Padayon nga Mag-alagad kan Jehova ha Bug-os nga Kasingkasing
“Akon anak, kilalahon mo an Dios han imo amay, ngan pag-alagara hiya ha hingpit [“bug-os,” NW] nga kasingkasing.”—1 KRON. 28:9.
ANO AN IMO BATON HINI NGA MGA PAKIANA?
Ano an simboliko nga kasingkasing?
Ano an usa nga paagi ha pag-usisa han aton kasingkasing?
Paonan-o kita makakag-alagad kan Jehova ha bug-os nga kasingkasing?
1, 2. (a) Ano nga bahin han lawas an mas agsob unabihon ha Pulong han Dios ha simboliko nga paagi? (b) Kay ano nga importante nga masabtan naton an kahulogan han simboliko nga kasingkasing?
AN Pulong han Dios agsob mag-unabi han mga bahin han lawas han tawo ha simboliko nga paagi. Pananglitan, an patriarka nga hi Job nagsiring: “Waray ha akon kamot an pagpungka.” Hi Hadi Salomon nagsiring: “An mag-opay nga mga sumat nakakapatambok han mga tul-an.” Hi Jehova nagpasarig kan Esekiel: “Ginhimo ko an imo agtang nga sugad han diamante ka maturotig-a kay han bantilis.” Ngan hi apostol Pablo ginsidngan: “Ikaw nagdadara ha amon mga talinga hin magpakaurosa nga mga bagay.”—Job 16:17; Prob. 15:30; Esek. 3:9; Buh. 17:20.
2 Kondi may usa nga bahin han lawas han tawo nga mas agsob gud unabihon ha Biblia ha simboliko nga paagi. Ito an gin-unabi ha pag-ampo han matinumanon nga hi Hana: “An akon kasingkasing malipay kan Jehova.” (1 Sam. 2:1) Ha pagkamatuod, an mga nagsurat han Biblia nag-unabi han kasingkasing hin haros usa ka yukot ka beses, kasagaran ha simboliko nga paagi. Importante gud nga masabtan naton an ginsisimbolohan han kasingkasing kay nagsiring an Biblia nga kinahanglan panalipdan naton ito.—Basaha an Proberbios 4:23.
ANO AN SIMBOLIKO NGA KASINGKASING?
3. Paonan-o naton masasabtan an kahulogan han pulong nga “kasingkasing” ha Biblia? Iilustrar.
3 Bisan kon an Pulong han Dios waray maghatag hin kahulogan han pulong nga “kasingkasing,” nabulig ito ha aton nga masabtan an kahulogan hito. Paonan-o? Ha pag-ilustrar, hunahunaa an usa nga makaruruyag nga piktyur nga ginkukompwesto hin usa ka yukot nga gudtiay nga bato nga gindurugkot. Basi hibaroan kon ano nga piktyur an naporma, kinahanglan umatras kita ngan kitaon an kabug-osan hito. Ha pariho nga paagi, kinahanglan kitaon naton an iba-iba nga teksto ha Biblia diin gin-gamit an pulong nga “kasingkasing” basi masabtan an kahulogan hito. Kon sugad, ano an simboliko nga kasingkasing?
4. (a) Ano an kahulogan han pulong nga “kasingkasing”? (b) Ano an kahulogan han mga pulong ni Jesus ha Mateo 22:37?
4 Gin-gamit han mga nagsurat han Biblia an pulong nga “kasingkasing” ha pag-unabi han kabug-osan han aton sulod nga pagkatawo. Upod hito an aton mga hingyap, panhunahuna, disposisyon, kinaiya, abilidad, motibo, ngan tumong. (Basaha an Deuteronomio 15:7; Proberbios 16:9; Buhat 2:26.) Usa nga reperensya an nagsiring nga “ito an kabug-osan han sulod nga pagkatawo.” Ha pipira nga kahimtang, an pulong nga “kasingkasing” limitado la an kahulogan. Pananglitan, hi Jesus nagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna.” (Mat. 22:37) Dinhi, an “kasingkasing” nagtutudlok han mga emosyon, hingyap, ngan pagbati han usa. Pinaagi han magkabulag nga pag-unabi han kasingkasing, kalag, ngan hunahuna, ginpabug-atan ni Jesus nga kinahanglan ipakita naton an aton gugma ha Dios pinaagi ha aton pagbati sugad man ha aton paagi han pagkinabuhi ngan paggamit han aton abilidad ha paghunahuna. (Juan 17:3; Efe. 6:6) Pero kon an pulong la nga “kasingkasing” an gin-uunabi, nangangahulogan ito han kabug-osan han sulod nga pagkatawo.
