Muhihiye opaka marukunuxo wiira mpatisiwe

1. a) Akhala wiira moopatisiwa, eyo entaphulela exeeni? b) Mwaha ola, ninrowa othokorerya exeeni?

NIIREKE muhiivahererya wa Yehova ni moopatisiwa? Akhala wiira moopatisiwa, eyo entaphulela wiira monvekela Yehova wiira ooleveleleni itampi sanyu ni ooweemereryani omukokhorela hoothe ni atthu akina. (1 Ped. 3:21) Nave muhaavaha ntakiheryo nooloka amiravo ni atthu ale nlelo ahipatisiwe. Tthiri nyuwo moopaka yoothanla yooloka! Ankhi vakhala wiira nlelo khampatisiwe? Moohaanyiherya nyuwo munnimphenta Yehova ni munniphavela omurumeela. Nave munnisuwela wiira ti vooloka opatisiwa wiira muleveleliwe itampi sanyu ni mukhale mpatthani a Yehova. (Mit. 2:​38-40) Exeeni ekhanle oowookhaliheryani, akhala wiira munnoovelela opatisiwa? Mwaha ola, ninrowa othokorerya 1) itthu siniwiiriha atthu akina woovelela opatisiwa, 2) xeeni vanireerela aya ohipiserya opatisiwa? ni 3) mareeliho xeeni munrowa anyu ophwanya mwapatisiwa niinaano-va?

ITTHU SINIWIIRIHA ATTHU AKINA WOOVELELA OPATISIWA

2. Etthu xeeni eniwiiriha atthu akina ohipatisiwa?

² Woova onniwiiriha atthu akina ohipatisiwa. Mwa ntakiheryo, hata aphavelaka omurumeela Yehova, atthu akina annoova yuupuwelaka wiira khanrowa owerya opaka itthu sinimusivela Yehova. Akhala wiira munuupuwela siiso, musomeke soolepa sa mbiibiliyani sinooniherya wiira Yehova khonlipelela wiira okathi wootheene munrowa opakaka itthu sooloka. Nave onnihakalala okathi munipaka anyu ele muniwerya anyu. (Esal. 103:​13, 14; Akol. 3:23) Akhala wiira munoova olupatthiwa, munvekeleke Yehova wiira ookhaliheryeni okhalana moonelo aarina awe nasaalimu, yoowo aalempe so: “Yehova ori ni miyo; nkinrowa woova etthu. Exeeni mutthu oniwerya awe okiiriha?” — Esal. 118:6.

3. Xeeni atthu akina anipiserya aya opatisiwa? (Nwehe eteseenyu vakaapani.)

³ Atthu akina annipiserya opatisiwa maana anuupuwela wiira khanisuwela itthu sinceene sa mbiibiliyani. Niireke onipirisari osuwela itthu sootheene siri mbiibiliyani wiira mpatisiwe? Nrowe nthokorerye ntakiheryo na kwarta a mukhatteya ni emusi awe. Nuumala etetere onyaanya ekhatteya, Paulo ni Sila yaahikhuma mukhatteya. Nto yaahikhalana eparakha ya omwiixuttiha kwarta ole ni emusi awe ihapari sooreera sa Yesu. Woonasa wene, mulopwana ole ni emusi awe yaahisuwela wiira mwa mwiiriirya, Muluku aahaakumiha arumeyi awe mukhatteya. Nave ohiyu ene yoole, awo yaahiixuttihiwa ikeekhai sa efaita yinceene sa Yehova ni Yesu. Nto kwarta ole ni atthu ootheene a etthoko awe, “yaahipatisiwa voohipisa.” (Mit. 16:​25-33) Akhala wiira munnimphenta Yehova ni murima anyu wootheene, munnisuwela soowiixuttiha soopacerya sa mbiibiliyani, moottharuwa soottheka sanyu ni moolakela otthara sooruma sa Yehova, nto eyo enitaphulela wiira moolikana wiira mpatisiwe. — Mar. 12:30.

