啟示錄

21 我見到新天新地。以前嘅天、以前嘅地已經消失，海都冇埋。 2 我亦都見到聖城新耶路撒冷由上帝嗰度從天而降，好似新娘為新郎打扮好自己，準備妥當。 3 我聽到寶座嗰度有一個洪亮嘅聲音，話：「睇吓！上帝嘅帳幕喺人間，佢會同人一齊住，佢哋要做佢嘅子民。上帝要親自同佢哋同在。 4 上帝要抹走佢哋每一滴眼淚，唔再有死亡，亦都唔再有悲傷、哀哭、痛苦。以前嘅事已經過去嘞。」

5 坐喺寶座嗰位話：「睇吓！而家我更新一切。」佢又話：「你要寫低呢啲說話，呢啲說話都係真嘅，係可靠*嘅。」 6 佢同我講：「全部都實現喇！我係阿爾法，亦都係奧米加*；我係開始，亦都係終結。邊個口渴，我都會將生命水嘅泉源嘅水，不求回報噉*賜俾佢飲。 7 戰勝嘅人會得到呢啲福分，我要做佢嘅上帝，佢要做我嘅仔。 8 至於膽怯嘅、不信嘅、可憎嘅、殺人嘅、淫亂*嘅、通靈嘅、拜偶像嘅，同埋所有講大話嘅，佢哋嘅下場就係被揼入燒住烈火硫磺嘅湖裡面。呢個湖象徵第二種死亡。」

9 嗰七個分別拎住碗，碗裡面裝滿最後七場災禍嘅天使當中，有一個嚟同我講：「嚟吖，我帶你去睇吓新娘，佢係綿羊羔嘅妻子。」 10 於是，佢用神聖力量帶我去到一座雄偉嘅高山，俾我睇到聖城耶路撒冷由上帝嗰度從天而降。 11 呢座城有上帝嘅榮耀，光芒四射，好似極之貴重嘅寶石，亦都好似晶瑩剔透嘅碧玉石。 12 城牆又高又大，有12道門，12道門前面都有個天使，門上面寫住以色列12個部族嘅名。 13 東面有3道門，北面有3道門，南面有3道門，西面有3道門。 14 城牆有12塊基石，上面有綿羊羔12個使徒嘅12個名。

15 同我講說話嘅嗰位拎住一條金色嘅蘆葦，要度一度嗰座城，仲有城門同埋城牆。 16 城係正方形嘅，長同闊都一樣。佢用蘆葦度一度嗰座城，係1萬2000斯塔迪安*，長、闊、高都相等。 17 佢亦都度吓城牆，高144肘尺*。呢個係人用嘅測量標準，亦都係呢個天使所用嘅測量標準。 18 城牆係碧玉造嘅。城係純金嘅，好似明亮嘅玻璃。 19 城牆嘅根基用各種寶石裝飾：第一個根基用嘅係碧玉，第二個係藍寶石，第三個係玉髓，第四個係綠柱玉， 20 第五個係纏絲瑪瑙，第六個係肉紅玉髓，第七個係貴橄欖石，第八個係綠柱石，第九個係黃玉，第十個係綠玉髓，第十一個係風信子石，第十二個係紫晶。 21 嗰12道門係12粒珍珠，每道門都係用一粒珍珠造嘅。城裡面嘅大街係用純金造嘅，好似透明嘅玻璃。

22 我見唔到城裡面有聖殿，因為全能嘅上帝耶和華*同綿羊羔，就係呢座城嘅聖殿。 23 呢座城唔需要日月照耀，因為上帝嘅榮耀照亮咗呢座城，綿羊羔就係呢座城嘅燈。 24 呢座城嘅光會照亮列國嘅人所行嘅路，地上嘅君王會將佢哋嘅榮耀帶入城裡面。 25 城門永遠都唔會閂埋，因為嗰度只有日頭，冇夜晚。 26 列國嘅榮耀同尊榮都會被帶入城。 27 任何被玷污嘅嘢，任何行為可憎、行事詭詐嘅人，都絕對唔能夠入城。只有記錄喺綿羊羔嘅生命冊上面嘅人先可以入去。