MALOŴE GAKUMBESI

Lina lya Mlungu lyakuti Yehofa likusagopolelaga kuti “Jwalakwe akusayitendekasya yindu kupagwa.” Yehofa ali Mlungu jwamachili gosope soni jwalakwe ni juŵapanganyisye yindu yosope. Jwalakwe akwete machili gakutenda yiliyose yakusaka.

Mu Chihebeli, lina lya Mlungu ŵalilembaga ni yilembo mcheche. Mu Chisungu yilemboyi yili YHWH kapena JHVH. Mu Chihebeli chaŵakamulichisye masengo pakulemba Baibulo linali lyasimanikwaga ndaŵi syakwana 7,000. Pachilambo chosope ŵandu akusalikolangaga lina lyakuti Yehofa mwakulekanganalekangana mwakamulana ni chiŵecheto chawo.

▸ Mtwe 1, ndime 15

Jwakulemba jusyesyene jwa Baibulo ali Mlungu, nambo jwalakwe ŵakamulichisye masengo ŵandu kuti ajilembe. Yeleyi mpaka tuyilandanye ni nganga jwam’ŵendile mwanache kuti amlembele chikalata. Mlungu ŵakamulichisye masengo msimu wakwe weswela pakwalongolela ŵakulemba Baibulo kuti alembe nganisyo syakwe. Msimuwu walongolelaga ŵakulemba Baibulowo m’matala gakulekanganalekangana. Ndaŵi sine watendekasyaga kugawona mesomkulola kapena kusagamila ni kaneko jemanjajo ŵalembaga yayiweni soni yasagamileyo.

▸ Mtwe 2, ndime 5

Fundo syelesi sili yijiganyo ya m’Baibulo yayikusasala ya usyesyene. Mwambone, songa mpela jakuti “kusyoŵekana ni ŵandu ŵakusakala kukusajonanga ndamo syambone,” jikusatujiganya kuti ŵandu ŵatukusakunguluka nawo mpaka atutendekasye kuti tuŵe ŵandu ŵambone kapena ŵakusakala. (1 Akolinto 15:33) Soni songa jakuti “Chilichose chamisile mundu chachigowola chichocho” jikusatujiganya kuti mundu ngaŵa mkutila yakuyichisya ya yitendo yakwe.—Agalatiya 6:7.

▸ Mtwe 2, ndime 12

Yili utenga wakutyochela kwa Mlungu. Komboleka kuŵa wakwamba chakulinga lya Mlungu, kwajiganya ŵandu ndamo, wakwalamula ŵandu yakusosekwa kutenda, kapena kwelusya ŵandu. Soni komboleka kuŵa utenga wakwamba ya yindu yakutendekwa msogolo. Yakulochesya yejinji ya m’Baibulo yikwanilichikwe.

▸ Mtwe 2, ndime 13

Yesu ni juŵakwanilisye yakulochesya yejinji yakwamba Mesiya. Alole libokosi lyakuti “Yakulochesya Yakwamba Mesiya.”

▸ Mtwe 2, ndime 17, soni Maloŵe ga mwiŵanda

Yehofa ŵapanganyisye chilambochi kuti chiŵe malo gakusalala gakutama ŵandu ŵakusamnonyela. Chakulinga chakwechi nganichichenga. Pachangakaŵapa Mlungu chachityosya yakusakala yosope soni chachapa ŵandu wakwe umi wangamala.

▸ Mtwe 3, ndime 1

Satana ali lilayika lyalyatandisye kumjimuchila Mlungu. Jwalakwe akusakolanjidwa kuti Satana kugopolela kuti “Jwakusisya” ligongo akusalimbana ni Yehofa. Jwalakwe jwaŵelesoni jwakulambusya jwakusasala ya unami yakwamba Mlungu soni kwalambusya ŵandu.

