NOTA

Lá Dios nga Jehová ne raca significar ni «laabe nga ni runi ni gueeda gaca». Jehová nga Dios ni jma napa poder ne laa bizáʼ guiráʼ cosa. Nápabe poder para gúnibe intiica ni quixhe íquebe gúnibe.

Dxiqué gucuá lá Dios lu diidxaʼ hebreu né tapa letra. Ne lu diidxastiá, ca letra riʼ nga ca consonante YHWH o JHVH (laaca zanda guicá ni YHVH). Lu textu hebreu gucuá Biblia primé, zeeda lá Dios biaʼ 7,000 biaje. Gadxé gadxé modo rucaa binni de guidubi Guidxilayú lá Jehová, ne gadxé gadxé modo riníʼcabe ni lu idioma stícabe.

▸ Cap. 1, párr. 15, nota ni cá ñee yaza

Dios nga autor stiʼ Biblia ne biquiiñebe hombre para bicaani. Zeeda gaca ni casi ora guinabaʼ ti jefe gucaa secretariu stiʼ ti carta. Neca secretariu que bicaa carta ca, peru jefe que nga guníʼ xi guicá luni. Zacaca nga Biblia, biquiiñeʼ Dios espíritu santu stiʼ para gucané ca hombre ca gucaacaʼ guiráʼ ni racaláʼdxibe guicá luni. Gadxé gadxé modo gucané espíritu santu stiʼ Dios laacabe. Casi nuu tu laa biʼyaʼ visión o guníʼ xcaandaʼ ne despué bicaa ni biʼyaʼ.

▸ Cap. 2, párr. 5

Naca ca principiu zeeda lu Biblia caadxi cosa ni dxandíʼ ni caquiiñeʼ guizíʼdinu ne ni rusiidiʼ laanu stale cosa nabé risaca. Guzéʼtenu ti ejemplu, casi principiu ni ná «pa guidxaagatu binni ni runi ni cadi jneza la? zunítitu ca costumbre galán ni nápatu», ca diidxaʼ riʼ cusiidini laanu ca binni guidxaaganu zanda gucaacaʼ laanu gúninu ni jneza o gúninu xiixa ni cadi jneza (1 Corintios 15:33). Ne sti principiu ni ná «ni gudxiibaʼ binni la? ngaca guni cosechar», rusiidini laanu guiráʼ ni gúninu zapa consecuencia (Gálatas 6:7).

▸ Cap. 2, párr. 12

Laacani nga mensaje stiʼ Dios. Zanda gácacani xiixa ni gusiene Dios para gaca ni ná, xiixa ni rusiidiʼ Dios laanu para guibáninu jneza, ti mandatu o juiciu stiʼ Dios. Laaca zanda gácacani mensaje de xiixa cosa ni chigaca. Maʼ guca cumplir stale profecía zeeda lu Biblia.

▸ Cap. 2, párr. 13

Guiráʼ ca profecía ni zeeda lu Biblia ni caníʼ de Mesías guca cumplírcani luguiáʼ Jesús. Biiyaʼ cuadru ni láʼ «Ca profecía ni caníʼ de Mesías».

▸ Cap. 2, párr. 17, nota ni cá ñee yaza

Gucalaʼdxiʼ Jehová ñaca Guidxilayú riʼ ti paraísu ra nibani binni ni nadxii laabe. Ne caʼruʼ diʼ guchaa ni naguixhe íquebe. Maʼ cadi candaa zunduuxeʼ Dios ca cosa malu nuu ndaaniʼ Guidxilayú ne zudiibe guendanabani ni qué zaluxe ca binni guzuubaʼ stiidxabe.

▸ Cap. 3, párr. 1

Laabe nga ángel ni bizulú bicaalú Dios. Diidxaʼ Binidxabaʼ riníʼ «tobi ni rucaalú». Zacá labe purtiʼ rucaalube Jehová. Ne diidxaʼ Diablu raca significar «tobi ni riníʼ diidxaʼ para guniná». Zacá labe purtiʼ riniʼbe cosa ni cadi dxandíʼ de Dios ne riguítebe binni.