4. Itthu xeeni atthu akina anuupuwela aya siniwiiriha woova opatisiwa? (Nwehe efootu.)

⁴ Atthu akina anniphavela opaka marukunuxo wiira amusiveliheke Muluku ni opatisiwa, masi vannaaxankiha opaka eyo. Ti va miruku wuupuwela moota yoothanla eyo enrowa aya waafetari okumi anyu. (Luka 14:​27-30) Nave akina, annuupuwela vanceene itthu anrowa aya oleva wiira amurumeeleke Muluku. Eyo ti etthu yaamwiiranenle Candace. Okathi aari awe mwaana, owo aahiixutta itthu aakhanle awe oopaka wiira omusiveliheke Yehova. Masi kheettela itthu aixuntte awe. Nuumala wunnuwa, owo aahitthikela omusoma Biibiliya. Candace onihimya so: “Miyo kaanisuwela itthu kaareerela aka opaka para Yehova. Hata vari siiso, nkaawerya ohiya mweettelo aka nnaamwi kaasuwela wiira khiwaamusivela Yehova. Vaanikixankiha ottharuwa itthu iye kaapaka aka.” Akina anuupuwela wiira khanrowa owerya okhalana mweettelo onimusivela Yehova nuumala opatisiwa. Awo anoova opaka etampi yuulupale nuumala opatisiwa, nto akumihiweke mmulokoni. Akhala wiira itthu iya sinnooxankihani, etthu xeeni mukhanle anyu oopaka?

5. Okathi muniphavela anyu opatisiwa, itthu xeeni mukhanle anyu oowuupuwelela? (Matheyo 13:​44-46)

⁵ Okathi nimphavela ahu othuma etthu yooreera, khaninwehexexa eperesu paahi, masi ninweha efaita erina aya etthu eyo. Okhala wene, khannoovelela othuma etthu ninsuwela ahu wiira enoonikhaliherya vanceene. Mwa enamuna emosa-ru, okathi muniphavela anyu opatisiwa, muhuupuweleke paahi marukunuxo ni mixankiho munrowa anyu okhalana. Masi muupuweleke mareeliho munrowa anyu ophwanya mwaha wookhalana ompatthani ni Yehova. Ophavelaka ottittimiherya mwaha ola, Yesu aahipaka malikanyiho manli. (Mmusome Matheyo 13:​44-46.) Khula nlikanyiho, ninnooniherya wiira mulopwana mmosa aahitumiha itthu sootheene aarina awe wiira othume etthu ya faita yuulupale aaphwanyale awe. Nave-tho, nyuwo moophwanya etthu ya faita yuulupale, eyo piiyo, ihapari sooreera sa Omwene. Akhala wiira munnoovelela opaka marukunuxo wiira mpatisiwe, muupuweleke matakiheryo ala a Yesu. Mwiikoheke so: Kiireke kinnikupali wiira ihapari sooreera sa Omwene sookhalana efaita yinceene? Kiireke kinnivaha efaita ompatthani aka ni Yehova, anna ni arokora ni nlipelelo okivahale awe? Osuwela waakhuliwa wa makoho ala, onimookhaliheryani oweha itthu mukhanle anyu oopaka wiira mpatisiwe.

6. Etthu xeeni enrowa onikhaliherya weettela itthu nniixutta ahu?

⁶ Nlikanyiho na mulipa-oomisa, Yesu aahihimya wiira atthu akina yaarowa wiiwa ihapari sooreera, khiyaarowa weettelaka itthu yiixutta aya. Nave Yesu aahihimya wiira atthu akina yaarowa wiiwa “nuulumo ni murima wootheene”, niire so, yaarowa wiiwa ihapari sooreera ni weettela ele aniixutta aya. (Luka 8:​5-15) Akhala wiira munnixanka, moovaka wiira khamunrowa owerya weettela itthu muniixutta anyu, muhikulumuwe. Mukhaliheriwaka ni Muluku, munoowerya okhalana “murima musya”, eyo piiyo, munoowerya omwiiwelela ni weettela malakiheryo awe. Nto munvekeleke Yehova wiira ookhaliheryeni weettela ni osiveliwa itthu muniixutta anyu. — Ezek. 18:31; 36:26.

