Pwako ni Shindakenyo Ngwo Uli mu Umwenemwene

 1. Liji “umwenemwene” ha yika linatale?

“KUCHI wanyingikine umwenemwene?” “Shina wasemukine mu umwenemwene?” “Hiwalinga miaka yingahi mu umwenemwene?” Kota hanakuhula yihula yino, ni yena kota hiunahula akwenu. Mba liji “umwenemwene” yika linalumbunuka? Kanji-kanji, twakuvuluka liji lino muze tunahanjika hakutwala ku ufulielo wetu, chize twakuwayila Zambi ni chize twakumbata mwono wetu. Atu waze ali “mu umwenemwene,” kananyingika yize Mbimbiliya yakulongesa, nawa kakukaula shimbi jamo. Yino yakwakwasa hanga atusuke ku malongeso a mahuza ni kupwa ni mwono upema chinji.—Yoa. 8:32.

 2. Kulita ni Yoano 13:34, 35, yika muyihasa kukwasa mutu kuzanga umwenemwene?

² Yika yakukwashile hanga uzange umwenemwene? Kota yitanga yipema ya Yela ja Yehova. (1 Petu. 2:12) Hanji zango lize ayo akwete mu kachi ko. Atu amwe kazangile umwenemwene hi hamukunda wa yize alilongesele ko, alioze, ha zango lize amwene mu kachi ka mandumbu. Yino kuyishi kutukomwesa, mumu Yesu kambile ngwenyi, tumbaji twenyi te maanyingika mumu lia kulizanga umwe ni mukwo. (Tanga Yoano 13:34, 35.) Alioze, hi zango ko wika liakukolesa ufulielo. Twatamba kulinga nawa yimwe.

 3. Yika muyihasa kulingiwa nyi ufulielo wetu muukola wika hamukunda wa zango lize mandumbu jetu akusolola?

³ Ufulielo wetu kuwatambile kukola wika ha mukunda wa zango lize lili hakachi ka atu ja Zambi. Mumu liaka? Achinyonga nyi ndumbu yoze uli mukulwana wa mu chikungulwila hanji pionelu malinga shili yinene. Nyi hanji ndumbwe makulemeka ku mbunge, hanji mapwa chitanganyanyi ni kwamba ngwenyi, kutushi ni umwenemwene. Yika mulinga? Shina mutalinga, nyi mununga ni kuwayila Yehova? Chili chilemu kwiwuluka ngwetu: Twatamba kukolesa ufulielo wetu hamukunda wa usepa wetu ni Yehova, mumu nyi twakolesa ufulielo wetu hamukunda wa yitanga ya akwetu kuuchi kukola. “Zuwo” lietu lia ufulielo, nelio kutwatambile kulitunga ni yikwata yilelu, chekwamba, ha chize twakwivwa ni chize twakunyonga. Alioze, twatamba kulitunga ni yikwata yilemu ngwe, shindakenyo ya yuma ni yinyingi. Yetwene, twatamba kupwa ni shindakenyo ngwo, mu Mbimbiliya muli umwenemwene wa Yehova.—Roma 12:2.

 4. Kulita ni Mateu 13:3-6, 20, 21, yika yakulingiwa kuli atu amwe muze ufulielo wo akuweseka?

⁴ Yesu kahanjikile hakutwala kuli atu waze te matayiza umwenemwene “ni uwahililo,” alioze makokoloka muze ufulielo wo maweseka. (Tanga Mateu 13:3-6, 20, 21.) Kota atu jacho kakanyingike ngwo, mapalika mu yihungumiona ha kukaula Yesu. (Mateu 16:24) Hanji kanyongene ngwo, mwono wa akwa-Kristu kuushi yipikalo, uli upema wika. Alioze, yetu eswe twakupinda mumu tuli hano hashi hapi. Kashika, ha mashimbu amwe, uwahililo wetu muuhasa kutoka ha mukunda wa yuma yize yakulingiwa ku mwono wetu.—Samu 6:6; Chilu. 9:11.

 5. Mumu liaka mutuhasa kwamba ngwetu, mandumbu anji kali ni shindakenyo ngwo, kawana umwenemwene?

⁵ Mandumbu anji kali ni shindakenyo ngwo, hanawane umwenemwene. Mumu liaka tunambe chocho? Mumu kukushi nyichimwe chuma chize chakupinjisa ufulielo wo, chipwe muze umwe mukwa-Kristu maalemeka ku mbunge hanji malinga shili. (Samu 119:165) Muze akupalika mu yeseko, ufulielo wo kuushi kukekema, alioze wakukola chinji. (Tia. 1:2-4) Mba yena, kuchi muhasa kukolesa ufulielo we?

