以弗所書

2 除此之外，以前你哋因為過錯，因為罪，本來係死嘅，不過上帝令你哋得到生命。 2 以前你哋行事為人，係順應呢個世界嘅制度*，順應掌管社會風氣*嘅統治者。呢種能夠操縱人嘅風氣，就係而家影響緊叛逆嘅人*嘅精神*。 3 我哋所有人都曾經好似佢哋噉，順應有罪身體*嘅慾望行事為人，跟住自己有罪嘅身體同思想去做，天生就會激起上帝嘅憤怒，同其他人冇分別。 4 但係，充滿憐憫嘅上帝對我哋有極大嘅愛心。 5 我哋因為過錯，本來係死嘅，不過上帝令我哋同基督一樣得到生命。（憑住分外恩典，你哋已經得救嘞。） 6 上帝仲令我哋同基督耶穌聯合，同佢一樣復活，喺天上有一席位， 7 噉係為咗喺將來嘅制度*恩待我哋呢啲同基督耶穌聯合嘅人，顯示佢極大嘅分外恩典。

8 由於上帝嘅分外恩典，你哋已經因為信心而得救嘞。呢個安排係上帝嘅恩賜*，唔係靠你哋自己可以做到嘅。 9 你哋得救並唔係由於自己有好行為，所以你哋根本冇理由自誇。 10 我哋係上帝嘅作品。佢創造咗我哋，令我哋同基督聯合，希望我哋行善*。呢個就係上帝預先決定要我哋做嘅事。

11 唔好忘記，按照血統，你哋係外族人*，曾經俾人稱為「冇受割禮*嘅人」。噉樣稱呼你哋嘅，係嗰啲「受過割禮嘅人」，亦即係身體實際受過割禮嘅人。 12 以前你哋唔認識基督，同以色列國冇關係*，喺上帝承諾賜福嘅誓約上係外人，你哋唔認識上帝，喺世界上冇希望。 13 你哋曾經同上帝疏遠，但係而家已經同基督耶穌聯合，由於基督嘅血而親近上帝嘞。 14 基督令我哋和睦，令雙方合而為一，佢拆毀咗喺中間隔開雙方嘅牆。 15 佢獻出自己嘅身體，消除敵意，即係廢除咗摩西法典上嘅誡命同法令。佢令雙方同自己聯合，成為一個新嘅人，有和睦嘅關係。 16 基督死喺苦刑柱*，就令雙方合為一體，同上帝完全和好，因為基督已經親自將敵意消除。 17 佢嚟到將關於和睦*嘅好消息傳俾你哋呢啲同上帝疏遠嘅人，亦都傳俾嗰啲同上帝親近嘅人， 18 我哋雙方通過佢，憑住同一股神聖力量，就可以親近天父嘞*。

19 所以，你哋唔再係外人，唔再係其他國家嘅人，而係同聖民同一國家嘅公民，同上帝係一家人。 20 你哋被建立喺使徒同先知嘅根基上，有基督耶穌自己作為根基房角石*。 21 成座建築物都同佢聯合，各部分和諧團結，慢慢擴展成為耶和華*嘅聖殿。 22 你哋同基督聯合，就一齊被建造成為上帝通過神聖力量居住嘅地方。