▸ Mtwe 3, ndime 4

Yehofa ŵagapanganyisye malayika kalakala mkanapanganye chilambo chapasi. Mlungu ŵagapanganyisye malayikaga kuti gatameje kwinani. Pana mamiliyoni gamajinji ga Malayika. (Daniele 7:10) Gakwete mena soni ndamo syakulekanganalekangana, soni malayika gakulupichika gakusakanaga kuti ŵandu agalambileje. Gakwete maudindo soni gakusakamulaga masengo gakulekanganalekangana. Gane mwamasengo gagakusatendaga gali kutumichila kuchitengu chauchimwene cha Yehofa, kupeleka mautenga, kwachenjela soni kwalongolela ŵakutumichila ŵa Mlungu pachilambo chapasi, kupeleka chilango, soni gakusakamuchisya nawo masengo gakulalichila. (Salimo 34:7; Chiwunukuko 14:6; 22:8, 9) Kusogoloku malayika gachiputa ngondo yalumo ni Yesu. Ngondoji jikusakolanjikwa kuti Alamagedo.—Chiwunukuko 16:14, 16; 19:14, 15.

▸ Mtwe 5, ndime 5; Mtwe 10, ndime 1

Ulemwa uli chilichose chatukusaganichisya soni kutenda chachili chakulekangana ni chakulinga lya Yehofa. Ligongo lyakuti ulemwa ukusajonanga unasi wetu ni Mlungu, jwalakwe atupele malamusi soni songa sya m’Baibulo syakutukamuchisya kuti tuŵambaleje kutenda ulemwa mwamele. Pandanda, yindu yosope yaŵayipanganyisye Yehofa yaliji yamlama. Nambo Adamu ni Hawa paŵasagwile kuti akampikanila Yehofa, ŵalemwisye soni nganaŵa ŵamlama. Jemanjajo ŵakalambele soni ŵawile. M’yoyo ligongo lyakuti m’weji twajigalile ulemwa kwa Adamu nombesoni tukusakalambala ni kuwa.

▸ Mtwe 3, ndime 7; Mtwe 5, ndime 3

Jili ngondo ja Mlungu jajichijonanga chilambo cha Satana soni kumasya yakusakala yosope.

▸ Mtwe 3, ndime 13; Mtwe 8, ndime 18

Uchimwene wa Mlungu uli boma jatamilikasisye Yehofa kwinani. Yesu Klistu ni jwali Mwenye jwakwe. Msogolomu, Yehofa chachikamulichisya masengo Uchimwenewu pakutyosya yakusakala yosope. Uchimwene wa Mlungu uchilamulila chilambo chosope chapasi.

▸ Mtwe 3, ndime 14

Mlungu ŵampanganyisye Yesu mkanapanganye chilichose. Yehofa ŵamtumisye Yesu pachilambo chapasi kukwawila ŵandu wosope. Yesu ali awulajidwe, Yehofa ŵamjimwisye. Sambano jino Yesu akulamulila kwinani mpela Mwenye jwa Uchimwene wa Mlungu.

▸ Mtwe 4, ndime 2

Baibulo jalochesye kapena kuti jasasile mkanipaŵe ya ndaŵi jachachiyika Mesiya. Ndaŵiji jaliji kumbesi kwa ndaŵi jajikusakolanjikwa kuti yijuma 69. Yijuma yeleyi yatandile m’chaka cha 455 B.C.E. soni yamasile m’chaka cha 29 C.E.

Ana tukusamanyilila chamtuli kuti yijumayi yamasile m’chaka cha 29 C.E.? Yijumayi yatandile m’chaka cha 455 B.C.E. M’chakachi, Nehemiya ŵayiche ku Yelusalemu ni kutanda masengo gakutaŵasoni msindawu. (Daniele 9:25; Nehemiya 2:1, 5-8) chijuma chikusakola masiku 7. Nambo yakulochesya yeleyi ngayikwamba ya yijuma yakola masiku 7, nambo yikwamba ya yijuma yakola yaka 7. Yeleyi yili m’yoyo mwakamulana ni kaŵalanjile ka yaka ka yakulochesya ya m’Baibulo kakuti “lisiku likusajimila chaka.” (Numeli 14:34; Esekiele 4:6) Yeleyi yikugopolela kuti chijuma chilichose chana yaka 7 soni kuti yijuma 69 yikutenda yaka 483. Kapena kuti Yijuma 69 kuyitupiya ka 7. Naga tukuŵalanjila yaka 483 kutyochela m’chaka cha 455 B.C.E., yikutuyikasya m’chaka cha 29 C.E. Chelechi chili chaka chele Yesu ŵabatiswe soni ŵaŵele Mesiya.—Luka 3:1, 2, 21, 22.

