Muttittimiheke soothanla sa atthu akina

1-2. Xeeni ikwaha sikina nimpaka ahu soothanla soovirikana?

NIIREKE mootoko ophukeliwa moohixariya mwaha wa yoothanla mwaapanke anyu? Niireke mootoko omphukela munna aahiiso murokora mwaha wa yoothanla aapanke awe? Anamunceene a hiyo, pooti waakhula wiira aayo, makoho ala oomanli.

² Ikwaha sikina, ninnipaka soothanla soovirikana ni sa atthu akina. Mwaha wa xeeni? Mwaha woowi, na atthu oovirikana. Khula mmosa a hiyo onuupuwela manera awe. Miyoonelo sahu sinnivirikana mwaha wa ekultuura ahu, moota nihuuwale ahu ni itthu siniiranenle mookumini mwahu. Masi nnaamwi nuupuwelaka mwa inamuna soovirikana, niheemererye wiira eyo ehonone murettele ni wiiraana nirina ahu ni anna ni arokora. — Aef. 4:3.

3. Ninkhala sai okathi munna aahiiso murokora onipaka awe yoothanla nihineemererya ahu?

³ Okathi munna aahiiso murokora onipaka awe yoothanla nihineemererya ahu, ikwaha sikina pooti wuupuwelaka wiira nihaana omuleela wiira oturuke moonelo awe aahiiso hiyo pooti wuupuwelaka waaleela atthu akina yoothanla opanke awe. Ninnipaka eyo mwaha woowi nimphavela omukhaliherya mutthu owo. Hiyo ninnaaphenta anna ni arokora, nto nimphavela wiira awo ahakalaleke. (Mir. 17:17) Tivonto, khanimphavela wiira apakeke soothanla sinrowa owiiriha oriipiwa murima muhoolo aahiiso sinrowa ohonona waataana waya ni Yehova.

4-5. Exeeni nikhanle ahu oopaka akhala wiira munna aahiiso murokora onnipaka yoothanla nihineemererya ahu?

⁴ Okathi munna aahiiso murokora onipaka awe yoothanla nihinemererya ahu, niireke nihaana olavulana? Ikwaha sikina nihaana opaka eyo, masi ikwaha sikina nnaari. Mwa ntakiheryo, nkuupuwelani wiira munna aahiiso murokora onuupuwela opaka etthu Biibiliya onikhoottiha awe. Mwaha wa omphenta, nihaana olavulana wiira nimukhaliherye olokiherya muupuwelo awe. (Mir. 27:​5, 6) Masi nkuupuwelani wiira yoothanla awe khenitthekela malamulo a mbiibiliyani, masi evirikanne paahi ni yoothanla naarowa ahu opaka. Nto akhala wiira ti siiso, nooneleke sai? Waakhuliwa wa nikoho nla, oniphwanyaneya yoolepa ya mwaha ola, yeeyo eni: “Muhaaphukeleke ale arina muupuwelo onivirikana ni wawinyu.” — Arom. 14:1.

⁵ Masi ikwaha sikina, pooti oxankiha ottittimiha soothanla sa atthu akina. Nto mwaha ola, nnooweha moota nikhanle ahu oottittimiha soothanla sa atthu akina ni moota nikhanle ahu oopaka eyo. Masi wanipacerya, ninrowa oweha matakiheryo a soothanla sa khula mutthu ni itthu sikhanle ooniiriha ophavela omphukela mutthu owo.

ITTHU SIKHANLE OONIIRIHA OPHAVELA WAAPHUKELA ATTHU AKINA

6-7. Mutthokiherye matakiheryo vakhaani yaakhanle ooniiriha ophavela waaphukela atthu akina mwaha wa soothanla saya.

⁶ Ntoko nithokorenrye ahu, ikwaha sikina ninnuupuwela opaka soothanla mwaha wa moota nihuuwale ahu aahiiso mwaha wa itthu siniiranenle mookumini mwahu. Ikwaha sikina, hiyo pooti wuupuwelaka wiira atthu akina arina moonelo mmosa-ru nirina ahu. Masi eyo khahiyo ekeekhai. Nrowe nithokorerye matakiheryo vakhaani. Noopacerya: Ohinatthi wiixutta ekeekhai, munna aakhala ni apapawe yaawo yaahapaliwa vanceene. Nto ori ene ofestani, onnaaweha anna ni arokora awuryaka eviinyu. Owo onnixankiheya ni onnaaleela wiira etthu anipaka aya ti yoohiloka. Ntakiheryo na nenli: Murokora mmosa aarina eretta yuulupale oopenuwa. Masi vano onninweha murokora mukina orina eretta ene yeeyo. Nto ophavelaka omukhaliherya, onninvekela wiira orumeele itthu simosa-ru simukhaliherye yena. Woonasa wene, owo onnimuleela etthu okhanle awe oolya, ikompirimiitu okhanle awe oowurya, aahiiso mirette sikina sikhanle awe oorumeela sikhale sa ospitaali aahiiso nnaari. Ntakiheryo na neeraru: Munna mmosa aari etiini yoowootha, masi vano khoniphavela-tho wiirela mpantta. Masi onnixankiheya nuumala osuwela wiira munna mukina oronwe okhaliherya masikho, yaawo anrowa othukumaniwa okerexa.a

