“Tutayize Kuya ni Yena”

1, 2. (a) Yika yize Yehova ambile ngwo te muyilingiwa ha mashimbu jetu? (b) Yihula yika muyipwa kukumbulula ha mutwe uno? (Tala chizulie chili hauputukilo.)

YEHOVA kambile ngwenyi ha mashimbu jetu, “kumi lia malunga a ku mavungu a malimi eswe makakwata ku hina lia mutu umuwika Ka-Yunda nikwamba ngwo, ‘Tutayize kuya ni yena mumu hitwevwa lufuma ngwo, Zambi hwali hamwe ni yenu.’” (Zekaria 8:23) “Ka-Yunda” kanalumbunuka atu eswe waze Zambi akuwayisa ni spritu yisandu hanga atwame mu malilu. Nawa kanavuluka ngwo “A-Izalele a Zambi.” (A-Ngalishia 6:16) “Kumi lia malunga” kanalumbunuka atu waze ali ni kutalatala cha kutwama hano hashi ku miaka yeswe. Ayo kananyingika ngwo Yehova hanawahisa chizavu chino cha akwa-Kristu akuwayisa nawa kananyingika ngwo chili chilemu chinji kuwayila Zambi hamwe no.

² Chizechene ngwe profeta Zekaria, Yesu kambile ngwo, atu ja Zambi makalinunga. Iye yatesa waze ali ni kutalatala cha kutwama mu malilu ngwe “mbunga yikepe ya mapanga,” alioze waze ali ni kutalatala cha kutwama hano hashi ngwe “mapanga akwo.” Ha chino, Yesu kambile ngwenyi ayo eswe te kumapwa “chendo chimuwika” nawa te mamukaula ngwe ‘kafunga ko.’ (Luka 12:32; Yoano 10:16) Amu kuli yizavu yaali, amwe mahasa kulihula ngwo: (1) Shina chili ni ulemu musono mapanga akwo kunyingika majina ja akwa-kristu eswe akuwayisa? (2) Kuchi akwa-Kristu akuwayisa atamba kunyonga hali ayo ene? (3) Nyi umwe mutu mu chikungulwila che maputuka kulia mbolo ni kunwa vinyu kuchi watamba kumunyongena? (4) Mumu liaka kutwatambile kulipikala hakutwala ku unji wa atu waze akulia mbolo ni kunwa vinyu ha Chiwanyino? Mutwe uno muukumbulula yihula yino.

3. Mumu liaka hi chashi ko kunyingika ni ushindakenyo weswe majina ja atu waze ali mu chizavu cha 144,000?

³ Shina chili ni ulemu musono mapanga akwo kunyingika majina ja akwa-kristu eswe akuwayisa? Ka. Mumu liaka? Mumu chili chikalu kuli yetu kupwa ni ushindakenyo nyi akwa-Kristu jacho makatambula lume chiwape cho.^[1] (Tala maliji ali mushi.) Chipwe ngwe Zambi hanaasakula hanga akaye mu malilu, nihindu o makatambula chiwape cho nyi manunga ni kushishika. Satana kanachinyingika, kashika iye akuzachisa ‘maprofeta a mahuza’ hanga eseke ‘kwaapiangula.’ (Mateu 24:24) Akwa-Kristu akuwayisa kechi kuhasa kupwa ni ushindakenyo ngwo makatambula chiwape cho ndo hoho Yehova masolola pundu kuli ayo ngwo, kali akwa-kushishika. Yehova kakwaaha chijikilo chacho, muze kanda achifwa hanji ku uputukilo wa “luyinda munene.”—Usolwelo 2:10; 7:3, 14.

4. Nyi kuchishi ni ulemu musono kunyingika majina ja akwa-Kristu eswe akuwayisa waze achili hano hashi, mba kuchi mutuhasa ‘kuya’ no?