Yakulochesyayi yajonjechesyesoni chijuma chimo, yayili yaka yine 7. Mkati mwa ndaŵi jeleji, m’chaka cha 33 C.E., Mesiya chachiwulajidwa, soni kutandila m’chaka cha 36 C.E., utenga wambone wa Uchimwene uchiŵa uli ulalichidwe ku mitundu josope ja ŵandu, ngaŵa kwa Ayudape.—Daniele 9:24-27.

▸ Mtwe 4, ndime 7

Baibulo jikusajiganya kuti Yehofa Mlungu ni jwali Mkupanganya soni kuti jwalakwe ni juŵampanganyisye Yesu mkanapanganye chilichose. (Akolose 1:15, 16) Yesu nganaŵa Mlungu. Jwalakwe nganasala kuti ali jwakulandana ni Mlungu. M’malo mwakwe, jwalakwe ŵasasile kuti, “Atati ali ŵakulungwa kupunda une.” (Yohane 14:28; 1 Akolinto 15:28) Nambo dini sine sikusajiganya kuti mwa Mlungu jumo mwana Milungu jitatu; Atati, Mwanache soni msimu weswela. Nambo chijiganyo cha “Utatu” kapena kuti mwa Mlungu jumo mwana Milungu jitatu changasimanikwaga m’Baibulo. Chijiganyo chelechi chili chaunami.

Msimu weswela uli machili gakamula masengo ga Mlungu. Gali machili gakwe gangawoneka gakusagakamulichisya masengo pakutenda yakusaka. Msimuwu nganiwuŵa Mlungu. Mwambone, Aklistu ŵa mu yaka 100 yandanda “ŵagumbalilwe ni msimu weswela,” soni Yehofa ŵaŵechete kuti, “chinjiwupungulila msimu wangu kwa ŵandu ŵakulekanganalekangana.”—Masengo 2:1-4, 17.

▸ Mtwe 4, ndime 12; Mtwe 15, ndime 17

Ligongo chichi Aklistu ŵasyesyene ŵangakamulichisya masengo mtanda pakumlambila Mlungu?

1. Dini jaunami jiŵele jili mkamulichisya masengo mtanda kwandaŵi jelewu pakulambila. Kalakala ŵandu ŵawukamulichisyaga masengo pakulambila yakupanganyikwa soni pamiteto jakwayana ni yagonana jaŵatendaga ŵandu ŵanganaŵa Aklistu. Kwa yaka 300 kutyochela paŵawile Yesu, Aklistu nganakamulichisyaga masengo mtanda pakulambila. Nambo mkupita kwandaŵi, Jwakulamulila jwa chiloma jwakolanjidwa kuti Constantine ŵatandisye yakuti mtanda uwe chimanyilo cha Aklistu. Ŵakamulichisyaga masengo mtanda pakusaka kuti chiklistu chiŵe chakumanyikwa mnope. Nambo mtanda nganiwukola mkamulano uliwose ni Yesu. Buku jine jikusati, “Mtanda wasimanikwaga ni ŵandu, Chiklistu mkanichitande soni kwa ŵandu ŵanganaŵa Aklistu.”—New Catholic Encyclopedia.

2. Yesu nganawila pamtanda. Maloŵe gakusagakolanga ŵandu kuti mtanda, mu chigiliki gakusagopolela “chitela chegoloche,” “litabwa,” kapena “chitela.” Buku jine jikusati, “M’Malemba ga chigiliki [chilangano chasambano] pangali palipose papakusasalaga ya yitela yiŵili yepinjikanye.” (The companion Bible) M’yoyo Yesu jwawilile pachitela chegoloche.

