Mwakhala mutthu a ankhili, itthu sinooweettelani saana

1-2. a) Ankhili exeeni? b) Ankhili annikhaliherya sai?

NIIREKE mootoko othokoreriwa moohiloka aahiiso oveehiwa ni mutthu mukina? Niireke mootoko woova mwaha wa etthu yaawiiranenleni? Akhala wiira itthu iyo sootoko owiiraneelani, moohaanyiherya, munnisuwela moota vanixankiha aya opaka etthu yooloka okathi owo. Masi ti voohakalaliha osuwela wiira Biibiliya onnihimya mukhalelo okhanle oonikhaliherya, okathi ninkhalana ahu mixankiho. Mukhalelo ene tuula: Ankhili.

² Ankhili, mukhalelo onnikhaliherya ovarerya saana muxankiho okhumelenle aahiiso osuwela itthu siirihale okhumelela muxankiho owo. Nave anninikhaliherya osuwela etthu emwiirihale mutthu oniveeha aahiiso onithokorerya moohiloka. Nave-tho, ankhili anninikhaliherya, opaka soothanla mwa miruku. Mwa ntakiheryo, anninikhaliherya okasoopa nlumi nahu ni osuwela okathi woomaala. (Mir. 10:19; Esal. 4:4) Okathi mutthu onnitthekela awe, ankhili anoonikhaliherya okhala oomaala ni omulevelela mutthu owo. Nave anninikhaliherya weemererya okathi ninvahiwa ahu miruku ni okathi ninttaruxiwa ahu. (Mir. 19:20) Ankhili, anninikhaliherya opaka itthu sinimuhakalaliha Yehova. Nave-tho, anninikhaliherya hiyo ni atthu ale naatthekenle ahu mwaha wa moolumo ahu aahiiso miteko sahu. Nave mukhalelo ola ti wa efaita, okathi sinniphwanya aya mixankiho sikhanle ooniiriha opaka etthu nihuupuwenle saana. Mwaha ola, ninrowa othokorerya matakiheryo 3 a mbiibiliyani, yaawo anooniherya wiira ankhili, anoonikhaliherya okhala oowiiyeviha, oomaala ni omuroromela Yehova.

MUKHALEKE OOWIIYEVIHA

3. Ti pani aari Naamani?

³ Wiira itthu sineettele saana, nihaana okhala oowiiyeviha. (1 Ped. 5:5) Ankhili anninikhaliherya okhala oowiiyeviha. Moota xeeni? Nrowe nithokorerye ntakiheryo na Naamani. Owo aakhala oSiiria epooma yaattamenle wIsarayeli. Naamani aari mutthu oottittimihiwa ni muhooleli a anakhotto a wAsiiria. Masi owo aanihaawa mwaha wa eretta ya makokho aarina awe. — 2 Mam. 5:1.

4. Naamani oonihenrye sai wiira aari oowiiyeviha?

⁴ Mwaarawe Naamani aahikhalana murumeyi awe yoowo aari mwaaruusi a wIsarayeli. Mwaaruusi owo aahimuleela mwaarawe Naamani wiira aahikhala profeta wIsarayeli aakhanle ompenuxa Naamani. (2 Mam. 5:​2, 3) Vaamukhweya Naamani wuupuwela so: Mwaaruusi ola ti pani okhanle ookileela etthu yoopaka? Masi Naamani khuupuwenle siiso. Moowiiyeviha, Naamani aahipaka etthu mwaaruusi ole aahimmye awe. Owo aahinvekela mwene a wAsiiria wiira omweemererye orowa wIsarayeli wiira apenuxiwe eretta awe. — 2 Mam. 5:​4, 5.

5. Exeeni yiiraneyale nuumala Naamani ophiya wIsarayeli?

⁵ Naamani aahirowa wa mwene Yorami a wIsarayeli, wiira apenuxiwe makokho awe. Nuumala Naamani ophiya, Yorami uupuwela wiira mwene a wAsiiria aaphavela omutuphela. Nto okathi profeta Eliseyo aasuwenle awe, aahinvekela Yorami wiira amuleele Naamani wiira akumane ni yena. (2 Mam. 5:​6-9) Masi itthu khiseettale ntoko Naamani aalipelela awe. Okhala wiira Eliseyo khaakhumale wiira akumane aahiiso alavule ni Naamani. Eliseyo anvekenle namitthaka awe wiira amuleele Naamani etthu aakhanle awe oopaka wiira openuwe. — 2 Mam. 5:10.