⁴ Nyi kuchishi ni ulemu musono kunyingika majina ja akwa-Kristu eswe akuwayisa waze achili hano hashi, mba kuchi mapanga akwo mahasa ‘kuya’ no? Mbimbiliya yinambe ngwo “kumi lia malunga” te mulikwata “ku hina lia mutu umuwika Ka-Yunda ni kwamba ngwo: ‘Tutayize kuya ni yena mumu hitwevwa lufuma ngwo, Zambi hwali hamwe ni yenu.’” Versu yino ya Mbimbiliya yinavuluka Ka-Yunda umuwika. Alioze maliji wano “yena” hanji “hamwe ni yenu,” kanasolola ngwo kali atu anji. Chino chinalumbunuka ngwo Ka-Yunda hi mutu umuwika ko, alioze kali atu eswe a mu chizavu cha akwa-Kristu akuwayisa. Mapanga akwo kanachinyingika, nawa o kakuwayila Yehova hamwe ni akwa-chizavu chacho. O kafupuwile kunyingika majina ja mutu ni mutu wa mu chizavu chacho nawa keshi kukaula mutu niumwe wa kuli ayo. Yesu mwe Mwata wetu, nawa Mbimbiliya yinambe ngwo twatamba kukaula wika iye.—Mateu 23:10.

5. Utowezo uka akwa-Kristu akuwayisa atamba kunyonga chinji, nawa mumu liaka?

⁵ Mukwa-Kristu wakuwayisa katamba kunyonga chinji hakutwala ku utowezo uze uli ha mukanda 1 A-Korindu 11:27-29. (Tanga.) Kuchi ndumbu yoze wakuwayisa mahasa kulia mbolo ni kunwa vinyu ha Chiwanyino cha Kwiwuluka Kufwa cha Yesu ni nyonga lize kulialitele? Nyi mutu wacho keshi ni usendo upema ni Yehova nawa keshi kushishika kuli iye, nyi maputuka kulia mbolo ni vinyu, iye kanahono vumbi. (A-Hepreu 6:4-6; 10:26-29) Utowezo uno ulemu unewulwisa akwa-Kristu akuwayisa hanga ashishike nyi kanazange kutambula “kwononona cha kutambika cha kwilu cha Zambi muli Kristu Yesu.”—A-Fwilipu 3:13-16.

6. Kuchi akwa-kristu akuwayisa atamba kunyonga hali ayo ene?

⁶ Paulu kambile kuli akwa-Kristu akuwayisa ngwenyi: “Yami, funge muli Mwene, ngunaliumbu kuli yenu, nukende ngwe chinatela kutambika chize hananutambika nacho.” Kuchi ayo atamba kuchilinga? Paulu yalumbununa ngwenyi: “Mbunge yeswe ya kulikehesa, ni umbovu, hamwe ni uhomboloji, nikulihumikiza umwe kuli mukwo mu zango. Fungenu ni muya wa sambukila, ni tachi jenu jeswe, kununga cha spiritu.” (A-Efwesu 4:1-3) Spiritu yisandu ya Yehova yakukwasa tuvumbi twenyi hanga apwe ni mbunge ya kulikehesa, chakuhona kulinangamisa. (A-Kolosu 3:12) Kashika akwa-Kristu akuwayisa katambile kunyonga ngwo o kali alemu chinji kuhiana akwo. Ayo kananyingika ngwo, Yehova keshi kuhana spiritu yinji kuli akwa-Kristu akuwayisa kuhiana tuvumbi akwo. Nawa ayo keshi kunyonga ngwo mahasa kunyingika chinji umwenemwene wa Mbimbiliya kuhiana mandumbu akwo. Nawa katambile kulweza mutu niumwe ngwo neye hamuwayisa nawa ngwo katamba kuputuka kulia mbolo ni kunwa vinyu ha Chiwanyino. Alioze, ayo kakulikehesa ni kunyingika ngwo Yehova wika mwe mahasa kusakula mutu hanga aye mu malilu.

