NGANI JAKULIJIGANYA 8
Yampaka Atende Kuti Asangalaleje Pakusimana ni Yakulingwa
“Achalongo achimjangu mŵeje ŵakusengwa pimkusimangana ni yakumlinga yejinji.”—YAK. 1:2.
NYIMBO NA. 111 Magongo Gakuŵela Ŵakusangalala
YACHITULIJIGANYEa
1-2. Mwakamulana ni lilemba lya Mateyu 5:11, ana tuyiwoneje mwamtuli yakulingwa?
YESU ŵasalile ŵakumkuya ŵakwe kuti chachiŵa ŵakusangalala yisyesyene. Nambope ŵakalamwisyesoni kuti chachisimana ni yakulingwa yejinji. (Mat. 10:22, 23; Luk. 6:20-23) Tukusasangalala mnope ligongo lyakuŵa ŵakulijiganya ŵa Klistu. Ana akusapikana wuli ŵandu ŵa mwiŵasa mwawo pakwasisya, ŵaboma pakwalagasya kapena achimjawo ŵakusukulu soni kumasengo pakwakanganichisya kuti atende ndamo syakusakala? Mwangakayichila yindu yeleyi mpaka yatendekasyeje kuti alagasicheje nganisyo.
2 Ŵandu akusayiwona kuti mundu nganaŵa aŵele jwakusangalala pakulagasidwa. Nambope, Maloŵe ga Mlungu gakusatusalila kuti tusangalaleje patukulagasidwa. Mwachisyasyo, Yakobo jwalembile kuti mmalo mwakutamila kudandawula, tukusosekwa tusangalaleje patukusimana ni yakulingwa. (Yak. 1:2, 12) Nombenajo Yesu jwasasile kuti tukusosekwa kuŵa ŵakusangalala atamose ŵane pakutulagasya. (Aŵalanje Mateyu 5:11.) Ana mpaka tuŵe ŵakusangalala chamtuli patukusimana ni yakulingwa? Mpaka tulijiganye yejinji panganiji patukulola yaŵalembile Yakobo mu chikalata chakwawula kwa Aklistu ŵa m’yaka 100 yandanda. Nambo kwende tukambilane kaje yakusawusya yaŵasimene nayo Aklistuŵa.
ANA AKLISTU ŴA M’YAKA 100 YANDANDA ŴASIMENE NI YAKULINGWA YAMTULI?
3. Ana chatendekwe chichi pandaŵi jele Yakobo jwaŵele jwakulijiganya jwa Yesu?
3 Yakobo juŵaliji jwachibale jwa Yesu paŵagambile kuŵa mklistu, Aklistu ku Yelusalemu ŵatandite kulagasidwa mnope. (Mase. 1:14; 5:17, 18) Soni pandaŵi jaŵawulajidwe jwakulijiganya Sitefano, Aklistu ŵajinji ŵatisile ku Yelusalemu. Jemanjaji “ŵapwilinganile m’yilambo ya Yudeya ni Samaliya,” mwamti kaneko ŵajawile ku Saipulasi soni ku Antiokeya. (Mase. 7:58–8:1; 11:19) Kusala yisyene, ŵakulijiganyaŵa ŵasimene ni yakusawusya yejinji. Nambopetu jemanjaji ŵapitilisye kulalichila ngani syambone kulikose kwaŵajawulaga, mwamti mipingo jatamilikasidwe mudela josope jajalamulidwaga ni ulamusi wa Loma. (1 Pet. 1:1) Nambotu yili yitendekwe yeleyi, Aklistuŵa ŵasimenesoni ni yakusawusya yine.
