Yeremia
31 “Nakai beiaŋ lɛ,” Yehowa kɛɛ, “Matsɔ Nyɔŋmɔ mahã Israel wekui lɛ fɛɛ, ni amɛbaatsɔ mimaŋ.”+
2 Nɔ ni Yehowa kɛɛ nɛ:
“Mɛi ni klante lɛ kpãtãaa amɛhiɛ lɛ ahiɛ eba nyam yɛ ŋa lɛ nɔ
Be ni Israel nyiɛ kɛyaa ehejɔɔmɔhe lɛ.”
3 Yehowa jɛ shɔŋŋ ejie ehe kpo etsɔɔ mi ni ekɛɛ:
“Naanɔ suɔmɔ mikɛsumɔ bo.
No hewɔ ni mikɛ suɔmɔ ni tsakeee gbalaa bo kɛbaa miŋɔɔ lɛ.*+
4 Masaa mama bo ekoŋŋ ni obaama shi.+
6 Ejaakɛ gbi ko baaba ni bulɔi ni yɔɔ Efraim gɔji lɛ anɔ lɛ baabolɔ akɛ:
‘Nyɛtea shi, nyɛhãa wɔkwɔa kɛyaa Zion, kɛyaa Yehowa, wɔ-Nyɔŋmɔ lɛ ŋɔɔ.’”+
7 Ejaakɛ nɔ ni Yehowa kɛɛ nɛ:
“Nyɛkɛ miishɛɛ aláa ahãa Yakob.
Nyɛláa kɛ miishɛɛ ejaakɛ nyɛyɛ jeŋmaji lɛ ahiɛ.+
Nyɛjajea enɛ nyɛtsɔa; nyɛjiea Nyɔŋmɔ yi, ni nyɛkɛa akɛ,
‘Ao Yehowa, heremɔ omaŋ lɛ, Israelbii ni eshwɛ lɛ.’+
8 Mikɛ amɛ miiku sɛɛ kɛmiijɛ kooyigbɛ shikpɔŋ lɛ nɔ kɛmiiba.+
Mabua amɛnaa kɛjɛ shikpɔŋ lɛ nɔ hei ni yɔɔ shɔŋŋshɔŋŋ lɛ.+
Shwilafoi kɛ akpakei,+
Kɛ yeihɔlɔi kɛ yei ni miifɔ fɛɛ yɛ amɛteŋ.
Amɛbaaku amɛsɛɛ kɛba biɛ akɛ asafo kpele.+
9 Amɛbaaba kɛ yaafo.+
Manyiɛ amɛhiɛ be ni amɛkpaa fai ni ana amɛ mɔbɔ lɛ.
Ejaakɛ miji Tsɛ kɛhã Israel, ni Efraim ji mikromɔbi.+
10 Nyɛ jeŋmaji, nyɛboa Yehowa wiemɔ toi,
Ni nyɛjajea nyɛtsɔa yɛ ŋshɔkpɔi ni yɔɔ shɔŋŋ lɛ anɔ akɛ:+
“Mɔ ni gbɛ Israel eshwã lɛ baabua Israel naa.
Ebaakwɛ enɔ tamɔ bɔ ni tookwɛlɔ kwɛɔ etooku nɔ lɛ.+
12 Amɛbaaba ni amɛbaalá kɛ miishɛɛ yɛ Zion gɔŋ lɛ nɔ+
Ni amɛmii baashɛ amɛhe yɛ Yehowa ekpakpafeemɔ lɛ* hewɔ,
Yɛ ŋmaa* kɛ wain+ hee kɛ mu lɛ hewɔ,
Kɛ toobii lɛ kɛ tsinabii lɛ ahewɔ.+
13 “Nakai beiaŋ lɛ, oblayei froi baajo kɛ miishɛɛ,
Kɛ oblahii kɛ hiimeji hu.+
Mahã amɛwerɛhoyeli lɛ atsɔ nyamɔ.+
Mashɛje amɛmii, ni mahã amɛmii ashɛ amɛhe moŋ fe nɔ ni amɛbaaye awerɛho.+
15 “Nɔ ni Yehowa kɛɛ nɛ:
‘Anu gbee ko yɛ Rama,+ aafó ni awo yara waa:
Ekpɛlɛɛɛ ni ashɛje emii yɛ ebihii lɛ ahewɔ,
Ejaakɛ amɛbɛ dɔŋŋ.’”+
16 Nɔ ni Yehowa kɛɛ nɛ:
“‘Tsĩi ogbee naa koni okafó, ni oŋamɔ ohiŋmɛii hu koni yaafonui akaje mli,
Ejaakɛ abaajwere bo yɛ onitsumɔ lɛ hewɔ,’ Yehowa kɛɛ.
