彼得后书

3 亲爱嘅朋友，呢封系我写俾你哋嘅第二封信。好似上一封信噉，我提醒你哋，系想激发你哋嘅思考力*， 2 令你哋紧记忠心嘅先知以前讲过嘅说话*，仲有拯救我哋嘅主通过使徒传俾你哋嘅诫命。 3 首先，你哋已经清楚知道一件重要嘅事：喺最后嘅日子，会有钟意嘲讽嘅人嚟取笑你哋。佢哋顺住私欲作恶， 4 仲话：“佢承诺会返嚟我哋呢度*，噉佢喺边度呀？其实，由我哋嘅祖先长眠以嚟，所有嘢都同最初创世嗰阵一模一样。”

5 佢哋专登无视呢个事实：喺远古嘅时候就有天同地。凭住上帝嘅话语*，就出现咗稳固嘅大地，部分露出水面，部分处于水中， 6 亦都因为呢一切，当时嘅世界俾洪水淹没，就毁灭咗嘞。 7 但系，凭住同样嘅话语，而家嘅天地被保存落嚟，直到嗰啲藐视上帝嘅人受审判、被毁灭嘅日子，就会用火摧毁。

8 但系，亲爱嘅朋友，唔好忽略呢个事实：喺耶和华*眼中，一日如同千年，千年如同一日。 9 耶和华*履行承诺，从来唔拖延*。有啲人以为佢拖延，其实佢系对你哋有耐心，因为佢唔希望任何一个人被毁灭，而系希望人人最终都悔改。 10 不过，耶和华*嘅日子会好似贼一样嚟到。到时天会喺一声巨响*之中消灭，各种元素会因为极热而销毁，地同地上嘅嘢都会暴露无遗。

11 既然呢一切都会噉样销毁，谂吓你哋应该做点样嘅人吖！你哋应该有圣洁嘅品行，虔诚*嘅行为， 12 等待耶和华*嘅日子临到，紧记呢个日子迫近*。到时，天会喺火焰之中消灭，各种元素都会因为极热而熔化。 13 但系我哋根据佢嘅承诺，等待嘅系新天新地，新天新地嘅一切都系正义嘅*。

14 亲爱嘅朋友，既然你哋等待紧呢啲事，就要竭尽全力，最终令自己喺上帝眼中毫无污点、毫无瑕疵、和睦安宁。 15 你哋亦都要将我哋主嘅耐心视为得救嘅机会。其实，我哋亲爱嘅弟兄保罗，都曾经用上帝俾佢嘅智慧写信俾你哋。 16 佢所有信都讲过呢啲事。不过佢信入面有啲地方唔容易理解，嗰啲无知*又唔坚定嘅人就歪曲呢啲说话，好似歪曲其他经文噉，结果佢哋就自取灭亡嘞。

17 所以，亲爱嘅朋友，既然你哋预先知道呢啲事，就要小心，唔好俾无法无天嘅人用错误嘅道理将你哋引入歧途，令你哋唔再继续坚定不移噉*行走正道。 18 希望你哋喺我哋嘅主同救主耶稣基督嗰度，得到越嚟越多嘅分外恩典同知识。愿荣耀归于佢，由而家直到永远。阿们。