▸ Cap. 3, párr. 4

Ante guzáʼ Jehová Guidxilayú riʼ, bizaʼbe ca ángel. Bizaʼbe laacaʼ para guibánicaʼ guibáʼ. Nuu jma de 100 millón de ángel (Daniel 7:10). Cada tobi napa lá ne gadxé gadxé personalidad nápacaʼ. Ca ángel riʼ, fiel ne humilde laacaʼ ne qué racaláʼdxicaʼ guni adorar binni laacaʼ. Gadxé gadxé nivel napa ca ángel riʼ ne gadxé gadxé dxiiñaʼ rúnicaʼ. Tobi de ca dxiiñaʼ rúnicabe nga guni servírcabe delante de trono stiʼ Jehová, rinécabe mensaje stiʼ Dios, racanécabe ca xpinni ni nuu lu Guidxilayú, rúnicabe ni maʼ gudixhe Dios lu ti juiciu ne racanécabe para gaca predicar ca noticia galán stiʼ Reinu (Salmo 34:7; Apocalipsis 14:6; 22:8, 9). Ne zacanécabe Jesús ora tinde lu Armagedón (Apocalipsis 16:14, 16; 19:14, 15).

▸ Cap. 3, párr. 5; cap. 10, párr. 1

Guni pecarnu nga guni sentirnu, guiníʼ íquenu o gúninu xiixa ni qué riuulaʼdxiʼ Jehová. Ruxheleʼ pecadu laanu de Dios. Pur nga, bidiibe laanu ley ne principiu ni zanda gacané laanu para cadi laapenu guyúbinu gucheʼnu. Dxi bizáʼ Jehová guiráʼ cosa bíʼnibe ni perfectu. Peru Adán ne Eva gulicaʼ cadi guzuubacaʼ stiidxaʼ Dios. Ra maʼ qué nuzuubacaʼ stiidxaʼ Dios bicheenecaʼ laabe ne maʼ qué ñácacaʼ perfectu. Bióʼxhocaʼ ne gúticaʼ. Cumu gulenenu pecadu ni bisaanané Adán laanu la? laaca rióxhonu ne rátinu.

▸ Cap. 3, párr. 7; cap. 5, párr. 3

Laani nga guerra ra chigunitilú Dios guidxilayú stiʼ Binidxabaʼ ne guiráʼ guendaquéiquiiñeʼ ni nuu.

▸ Cap. 3, párr. 13; cap. 8, párr. 18

Laani nga ti gobiernu ni gudixhe Jehová chuʼ guibáʼ. Jesucristu nga Rey stiʼ Reinu ca. Ne zaquiiñeʼ Jehová Reinu stiʼ para gunitilú ca cosa malu nuu yanna. Zuni mandar Reinu stiʼ Dios guidubi naca Guidxilayú.

▸ Cap. 3, párr. 14

Maca bizáʼ Dios Jesús ante guzáʼ guiráʼ cosa. Biseendaʼ Jehová Jesús lu Guidxilayú para gudii xpida pur binni. Gútisibe, bisibani Jehová laabe. Yanna riʼ, maʼ cayuni mandar Jesús guibáʼ casi Rey lu Reinu stiʼ Dios.

▸ Cap. 4, párr. 2

Maca bizeeteʼ Biblia padxí zahuinni Mesías. Zácani tidiʼ si ti tiempu de 69 semana, ne bizuluni lu iza 455 ante de ca dxi stiʼ Jesús (a.J.) ne bilúxeni lu iza 29 despué de ca dxi stiʼ Jesús (d.J.).

¿Ximodo nánnanu biluxe tiempu de 69 semana ca lu iza 29 despué de ca dxi stiʼ Jesús yaʼ? Bizulú ca 69 semana ca lu iza 455 ante de ca dxi stiʼ Jesús, dxi guyé Nehemías Jerusalén ne bizulú biʼniʼ chaahuiʼ guidxi que sti biaje (Daniel 9:25; Nehemías 2:1, 5-8). Ora gunadiáganu diidxaʼ semana riníʼ íquenu gadxe gubidxa, peru ca semana ni riete lu profecía riʼ cadi semana de gadxe gubidxa ni, sínuque semana de gadxe iza. Purtiʼ nga nga ti regla ni riquiiñeʼ lu profecía. Regla riʼ ná: «Ti dxi pur ti iza» (Números 14:34; Ezequiel 4:6). Ndiʼ riníʼ, cada semana rindaa gadxe iza ne ca 69 semana ca zandaa ni 483 iza (raca multiplicar 69 pur 7). Pa dede lu iza 455 ante de ca dxi stiʼ Jesús guzulú ugábanu 483 iza, zindanu lu iza 29 despué de ca dxi stiʼ Jesús (gastiʼ iza cero). Ne lu iza 29 guyuunisa Jesús ne beeda gaca Mesías (Lucas 3:1, 2, 21, 22).