‘Amɛbaaku amɛsɛɛ kɛjɛ henyɛlɔ lɛ shikpɔŋ lɛ nɔ.’+
17 ‘Hiɛnɔkamɔ yɛ kɛhã bo wɔsɛɛ,’+ Yehowa kɛɛ.
‘Obii* lɛ baaku amɛsɛɛ kɛba amɛ diɛŋtsɛ amɛshikpɔŋ lɛ nɔ.’”+
18 “Minu lɛɛlɛŋ ni Efraim miiye ŋkɔmɔ akɛ,
‘Ojaje mi, ni mimɔ jajemɔ lɛ mli,
Tamɔ tsinabi ni atsɔseko lɛ.
Okɛ mi aku sɛɛ kɛba, ni maku misɛɛ oya,
Ejaakɛ bo ji Yehowa, mi-Nyɔŋmɔ lɛ.
19 Ejaakɛ be ni miku misɛɛ agbɛnɛ lɛ, mishwa mihe;+
Be ni ahã minu shishi agbɛnɛ lɛ, awerɛhoyeli hã migbala mishuɔ he mai.
Mihiɛ gbo ni mihiɛ shwie shi,+
Ejaakɛ mitere migbekɛbiiashi ahorabɔɔ lɛ.’”
20 “Ani Efraim jeee mibinuu ni mishwɛɛɛ ehe, mibi ni misumɔɔ esane?+
Ejaakɛ shii abɔ ni miwieɔ mishiɔ lɛ lɛ, mikaiɔ lɛ kɛ̃.
No hewɔ ni mimusuŋ tsɔɔ mi* yɛ ehewɔ lɛ.+
Ni bɔ fɛɛ bɔ ni fee lɛ, enii baafee mi mɔbɔ,” Yehowa kɛɛ.+
21 “Okɛ gbɛ kadimɔ nii amamɔ shi ohã ohe,
Ni okɛ gbɛtsɔɔmɔ okadii hu amamɔ shi.+
Hã ojwɛŋmɔ ahi gbɛjegbɛ lɛ nɔ jogbaŋŋ, gbɛ ni obaatsɔ nɔ lɛ.+
Bo Israel oblayoo fro, kuu osɛɛ, kuu osɛɛ kɛba omaji nɛɛ amli.
22 Bo biyoo ni yeee anɔkwa, mɛɛ be nɔŋŋ oyiŋ baafee bo kɔshikɔshi kɛyashi?
Ejaakɛ Yehowa ebɔ nɔ ko hee yɛ shikpɔŋ lɛ nɔ:
Yoo baatao nuu sɛɛ gbɛ waa.”
23 Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Kɛ́ mibua amɛteŋ mɛi ni aŋɔ amɛ nom kɛtee lɛ anaa kɛku sɛɛ kɛba lɛ, amɛbaawie wiemɔi nɛɛ ekoŋŋ yɛ Yuda shikpɔŋ lɛ nɔ kɛ emaji lɛ amli akɛ: ‘Bo jalɛ shihilɛhe,+ bo gɔŋ krɔŋkrɔŋ,+ Yehowa ajɔɔ bo.’ 24 Ni Yuda kɛ emaji lɛ fɛɛ baafee ekome kɛhi mli, okwaafoi kɛ mɛi ni kpalaa tookui fɛɛ.+ 25 Ejaakɛ mahã mɔ* ni etɔ lɛ lɛ atɔ, ni mahã mɔ fɛɛ mɔ* ni egbɔjɔ lɛ hu aná hewalɛ.”+
26 Kɛkɛ ni mihiɛ tsɛ̃ ni migbele mihiŋmɛii; miwɔ lɛ ŋɔɔ minaa.
27 “Naa! Gbii miiba,” Yehowa kɛɛ, “be ni madu* gbɔmɛi aseshi* kɛ kooloi aseshi yɛ Israel shĩa lɛ kɛ Yuda shĩa lɛ.”+
28 “Ni bɔ ni mishi kpe yɛ amɛhe koni mafamɔ amɛ, ni makumɔ amɛ, ni mabutu amɛ, ni makpãtã amɛhiɛ, ni mafee amɛ efɔŋ lɛ,+ nakai nɔŋŋ kɛ̃ mashi kpe yɛ amɛhe koni matswa amɛ mama shi, ni madu* amɛ hu,”+ Yehowa kɛɛ. 29 “Nakai gbii lɛ amli lɛ, amɛkɛŋ dɔŋŋ akɛ, ‘Tsɛmɛi lɛ ye wain yibii ŋmilikitii, shi bii* lɛ moŋ anyanyɔji eshwã.’*+ 30 Moŋ lɛ, mɔ fɛɛ mɔ baagbo yɛ lɛ diɛŋtsɛ etɔmɔ hewɔ. Mɔ fɛɛ mɔ ni baaye wain yibii ŋmilikitii lɛ, lɛ diɛŋtsɛ enyanyɔji baashwã.”