⁷ Nrowe nthokorerye matakiheryo makina. Ntakiheryo na neexexe: Munna mmosa, iixuntte ekeekhai okathi atthu anceene yuupuwela aya wiira khahiyo ti vooloka munna ohuwa ereru aahiiso murokora owara ekaalasa orowaka mithukumano. Vano owo onnisuwela marukunuxo a niinaano voohimya sa mwaha owo. Masi hata vari siiso, onihimya wiira khahiyo ti vooloka mulopwana ohuwa ereru ni athiyana owara ekaalasa okathi anivara aya miteko sa Muluku. Ntakiheryo na neethanu: Mutokweene mmosa onnimusuwela munna aaronwe osoma iskola suulupale nuumala-vo, ohiya omurumeela Yehova. Masi vano munna mmosa a muloko awe, oniphavela osoma iskola suulupale. Nto mutokweene owo onneererya olavula ni munna owo aahiiso anamuyari awe wiira amuturuke palano aya.

8. a) Etthu xeeni ekhanle oomwiiriha namuyari waaphukela anamuyari akina? b) Moota xeeni miyoonelo sahu sikhanle aya oohonona wiiraana wahu mmulokoni?

⁸ Vano nrowe niwehe matakiheryo akhanle oowaafetari anamuyari. Ntakiheryo nummeru 6: Akhala wiira mwa namuyari, munniimananiha owiixuttiha aniinyu “muttharaka malakiheryo a Yehova.” (Aef. 6:4) Masi pooti wiira anamuyari akina anniweemererya anaaya opaka itthu nyuwo muhikhanle anyu ooweemererya aniinyu. Mwa ntakiheryo, awo pooti oweemererya anaaya ophiya owaani vailale ene, oweemererya oweetta axooku ahikhanle ootakhala aahiiso waathumela telefooni anamwane awo ari ene acikhaani. Nto eyo pooti omwiiriha mwaninyu wuupuwelaka wiira khimureerane ireekera. Nave owo pooti wookohani so: “Xeeni muhinaatakiha anyu anamuyari a mpatthani aka?” Nto eyo pooti owiirihani ophavela waaphukela anamuyari akina. Tthiri okathi anna ni arokora ampaka aya soothanla sihineemererya ahu, eyo pooti oniiriha okhalana muupuwelo woohiloka. Mwa ntakiheryo, hiyo pooti opacerya wuupuwela wiira mutthu owo onikastari musurukhu awe mwa enamuna yoohiloka, onnitepa oviyaxari ni matthekulelo awe toohiloka. Masi niheemererye wiira muupuwelo ahu aahiiso moonelo ahu, okhalane efaita ovikana wiiraana nirina ahu ni anna ni arokora.

9. a) Etthu xeeni ootheene ahu nimphavela ahu? b) Etthu xeeni ninreerela ahu osyaka? (Nwehe eteseenyu.)

⁹ Yoothanla ya munna mmosa, pooti ovirikana ni ya munna mukina. Masi eyo khentaphulela wiira mukina opanke yoothanla yooloka nave mukina opanke yoohiloka. (Arom. 14:5) Biibiliya aahimyaka wiira nihaana “okhalana muupuwelo mmosa-ru”, oniphavela ohimya wiira ootheene ahu, nihaana otthara malamulo ni malakiheryo a Yehova. Masi eyo khenitaphulela wiira khula etthu ninrowa wuupuwelaka mwa enamuna emosa-ru. (2 Akor. 13:11) Nkuupuwelani wiira nimphavela oviyaxari nirowaka elapo ekina. Okhala wene, sinnikhala inamuna ni iphiro soovirikana khula mmosa okhanle awe oorumeela, masi niphavelaka ophiya elapo emosa-ru. Hiyo ninthanla ele ennisivela aahiiso enivarihana ni makhalelo ahu. Mwa enamuna emosa-ru, khula mukristau onnipaka soothanla sawe, masi ootheene ahu, nimphavela etthu emosa-ru. Etthu ene tiila: Omuhakalaliha Yehova. Tivonto, nihaana osyaka waaphukela atthu akina mwaha wa soothanla anipaka aya. — Math. 7:1; 1 Ates. 4:11.