3. Yehofa jwangasaka kuti tukamulichisyeje masengo yiwanichisyo kapena yimanyilo patukumlambila.—Ekisodo 20:4, 5; 1 Akolinto 10:14.

▸ Mtwe 5, ndime 12

Yesu ŵalamwile ŵakulijiganya ŵakwe kuti atendeje chikumbuchilo cha chiwa chakwe. Jemanjaji akusatendaga yeleyi chaka chilichose palisiku lyele Ayuda akusalikolanga kuti Nisani 14. Lisikuli ni lyelesoni Ayisalayeli ŵatendaga Pasaka. Mkate soni finyo yayikusajimila chilu soni miyasi ja Yesu akusayijendesya kwa jwalijose jwayiche pa chikumbuchilo. Ŵachachilamulila yalumo ni Yesu akusalyaga soni kumwa finyo. Ŵandu ŵakwete chembecheyo chakutama ni umi wangamala pachilambo chapasi akusasimanikwapo pakuchimbichisya chakutendekwacho nambo jemanjaji ŵangalya mkate kapena kumwa finyo.

▸ Mtwe 5, ndime 21

Ŵandu ŵajinji akusaganisya kuti mundu pawile chindu chine chikusajendelechela kutama ni umi ku malo gane. Nambo Baibulo jikusajiganya kuti ŵandu soni yinyama mbesi jawo jili jakulandana. (Jwakulalichila 3:19, 20) Mundu pawile, ngaŵa mkupakombola kupumula mpweya, ganisya, kum’ŵenga mundu, kumnonyela mundu, kumkamuchisya kapena kum’wulasya.—Jwakulalichila 9:5, 6, 10.

Maloŵe gakuti msimu mpaka gasalejesoni ya yakupanganyikwa yausimu kapena msimu weswela wawuli machili gakamula masengo ga Mlungu. Baibulo jangajiganya kuti pawile mundu chindu chine chikusajendelechela kutama ni umi.—Ekisodo 35:21; Salimo 104:29; Mateyu 12:43; Luka 11:13.

▸ Mtwe 6, ndime 5; Mtwe 15, ndime 17

Jehena lili lina lya chiŵata chachili chiŵandika ni msinda wa Yelusalemu, kwele yiswani ŵayijochagako. Pangali umboni wakulosya kuti mundaŵi ja Yesu kumaloga yinyama soni ŵandu ŵaliji mkwalagasya kapena kwajocha ŵachijumi. M’yoyo Jehena jangajimila malo gasyesyene gakuwoneka gakwalagachisya soni kwajocha ŵandu ŵawile mpaka kalakala. Yesu paŵasalaga ya ŵandu ŵaŵaponyisye ku Jehena ŵagopolelaga kuti ŵanduwo chachijonanjidwa kwene.—Mateyu 5:22; 10:28.

▸ Mtwe 7, ndime 20

Lyeleli lyaliji lipopelo lyele Yesu ŵapopesile paŵaliji mkwajiganya ŵakulijiganya ŵakwe mwampaka apopelele. Likusakolanjikwasoni kuti lipopelo lya Atati Ŵetu kapena lipopelo lyachisyasyo. Mwambone, Yesu ŵajiganyisye kuti tupopeleje chamti m’yi:

• “Lina lyawo liswejesyedwe”

  Tupopeleje kwa Yehofa kuti aswejesye lina lyakwe, kapena mbili jakwe ku yaunami yosope yakusam’ŵechetela. Tukusosekwa kupopelela yeleyi kuti jwalijose kwinani soni pachilambo chapasi alichimbichisye lina lya Mlungu.

• “Uchimwene wawo uyiche”

  Tupopeleje kuti boma ja Mlungu jijonanje chilambo chakusakala cha Satanachi, soni kuti bomajo jilamulile pachilambo chosope chapasi soni kulinganya chilambochi kuŵa paladaiso.

• “Chakulinga chawo chitendekwe pachilambo chapasi”

  Tupopeleje kuti chakulinga cha Mlungu cha chilambo chapasi chikwanilichikwe kuti ŵandu ŵakupikanila chatame ni umi wamlama m’chilambo cha paladaiso, mpela muŵasachilaga Mlungu paŵapanganyaga ŵandu..

