¿Chuqui yom yʌl cheʼ mach i chaʼañoñicla pañimil?

 1. ¿Chuqui tsiʼ yʌlʌ Jesús ti jiñi cojix bʌ acʼʌlel cheʼ wʌʼto an ila ti Pañimil?

CHEʼ bʌ Jesús muʼto i cajel ti chʌmel, tsiʼ pʌsʌ chaʼan mucʼʌch i cʼojoʼtan bajcheʼ mi caj i ñusañob jiñi xcʌntʼañob i chaʼan. Jin chaʼan, tsiʼ cʼajtibe i Tat ti oración: «Maʼañic mij cʼajtibeñet chaʼan maʼ pʌyob loqʼuel ti pañimil. Mij cʼajtibeñet chaʼan maʼ chʌcʌ qʼuelob ame yajlicob ti jontolil. Mach i chaʼañobic pañimil cheʼ bajcheʼ joñon mach i chaʼañonic pañimil jaʼel» (Juan 17:15, 16). Ti ili oración, Jesús tsiʼ pʌsʌ chaʼan miʼ wen cʼuxbin yicʼot chaʼan wen ñuc i cʼʌjñibal jiñi tʼan tsaʼ bʌ i yʌlʌ tiʼ tojlel chaʼtiquil uxtiquil xcʌntʼañob i chaʼan ti jiñi bʌ acʼʌlel: «Mach i chaʼañeticla pañimil» (Juan 15:19). Cheʼ bajcheʼ tsaʼ laj cʌñʌ, Jesús ñuc i cʼʌjñibal tsiʼ qʼuele cheʼ maʼañic miʼ yotsañob i bʌ tiʼ chaʼan bʌ pañimil jiñi woli (choncol) bʌ i tsajcañob.

 2. ¿Baqui bʌ «pañimil» tsiʼ taja ti tʼan Jesús?

² ¿Baqui bʌ «pañimil» tsiʼ taja ti tʼan Jesús? Jiñʌch jiñi wiñicob xʼixicob (quixtañujob) ñajt bʌ añob tiʼ tojlel Dios añoʼ bʌ tiʼ cʼʌb Satanás, muʼ bʌ i bajñel sʌclañob i wenlel yicʼot muʼ bʌ i qʼuelob i bʌ ti ñuc (Juan 14:30; Efesios 2:2; 1 Juan 5:19). Jin chaʼan, jiñi Biblia mi yʌl: «Jiñi muʼ bʌ i cʼuxbin i chaʼan bʌ pañimil, miʼ contrajin Dios» (Santiago 4:4). Chaʼan mi lac chʌn ajñel tiʼ cʼuxbiya Dios, mi caj laj qʼuel joʼchajp bajcheʼ yom mi lac chumtʌl ti ili pañimil (mulawil), pero maʼañic mi laj cotsan lac bʌ: Xucʼulonla tiʼ Yumʌntel Dios i maʼañic mi la cochel ti política, mi lac lʌtʼ i ñaʼtʌbal pañimil, i pʼisol jach yom mi lac xoj lac pislel, wen jach bajcheʼ yom chumulonla yicʼot yom lʌpʌl lac chaʼan tiʼ pejtelel lac mʌctʌjib.

 3. a) ¿Chuqui tsiʼ mele Jesús chaʼan maʼañic miʼ yotsan i bʌ ti política? b) ¿Chucoch mi yʌl jiñi Biblia chaʼan chocbilob tilel tiʼ qʼuexol Jesús jiñi xcʌntʼañob i chaʼan? (Qʼuele jiñi nota.)

³ Jesús maʼañic tsiʼ yotsa i bʌ ti política wʌʼ ti pañimil, tsiʼ chaʼle subtʼan chaʼan bʌ i Yumʌntel Dios, i jiñʌch tsaʼ bʌ waʼchoconti chaʼan miʼ yochel ti Rey ti jiñi yumʌntel (Daniel 7:13, 14; Lucas 4:43; 17:20, 21). Jin chaʼan, tsaʼ mejli i suben jiñi gobernador bʌ ti Roma, Poncio Pilato: «Mach wʌʼic chʼoyol c yumʌntel ti pañimil» (Juan 18:36). Ili ora woli (yʌquel) lac sajcʌben i ejemplo jaʼel. ¿Bajcheʼ? Jiñʌch cheʼ xucʼulonla ti jiñi Yumʌntel yicʼot ti jiñi rey Jesucristo i cheʼ mi lac sub chaʼan bʌ jiñi yumʌntel tiʼ petol Pañimil (Mateo 24:14). Jiñi apóstol Pablo tiʼ tsʼijbu: «Jiñi chaʼan chocbilon lojon majlel tiʼ qʼuexol Cristo [...]. Mic subeñet lojon ti wocol tʼan cheʼ bajcheʼ Cristo: Laʼ utsʼesʌntic laʼ pusicʼal yicʼot Dios» (2 Corintios 5:20).a