7-8. Etthu xeeni eniwiiriha amiravo akina ohipaka marukunuxo wiira apatisiwe? (Nwehe efootu.)

⁷ Amiravo akina, yaawo animphenta Yehova, khanipaka marukunuxo wiira apatisiwe, mwaha woowi anihapuxiwa ni atthu akina. Mwa ntakiheryo, mapurusoore makina, anneererya owiiriha anaskola wuupuwela wiira khahiyo vootakhala okhalana mweettelo woohiloka, hata mweettelo owo ohivarihanaka ni malamulo a Muluku. Nto miruku iyo, sinnikumiherya mixankiho sinceene. (Esal. 1:​1, 2; Mir. 7:​1-5) Munoowerya osyaka mixankiho iyo, vakhala wiira munootthara ntakiheryo na nasaalimu, yoowo aamulenle Yehova wiira: “Kookhalana ankhili anceene waavikana ootheene ale anikiixuttiha, okhala wiira kinnuupuwelela ikano sanyu.” — Esal. 119:99.

⁸ Irelatoorio sinceene, sinnooniherya wiira anamuyari akina, annaakhoottiherya anaaya opatisiwa. Anamuyari awo, aniphavela wiira anaaya asome vanceene ni aphwanye muteko oniliviwa musurukhu munceene. Nto anniliyala waatumererya anaaya, okhalana soolukama sinrowa waakhaliherya okhalana ompatthani woolipa ni Yehova. Niireke munoona wiira anamuyari anyu khanookhaliheryani ophwanya yoolukama anyu ya opatisiwa? Munoonela sai ovaanela naawo voohimya sa mwaha owo? Musuweleke wiira, moohicikha iyaakha murina anyu, munoowerya okhalana ompatthani woolipa ni Yehova. — Mir. 20:11.

9. Etthu xeeni eniwiiriha atthu akina opiserya opatisiwa?

⁹ Atthu akina yaawo aniphwanelela opatisiwa, annipiserya opatisiwa mwaha woowi animulipelela mutthu mukina wiira apatisiwe hoothe. Mwa ntakiheryo, awo pooti ophavelaka opatisiwa nihiku nimosa-ru ni mpatthani aya aahiiso mmusi aya. Ekeekhai wiira nyuwo pooti opatisiwa nihiku nimosa-ru ni mutthu munimphenta anyu. Masi niireke vannireerela opiserya opatisiwa mwaha wa yeeyo? Muhiliyale wiira, wiivahererya wa Muluku, yoothanla ya khula mutthu ni khenaahela muhina atthu akina. Nave opatisiwa wanyu, khonlipa ni itthu atthu akina anipaka aya. — Arom. 14:12.

XEENI VANIREERELA AYA OHIPISERYA OPATISIWA?

10. Etthu xeeni eniwiiriha atthu akina ohipaka marukunuxo wiira apatisiwe?

¹⁰ Ohiya paahi itthu nilavunle ahu ittima sivinre, atthu akina, khanipaka marukunuxo wiira apatisiwe, mwaha woowi, anuupuwela wiira woohala okathi munceene wiira olumwenku ola omale. Niireke owo muupuwelo wooloka? Nnaari, maana Yesu aahaaleela awiixutti awe wiira: “Nyuwo-tho, mukhale oolikana ene, okhala wiira Mwaana a Mutthu onirwa ewoora muhinuupuwela anyu.” — Luka 12:40.

