Xiñee guluu ndaayaʼ Dios Noé ne xiñee naquiiñeʼ gánnanu de laani

STALE de laanu qué rusiáʼndanu ora gúnnanu xiixa ni nabé risaca. Rietenaláʼdxinu de guiráʼ xixé ni guca, paraa nuunu, xi cayúninu óraque ne dede xi bíninu despué de gúnnanu ni. Nanna dxíchinu laaca qué ñuu dxi ñaandaʼ Noé dxi gudxi Jiobá, Dios ni jma nandxóʼ, laabe maʼ chigunitilú guiráʼ ca binni malu nuu ca dxi stibe que. Peru caquiiñeʼ guzáʼ Noé ti arca naroʼbaʼ para ganda guilá ne ca binnilidxi ne ca maniʼ nuu lu Guidxilayú riʼ (Génesis 6:9-21).

Xi biʼniʼ Noé óraque yaʼ. Biéchebe ora binadiágabe ni la? o guniʼbe qué zúnibe ni. Ximodo gúdxibe ni xheelabe ne ca xiiñibe yaʼ. Cadi cá diʼ lu Biblia ximodo. Ndiʼ nga ni cá luni: «Noé bizulú biʼniʼ guiráʼ ni biʼniʼ mandar Dios laa guni. Bíʼnibe zaqué zaquepeʼ» (Génesis 6:22).

Ni cá lu textu ca racané laanu gánnanu xiñee guluu ndaayaʼ Dios Noé, gudixhe íquebe gúnibe guiráʼ ni biʼniʼ mandar Dios laabe, ne nabé risaca nga ni bíʼnibe ca (Génesis 6:8). Xiruʼ bicaa Dios uguu ndaayaʼ laabe yaʼ. Riquiiñeʼ gánnanu ni, purtiʼ naquiiñeʼ gácanu casi Noé, ti ganda guilanu ora gunitilú Dios guiráʼ guendaquéiquiiñeʼ cayaca lu Guidxilayú riʼ. Peru, primeru guidúʼyanu ximodo bibani binni ante guiaba Nisaguié Naroʼbaʼ que ca dxi bibani Noé.

Beeda ca demonio lu Guidxilayú riʼ

Noé bibani ndaaniʼ Guidxilayú riʼ dxi nacubi cadale binni luni. Gúlebe gudiʼdiʼ si biaʼ ti mil iza de bizáʼ Dios Adán, primé hombre que. Nuu tu riníʼ ique guleza ca binni que ndaaniʼ cueva ne gúpacaʼ stale guicha ládicaʼ. Laaca riníʼcabe qué ganna ca binni que gúnicaʼ dxiiñaʼ, natigu rizacaʼ ne maʼ naazecaʼ ti palu. Peru cadi zacá diʼ nga guca ca binni que, sínuque gúpacaʼ cosa de guiibaʼ ne de cobre ni bíʼninecaʼ dxiiñaʼ, ne zándaca biquiiñeʼ Noé cani para biʼniʼ arca que. Laaca bizáʼ ca binni que ni guxhídxinecaʼ saa. Bichaganacaʼ, bisiniisicaʼ xiiñicaʼ, bíʼnicaʼ dxiiñaʼ lu layú ne gúpacaʼ maniʼ sticaʼ. Laaca guziʼcaʼ ne bitoocaʼ stale cosa. Nga runi, laaca bibánicabe casi nabani binni yanna (Génesis 4:20-22; Lucas 17:26-28).

Peru lu xcaadxi cosa la? gadxé gúcacabe de ca binni nabani yanna. Dxiqué la? jma xadxí bibani binni. Cadi guendaridxagayaa diʼ nga guibani tuuxa 800 iza. Noé bibani 950; Adán bisaa 930, ne Matusalén, bixhozebida Noé, bisaa 969 iza (Génesis 5:5, 27; 9:29).a

Sti cosa ni guca ca dxi que nga ni cá lu Génesis 6:1, 2: «Dxi maʼ bizulú cadale binni ndaaniʼ guidxilayú riʼ la? gúpacaʼ xiiñicaʼ, óraque ca xiiñiʼ Dios ni dxandíʼ que biiyacabe ca xiiñidxaapaʼ ca binni que guizáʼ sicarucaʼ; ne gúpacabe stale xheelacabe, guiráʼ ni gulícabe». Ca «xiiñiʼ Dios ni dxandíʼ que» la? ángel nga laacabe, peru gúcacabe de beela ne beedacabe ndaaniʼ Guidxilayú riʼ para guibánicabe casi binni. Cadi Dios diʼ biʼniʼ mandar laacabe gueedacabe ne cadi beedadícabe para gacanécabe binni, sínuque bisaanacabe lugar stícabe guibáʼ para chuʼnécabe ca gunaa sicarú nuu ndaaniʼ Guidxilayú, ne zacá beeda gácacabe demonio (Judas 6).