6. a) Exeeni yaamwiirihale Naamani ophavela otthikela owaani ohinatthi openuxiwa? b) Arumeyi a Naamani yoonihenrye sai wiira yaahikhalana ankhili? (2 Mamwene 5:​13, 14) c) Nuumala wiiwelela malakiheryo aavahiwe awe, exeeni yiiraneyale?

⁶ Wanipacerya, Naamani khaasiveliwe ni malakiheryo aavahiwe awe ni murumeyi a Eliseyo. Naamani “aahitikinihiwa” ni “aahirukunuwa onarowa onanariwe ene.” (2 Mam. 5:​11, 12) Mwaha wa xeeni? Woonasa wene, uupuwela wiira khaathokoreriwe mwa nttittimiho ntoko aareerela awe othokoreriwa mukhulupale a anakhotto. Waanyiheryasa, Naamani uupuwela wiira malakiheryo aavahiwe awe, yooniherya wiira Eliseyo khaattittimiha asiiria. Nnaamwi nihisuwelaka saana etthu uupuwela awe, owo aaniphavela otthikela owaani ahipenuxiwe. Masi arumeyi awe, yaahooniherya okhala a ankhili ni yaahinvekela wiira uupuwele saana ohinatthi otthika. Nto moowiiyeviha, Naamani aahiiwelela malakiheryo aavahiwe awe ni Eliseyo. Nuumala-vo, aahipenuxiwa! — Mmusome 2 Mamwene 5:​13, 14.

7. Ntakiheryo na Naamani ninniixuttiha exeeni? (Miruku 22:4) (Nwehe eteseenyu.)

⁷ Etthu nniixutta ahu. Ninnooniherya wiira nookhalana ankhili vaavo nnuupuwelela ahu etthu yiirihale wiiraneya etthu eyo aahiiso ovahiwa malakiheryo awo. Nave ninnooniherya wiira nookhalana ankhili, akhala wiira khanimpaka soothanla moovarihana ni itthu nnuupuwela ahu paahi. Ankhili, anninikhaliherya okhala oowiiyeviha ni weemererya wiira khaninsuwela itthu sootheene. Woonasa wene, hiyo pooti opirisariki okhaliheriwa ni atthu akina, otepexa wene ni Yehova. Naamani khahiyo aari murumeyi a Yehova. Masi aahooniherya wiira aahikhalana ankhili, maana moowiiyeviha aahaawiriyana atthu akina. Owo aahinwiriyana mwaaruusi a wIsarayeli, yoowo aari murumeyi a mwaarawe ni aahaawiriyana arumeyi awe nave aahinwiriyana Eliseyo yoowo aari profeta a Yehova. Okhala wiira aahihiya wiixinnuwiha, Naamani aahipaka yoothanla yooloka ni aahipenuxiwa. Nto nniixutta wiira, nihaana wuupuwela saana nihinatthi opaka aahiiso olavula etthu. Mwa ntakiheryo, nkuupuwelani wiira mutthu mukina onimoovahani malakiheryo muhineemererya anyu! Akhala wiira eyo enimwiiraneya, muhaana wuupuwela saana muhinatthi opaka yoothanla. Nyuwo pooti wiikoha so: Etthu kinrowa aka opaka aahiiso olavula, kiireke kinimooniherya wiiyeviha? — Musome Miruku 22:4.

MUKHALEKE OOMAALA NI MUHAAKHULEKE NI OWALI

8. Okathi xeeni vanixankiha aya okhala oomaala?

⁸ Ankhili, anoonikhaliherya okhala oomaala ni ohaakhula ni owali, okathi atthu akina annitthekela aya. Ikwaha sikina khivanikhweya opaka eyo, otepexa wene, okathi mutthu mukina ohinnireerela awe murima aahiiso onnithokorerya awe moohixariya. (Aef. 4:26) Nrowe nthokorerye moota Davidi ni Abigayili yoonihenrye aya okhala atthu yaarina ankhili okathi wooxankiha.

9. Davidi aathokoreriwe sai ni Nabali?

⁹ Nkuupuwelani ela: Davidi ni arumeyi awe yaari oParani, weiwo yaatthyawenle aya. (1 Sam. 25:1) Ari ene weiwo, awo yaanaakhapelela amakampusi ni ipwittipwitthi sa mulopwana oothaaciri aitthaniwa Nabali. (1 Sam. 25:​15, 16) Nuumala ophiya okathi woomettha ipwittipwitthi, mooreerela murima ni mwa nttittimiho, Davidi aahaaruma alopwana akina wiira arowe owannyawe Nabali wiira yanvekele yoolya. (1 Sam. 25:​6-8) Masi Nabali khaaxukhurenle nnakhala vakhaani etthu Davidi ni alopwana ale yaapanke aya. Nto Nabali aahimwaakhula moowali ni aahinveeha Davidi ni alopwana ale aarina awe. — 1 Sam. 25:​10, 11.