XEENI NINREERELA AHU OTTITTIMIHA SOOTHANLA SA ATTHU AKINA?

10. Moovarihana ni Yakobo 4:​12, etthu xeeni nihirina ahu etireitu ni mwaha wa xeeni?

¹⁰ Biibiliya onnooniherya oratteene xeeni ninreerela ahu ottittimihaka soothanla sa khula mutthu. Nrowe nithokorerye iponto vakhaani. Hiyo khanirina etireitu ya waaphukela atthu akina mwaha wa soothanla saya. (Mmusome Yakobo 4:12.) Yehova ta xariya, tori Mulipa Oniphuka Milattu ni tori Mulipa Onikumiherya Malamulo. Nto yena torina etireitu ya onileela etthu nikhanle ahu oopaka ni nihikhanle ahu oopaka. Hiyo khanikhanle oowaaphukela anna ni arokora, masi Yehova tonrowa waaphukela. (Arom. 14:10) Nave nihaaphukeleke ni soothanla saya hata nirina ene moonelo woovirikana ni wawaya.b

11. Etthu xeeni nikhanle ahu oopaka wiira nikhale oowiiraana mmulokoni? (Nwehe efootu.)

¹¹ Yehova oniphavela wiira nikhaleke oowiiraana, ohiya oolikana. Yehova omusivela itthu soovirikana. Ninnisuwela eyo mwaha wa itthu sinceene opattunxe awe. Mwa ntakiheryo, makukhu a mwiri mmosa, anikhala oovirikana. Nave nkahaya nwuupuwele apinaatamu. Mulaponi, aakhala apinaatamu anivikana imilyau 8, masi khuuvo onlikana ni mukhwaawe. Hata alikanaka vakhaani owiitho, awo annivirikana mikhalelo saya ni moota anipaka aya itthu. Yehova onipattunxe wiira nikhaleke oovirikana. Masi owo oniphavela wiira nikhaleke oowiiraana. Nto nihaana waahiya atthu akina wiira apakeke soothanla saya hata sivirikanaka ni sawihu wiira nikhalihe murettele. Etthu erina efaita yuulupale ti wiiraana mmulokoni, ohiya ophavela wiira atthu akina apakeke itthu nnoona ahu wiira ti sooloka. — Arom. 14:19.

MOOTA WOOTTITTIMIHA MIYOONELO SA ATTHU AKINA

12-13. Etthu xeeni nikhanle ahu oopaka noona wiira mutthu owo oneetta “ephiro yootakhala”? (Akalaasia 6:1; nwehe ekaaxa eni: “Akhala wiira khamuneemererya yoothanla awe.”)

¹² Okathi atthu anipaka aya soothanla sinivarihana ni myaha saya. Mwiikoheke so: Kiireke mutthu owo onirowa “ephiro yootakhala”, aahiiso moonelo awe tovirikanne ni wawaka paahi? Akhala wiira onirowa “ephiro yootakhala”, aahiiso onipaka itthu Biibiliya onikhoottiha awe, mwiikoheke so: Kiireke ka mutthu ooreerela para omukhaliherya ni mwaha owo, aahiiso aahaana okhala mutthu mukina ntoko mutokweene? Moona wiira vannireerela omukhaliherya, mpakeke eyo mooreerela murima. (Mmusome Akalaasia 6:1.) Ikwaha sikina, pooti woona wiira mutthu owo khahiyo onipaka etthu yoohiloka, masi yoothanla awe tevirikanne ni yawinyu. Akhala wiira ti siiso, muhimphukeleke aahiiso omulavula moohiloka mwaha wa yoothanla awe. Tivonto, muttittimiheke soothanla sawe. — Arom. 14:​2-4.

¹³ Nkuupuwelani ntakiheryo nla: Vaakhanle wiira muronwe orestaurante ni mpatthani anyu, niireke mwaarowa omukhanyererya othanla eyoolya emosa-ru muthanlale anyu? Nnaari. Nyuwo mwaamuttittimiha moonelo awe wa othanla etthu oniphavela awe. Hata othanlaka etthu ehinoosivelani olya, yena ennimusivela. Ankhi vaakhanle wiira onnookhanyereryani othanla eyoolya enimusivela, mwaarowa woonela sai? Mwa enamuna emosa-ru, nihaana ottittimiha soothanla sa atthu akina, nihaakhanyereryaka opaka itthu ntoko nimphavela ahu.