4. Ana ni yakusawusya yine yapi yaŵasimene nayo Aklistu ŵa m’yaka 100 yandanda?
4 Cha m’ma 50 C.E, Aklistu ŵasimene ni yakusawusya yejinji. Mwachisyasyo, Mwenye Klaudiyo ŵalamwile Ayuda wosope kuti atyoche m’chilambo cha Loma. Myoyo, Ayuda ŵaŵaŵele Aklistu ŵasosekwaga kutyoka ni kuleka majumba gawo kuti akatameje kumadela gane. (Mase. 18:1-3) Cha m’ma 61 C.E, Paulo jwalembile kuti Aklistu achimjakwe ŵatendeledwaga yachipongwe ŵane ali mkulola, ŵaŵisile mu ukayidi soni katundu jwawo jwasumulidwe. (Aheb. 10:32-34) Mpela mwayikusaŵela ni ŵandu ŵane, Aklistu ŵane ŵaliji ŵakulaga soni ŵalwalaga.—Alo. 15:26; Afil. 2:25-27.
5. Ana chitukambilane kwanga kwa yiwusyo yapi?
5 Yakobo jwalembile chikalata chakwe chaka cha 62 C.E mkanichikwane. Pandaŵi jiŵalembaga chikalatachi, jwalakwe jwamanyililaga chenene yakusawusya yaŵasimanaga nayo abale ni alongo. Yehofa ŵamsalile Yakobo kulemba chikalatachi pakusaka kwalimbikasya Aklistu kuti aŵeje ŵakusangalala atamose pakusimana ni yakulingwa. Uli tukambilane yindu yine yaŵalembile Yakobo. Kaneko tupate kwanga kwa yiwusyo ayi, Ana kusangalala kwa ŵakusasile Yakobo kukusagopolela chichi? Ana chichi champaka chimtendekasye Mklistu kuti akasangalalaga? Ana lunda, chikulupi soni kulimba mtima mpaka yitukamuchisye chamtuli kuŵa ŵakusangalala atamose patusimene ni yakulingwa?
ANA CHICHI CHACHIKUSATENDEKASYA AKLISTU KUŴA ŴAKUSANGALALA?
Mpela lilamba lya moto lyalikusakolela mkati mwa nyali ja ligalasi, nombe kusangalala kwakusapeleka Yehofa kukusaŵa kuli mkukolela mumtima mwa Mklistu (Alole ndime 6)
6. Mwakamulana ni lilemba lya Luka 6:22, 23, ligongo chichi Mklistu mpaka aŵe jwakusangalala pakusimana ni yakulingwa?
6 Ŵandu ŵajinji akusayiwona kuti mpaka aŵe ŵakusangalala naga chilu chawo chili chenene, naga akwete mbiya syejinji soni naga liŵasa lyawo likwenda chenene. Nambo kusangalala kwaŵasasile Yakobo kuli mbali ja chisogosi cha msimu weswela soni kwangadalila mwayikwendela yindu paumi wetu. (Agal. 5:22) Mklistu mpaka aŵe jwakusangalala yisyesyene ligongo lyakumanyilila kuti yakusatenda yikusamsangalasya Yehofa soni kuti akusamsyasya Yesu. (Aŵalanje Luka 6:22, 23; Akolo. 1:10, 11) Mpela mwayikusaŵela ni lilamba lya moto lyalikusakolela mkati mwa nyali ja ligalasi, nombe nako kusangalala kwa Aklistu kukusaŵa kwakutyochela mumtima. Atamose pandaŵi jele akulwala kapena panganakola mbiya, Mklistu akusapitilisyape kuŵa jwakusangalala. Sonitu kusangalala kweleku kwangamalaga atamose achimjawo soni ŵa mwiŵasa mwawo ŵanyosyeje kapena kwasisya. Mmalo mwakutamila kudandawula, tukusapitilisya kuŵa ŵakusangalala pakutusisya. Pakutulagasya ligongo lya chikulupi chetu, yikusalosya kuti tuli ŵakulijiganya ŵasyesyene ŵa Klistu. (Mat. 10:22; 24:9; Yoh. 15:20) Ni ligongo lyakwetu Yakobo ŵalembile kuti, “Achalongo achimjangu mŵeje ŵakusengwa pimkusimangana ni yakumlinga yejinji.”—Yak. 1:2.