 4. ¿Bajcheʼ an i pʌsʌyob i xucʼtʌlel tiʼ Yumʌntel Dios jiñi isujm bʌ xñoptʼañob? (Qʼuele jiñi recuadro «Jiñi ñaxam bʌ xñoptʼañob maʼañic tsiʼ yotsayob i bʌ ti política».)

⁴ Juntiquil chocbil bʌ majlel ti yambʌ país (embajador), yajcʌbil chaʼan miʼ majlel tiʼ wenta juntiquil yumʌl. Jin chaʼan, maʼañic miʼ yotsan i bʌ mi an wocol ti jiñi país baqui miʼ chojquel majlel. Pero mucʼʌch i coltan jiñi yumʌl waʼchocobil bʌ tiʼ tojlel. Cheʼ miʼ melob jaʼel jiñi xñoptʼañob bombiloʼ bʌ añoʼ bʌ i «lumal yaʼ ti panchan» (Filipenses 3:20). Ili chocbiloʼ bʌ tilel tiʼ qʼuexol Jesús wen chʼejloʼ bʌ, woliʼ chʌn chaʼleñob subtʼan chaʼan jiñi Yumʌntel, jiñi chaʼan, an i coltayob cabʌl millón «yambʌ tiñʌmeʼob» i chaʼan Cristo chaʼan miʼ lʌcʼtesañob i bʌ ti Dios (Juan 10:16; Mateo 25:31-40). Jiñi bombiloʼ bʌ jiñʌch añoʼ bʌ tiʼ wenta miʼ qʼuelob chaʼan jiñi yambʌ tiñʌmeʼob miʼ melob i yeʼtel bajcheʼ chocbiloʼ bʌ tilel tiʼ tojlel Cristo. Ili chaʼmojt temel miʼ yʌcʼob ti cʌñol i Yumʌntel Cristo yicʼot xucʼul miʼ yajñelob i maʼañic miʼ wis otsañob i bʌ ti política (pejcan Isaías 2:2-4).

 5. ¿Chucoch mach lajaloñicla bajcheʼ jiñi israelob ti wajali, i bajcheʼ mi lac pʌs ti jujuntiquil chaʼan cheʼʌchi?

⁵ Pero an yan tac bʌ chucoch maʼañic mi laj cotsan lac bʌ ti política, mach cojach chaʼan lac xucʼtʌlel ti Cristo. Mach lajaloñicla bajcheʼ jiñi israelob ti wajali tsaʼ jach bʌ chumleyob ti jumpʼejl país tsaʼ bʌ aqʼuentiyob ti Dios. Joñonla pam pujquemonla tiʼ pejtelel Pañimil (Mateo 28:19; 1 Pedro 2:9). Jin chaʼan, ¿chuqui miʼ chaʼlen mi tsaʼ la cotsa lac bʌ ti política? Mach chʌn temelix mi caj la cajñel la quicʼot la quermañojob, mach librejix mi caj laj cubin lac bʌ yicʼot mach tijicñayix laj conciencia cheʼ mi caj lac subeñob jiñi quixtañujob chaʼan bʌ jiñi Yumʌntel (1 Corintios 1:10). Cheʼ jaʼel, cheʼ muqʼuic i tejchel jumpʼejl guerra, choncol laj contrajin la quermañojob tsaʼ bʌ subentiyonla chaʼan mi laj cʼuxbiñob (Juan 13:34, 35; 1 Juan 3:10-12). Jesús tsiʼ yʌlʌ chaʼan mach yomic miʼ majlelob ti guerra jiñi xcʌntʼañob i chaʼan yom miʼ cʼuxbiñob i contrajob (Mateo 5:44; 26:52; qʼuele jiñi recuadro «¿Ti isujm ba añon tiʼ tojlel Jehová?»).

