Muhimuliyale Yehova okathi munisoma anyu iskola suulupale

1-2. a) Vakhala wiira moothanla osoma iskola suulupale, exeeni muhinireerela anyu ohiya? b) Moolumo oowi “weetta ephiro emosa-ru”, antaphulela exeeni? (Afilipi 3:16)

ARUMEYI akina a Yehova, aathanla osoma iskola suulupale. Awo anuupuwela wiira opaka eyo, pooti ophwanya muteko onrowa waakhaliheryaka ohihiya ovara miteko sa Muluku. Akhala wiira moothanla osoma iskola suulupale, etthu xeeni mukhanle anyu oopaka wiira muhihiye omurumeela Yehova? (Yak. 4:8a) Woonasa wene, iyaakha sivinre musomaka, saahoophwanyani mixankiho seeherenrye waamini wanyu, masi khamuhiyale omurumeela Yehova. Nto vano mutepeke “weetta ephiro emosa-ru”, eyo piiyo, muhihiye omurumeela Yehova moororomeleya. — Mmusome Afilipi 3:16.

² Nuulumo na ekereku nirumeeliwe efrase ela noowi “weetta ephiro emosa-ru”, naanirumeeliwa aphavelaka ohimmwa atoropa yaawo yaatthimaka attharaka ephiro emosa-ru. Akhala wiira moothanla osoma iskola suulupale, muhaana waatakiha atoropa awo. Eyo enitaphulela wiira muhaana ohihiya “weetta” hoothe ni anna ni arokora ni opaka itthu sinlipiha waamini wanyu. Mwaha ola, nnoothokorerya malakiheryo 4 a mbiibiliyani, anrowa wookhaliheryani. Malakiheryo awo khahiyo a niinaano, mootoko ovarihela muteko. Nto vano mpacenrye anyu osoma iskola suulupale, muhaana ohihiya ovarihela muteko mpakha omaliha osoma.

MUHIHIYE OVARA MITEKO SINILIPIHA WAAMINI WANYU

3. Akhala wiira moopacerya osoma iskola suulupale, mixankiho xeeni sikhanle ookhumelela?

³ Mixankiho sikhanle ookhumelela. Osoma iskola suulupale, pooti owiirihani waatteliwa miteko muhinawerya ovara itthu sinlipiha waamini wanyu. Okhala wiira muniphavela opasari, nyuwo pooti oluttuweliwaka osoma, muhinavaha efaita miteko sa Muluku. Eyo pooti owiirihakani opacerya ohirowela mithukumano, muteko woolaleerya, ohikhalana yoosoma anyu ya Biibiliya ni ohiya ovekela. — Wis. 2:4.

4. Etthu xeeni mukhanle anyu oopaka wiira “mukhalaneke muteko munceene munaavarela anyu Apwiya”? (1 Akorinto 15:58)

⁴ Mmusome 1 Akorinto 15:58. Akhala wiira muniphavela weetta ni pisikeleeta, nyuwo munipirisari ohihiya omunyakelela. Mwa enamuna emosa-ru, wiira muhihiye olipiha ompatthani anyu ni Yehova, muhaana ohihiya okhalela nthiti miteko sa Yehova. Tivonto, Biibiliya onihimya awe wiira “mukhalaneke muteko munceene munaavarela anyu Apwiya”. Nto muhaana opaka eyo ni murima anyu wootheene ni mwaha wa omphenta Yehova. Muhiliyale wiira etthu yootepexa okhala efaita, omurumeela Yehova, ohiya osoma iskola suulupale. (Math. 22:37) Murokora mmosa mwali, oniitthaniwa Samantha, onihimya so: “Kihinatthi opacerya osoma iskola suulupale, kaahimpaka palano wiira sapacerya okiphwanya mixankiho saarowa okikhoottiherya opaka ele Yehova oniphavela awe, kaamuhiya osoma.”

5. Etthu xeeni mukhanle anyu oopaka wiira muluttuweliweke miteko sa Yehova?

⁵ Exeeni mukhanle anyu oopaka muhinatthi opacerya osoma iskola suulupale? Nvareryeke vakhala wiira Yehova onrowa okhala nipuro noopacerya mookumini mwanyu. Mwiikoheke so: Etthu xeeni kikhanle aka oopaka wiira kiweryeke olokiherya ni orowela mithukumano, olaleerya ni okhalana yoosoma aka ya Biibiliya? (Yox. 1:8; Math. 28:​19, 20; Ahep. 10:25) Nave nyuwo pooti wiikoha-tho so: Kaawerya sai ophwanya okathi wiira kivare miteko sa Muluku vaavo kaasoma aka oskola? Moona wiira sookhala itthu munrowa anyu opakaka, masi sahaakhanle okathi mwaasoma anyu iskola sinivekeliwa ni kuvernu, exeeni mukhanle anyu opaka wiira itthu siweetteleni saana? Nvareryeke akhala wiira munaamukhalana okathi wiira nvareke miteko sa Muluku, mwapacerya osoma iskola suulupale. Ekeekhai wiira muhaana ovara saana miteko sa oskola wanyu, masi muheemererye siwiirihakani ohiya okhalela nthiti miteko sa Yehova.a — Math. 6:24.