Ligongo chichi yakulingwa mpaka tuyilandanye ni moto wakusakamulichisya masengo pakusyanila chisyano? (Alole ndime 7)b
7-8. Ligongo chichi chikulupi chetu chikusawa chakulimba patukusimana ni yakulingwa?
7 Yakobo ŵasasilesoni chindu chine chachikusatendekasya Aklistu kupilila atamose pakulinjidwa mnope. Jwalakwe ŵatite, “Kulinjikwa kwa chikulupi chenu kukusamtendekasya kuŵa ŵakupilila.” (Yak. 1:3) Yakulingwa mpaka tuyiwanichisye ni moto wakusawukamulichisya masengo pakusyanila chisyano kuti chiŵe chakutema mnope. Chisyanochi pachiŵisile pamoto kaneko ni kuchityosya kuti chisisime, chikusaŵa chakulimba mnope. Mwakulandana ni yeleyi, patukupilila yakulingwa chikulupi chetu chikusalimba mnope. Ni ligongo lyakwe Yakobo ŵalembile kuti, “Kupimilila kweleku, kukamuleje masengo gakwe ndaŵi syosope, kuti jemanja msimanikwe mli ŵangali ulemwa soni chakumsisya nacho chilichose.” (Yak. 1:4) Chikulupi chetu chikusaŵa chakulimba patukusimana ni yakulingwa. Yeleyi yikusatutendekasya kupilila kwineku tuli mkusangalala.
8 Nambope, Yakobo ŵalembilesoni yindu yine yampaka yitutendekasye kuti tukasangalalaga. Ana yindu yakwe yili yapi, soni ana mpaka tutende wuli kuti tumalane nayo?
KUMALANA NI YAKUSAWUSYA YAMPAKA YITUTENDEKASYE KUTI TUKASANGALALAGA
9. Ligongo chichi tukusasosechela lunda?
9 Yampaka yitutendekasye kuti tukasangalalaga: Pangatukumanyilila yampaka tutende. Patukusimana ni yakulingwa tukusosekwa kumŵenda Yehofa kuti atukamuchisye kusagula yindu yampaka yimsangalasye, yampaka yakamuchisye abale ni alongo ŵetu soni yampaka yitukamuchisye kuŵa ŵakulupichika. (Yel. 10:23) Tukusasosechela lunda kuti tumanyilile yampaka twajanje ŵakusatusisya. Nambo naga ngatukumanyilila yampaka tutende tukusatanda kulagasika nganisyo soni kuliwona kuti tuli jikajikape. Yeleyi mpaka yitutendekasye kuti tukasangalalaga.
10. Ana lilemba lya Yakobo 1:5, likutusalila kuti tukusosekwa kutenda chichi naga tukusaka kola lunda?
10 Yampaka tutende kuti tusangalaleje: Tumŵendeje Yehofa kuti atupe lunda. Kuti tukombole kupilila yakulingwa, tumŵendeje Yehofa kuti atupe lunda ni chakulinga chakuti tusagule chenene yindu. (Aŵalanje Yakobo 1:5.) Ana tukusosekwa kutenda chichi naga tukuyiwona kuti Yehofa ngakwanga mapopelo getu mwachitema? Yakobo ŵasasile kuti tukusosekwa kupitilisya ‘kumŵenda’ Mlungu. Yehofa ngakusatumbila pakutuwona tuli mkupitilisya kumŵenda lunda. Atati ŵetu ŵakwinani akusapeleka mwangawumila patukwaŵenda lunda ni kuti tukombole kupilila yakulingwa. (Sal. 25:12, 13) Yehofa akusayiwona yakusawusya yatukusasimana nayo soni akusatutendela chanasa mwamti ali jwakusachilila kutukamuchisya. Yeleyitu yikusatutendekasya kuŵa ŵakusangalala. Nambo ana Yehofa akusatendasoni chichi pakusaka kutupa lunda?