Bicaalúcabe Dios, puru cosa ni cadi jneza gucuá íquecabe gúnicabe, ne cumu jma nánnacabe ne jma nadípacabe que binni la? bicaacabe laacaʼ gúnicaʼ stale cosa malu. Zándaca bicaacabe binni guni guiráʼ ni gucaláʼdxicabe. Qué ñunidícabe casi runi tuuxa ni ruuti binni ne maʼ canagucaachilú para cadi guinaazecabe laa, sínuque ora tiisi bíʼnicabe cosa malu ne qué nuzuubacabe stiidxaʼ Dios.

Cumu guyuuné ca demonio que ca gunaa que la? gúpacaʼ xiiñicabe. Ca xiiñicabe que guizáʼ nadipaʼ gúcacaʼ ne binibiáʼ binni laacaʼ casi nefilim, lu diidxaʼ hebreu. Biblia na: «Ca nefilim que nuucaʼ lu guidxilayú riʼ ca dxi que, ne laaca guyuucabe despué, dxi guyuuné ca xiiñiʼ Dios ni dxandíʼ ca gunaa xiiñiʼ binni guidxilayú, ne laacaʼ gúpacaʼ xiiñicabe, ca xiiñicabe que nga ca binni ni guca nadipaʼ ni bibani dxiqué, nabé binibiáʼ binni laacaʼ» (Génesis 6:4). Nabé bidxibi binni ca nefilim que. Lácabe riníʼ: «ni rusaba xcaadxi binni». Biiticabe binni ne zándaca pur guiráʼ ca cosa malu bíʼnicabe nga bicaa binni jma cuentu ni caníʼ de guendaridinde.

Biuubaʼ ladxidóʼ binni ni biʼniʼ ni jneza

Modo caníʼ Biblia de ca binni que cusihuinni nabé bíʼnicabe stale guendaquéiquiiñeʼ. Biblia na «bidale guendaquéiquiiñeʼ ni cayuni binni ndaaniʼ guidxilayú riʼ, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora». Guiráʼ ladu gudinde binni lu Guidxilayú «purtiʼ guiráʼ ca binni que puru ni cadi jneza cayúnicaʼ lu guidxilayú» (Génesis 6:5, 11, 12).

Lade ca binni ca nga bibani Noé. Peru gadxé si de ca binni que la? «Noé guca ti hombre ni biʼniʼ ni jneza [ne] guzané[be] Dios ni dxandíʼ» (Génesis 6:9). Nagana nga guibani ti binni nachaʼhuiʼ lade binni qué runi ni jneza. ¡Nanna pabiáʼ biuubaʼ ladxidoʼbe pur guiráʼ ni biʼniʼ ca binni que ne pur ni guniʼcaʼ yaʼ! Zándaca biʼniʼ sentirbe cásica Lot, sti hombre ni biʼniʼ ni jneza ni bibani despué de biaba Nisaguié Naroʼbaʼ que. Lot bibani lade binni ni biʼniʼ puru ni cadi jneza de guidxi Sodoma ne «qué ñuulaʼdxi modo nabani ca binni que», ne «irá dxi racaná ladxidóʼ be ora guʼya be ne guna diaga be irá enda nadxaba cayuni ca binni que, purti laabe runi be ni jneza» (2 Pedro 2:7, 8). Zacaca nga guyuu Noé.

Ñee laaca riuubaʼ ladxidoʼloʼ ora gánnaluʼ de guiráʼ cosa feu cayaca yanna ne purtiʼ qué runi binni ni na Dios la? Pa zacá ni la? ziéneluʼ xi biʼniʼ sentir Noé. Guníʼ ique si pabiáʼ nagana guca para laabe guibánibe lade ca binni ni qué runi ni jneza que xhoopaʼ gayuaa iza, biaʼ ca nga iza nápabe dxi biaba Nisaguié Naroʼbaʼ que. ¡Nanna pabiáʼ ngue maʼ rápabe gana guiree guiráʼ guendaquéiquiiñeʼ que yaʼ! (Génesis 7:6.)