 6. Anquese tsaʼix la cʌcʼʌ lac bʌ ti Dios, ¿bajcheʼ yom añonla tiʼ tojlel César?

⁶ Cheʼ jaʼel, jiñi isujm bʌ xñoptʼañob tsaʼix i yʌcʼʌyob i bʌ ti Dios, mach ti juntiquil wiñic o xʼixic mi ti jumpʼejlic organización i chaʼan bʌ wiñic o tiʼ tojlel jumpʼejl país. Yaʼ ti 1 Corintios 6:19, 20 mi yʌl: «Mach laʼ bajñel wentajic laʼ bʌ. Come tsaʼ mʌjñiyetla, tojbiletla». Jin chaʼan, anquese mi laj cʌqʼuen i chaʼan bʌ «César» cheʼ bajcheʼ i ñuclel, tojoñel yicʼot miʼ jacʼbentelob i tʼan, pero mach tiʼ pejtelelic, jiñi ñumen ñuc bʌ i chaʼañob jiñʌch cheʼ miʼ yʌqʼueñob «Dios chuqui i chaʼan Dios» (Marcos 12:17; Romanos 13:1-7). Ti jiñi «i chaʼan Dios» yaʼ ochem i chʼujutesʌntel, cʼuxbiya tiʼ pejtelel lac pusicʼal, jacʼbentel i tʼan, xucʼtʌlel yicʼot chaʼan mi la cʌcʼ laj cuxtʌlel mi cʼʌñʌl mi la cʌcʼ (Lucas 4:8; 10:27; pejcan Hechos 5:29; Romanos 14:8).

7, 8. ¿Chuqui jiñi «espíritu» i chaʼan bʌ pañimil, i bajcheʼ yʌquel ti eʼtel ti quixtañujob?

⁷ Yambʌ bajcheʼ mi lac pʌs chaʼan ñajt añonla tiʼ chaʼan bʌ pañimil jiñʌch cheʼ maʼañic mi laj cʌcʼ ti ochel jiñi jontol bʌ i yespíritu ti lac tojlel. Pablo tiʼ tsʼijbu chaʼan maʼañic tsaʼ aqʼuentiyonla «i ñaʼtʌbal [«yespíritu», TNM] pañimil. Tsaʼ aqʼuentiyonla jiñi espíritu chʼoyol bʌ ti Dios» (1 Corintios 2:12). Pero jiñi xñoptʼañob ti Éfeso tsiʼ subeyob: «Ti yambʌ ora tsaʼ laʼ chaʼle xʌmbal cheʼʌch bajcheʼ an ili pañimil, cheʼ bajcheʼ yom jiñi yumʌl am bʌ i yeʼtel tiʼ tojlel jiñi icʼ, jiñi espíritu woli bʌ ti eʼtel tiʼ yalobilob jiñi xñusa tʼan» (Efesios 2:2, 3).

⁸ Jiñi «icʼ», o espíritu, i chaʼan bʌ pañimil, jiñʌch jiñi pʼʌtʌlel maʼañic bʌ miʼ mejlel laj qʼuel muʼ bʌ i mel chaʼan jiñi quixtañujob miʼ melob chuqui jach yomob. ¿Bajcheʼ? Miʼ xicʼonla lac ñusʌben i mandar Dios yicʼot miʼ yotsan «i tsuculel lac pusicʼal. Jiñi lolom wen bʌ mi la quilan ti lac wut» (1 Juan 2:16, Jiñi wen bʌ tʼan; 1 Timoteo 6:9, 10). ¿Chucoch an i ‹yeʼtel› o i pʼʌtʌlel tiʼ tojlel quixtañujob jiñi espíritu? Come miʼ sʌclan bajcheʼ miʼ yʌsañonla ti mulil, mach tsiquilic bajcheʼ miʼ mel, maʼañic miʼ cʼaj i yoj yicʼot lajal bajcheʼ icʼ come baqui jach an tiʼ pejtelel ora. ¿Bajcheʼ ‹woli ti eʼtel› ti quixtañujob? Jiñʌch cheʼ cʼunteʼ cʼunteʼ miʼ yʌcʼ ti pʼojlel melbalʌl mach bʌ weñic tiʼ tojlel xñoptʼañob, cheʼ miʼ bajñel cʼuxbiñob i bʌ, miʼ qʼuelob i bʌ ti ñuc, miʼ mulañob ti cabʌl chuqui an, miʼ melob bajcheʼ bajñel yomob i maʼañix miʼ jacʼob chuqui miʼ subentelob.b Ti tsʼitaʼ bʌ tʼan, xucʼu xucʼul miʼ yʌcʼ ti colel i melbal Satanás tiʼ pusicʼal wiñicob (Juan 8:44; Hechos 13:10; 1 Juan 3:8, 10).