11. Ana ni yindu yine yapi yatukusosekwa kutenda kuti tukole lunda?
11 Yehofa akusatupa lunda kupitila m’Maloŵe gakwe. (Mis. 2:6) Kuti tukole lunda, tukusosekwa kulijiganya Maloŵe ga Mlungu soni mabuku getu gakusala ngani sya m’Baibulo. Nambo mmalo mwagamba kumanyilila yindu yayili m’Baibulo, tukusosekwa tuyitendeje yindu yatulijiganyisyeyo. Yakobo ŵalembile kuti, ‘Mkagambaga kugapikanila Maloŵe ga Mlungu, nambo mtendeje yagakuti maloŵego.’ (Yak. 1:22) Patukutenda yindu yatulijiganyisye m’Maloŵe ga Mlungu, tuchiŵa ŵa mtendele, ŵakuganisya chenene soni ŵachanasa. (Yak. 3:17) Ndamo syelesi sichitukamuchisya kuti tupilileje patukusimana ni yakulingwa soni kuti tuŵeje ŵakusangalala.
12. Ligongo chichi tukusosekwa kujimanyilila chenene Baibulo soni kamulichisya masengo yajikusasala?
12 Maloŵe ga Mlungu gali mpela ligalasi, mwamti gakusatukamuchisya kumanyilila yindu yatukusosekwa kuchenga. (Yak. 1:23-25) Mwachisyasyo, panyuma pakulijiganya Maloŵe ga Mlungu, mpaka tumanyilile kuti tukusosekwa kuŵambala kutumbila chitema. Yehofa mpaka atukamuchisye kuti tuŵe ŵakuwusimana mtima patukutenda yindu ni ŵandu soni patusimene ni yindu yampaka yitutendekasye kutumbila. Ligongo lyakuti tuli ŵakuwusimana mtima, tukusatenda yindu mwalunda patusimene ni yakusawusya. Nambosoni tukusaganisya chenene, yayikusatukamuchisya kuti tusagule yindu mwalunda. (Yak. 3:13) Myoyo tukusosekwa kujimanyilila chenene Baibulo soni kukamulichisya masengo yajikusasalagayo.
13. Ligongo chichi tukusosekwa kulijiganya yisyasyo ya ŵandu ŵakusiŵasala m’Baibulo?
13 Ndaŵi sine tukusalijiganya yindu yatukusosekwa kuyiŵambala tuli tulemwisye kala. Nambo kulijiganya mwalitala lyeleli kuli kwakupweteka mnope. Litala lyambone lya mpaka tupatile lunda kuli kulijiganya kutyochela payindu yambone soni yakulemwecheka yaŵatesile ŵandu ŵane. Ni ligongo lyakwe Yakobo ŵatulimbikasisye kuti tulijiganyeje kutyochela pa yisyasyo ya m’Baibulo mpela Abulahamu, Lahabi, Yobu soni Eliya. (Yak. 2:21-26; 5:10, 11, 17, 18) Jemanjaji, ŵakombwele kupilila yakulingwa yaŵasimanaga nayo yayikatendekasisye kuti akasangalalaga. Kupilila kwa jemanjaji kukusatukamuchisya kumanyilila kuti Yehofa mpaka atukamuchisye kuti tukomboleje kupilila yakulingwa.
14-15. Ligongo chichi tukusosekwa kuŵambala kayichila yatukusakulupilila?
