Maaram hi Jehova kon Paonan-o Niya Luluwason an Iya Katawohan

“An Ginoo maaram ha pagluwas han matinumanon ha Dios tikang ha panulay.”—2 PED. 2:9.

KAY ANO NGA MAKAKASARIG KITA NGA HI JEHOVA:

Maaram kon san-o ipapahinabo an mga butang ha pagtuman han iya katuyoan?

Magamit han iya gahum ha pagluwas ha iya katawohan?

Maaram gud kon ano an mahitatabo durante han daku nga kagol-anan?

1. Ano an magigin kahimtang han kalibotan durante han “daku nga kagol-anan”?

AN PAGPADAPAT han Dios han iya paghukom ha kalibotan ni Satanas tigda gud nga maabot. (1 Tes. 5:2, 3) Durante han “daku nga adlaw ni Jehova,” magigin masamok hinduro an kalibotan. (Sep. 1:14-17) Magkakaada duro nga kakurian ngan pag-antos. Magigin panahon ito han kasakit nga “waray pa mahinabo tikang ha tinikangan han kalibotan tubtob yana.”—Basaha an Mateo 24:21, 22.

2, 3. (a) Ano an maieksperyensyahan han katawohan han Dios durante han “daku nga kagol-anan”? (b) Ano an makakaparig-on ha aton ha mahitatabo ha tidaraon?

² Ha ikatarapos han “daku nga kagol-anan,” an katawohan han Dios an magigin puntirya han bug-os nga pag-atake ni ‘Gog ha tuna ha Magog.’ Durante hito, an “damu ngan gamhanan nga kasundalohan” maatake ha katawohan han Dios “sugad hin usa nga dampog ha pagtabon han tuna.” (Esek. 38:2, 14-16; Maopay nga Sumat) Waray tawhanon nga ahensya an madepensa ha katawohan ni Jehova. An ira kaluwasan madepende gud la ha Dios. Ano an ira magigin reaksyon ha atubangan han ira mga kaaway nga karuyag magbungkag ha ira?

³ Kon usa ka nga surugoon ni Jehova, natoo ka ba nga maluluwas ni Jehova an iya katawohan ha daku nga kagol-anan ngan luluwason gud niya hira? Hi apostol Pedro nagsurat: “An Ginoo maaram ha pagluwas han matinumanon ha Dios tikang ha panulay, ngan pagkapot ha diri matinumanon ha Dios ha ilarom ha pagkahinukman ngada ha adlaw ha paghukom.” (2 Ped. 2:9) An pamalandong ha pagluwas ni Jehova ha iya katawohan han naglabay makakaparig-on ha aton ha mahitatabo ha tidaraon. Aton hisgotan an pipira nga ehemplo nga magpaparig-on han aton pagsarig ha gahum ni Jehova ha pagluwas han iya katawohan.

NAKATALWAS HA BUG-OS-KALIBOTAN NGA BAHA

4. Ano an kinahanglan buhaton antes umabot an Baha?

⁴ Siyahan, tagda an asoy mahitungod han Baha ha panahon ni Noe. Antes umabot an Baha, may mga kinahanglan buhaton. Kinahanglan maghimo hin daku nga arka ngan isulod dida hito an mga hayop. An asoy han Genesis waray magsiring nga iginpatukod anay ni Jehova an arka antes magdesisyon kon san-o magtitikang an Baha, nga baga hin puydi niya bag-uhon an pagtikang hito kon pananglitan diri matapos an arka ha nakaeskedyol nga panahon. Lugod, maiha na antes pa sugoon han Dios hi Noe nga maghimo hin arka, nagdesisyon na Hiya kon san-o magtitikang an Baha. Kay ano nga makakasiring kita hito?

5. Ano an iginpahayag ni Jehova nga nakarekord ha Genesis 6:3, ngan kakan-o niya ito iginpahayag?

⁵ An Biblia nagsusumat ha aton nga hi Jehova naghimo hin desisyon ngan iginpahibaro ito didto ha langit. Sumala ha Genesis 6:3, hiya nagsiring: ‘An akon espiritu diri igkakatipa ha tawo ha kadayonan, tungod nga hiya liwat unod: kondi an iya mga adlaw maabot hin usa ka gatos karuhaan ka tuig.’ Diri an aberids nga kahilawigon han kinabuhi han tawo an ginhihisgotan dinhi. Iginpapahibaro ni Jehova kon san-o niya bubungkagon an ngatanan nga karaotan ha tuna.a Tungod kay an Baha nagtikang han 2370 A.K.P., baga hin iginpahayag ito han Dios han 2490 A.K.P. Hito nga panahon 480 anyos hi Noe. (Gen. 7:6) Paglabay hin mga 20 ka tuig, han 2470 A.K.P., hi Noe nagtikang pagkaada mga anak. (Gen. 5:32) Mga usa ka gatos ka tuig na la antes magtikang an Baha, kondi waray la gihap ni Jehova isumat kan Noe an iya magigin importante nga papel ha pagtalwas han katawohan. San-o pa ito isusumat han Dios kan Noe?