 9. ¿Bajcheʼ miʼ mejlel ti ochel i yespíritu pañimil ti lac ñaʼtʌbal yicʼot ti lac pusicʼal?

⁹ ¿Muʼ ba i mejlel ti colel ti lac ñaʼtʌbal yicʼot ti lac pusicʼal i yespíritu pañimil? Mucʼʌch, pero cojach mi maʼañic mi laj cʌntan lac bʌ (pejcan Proverbios 4:23). Ti ñaxan mach wen tsiquilic bajcheʼ miʼ mel. Jumpʼejl ejemplo, jiñi jontol bʌ espíritu miʼ mejlel ti tilel ti lac piʼʌlob wen utsoʼ bʌ yilal, pero maʼañic bʌ miʼ cʼuxbiñob Jehová (Proverbios 13:20; 1 Corintios 15:33). Cheʼ jaʼel, miʼ mejlel lac taj ti jun tac muʼ bʌ i pʌs i tsuculel ili pañimil, ti Internet baqui miʼ pʌs pornografía o muʼ bʌ i cʌy i ñopob isujm bʌ Dios, mach bʌ weñic ñusa qʼuin tac, alas tac baqui wen tsʌts miʼ yotsañob i bʌ yicʼot baqui miʼ jatsʼob i bʌ, o tiʼ pejtelel majqui miʼ pʌs i melbal Satanás yicʼot ili i pañimil.

10. ¿Bajcheʼ miʼ mejlel lac mʌlben i yespíritu ili pañimil?

¹⁰ ¿Bajcheʼ mi caj lac mʌlben (jotben) jiñi jontol bʌ i yespíritu pañimil i mi lac chʌn ajñel tiʼ cʼuxbiya Dios? Jiñʌch cheʼ mi laj cʼʌn acʼbil bʌ i chaʼan Jehová chaʼan mi lac pʼʌtʼesan ñopol bʌ lac chaʼan tiʼ tojlel yicʼot mi laj cʼajtiben tiʼ pejtelel ora jiñi chʼujul bʌ i yespíritu. Anquese jiñi Diablo yicʼot i pañimil wen pʼʌtʌlob, pero Dios ñumen pʼʌtʌl to (Santiago 4:7). Jin chaʼan, ñumen ñuc i cʼʌjñibal cheʼ mi lac mel oración chaʼan chʌn lʌcʼʌlonla tiʼ tojlel Dios.

11. ¿Bajcheʼ miʼ pʌs i yespíritu pañimil cheʼ bajcheʼ miʼ xoj i pislel juntiquil quixtañu?

¹¹ An cabʌl bajcheʼ miʼ cʼotel laj cʌn jiñi espíritu muʼ bʌ i ñijcan juntiquil quixtañujob. Junchajp jiñʌch bajcheʼ yilal miʼ xiban i jol o miʼ chʼʌl i bʌ, mi sʌcʌch yicʼot bajcheʼ yilal miʼ xoj i pislel. Tiʼ sujm, ti cabʌl país tac tsaʼix i qʼuextayob bajcheʼ yilal miʼ lʌpob i pislel. Jin chaʼan, juntiquil muʼ bʌ ti tʼan ti televisión tsaʼ cʼoti yʌl chaʼan jiñi xʼixicob muʼ bʌ i choñob i bʌ, maʼañix mi caj i ñaʼtañob bajcheʼ yilal mi caj i lʌpob i pislel chaʼan miʼ mulʌntelob. Jumpʼejl periódico tsiʼ yʌlʌ: «Wen pʼots jax i pislelob i maʼañix mucʼob ti quisin», i miʼ cʼotel ti qʼuejlel jaʼel tiʼ tojlel jiñi xchʼocob maxto bʌ i tajayob i colel. Cheʼ jaʼel muqʼuix i wen mulan i lʌpob pislel tac baqui miʼ yʌcʼob ti cʌjñel chaʼan xñusatʼañob yicʼot chaʼan mach sʌcobix bajcheʼ añob ñumel, i cheʼ bajcheʼ jiñi miʼ pʌsob chaʼan maʼañix miʼ cʼuxbiñob i bʌ.