7, 8. Yika yize akwa-Kristu akuwayisa katambile kulinga, nawa mumu liaka?

⁷ Chipwe ngwe akwa-Kristu akuwayisa kakumona ngwo chili chilemu ha kwasakula hanga aye mu malilu, nihindu o keshi kushimbwila hanga alemese kuli akwo. (A-Efwesu 1:18, 19; tanga A-Fwilipu 2:2, 3.) Ayo kananyingika nawa ngwo muze Yehova akwawayisa, iye keshi kunyingikisa kuwayisa chacho kuli mutu niumwe. Kashika ndumbu yoze awayisa katambile kukomoka ni atu amwe keshi kutayiza ngwo iye kali wakuwayisa. Mumu ayo kananyingika ngwo Mbimbiliya yakutulweza hanga twehuke kutayiza-chamutayijila mutu yoze matulweza ngwo Zambi hamwaha chimwe chiteli chilemu. (Usolwelo 2:2) Amu mukwa-Kristu wakuwayisa keshi kushimbwila hanga akwo amulemese chinji kuhiana, kashika iye katambile kulweza kuli atu atangu waze maliwana no ngwo kamuwayisa. Kwamba pundu, iye katambile kwamba chocho kuli mutu niumwe. Nawa katambile kulisamba hakutwala ku yuma yilemu yize makalinga mu malilu.—1 A-Korindu 1:28, 29; Tanga 1 A-Korindu 4:6-8.

⁸ Akwa-Kristu akuwayisa katambile kupalikisa wika mashimbu hamuwika ayo ene ngwe miata a chimwe chota. Ayo nawa katambile kufupa akwa-Kristu akwo akuwayisa hanga ahanjike hakutwala ku kutalatala cho cha mu malilu, hanji kulikungulula mu yizavu hanga ahengwole Mbimbiliya. (A-Ngalishia 1:15-17) Nyi akwa-Kristu akuwayisa malinga chocho, chikungulwila kuchichi kupwa ni sambukila. Ha chino, o malinga yuma yize kuyalitele ni spiritu yisandu, mumu ye yakukwasa atu ja Zambi hanga apwe ni sambukila ni unungiso.—Tanga A-Roma 16:17, 18.

9. Mumu liaka twatamba kukeya hakutwala ku chize twakumona waze akulia mbolo ni kunwa vinyu ha Chiwanyino? (Tala kasha ‘Zango Kulishi Kulinga Chize Kuchatele.’)

⁹ Kuchi twatamba kumona mandumbu ni mapangi akuwayisa? Yesu kambile kuli tumbaji twenyi ngwenyi: “Yenu eswe nuli mandumbu.” Iye nawa ngwenyi: “Mweswawo malinangamisa, kumakamukehesa; mweswawo malikehesa, kumakamunangamisa.” (Mateu 23:8-12) Kashika hi chipema ko kulemesa chinji umwe mutu, chipwe ngwe kali ndumbu ya Kristu. Muze Mbimbiliya yakwamba hakutwala kuli makulwana amu chikungulwila, yakutukolweza hanga twimbulule ufulielo wo, alioze kuyishi kutulweza ngwo twatamba kupwisa umwe mutu ngwe mwata wetu. (A-Hepreu 13:7) Ewa, Mbimbiliya yakwamba ngwo amwe “katela kuaweza ulemu.” Mumu ayo kali “waze akuyula kanawa” nawa “waze akukilikita mu milimo ya kwambujola liji ni kulongesa.” (1 Timoteu 5:17) Nyi mutulemesa chinji akwa-Kristu akuwayisa hanji kwaaha umwe ulemu wahiana mutuhasa kwivwisa sonyi. Chikwo nawa, chino muchihasa kwalingisa hanga alinangamise. (A-Roma 12:3) Niumwe wa kuli yetu katambile kulinga yuma yino hanga alingise mandumbu ja Kristu akuwayisa alingile upi uno upwahaha!—Luka 17:2.