KON KAY ANO NGA KINAHANGLAN NATON PANALIPDAN AN ATON KASINGKASING
5. Kay ano nga karuyag naton buhaton an aton gimaopayi ha pag-alagad kan Jehova ha bug-os nga kasingkasing?
5 May kalabotan ha kasingkasing, hi Hadi David nagpahinumdom kan Salomon: “Akon anak, kilalahon mo an Dios han imo amay, ngan pag-alagara hiya ha hingpit [“bug-os,” NW] nga kasingkasing ngan ha matininguhaon nga hunahuna; kay hi Jehova nagsususi han ngatanan nga kasingkasing, ngan nasabot han ngatanan nga painoino han mga hunahuna.” (1 Kron. 28:9) Oo, gin-uusisa ni Jehova an ngatanan nga kasingkasing, pati na an aton. (Prob. 17:3; 21:2) Ngan an iya nakikita ha aton kasingkasing may daku nga epekto ha aton relasyon ha iya ngan ha aton tidaraon. Salit karuyag gud naton sundon an giniyahan nga sagdon ni David pinaagi ha pagbuhat han aton gimaopayi ha pag-alagad kan Jehova ha bug-os nga kasingkasing.
6. Ano an sadang naton hibaroan mahitungod ha aton determinasyon nga mag-alagad kan Jehova?
6 An aton pagin madasigon sugad nga mga Saksi ni Jehova nagpapakita nga hingyap gud naton nga mag-alagad ha Dios ha bug-os nga kasingkasing. Kondi, maaram kita nga an maraot nga kalibotan ni Satanas ngan an aton tendensya nga makasala mahimo gud makaimpluwensya ha aton ngan makapaluya han aton determinasyon nga mag-alagad kan Jehova ha bug-os nga kasingkasing. (Jer. 17:9; Efe. 2:2) Salit basi masiguro nga diri nagtitikaluya an aton determinasyon nga mag-alagad ha Dios, kinahanglan regular nga usisahon naton an aton kasingkasing. Paonan-o naton ito mahihimo?
7. Ano an nagpapakita han kahimtang han aton kasingkasing?
7 Waray tawo nga nakakakita han aton sulod nga pagkatawo, sugad la nga diri nakikita an pinakabutnga nga bahin han kahoy. Bisan pa hito, ha Sermon ha Bukid, hi Jesus nagsiring nga sugad la nga an mga bunga nagsusumat han kahimtang han usa nga kahoy, an aton mga ginhihimo nagpapakita han tinuod nga kahimtang han aton kasingkasing. (Mat. 7:17-20) Hisgotan naton an usa hito.
USA NGA PAAGI HA PAG-USISA HAN ATON KASINGKASING
8. Sumala ha ginsiring ni Jesus ha Mateo 6:33, paonan-o naton maipapakita kon ano an aada ha aton kasingkasing?
8 Ha amo gihap nga sermon, ginsidngan ni Jesus an iya mga mamarati kon ano an sadang nira buhaton basi ipakita an ira hingyap nga mag-alagad kan Jehova ha bug-os nga kasingkasing. Hiya nagsiring: “Pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.” (Mat. 6:33) Oo, an aton gin-uuna ha kinabuhi nagpapakita kon ano an aton tinuod nga ginhihingyap, ginhuhunahuna, ngan ginpaplano. Salit an pag-usisa han aton mga prayoridad usa nga paagi ha paghibaro kon nag-aalagad ba kita kan Jehova ha bug-os nga kasingkasing.
9. Ano an imbitasyon ni Jesus ha pipira nga kalalakin-an, ngan ano an iginpakita han ira baton?
9 Waray pag-iha katapos aghaton ni Jesus an iya mga sumurunod nga padayon nga ‘pamilngon siyahan an ginhadian,’ may nahitabo nga nagpapakita kon paonan-o hibabaroan an kahimtang han kasingkasing han usa pinaagi han iya gin-uuna ha kinabuhi. Gintikangan ni Lukas an pag-istorya hito pinaagi ha pagsiring nga “ginrig-on [ni Jesus] an iya bayhon ha pagkadto ha Jerusalem” bisan kon maaram gud hiya kon ano an mahitatabo ha iya didto ha urhi. Samtang hiya ngan an iya mga apostol ‘naglilinakat ha dalan,’ may iginkatapo hira nga kalalakin-an nga iya gin-imbitar: “Sunod ha akon.” Karuyag hito nga kalalakin-an nga karawaton an imbitasyon ni Jesus, pero may mga kondisyon hira. An usa nagsiring: “Tuguti ako anay pagkadto paglubong han akon amay.” An usa pa nagsiring: “Ginoo, masunod ako ha imo; kondi tuguti ako anay pagsarit han aadto ha akon balay.” (Luk. 9:51, 57-61) Daku gud an kaibahan han marig-on ngan bug-os-kasingkasing nga determinasyon ni Jesus ha nagruruhaduha nga baton hito nga kalalakin-an! An ira pag-una han ira mga karuyag nagpakita nga diri hira andam nga mag-alagad ha Dios ha bug-os nga kasingkasing.