11. Moovarihana ni Esaalimu 119:​60, vaavo nintepa ahu omusuwela Yehova, nooneleke sai malamulo awe?

¹¹ Ophenta tonniiriha wiivahererya wa Yehova ni opatisiwa. Okathi nimmusuwela ahu oratteene Yehova, ninnoona wiira onniniphenta vanceene. Nto eyo enniniiriha wiiwelela malamulo awe, maana anniniphwanyiha mireerelo. (Musome Esaalimu 119:60.) Murummwa Yakobo, oohimya etthu ekina yuulupale enniiriha wiiwelela malamulo a Yehova. Etthu ene tiila: Khuuvo mutthu onisuwela moota okumi awe onrowa aya okhala meelo. Nto, nihaana orumeela khula nihiku, wiira nisuwele “etthu yooreerela opaka”, yeeyo Yehova oniphavela awe wiira nipakeke. — Yak. 4:​13-17.

12. Nlikanyiho na Yesu na ematta ya ewuuva, ninniixuttiha exeeni?

¹² Nkahaya muupuwele nlikanyiho na Yesu na ematta ya ewuuva. Yesu aahimmye wiira, atthu akina yaahivara muteko nihiku nootheene, ni akina yaavanre muteko ewoora emosa paahi, masi ootheene aya, yaahiliviwa musurukhu, mwaattelo mmosa-ru. Masi etthu xeeni yaawiirihale anamuteko akina ovara ewoora emosa paahi? Awo yaahimyale so: “Khuuvo onivahale muteko.” Khahiyo wiira anamuteko ale yaari atthu oolosowa, masi okhala wiira, khuuvo mutthu aavahale muteko. Nto okathi yaavahiwe aya muteko, moowaakuveya, yaahirowa ovara. (Math. 20:​1-16) Olelo-va, Yesu onninivekela okhala awiixutti awe ni ovara muteko wa olaleya Omwene. Nto nuumala wiixutta ekeekhai, nihaana ovara muteko Yesu onirumme awe.

13. Yoowiiraneya ya mwaarawe Lothi, enniixuttiha exeeni?

¹³ Atthu akina annipisa opaka marukunuxo wiira amurumeeleke Yehova, maana anuupuwela wiira anrowa opaka marukunuxo awo ohalaka vakhaani olumwenku ola omala. Masi vaavo anipisa aya, vanootepa waaxankiha opaka marukunuxo awo. Yesu aanisuwela eyo, nto aahaalopola awiixutti awe oriki: “Mmuupuweleke mwaarawe Lothi.” (Luka 17:​31-35) Mwaarawe Lothi, aanisuwela wiira moohipisa, Yehova aarowa opwetexa muttetthe wa oSodoma ni oGomora. Masi owo aahitepa ovarexexa mireerelo aahiyale awe ottuli. (Maph. 19:​23-26) Yoowiiraneya ela, enninikhaliherya woona wiira Yehova ohaavaha atthu okathi wiira apake marukunuxo ni othanla omurumeela. Nto okathi owo wamala, khivanrowa oweryaneya opaka marukunuxo wiira mutthu oopowe. — Luka 13:​24, 25.

14. Xeeni vari aya vooloka oweha iprofesia siniiraneya?

¹⁴ Khula nihiku ninvira, sinniiraneya iprofesia sinooniherya wiira olumwenku ola ohanle omala. Hata itthu sikina Biibiliya aahimmye awe sihiiraneyaka muttetthe munikhala anyu, osuwela wiira sinniiraneya mittetthe sikina, ohaana owiirihani opaka marukunuxo wiira mpatisiwe. Nkahaya muupuwele etthu murummwa Pedru aatumerenrye awe makristau. Owo aahaaleela wiira “mukhaleke oolikana ene” aahiiso oowehaweha, mwaha woowi, “omala wa itthu sootheene ori vakhiviru.” (1 Ped. 4:7; enoota) Eversiikulu ela, vanikhala ntoko wiira nuulumo noowi “omala”, onihimya okathi Yerusalemu ni etemplo yaarowa aya opwetexiwa. Makristau Pedru aalepenle awe, yaakhala ottaiwene ni oYerusalemu. Nto opwetexiwa wa epooma ele, khiwaarowa owaafetari. (1 Ped. 1:1) Masi okathi yaarowa aya owehaka eprofesia ele yiiraneyaka, eyo yaamwaakhaliherya okupali wiira itthu sootheene Yehova oleihenrye awe ampaka. Mwa enamuna emosa-ru, ti vooloka oweha iprofesia siniiraneya. Nto okathi munrowa anyu owehaka wiira waanikisa ohanle ophiya, eyo enoowiirihani opaka sootheene muniwerya anyu wiira mpatisiwe.