10. Kuchi muhasa kusolola vumbi kuli akwa-Kristu akuwayisa?

¹⁰ Kuchi mutusolola ngwetu twakuvumbika mandumbu waze akuwayisa kuli Yehova? Kutwatambile kwaahula chize awayishile. Chino chili chikuma cha ku mbunge ya mutu mwene, chize kutwatambile kunyingika. (1 A-Tesalonika 4:11; 2 A-Tesalonika 3:11) Nawa kutwatambile kunyonga ngwetu malunga jo, ni mapwo jo, ni yisemi jo, hanji ni asoko jo no kali akuwayisa. Mutu keshi kuhinga kutalatala chenyi kuli asoko jenyi. (1 A-Tesalonika 2:12) Nawa twatamba kwehuka kuhula yuma yize muyihasa kupinjisa akwetu. Chakutalilaho, kutwatambile kuhula pwo lia ndumbu wakuwayisa chize aye akwivwa hakutwala ku chikuma chakutwama ukawenyi hano hashi ku miaka yeswe chakuhona mukwo-lunga. Kwamba umwenemwene, yetu mutuhasa kupwa ni ushindakenyo ngwetu mu paraisu, Yehova ‘makayukisa usona wa waze eswe atwama ni mwono.’—Samu 145:16.

11. Kuchi mutulifunga yetwene nyi mutwehuka “kukomoka chinji yitanga ya atu”?

¹¹ Nyi kutwalemesele chinji akwa-Kristu akuwayisa kuhiana akwa-Kristu akwo, mutulifunga yetwene. Mumu liaka? Mumu Mbimbiliya yinatulweze ngwo, mukuhasa kupwa “mandumbu a kwonga” mu chikungulwila waze mahasa kwamba ngwo kali akwa-Kristu akuwayisa. (A-Ngalishia 2:4, 5; 1 Yoano 2:19) Nawa akwa-Kristu akwo mahasa kuhona ushishiko. (Mateu 25:10-12; 2 Petulu 2:20, 21) Alioze nyi mutwehuka “kukomoka chinji yitanga ya atu,” kutuchi kukaula akwetu, chipwe akwa-Kristu akuwayisa, hanji waze twanyingika chinji, hanji waze aputukile kulu kulingila Yehova. Ha chino, nyi ayo matanguka hanji mahichika chikungulwila, ufulielo wetu muli Yehova kuuchi kukeketela chipwe kwecha kumuwayila.—Yundase 16.

12, 13. Mumu liaka kutwatambile kulipikala hakutwala ku unji wa atu waze akulia mbolo ni kunwa vinyu ha Chiwanyino?

¹² Ha miaka yinji kunyima kwalula cha waze akulia mbolo ni kunwa vinyu ha Chiwanyino te kuchinatepuluka. Alioze haliapwila kwalula chacho kuchinoko chinji ha mwaka ni mwaka. Shina twatamba kulipikala hakutwala ku unji wo? Ka. Tutalenu mumu liaka.

¹³ “Yehova ‘kananyingika atu jenyi.” (2 Timoteu 2:19) Yehova kalisa chinji ni mandumbu waze akwalula atu waze akulia mbongo ni kunwa vinyu ha Chiwanyino, mumu o keshi kunyingika pundu lume yoze uli wakuwayisa. Kwalula chacho chinachingi ni waze akunyonga ngwo kali akuwayisa alioze ka. Chakutalilaho, amwe atu waze apwile ni kulia mbolo ni kunwa vinyu, ha kupalika cha matangwa hi yecha kuchilinga. Akwo kota ha mukunda wa mahesu-hesu, mba hi maputuka kufuliela ngwo, makayula ni Kristu mu malilu. Kwamba umwenemwene, kutwanyingikine kanawa unji wa akwa-Kristu akuwayisa waze achili hano hashi.

