Ngani Syambone Syaŵalembile Luka

3 M’chaka cha 15 cha ulamusi wa Kaisala Tibeliyo, Pontiyo Pilato jwalamulilaga chigawo* cha Yudeya, Helodi* jwalamulilaga chigawo cha Galileya. Filipo, mkulugwe Helodi, jwalamulilaga chigawo cha Ituleya ni Tilakoniti, soni Lusaniyo jwalamulilaga chigawo cha Abilene. 2 Mu ndaŵi jelejo Anasi jwaliji jwakulolela ŵakutaga mbopesi soni Kayafa jwaliji jwamkulungwa jwa ŵakutaga mbopesi. Pandaŵiji Mlungu ŵampele utenga Yohane mwanache jwa Sekaliya ali m’chipululu.

3 Sambano jwalakwe jwajesile m’misi josope jakusyungulila Yolodani. Ŵaliji mkulalichila kwa ŵandu kuti abatisidwe pakulosya kugalawuka mtima kwawo soni kuti akululuchidwe yakulemwa. 4 Ŵatesile yeleyi mwakamulana ni yaŵalembile jwakulochesya Yesaya m’buku jakwe kuti, “Jwine jwakwe akugumila m’chipululu kuti, ‘Alinganye chenene litala lya Yehofa! Ajongole misewu jakwe. 5 Asilile chiŵata* chilichose, soni amwasanye litumbi lililyose lyekulungwa soni lyamwana. Ajongole matala gepindiche, soni alinganye matala gesolechesoleche. 6 Ŵandu wosope chachichiwona chikulupusyo cha Mlungu.’”*

7 Sambano ŵandu ŵajinji ŵatandite kwika kwa Yohane kuti ŵabatisyeje. Myoyo jwalakwe jwatandite kwasalila ŵanduwo kuti, “Jemanja ŵanache ŵa majoka, ana ŵani ŵamkalamwisye kuti mtile ukali wa Mlungu wawukwikawo? 8 Myoyo msogoleje yisogosi yakulosya kugalawuka mtima. Mkatanda kuŵecheta kuti, ‘M’we tuli ŵanache ŵa Abulahamu.’ Pakuŵa ngumsalila kuti Mlungu mpaka ampanganyichisye Abulahamu ŵanache kutyochela ku maganga aga. 9 Sonitu liŵago lili kala pa lipata lya chitela. Myoyo, chitela chilichose changasogola yisogosi yambone chikusosekwa kuchikata ni kuchiponya pamoto.”

10 Pelepo ŵanduwo ŵamwusyaga jwalakwejo kuti, “Sambano tutende wuli pelepa?” 11 Jwalakwe ŵajangaga kuti, “Jwalijose jwakwete chakuwala chine amgaŵile mjakwe, soni jwalijose jwakwete chakulya atendesoni myoyo.” 12 Ŵakomesya msongo nombenawo ŵayikaga kuti abatisidwe, soni ŵamwusyaga kuti, “Mwalimu, sano tutende wuli?” 13 Jwalakwe ŵajangaga kuti, “Mkasimwalipisyaga ŵandu yakupunda msongo wawukusosechela.” 14 Nambosoni asilikali ŵamwusyaga jwalakwejo kuti, “Sambano m’weji tutende wuli?” Jwalakwe ŵasalile kuti, “Mkasimwalagasyaga ŵandu* kapena kumlambuchisya mundu jwalijose, nambo mjikutileje ni malipilo gamkusapochela.”

15 Sambano ŵandu ŵaliji mkwembecheya Klistu. Myoyo ŵaliji mkuliwusya m’mitima mwawo pakwamba ya Yohane kuti, “Ana kapena jweleju ni Klistu jula?” 16 Yohane ŵasalile ŵanduwo kuti, “Unetu ngum’batisya jemanja ni mesi, nambo jwine jwamachili kumbunda une akwika. Mundu jweleju une nganimba jwakuŵajilwa kugopola ngonji sya sapato syakwe. Jwalakwejo chachim’batisya jemanja ni msimu weswela soni ni moto. 17 Fosholo jakwe jakuwululuchisya masapi jili mmyala mwakwe kuti atyosye masapi gosope pamalo gakuputilapo mbeju. Tiligu chachimsonganganya ni kumŵika mu ngokwe, nambo masapi chachigajocha ni moto wele nganiwuŵa ukomboleche kuwusimisya.”

18 Jwalakwe ŵasalilesoni ŵanduwo maloŵe gejinji gakwalongolela, soni ŵapitilisye kulalichila ngani syambone kwa ŵandu. 19 Nambosoni jwalakwe ŵamjamwiche Helodi juŵaliji jwakulamulila jwa chigawocho, pakwamba ya Helodiya ŵaŵaliji ŵamkwakwe ŵa mkulugwe Helodi soni pakwamba ya yindu yakusakala yosope yaŵatesile Helodijo. 20 Konjechesya pelepa, Helodi ŵatesilesoni chindu chine chakusakala. Jwalakwe ŵamwugalile Yohane mu ndende.

21 Sambano ŵandu wosope paŵaliji mkubatisidwa, nombenajo Yesu ŵabatisidwe. Paŵaliji mkupopela, kwinani kwawugwiche, 22 soni msimu weswela wakuwoneka mpela ngunda wayiche pa jwalakwejo. Kaneko papikaniche maloŵe kutyochela kwinani gakuti, “Mmwe mli Mwanangu jwapamtima. Une ngusasangalala ni mmwejo.”

23 Sambano Yesu paŵatandaga masengo gakwe, jwakwete yaka chiŵandika 30. Ŵandu ŵamwonaga kuti jwalakwejo ali

mwanache jwa Yosefe.