6. Makoho xeeni munireerela anyu wiikoha, para musuwele akhala wiira Yehova ori nipuro noopacerya mookumini mwanyu? (Nwehe efootu.)

⁶ Nuumala opacerya osoma iskola suulupale, ti vooloka wiivaha okathi khula mweeri wiira mwiivarerye, vakhala wiira omphenta wanyu Yehova, nlelo wookhalana efaita yuulupale mookumini mwanyu. Nto wiira mwiivarerye, muhaana wiikoha so: Kiireke ikwaha sinceene kinnicompela mithukumano aahiiso kinnaatarasari? Kiireke okathi wa mithukumano kinimakela owuupuwela ateepeese paahi? Kiireke ikwaha sinceene kiniweha mithukumano ni telefooni ohiya orowa ni emusi aka? Nave pooti wiikoha-tho so: Kiireke koohiya omusoma Biibiliya ni ovekela, ntoko kiira aka khalai? Kiireke kinirowa muteko woolaleerya wiira kooniwe paahi aahiiso kinivara ni murima wootheene? Akhala wiira nookhala nikoho munaakhula anyu wiira aayo, muhaana opaka marukunuxo moowaakuveya. Muhemererye wiira osoma wanyu owiiriheni ohiya omuhela Yehova nipuro noopacerya mookumini mwanyu.

“MUKHAPELELE MUUPUWELO ANYU”

7. Mixankiho xeeni sikhanle ookhumelela okathi munimpaka anyu kursu?

⁷ Mixankiho sikhanle ookhumelela. Moovarihana ni kursu mmuthanlale anyu, nyuwo pooti owiriyanaka moolumo oohiloka, yaawo Biibiliya onihimya awe okhala “moolumo oowoototha ni miyuupuwelo seethiru”. Mwa ntakiheryo, pooti wiixuttihiwaka wiira Muluku kokhanle ni apinaatamu arootathuwa. (Akol. 2:8) Nave itthu muniixutta anyu pooti owiirihani opaceya wiiroromela, ohiya omuroromela Yehova. Munna mmosa mmiravo, onihimya wiira: “Ohiya paahi wiixuttihiwa moota woovara muteko, nave naaniixuttihiwa muupuwelo mukina, yoowo wahaavarihana ni ele Yehova oniphavela awe. Mwa ntakiheryo, naaniixuttihiwa wiira naaphavelaka ophwanya ohakalala weekeekhai, nihaana wiiroromela. Muupuwelo owo, waahipacerya okiiriha ohiphavela nikhaliheryo na Yehova. Nave kaahipacerya ohimuroromela Yehova.”

8. Xeeni vari aya vooloka okhapelela “muupuwelo anyu”? (Miruku 5:​1, 2)

⁸ Musome Miruku 5:​1, 2. Biibiliya onihimya wiira “mukhapelele muupuwelo anyu”. Etthu enikhapeleliwa, tiile mutthu mukina oniphavela awe ohonona aahiiso onaakha. Satana ni olumwenku awe, ikwaha sinceene onneererya ohonona muupuwelo ahu. (1 Ped. 5:8) Moota atthu anuupuwela aya, anoonela aya itthu sooloka ni soohiloka, moota okumi opacenrye aya ni akhala wiira Muluku ookhala, pooti oniiriha opacerya waanyiherya itthu nniixutta ahu mbiibiliyani. Mapurusoore ni atthu akina, pooti oniiriha wuupuwela wiira itthu anniixuttiha aya sookhalana efaita. Masi muhiliyale wiira miyuupuwelo sa olumwenku ola, “khahiyo etthu vamaithoni va Muluku”. — 1 Akor. 3:​18-20.

