Musuweleke etthu yootepexa okhalana efaita

1-2. Nvahe ntakiheryo nnooniherya wiira etthu ya faita pooti okhala yooxeleliha.

NKAHAYA muupuwele wiira muneettiha ekaaro aahiiso moota, nto telefoni anyu onapacerya oxamari. Pooti wiira examaata eyo yookhalana efaita. Niireke mwaarowa omwaatenteri telefoni owo ni ohiya evolanti? Muhiliyale wiira muri mustaraatani, mwaahisuwele, pooti wiikumiherya aahiiso waakumiherya mixankiho atthu akina. Mwaarowa opaka exeeni okathi owo? Olumwenku ola, sookhala itthu sinceene sikhanle oonixeleliha. Nto nihaana othanla etthu yootepexa okhalana efaita.

² Khula mmosa a hiyo, onnikhalana itthu sa faita onireerela awe opaka. Masi noosuwela wiira etthu yootepexa okhalana efaita, ohela nipuro noopacerya miteko sa Muluku.a (Math. 6:33) Arumeyi a Muluku, anilikana ni mutthu oneettiha ekaaro aahiiso moota, yoowo ohineemererya wiira itthu sikina simuxelelihe. Mwa enamuna emosa-ru, arumeyi a Yehova khaneemererya wiira itthu sikina saaxelelihe ovara miteko sa Muluku. — Mir. 4:25; Math. 6:22.

3. a) Ipontu xeeni ninrowa ahu othokorerya mwaha ola? b) Ipontu iya sinrowa onikhaliherya sai?

³ Khuuvo oniphavela ohiya ohela nipuro noopacerya miteko sa Muluku! Masi ekeekhai ti yoowi sookhala itthu sinceene sikhanle oonixeleliha. (Luka 21:​34-36) Mwaha ola, nnoothokorerya ipontu tthaaru. Ipontu sene tiiya: 1) Itthu sikhanle oonixeleliha, 2) moota Yesu aaxinttale awe itthu saakhanle oomuxeleliha ni 3) moota nikhanle ahu oosyaka itthu sooxeleliha. Ipontu iya, sinoonikhaliherya ohihiya ohela nipuro noopacerya miteko sa Muluku.

ITTHU SIKHANLE OONIXELELIHA

4-6. Itthu xeeni sikhanle oonixeleliha ovara miteko sa Muluku?

⁴ Ootheene ahu, nookhalana itthu sinceene sinnixankiha. Mwa ntakiheryo pooti wiira ninniwereyasiwa, nookhalana mixankiho mweemusini aahiiso sikina. Mixankiho ntoko iyo, wiira simale wala sivukuwe, nihaana orumeela okathi ahu. Masi naahivahe ephoole, itthu iyo pooti onixeleliha. Moota xeeni? Okhala wiira iyo pooti waafetari muupuwelo ahu, okathi ni ikuru sahu, nto nnahiya ovara miteko sa Yehova.

⁵ Nave anceene a hiyo sinniniphwanya mixankiho ntoko, owanawana wa anapoliitika, othoiwa musurukhu, iretta soowaakuva wuulaana ni mixankiho sikina sinikhumela olumwenku ola wa Satana. (2 Tim. 3:1) Nto okathi sinniphwanya aya mixankiho iyo, hiyo ninnixanka nihinawerya wuupuwela itthu sikina.

⁶ Woonasa wene, munnimusuwela mutthu samphwannye mixankiho saaturunke okumi awe mootutuxerya. Okathi eyo eniiraneya aya, mutthu onnixanka vanceene ni okhulumuwa, okhala wiira Yehova khaapattunxe apinaatamu wiira ahaaweke. Atthu akina, anuupuwela wiira khaniwerya okhalana okumi wooloka, mwaha woowi, itthu khasiniweettela saana ntoko yaaphavela aya. Nto eyo, enniwiiriha oviriha okathi munceene apakaka itthu anoona aya wiira sinimwaakhaliherya oliyala mixankiho saya. Etthu xeeni nikhanle ahu oopaka saniphwanya mixankiho iyo? Yesu saahimphwanya mixankiho siiso. Etthu xeeni aapanke awe wiira ohihiye ovara miteko sa Muluku? Ittima sinittharelana nnooweha.

