Ana Uchimwene Wa Mlungu Uli Chichi?

 1. Ana chitukambilane lipopelo lyakumanyika lyapi?

ŴANDU ŵajinji akusalimanyilila lipopelo lyakumanyika mnope lyakolanjidwa kuti lipopelo lya Atati Ŵetu, kapena kuti Lipopelo lya Ambuje. Yesu ŵakamulichisye masengo lipopeloli pakwajiganya ŵakulijiganya ŵakwe mwampaka apopelele. Ana jwalakwe ŵasasile yatuli m’lipopeloli? Soni ligongo chichi lipopeloli lili lyakusosekwa mnope kwa m’weji moŵa agano?

 2. Ana yindu yitatu yapi yaŵatujiganyisye Yesu kuti tuyipopeleleje?

² Yesu ŵaŵechete kuti, “M’yoyo, pakupopela ajileje kuti, ‘Atati ŵetu ŵakwinani, lina lyawo liswejesyedwe. Uchimwene wawo uyiche. Yakusaka yawo yitendekwe pachilambo chapasi, mpela kwinani.’” (Aŵalanje Mateyu 6:9-13.) Ana ligongo chichi Yesu ŵatujiganyisye kuti tupopeleleje yindu yitatu yeleyi?—Alole Maloŵe gakumbesi 19.

 3. Ana tukusosekwa kumanyilila yatuli yakwamba Uchimwene wa Mlungu?

³ Tulijiganyisye kala kuti lina lya Mlungu lili Yehofa. Soni tutagulilene yakwamba chakulinga cha Mlungu kwa ŵandu ni chilambo chapasi. Nambo ana Yesu ŵagopolelaga chichi paŵatite, “Uchimwene wawo uyiche”? Mungani ajino chitulijiganye kuti ana Uchimwene wa Mlungu uli chichi, uchitenda yatuli, soni uchiswejesya chatuli lina lya Mlungu.

 4. Ana Uchimwene wa Mlungu uli chichi, soni Mwenye jwakwe ali ŵani?

⁴ Yehofa ŵatamilikasisye boma jakwinani ni ŵamsagwile Yesu kuŵa Mwenye jwa bomajo. Baibulo jikusajikolanga boma jeleji kuŵa Uchimwene wa Mlungu. Yesu ni jwali “Mwenye jwa ŵakulamulila mpela achayimwene soni Ambuje jwa ŵakulamulila mpela achambuje.” (1 Timoteo 6:15) Yesu ni jwampaka akombole kutenda yindu yambone yejinji kupunda jwakulamulila jwalijose jwaumundu. Jwalakwe akwete machili kupunda ŵakulamulila ŵaumundu wosope.

 5. Ana boma ja Mlungu jili kwapi, soni jichilamulila chichi?

⁵ Panyuma pa masiku 40 ali ajimwiche ku ŵawe, Yesu ŵawujile kwinani. Kaneko Yehofa ŵamsagwile jwalakwe kuŵa Mwenye jwa Uchimwene wakwe. (Masengo 2:33) Boma ja Mlungu jichilamulila chilambo chosope chapasi kutyochela kwinani. (Chiwunukuko 11:15) Lyeleli ni ligongo lyakwe Baibulo jikusawukolanga Uchimwene wa Mlunguwu kuŵa ‘uchimwene wa kwinani.’—2 Timoteo 4:18.

6, 7. Ana chichi chachikumtendekasya Yesu kuŵa jwambone kupunda mwenye jilijose jaumundu?

⁶ Baibulo jikusasala kuti Yesu ali jwakupunda mayimwene gosope gaumundu, ligongo jwalakwe “jika akwete umi wangawa.” (1 Timoteo 6:16) Mkupita kwandaŵi, ŵakulamulila ŵaumundu akusawaga, nambo Yesu ngasawa kose. Yindu yambone yachachitutendela Yesu ngasiyimala mpaka kalakala.

⁷ Yakulochesya ya m’Baibulo yikusati, Yesu chachiŵa Mwenye jwachilungamo soni jwachanasa, “Msimu wa Yehofa uchitamilichika pa jwalakwe, msimu wa lunda ni wakupikanichisya, wakwamuka, wamachili, wa umanyilisi ni wakogopa Yehofa, soni jwalakwe chachisangalala pakogopa Yehofa. Ngasalamula pakwamba kujigalila yayiweni ni meso gakwe, kapena kwamuka ligongo lyakujigalila yindu yagambile kuyipikana ni mawiwi gakwe. Chachilamula mwakulungamika ŵandu ŵakutuluka [ŵakulaga].” (Yesaya 11:2-4) Ana wawojo ngaŵa mkunonyela kuti mwenye jwawo jukole ndamo syelesi?