14 Yampaka yitutendekasye kuti tukasangalalaga: Kuyikayichila yatukusakulupililaga. Ndaŵi sine mpaka yitusawusyeje kupikanichisya chenene yindu yine yajikusasala Baibulo. Mwinesoni mpaka yisimanikwe kuti Yehofa ngakwanga mapopelo getu mwatusachileje. Yeleyi mpaka yitutendekasye kuti tutande kukayichila. Naga tukunda kuti kukayichila kutamilichikwe mumtima mwetu, chikulupi chetu chikusatanda konasika. Yeleyi mpaka yijonanjesoni unasi wetu ni Yehofa. (Yak. 1:7, 8) Kaneko mpaka tuleche kwembecheya yindu yambone yamsogolo.
15 Ndumetume Paulo ŵasasile kuti chembecheyo cha yindu yamsogolo chili mpela nangula. (Aheb. 6:19) Nangula akusakamuchisya kuti liboti likajendagajendaga naga kuli kwana chimbungo chamachili. Nangulaju akusakamula masengo naga chingwe chataŵile ku liboticho nganichikutuka. Mpela mwayikusaŵela kuti mkuwo ukusajonanga chingwe chakusataŵila ku nangula, nombe kukayichila mpaka kujonanje chikulupi chetu. Mundu jwakusakayichila yakusakulupilila, pasimene ni ŵakusisya mpaka aleche kulupilila yaŵasasile Yehofa. Chikulupi chetu pachimasile machili, chembecheyo chetu chikusamalasoni. Ni ligongo lyakwe Yakobo ŵasasile kuti, “Mundu jwakusakayichilakayichila ali mpela matumbela ga pa nyasa gagakusajawula kwajikupujila mbungo.” (Yak. 1:6) Mundu jwakusakayichila chamti myiyi, nganaŵa aŵele jwakusangalala amta panandi.
16. Ana tukusosekwa kutenda chichi naga tukusakayichila yatukusakulupilila?
16 Yampaka tutende kuti tusangalaleje: Aleche kukayichila soni alimbisyeje chikulupi chawo. Akatendaga yindu mwakupupuluma. Mu ndaŵi ja jwakulochesya Eliya, ŵandu ŵa Yehofa ŵatandite kukayichila ya chikulupi chawo. Nambope Eliya ŵasalile kuti, “Naga AMBUJE ni ŵali Mlungu mwalambile ŵelewo. Nambo naga Baala ni jwali Mlungu, mumlambileje jwalakwejo.” (1 Ayi. 18:21) Yeleyi ni yatukusosekwa kutenda masiku agano. Tuwungunyeje ni kupata maumboni gakuti Yehofa ali Mlungu, soni kuti Baibulo jili Maloŵe gakwe nambosoni kuti ŵa Mboni sya Yehofa ali ŵandu ŵakwe. (1 Ates. 5:21) Kutenda yindu yeleyi mpaka kutukamuchisye kuti tukakayichilaga, soni mpaka kulimbisye chikulupi chetu. Nambo naga tukusaka chikamuchisyo kuti tuleche kukayichila ya yindu yatukusakulupilila mpaka twawusye achakulungwa wa mumpingo. Tukusosekwa kutenda yeleyi mwachitema ni chakulinga chakuti tupitilisye kuŵa ŵakusangalala patukumtumichila Yehofa.
17. Ana mpaka chitendekwe chichi naga tulesile kuŵa ŵakulimba mtima?
17 Yampaka yitutendekasye kuti tukasangalalaga: Yakutengusya. Maloŵe ga Mlungu gakusasala kuti, “Naga ukwasa mtima pati usimene ni yisawusyo, ni kuti ugwejo machili gakwe gakunandipa.” (Mis. 24:10) Maloŵe ga Chihebeli gaŵagagopolele kuti “naga ukwasa mtima” mpaka gagopolelesoni “kuŵa ŵangalimba mtima.” Mundu palesile kuŵa jwakulimba mtima, nombe kusangalala kukusamalila papopo.