▸ Mtwe 8, ndime 2

Yehofa ŵatuwombwele pakusaka kwakulupusya ŵandu ku ulemwa ni chiwa. Kuwombolaku kwaliji mtengo wawasosekwaga kulipilila umi waŵajasile Adamu, soni kuwuchisya unasi wawajonasiche pasikati pa ŵandu ni Yehofa. Mlungu ŵamtumile Yesu pachilambo kukwawila ŵandu wosope ŵakulemwa. Ligongo lya chiwa cha Yesu, ŵandu wosope akwete upile wakutama ni umi wangamala soni kuŵa ŵamlama.

▸ Mtwe 8, ndime 21; Mtwe 9 ndime 13 13

Yakulochesya yayili m’buku ja Daniele mtwe 4 yikutujiganya kuti Mlungu ŵatamilikasisye Uchimwene wakwe mu 1914.

Yakulochesya: Yehofa ŵampele Mwenye Nebukadinesala yakulochesya kupitila m’sagamisi syakwamba chitela chekulungwa chachagwisidwe. M’sagamisimo, chisichi cha chitelacho ŵachitaŵile ni ngwambala sya chisyano kuti chikasipuka kwandaŵi syakwana “msano ni siŵili.” Kaneko chitelacho chichisipukasoni.—Daniele 4:1, 10-16.

Ana yakulochesyayi yikugopolela chichi kwetuwe? Chitelacho chikwimila ulamusi wa Mlungu. Kwa yaka yejinji, Yehofa ŵakamulichisyaga masengo mayimwene ga ku Yelusalemu pakulamulila mtundu wa Ayisalayeli. (1 Mbili 29:23) Nambo mayimwenega galiji gangakulupichika, m’yoyo ulamusi wawo wamasile. Yelusalemu jwajonanjidwe m’chaka cha 607 B.C.E. M’chakachi ni pasyatandile ndaŵi “msano ni siŵili.” (2 Ayimwene 25:​1, 8-10; Esekiele 21:25-27) Yesu paŵasasile kuti, “Yelusalemu chachiliŵatidwaliŵatidwa ni mitundu jine,” jwalakwe ŵasalaga ya ndaŵi “msano ni siŵili.” (Luka 21:24) M’yoyo ndaŵi “msano ni siŵili” nganisimala pandaŵi jele Yesu ŵaliji pachilambo chapasi. Yehofa ŵasasile kuti chachisagula Mwenye kumbesi kwandaŵi “msano ni siŵili.” Ulamusi wa Mwenye jwasambano jwali Yesu, uchiyikasya upile wekulungwa kwa ŵandu wosope ŵa Mlungu pachilambo chosope chapasi.—Luka 1:30-33.

Ulewu wa ndaŵi “msano ni siŵili”: Ndaŵi “msano ni siŵili” syaliji sya yaka 2,520. Naga tukuŵalanjila yaka 2,520 kutyochela m’chaka cha 607 B.C.E. sikusatuyikasya m’chaka cha 1914. M’chakachi Yehofa ŵam’ŵisile Yesu jwali Mesiya kuŵa Mwenye jwa Uchimwene wa Mlungu kwinani.

Nambo ana yaka 2,520 tuyiijigele kwapi? Baibulo jikusati ndaŵi sitatu ni litika sili masiku 1,260. (Chiwunukuko 12:6, 14) M’yoyo ndaŵi sitatu ni litika kusitupiya kaŵili sikutupa ndaŵi “msano ni siŵili,” kapena kuti masiku 2,520. M’yoyo masiku 2,520 gali gakulandana ni yaka 2,520. Yeleyi yili m’yoyo ligongo lyakuti kaŵalanjile ka yaka ka yakulochesya ya m’Baibulo kakusati “lisiku likusajimila chaka.”—Numeli 14:34; Esekiele 4:6.