 8. Ana tukumanyilila chatuli kuti Yesu ngasalamulila jika?

⁸ Mlungu asagwile ŵandu ŵane kuti akalamulile yalumo ni Yesu mu boma jakwinaniji. Mwambone, ndumetume Paulo jwamsalile Timoteyo kuti, “Naga tukwendelechela kupilila, tuchilamulilasoni ni jwalakwe mpela mayimwene.” (2 Timoteo 2:12) Nambo ana ŵandu ŵalingwa ŵachachilamulila yalumo ni Yesu mpela mayimwene?

 9. Ana ŵandu ŵalingwa ŵachachilamulila yalumo ni Yesu? Ana Mlungu ŵatandite kwasagula chakachi?

⁹ Mpela mutwalijiganyile mu Mtwe 7, ndumetume Yohane ŵagaweni mesomkulola. M’mesomkulolago, jwalakwe ŵam’weni Yesu mpela Mwenye jwakwinani, yalumo ni mayimwene gane gakwana 144,000. Ana ŵandu ŵa 144,000 ŵeleŵa ali ŵani? Yohane akusala kuti jemanjaji “alembedwe lina lyakwe [lya Yesu] soni lina lya Atatigwe pawusyo pawo.” Jwalakwe akusalasoni kuti, “Ŵeleŵa ni ŵakusamkuya Mwanache Jwangondolo [jweleju ali Yesu] kulikose kwakwawula. Jemanjaji ŵasumidwe kutyochela kwa ŵandu.” (Aŵalanje Chiwunukuko 14:1, 4.) Ŵandu 144,000 ŵeleŵa, ali Aklistu ŵakulupichika ŵele Mlungu ŵasagwile kuti ‘chalamulile mpela mayimwene pachilambo chapasi’ yalumo ni Yesu. Jemanjaji pawile, akusajimuchila kwinani. (Chiwunukuko 5:10) Kutandila mu ndaŵi ja ŵandumetume, Yehofa aŵele ali mkusagula Aklistu ŵakulupichika kuti aŵe m’likuga lya mayimwene 144,000.

10. Ana ligongo chichi chili chinonyelo kuti Yehofa ŵasagwile Yesu soni ŵa 144,000 kuti chalamulile ŵandu?

¹⁰ Yehofa akusasamala mnope ya m’weji, lyeleli ni ligongo lyakwe jwalakwe alinganyisye yakuti ŵandu ŵane akalamulile yalumo ni Yesu. Yesu chachiŵa jwakulamulila jwambone ligongo akusatupikanichisya. Jwalakwe pakwete paŵaŵele mundu pachilambo chapasi soni kulaga akumanyi. Paulo ŵasasile kuti Yesu akusatupikanichisya, jwalakwe ‘akusapakombola kututendela chanasa pa yakulepela yetu,’ soni “ŵalinjidwe mu yindu yosope mpela m’weji.” (Ahebeli 4:15; 5:8) Nombe ŵa 144,000 pakwete paŵele ŵandu pachilambo chapasi. Jemanjaji aŵele mkulaga ni ungali umlama soni ulwele. M’yoyo mpaka tuŵe ŵakusimichisya kuti Yesu soni ŵa 144,000 ngasagamba kupikanichisya mwatuchipikanila pandaŵijo nambosoni chachipikanichisya yakusawusya yatuchilimbanaga nayo.

11. Ana ligongo chichi Yesu ŵajiganyisye ŵakulijiganya ŵakwe kuti apopeleleje kuti lisosa lya Mlungu litendekwe kwinani?

¹¹ Yesu ŵajiganyisye ŵakulijiganya ŵakwe kuti apopeleje kuti yakusaka ya Mlungu litendekwe kwinani. Ligongo chichi? Twalijiganyisye mu Mtwe 3 kuti Satana ŵamjimuchile Yehofa. Ali atesile yeleyi, Yehofa ŵamkundile jwalakwe soni malayika gangakulupichika kapena kuti yiwanda, kutama kwinani kwakandaŵi. M’yoyo, ngaŵa kuti malayika gosope gatendaga yakusaka ya Mlungu. Mu Mtwe 10, tuchilijiganya yejinji yakwamba Satana ni yiwanda.

12. Ana pa Chiwunukuko 12:10 akusasala yakutendekwa yiŵili yapi?

¹² Baibulo jikusasala kuti Yesu paŵagambile kuŵa Mwenye jwa Uchimwene wa Mlungu, jwaputile ngondo jakulimbana ni Satana. (Aŵalanje Chiwunukuko 12:7-10.) Ndime 10 jikusala yindu yiŵili yakusosekwa mnope yayatendekwe. Uchimwene wa Mlungu uli utandite kulamulila, Yesu ni jwaŵaŵele Mwenye jakwe, soni Satana ŵamtopwele kwinani ni kumponya pachilambo chapasi. Kusogoloku chitulijiganye muyatendechele yeleyi.