MOOTA YESU AAXINTTALE AWE ITTHU SAAKHANLE OOMUXELELIHA

7. Itthu xeeni saakhanle oomuxeleliha Yesu ovara miteko sa Muluku?

⁷ Saahikhala itthu sinceene saakhanle oomuxeleliha Yesu ovara miteko sa Muluku. Itthu iyo, saahela muhina myaha sa ipoliitika ni itthu sikina saakhumelela mmuttettheni. Mwa ntakiheryo, okathi wa Yesu, atthu anceene yaari oohaawa ni yaaniwereyasiwa. (Math. 14:14; Mar. 14:7) Nave aroma ni ayuda, yaanaathokorerya moohixariya atthu akina. Nuumala atthu ale osuwela wiira Yesu aahikhalana owerya wa opaka miiriirya, yaaniphavela omukhaliha mwene aya. (Yoh. 6:​14, 15) Nave-tho, Satana aahimweehererya Yesu, ophavelaka onvaha omwene wootheene wa mulaponi. Yesu, anwerya wuupuwela wiira okhala mwene a olumwenku wootheene, etthu yooloka. Masi owo, kheemerenrye wiira muupuwelo ole woohiloka, omuxelelihe. (Math. 4:​8, 9) Nave, murummwa Pedru yoowo aari mpatthani awe Yesu, aahimutumererya opaka etthu yaakhala ntoko ti yooloka. Pedru aahimyale so: “Pwiya, mwiireerele murima.” — Math. 16:​21, 22.

8. Etthu xeeni Yesu aapaka awe wiira itthu sikina sihimuxelelihe ovara miteko sa Muluku?

⁸ Etthu xeeni Yesu aapaka awe wiira itthu iye sootheene sihimuxelelihe? Sookhala itthu tthaaru saamukhaliherya Yesu. Etthu yoopacerya, owo aanitakiha moota Yehova onuupuwela awe. (Yoh. 8:28; 14:9) Yanenli, owo aanikhalela nthiti ovara miteko sa Muluku. (Math. 9:35) Ya neeraru, owo aanisuwela etthu yootepexa okhalana efaita. (Yoh. 4:34) Tivonto, Yesu aahikhootta moomalela, sooweeha sa Satana. Nave owo aanisuwela wiira etthu Pedru aahimmye awe, yaakhala ntoko ti yooloka. Masi khiyaavarihana ni ele Yehova aaphavela awe. (Math. 4:10; 16:23) Yesu kheemerenrye wiira miyuupuwelo, moolumo ni miteko sa atthu akina, simuxelelihe ovara miteko sa Yehova. Ekeekhai wiira itthu saakhumelela okathi wa Yesu, ti soovirikana ni iye sinikhumelela mahiku ahu ala. Masi ntakiheryo nawe, nnoonikhaliherya osyaka itthu sikhanle oonixeleliha ovara miteko sa Muluku.

MOOTA NIKHANLE AHU OOSYAKA ITTHU SOOXELELIHA

9. Ninrowa osuwela sai “ele Yehova oniphavela awe”? (Aefeso 5:17)

⁹ Mutakiheke moota Yehova onuupuwela awe. Eyo enimookhaliheryani “osuwela ele Yehova oniphavela awe” ni opaka yeeyo. (Mmusome Aefeso 5:17.) Nnoowerya osuwela muupuwelo wa Yehova, nimusomaka Biibiliya ni wuupuwelela ele ninsoma ahu. Nto okathi sinniphwanya aya mixankiho Biibiliya ohinihimya awe mooluluwanya etthu yoopaka, nnooweryaka omuhakalaliha Yehova. Moota xeeni? Nisuwelaka moota Yehova onuupuwela awe ni wiimananiha omutakiha.