 6. Ufulielo wa akwa-Kristu atangu wapwile ni kukatuka ha yika?

⁶ Ufulielo wa akwa-Kristu atangu, wakatukile ha “umwenemwene wa sango lipema,” chekwamba, ha yinyingi ya mu yisoneko ni ha malongeso a Kristu. (Ngala. 2:5) Umwenemwene wacho, unatale ha yeswe yize akwa-Kristu akufuliela, ngwe, shindakenyo ha chitapo cha ukuule wa Yesu ni ha uhindukilo wenyi. Postolo Paulu, kapwile ni shindakenyo ngwenyi, malongeso jacho kali amwenemwene. Mumu liaka? Mumu kapwile ni kuhengwola Yisoneko hanga apwe ni shindakenyo ni kulumbununa ngwo, “chatamba Kristu kufwa, nikuhinduka hakachi ka afu.” (Yili. 17:2, 3) Akwa-Kristu atangu kapwile ni kutayiza malongeso jacho ni kujikijila ha ukwaso wa spiritu yisandu hanga anyingike kanawa Liji lia Zambi. Ene kapwile ni kuhengwola malongeso jacho hanga apwe ni shindakenyo nyi chamwenemwene kanakatuka mu Liji lia Zambi. (Yili. 17:11, 12; Hepre. 5:14) Ufulielo wa akwa-Kristu jacho kuwakapwile ni kukatuka ha yize akwivwa ni yize akunyonga, hanji kuwayila Yehova mumu lia kuzanga kupwa mu kachi ka mandumbu. Alioze, ufulielo wo, wapwile ni kukatuka ha “yinyingi yeswe ya Zambi.”—Kolo. 1:9, 10.

 7. Kufuliela ha umwenemwene wa mu Mbimbiliya muchitukwasa kulinga yika?

⁷ Umwenemwene wa mu Liji lia Zambi kuushi kwalumuka. (Samu 119:160) Chakutalilaho, nyi umwe ndumbu mu chikungulwila matulemeka ku mbunge hanji malinga shili yinene, nihindu umwenemwene muununga. Chipwe ngwe mutupalika mu kapinda hanji mu yipikalo, nihindu umwenemwene kuuchi kwalumuka. Kashika, twatamba kunyingika kanawa malongeso a mu Mbimbiliya ni kupwa ni shindakenyo ngwo, kali amwenemwene. Ufulielo uze unakatuka mu umwenemwene wa mu Mbimbiliya, muutukwasa kunyongonona, chipwe muze mutupalika mu yeseko. Ufulielo wacho muukola ngu, ngwe nguji. Yika watamba kulinga hanga upwe ni shindakenyo ngwo uli ni umwenemwene?

 8. Kulita ni 2 Timoteu 3:14, 15, yika yakwashile Timoteu kupwa ni shindakenyo ngwo, kali ni umwenemwene?

⁸ Timoteu kapwile ni shindakenyo ngwenyi, kali ni umwenemwene. Yika yamukwashile kupwa ni shindakenyo yacho? (Tanga 2 Timoteu 3:14, 15.) Naye ni kako e amukwashile kunyingika “sona jisandu.” Alioze, iye mwene mwe wasele tachi ni mashimbu hanga alilongese kanawa Yisoneko yacho. Chino chamukwashile kusa “chinyingi” ha umwenemwene. Ha kupalika cha mashimbu, Timoteu, naye ni kako, yapwa akwa-Kristu. Timoteu kota kakomokene chinji ha kumona zango lize liapwile ha kachi ka tumbaji a Yesu, kazangile chinji kupwa hamwe ni mandumbu jenyi akwa-Kristu ni kwakwasa. (Fwili. 2:19, 20) Ufulielo wa Timoteu, kuwakakolele mumu lia zango lize amwene hali mandumbu, alioze, ha yinyingi yize yamukwashile kupwa sepa lia Yehova. Muze unatange Mbimbiliya, ni yena watamba kusa shindakenyo ha yize unatange. Chino muchikukwasa kupwa ni shindakenyo ngwo, yize unalilongesa hakutwala kuli Yehova yili yamwenemwene.

 9. Yikuma yika yitatu yize watamba kunyingika kanawa?

⁹ Watamba kunyingika kanawa yikuma yitatu, mba upwe ni shindakenyo. Chikuma chitangu: Yehova Zambi, mwe watangile yuma yeswe. (Kutuhu. 3:14, 15; Hepre. 3:4; Uso. 4:11) Chamuchiali: Mbimbiliya yili Liji lia Zambi. (2 Timo. 3:16, 17) Chamuchitatu: Yehova kali ni chizavu cha atu waze akusongwela kuli Kristu, chizavu chacho kakuchivuluka ngwo, Yela ja Yehova. (Iza. 43:10-12; Yoa. 14:6; Yili. 15:14) Kuwafupiwile kulilongesa yuma yeswe yili mu Mbimbiliya mba unyingike yikuma yino. Muze unalilongesa Mbimbiliya, watamba kulilongesa ni kanawa hanga upwe ni shindakenyo ngwo uli mu umwenemwene.—Roma 12:1.