9. Exeeni mukhanle anyu oopaka wiira mukhapelele muupuwelo anyu?

⁹ Etthu mukhanle anyu oopaka muhinatthi opacerya osoma iskola suulupale. Mukupaliki ni murima wootheene wiira itthu Biibiliya oniixuttiha awe ti sa ekeekhai muhinatthi opacerya osoma. Mwiikoheke so: Exeeni enkiiriha okupali wiira Muluku ookhala? Kinsuwela sai wiira Biibiliya Nuulumo na Muluku? Exeeni enikiiriha okupali wiira malakiheryo a mbiibiliyani aakhalana efaita ovikana muupuwelo wa olumwenku ola? Etthu ekina enrowa wookhaliheryani, ori wuupuwela moota mwaawerya anyu oxintta mixankiho, okathi mwaasoma anyu iskola sinivekeliwa ni kuvernu. Nave pooti wiikoha so: Kiireke okathi ole, kaahipacerya waanyiherya akhala wiira Muluku ookhala ni topattunxe itthu sootheene, nnaamwi atthu akina yaakupali mwiixuttiho wa othatuwa? Kiireke kaahipacerya opaka itthu soohiloka saapakiwa ni ale kaasomana aka? Akhala wiira munaakhula aayo makoho ala, exeeni mukhanle anyu oopaka, enrowa wookhaliheryani okupali wiira itthu Biibiliya oniixuttiha awe, ti sa ekeekhai ni sa faita? Nvareryeke vakhala wiira itthu atthu akina anihimya aya, kasinrowa owiirihani waanyiherya ikeekhai mwiixuntte anyu mbiibiliyani. — 2 Tim. 2:​16-18.b

10. Nuumala opacerya osoma iskola suulupale, makoho xeeni-tho mukhanle anyu oowiikohaka?

¹⁰ Okathi munisoma anyu iskola suulupale, muhiliyaleke wiikoha makoho ala anittharelana: Kiireke koopacerya otthara mweettelo woohiloka wa atthu ale kinisomana aka? Kiireke koopacerya okupali itthu soowoothiwa siniixuttihiwa oskola? Kiireke kinnikupali wiira Omwene wa Muluku paahi tonrowa omaliha mixankiho sa apinaatamu? Omusoma Biibiliya, wuupuwelela ni ovarihela muteko ele munisoma anyu, onimookhaliheryani ohiwokiwa ni ale munisomana anyu aahiiso mapurusoore anyu. Mwiira siiso, khamunrowa ohiya okupali wiira itthu Biibiliya oniixuttiha awe ti sa ekeekhai. — 1 Tim. 4:15.

MURUMEELEKE SAANA OKATHI ANYU

11. Okathi munisoma anyu iskola suulupale, mixankiho xeeni sikhanle oowiirihani ohirumeela saana okathi anyu?

¹¹ Mixankiho sikhanle ookhumelela. Osoma iskola suulupale, pooti owiiyeryakani okathi munceene, otepexa wene okathi muniilokiherya anyu wiira mwapake iporova aahiiso munivahiwa anyu teepeese wiira mumpake moowaakuveya. Nto akhala wiira khamunirumeela saana okathi anyu, nyuwo pooti okhulumuwa ni opacerya wuupuwela wiira muri mekhinyu. Ohiya paahi khula okathi ovaraka miteko sa oskola, ti vooloka wiivaha okathi wiira mukhapelele okumi anyu ni muupuwelo anyu.

12. Xeeni vanixankiha aya orumeela “oratteene okathi anyu”? (Aefeso 5:​15, 16)

¹² Mmusome Aefeso 5:​15, 16. Xeeni vanixankiha aya orumeela “oratteene okathi anyu”? Mwaha woowi sookhala itthu sinceene munireerela anyu ovara. Mwa ntakiheryo, nyuwo muhaana wiivaha okathi wiira musome oskola, masi etthu yootepexa okhalana efaita, ori oviriha okathi muri ene ni amusi anyu ni anna ni arokora a muloko anyu. (Esal. 133:1; Mir. 18:1) Etthu ekina mukhanle anyu oohela nipuro noopacerya, ori olipiha ompatthani anyu ni Yehova. (Math. 6:33) Nave pooti wiira mookhalana miritti sikina mweemusini aahiiso muteko munivara anyu. Ohiya-vo, nyuwo muhaana okhapelela okumi anyu, ophumurya ni opaka esersiisio. (Mus. 4:6; 1 Tim. 4:8) Wiira nwerye opaka itthu iya sootheene, muhaana orumeela saana okathi anyu.