10. Ninrowa owerya sai osuwela muupuwelo wa Yehova?

¹⁰ Nnoowerya osuwela muupuwelo wa Yehova, nimusomaka Biibiliya ni osuwela moota ophenta wa Yehova onaakhaliherya aya apinaatamu. (Yer. 45:5) Okathi ninsoma ahu soowiiraneya sa mbiibiliyani, nihaana wiikoha so: Yoowiiraneya ela, enikiixuttiha exeeni voohimya sa Yehova? Kinrowa olokiherya sai muupuwelo aka wiira kiweheke itthu ntoko Yehova onoonela awe? Noosuwela wiira Yehova ookhalana ankhili, onivikana hiyo. (Yes. 55:9) Nto, nihaana onvekela wiira oniixuttihe opaka itthu ntoko oniphavela awe. (Esal. 143:10) Okathi nninvekela ahu, nikupaliki wiira onoonikhaliherya osuwela moota onuupuwela awe. — 1 Yoh. 5:14.

11. Etthu xeeni Yehova oniphavela awe ni ohiniphavela awe?

¹¹ Vaavo nniixutta ahu moota Yehova onuupuwela awe, eyo enninikhaliherya osuwela wiira khoniphavela wiira itthu sikina sinixeleliheke. Masi oniphavela wiira nikhaleke oolikana ene wiira noopowe okathi olumwenku ola onrowa aya opwetexiwa. (Math. 24:44) Yehova, khonisiveliwa aaniwehaka nixankiheyaka. (Math. 6:​31, 32) Masi akhala wiira ninnixankiheya ni okumi ahu, muteko, opuro wookhala aahiiso itthu sikina, nikupaliki wiira Yehova, onoonikhaliherya. Akhala wiira nnoonvekela Yehova, owo onoonivaha ankhili ni ikuru wiira nivileleke mixankiho sahu. — Esal. 55:22; Mir. 3:​5-7.

12. Etthu xeeni enrowa onikhaliherya ohihiya okhala oohakalala hata sikhumelelaka itthu soohiloka? (Matheyo 5:3)

¹² Mukhaleleke nthiti ovara miteko sa Muluku. Ootheene ahu, ninnixankiheya ni itthu sootakhala siniiraneya moolumwenkuni, seiyo nihinwerya ahu omala-maliha. Nto ohiya oxeleliwaka ni itthu nihinwerya ahu omaliha, nihaana okhalelaka nthiti, ovara miteko sa Yehova. Vaavo nniimananiha ahu ovara miteko sa Yehova, ninnihakalala, okhala wiira Yehova oniphavela yeeyo. (Mmusome Matheyo 5:3.) Etthu enrowa onikhaliherya okhalela nthiti miteko sa Yehova, ori omusoma Biibiliya ni opaka ele eniwerya ahu moovarihana ni makhalelo ahu. Akhala wiira nnoopaka eyo, nnoorumeela saana okathi ahu ni nnoomuhakalaliha Yehova. — Mir. 23:15.

13. Ninrowa orumeela sai oratteene okathi ahu?

¹³ Okhala wiira na arumeyi a Muluku, ninnitumereriwa orumeela saana okathi ahu. (Aef. 5:​15, 16; nwehe enoota “murumeeleke oratteene okathi anyu.”) Eversiikulu 16, kheniphavela ohimya paahi iwoora 24 sa khula nihiku. Masi ennitumererya okhala oowehaweha ni orumeela saana okathi onihala, olumwenku ola ohinatthi opwetexiwa. Ninrowa orumeela sai oratteene okathi ahu? Akhala wiira nnooviriha okathi munceene naawehaka anotiisia oohiloka, eyo pooti oniiriha okhulumuwa ni ohirumeela saana okathi ahu. Nave pooti oniiriha ohikhalela nthiti miteko sa Muluku. Nto wiira nirumeele saana okathi ahu, nihaana othanlelaka soohimmwa ninsoma ahu, ninweha ahu ni ninwiriyana ahu, pooti okhala mwinterneetini! Akhala wiira nnoopaka eyo, nnookhalana okathi ni ikuru sinceene wiira nivare miteko sa Muluku. Nave nnoowehaka inamuna nikhanle ahu oowuncererya muteko ahu woolaleerya, nihihiyaka waaxukurya atthu naalalenrye ahu. Ninnisuwela wiira, ti vootepexa oloka orumeela saana okathi ahu wiira “atthu a makhalelo ootheene yoopowe ni akhalane osuwela weekeekhai.” — 1 Tim. 2:4.