Laaca ruzeeteʼ profecía riʼ de sti semana, o xcadxe iza. Lu tiempu riʼ, zuuticabe Mesías. Ne bizaaca ndiʼ lu iza 33 d.J. Ne lu iza 36 d.J. bizulú biʼniʼ predicárcabe ca noticia galán stiʼ Reinu stiʼ Dios guiráʼ guidxi ne cadi ra nuu si ca judíu (Daniel 9:24-27).

▸ Cap. 4, párr. 7, nota ni cá ñee yaza

Biblia rusiidiʼ Jehová nga Dios ni bizáʼ guiráʼ cosa ne maca bizaʼbe Jesús ante guzaʼbe guiráʼ ni nuu (Colosenses 1:15, 16). Cadi Jesús diʼ nga Dios ni jma napa poder. Ne qué ñuu dxi niníʼ Jesús biaʼca laa Dios. Ni dxandíʼ guniʼbe nga: «Jma napa Bixhozeʼ poder que naa» (Juan 14:28; 1 Corintios 15:28). Peru nuu caadxi religión rusiidiʼ de trinidad. Rusiidicaʼ naca Padre, Xiiñiʼ ne espíritu santu ti binni si ne laaca nácacaʼ ti Dios si. Qué riete diʼ diidxaʼ trinidad lu Biblia. Nga runi, nácani ti enseñanza ni cadi jneza.

Espíritu santu ca nácani stipa stiʼ Dios. Poder ni qué rihuinni stiʼ Dios ni ne siempre caquiiñebe ni para ganda guni cumplirbe ni racaláʼdxibe gúnibe. Cadi ti binni ni, purtiʼ Biblia ná ca xpinni Cristu de primé siglu «bidxá guirácabe de espíritu santu». Ne guníʼ Jehová: «Zudieeʼ espíritu stinneʼ guiráʼ clase binni» (Hechos 2:1-4, 17).

▸ Cap. 4, párr. 12; cap. 15, párr. 17

¿Xiñee qué riquiiñeʼ ca ni dxandíʼ xpinni Cristu cruz para guni adorarcaʼ Dios?

1. Maʼ raca stale iza huaquiiñeʼ ca religión falsu cruz. Tiempu que, biquiiñecabe cruz para guni adorárcabe naturaleza ne ora ratanécabe stobi para guni adorárcabe dios falsu. Ca primé chonna gayuaa iza despué de guti Jesús qué niquiiñeʼ ca ni dxandíʼ xpinni Cristu cruz para ñuni adorarcaʼ Dios. Peru Constantino, emperador stiʼ Roma biquiiñebe cruz casi ti seña para ca xpinni Cristu. Biquiiñecabe ni purtiʼ para laacabe zaqué nga zadale ca xpinni Cristu. Peru cruz ca la? qué lica nuzeeteʼ Cristu ni. Ne ti libru stiʼ ca católicu ná: «Dede ante gueeda Cristu, ca binni que maca riquiiñecaʼ cruz ne ca binni ni cadi naca xpinni Cristu laaca biquiiñecaʼ ni» (New Catholic Encyclopedia).

2. Qué ñati Jesús lu ti cruz. Diidxaʼ griegu ni raca traducir «cruz» riniʼni «poste» o ti «yaga derechu». Ti traducción stiʼ Biblia cusiene, lu diidxaʼ griegu ni gucuá Nuevo Testamento «cadi lica cusiene ni de chupa ndaa yaga» (The Companion Bible). Guti Jesús lu ti palu o ti yaga derechu.