12, 13. ¿Baqui bʌ principio yom mi laj cʼʌn chaʼan mi lac ñaʼtan bajcheʼ yom mi lac xoj lac pislel?

¹² Come mi lac chʼujutesan Jehová, com lac pʌs chaʼan weñʌch bajcheʼ mi lac xoj lac pislel, chaʼan wen sʌc yicʼot chaʼan utsʼatʌch ti qʼuelol tiʼ pejtelel ora. Tiʼ pejtelel ora yom «i pʼisol jach» mi lac chʼʌl lac bʌ, i mi an jiñi ‹wem bʌ lac melbal›, mi ca laj cʌjñel ti lac pejtelel bajcheʼ «muʼ bʌ i yʌlob ochemob ti Dios». Laj com chaʼan ‹mi lac chʌn ajñel tiʼ cʼuxbiya Dios› i mach jiñic chaʼan mi laj qʼuejlel ti yañoʼ bʌ (1 Timoteo 2:9, 10; Judas 21). Tiʼ sujm, jiñi ñumen ñuc bʌ chaʼañonla jiñʌch bajcheʼ an «i chʼʌjlil lac pusicʼal [...]. Jiñʌch cʼax utsʼat bʌ tiʼ wut Dios» (1 Pedro 3:3, 4).

¹³ Yom cʼajal lac chaʼan jaʼel, cheʼ bajcheʼ mi lac xoj lac pislel yicʼot bajcheʼ mi lac chʼʌl lac bʌ miʼ yʌcʼ ti cʌjñel bajcheʼ yilal jiñi isujm bʌ ñopbalʌl. Jiñi tʼan «pʼisol jach» am bʌ ti griego, miʼ cʼʌjñel chaʼan cheʼ bajcheʼ yilalonla mi lac pʌs lac bʌ, i miʼ yʌqʼueñonla lac ñaʼtan chaʼan yom mi laj qʼuel ti ñuc chuqui miʼ ñaʼtañob o bajcheʼ miʼ yubiñob i bʌ jiñi yañoʼ bʌ. Jin chaʼan, yom ñaxan mi lac chʼʌm ti ñuc i conciencia yañoʼ bʌ, i mach jiñic chuqui bajñel la com. Jiñi ñumen i cʼʌjñibal bʌ lac chaʼan, jiñʌch mi la cʌqʼuen i ñuclel Jehová i mi la cʌcʼ lac bʌ ti cʌñol bajcheʼ i wiñiconla. Laj com chaʼan tiʼ pejtelel chuqui mi lac mel chaʼañʌch «miʼ tsictiyel i ñuclel Dios» (1 Corintios 4:9; 10:31; 2 Corintios 6:3, 4; 7:1).

14. ¿Baqui bʌ cʼajtiya tac yom mi lac melben lac bʌ chaʼan bajcheʼ yilalonla yicʼot chaʼan bʌ lac sʌclel?

¹⁴ Cheʼ mi lac chaʼlen subtʼan yicʼot mi lac majlel ti tempa bʌ tac, yom wen sʌc lac pislel yicʼot wen chajpʌbil bajcheʼ yilalonla mi lac majlel. Jin chaʼan, yom mi laj cʼajtiben lac bʌ: «¿Bajcheʼ miʼ qʼuel yañoʼ bʌ cheʼ bajcheʼ yilalon o cheʼ mach wen sʌquic mic mel c bʌ? ¿Muʼ ba cʌcʼob ti quisin? ¿Chuqui ñumen ñuc bʌ mij qʼuel: Jimba bajcheʼ mic mulan c lʌp c pislel o chaʼan mic mel jiñi yom bʌ miʼ tsʼʌctesʌntel chaʼan mic mejlel c taj queʼtel ti congregación?» (Salmo 68:6; Filipenses 2:4; 1 Pedro 5:6).

15. ¿Chucoch maʼañic tsiʼ cʌyʌ Jehová jumpʼejl lista chaʼan bajcheʼ yom mi lac xoj lac pislel, chaʼan sʌconla yicʼot chaʼan bajcheʼ yom mi lac chʼʌl lac bʌ?

