哥林多前書

10 各位弟兄，你哋都知道，以前我哋嘅祖先喺雲下面穿過紅海， 2 佢哋都喺雲下面同埋海裡面受浸，同摩西聯合。 3 佢哋食嘅都係上帝所賜嘅食物， 4 飲嘅都係上帝所賜嘅水。佢哋飲嘅水係嚟自上帝所賜嘅磐石。呢塊伴隨佢哋嘅磐石，指嘅就係*基督。 5 不過佢哋大多數人都令上帝唔高興，結果死喺曠野。

6 呢啲事成為我哋嘅前車之鑑，警告我哋：唔好貪戀惡事，好似佢哋一樣。 7 唔好拜偶像，好似佢哋有啲人做嘅噉。關於呢啲人，聖經噉樣寫：「人民坐低飲飲食食，又狂歡作樂。」 8 唔好淫亂*，好似佢哋有啲人噉樣，一日就死咗2萬3000人。 9 唔好試探*耶和華*，好似佢哋有啲人噉做，就俾蛇咬死。 10 唔好成日埋怨，好似佢哋有啲人一樣，就俾上帝嘅天使*處死。 11 佢哋嘅遭遇都成為前車之鑑，仲寫低落嚟，警告我哋呢啲面臨各個制度終結嘅人。

12 所以，自以為企得穩嘅人要小心，以免跌倒。 13 你哋遇到嘅引誘，其實其他人都遇到。上帝係信實可靠嘅，佢唔會俾你哋面對一啲你哋忍受唔到嘅引誘。面對引誘嘅時候，佢會打開出路，等你哋忍耐得住。

14 所以，我親愛嘅朋友，你哋要遠遠避開拜偶像嘅行為。 15 我認為你哋係明辨事理嘅人，所以噉樣講。我講得啱唔啱，你哋自己判斷嘞。 16 我哋用感恩嘅杯嚟感謝上帝，唔係就係一齊領受基督嘅血咩？我哋將餅搣開嚟食，唔係就係一齊領受基督嘅身體咩？ 17 餅只有一個，我哋大家都分享同一個餅，所以我哋雖然人數好多，仍然係一個身體。

18 請諗吓血統上嘅以色列人吖。佢哋食祭壇上嘅祭牲，咪就係同上帝一齊吃喝囉。 19 我講嘅係咩意思呢？我係咪話獻俾偶像嘅祭牲或者偶像本身好重要呢？ 20 唔係。我意思係列國嘅人獻祭，係獻俾邪靈，唔係獻俾上帝。所以，我唔希望你哋同邪靈有任何關係。 21 你哋唔可以攞耶和華*嘅杯嚟飲，又攞邪靈嘅杯嚟飲；唔可以享用「耶和華*嘅宴席」，又享用邪靈嘅宴席。 22 「我哋係咪想激起耶和華*嘅憤怒*吖？」我哋根本冇能力承受佢嘅憤怒。

23 凡事都可以做，不過唔係樣樣都有益處。凡事都可以做，不過唔係樣樣都能夠鼓勵人。 24 每個人都要時刻為人著想，唔好淨係諗自己。

25 喺市場賣嘅肉，你哋都可以食，唔使為自己嘅良心追問啲肉係邊度嚟嘅， 26 因為「大地同大地嘅一切，都屬於耶和華*」。 27 如果唔係信徒嘅人請你哋食飯，而你哋都想去，噉擺喺面前嘅食物，你哋都可以食，唔使為自己嘅良心追問啲乜嘢。 28 不過，如果有人同你哋講「呢啲嘢係獻過俾偶像嘅」，為咗呢個人，亦都為咗良心嘅緣故，你哋就唔應該食嘞。 29 我所講嘅唔係你嘅良心，而係嗰個人嘅良心。雖然我有自由噉做，但係我唔想因為令其他人良心不安而俾人指責。 30 就算我食嘅時候係懷住感恩之心，但係如果會引起批評，我係咪仲要噉做呢？

31 所以，你哋無論係吃喝定係做其他事，一切都要為上帝嘅榮耀而做。 32 無論係猶太人，希臘人*定係上帝嘅會眾，你哋都唔好成為佢哋嘅絆腳石， 33 反而要好似我一樣，做任何事都唔係淨係諗自己，而係為大家著想，令大家開心，希望佢哋可以得救。