14. Yika Mbimbiliya yinambe hakutwala kwalula cha akwa-kuwayisa waze makapwa hano hashi, muze luyinda munene makaputuka?

¹⁴ Mukukapwa akwa-Kristu akuwayisa ku yihela yinji hano hashi muze Yesu makeza ni kwaasaka hanga aye no mu malilu. Mbimbiliya yinambe ngwo, Yesu “Kumakatuma angelo jenyi ni liji linene lia chitavwi, o makakungulula waze hanaatongola kuli iye ku fuji jiwana, ku songo limwe lia malilu ndo ku songo likwo.” (Mateu 24:31) Mbimbiliya yinasolola nawa ngwo, ku matangwa akusula hashi muhakapwa akwa-Kristu akuwayisa akehe. (Usolwelo 12:17) Alioze chino kuchishi kutongola unji wa akwa-Kristu akuwayisa waze makapwa hano hashi muze luyinda munene maputuka.

15, 16. Yika yize twatamba kunyingika hakutwala kuli 144,000 waze akusakula kuli Yehova?

¹⁵ Yehova mwe unanyingika shimbu lize masakula akwa-Kristu akuwayisa. (A-Roma 8:28-30) Yehova kaputikile kusakula akwa-Kristu akuwayisa muze Yesu te hamuhindwisa. Chinalumbunuka ngwo ku sekulu yitangu, akwa-Kristu eswe amwenemwene te akuwayisa. Hakupalika cha kama ja miaka, anji akuli waze apwile ni kwamba ngwo kali akwa-Kristu, kakakawile Kristu ni mbunge yeswe. Chipwe chocho, ha miaka yacho, Yehova yawayisa ndambu ya atu waze apwile akwa-Kristu amwenemwene. O kapwile ngwe tiliku yize Yesu ambile ngwo te muyikola hamwe ni yambu. (Mateu 13:24-30) Ha matangwa wano akusula, Yehova machinunga ni kusakula atu hanga alinge chihanda cha 144,000.^[2] (Tala maliji ali mushi.) Kashika nyi Zambi manyonga kusakula amwe atu shimbu songo kanda lichiza, pundu kutwatambile kuhangulula yize analingi. (Izaia 45: 9; Daniele 4:35; tanga A-Roma 9:11, 16.)^[3] (Tala maliji ali mushi.) Twatamba kukanyama hanga tuhone kupwa ngwe akwa-milimo waze aputukile kulinyenyeta ha yize mwenya zuwo alingile hali waze aputukile mulimo kasula.—Tanga Mateu 20:8-15.

¹⁶ Hi eswe ko waze makaya mu malilu kanalingi chihanda cha “ndungo wamwenemwene, wa kukanyama.” (Mateu 24:45-47) Chizechene ngwe kusekulu yitangu, ni musono nawa, Yehova ni Yesu kanazachisa atu akehe wika hanga alise hanji alongese atu anji. Zambi kazachishile akwa-Kristu akehe wika ku sekulu yitangu hanga asonekene Yisoneko ya akwa-Kristu ya Ngregu. Ni musono nawa, akwa-Kristu akehe wika ali ni chiteli cha kuhana “kulia ha mwaka” walita kuli atu ja Zambi.

17. Yika yize twalilongesa ha mutwe uno?

¹⁷ Yika yize twalilongesa ha mutwe uno? Yehova kanazange kuhana mwono wa mutolo kuli atu anji hano hashi ni mu malilu kuli waze makayula hamwe Yesu. Yehova kakuwahisa tuvumbi twenyi eswe, “Ka-Yunda” ni “kumi lia malunga,” nawa kakuzanga hanga eswe ononokene ku shimbi yoyene nawa hanga ashishike. Eswe katamba kulikehesa. Eswe katamba kumuwayila hamuwika ni sambukila. Nawa eswe katamba kusa tachi hanga mu chikungulwila mupwe sambukila. Yetu hitwakundama ku songo, kashika tunungenu ni kuwayila Yehova ni kukaula Kristu ngwe mapanga a chendo chimuwika.