¹⁵ Jehová maʼañic tsiʼ cʌyʌ jumpʼejl lista chaʼan bajcheʼ yom mi lac xoj lac pislel, chaʼan sʌconla yicʼot chaʼan bajcheʼ yom mi lac chʼʌl lac bʌ. ¿Chucoch? Come yom chaʼan joñoñʌchla mi lac yajcan chuqui la com lac mel. Yom mi laj cʼʌn jiñi principio tac am bʌ ti Biblia chaʼan mi lac ñaʼtan chuqui yom mi lac mel bajcheʼ juntiquil xñoptʼan tsaʼix bʌ i taja i colel ‹cheʼ cʌñʌlix i chaʼan chuqui wen yicʼot chuqui mach bʌ weñic› (Hebreos 5:14). Yom chaʼan jiñi laj cʼuxbiya ti Dios yicʼot ti lac piʼʌlob miʼ tojʼesañonla (pejcan Marcos 12:30, 31). Cabʌl bajcheʼ yilal bʌ pisil miʼ mejlel lac yajcan yicʼot bajcheʼ miʼ mejlel lac chʼʌl lac bʌ. Jasʌl mi lac majlel ti jumpʼejl colem tempa bʌ i chaʼan i testigojob Jehová ti baqui jach bʌ país chaʼan mi laj qʼuel ti chajp ti chajp bajcheʼ yilal i pislelob yicʼot bajcheʼ yilalob i tijicñʌyel.

16. ¿Chucoch mach lajalic i yespíritu ili pañimil bajcheʼ i cʌntesa Jesús, i baqui tac bʌ cʼajtiya yom mi lac melben lac bʌ?

¹⁶ Jiñi i yespíritu pañimil miʼ mejlel i wen lotiñonla. Miʼ ñijcan cabʌl millón quixtañujob chaʼan miʼ sʌclañob i tijicñʌyel ti taqʼuin yicʼot ti chubʌʼañʌl tac. Jesús tsiʼ yʌlʌ: «Mach cuxulobic wiñicob chaʼan ti cabʌl i chubʌʼan» (Lucas 12:15). Pero pʼisbil jach chuqui tsiʼ yʌlʌ i maʼañic tsiʼ yʌlʌ chaʼan maʼañic chuqui yom mi lac wis mel. Tsiʼ yʌlʌ chaʼan jiñi muʼ bʌ caj i tajob isujm bʌ i tijicñʌyel yicʼot i coltʌntel jiñʌch «muʼ bʌ i yubibeñob i tʼan Dios muʼ bʌ i jacʼob» yicʼot jiñi wen jach bʌ bajcheʼ chumulob, yom yʌl, jiñi yaʼ jach bʌ miʼ yʌcʼob i ñaʼtʌbal tiʼ chaʼan bʌ Jehová (Lucas 11:28; Mateo 6:22, 23). Jin chaʼan, yom mi laj cʼajtiben lac bʌ: «¿Tiʼ sujm ba mic ñop tsaʼ bʌ i pʌsʌ Jesús, o jimba wolic ñopben chuqui miʼ pʌs i yum jiñi lot?» (Juan 8:44). «¿Chuqui miʼ yʌcʼ ti ñaʼtʌntel jiñi c tʼan, woli bʌ c ñaʼtan c mel, chuqui com bʌ c ñaxan mel yicʼot chaʼan bajcheʼ chumulon?» (Lucas 6:45; 21:34-36; 2 Juan 6.)

17. ¿Chuqui bʌ wenlel tac mi lac taj cheʼ wen jach bajcheʼ mi lac chumtʌl?

¹⁷ Chaʼan mi laj cʌn i sujmlel jiñi ticʼojel tsaʼ bʌ i yʌcʼʌ Jesús yom mi lac jacʼ, come jiñi Biblia mi yʌl: «Chʌn melela chuqui miʼ yʌl jiñi wen tʼan. Mach yomic toʼo cheʼ jach mi laʼ wubin» (Santiago 1:22). Jumpʼejl ejemplo, jiñi wen jach bʌ bajcheʼ chumulob miʼ tajob jiñi isujm bʌ cʼaj o tiʼ melol i yeʼtel Dios (Mateo 11:29, 30). Cheʼ jaʼel, maʼañic chuqui miʼ cʼojoʼtañob, maʼañobic i chʼijiyemlel yicʼot i cʼuxyajiyel (pejcan 1 Timoteo 6:9, 10). Miʼ ñumen tajbeñob i yorajlel chaʼan miʼ yajñel yicʼot i familia yicʼot i yermañojob, come tijicñayob cheʼ añob i chaʼan chuqui i cʼʌjñibal bʌ i chaʼañob. Ñumen wen miʼ wʌyelob (Eclesiastés 5:12). Miʼ ñumen tajob i tijicñʌyel cheʼ miʼ tʼoxob chuqui añob i chaʼan (Hechos 20:35). Cheʼ jaʼel, ‹miʼ bujtʼesañob i pusicʼal ti tijicñʌyel› yicʼot ñʌchʼʌl miʼ yajñelob (Romanos 15:13; Mateo 6:31, 32). Ti isujm jiñʌch wen ñuc bʌ bendición.