3. Qué racalaʼdxiʼ Jehová iquiiñenu bidóʼ nin xiixa cosa para guni adorarnu laa (Éxodo 20:4, 5; 1 Corintios 10:14).

▸ Cap. 5, párr. 12

Biʼniʼ mandar Jesús ca discípulo stiʼ guietenaláʼdxicaʼ guendaguti stibe. Ca xpinni Cristu rúnicani guiráʼ iza, 14 de nisán, beeu stiʼ ca judíu ne lu calendariu stinu rácani lu beeu marzo o abril. Dxi queca biʼniʼ celebrar ca israelita saa stiʼ Pascua. Lu Conmemoración ca ridiʼdiʼ pan ne vinu lu náʼ ca binni nuu raqué, ne runi representar ca ni cuerpu ne rini stiʼ Jesús. Guiráʼ ca ni chiguni mandarné Jesús guibáʼ nga ró pan ne reʼ vinu ca. Ca ni napa esperanza de guibani para siempre lu Guidxilayú riʼ riecaʼ Conmemoración né rusihuínnicaʼ respetu dxi ca, peru qué rocaʼ pan ne qué reʼcaʼ vinu.

▸ Cap. 5, párr. 21

Lu Traducción del Nuevo Mundo, riquiiñeʼ ni diidxaʼ alma para guiniʼni de 1) binni, 2) animal o 3) guendanabani stiʼ binni o stiʼ ti animal. Guidúʼyanu chupa chonna ejemplu:

• Binni. «Ca dxi stiʼ Noé, [...] bilá chupa chonna binni, xhono si alma bilá lu nisa que» (1 Pedro 3:20, nota). Raríʼ, diidxaʼ alma ca caniʼni de binni guidxilayú casi: Noé, xheelaʼ Noé, guionnaʼ xiiñiʼ ne guionnaʼ xuaalidxi.

• Animal. «Ne guníʼ Dios: “Guidxá maniʼ nabani [alma nabani] lu guidxilayú de cada clase stiʼ, maniʼ nadóʼ ne maniʼ rixubi ndaaniʼ layú ne maniʼ guiʼxhiʼ nuu lu guidxilayú de cada clase stiʼ”. Ne zaqué guca ni» (Génesis 1:24).

• Guendanabani stiʼ binni o stiʼ ti animal. Gudxi Jehová Moisés: «Maʼ guti guiráʼ hombre biyubi guuti lii [alma stiluʼ]» (Éxodo 4:19). Dxi guyuu Jesús lu Guidxilayú riʼ guníʼ: «Naa nga pastor chaʼhuiʼ. Ti pastor chaʼhuiʼ la? rudii alma stiʼ pur ca dendxuʼ stiʼ» (Juan 10:11, nota).

  Ora riníʼ Biblia cayuni tuuxa binni xiixa cosa de guidubi xhialma, caníʼ ni cayúnibe ni de guidubi ladxidoʼbe o modo jma galán caquiiñeʼ gúnibe ni (Deuteronomio 6:5; Mateo 22:37). Lu Biblia laaca riquiiñecabe diidxaʼ alma para guiníʼcabe de deseu o apetitu stiʼ tobi ni nabani (Proverbios 23:2, nota; Isaías 56:11, nota). Laaca ruzeeteʼ ni naca ti gueʼtuʼ ti alma ni maʼ guti (Números 6:6, nota; Ageo 2:13, nota). Zacá ni, Biblia ná rati alma ca (Ezequiel 18:4, 20; Santiago 5:20, nota).

▸ Cap. 6, párr. 5, nota ni cá ñee yaza; cap. 15, párr. 17

Diidxaʼ hebreu ne griegu ni guca traducir «espíritu» lu Traducción del Nuevo Mundo, zanda gápani chupa chonna significadu. Peru guiráʼ significadu ca rusiénecani de xiixa ni qué randa ruuyaʼ binni, casi bi o bi ni ricaa guiráʼ binni ne maniʼ. Laaca zanda guiniʼni de ca binni de espíritu ne de espíritu santu o stipa stiʼ Dios. Qué rusiidiʼ diʼ Biblia ribani ti parte de binni despué de gatiʼ (Éxodo 35:21; Salmo 104:29; Mateo 12:43; Lucas 11:13).

▸ Cap. 6, párr. 5, nota ni cá ñee yaza; cap. 15, párr. 17

Nuu Biblia runi traducir diidxaʼ griegu riʼ casi «infiernu». Peru Gehena nga láʼ ti valle ni guyuu gaxha de Jerusalén ra bisáʼbicabe ne bizaaquicabe guixi dxiqué. Gastiʼ nin ti prueba ni guiníʼ rulaacabe binni o maniʼ nabani raqué para guicaguí o para gaca castigar ca dxi bibani Jesús. Nga runi, qué zanda guininu laani nga ti lugar ni qué rihuinni ra raca castigar binni ni maʼ guti para siempre lu bele. Ora guníʼ Jesús zié caadxi binni ndaaniʼ Gehena, ni guniʼbe nga zanitilucaʼ para siempre (Mateo 5:22; 10:28).