10. (a) Ano an aton nagin reaksyon ha imbitasyon ni Jesus nga magin iya sumurunod? (b) Ano nga ilustrasyon an gin-unabi ni Jesus?
10 Diri pariho hadton gintanyagan nga magin disipulo, maaramon nga ginkarawat naton an imbitasyon ni Jesus nga magin iya sumurunod ngan yana nag-aalagad kita kan Jehova kada adlaw. Hini nga paagi, iginpapakita naton kon ano an aton inaabat para kan Jehova. Pero bisan kon aktibo kita ha kongregasyon, kinahanglan hinumdoman naton nga puydi pa gihapon mameligro an aton kasingkasing. Paonan-o? Hibabaroan naton an baton ha ginsiring ni Jesus ha kalalakin-an nga iya gin-imbitar nga magin iya disipulo. Hiya nagpahamangno: “Waray usa ka tawo nga magbutang han iya kamot dida ha arado, ngan lumingi, nga igo han ginhadian han Dios.” (Luk. 9:62) Ano nga leksyon an aton hibabaroan hito nga ilustrasyon?
KITA BA ‘NAKUPKOP HA MAOPAY’?
11. Ano an nahitabo ha trabaho han parauma ha ilustrasyon ni Jesus, ngan kay ano?
11 Basi magin mas matin-aw ha aton an leksyon han ilustrasyon ni Jesus, dugangan naton ito hin mga detalye. Usa nga parauma an sagipo ha pag-arado. Kondi samtang nag-aarado, an iya hunahuna nakadto ha iya balay diin aadto an iya pamilya ngan kasangkayan ngan may pagkaon, musika, kalipayan, ngan masisirongan. Ginhihingyap gud niya ito ngatanan. Han hurohirayo na an iya naarado, nagin duro na gud ito nga iya hingyap salit ‘liningi’ hiya basi kitaon an mga butang ha iya luyo. Bisan kon damu pa an iya tatrabahoon antes makatanom, diri hiya nakapokus ha iya ginbubuhat ngan naapektohan an iya trabaho. Syempre, waray malipay an iya agaron kay waray hiya magpailob.
12. Paonan-o an usa nga Kristiano yana maipapariho ha parauma ha ilustrasyon ni Jesus?
12 Kitaon naton kon paonan-o an puropariho hito nga sitwasyon mahimo mahitabo yana. An parauma mahimo magrepresentar han bisan hin-o nga Kristiano nga baga hin aktibo pero namimeligro na ngay-an an espirituwalidad. Pananglitan, hunahunaa an usa nga bugto nga aktibo ha pag-alagad. Pero bisan kon natambong hiya ha mga katirok ngan nakikigbahin ha ministeryo, ginhihinunahuna la gihapon niya an pipira nga butang ha kalibotan nga iya naruruyagan. Ha iya kasingkasing, ginhihingyap niya ito. Katapos han pipira ka tuig nga pag-alagad ha Dios, nagin duro na gud an iya hingyap ha pipira nga butang hini nga kalibotan salit ‘liningi’ hiya basi kitaon an mga butang ha iya luyo. Bisan kon damu pa an buruhaton ha ministeryo, waray hiya ‘makakapot hin marig-on ha pulong han kinabuhi,’ ngan naapektohan an iya pakigbahin ha teokratiko nga mga buruhaton. (Fil. 2:16, NW ) Hi Jehova, an “Ginoo han babrion,” nasusubo kon an usa nga Kristiano diri nagpapailob.—Luk. 10:2.