6. Kakan-o ginsugo ni Jehova hi Noe nga maghimo han arka?

⁶ Baga hin damu ka tuig nga naghulat hi Jehova antes isumat kan Noe kon ano an Iya bubuhaton. Kay ano nga makakasiring kita hito? An Biblia nasiring nga an mga anak ni Noe dagku na ngan mga inasaw-an na han ginsugo hiya han Dios nga maghimo hin arka. Hi Jehova nagsiring ha iya: “Akon tutukuron an akon kauyonan ha imo; ngan masakob ka ha arka, ikaw, ngan an imo mga anak nga lalaki, ngan an imo asawa, ngan upod ha imo an mga kaasaw-an han imo mga anak nga lalaki.” (Gen. 6:9-18) Salit posible nga han ginsugo hi Noe nga maghimo han arka, 40 o 50 ka tuig na la antes umabot an Baha.

7. (a) Paonan-o iginpakita ni Noe ngan han iya pamilya an ira pagtoo? (b) Kakan-o ginsumatan han Dios hi Noe kon san-o gud magtitikang an Baha?

⁷ Samtang gintutukod ni Noe ngan han iya pamilya an arka, sigurado nga naghunahuna hira kon paonan-o ngan san-o papahinaboon han Dios an Baha. Pero bisan kon diri hira maaram hito, waray hira umundang ha pagtukod han arka. An Biblia nasiring: “Sugad hini ginbuhat ni Noe; sugad ha ngatanan nga kanan Dios ginsugo ha iya, iya ginbuhat.” (Gen. 6:22) Pito ka adlaw antes magtikang an Baha—igo la nga panahon nga maisulod ni Noe ngan han iya pamilya an mga hayop ha arka—ginsumatan na hiya ni Jehova kon san-o magtitikang an Baha. Salit han nagtikang pag-uran “han ikaunom ka gatos ka tuig han kan Noe kinabuhi, ha ikaduha ka bulan, ha ika napulo kag pito ka adlaw han bulan,” andam na an ngatanan.—Gen. 7:1-5, 11.

8. Paonan-o an asoy mahitungod han Baha nakakaaghat ha aton nga sumarig nga maaram hi Jehova kon san-o luluwason an iya katawohan?

⁸ An asoy mahitungod han Baha nagpapamatuod nga hi Jehova pirme maaram han gimaopayi nga panahon ngan paagi ha pagluwas han iya katawohan. Samtang nagtitikahirani an kataposan hini nga sistema, makakasiguro kita nga an ngatanan nga katuyoan ni Jehova matutuman ha eksakto nga “adlaw ngan oras” nga iya itinanda.—Mat. 24:36; basaha an Habakuk 2:3.

GINLUWAS HA DAGAT NGA PULA

9, 10. Paonan-o gin-gamit ni Jehova an iya katawohan sugad nga paon basi malit-ag an kasundalohan han Ehipto?

⁹ Ha aton pa la ginhisgotan, nakita naton nga kontrolado gud ni Jehova kon san-o ipapahinabo an mga butang ha pagtuman han iya katuyoan. An ikaduha nga ehemplo nga aton hihisgotan nagpapabug-at han usa pa nga hinungdan nga makakasarig kita nga luluwason ni Jehova an iya katawohan: Gagamiton niya an iya waray-limitasyon nga gahum basi masiguro nga matuman an iya kaburut-on. Sigurado gud nga maluluwas ni Jehova an iya katawohan salit may mga panahon nga ginagamit niya hira sugad nga paon basi malit-ag an iya mga kaaway. Ito an nahitabo han iya gintalwas an mga Israelita tikang ha pagkauripon ha Ehipto.

¹⁰ Bangin mga tulo ka milyon an mga Israelita nga binaya ha Ehipto. Ginsugo ni Jehova hi Moises nga pangunahan an mga Israelita ha paagi nga huhunahunaon ni Paraon nga naglalakat hira nga nawuwurok ngan nawawara. (Basaha an Eksodo 14:1-4.) Salit ginlanat hira ni Paraon ngan han iya kasundalohan ngan nakorner hira ha Dagat nga Pula. Baga hin waray na gud makakadtoan an mga Israelita para makatalwas. (Eks. 14:5-10) Kondi ha pagkamatuod, diri hira namimeligro. Kay ano? Kay andam hi Jehova ha pagluwas ha ira.

11, 12. (a) Paonan-o ginbuligan ni Jehova an mga Israelita? (b) Ano an resulta han pagbulig ni Jehova, ngan ano an igintututdo hito ha aton mahitungod kan Jehova?