18. Cheʼ bajcheʼ mi yʌl jiñi Biblia, ¿majqui jiñi laj contrajob, chuqui miʼ melob yicʼot bajcheʼ yilal bʌ contrajintel an lac chaʼan tiʼ tojlelob?

¹⁸ Mi mucʼʌch lac chʌn ajñel tiʼ cʼuxbiya Dios, mi caj i coltañonla chaʼan maʼañic mi lac yajlel tiʼ cʼʌb Satanás, yom bʌ jiñʌch mi lac sʌt lac tijicñʌyel yicʼot laj cuxtʌlel mach bʌ añic miʼ jilel (1 Pedro 5:8). Pablo tsiʼ yʌlʌ: «Maʼañic woli laj contrajin wiñicob añoʼ bʌ i bʌcʼtal yicʼot i chʼichʼel. Pero woli laj contrajin xibajob añoʼ bʌ i yeʼtel yicʼot i pʼʌtʌlel, woli bʌ i melob i yumʌntel ti icʼchʼipan bʌ pañimil, yicʼot jontol bʌ espíritujob ti pañimil [«panchan», TNM]» (Efesios 6:12). Jiñi tʼan «contrajin» am bʌ ti griego yom yʌl jumpʼejl jatsʼ. Cheʼ bʌ Pablo tsiʼ taja ti tʼan jiñi laj contrajob espíritujoʼ bʌ, tsiʼ yʌlʌ chaʼan añob «i yeʼtel yicʼot i pʼʌtʌlel» yicʼot chaʼan ‹yumʌlob›. ¿Chuqui yom yʌl iliyi? Chaʼan jiñi xibajob wen chajpʌbil chuqui miʼ melob.

19. Tsictesan baqui bʌ i mʌctʌjib jiñi xñoptʼañob.

¹⁹ Anquese ti lac pejtelel an cabʌl laj cʼunlel yicʼot an i tajol maʼañic miʼ mejlel lac mel chuqui la com, pero mucʼʌch i mejlel lac mʌl jiñi jatsʼ. ¿Bajcheʼ? Jiñʌch cheʼ mi lac chʼʌm tiʼ «pejtelel [lac] mʌctʌjib muʼ bʌ i yʌqʼue[ñonla] Dios» (Efesios 6:13). Ili mʌctʌjib miʼ tsictesʌntel ti Efesios 6:14-18: «Yom chajpʌbiletla cheʼ bajcheʼ soldado yicʼot i sujmlel i tʼan Dios, i wenta laʼ cajchiñʌcʼ, chaʼan utsʼat mi laʼ chaʼlen xʌmbal. Lʌpʌla toj bʌ laʼ pusicʼal i wenta laʼ bujc. Yom chajpʌbil laʼ woc chaʼan mi laʼ majlel yicʼot jiñi wen tʼan muʼ bʌ i yutsʼesan lac pusicʼal yicʼot Dios. Cheʼ jaʼel, chucu laʼ mʌctʌjib ti laʼ cʼʌb chaʼan mi laʼ yʌpben i jalʌjp xiba woli bʌ ti lejmel i ñiʼ. Jiñi lac mʌctʌjib chucul bʌ ti laʼ cʼʌb, jiñʌch i ñopol Dios. Cʼʌcʌla i mʌctʌjib laʼ jol, jiñʌch laʼ coltʌntel. Chucula jiñi espada muʼ bʌ i cʼʌn Espíritu chaʼan miʼ mel i yeʼtel, jiñʌch i tʼan Dios. Chaʼlenla oración tiʼ pejtelel ora ti jiñi Espíritu. Yom mi laʼ chʌn cʼajtiben chuqui anto yom laʼ chaʼan».

20. ¿Chucoch mach lajaloñicla bajcheʼ jiñi soldadojob ti ili pañimil?