13. Ano an nahiuupod ha pag-alagad kan Jehova ha bug-os nga kasingkasing?
13 Matin-aw gud an leksyon para ha aton. Darayawon gud kon regular kita ha mag-opay ngan makapatagbaw nga mga buruhaton sugad han pagtambong ha mga katirok ngan pakigbahin ha ministeryo. Kondi labaw pa an nahiuupod ha pag-alagad kan Jehova ha bug-os nga kasingkasing. (2 Kron. 25:1, 2, 27) Kon an kasingkasing han usa nga Kristiano padayon nga nahigugma ha pipira nga bahin han paagi han pagkinabuhi han kalibotan, namimeligro an iya maopay nga relasyon kan Jehova. (Luk. 17:32) Magigin “igo [la kita] han ginhadian han Dios” kon aton gud ‘ginkakangalasan an maraot ngan nakupkop kita ha maopay.’ (Roma 12:9; Luk. 9:62) Salit kinahanglan siguruhon naton ngatanan nga waray bisan ano ha kalibotan ni Satanas, bisan kon baga hin mapulsanon o makaruruyag ito, an makakaulang ha aton ha pag-alagad ha Dios ha bug-os nga kasingkasing.—2 Kor. 11:14; basaha an Filipos 3:13, 14.
MAGPABILIN NGA ALERTO!
14, 15. (a) Paonan-o nangangalimbasog hi Satanas nga ibanan an aton kadasig ha pag-alagad kan Jehova? (b) Iilustrar kon kay ano nga peligroso hinduro an pamaagi ni Satanas.
14 An aton gugma kan Jehova nagpagios ha aton nga idedikar an aton kalugaringon ha iya. Tikang hito nga panahon, damu ha aton an nagpamatuod ha sulod hin damu ka tuig nga determinado kita nga mag-alagad kan Jehova ha bug-os nga kasingkasing. Pero hi Satanas diri naundang ha pangalimbasog nga impluwensyahan kita. An aton kasingkasing pa gihapon an iya ginpupuntirya. (Efe. 6:12) Syempre, maaram hiya nga diri kita tigda na la nga mabaya kan Jehova. Salit tuso nga ginagamit niya ini nga sistema basi hinay-hinay nga paluyahon an aton kinasingkasing nga kadasig ha pag-alagad ha Dios. (Basaha an Markos 4:18, 19.) Kay ano nga epektibo gud ito nga pamaagi ni Satanas?
15 Basi mabaton ito, hunahunaa nga nagbabasa ka hin libro nga an imo suga 100 watts nga bombilya, pero tigda la ito nga naponder. Tungod kay masirom na, maaram ka kon ano an nahitabo ngan ginsaliwnan mo ito hin bag-o. Nagpawa na liwat an kwarto. Han sunod nga gab-i, nagbabasa ka na liwat nga amo la gihap an suga. Kondi diri ka maaram nga an bag-o nga 100 watts nga bombilya ginsaliwnan ngay-an hin 95 watts. Maaabat mo ba an kaibahan? Bangin diri. Ano man kon kinabuwasan ginsaliwnan na liwat ito hin 90 watts nga bombilya? Posible nga diri mo la gihap ito maaabat. Kay ano? Kay hinay-hinay gud la an pagtikaluya han kapawa. Ha pariho nga paagi, an mga impluwensya han kalibotan ni Satanas mahimo magin hinungdan nga hinay-hinay nga maibanan an aton kadasig. Kon mahitabo ito, sugad hin naglampos hi Satanas ha pag-iban han aton “100 watts” nga kadasig ha pag-alagad kan Jehova. Kon an usa nga Kristiano diri alerto, bangin diri ngani niya maabat an hinay-hinay nga pagbag-o.—Mat. 24:42; 1 Ped. 5:8.
IMPORTANTE GUD AN PAG-AMPO
16. Paonan-o naton mapapanalipdan an aton kalugaringon ha mga pamaagi ni Satanas?
16 Paonan-o naton mapapanalipdan an aton kalugaringon ha sugad nga mga pamaagi ni Satanas ngan padayon nga makag-alagad kan Jehova ha bug-os nga kasingkasing? (2 Kor. 2:11) Importante gud an pag-ampo. Gin-aghat ni Pablo an iya mga igkasi-tumuroo nga marig-on nga ‘atubangon an mga limbong han yawa.’ Katapos nagsiring hiya ha ira: “Ha bug-os nga pag-ampo ngan pakimalooy, mag-ampo kamo ha ngatanan nga panahon.”—Efe. 6:11, 18; 1 Ped. 4:7.