14. Okhalela nthiti ovara miteko sa Muluku onnikhaliherya sai? (Nwehe efootu.)

¹⁴ Vaavo ninkhalela ahu nthiti ovara miteko sa Muluku, eyo enninikhaliherya ohiliyala nthowa naya sinikhumelela aya itthu soohiloka. Hata siniphwanyaka mixankiho sinikhumelela mwaha wa ohiiwanana wa anapoliitika, othoiwa musurukhu ni iretta soowaakuva wuulaana, itthu iyo khasinrowa oniiriha okhulumuwa. Mixankiho iyo, sinninikhaliherya okupali wiira iprofesia sa mbiibiliyani khula okathi sinniiraneya. Nihiliyale wiira Yehova onoomaliha mixankiho iyo ni onooruuha eparayiisu. Nilipelelaka ophiya okathi owo, nihaana omuroromela Yehova wiira onoonikhaliherya ovilela ni ohihiya okhala oomaaleleya. — Esal. 16:8; 112:​1, 6-8.

15. a) Onitaphulela exeeni okhalana “muupuwelo wooloka”? (1 Pedru 4:7) b) Xeeni vari aya vooloka okhalana muupuwelo owo?

¹⁵ Muhiliyaleke itthu sootepexa okhalana efaita. Atthu anceene olelo-va, anniviriha okathi munceene atthekulaka ni apakaka itthu sinaahakalaliha. Awo anniliyala wiira olumwenku ola ohanle vakhaani opwetexiwa. Nnaamwi otthekula ehikhanle etthu yootthekeya, nihaana osyaka wuupuwela ntoko atthu a olumwenku. Nto nihaana wiimananiha okhalana “muupuwelo wooloka”. (Mmusome 1 Pedru 4:7.) Onitaphulela exeeni okhalana “muupuwelo wooloka”? Moolumo ala, anitaphulela wuupuwela saana nihinatthi opaka soothanla, nto eyo, enoonikhaliherya okhalana muupuwelo wooloka voohimya sa otthekula. Akhala wiira nnookhalana “muupuwelo wooloka”, nnoowerya otakiha moota Yehova onuupuwela awe nave nnoosuwelaka itthu sootepexa okhalana efaita. — 2 Tim. 1:7.

16. Etthu xeeni Yesu ahaahiyale awe opaka okathi aari awe valaponi?

¹⁶ Yesu, aanisuwela itthu sootepexa okhalana efaita. Mpakha ophiya mahiku awe ookiserya valaponi, Yesu khaahiyale okhala oororomeleya ni opaka itthu saamusivela Tiithi awe. Wiira owerye opaka eyo, owo aanivekela voohihiyererya. Masi awiixutti awe, yaahihiya okhala oowehaweha. Awo “yaahikhulumuwa mwaha wa oriipiwa murima”, nto yaahipacerya orupa. — Luka 22:​39-46; Yoh. 19:30.

17. Exeeni eniwiiriha atthu akina waarumeela aredes sociais? (Nwehe efootu.)

¹⁷ Ntoko yiiraneyale aya ni awiixutti ale, hiyo nave, ikwaha sikina pooti oriipiwaka murima ni okhulumuwa. Nave itthu siniiraneya mahiku ala ookiserya, pooti oniiriha oxanka vanceene. Aphavelaka osyaka mixankiho iyo, atthu akina, anniviriha okathi munceene yaarumeelaka aredes sociais. Mwa ntakiheryo, awo annarumeela wiira avaaneleke ni amusi ni apatthani aya anikhala ilapo sikina ni winviyarelana ifootu. Nave annarumeela para oweha iviitiyu ni oweetta axooku. Nave akina, annarumeela okathi munceene awehaka itthu sikumiheriwe niinaano. Wiira nihimorele muraakho owo, niikoheke so: Nuumala waarumeela aredes sociais, kiireke kinnikhala saana? Kiireke khanikiiyerya okathi kaarowa aka ovara itthu sikina sa faita?