▸ Cap. 7, párr. 20

Laani nga oración ni bisiidiʼ Jesús ca discípulo stiʼ ora guni orarcaʼ. Laaca runibiáʼcabe ni casi oración del Señor o casi oración modelo. Bisiidiʼ Jesús laanu guinábanu ca cosa riʼ:

• «Gaca santificar laluʼ»

  Rinábanu Jehová gusiá lá de guiráʼ ni maʼ bisiguii binni de laabe. Zacá, guiráʼ ca ni nabeza guibáʼ ne lu Guidxilayú zusisácacaʼ ne zuni respetarcaʼ lá Dios.

• «Gueeda Reinu stiluʼ»

  Rinábanu gunitilú Reinu stiʼ Dios guidxilayú malu stiʼ Binidxabaʼ, guni mandarbe Guidxilayú ne gúnibe ni ti paraísu.

• «Gaca ni naluʼ ndaaniʼ guidxilayú»

  Rinábanu gaca cumplir ni naguixhe ique Dios guni lu Guidxilayú riʼ: gaca binni ni guzuubaʼ diidxaʼ perfectu ne guibánicaʼ para siempre ndaaniʼ ti paraísu. Nga peʼ nga ni gucalaʼdxiʼ Jehová ñuni dxi bizáʼ binni.

▸ Cap. 8, párr. 2

Pur rescate bidii Jehová, zanda guilá binni de pecadu ne guendaguti. Rescate ca nga ni gudixe Dios para gudxiguetaʼ guendanabani sin donda ni biniti primé hombre, Adán. Laaca caquiiñeʼ rescate ca para guibiguetaʼ gaca xhamigu binni Dios. Biseendaʼ Jehová Xiiñiʼ para gatiʼ pur guiráʼ ca pecador. Pur guendaguti stiʼ Jesús, guiráʼ binni napa oportunidad de gácacaʼ perfectu ne guibánicaʼ para siempre.

▸ Cap. 8, párr. 21; cap. 9, párr. 13

Lu profecía ni zeeda lu Daniel capítulo 4, rusiidini laanu zuzulú guni mandar Reinu stiʼ Dios lu iza 1914.

Profecía. Lu ti bacaandaʼ biluíʼ Jehová Nabucodonosor, rey stiʼ Babilonia, xi chiguizaaca. Lu bacaandaʼ que biiyabe cusábacabe ti yaga guizáʼ naroʼbaʼ. Despué, bindiibicabe guiibaʼ ne cobre tronco stiʼ yaga que para maʼ cadi guiniisini dede ora tidiʼ «gadxe tiempu». Guizaa si tiempu ca zabiguetaʼ zaniisi yaga que (Daniel 4:1, 10-16).

Significadu. Runi representar yaga que Reinu stiʼ Dios. Stale iza biquiiñeʼ Dios ca rey de Jerusalén para guni mandar guidxi Israel (1 Crónicas 29:23). Peru ca rey riʼ qué nuzuubacaʼ diidxaʼ, ne maʼ guirutiʼ tu ñuni mandar. Binitilú Jerusalén lu iza 607 ante de ca dxi stiʼ Jesús (a.J.). Lu iza ca bizulú «gadxe tiempu» que (2 Reyes 25:1, 8-10; Ezequiel 21:25-27). Jesús guníʼ: «Zuxhaatañee guiráʼ guidxi Jerusalén dede ora maʼ bizaa tiempu stiʼ ca guidxi». «Tiempu stiʼ ca guidxi» riʼ laaca laani nga «gadxe tiempu» ni maca bieeteʼ ca (Lucas 21:24). Nga runi, «gadxe tiempu» riʼ qué nilúxeni dxi guyuu Jesús lu Guidxilayú. Jehová maca guníʼ zabí ti Rey ora guiluxe «gadxe tiempu» que. Ne Rey riʼ nga Jesús. Ora guni mandarbe zedanebe stale ndaayaʼ para ca xpinni Dios ni nuu lu Guidxilayú (Lucas 1:30-33).