▸ Mtwe 8, ndime 23

Baibulo jikusagambaga kusala ya jwamkulungwa jwa malayika jumo, jwele lina lyakwe lili Mikayeli.—Daniele 12:1; Yuda 9.

Mikayeli ali Mlongola jwa malayika gakulupichika ga Mlungu. Lilemba lya Chiwunukuko 12:7 likusati, “Mikayeli ni malayika gakwe ŵamenyene ni chimjoka, . . . ni malayika gakwe.” Buku ja Chiwunukuko jikusasala kuti Mlongola jwa asilikali ŵa Mlungu ali Yesu. M’yoyo Mikayeli lili lina line lya Yesu.—Chiwunukuko 19:14-16.

▸ Mtwe 9, ndime 4

Maloŵe gelega gakusasalaga ya ndaŵi ja yakutendekwa yekulungwakulungwa yayichitendekwaga pachilambo chapasi, Uchimwene wa Mlungu mkanujonanje chilambo cha Satanachi. Maloŵe gakulandana ni gelega gali, “mbesi ja ndaŵi ajino” soni “kuŵapo kwa Mwanache jwa mundu.” Yakulochesya ya m’Baibulo yikusakamulichisya masengo maloŵega payikusala ya masiku gambesi. (Mateyu 24:3, 27, 37) “Masiku gambesi” gatandite Uchimwene wa Mlungu uli utandite kulamulila kwinani m’chaka cha 1914, soni gachimala chilambo cha Satanachi ali achijonasile pa Alamagedo.—2 Timoteo 3:1; 2 Petulo 3:3.

▸ Mtwe 9, ndime 5

Kukusatendekwa naga Mlungu awuchisyesoni umi wa jwam’we. Baibulo jikusasalaga ya ŵandu 9 ŵaŵajimwiche ku ŵawe. Nambosoni Eliya, Elisa, Yesu, Petulo, soni Paulo, ŵajimwisyepo ŵawe. Jemanjaji ŵakombolaga kutenda yakusimonjesyayi ligongo lya machili ga Mlungu. Yehofa ŵasasile kuti chachijimusya “ŵakulungama ni ŵangalungama ŵakwe” kuti chatameje ni umi pachilambo chapasi. (Masengo 24:15) Baibulo jikusasalasoni kuti ŵandu ŵane chachajimusya kuti akatame kwinani. Yeleyi yikusatendekwa kwa ŵandu ŵasagulidwe ni Mlungu kuti akatameje ni Yesu kwinani.—Yohane 5:28, 29; 11:25; Afilipi 3:11; Chiwunukuko 20:5, 6.

▸ Mtwe 9, ndime 13

Kutenda yamisimu jili ndamo jakusakala jele mundu akusakamulana ni misimu jakusakala. Mundu mpaka akamulaneje najo jika kapena kupitila mwa mundu jwine. Mpaka atende yeleyi kupitila mwa sing’anga jwa misimu, jwakuŵecheta ni ŵawe. Ŵandu ŵakusatendaga yamisimu akusatendaga yeleyi ligongo lyakuti akusakulupilila chijiganyo chaunami chakuti mundu pawile msimu wakwe ukusajendelechela kuŵa chijumi soni akusasukaga chindu chakogoya. Misimu jakusakala jikusijatendekasya ŵandu kuti akampikanila Mlungu. Mitundu jine jakulupilila misimu jili, kulupilila ndondwa, kulondola chisango, usaŵi, kulupilila kulila kwa yijuni, soni kutenda yamasenga. Mabuku, mafidiyo, yikwangwani, soni atamose nyimbo yikusatendekasya ŵandu kuyiwonaga kuti kutenda yamisimu kwangali chakusawusya chilichose soni kuli kwakusangalasya. Panasoni miyambo jejinji ja pamalilo, mpela kupeleka mbopesi kwa ŵawe, yindimba yakumbuchila ŵawe. Nambosoni misyungu jine jajikusatendekwa kwa jwamkongwe kapena jwamlume jwele ŵamkwakwe ajasiche, kulindilila malilo kuti pakayika misimu jakusakala, yosopeyi yili kulupilila misimu jakusakala. Ŵandu akusakamulichisya masengo mitela pakusaka kupata machili ga misimu jakusakala.—Agalatiya 5:20; Chiwunukuko 21:8.