10. Davidi ni Abigayili, yoonihenrye sai okhala atthu a ankhili? (1 Samuweli 25:​32, 33) (Nwehe eteseenyu.)

¹⁰ Vaakhanle wiira mwa Davidi, mwaarowa woonela sai? Tthiri etthu ele yiiraneyale, yaahimunanara vanceene Davidi. Hata aari mutthu oomoriwa ikharari, etthu ele yaahimwiiriha ophavela omwiiva Nabali! (1 Sam. 25:​13, 21, 22) Davidi aahikhuma wiira amwiive Nabali. Masi mwaarawe Nabali yoowo iitthaniwa Abigayili, aahikhuma wiira alavule ni Davidi. Abigayili oonihenrye sai wiira aahikhalana ankhili? Owo aanisuwela wiira Davidi aari mulopwana ooreera murima nnaamwi aaphavela opaka etthu ele yoohiloka. Nto Abigayili aahipaka etthu wiira omukhaliherye Davidi wiira ohimwiive Nabali. Owo aahikuxa itthu sikina wiira anvahe Davidi ni moowiiyeviha aahinvaha miruku sooloka. (1 Sam. 25:​18, 23-31) Nto Davidi aahooniherya okhala mutthu a ankhili, maana aahiwiriyana ni ephoole etthu Abigayili aahimyale awe. Nave aanikupali wiira moolumo a Abigayili yaakhuma wa Yehova. Eyo yaahimwiiriha Davidi okhala oomaaleleya ni aahisyaka opaka etampi yuulupale. — Mmusome 1 Samuweli 25:​32, 33.

11. Ankhili anrowa wookhaliheryani sai okathi muniireliwa anyu etthu yoohiloka? (Miruku 19:11)

¹¹ Etthu nniixutta ahu. Ankhili anoonikhaliherya okhala oomaaleleya, hata nikhalanaka mathowa akhanle ooniiriha olavula ni owali. Nave anoonikhaliherya wuupuwela mixankiho sikhanle ookhumelela mwaha wa moolumo aahiiso miteko sahu. (Musome Miruku 19:11.) Abigayili aahimukhaliherya Davidi wuupuwelela moota Yehova aarowa awe woonela apaka etthu ele yoohiloka. Eyo yaahimukhaliherya Davidi okhala oomaaleleya. Nto akhala wiira muhiireliwa etthu yoohiloka, muhaana wuupuwela saana muhinatthi opaka yoothanla. (Yak. 1:19) Munvekeleke Yehova ni mwiivaheke okathi wiira musuwele moonelo awe voohimya sa mwaha owo. Mwapaka eyo, pooti wookhaliheryani okhala oomaaleleya.

12. Atthu akina anrowa onikhaliherya sai okhalana ankhili ni okhala oomaaleleya?

¹² Okhala wiira Yehova aahimurumeela Abigayili wiira omukhaliherye Davidi, nave-tho, Yehova pooti waarumeela atthu akina wiira anikhaliherye osuwela mixankiho sikhanle ookhumelela ni soothanla sahu. Akhala wiira mutthu mukina ohoonyoonyihani, nvaanele ni munna aahiiso murokora orina waamini woolipa, wiira ookhaliheryeni ovarerya saana mwaha owo. (Mir. 12:15; 20:18) Ankhi mwasuwela wiira mutthu mukina ootthekeliwa, munrowa omutakiha sai Abigayili? Munoomutakiha, mmukhaliheryaka osuwela moota Yehova onoonela awe mwaha owo. Yehova onooreeliha wiimananiha wanyu ophavela waakhaliherya atthu akina okhalana ankhili ni okhala oomaaleleya.

MMUROROMELEKE YEHOVA OKATHI MUNOOVA ANYU

13. Ankhili anrowa onikhaliherya sai okathi nnoova ahu?

¹³ Ikwaha sikina, sinniniphwanya mixankiho seiyo sinniiriha woova. Masi ankhili anninikhaliherya wuupuwela wiira Yehova toowerya ovikana itthu sootheene. Nto wuupuwela owerya wa Yehova, onoonikhaliherya omuroromela hata noovaka. Muhiliyale wiira Yehova ookhalana owerya ovikana itthu sootheene sikhanle ooniiriha woova. (Esal. 27:1) Yehova pooti onikhaliherya hata ni mixankiho seiye ikwaha sikina nnoona ahu wiira khaninwerya oxintta. Eyo yaahimwiiraneela profeta Yoona. Owo aanimphenta vanceene Yehova. Masi nuumala ovahiwa yoothanleliwa yooxankiha, aahipacerya woova.