13. Ana kwinani kwaliji yamtuli Satana ali amtopwele?

¹³ Baibulo jikusasala kuti malayika gakulupichika gasangalele panyuma pakuti Satana ni yiwanda yakwe ayitopwele kwinani. Tukusaŵalanga kuti, “Sangalalani kwinani soni jemanja ŵamkutama kweleko!” (Chiwunukuko 12:12) Apano kwinani kwana mtendele mnope soni mkamulano ligongo jwalijose akutenda yakusaka ya Mlungu.

14. Ana pachilambo chapasi pakutendekwa yatuli ligongo lyakutopoledwa kwa Satana kwinani?

¹⁴ Nambo umi pachilambo chapasi waliji wakusawusya mnope. Ŵandu ŵasimene ni yakusawusya mnope ligongo ‘Satana ŵatuluchile kwa ŵandu’ soni ali “jwaukali mnope, ligongo akumanyilila kuti jimsigalile ndaŵi jamnono.” (Chiwunukuko 12:12) Satana ali jwakutumbila. Jwalakwe ŵamtopwele kwinani, ni akumanyilila kuti pachangakaŵapa chajonanjidwe. M’yoyo jwalakwe akutenda yiliyose yampaka akombole pakutendekasya yakusawusya pachilambo chosope chapasi.

15. Ana lisosa lya Mlungu lya chilambo chapasi lili lyamtuli?

¹⁵ Nambo chakulinga cha Mlungu lya chilambo chapasi nganilichenga. Jwalakwe akusakape kuti ŵandu ŵamlama chatame ni umi wangamala m’chilambo chapasi cha paladaiso. (Salimo 37:29) Nambo ana Uchimwene wa Mlungu uchikombola chamtuli kutenda yeleyi?

16, 17. Ana lilemba lya Daniele 2:44 likutusalila yamtuli pakwamba ya Uchimwene wa Mlungu?

¹⁶ Maloŵe ga pa Daniele 2:44 gakusati, “M’masiku ga achayimwene ŵelewo, Mlungu jwa kwinani chachitamilikasya uchimwene wangasiwujonasika ku ndaŵi josope. Uchimwene wakwe ngasiwupelechedwa kwa mtundu uliwose wa ŵandu, nambo uchikasa ni kugamasya mauchimwene gane gosopego. Nipo chiwuchitama kwandaŵi josope.” Ana maloŵe gelega gakutujiganya yatuli pakwamba ya Uchimwene wa Mlungu?

¹⁷ Chandanda, yikutusalila kuti Uchimwene wa Mlungu uchitanda kulamulila “m’masiku ga achayimwene ŵelewo.” Yeleyi yikugopolela kuti maboma gane ga pachilambo chapasi gachiŵa gali gapali pandaŵi jele Uchimwene wa Mlungu uchitanda kulamulila. Chaŵili, yikutusalila kuti Uchimwene wa Mlungu ngasiwumala soni pangali uchimwene wine wawuchijinjila m’malo mwakwe. Chatatu, pachiŵa ngondo pasikati pa Uchimwene wa Mlungu ni mauchimwene ga pachilambo chapasi. Nambo Uchimwene wa Mlungu uchipunda ni kulamulilaga pachilambo chosope chapasi. Ŵandu chachikola boma jambone janganajiwoneje chitandile.

18. Ana ngondo jakumalisya ja pasikati pa Uchimwene wa Mlungu ni maboma ga chilambochi jikusakolanjidwa chichi?

¹⁸ Nambo ana yichikomboleka chamtuli kuti Uchimwene wa Mlungu utande kulamulila m’malo mwa mauchimwene ga pachilambo chapasi? Mkanijiyiche ngondo jakumalisya, jakolanjidwa kuti Alamagedo, yiŵanda yichisokonasya “achayimwene ŵa pachilambo chosope chapasi kwakuli ŵandu, kuti ŵasonganganye pamo kungondo ja lisiku lyekulungwa lya Mlungu Jwamachiligosope.” M’yoyo, maboma ga ŵandu gachilimbana ni Uchimwene wa Mlungu.—Chiwunukuko 16:14, 16; alole Maloŵe Gakumbesi 10.

19, 20. Ana ligongo chichi tukusosechela Uchimwene wa Mlungu?

¹⁹ Ligongo chichi tukusosechela Uchimwene wa Mlungu? Pana magongo gatatu. Ligongo lyandanda lili lyakuti, m’weji tuli ŵakulemwa, m’yoyo tukusalwala soni kuwa. Nambo Baibulo jikusatusalila kuti mu Uchimwene wa Mlungu tuchitama kwangamala. Lyeleli ni ligongo lyakwe lilemba lya Yohane 3:16 likusati, “Mlungu ŵachinonyele mnope chilambo chapasi mwati ŵapeleche Mwanagwe jwakupagwa jika, kuti jwalijose jwakukulupilila mwa jwalakwe akajonasika nambo akole umi wangamala.”