¹¹ An “dampog nga daw harigi” nga nag-uuna ha mga Israelita binalhin ha ira luyo basi diri hira maabtan han kasundalohan ni Paraon. Tungod hito nga dampog nagsirom ha dapit han mga Ehiptohanon, kondi milagroso nga naghatag ito hin kapawa ha mga Israelita ha gab-i. (Basaha an Eksodo 14:19, 20.) Katapos, ginbahin ni Jehova an dagat pinaagi han makusog nga hangin tikang ha sinirangan “ngan ginhimo an dagat nga mamara nga tuna.” Sigurado nga maiha-iha an pagbuhat hito, kay an asoy nasiring nga an hangin nagpadayon “ha bug-os nga gab-i” ngan katapos hito, “an mga anak ni Israel napakadto ha butnga han dagat ha bawbaw han mamara nga tuna.” Kon itanding ha kasundalohan ni Paraon nga nakasakay ha ira mga karomata nga pan-girra, mahinay gud an pag-abante han mga Israelita. Pero imposible hira maabtan han mga Ehiptohanon, kay hi Jehova nakikig-away para ha Israel. “Ginsaramok niya an kasundalohan han mga Ehiptohanon. Ngan ginkuha niya an mga kaliding han ira mga karomata ha pakig-away, ngan hira nanaghimakuri pagpalakat hini.”—Eks. 14:21-25.

¹² Han nakatabok na an ngatanan nga Israelita ngadto ha luyo nga baybayon, ginsugo ni Jehova hi Moises: “Unata an imo kamot ha igbaw han dagat, basi an mga tubig bumalik liwat ha mga Ehiptohanon, ha ira mga karomata ha pakig-away, ngan ha ira mga kakabayohan.” Samtang naniniguro an kasundalohan nga diri hiabtan han naghahaganas nga tubig nga narumbo ha ira, “iginduso hira” ni Jehova ngadto ha butnga han dagat. Imposible na gud hira makatalwas. “Waray nahisalin ha ira bisan usa.” (Eks. 14:26-28; Maopay nga Sumat) Hito nga paagi iginpakita ni Jehova nga may-ada hiya gahum ha pagluwas ha iya katawohan ha anoman nga sitwasyon.

NAKATALWAS HA KABUNGKAGAN HAN JERUSALEM

13. Ano nga mga instruksyon an iginhatag ni Jesus, ngan ano an bangin ginhunahuna han iya mga sumurunod?

¹³ Maaram gud hi Jehova kon ano an mahitatabo basi matuman an iya katuyoan. Ginpapabug-atan ini ha ikatulo nga ehemplo nga aton hihisgotan: an paglikos han Romano nga kasundalohan ha Jerusalem han siyahan nga siglo. Basi matalwas an mga Kristiano nga naukoy ha Jerusalem ngan Judea antes ito bungkagon han 70 K.P., gin-gamit ni Jehova an iya Anak ha paghatag ha ira hin mga instruksyon. Hi Jesus nagsiring: “Kon makita niyo nga natindog ha baraan nga lugar an mangil-ad nga butang nga hinungdan han kabungkagan, sugad han gin-unabi ni propeta Daniel, . . . an aadto ha Judea pumalagiw ngadto ha kabukiran.” (Mat. 24:15, 16, NW) Kondi paonan-o hibabaroan han mga sumurunod ni Jesus nga natutuman na ito nga tagna?

14. Ano an mga nahitabo nga nagpatin-aw han karuyag sidngon han mga instruksyon ni Jesus?

¹⁴ Paglabay hin damu ka tuig, nagin matin-aw an karuyag sidngon han ginsiring ni Jesus. Han 66 K.P., an Romano nga kasundalohan nga ginpangunahan ni Cestius Gallus inabot ha Jerusalem basi pugngan an pagrebelde han pipira nga Judio. Han an mga rebelde nagtago ha sulod han templo, an Romano nga kasundalohan nagtikang pagguba han pader han templo. Para ha alerto nga mga Kristiano, matin-aw an iginpapasabot hito: An pagano nga kasundalohan nga may idolatroso nga mga bandera (“an mangil-ad nga butang”) nakaabot ha pader han templo (usa nga “baraan nga lugar”). Panahon na nga an mga sumurunod ni Jesus “pumalagiw ngadto ha kabukiran.” Pero paonan-o hira makakagawas ha syudad nga ginlikosan? May mahitatabo nga diri ginlalaoman.

15, 16. (a) Ano nga espisipiko nga instruksyon an iginhatag ni Jesus, ngan kay ano nga importante gud nga sundon ito han iya mga sumurunod? (b) Ha ano madepende an aton kaluwasan?