15. Nnooniherya sai wiira nihiilokiherya para nihiku na Yehova? (2 Pedru 3:​10-13)

¹⁵ Epaphelo awe ya nenli, Pedru aahitthokiherya moota makristau yaarowa aya wiilokiherya para “nihiku na Yehova”. Okathi aalepenle awe epaphelo eyo, siira sihalaka iyaakha sinceene wiira niphiye nihiku na Yehova. Hata vari siiso, owo aahaatumererya ohiliyala aahiiso ophavelaka vanceene nihiku nlo. (Mmusome 2 Pedru 3:​10-13.) Nave hiyo, khaninrowa oliyala nihiku nlo vakhala wiira ninniphavela vanceene wiira naaphiyale. Hiyo ninnooniherya wiira nihiilokiherya, vaavo ninkhalana ahu mweettelo wooloka ni ovara miteko sinooniherya wiira ninnimuroromela Muluku. Okathi nimpaka ahu itthu sinimusivela Yehova, owo onnihakalala vanceene. Nave onoohakalala vanceene okathi onrowa awe woowehani mwiivahereryaka ni opatisiwa.

MAREELIHO XEENI MUNROWA ANYU OPHWANYA MWAPATISIWA NIINAANO-VA?

16. Okathi xeeni wooreerela wiira mutthu opatisiwe? (2 Akorinto 6:​1, 2) (Nwehe ifootu.)

¹⁶ Ola okathi wooreerela wiira mpatisiwe. (Mmusome 2 Akorinto 6:​1, 2.) Mukhulupale a ekuvernu ya wEthiyopia, yoowo Filipe amphwanyale awe, aahisuwela wiira aahaana ohipiserya opatisiwa. Nuumala wiixutta ihapari sooreera ni oweha opuro aakhanle awe oopatisiwa, owo khuupuwenle so: Kihaana wiixutta-tho itthu sikina. Ohoolo kinoophwanya-tho maasi makina wiira kipatisiwe. Ohiya-vo, owo aahimukoha Filipe wiira: “Kiireke yookhala etthu enikikhoottiherya opatisiwa?” (Mit. 8:​26, 27, 35-39) Tthiri nla ntakiheryo nooreera! Nuumala mukhulupale ole a ekuvernu ya wEthiyopia opatisiwa, “aahitthikela mukwaha awe otteeliwe ene murima.”

17. Etthu xeeni ninreerela ahu okupali?

¹⁷ Akhala wiira munnovelela opatisiwa, mukupaliki wiira Yehova onimookhaliheryani wiira mukhale mpatthani awe. (Arom. 2:4) Nave owo onimookhaliheryani oxintta woova, oxanka ni onimookhaliheryani akhala wiira atthu akina khanootumereryani opatisiwa. Akhala wiira munoopatisiwa, munoohakalala vanceene. Nave munimoona wiira “itthu sihanle ottuli” khasirina efaita. (Afil. 3:​8, 13) Nto munrowa wiimananihaka ophwanya “itthu siri ohoolo”, eyo piiyo, wiiraneya wa itthu sootheene Yehova aaleihenrye awe atthu ale yiivaherenrye ni opatisiwa. — Mit. 3:19.