▸ Mtwe 10, ndime 10; Mtwe 16, ndime 4

Yehofa ali Mlungu Jwamachiligose, soni jwalakwe ni juŵapanganyisye yindu yosope. (Chiwunukuko 15:3) Lyeleli ni ligongo lyakwe jwalakwe ali Msyene jwa yindu yosope soni ni jwakwete ulamusi wosope pa yakupanganyikwa yakwe. (Salimo 24:1; Yesaya 40:21-23; Chiwunukuko 4:11) Jwalakwe jwapeleche malamusi ku yindu yosope yaŵayipanganyisye. Yehofa akwetesoni machili gakusagula ŵane kuti aŵe ŵakulamulila. Mpaka tulosye kuti tuli kumbali ja ulamusi wekulungwa wa Mlungu naga tukusamnonyela soni kumpikanila.—1 Mbili 29:11.

▸ Mtwe 11, ndime 10

Kwasa chitumbo kuli kuwulaga mwanache jwanganaŵe kupagwa. Kwangatendekwa mwangosi soni kwangatendekwa ligongo lya yakusawusya yine yam’chilu mwa mundu. Kutandila pandaŵi jele jwamkongwe ajigele chitumbo, mwanachejo akusaŵaga mundu pajika, ngakusaŵaga mbali ja chilu cha mamagwewo.

▸ Mtwe 13, ndime 5

Kuli litala lyakusalikamulichisya masengo ŵachipatala lyele jwakulwala akusampakaga miyasi jamtundu kapena mbali syakwe mcheche syekulungwakulungwa. Miyasiji mpaka jityochele kwa mundu ni kumpa ndaŵi jijojo kapena mpaka jisunjidwe nikumpa mundu pandaŵi jine. Mbali mcheche syekulungwakulungwa sya miyasi sili, mesi ga m’miyasi, maselo gechejewu, maselo geswela, soni maselo gakamuchisya kuti miyasi jileche kopoka.

▸ Mtwe 13, ndime 13

Mu Baibulo maloŵe gakuti chamuko gangagopolelape kuti chilango. Naga atupele chamuko nikuti akutusalila yatukusosekwa kutenda, kutujiganya, soni kutujongolela. Yehofa jwangapeleka chamuko mwachipongwe soni mwangasae. (Misyungu 4:1, 2) Yehofa akusiŵapaga achinangolo chisyasyo chambone pakupelaka chamuko. chamuko chakusapeleka Yehofa chikusaŵa chakamula mtima mwati mundu akusachinonyelaga. (Misyungu 12:1) Yehofa akusiŵanonyelaga ŵandu ŵakwe, ni ligongo lyakwe akusiŵajiganyaga. Jwalakwe akusiŵasalilaga ŵandu ŵakwe yakusosekwa kutenda kuti ajongolele nganisyo syakulemwecheka soni kwakamuchisya kuti aganisyeje ni kutendaga yindu yakumnonyelesya jwalakwe. Kwa achinangolo chamuko mpaka chipwatichepo kwakamuchisya ŵanache wawo kupikanichisya magongo gakusosechela kuŵa ŵakupikanila. Mpaka chigopolelesoni kwajiganya ŵanache kumnonyela Yehofa, nambosoni Maloŵe gakwe, gagali Baibulo, soni kupikanichisya fundo sya m’Baibulo.

▸ Mtwe 14, ndime 13

Yili yakupanganyikwa yakusakala yausimu nambo yikwete machili kupunda ŵandu. Misimuji jili malayika gakusakala. Jaŵele jakusakala ligongo lyakuti jalitesile kuŵa adani ŵa Mlungu ligongo lyakuti nganijimpikanila Mlungu. (Genesesi 6:2; Yuda 6) Jakamulene ni Satana pajamjimuchile Yehofa.—Detulonomo 32:17; Luka 8:30; Masengo 16:16; Yakobo 2:19.

▸ Mtwe 16, ndime 4