²⁰ Ligongo lyaŵili lyatukusosechela Uchimwene wa Mlungu lili lyakuti chilambochi, chigumbele ni ŵandu ŵakusakala. Ŵajinji mwa jemanjaji akusalambusyaga soni akusatendaga yachikululu. M’weji ngaŵa mkwatenda chilichose jemanjaji, nambo Mlungu ni juchachimalana nawo. Ŵandu ŵakwendelechela kutenda yakusakala chachajonaga pa Alamagedo. (Aŵalanje Salimo 37:10.) Ligongo lyatatu lyatukusosechela Uchimwene wa Mlungu lili lyakuti maboma ga ŵanduga gangali machili, gali gangasa, soni gali gachinyengo. Mabomaga gangayikosya yakwakamuchisya ŵandu kuti apikanileje Mlungu. Baibulo jikusati “mundu ampweteche mjakwe mwakumlamulila.”—Jwakulalichila 8:9.

21. Ana Uchimwene wa Mlungu uchilolechesya chamtuli kuti yakusaka ya Mlungu yitendekwe pachilambo chapasi?

²¹ Panyuma pa Alamagedo, Uchimwene wa Mlungu uchilolechesya kuti chakulinga cha Mlungu litendekwe pachilambo chapasi. Mwambone, Uchimwenewu uchimjonaga Satana ni yiwanda yakwe. (Chiwunukuko 20:1-3) Kaneko, pangali mundu jwachachilwalaga soni kuwa. Ligongo lya chiwombolo cha Yesu, ŵandu chachipakombola kutama kwangamala m’Paladaiso. (Chiwunukuko 22:1-3) Uchimwenewu uchiswejesya lina lya Mlungu. Ana yeleyi yikugopolela chichi? Yigopolela kuti Uchimwene wa Mlungu pawuchilamulilaga pachilambo chapasi, ŵandu wosope chachilichimbichisya lina lya Yehofa.—Alole Maloŵe Gakumbesi 20.

22. Ana tukumanyilila chatuli kuti Yesu nganaŵa Mwenye paŵaliji pachilambo chapasi, soni najimukape kuŵawe?

²² Yesu ŵajiganyisye ŵakulijiganya ŵakwe kupopelelaga kuti, “Uchimwene wawo uyiche.” M’yoyo, yaliji yangakayikasya kuti boma ja Mlungu jaliji jakuti jichiyika kusogolo. Yehofa ŵasosekwaga kutamilikasya kaje bomajo soni nikumsagula Yesu kuŵa Mwenye ja bomajo. Ana Yesu ŵapochele Uchimwenewu paŵagambile kwawula kwinani? Iyayi, jwalakwe ŵasosekwaga kulindilila kaje. Pali papite ndaŵi chijimuchile Yesu, Petulo ni Paulo ŵasasile mwakupikanika chenene yakulochesya yakwamba Yesu, yayili pa Salimo 110:1. Mu yakulochesyayo, Yehofa ŵasasile kuti, “Tamani kumkono wangu wamlyo mpaka patinjaŵika adani ŵenu mpela chakuliŵatapo sajo syenu.” Ana Yesu ŵasosekwaga kulindilila kwandaŵi jelewu chamtuli Yehofa mkanam’ŵiche kuŵa Mwenye?

23. (a) Ana Yesu ŵatandite chakachi kulamulila mpela Mwenye jwa boma ja Mlungu? (b) Ana mumtwe wakuyichisya tuchilijiganya yamtuli?

²³ Kwa yaka yejinji mkanichiyiche chaka cha 1914, likuga lya Aklistu ŵakuwona mtima lyapikanichisye kuti chaka cha 1914 chaliji chaka chakusosekwa mu yakulochesya ya m’Baibulo. Yindu yayatendekwaga pachilambo chosope kutandila m’chakachi, yasimichisye kuti yaŵayipikanichisyeyo yaliji yisyesyene. M’chakachi, Yesu ŵatandite kulamulila mpela Mwenye. (Salimo 110:2) Panyuma pakuŵa Mwenye, Yesu ŵamponyisye Satana pachilambo chapasi. Nambo sambano jwalakwe “jimsigalile ndaŵi jamnono.” (Chiwunukuko 12:12) Mumtwe wakuyichisya tuchilola maumboni gamajinji gakulosya kuti tukutama mundaŵi jamnonoji. Tuchilijiganyasoni kuti pachangakaŵapa Uchimwene wa Mlungu uchilolechesya kuti yakusaka ya Mlungu yitendekwe pachilambo chapasi.—Alole Maloŵe Gakumbesi 21.