhala matakiheryo manceene a arumeyi oororomeleya, yaawo okathi mukina yuupuwela itthu yaahiyale aya. Mwa ntakiheryo, mwaha wa omwiiwelela Yehova, Abrahamu ni Sara yaahikhuma esitati yoolipihiwa ya wUri, anarowa okhala mutentani. (Ahep. 11:​8, 9) Moohaanyiherya, pooti wiira awo yaanuupuwela itthu sooreera yaarina aya elapo ya wUri. Masi “vaakhanle wiira awo yaanuupuwela opuro yaakhumme aya”, aahiiso yaaninkheliwa itthu yaahiyale aya, eyo yanwiiriha otthikela elapo ya wUri. Ohiya opaka eyo, awo yaawehexexa itthu Yehova aarowa awe waavaha muhoolo. — Ahep. 11:​15, 16.

9. Murummwa Paulo oonela sai itthu aahiyale awe moolumwenkuni? (Afilipi 3:​7, 8, 13)

⁹ Murummwa Paulo aahihiya itthu sikina wiira omurumeeleke Yehova. Mwa ntakiheryo, ohinatthi okhala mukristau, Paulo aahiixuttihiwa Malamulo a ayuda ni purusoore ootepexa ovuwa aihaniwa Gamaliyeli. (Mit. 22:3) Nto Paulo anwerya okhala muhooleli aattittimihiwa vanceene a etiini ya ayuda. (Akal. 1:​13, 14) Masi nuumala weemererya ihapari sooreera sa Kristu, Paulo aahihiya itthu sootheene. Niireke nuumala okhala mukristau, makhalelo a Paulo yaari ooloka? Nnaari. Owo aahimaniwa, otthukweliwa mukhatteya ni aaninyokhiwa ni ayuda akina. (2 Akor. 11:​23-26) Vaakhanle wiira Paulo aaniwehexexa mixankiho iye ni aanilikanyiha ni makhalelo awe a khalai, owo aamuupuwelaka wiira aahipaka etthu yoohiloka mwaha woopacerya omutthara Yesu. Masi Paulo khuupuwela siiso. Ohiya-vo, owo uupuwelela eparakha aarina awe ya okhala mutthareli a Yesu Kristu ni mareeliho aarowa awe ophwanya muhoolo. Tthiri, Paulo aanikupali ni murima wootheene wiira marukunuxo aapanke awe khahiyo yaari a mahala. — Mmusome Afilipi 3:​7, 8, 13.

10. Itthu xeeni ikwaha sinceene munireerela anyu wuupuwelelaka? (Marko 10:​29, 30) (Nwehe ifootu.)

¹⁰ Etthu xeeni nniixutta ahu? Akhala wiira noopacerya wuupuwela itthu nihiyale ahu wiira nimurumeeleke Yehova, nave nihaana wuupuwela etthu eniirihale ohiya itthu iyo. (Mus. 7:10) Muupuweleke itthu sooreera murina anyu olelo-va, ovikana itthu muhiyale anyu muhinatthi wiixutta ekeekhai. Mwa ntakiheryo, nyuwo mookhalana ompatthani wooloka ni Yehova. (Mir. 3:32) Nave mookhalana anna ni arokora a muloko anyu ni a olumwenku wootheene, yaawo anoophentani vanceene. (Mmusome Marko 10:​29, 30.) Nave-tho, muupuweleke mareeliho Yehova onrowa awe woovahani muhoolo. (Yes. 65:​21-23) Akhala wiira ikwaha sinceene munimuupuwelaka itthu sooreera mphwanyale anyu mwaha wa omukokhorela Yehova, woonasa wene, khamunrowa otepaka wuupuwela itthu muhiyale anyu.