18. Xeeni ninreerela ahu okhalana muupuwelo wooloka okathi nimmurumeela ahu interneti?

¹⁸ Khahiyo vootthekeya oweetta axooku ni oweha iviitiyu. Okhala wiira anninikhaliherya otthekula ni okhala oomaaleleya. Moohicikha akhala wiira nimmurumeela interneti aahiiso TV, nihaana okhalana ephoole ni othanla mwa miruku eviitiyu ni xooku nimphavela ahu omweetta. Nto okhalana muupuwelo wooloka, onoonikhaliherya othanlela itiipo sa iviitiyu ni axooku nikhanle ahu ooweetta. Nave onoonikhaliherya osuwela okathi nikhanle ahu ooviriha niwehaka itthu iyo. Isaiti sikina, vaavo enimala aya eviitiyu emosa, ennikela ekina. Nto akhala wiira nnooviriha okathi munceene niri ene isaiti iyo, pooti oniiriha oweha itthu soohiloka. Eyo yaahimwiiraneela munna mmosa onikhala wÁsia. Wanipacerya, munna owo aanithanlela iviitiyu aaweha awe. Nuumala-vo, saanikhumela ni aaniweha iviitiyu sikina soohiloka. Ohivinre okathi munceene, owo aahipacerya oweha epornokarafiya. Moohakalaliha, okhaliheriwaka ni axitokweene ni apatthani awe, aahihiya oweha itthu iye soohiloka ni aahipacerya orumeela saana okathi awe. Etthu yaamwiiranenle munna ole, enniniixuttiha wiira nihaana okhalana muupuwelo wooloka ni othanlela mwa miruku matthekulelo ahu.

19. Exeeni enrowa wiiraneya akhala wiira nnoohela nipuro noopacerya otthekula aahiiso oviyaxari?

¹⁹ Nave-tho, nihaana okhalana muupuwelo wooloka vaavo nnuupuwela ahu oviyaxari aahiiso okathi nimpaka ahu itthu sinnisivela. Otthekula aahiiso ophumurya mwaha wa miteko ninvara ahu khula nihiku, onninikhaliherya okhalana okumi wooloka. Masi akhala wiira nnoohela nipuro noopacerya itthu iyo, pooti oniiriha ohikhalana okathi wiira nivare itthu sootepexa okhalana efaita. (Afil. 1:10) Khula mmosa a hiyo, ohaana othanla moota woorumeela okathi awe. Masi okathi munipaka anyu eyo, mwiikoheke so: Kiireke okathi kiniviriha aka kitthekulaka aahiiso kiviyaxariki, kinnooniherya wiira kookhalana muupuwelo wooloka? Kinnooniherya wiira kinnihela nipuro noopacerya itthu sootepexa okhalana efaita? Kinnooniherya wiira kihiilokiherya ohinatthi “omala wa itthu sootheene”?

20. Mareeliho xeeni anikhumelela mwaha wa oheemererya itthu sikina onixeleliha?

²⁰ Nihaana okhalana ephoole ni itthu sikhanle oonixeleliha ovara miteko sa Yehova. (Yes. 48:17) Nikhaliheriwaka ni Yehova, nnoowerya ovilela mixankiho sahu. Nave itthu soohiloka siniiraneya moolumwenkuni, khasinrowa onikhulumula. Nave-tho, nnoosyaka ohela nipuro noopacerya itthu sinnisivela aahiiso otthekula. Nto nihihiye ophavela osuwela muupuwelo wa Yehova, okhalela nthiti miteko sa Muluku ni osuwela etthu yootepexa okhalana efaita. Napaka eyo, nnoomuhela Yehova nipuro noopacerya mookumini mwahu ni nnimooniherya wiira noovarexexa “okumi weekeekhai.” — 1 Tim. 6:19.