17. Ano nga leksyon an igintututdo ha aton han mga pag-ampo ni Jesus?
17 Basi makapabilin nga marig-on kontra kan Satanas, kinahanglan subaron naton an pagin mainampoon ni Jesus, nga nagpakita han iya duro nga hingyap nga padayon nga mag-alagad kan Jehova ha bug-os niya nga kasingkasing. Pananglitan, tagda an iginsurat ni Lukas mahitungod han paagi han pag-ampo ni Jesus han gab-i antes hiya mamatay: “Han duro na an iya kasakit, mas naniguro gud hiya ha pag-inampo.” (Luk. 22:44, NW) Antes hini, may mga panahon na nga naniguro hi Jesus ha pag-ampo, kondi hini nga higayon nga naatubang hiya ha pinakamakuri nga pagsari ha iya kinabuhi ha tuna, “mas naniguro gud” hiya pag-ampo—ngan maaram kita nga ginbaton an iya pag-ampo. Iginpapakita han ehemplo ni Jesus nga iba-iba an kahilarom han aton pagbati kon nag-aampo. Salit kon mas makuri an mga pagsari ha aton ngan mas tuso an mga pamaagi ni Satanas, kinahanglan ‘mas maniguro gud’ kita ha pag-ampo nga panalipdan kita ni Jehova.
18. (a) Ano an sadang naton ipakiana ha aton kalugaringon mahitungod ha pag-ampo, ngan kay ano? (b) Ano nga mga butang an nakakaapekto ha aton kasingkasing, ngan ha ano nga mga paagi? (Kitaa an kahon ha pahina 16.)
18 Ano an magigin resulta ha aton han sugad nga mga pag-ampo? Hi Pablo nagsiring: “Ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing.” (Fil. 4:6, 7) Oo, basi padayon kita nga makag-alagad kan Jehova ha bug-os nga kasingkasing, kinahanglan maniguro kita ha pag-ampo ngan buhaton ito hin agsob. (Luk. 6:12) Salit pakianhi an imo kalugaringon, ‘Naniniguro ba ako pag-ampo? Ano kaagsob ako mag-ampo?’ (Mat. 7:7; Roma 12:12) An imo baton nagpapakita kon ano kahilarom an imo kinasingkasing nga hingyap nga mag-alagad ha Dios.
19. Ano an imo bubuhaton basi padayon nga mag-alagad kan Jehova ha bug-os nga kasingkasing?
19 Sugad han aton ginhisgotan, an aton mga prayoridad ha kinabuhi nagpapakita kon ano an kahimtang han aton kasingkasing. Karuyag naton siguruhon nga an mga butang nga aton ginbayaan ngan an tuso nga mga paagi ni Satanas diri gud makakapaluya han aton determinasyon nga mag-alagad kan Jehova ha bug-os nga kasingkasing. (Basaha an Lukas 21:19, 34-36.) Salit pariho kan David, padayon kita nga nanginginyupo kan Jehova: “Pag-usaa an akon kasingkasing.”—Sal. 86:11.
[Kahon ha pahina 16]
TULO NGA BUTANG NGA NAKAKAAPEKTO HA ATON KASINGKASING
Sugad la nga may mahihimo kita basi magin mahimsog an aton literal nga kasingkasing, may mahihimo liwat kita basi matipigan nga mahimsog an aton simboliko nga kasingkasing. Tagda inin tulo nga importante nga butang:
1 Masustansya nga pagkaon: An aton literal nga kasingkasing nagkikinahanglan hin igo nga kadamu han masustansya nga pagkaon. Ha pariho nga paagi, kinahanglan siguruhon naton nga makakuha kita hin igo nga kadamu hin masustansya nga espirituwal nga pagkaon pinaagi han regular nga personal nga pag-aram, pagpamalandong, ngan pagtambong ha mga katirok.—Sal. 1:1, 2; Prob. 15:28; Heb. 10:24, 25.
2 Ehersisyo: Basi magin mahimsog an aton literal nga kasingkasing, usahay kinahanglan magin malaksi an pagpitik hito. Ha pariho nga paagi, an madasigon nga pakigbahin ha ministeryo, bangin an pangalimbasog nga mapauswag ito, mabulig ha aton simboliko nga kasingkasing nga magpabilin nga mahimsog.—Luk. 13:24; Fil. 3:12.
3 Mga kaupod: An pagtrabaho ngan pagkinabuhi kaupod an diri-diosnon nga mga tawo nakakaistres gud ha aton literal ngan simboliko nga kasingkasing. Pero puydi naton maibanan ito nga istres pinaagi ha agsob nga pakig-upod ha aton mga igkasi-tumuroo nga tinuod nga nahigugma ha aton ngan nag-aalagad ha Dios ha bug-os nga kasingkasing.—Sal. 119:63; Prob. 13:20.