11. Ntakiheryo na murokora Rosemary, ninniixuttiha exeeni?

¹¹ Murokora oniihaniwa Rosemary, opatisiwe orina ene iyaakha 50. Nwehe etthu enimukhaliherya ohitepa wuupuwela itthu ohiyale awe ottuli. Owo onihimya so: “Nuumala okhala Namoona a Yehova, khula mwaakha kaaniriipiwa murima okathi wa Natali. Mwaha woowi, waanikisivela oviriha okathi kiri ene ni amusi aka. Waanikisivela waavaha iperesenti atthu kinaaphenta aka. Nave waanikisivela waaweha anamwane yaattamenle ene mwiri wa Natali ni ahakalanle ene atthukulaka iperesenti saya.” Etthu xeeni emukhalihenrye Rosemary? Owo onihimya so: “Kihiixutta oviriha okathi kiri ene ni amusi aka nihiku nikina, ohiya nihiku na Natali. Khula mwaakha, mahiku oovirikana, kinnaalattula amusi aka wiira nivirihe nihiku niri ene hoothe. Okathi owo, kinnavaha iperesenti ni kinnaaleela wiira kinnaphenta vanceene.” Rosemary aahikhalana muxankiho mukina. Owo onihimya so: “Nuumala wiixutta ekeekhai, apatthani aka yaahihiya weetta ni miyo. Ikwaha sikina kaaniriipiwa murima mwaha woowi nkaaviriha-tho okathi kitthekulaka naawo, ni kaanaapirisari apatthani akina.”d Etthu xeeni emukhalihenrye Rosemary? Owo aanaalattula arokora akina wiira yalaleerye hoothe. Rosemary onihimya so: “Okathi naalaleerya ahu, kaanaasuwela oratteene arokora awo, nto naapatthani aalupale. Vano kookhalana apatthani kinaaphenta aka ni kinaavaha aka efaita.” Ntakiheryo na murokora ola ninniixuttiha exeeni? Nniixutta wiira, akhala wiira sookhala itthu saanisivela ni saanihakalaliha nihinatthi opacerya omukokhorela Yehova, nihiliyale wiira nnoowerya okhalana itthu sikina sootepa oreera ni soohakalaliha ovikana iye nihiyale ahu. (Afil. 4:​8, 9) Muhikhala-khale muliyalaka ela: Okathi wootheene, Yehova onimoovahakani itthu sootepa oreera ovikana iye muhiyale anyu.

OKATHI ATTHU AKINA ANIHIYA AYA OMUKOKHORELA YEHOVA

12. Etthu xeeni yooriipiha murima ekhanle ookhumelela mmulokoni?

¹² Nuumala okhala Namoona a Yehova, mwaahihakalala mwaha wa ohiirela mpantta olumwenku ola wootakhala. Vano muniirela mpantta ekurupu ya atthu aniixuttiha ekeekhai ni anipaka itthu sooloka. (Yes. 65:14) Masi okathi mukina, anna ni arokora annipaka itampi suulupale. Nto vakhala wiira khanittharuwa ni murima wootheene, awo annikumihiwa mmulokoni. (1 Akor. 5:13) Nwehe etthu yaamwiiranenle murokora Samar nuumala wiiwa wiira mutokweene mmosa ookumihiwa mmulokoni. Murokora Samar onihimya so: “Ohivirale okathi munceene nuumala miyo opatisiwa, mutokweene mmosa aahipaka etampi yuulupale ni aahikumihiwa mmulokoni. Eyo yaahikikhulumula vanceene, maana nkaakupali wiira mutokweene ammutthekela Yehova ni aamwaariipiha murima anna ni arokora mmulokoni.” Tthiri hiyo ninnikupali wiira okathi wootheene, anna ni arokora annimphenta Yehova ni anniphavela ohihiya okhala oororomeleya. (1 Akor. 13:​4, 7) Masi mooriipiha murima, khula mwaakha atthu anceene annikumihiwa mmulokoni. Okathi owo pooti wooxankihani akhala wiira mutthu owo okumihiwe mmulokoni, aari mpatthani anyu, mmusi aahiiso mutthu mwaamuttittimiha anyu vanceene.

13. Etthu xeeni mukhanle anyu oopaka akhala wiira mutthu mwamphenta anyu oohiya omurumeela Yehova?

¹³ Etthu xeeni mukhanle anyu oopaka niinaano-va, enrowa wookhaliheryani ohihiya waamini akhala wiira mutthu mwamphenta anyu onnihiya omurumeela Yehova? Muhihiye olipiha ompatthani anyu ni Yehova. (Yak. 4:8) Ompatthani anyu ni Yehova ohilipeke ni ororomeleya wa atthu akina. Mwa ntakiheryo, ninnimusoma Biibiliya ni ovekela niri ene ni amusi ni anna ni arokora mmulokoni. Masi nihaana onvekela Yehova ikwaha sinceene ni okhalana eporokaraama ahu ya omusoma Biibiliya. — Esal. 1:2; 62:8.