13. Muhinatthi opacerya osoma, exeeni mukhanle anyu oopaka wiira murumeele saana okathi anyu?

¹³ Etthu mukhanle anyu oopaka muhinatthi opacerya osoma iskola suulupale. Biibiliya onihimya wiira mutthu onaapaka apalano oratteene, itthu sinoomweettela saana. (Mir. 21:5) Muupuwelaka eyo, muhaana ompaka prokaraama saana muhinatthi opacerya osoma iskola suulupale. Wiira nwerye opaka eyo, muhaana wiikoha so: Vaavo kaasoma aka iskola sinivekeliwa ni kuvernu, kaawerya sai orumeela saana okathi aka? Akhala wiira mwaanirumeela saana okathi anyu, nto marukunuxo xeeni munireerela anyu opaka nenna-va? Mwampaka prokaraama ooloka, munaamurumeela saana okathi anyu ohiya okathi woorumeelani nyuwo.c

14. Makoho xeeni anrowa wookhaliheryani wiivarerya?

¹⁴ Okathi munisoma anyu iskola suulupale, muhiliyaleke wiikoha makoho ala anittharelana: Kiireke eprokaraama aka ennikeemererya okhalana okathi para ophumurya ni opaka esersiisio? Kiireke kinnikhalana okathi wiira kikhale ni anna ni arokora? Kiireke kinniwerya omaleliha miteko kinivahiwa aka oskola okathi kivekeliwe aka? Akhala wiira munaakhula wiira nnaari makoho ala, niireke munaatteliwa miteko aahiiso munoohirumeela saana okathi anyu? Niireke apatthani ni amusi anyu annoona ni annihimya wiira eprokaraama anyu kekhanle saana? Moona wiira yookhala etthu munireerela anyu olokiherya, muhaana opaka eyo moowaakuveya. Nyuwo pooti ovaanela ni atthu akina yaawo anisuwela orumeela saana okathi aya. — Mir. 11:14.

MWEETTEKE NI ATTHU A ANKHILI

15. Mixankiho xeeni sikhanle ookhumelela okathi munisoma anyu iskola suulupale?

¹⁵ Mixankiho sikhanle ookhumelela. Nuumala opacerya osoma iskola suulupale, ale munisomana anyu, pooti woolattulakani wiira mwapasiyari aahiiso otthekula hoothe. Okathi mukina nyuwo pooti weemereryaka. Eyo pooti wiiraneyaka akhala wiira murina iyaakha simosa-ru, munnisiveliwa ni itthu sinipaka aya aahiiso munikhala naawo ikwaha sinceene. Nyuwo pooti opacerya wuupuwela wiira sookhala itthu sinceene sinoosivelani opaka naawo ohiya ni anna ni arokora. Masi muhaana okhalana ephoole. Hata sikhanle ene itthu sinoosivelani ovara ni ale munisomana anyu, muhiliyale wiira moovirikana naawo, maana nyuwo muniphavela omuhakalaliha Yehova, masi awo nnaari. Nto akhala wiira munniviriha okathi munceene muri ene naawo, pooti opacerya wuupuwela ntoko anuupuwela aya. (1 Akor. 15:33) Eyo yaahiiraneya ni munna oniitthaniwa Michael, yoowo ovirihale iyaakha 4 ompakaka kursu a olokiherya enerxia. Owo onihimya so: “Khula esumana, kaaniviriha iwoora 40 kiri ene ni ale kaasomana aka. Awo yaahikhalana moonelo woohiloka voohimya sa orupihana, yaawiriyana isipo soohiloka ni malavulelo aya yaari oohiloka. Nto kaahipacerya wuupuwela ntoko awo.”

16. Miruku 13:​20, onniixuttiha exeeni?

¹⁶ Musome Miruku 13:20. Biibiliya oninlopola wiira weetta ni atthu ootakhala, onnihonona mikhalelo sooloka. Nave “ole oneetta ni atthu arina ankhili, onookhala mutthu a ankhili”. Etthu nniixutta ahu tiila: Ale ninvirihana ahu okathi munceene niri ene hoothe, pooti oniiriha opaka etthu yooloka aahiiso yoohiloka. Nto mwaathanleke okhala apatthani anyu ale animphenta Yehova ni anipaka itthu sinoosivelani ni sinimusivela Yehova. — Esal. 101:​6, 7; 119:63.