14. Exeeni yaamwiiriha Yoona woova yoothanleliwa aavahiwe awe ni Yehova?

¹⁴ Yehova, aahinvaha Yoona yoothanleliwa yooxankiha. Owo aahaana orowa oNiinive wiira alaleye muhupi wa ophukela. (Yoona 1:​1, 2) Vaakhanle wiira Yehova oorummeni nyuwo, mwaarowa woonela sai? Yoona anviriha mweeri mmosa eettaka, maana okhuma wIsarayeli orowaka oNiinive, waari mukwaha woorakama. Atthu a oNiinive yaari ootakhala. Nave oNiinive, yaasuweliwa okhala “epooma ya ale aniwiiva atthu.” (Nah. 3:​1, 7) Mwaha wa woova, Yoona kheemerenrye yoothanleliwa awe ni aahitthyawa. — Yoona 1:3.

15. Etthu xeeni yaamwiirihale Yoona omuroromela Yehova? (Yoona 2:​6-9)

¹⁵ Okathi Yoona aatthyawa awe, Yehova aahimooniherya owerya wawe. Owo aahipaka eyo omoopolaka Yoona mwa mwiiriirya. (Yoona 1:​15, 17) Yoona aahiixutta etthu. Owo aahipacerya wuupuwela wiira khaareerela woova orowa oNiinive, okhala wiira Yehova ammukhaliherya. (Mmusome Yoona 2:​6-9.) Okathi Yehova aatthikenle awe omuruma Yoona, owo khoovale ni aaheemererya. Nto owo aahirowa oNiinive ni atthu a weiwo yaahinwiriyana ni yaahoopoliwa. — Yoona 3:5.

16. Etthu xeeni enrowa onikhaliherya okathi nnoova ahu? (Miruku 29:25) (Nwehe ifootu.)

¹⁶ Etthu nniixutta ahu. Niheemererye etthu ekina nnakhala owoova atthu, oniirihaka ohiya omukokhorela Yehova. (Musome Miruku 29:25.) Ankhili, yaahimukhaliherya Yoona omuroromela Yehova ni ohoova mixankiho saakhanle omphwanya. Nave hiyo nnoohiya woova itthu sikhanle oonikhumelela, akhala wiira nnimuupuwelaka moota Yehova onnikhaliherya awe ni onikhapelela khula okathi. Nave-tho, nihaana wuupuwelela matakiheryo a anna ni arokora, yaawo yaamuroromela Yehova ni yaawenrye oxintta mixankiho ni weemererya yoothanleliwa aya nnaamwi yaari yooxankiha.a (Ahep. 13:6) Nto nnimooniherya wiira nookhalana ankhili nimuroromelaka Yehova ni murima wootheene ni waakhaliherya atthu akina omuroromela yena.

MUTAKIHEKE MOOTA YEHOVA ONUUPUWELA AWE

17. Exeeni enrowa onikhaliherya wiira niwerye okhalana ankhili?

¹⁷ Ntoko niixuntte ahu, ankhili anninikhaliherya oxintta mixankiho sahu mwa enamuna yooloka. Ninrowa owerya sai okhalana ankhili? Yehova paahi tokhanle oonikhaliherya, maana owo tori maphattuwelo a ankhili. Yehova onnimurumeela Biibiliya ni ikuru sawe soowaarya wiira onivahe ankhili. (Neh. 9:20; Esal. 32:8) Yehova onninivaha malakiheryo wiira niweryeke opaka soothanla sooloka. Nave onninikhaliherya wiira niheettihiweke ni muupuwelo ahu paahi. (Esal. 119:​97-101) Hiyo ninnikhalana ankhili, vaavo nnuupuwela ahu ele Biibiliya onihimya awe ni okathi nninvekela ahu ikuru sawe soowaarya. Niira siiso, okathi sinniphwanya aya mixankiho, nnoowerya osuwela moota Yehova onoonela awe mwaha owo ni opaka soothanla ntoko oniphavela awe. — Mir. 21:​11, ni enoota.

18. Etthu xeeni mulakenle anyu opaka?

¹⁸ Nihihiye onvekela Yehova wiira onivaheke ankhili. (Esal. 14:2) Niira siiso khaninrowa ohiya weetta “ephiro ya ankhili”. (Mir. 21:16) Nave khaninrowa ohiya wooniherya wiira nookhalana ankhili hata okathi sinniphwanya aya mixankiho. Nto, itthu sinooneettelaka saana ni nnoomuhakalaliha Yehova.