14. Ntakiheryo na murummwa Pedru, ninniixuttiha exeeni? (Yohani 6:​66-68)

¹⁴ Etthu murummwa Pedru aapanke awe nuumala awiixutti akina ohiya omutthara Yesu, enniniixuttiha etthu ya efaita yinceene. Pooti wiira Pedru khiiwexenxe etthu Yesu aahimyale awe. Masi hata vaari siiso, Pedru khaahiyale ororomeleya. Nwehe etthu Pedru aahimyale awe eri Yohani 6:​66-68. (Mmusome.) Ohiya otakiha etthu emosa-ru atthu akina yaapanke aya, Pedru aahivarexexa ekeekhai aixuttihiwe awe ni Yesu. Nto eyo, yaahimukhaliherya Pedru ohihiya omutthara Yesu. Mwa enamuna emosa-ru, itthu atthu akina anipaka aya, khasinivukula efaita erina aya ekeekhai niixuntta ahu nikhaliheriwaka ni mutthenkeso wa Yehova. Nto muhihiye ororomeleya wa Yehova ni ovaha efaita ekeekhai eyo. Murokora Samar nimulavunle ahu ittima sivire, onihimya so: “Okathi wootheene kinnuupuwela wiira itthu soohiloka atthu akina anipaka aya, khasinooniherya wiira atthu ootheene a mmulokoni ni mutthenkeso onipaka itthu soohiloka. Nave Yehova khonihiya okhala Muluku orina mikhalelo sooreera.”

15. Etthu yaamwiiranenle Emily, eniwiixuttihani exeeni?

¹⁵ Nkahaya muupuwele etthu yaamwiiranenle Emily. Nuuvira esumana emosa opatisiwe ene, maama awe aahikumihiwa mmulokoni ni aahikhuma vatthokoni vawe. Emily onihimya so: “Nkaakupali wiira maama aka ampaka etthu yoohiloka ni aamuhiya omurumeela Yehova. Ola muxankiho muulupale okiiranenle ni kinninkheliwa ni maama aka.” Etthu xeeni enimukhaliherya Emily? Owo onihimya-tho so: “Miyo nkikhanle mekhaka. Paapa aka onnikiphenta ni onnikikhapelela oratteene. Nave anna ni arokora annikithokorerya ntoko mmusi aya. Khula mutthu onimurumeela Yehova, sinnimphwanya mixankiho. Tivonto, vari aya vooloka okhalana waataana wooloka ni anna ni arokora, okhaliheryana ni olipihana mukina ni mukhwaawe.” (1 Ped. 5:9) Hiyo khannipirisari olipelela oniphwanya mixankiho wiira nilipiheke waataana nirina ahu ni anna ni arokora. Muhihiye opaka eyo. Nto mwiira siiso, okathi sinoophwanyaayani mixankiho, anna ni arokora animookhaliheryani ni woolipihani.

16. Etthu xeeni nihinreerela ahu oliyala? (Nwehe efootu.)

¹⁶ Muhiliyale wiira Yehova onnaattaruxa ale onaaphenta awe. (Ahep. 12:6) Nave oniphavela wiira ootheene ale akumihiwe mmulokoni attaruwe itthu soohiloka yaapaka aya ni atthikele mmulokoni. (2 Ped. 3:9) Nto akhala wiira mutthu munimphenta anyu ookumihiwa mmulokoni, mukupaliki wiira axitokweene anoomukhaliherya otthikela omurumeela Yehova. — 2 Tim. 2:​24, 25.

17. Etthu xeeni munireerela anyu okupali?

¹⁷ Mpakha-va, noothokorerya mixankiho sikhanle oowoophwanyani nuumala opatisiwa. Masi khamunipirisari woova. Munoowerya omurumeela Yehova moororomeleya. Sookhala itthu sinceene mukhanle anyu oopaka wiira mwiilokiherye okhuma niinaano-va. Nave muhiliyale wiira Yehova onimookhaliheryani wiira muhihiye okhala mutthu oororomeleya. Okhuma khalai onnookhaliheryani ni onrowa wookhaliheryakani mahiku ootheene! (1 Ped. 5:10) Khula okathi, Yehova onnoovahani ikuru wiira nwerye ovilela mixankiho. Nto akhala wiira munimweemererya okhaliheriwa ni Yehova, mukupaliki wiira khuuvo muxankiho onrowa owiirihani ohiya omurumeela! — Esal. 119:165; Arom. 8:​38, 39.