Pabiáʼ bindaa ni. «Gadxe tiempu» que bindaa ni 2,520 iza. ¿Ximodo nánnanu 2,520 iza nga «gadxe tiempu» que yaʼ? Biblia ná chonna tiempu arondaʼ que nga 1,260 dxi (Apocalipsis 12:6, 14). Nga runi, gadxe tiempu ca la? doble de 1,260 ni, ngue runi bidii ni 2,520 dxi. Ne ti regla ni riquiiñeʼ lu ca profecía ná: «Ti dxi pur ti iza» (Números 14:34; Ezequiel 4:6). Nga runi, 2,520 dxi zeeda gácani 2,520 iza.

Pa dede lu iza 607 ante de ca dxi stiʼ Jesús guzulú ugábanu 2,520 iza la? biaʼsi zindanu lu iza 1914 (gastiʼ iza cero). Ne lu iza 1914, biʼniʼ nombrar Jehová Jesucristu, Mesías que, Rey guibáʼ.

▸ Cap. 8, párr. 23

Diidxaʼ arcángel raca significar «jefe stiʼ ca ángel». Biblia ruzeeteʼ de ti arcángel si ni láʼ Miguel (Daniel 12:1; Judas 9).

Naca Miguel xaíque stiʼ ejércitu de ca ángel fiel stiʼ Dios. Biblia ná: «Bicaalú Miguel ne ca ángel stiʼ dragón que. Ne dragón que ne ca ángel stiʼ laaca bicaalucaʼ» (Apocalipsis 12:7). Laaca ruzeeteʼ Biblia naca Jesús xaíque stiʼ ejércitu stiʼ Dios. Nga runi, Miguel nga sti lá ni napa Jesús (Apocalipsis 19:14-16).

▸ Cap. 9, párr. 4, nota ni cá ñee yaza

Laani nga tiempu ra zazaaca stale cosa risaca ante gunitilú Reinu stiʼ Dios guidxilayú stiʼ Binidxabaʼ. Ca profecía ni zeeda lu Biblia riquiiñeʼ caadxi diidxaʼ para guiniʼcaʼ de tiempu riʼ, casi «dxi guiluxe guidxilayú» ne «presencia stiʼ Xiiñiʼ Hombre» (Mateo 24:3, 27, 37). Bizulú «ca últimu dxi ca» lu iza 1914, dxi bizulú cayuni mandar Reinu stiʼ Dios guibáʼ ne zaluxe ni ora guinitilú guidxilayú stiʼ Binidxabaʼ lu guerra ni láʼ Armagedón (2 Timoteo 3:1; 2 Pedro 3:3).

▸ Cap. 9, párr. 2

Resurrección nga ora gusibani Dios ti binni ni maʼ guti. Lu Biblia riete de gaʼ resurrección. Bidii Dios poder Elías, Eliseo, Jesús, Pedro ne Pablo para bisibánicaʼ binni ni maʼ guti. Maʼ guníʼ Jehová zusibani ca binni «biʼniʼ ni jneza» ne «ca ni qué ñuni ni jneza» para guibánicaʼ lu Guidxilayú (Hechos 24:15). Laaca ruzeeteʼ Biblia zabani caadxi binni para cheʼ guibáʼ. Laacabe nga ca xpinni Cristu ni maʼ gulí Dios para guni mandárnecaʼ Jesús guibáʼ (Juan 5:28, 29; 11:25; Filipenses 3:11; Apocalipsis 20:5, 6).

▸ Cap. 9, párr. 13

Espiritismo nga ti práctica ra ruyubi binni guiniʼné ca espíritu ca o riquiiñecaʼ sti binni para gúnini, casi ti bruju, ti chamán, ti médium espiritista, o ni runi adivinar. Cadi jneza diʼ práctica riʼ. Ca binni ni runi practicar espiritismo, runi crecaʼ nabániruʼ ti parte de cuerpu stinu despué de gatiʼ ne rácani ti espíritu nadipaʼ. Peru nácani ti creencia falsu. Rucaa ca demonio binni cadi guzuubacaʼ stiidxaʼ Dios. Caadxi cosa riquiiñeʼ ca demonio para quítecaʼ binni nga astrología, adivinación, magia, brujería, superstición, ocultismo ne espiritismo. Lu stale libru, revista, horóscopo, película, cartel ne dede lu ca canción ca reeda magia, riníʼ ca ni de demonio, espiritismo ne rucaa ca ni binni chuulaʼdxiʼ ca ni ne guiníʼ íquecaʼ cadi malu ca ni. Stale costumbre ni raca lu ca funeral ca laaca zeedacani de ca demonio. Ca costumbre ca nga gúnicabe ofrenda para ca ni maʼ guti, mixaʼ ni raca ora gusaa ca gueʼtuʼ ca iza, chuʼ binni lutu ne gúnicaʼ xcaadxi práctica lu ca velorio. Stale binni riquiiñeʼ droga, gueza ne alcohol para guinábacaʼ ca demonio gudii poder laacaʼ (Gálatas 5:20, 21; Apocalipsis 21:8).