Bíʼnibe stipa pur gácabe gadxé de ca binni que

Noé «beeda gácabe [ti binni] ni qué gapa donda lade cani bibaninebe» (Génesis 6:9). Pa cudiiluʼ cuenta la? Biblia na gúcabe ti binni ni qué ñapa donda lade ca binni ni bibaninebe. Peru cadi para ca binni que nga qué ñápabe donda, sínuque Dios nga biiyaʼ laabe casi ti binni nachaʼhuiʼ, purtiʼ ca binni que gadxé modo biiyacaʼ laabe. Nanna dxíchinu qué niníʼ íquebe casi ca binni que, ne laaca qué ñúnibe ca guendaquéiquiiñeʼ biʼniʼ ca binni que o ñuube lu ca saa ni bíʼnicaʼ. ¡Bixuiʼlú xi guníʼ ique ca binni que ora bizulú cayúnibe arca que! Lugar de niníʼ ique ca binni que dxandíʼ zaca ni caniʼbe que la? laga biʼniʼ búrlacaʼ laabe.

Peru Noé biʼniʼ cré ni gudxi Jiobá laa de guidubi ladxidóʼ, nga runi na Biblia gúdxibe ca binni que «nusaana ca irá enda ruchee sticaʼ» (2 Pedro 2:5). Maca nánnabe ziuu tu zucaalú laabe. Enoc, bixhozebida bixhózebe, guca ti hombre ni biʼniʼ ni jneza ne guníʼ zusabanáʼ Dios binni malu. Zándaca pur ngue guzanándacabe laabe, peru qué nudii Dios lugar ñuuti ca xhenemígube laabe (Génesis 5:18, 21-24; Hebreos 11:5; 12:1; Judas 14, 15). Yanna, xi zanda guininu de Noé yaʼ. Gúcabe nadxibalú ne biʼniʼ crebe zanda gapa Jiobá laabe de ca binni ni bicaalú laabe, de cani qué ñuulaʼdxiʼ ni cayúnibe, de ca demonio ne de ca nefilim ni bíʼnicaʼ ni na Binidxabaʼ.

Ca binni ni qué runi ni na Dios ca nabé nga huacaalúcabe ca xpinni Dios. Dede Jesucristu ne ca discípulo stiʼ guca nanaláʼdxicabe laacaʼ (Mateo 10:22; Juan 15:18). Guca Noé nadxibalú para biʼniʼ ni na Dios lade binni ni qué riuulaʼdxiʼ gúnini. Bidiibe cuenta jma ngue risaca gúnibe ni na Dios que gúnibe ni runi ca binni que. Ngue runi guluu Jiobá ndaayaʼ laabe.

Biʼniʼ Noé ni gudxi Dios laa

Casi maʼ bidúʼyanu ca, qué nusaana Noé de nucheeche diixaʼ ne gúcabe nadxibalú para bíʼnibe ni. Xi biʼniʼ ca binni que ora binadiágacaʼ ni caniʼbe yaʼ. Biblia cayabi laanu xi biʼniʼ ca binni que ante guiaba Nisaguié Naroʼbaʼ que: «Cayó ca binni que ne cayéʼ caʼ, cachaganá caʼ ne cucheela caʼ, dede dxi biuu Noé ndaani arca que. Ne caʼru guiene ca xi chi gaca dede ora beeda nisa que, ziné irá caʼ». Qué nulábicabe ni gudxi Noé laacabe (Mateo 24:38, 39).

Ngaca nga ni na Jesús zuni binni ca dxi stinu riʼ. Ne zacá nga huayaca ni, purtiʼ ca testigu stiʼ Jiobá maʼ zinecaʼ jma de ti gayuaa iza de caguixhenacaʼ binni zacaca. Xi caníʼcabe yaʼ. Caníʼcabe mayaca cuee Jiobá guiráʼ cosa malu nuu yanna, ti guedané ti guidxilayú cubi ra zaca puru si ni jneza. Ne nécapeʼ millón de binni nga maʼ cayuni ni na Dios la? nuuruʼ stale millón ni cadi culabi ni caníʼcabe. Qué naʼ ca binni ca guni crecaʼ dxandíʼ nga biaba ti Nisaguié Naroʼbaʼ dxiqué ne qué gápacaʼ gana gánnacaʼ xiñee gúcani (2 Pedro 3:5, 13).