10. Amu hitwapwa ni shindakenyo ya umwenemwene, chuma chika nawa twatamba kulinga?

¹⁰ Amu hiwalilongesa yikuma yitatu yilemu, umwenemwene hakutwala kuli Zambi, Mbimbiliya ni atu ja Zambi, chuma chika nawa watamba kulinga? Watamba kunyingika kanawa Mbimbiliya mba ukwase kanawa akwenu hanga no anyingike umwenemwene. Mumu liaka? Mumu yetu akwa-Kristu tuli ni chiteli chinene: Kulongesa akwetu umwenemwene.b (1 Timo. 4:16) Muze twakukwasa akwetu hanga apwe ni shindakenyo ya umwenemwene wa mu Mbimbiliya, ufulielo wetu wakukola chinji.

11. Kuchi mutuhasa kwimbulula Paulu ha kulongesa akwetu?

¹¹ Muze Postolo Paulu apwile ni kulongesa atu, kapwile ni kusa tachi hanga ‘akunune ha kutwala kuli Yesu, ku Shimbi ya Mose, ni ku mikanda ya aprofeta.’ (Yili. 28:23) Kuchi mutuhasa kwimbulula Paulu? Muze tunalongesa, twatamba kushindakenya ha yikuma yilemu. Twatamba kukwasa alongi jetu a Mbimbiliya hanga apwe ni kukwata yiyulo kulita ni Yisoneko. Kutwazangile hanga ayo atayize umwenemwene mumu lia usepa wetu. Tunazange hanga ene anyingike ngwo, yuma yize analilongesa hakutwala kuli Zambi yili yamwenemwene.

12-13. Kuchi yisemi mahasa kukwasa ana jo hanga anunge mu umwenemwene?

¹² Nyi uli chisemi, kota unazange chinji hanga ana je anunge mu umwenemwene. Hanji wakunyonga ngwo, nyi ana je mapwa ni masepa apema mu chikungulwila, makola ku ufulielo. Alioze, hi wika ko masepa apema makwasa ana je hanga apwe ni shindakenyo ngwo, kali ni umwenemwene. Ayo katamba kupwa ni usepa upema ni Zambi ni kupwa ni shindakenyo ngwo, Mbimbiliya yakulongesa umwenemwene.

¹³ Yisemi katamba kulinga yuma yinji, hi wika ko kulongesa ana umwenemwene hakutwala kuli Zambi. Nwatamba kupwa chilweza chipema hali ana jenu ha kupwa alongi apema a Mbimbiliya. Yisemi katamba kusa mashimbu hanga apukune ha yuma yeswe yize akulilongesa. Nyi malinga chino, muchipwa chashi kukwasa ana jo hanga embulule chilweza cho. Yisemi katamba kukwasa ana jo hanga anyingike kukalakala ni yikwata yakulilongesa nayo Mbimbiliya, ngwe chize akukwasa alongi jo. Nyi malinga chocho, makwasa ana jo hanga azange Yehova ni kujikijila hali “ndungo wamwenemwene, wa kukanyama,” yoze wakutwaha kulia cha ku spiritu. (Mateu 24:45-47) Yisemi, kanda nulongesa wika ana jenu yuma yikehe-yikehe ya mu Mbimbiliya. Alioze, alongesenu nawa “yuma yikalu ya Zambi” kulita ni miaka ni chize ayo apwa. Nyi nwalinga chino, munukwasa ana jenu hanga apwe ni ufulielo ukolo.—1 Kori. 2:10.

14. Mumu liaka twatamba kulilongesa uprofeto wa mu Mbimbiliya? (Tala nawa mushete unambe ngwo, “Shina Muhasa Kulumbununa Uprofeto uno?”)

¹⁴ Uprofeto wa mu Mbimbiliya, uli ni ulemu unji. Mumu wakukolesa ufulielo wetu hali Yehova. Uprofeto uka wakukolesa ufulielo we? Kota muhasa kunyonga ha uprofeto wa “matangwa a kusula.” (2 Timo. 3:1-5; Mateu 24:3, 7) Uprofeto uka hiwamanunuka uze muuhasa kukolesa ufulielo we? Chakutalilaho, shina unanyingika kulumbununa uprofeto uli ha Daniele kapitulu 2, hanji Daniele 11 uze wamanunukine ni uze unamanunuka?c Ufulielo wetu nyi wakatuka ha yinyingi ya mu Mbimbiliya muupwa ukolo chinji. Achinyonga ha chilweza chize mandumbu a mu Alemanha ahichikile muze apwile ni kwahungumiona ha Jita Yinene Yamuchiali ya Hashi Heswe. Ayo kakanyingikine kanawa uprofeto uze unahanjika hakutwala ku matangwa a kusula, alioze, kapwile ni kufuliela chinji ha Liji lia Zambi.