18. Ana kupilila kukusagopolela chichi?
18 Yampaka tutende kuti tusangalaleje: Tumdalileje Yehofa kuti atukamuchisye kuŵa ŵakulimba mtima soni ŵakupilila. Tukusasosekwa kuŵa ŵakulimba mtima kuti tupilile yakulingwa. (Yak. 5:11) Maloŵe gaŵakamulichisye masengo Yakobo pakusala ya ‘kupilila’ gakusasala ya mundu jwajimi pa malo ganegakwe mwangatenganyika. Maloŵega gakusatutendekasya kuganichisya ya msilikali jwakulimba mtima jwakulimbana ni adani ŵakwe. Atamose yindu payisaŵisye jwalakwe ngakusatila.
19. Ana chisyasyo cha Paulo chikutujiganya chichi?
19 Ndumetume Paulo ali chisyasyo chambone mnope pangani jakulimba mtima soni kupilila. Ndaŵi sine jwasimanaga ni yindu yayamtengusyaga. Nambope Paulo jwapililaga yakusawusyayi, yaliji myoyo ligongo Yehofa ŵampaka machili. (2 Akoli. 12:8-10; Afil. 4:13) Naga tuli ŵakulinandiya soni kumanyilila kuti Yehofa ni jwakusosekwa kutukamuchisya patukusimana ni yakusawusya nikuti tuchiŵa ŵakulimba mtima soni ŵamachili.—Yak. 4:10.
AMŴANDICHILE MLUNGU SONI AŴEJE ŴAKUSANGALALA
20-21. Ana mpaka tuŵe ŵakusimichisya ya chichi?
20 Mpaka tuŵe ŵakusimichisya kuti yakulingwa yatukusasimana nayo nganichiŵa chilango chakutyochela kwa Yehofa. Yakobo ŵatusalile kuti, “Naga jwine akulinjidwa akasaŵecheta kuti, “Ngulinjidwa ni Mlungu,” ligongo Mlungu jwangalinjidwa ni yangalumbana nambo soni Mlungu msyene ngaŵa mkumlinga jwalijose.” (Yak. 1:13) Naga tukusakulupilila yeleyi nikuti mpaka tuŵe paunasi wambone ni Atati ŵetu ŵakwinani.—Yak. 4:8.
21 Yehofa ‘ngakusachenga.’ (Yak. 1:17) Jwalakwe ŵakamuchisye Aklistu ŵa m’yaka 100 yandanda paŵasimanaga ni yakulingwa. Yehofa mpaka amkamuchisye jwalijose masiku agano. Myoyo amŵendeje Yehofa kuti ŵape lunda, kuti akole chikulupi soni kuti aŵe ŵakulimba mtima. Jwalakwe chachijanga mapopelo gawo. Yeleyi yichakamuchisya kusimichisya kuti Yehofa chachakamuchisya kuti aŵeje ŵakusangalala pakupilila yakulingwa.
NYIMBO NA. 128 Tupilile Mpaka Kumbesi
a Buku ja Yakobo jikwete malangiso gambone gampaka gatukamuchisye patukusimana ni yakulingwa. Nganiji jikusala malangiso gane gaŵatupele Yakobo. Malangisoga mpaka gatukamuchisye kuŵa ŵakupilila patukusimana ni yakusawusya soni kuŵa ŵakusangalala patukumtumichila Yehofa.
b KULONDESYA YIWULILI Peji: Ŵapolisi ayiche kukumtaŵa m’bale pa nyumba jakwe. Ŵamkwakwe soni mwanache jwakwe jwamkongwe akulola ŵapolisiŵa pakumjigala m’baleju. M’baleju pali kundende, abale ni alongo ŵa mumpingo wakwe ayiche kukutenda kulambila kwa peŵasa ni liŵasa lyakwe. Ŵamkwakwe m’baleju soni mwanache jwakwe jwamkongwe akusamŵenda Yehofa kuti ŵakamuchisye kupilila. Yehofa akwakamuchisya kuti aŵe ŵakulimba soni kuti akole mtendele wa mumtima. Yeleyi yikwakamuchisya kuti asangalaleje pakupilila yakulingwa.