Noé huaxa bicaadiaga ne bizuubaʼ stiidxaʼ Jiobá, ngue runi bilá. Sicaríʼ bicaa apóstol Pablu: «Purti bini cre Noé Dios, nga runi bizuuba stiidxa Dios ra gudxi Dios laa xi chi aca. Ne neca caʼru guʼya be ni, peru biʼni be ni na Dios, bizáʼ be arca ra bilá né be binni lidxi be» (Hebreos 11:7).

Naquiiñeʼ chinándanu ejemplu stibe

Arca bizáʼ Noé que guizáʼ naroʼbaʼ ni, jma ziuulani que ti campu ra riguítecabe fútbol ne nasooni biaʼ ti yoo de gaayuʼ pisu. Ziuulani 30 metru jma que ti barcu ni láʼ Wyoming, nga nga barcu de yaga ni jma naroʼbaʼ huayuni binni. Neca cadi ti barcu nga arca que la? peru gunda biásani lu nisa que. Yanna, para gunda biʼniʼ Noé ni la? gunna chaahuibe ximodo naquiiñeʼ gácani, ne bineʼbe alquitrán guidubi ndaaniʼ ni ne fuera de laani. Zándaca bindaabe jma de cincuenta iza para bilúxebe arca que (Génesis 6:14-16).

Peru cadi ngasi nga ni biʼniʼ Noé, laaca gupa xidé guluube ni gónebe binnilídxibe ne ni gó ca maniʼ que para ti iza. Gupa xidé bitagulisaabe ca maniʼ que ne guluube laacame ndaaniʼ arca que ante guiaba Nisaguié Naroʼbaʼ que. Biblia na «biʼniʼ Noé guiráʼ ni biʼniʼ mandar Jiobá laa». ¡Nanna pabiáʼ biéchebe ora bilúxebe arca que ne ora biseeguʼ Jiobá puertaʼ stini yaʼ! (Génesis 6:19-21; 7:5, 16.)

Oraqueruʼ biaba Nisaguié Naroʼbaʼ que. Biaba nisaguié que cuarenta dxi ne cuarenta gueelaʼ, guirácabe biaanacabe ndaaniʼ arca que ti iza, dede ora bibidxi ca nisa que (Génesis 7:11, 12; 8:13-16). Guti guiráʼ ca binni malu que, peru Noé si ne ca binnilidxi nga biaana lu Guidxilayú riʼ biree si guiráʼ guendaquéiquiiñeʼ que.

Nisaguié Naroʼbaʼ biaba ca dxi stiʼ Noé que la? na Biblia nácani ti ejemplu para «ganna ca [binni malu] xi cabeza laacaʼ». Ximodo nga yaʼ. Racá ridúʼndanu: «Ibáʼ ne guidxilayú ni nuu yanna ri la? [...] ma gudixhe Dios unitilú ni ne gui. Ne laca gui que unitilú irá cani qué rulabi laabe, dxi cuidxi be cuenta laacaʼ». Peru cásica bilá Noé la? zacaca ziuu tu zalá. Nanna dxíchinu zacá ni purtiʼ «rulá Dios ni zinanda laa ora cadiʼdi ca ra nagana» (2 Pedro 2:5, 6, 9; 3:7).

Noé guca ti hombre ni biʼniʼ ni jneza ne biʼniʼ adorarbe Jiobá lade ca binni qué iquiiñeʼ que. Bíʼnibe guiráʼ ni gudxi Dios laabe ne gúcabe nadxibalú para bíʼnibe ni jneza, neca nánnabe zuni burla binni laabe ne zaca nanaláʼdxicaʼ laabe pur laani. Pa chinándanu ejemplu stiʼ Noé la? laaca zaguu Jiobá ndaayaʼ laanu, ne zanda guilanu ne chuʼnu lu guidxilayú cubi ni mayaca gueeda ca (Salmo 37:9, 10).

[Cani cá ñee yaza]

[Ni caníʼ yaza 5]

Cumu nabé gudinde ca nefilim que la? zándaca pur ngue bicaa binni jma cuentu ni caníʼ de guendaridinde

[Paraa gucuaacabe dibuju o foto ni zeeda lu yaza 5]

Alinari/Art Resource, NY

[Dibuju/foto ni zeeda lu yaza 7]

Pa gápanu fe casi gupa Noé la? laaca zaguu ndaayaʼ Dios laanu