31 “Naa! Gbii miiba,” Yehowa kɛɛ, “be ni mikɛ Israel shĩa lɛ kɛ Yuda shĩa lɛ baakpaŋ kpaŋmɔ hee.+ 32 Etamɔŋ kpaŋmɔ ni mikɛ amɛtsɛmɛi lɛ kpaŋ yɛ gbi ni mimɔ amɛnineshi ni minyiɛ amɛhiɛ kɛje Ejipt shikpɔŋ lɛ nɔ lɛ,+ ‘mikpaŋmɔ ni amɛku mli,+ tsɛbelɛ miji amɛnuŋtsɔ diɛŋtsɛ lɛ,’* Yehowa kɛɛ.”
33 “Ejaakɛ kpaŋmɔ ni mikɛ Israel shĩa lɛ baakpaŋ yɛ nakai gbii lɛ asɛɛ lɛ nɛ,” Yehowa kɛɛ. “Mikɛ mimla lɛ baawo amɛmli,+ ni maŋma yɛ amɛtsui mli.+ Ni matsɔ amɛ-Nyɔŋmɔ, ni amɛbaatsɔ mimaŋ.”+
34 “Ni amɛteŋ mɔ ko etsɔŋ ehe gbɔmɔ kɛ enyɛmi dɔŋŋ akɛ, ‘Le Yehowa,’+ ejaakɛ amɛ fɛɛ amɛbaale mi, kɛjɛ amɛteŋ mɔ bibioo fe fɛɛ nɔ kɛyashi amɛteŋ mɔ wulu fe fɛɛ nɔ,”+ Yehowa kɛɛ. “Ejaakɛ mikɛ amɛtɔmɔ lɛ baake amɛ, ni mikaiŋ amɛhe esha lɛ dɔŋŋ.”+
35 Nɔ ni Yehowa,
Mɔ ni fee hulu lɛ koni ekpɛ́ yɛ jetsɛremɔ mli,
Ni efee mlai ehã* nyɔɔŋtsere lɛ kɛ ŋulamii lɛ koni amɛkpɛ́ yɛ jenamɔ mli,
Mɔ ni taa ŋshɔ lɛ mli ni ehãa ŋshɔkei lɛ feɔ hamahama,
Mɔ ni gbɛ́i ji Yehowa, taiatsɛ lɛ,+ kɛɛ nɛ:
36 “‘Ja mlai* nɛɛ tsuuu nii dɔŋŋ,’ Yehowa kɛɛ,
‘Dani Israel seshi lɛ efeŋ maŋ ni yɔɔ mihiɛ be fɛɛ be dɔŋŋ.’”+
37 Nɔ ni Yehowa kɛɛ nɛ: “‘Kɛji abaanyɛ asusu ŋwɛi ni yɔɔ yiteŋgbɛ nɛɛ, ni abaanyɛ akpa shikpɔŋ lɛ faneshii lɛ ashi lɛ, no dani mi hu manyɛ makwa Israel seshi lɛ fɛɛ yɛ nibii fɛɛ ni amɛfee lɛ ahewɔ,’ Yehowa kɛɛ.”+
38 “Naa! Gbii miiba,” Yehowa kɛɛ, “be ni abaatswa maŋ lɛ+ ahã Yehowa kɛjɛ Hananel Mɔɔ+ lɛ he kɛyashi Koŋ Agbó+ lɛ he. 39 Ni susumɔ kpãa+ lɛ baaje kpo kɛya hiɛ tɛ̃ɛ aahu kɛya Gareb gɔŋkpɔ lɛ nɔ, ni ebaadɔ eyi kɛya Goa. 40 Ni gbohii kɛ lamulu* jɔɔ lɛ fɛɛ, kɛ ŋmɔji lɛ fɛɛ aahu kɛyashi Kidron Jɔɔ+ lɛ mli kɛtee Okpɔŋɔ Agbó+ lɛ koŋ ni yɔɔ bokãgbɛ lɛ he lɛ, fɛɛ baatsɔ nɔ krɔŋkrɔŋ ahã Yehowa.+ Afãŋ dɔŋŋ, ni akumɔŋ hu dɔŋŋ.”