¹⁵ Ha diri hinbabaroan nga hinungdan, hi Cestius Gallus ngan an iya kasundalohan inatras ngan binaya ha Jerusalem. Ginlanat hira han mga rebelde. Tungod kay binaya na an nag-aaragway nga mga grupo, an mga sumurunod ni Jesus nagkaada higayon nga pumalagiw. Espisipiko nga ginsugo hira ni Jesus nga bayaan an ira mga panag-iya ngan pumalagiw dayon. (Basaha an Mateo 24:17, 18.) Kinahanglan gud ba hira gumios dayon? Waray pag-iha, nagin matin-aw an baton. Paglabay hin pipira la ka adlaw, binalik an mga rebelde ngan ginpirit an mga umurukoy ha Jerusalem ngan Judea nga umapi ha pagrebelde. Madagmit nga nagtikaraot an kahimtang ha Jerusalem samtang an magkakontra nga mga grupo han mga Judio nag-aaragway ha pagkontrol han syudad. Nagtikakuri na an pagbaya ha Jerusalem. Han binalik an mga Romano han 70 K.P., imposible na an pagpalagiw. (Luk. 19:43) An bisan hin-o nga nagpabilin didto diri na makakagawas! Kondi natalwas an mga Kristiano nga sinunod ha mga instruksyon ni Jesus ngan pinalagiw ngadto ha kabukiran. Hira mismo nakakita nga hi Jehova maaram kon paonan-o niya luluwason an iya katawohan. Ano nga leksyon an aton hibabaroan hini nga asoy?

¹⁶ Durante han daku nga kagol-anan, kinahanglan sundon han mga Kristiano an mga instruksyon tikang ha Pulong han Dios ngan ha iya organisasyon. Pananglitan, an sugo ni Jesus nga “pumalagiw ngadto ha kabukiran” aplikado liwat ha aton panahon. Diri kita maaram kon ha ano nga paagi kita mapalagiw.b Kondi makakasiguro kita nga ha husto nga panahon, ipapatin-aw ni Jehova an karuyag sidngon hito nga mga instruksyon. Tungod kay an aton kaluwasan madepende ha aton pagsunod, maopay nga pakianhan naton an aton kalugaringon: ‘Ano an akon reaksyon ha mga instruksyon nga iginhahatag ni Jehova ha iya katawohan yana? Nasunod ba ako dayon o nagruruhaduha pagsunod?’—Jak. 3:17.

GINPAPARIG-ON PARA HA MAHITATABO HA TIDARAON

17. Ano an aton hibabaroan ha tagna ni Habakuk mahitungod han tiarabot nga pag-atake ha katawohan han Dios?

¹⁷ Yana hisgotan na liwat naton an bug-os nga pag-atake ni Gog nga gin-unabi ha tinikangan. Ha tagna nga may kalabotan hito, hi Habakuk nagsiring: “Hinbabatian ko ini ngatanan ngan nangungurog ako; nangungurog hin kahadlok an akon mga im-im. Nahiraraptay an akon lawas, ngan nahipapakdol an akon mga tiil. Mahulat ako hin hilom han tiarabot nga panahon nga pagkakastigohon han Dyos adton mga nasulong ha amon.” (Hab. 3:16, Maopay nga Sumat) Bisan ha pakahibaro pa la han sumat mahitungod han tiarabot nga pag-atake ha katawohan han Dios, nangurog hi Habakuk ngan nanluya an iya lawas. Iginpapakita han iya reaksyon nga baga hin makuri gud an aton magigin kahimtang kon umatake na ha aton hi Gog ngan an iya mga sakop. Kondi hi Habakuk andam ‘maghulat hin hilom’ ha pag-abot han daku nga adlaw ni Jehova, nasarig nga luluwason ni Jehova an iya katawohan. Mahimo liwat kita magkaada sugad hito nga pagsarig kan Jehova.—Hab. 3:18, 19.

18. (a) Kay ano nga diri kita sadang mahadlok ha tiarabot nga pag-atake ha aton? (b) Ano an aton hihisgotan ha sunod nga artikulo?

¹⁸ Matin-aw nga iginpapakita han tulo nga ehemplo nga aton ginhisgotan nga maaram hi Jehova kon paonan-o niya luluwason an iya katawohan. An iya katuyoan diri mapapakyas; sigurado nga magdadaog hiya. Kondi basi makaapi ha pagselebrar hiton daku nga kadaogan, kinahanglan magpabilin kita nga matinumanon tubtob ha kataposan. Paonan-o kita ginbubuligan ni Jehova nga matipigan an aton integridad yana? Ito an hihisgotan ha sunod nga artikulo.

[Mga footnote]

[Retrato ha pahina 24]

Nameligro gud ba an mga Israelita ha kasundalohan ni Paraon?