15-17. Kuchi tunanyingika ngwetu, kulilongesa Mbimbiliya chakwashile mandumbu kunyongonona muze te anaahungumiona kuli A-Nazista?

¹⁵ Muze A-Nazista apwile ni kutumina chifuchi cha Alemanha, mandumbu anji kaasele mu mazuwo a ususu ni kwatuma kulinga milimo yikalu. Hitler ni kapitau wa maswalale SS, avuluka ngwo, Heinrich Himmler, kapwile ni kuvwila kole Yela ja Yehova. Umwe ndumbu wa pwo kambile ngwenyi, Himmler kambile kuli amwe mandumbu a mapwo apwile mu zuwo lia ususu ngwenyi: ‘Yehova wenu mahasa kuyula mu malilu, alioze hano hashi yetu tunayulaho! Mutunusolwela waze manunga miaka yinji, yetu nyi yenu!’ Yika yakwashile atu ja Yehova kunyongonona?

¹⁶ Alongi jacho a Mbimbiliya kanyingikine ngwo, Wanangana wa Zambi waputukile kuyula ha mwaka 1914. Ayo kakakomokene ha yihungumiona yize amwene hanji apalikile. Alioze, yanyingika nawa ngwo, kukushi Wanangana uze muuhasa kukinda Yehova alinge yize anazange. Hitler, te kechi kuhasa kuhwisa uwayilo wamwenemwene, chipwe kusa umwe unguvulu uze muupwa ni ndundo jinji kuhiana Wanangana wa Zambi. Mandumbu jetu kapwile ni shindakenyo ngwo, unguvulu wa Hitler muuhwa limwe tangwa.

¹⁷ Mandumbu jacho kapwile ni shindakenyo ha yize apwile ni kufuliela. Ha mashimbu akehe wika unguvulu wa Hitler yiwuhwa. Heinrich Himmler, lunga yoze wambile ngwenyi, “hano hashi yetu tunayulaho,” yachina hanga apulwile mwono wenyi. Muze te anachina, yaliwana ni umwe ndumbu yoze wapwile mu zuwo lia ususu te avuluka ngwo, Lübke. Himmler, yevwa sonyi jinji, chocho yahula ndumbu Lübke ngwenyi: “Longi wa Mbimbiliya, haliapwila yika muyilingiwa?” Ndumbu Lübke yakumbulula ngwenyi, Yela ja Yehova kanyingikine ngwo, unguvulu wa A-Nazista te muuhwa, nawa te maatusula mu mazuwo a ususu. Himmler, yoze wapwile ni kwamba yuma yipi hali Yela ja Yehova, hazehene yahola kulu. Hakupalika cha mashimbu akehe, yalisukika. Yika lusango yono anatulongesa? Kulilongesa Mbimbiliya ni uprofeto wamo, muchitukwasa kufuliela chinji hali Zambi ni kumana ngu ha mashimbu a lamba.—2 Petu. 1:19-21.

18. Kulita ni mukanda wa Yoano 6:67, 68, mumu liaka twatamba kupwa ni “yinyingi yeswe ni mana”?

¹⁸ Yetu eswe twatamba kusolola zango; mumu che chilayi chakusolola akwa-Kristu amwenemwene. Alioze, twatamba kupwa nawa ni “yinyingi yeswe ni mana.” (Fwili. 1:9) Nyi kutwapwile ni yitanga yino, muchipwa chashi kutupiangula “ni kuhungumioka kweka ni kweka ni fuji yeswe ya longeso, ku kwonga cha atu.” (Efwe. 4:14) Ku sekulu yitangu, muze tumbaji anji a Yesu alitunyine kumukaula, postolo Petulu yamba ni shindakenyo yeswe ngwenyi, Yesu kali ni “maliji a mwono wa mutolo.” (Tanga Yoano 6:67, 68.) Chipwe ngwe kakanyingikine kanawa ulumbunwiso wa maliji jacho, nihindu Petulu yanunga ni kushishika kuli Kristu, mumu te kananyingika umwenemwene hakutwala kuli iye. Kashika, ni yena nunga ni kukolesa ufulielo we ha yize Mbimbiliya yakulongesa. Chino, muchikukwasa kukolesa ufulielo we ni kukumba yeseko yeswayo muyisoloka. Nawa muhasa kukwasa akwenu hanga akolese ufulielo wo.—2 Yoa. 1, 2.