17. Wiira mwaasyake apatthani oohiloka, etthu xeeni mukhanle anyu oopaka?

¹⁷ Etthu mukhanle anyu oopaka muhinatthi opacerya osoma iskola suulupale. Musuweleke okathi munrowa anyu ovirihaka ni ale munisomana anyu. Namoona a Yehova oniitthaniwa Trenton, onihimya so: “Kinnaareerela murima ale kinisomana aka, masi nkiniviriha okathi munceene kiri ene naawo nuumala okhuma oskola. Miyo kinaathokorerya ntoko atthu kinisomana aka, ohiya ntoko apatthani aka.” Exeeni mukhanle anyu oopaka wiira musuwele akhala wiira khamuniviriha okathi munceene muri ene ni ale munisomana anyu? Wiira mwaakhule nikoho nla, muupuwele okathi mwaasoma anyu iskola sinivekeliwa ni kuvernu. Mwawerya sai osyaka okhala apatthani a atthu ale mwaasomana anyu? Akhala wiira mwaaniwerya osyaka oviriha okathi munceene muri ene naawo, nto marukunuxo xeeni munireerela anyu opaka nenna-va? Tivonto, muhihiye weetta ni atthu a ankhili ni waasyaka apatthani oohiloka yaawo ahinimphenta Yehova.d

18. Makoho xeeni munireerela anyu wiikoha? (Nwehe efootu.)

¹⁸ Ti va miruku khula okathi wiivarerya mwiikohaka makoho ala anittharelana: Kiireke kinniviriha okathi munceene kiri ene ni atthu kinisomana aka? Kiireke koopacerya olavula, wuupuwela ni opaka itthu ntoko ale kinisomana aka? Yehova onoonela sai waataana kirina aka ni ale kinisomana aka? (Esal. 1:1) Moona wiira yookhala etthu yoohiloka munireerela anyu olokiherya, muhaana opaka eyo moowaakuveya. Tivonto, apatthani anyu akhaleke ale animphenta Yehova. Masi okhala wiira ale munisomana anyu khanimusuwela Yehova, nto murumeeleke okathi munikhala anyu naawo wiira nvaanele voohimya sa Yehova ni Biibiliya.

MUHIHIYE OMUHAKALALIHA YEHOVA

19. Munrowa wiilokiherya sai mwaha wa mixankiho sikhanle ookhumelela vaavo munisoma anyu iskola suulupale? Nvahe nlikanyiho.

¹⁹ Nkahaya mmuupuwele mutthu oniilokiherya wiira orowe omatta. Mwa ntakiheryo, owo ohaana okuxa maasi awe munttonkani aahiiso itthu sikina, uupuwelaka itthu sikhanle oowiiraneya mphironi wala omatta. Masi nnaamwi ohisuwelaka itthu sootheene sinrowa wiiraneya mphironi, wiilokiherya mwa enamuna ela, onoomukhaliherya okathi oneetta awe ni aphiya omatta. Nave-tho, owo onnisuwela opuro onrowa awe ni khonrowa otthara ephiro ekina ehikhanle ele enimuroiha omatta. Mwa enamuna emosa-ru, nyuwo muhaana wiilokiherya oratteene muhinatthi orowa osoma iskola suulupale. Mukhalaneke waamini woolipa ni “nwareke ikaruma sootheene sa ekhotto sinikhuma wa Muluku”. Nave musuweleke etthu eniwiirihani ophavela osoma iskola suulupale. Yoolakela anyu, khahiyo wiithukumanyerya muhakhu aahiiso ophavela okhala mutthu oovuwa, masi musuweleke wiira etthu yootepexa okhalana efaita, ophavela omuhakalaliha Yehova. — Aef. 6:​11-13; 1 Akor. 9:​26, 27; 10:31.

20. Munrowa wiivarerya sai wiira moone “akhala wiira nlelo munneettela waamini”?

²⁰ Biibiliya onihimya wiira “okathi wootheene mwiiweheke akhala wiira nlelo munneettela waamini. Mwiivareryeke wiira musuwele omutthu anyu.” (2 Akor. 13:5) Nyuwo pooti opaka eyo okathi munisoma anyu iskola suulupale. Moota xeeni? Khula okathi mwiivareryaka moovarihana ni malakiheryo niixuntte ahu mwaha ola. Niireke munniluttuweliwa ovara miteko sa Muluku? Niireke munnisyaka wuupuwela ntoko atthu a olumwenku ola? Niireke munnirumeela saana okathi anyu? Niireke munnaataana ni anna ni arokora? Nyuwo muhaana wiikoha makoho ala hata mumpakaka kursu, musomaka iskola suulupale, aahiiso nvaraka miteko sikina. Muhaana okhalana waamini woolipa, moohicikha mixankiho sinoophwanyani. Mukupaliki wiira khula okathi Yehova onooreeliha wiimananiha wanyu ophavela omuhakalaliha. — Mir. 3:​5, 6.