²⁰ Jiñi lac mʌctʌjib tilem bʌ ti Dios mi caj i chʌn coltañonla. Pero yom mi laj cʼʌn tiʼ pejtelel ora. ¿Chucoch? Come woliyonla ti guerra baqui maʼañic cʼaj o, i mach lajaloñicla bajcheʼ jiñi soldadojob am bʌ i tajol miʼ cʼajob i yoj cheʼ miʼ yujtelob ti jumpʼejl guerra. Ili guerra mi caj i yujtel baqui ora Dios miʼ jisan i pañimil Satanás i miʼ ñupʼ ti jumpʼejl chʼen maʼañic bʌ i yebal tiʼ pejtelel jiñi jontol bʌ espíritujob (Apocalipsis 12:17; 20:1-3). Mi jatet choncol a chaʼlen wersa a mʌlben a cʼunlel yicʼot tiʼ mulʌntel chuqui mach bʌ weñic, chʌn chaʼlen wersa. Ti lac pejtelel yom mi lac ticʼ lac bʌcʼtal chaʼan toj mi lac chʌn ajñel ti Jehová (1 Corintios 9:27).

21. ¿Bajcheʼ miʼ mejlel lac mʌl jiñi guerra?

²¹ Ti lac bajñelil maʼañic mi caj lac mejlel. Jin chaʼan, Pablo miʼ cʼajtesʌbeñonla: «Chaʼlenla oración tiʼ pejtelel ora ti jiñi Espíritu». Cheʼ jaʼel yom mi lac ñʌchʼtan chuqui miʼ subeñonla Dios. ¿Bajcheʼ? Jiñʌch cheʼ mi lac pejcan i Tʼan yicʼot cheʼ mi lac chaʼlen wersa lac tempan lac bʌ la quicʼot lac piʼʌlob ti guerra. La cujil chaʼan mach lac bajñelic (Filemón 2; Hebreos 10:24, 25). Mi xucʼulonla tiʼ melol iliyi mi caj i mejlel lac mʌl.

22, 23. a) ¿Chucoch yom chajpʌbilonla chaʼan mi laj coltan lac ñopoñel ti Dios, i baqui bʌ cʼajtiya tac yom bʌ mi lac melben lac bʌ? b) ¿Chuqui mi caj laj cʌn ti yambʌ cʌntesʌntel?

²² Jesús tsiʼ yʌlʌ: «Mach i chaʼañeticla pañimil, [...] jiñi añoʼ bʌ ti pañimil miʼ tsʼaʼleñetla» (Juan 15:19). Jin chaʼan, jiñi xñoptʼañonbʌla yom chʌn chajpʌbilonla chaʼan miʼ mejlel laj coltan lac bʌ cheʼ bʌ an ti wocol lac ñopoñel (chʼujbiya) ti Dios, pero yom mi lac mel ti uts yicʼot cʼuxbiya (pejcan 1 Pedro 3:15). Jin chaʼan, laʼ laj cʼajtiben lac bʌ: «¿Muʼ ba c chʼʌmben isujm chucoch jiñi i testigojob Jehová an i tajol yʌñʌl i melbalob?». «Cheʼ bʌ jajayajl yom mic pʌs wem bʌ c melbal, ¿muʼ ba c ñop chaʼan cheʼʌch bajcheʼ mi yʌl yaʼ ti Biblia yicʼot jiñi xucʼul bʌ xʼeʼtel?» (Mateo 24:45; Juan 17:17.) «Cheʼ bʌ i yorajlel chaʼan mic pʌs chuqui wem bʌ tiʼ wut Jehová, ¿muʼ ba c pʌs chaʼan tijicñayon cheʼ i testigojon Jehová i chaʼan mach cojach chajpʌbilon chaʼan yom yʌñʌlon bajcheʼ yañoʼ bʌ?» (Salmos 34:2; Mateo 10:32, 33.)

²³ Jiñi Diablo wen miʼ sʌclan baqui bʌ yac miʼ mejlel i cʼʌn chaʼan miʼ yʌsañonla tiʼ chaʼan bʌ pañimil. Cheʼ bajcheʼ tsaʼix la cʌlʌ, miʼ mejlel i yʌcʼonla ti yajlel ti jiñi ñusa qʼuin tac mach bʌ weñic. ¿Chuqui mi caj i coltañonla chaʼan mi lac yajcan wem bʌ ñusa qʼuin, muʼ bʌ i pʼʌtʼesañonla yicʼot ñʌchʼʌl bʌ miʼ cʌy laj conciencia? Iliyi mi caj laj cʌn ti yambʌ cʌntesʌntel.