14. Okathi munipaka anyu soothanla, munrowa wiiriha sai muloko okhala woowiiraana? (1 Akorinto 8:​12, 13)

¹⁴ Okathi munipaka anyu soothanla sinivarihana ni myaha sanyu. Munnikhaliherya muloko okhala woowiiraana, akhala wiira khamunipaka itthu sinihonona waamini wa atthu akina. (Mmusome 1 Akorinto 8:​12, 13.) Ikwaha sikina, nyuwo pooti woonaka wiira yoothanla muniphavela anyu opaka, enneemereriwa ni khenitthekela malamulo a mbiibiliyani. Masi akhala wiira ennivukula waamini wa munninyu, yoothanla eyo kherina “mureerelo”.c (1 Akor. 10:​23, 24) Ohiya wuupuwela wiira mookhalana etireitu yoopaka eyo, vaamuloka wuupuwela moota atthu akina anrowa aya woonela. (Arom. 15:1) Mwaha ola, noolavula wiira khula mmosa ohaana ottittimiha soothanla sa mutthu mukina. Masi nihaana wuupuwela malakiheryo ari Aroma 12:​18, yaawo ani: “Mpakeke sootheene muniwerya anyu, wiira mukhaleke ni murettele ni atthu ootheene.” Nto nihaana ophavela okhaliha murettele ni atthu akina ni osyaka opaka soothanla sikhanle oovukula waamini waya.

15. Axitokweene anikhaliherya sai muloko okhala woowiiraana? (1 Akorinto 4:6)

¹⁵ Axitokweene, muttittimiheke soothanla sa atthu akina. Axitokweene annikhaliherya muloko okhala woowiirana, akhala wiira khanikumiherya ireekera sinivarihana ni soothanla sa khula mutthu aahiiso sihinivarihana ni “itthu silempwale.” (Mmusome 1 Akorinto 4:6.) Nave awo khanihimya etthu ehinivarihana ni ele iliivuru sahu sinitthokiherya aya. Nave okathi munna aahiiso murokora onivekela awe nikhaliheryo, awo khaninvaha miruku sinivarihana ni muupuwelo aya. Ohiya-vo, awo aninvaha malakiheryo anikhuma mbiibiliyani. — Yes. 48:​17, 18.

16. Mutokweene onooniherya sai wiira onnittittimiha soothanla sa nikhuuru na axitokweene?

¹⁶ Nave mutokweene, ohaana ottittimiha soothanla sinipakiwa ni nikhuuru na axitokweene. Axitokweene anipacerya opaka nivekelo avekelaka ikuru soowaarya ni annithokorerya malakiheryo a mbiibiliyani, nuumala-vo, annipaka yoothanla. Nto khula mutokweene, ohaana okhaliherya yoothanla enipakiwa ni axitokweene akina hata yena orina ene moonelo mukina. (Aef. 5:17) Axitokweene, ahaana otthara malakiheryo a mbiibiliyani ni ari iliivuru sahu sinimutthokiherya Biibiliya. Mwa ntakiheryo, khahiyo ti vooloka mutokweene orumeela moohiloka malakiheryo a mbiibiliyani aahiiso ari iliivuru sahu, ophavelaka okhaliherya moonelo awe paahi.

17. Muloko ahu onrowa okhala sai, vakhala wiira nnoottittimihaka soothanla sa atthu akina?

¹⁷ Ntoko niixuntte ahu mwaha ola, khula mmosa a hiyo toovirikana ni mukina. Khula mutthu orina moonelo awe ni itthu sinimusivela. Tthiri ti vooreera okhala atthu oovirikana! Okhala wiira ninkhuma mapuro oovirikana ni nirina mikhalelo soovirikana, eyo ennikhaliherya muloko okhala nipuro nooreera ni noovareleleya. Nto niheemererye wiira ovirikana iwo oniirihe okawanyeya. Masi niimananiheke okhaliha murettele. Nave nihaana okhalana ephoole wiira soothanla sahu sihivukule waamini wa atthu akina. Ohiya-vo, nihaana ottittimihaka soothanla sa khula mutthu. Akhala wiira nnoopaka eyo Yehova onoonireeliha. Nave nnookhaliherya wiira anna ni arokora akhaleke oowiiraana ni oohakalala. — Esal. 133:1; Math. 5:9.