▸ Cap. 10, párr. 12; cap. 16, párr. 4

Jehová nga Dios ni jma napa poder ne ni bizáʼ guidubi naca universu (Apocalipsis 15:3). Pur nga, stibe guiráʼ cosa. Laabe nga Dios ni jma nandxóʼ, purtiʼ laasibe nápabe autoridad para guni mandarbe guiráʼ ni bizaʼbe (Salmo 24:1; Isaías 40:21-23; Apocalipsis 4:11). Maʼ gudixhe Jehová ley para guiráʼ ni bizáʼ. Laaca nápabe autoridad para cuibe tu guni mandar. Pa gannaxhiinu Dios ne guzúʼbanu stiidxaʼ, zusihuínninu laasibe nga nápabe derechu para guni mandarbe (1 Crónicas 29:11).

▸ Cap. 11, párr. 10

Guizáʼ malu nga laapenu guutinu ti baʼduhuiiniʼ ni caʼruʼ gale. Dede momentu gacaxiiñiʼ ti gunaa la? maʼ ti binni baʼduhuiiniʼ ca para Dios. Baʼduhuiiniʼ riʼ cadi nácabe parte de cuerpu stiʼ jñaabe.

▸ Cap. 13, párr. 5

Nácani ti tratamientu ni riquiiñeʼ ca doctor para gutiidicaʼ rini o tobi de ca tapa componente jma risaca zeeda lu rini ca lu cuerpu stiʼ binni, laacani nga: plasma, glóbulo rojo, glóbulo blanco ne plaqueta. Zanda gácani laaca rini stiʼ ti binni ni maʼ guca almacenar o rini stiʼ sti binni.

▸ Cap. 13, párr. 13

Lu Biblia, diidxaʼ disciplina qué riquiiñeʼ ni para si guiniʼni de ti castigu. Ora guicaanu disciplina, rizíʼdinu, raca educarnu ne raca corregirnu. Qué lica ridindené ne qué raca Jehová naduxhuʼ ora runi disciplinar laanu (Proverbios 4:1, 2). Guizáʼ jneza modo runi disciplinar Jehová dede rucaani binni gannaxhii disciplina ca (Proverbios 12:1). Rusiidiʼ ne runi disciplinar Jehová ca xpinni purtiʼ nadxiibe laacaʼ. Rábibe laacaʼ ximodo guni corregircaʼ ni cadi jneza riníʼ íquecaʼ ne nga rusiidiʼ laacaʼ guiníʼ íquecaʼ ne gúnicaʼ modo riuulaʼdxiʼ Dios. Ca padre ca naquiiñeʼ chinándacaʼ ejemplu stiʼ Jehová ora guni disciplinarcaʼ xiiñicaʼ. Naquiiñeʼ gacanécabe guiene xiiñicabe xiñee naquiiñeʼ guzuubacaʼ diidxaʼ. Laaca naquiiñeʼ gusiidicabe xiiñicabe gannaxhiicaʼ Jehová ne Stiidxaʼ, Biblia, ne gacanécabe laacaʼ guiénecaʼ ca principiu zeeda lu Biblia.

▸ Cap. 14, párr. 13

Nácacabe espíritu malu ni qué rihuinni ne jma nápacabe poder que binni. Ca ángel riʼ gúcacaʼ malu purtiʼ qué nuzuubacaʼ stiidxaʼ Dios ne gúcacaʼ enemigu stibe (Génesis 6:2; Judas 6). Bieegucabe Binidxabaʼ para gucaalúcabe Jehová (Deuteronomio 32:17; Lucas 8:30; Hechos 16:16; Santiago 2:19).

▸ Cap. 16, párr. 4