Dezembr

Ethiopiekar odhikari bautizm gheunk khorench toiar aslo kai? Hacher dhean diat. Ethiopiekar “Devachi bhokti korunk Jeruzalemant gelʼlo.” (D.I. 8:27) Hantuntlean tannem Judev dhorm apnnailʼlo mhunn kollon ieta. Ani to Hebrev Bhaxen Boroilʼlea Pustokam thaun Jehova vixim xiklo mhunn kainch dubhav na. Punn taka anikui xikonk itsa asli. Oxem ami kiteak mhunnonk zata? Filip taka rostear mellʼllo tednam to Ethiopiekar khol sotam aslolim Izaias provadeacho kovllo vachtalo. (D.I. 8:28) To khol sotam zannam zaunk sodhtalo mhunn ami zannam zatat. Ethiopia thaun Jeruzalemant aslolea Devmondirant ieun Jehovachi bhokti korunk tannem khub lamb provas kelo. Ethiopiekar Filipa koddlean thoddim mhotvachim sotam xiklo. Tantuntlem ek sot mhunnttlear, Jezu Krist Mesias zaun aslo mhunn taka kollon ailem. (D.I. 8:34, 35) Jehova ani Jezu pasot tacho mog itlo vaddlo ki Jezucho pattlavdar zaunk tannem bautizm gheuncho ek mhotvacho nirnnoi ghetlo. Ani Filipan to Ethiopiekar toiar aslo to polloilo ani taka bautizm dilo. w23.03 8-9 ¶3-6

Ami Jehovak manvota tem korunk sodhtat zalear ami sot ulounk zai. (Mho. 6:16, 17) Aiz zaitea lokank fott marop hantunt kainch vaitt na oxem dista. Punn fott marop sarkem nhoi mhunn Jehova amkam sangta dekhun ami fott marinant. (St. 15:1, 2) Tor ami fott marop sarkench pois kortat. Toxench dusreank fottounk ami thoddi mahiti pasun lipoinant. Tea bhair, ami dusreancheo chaddio korcheo nhoi. (Mho. 25:23, NW; 2 Tes. 3:11) Tumi dusream sangata uloitat tednam dusrim heram vixim chaddio korunk lagtat zalear tem ulovop thoinch bond korun urba dita toslea vixoi-acher ulovop suru korat. Aiz ami ravtat tea sonvsarant choddso lok vaitt vo pozddim utram uzar kortat. Hea pasot, amchem ulovop Jehova Devak manvota toxem asonk ami khub vavr korunk zai. Ami porgottnni kortana, mittingek hajir zatat tednam ani her vellar dusream sangata uloitana Jehovak mhoima melltta tea ritin uloilim zalear to amcher besanv ghaltolo. Beginuch Jehova hea vaitt sonvsaracho nas korcho asa. Ani tea uprant, taka man melltta tea ritin ulounk amkam anikui sompem zatolem.​—Jud 15. w22.04 9 ¶18-20

Jehovan ani Jezun amcho kitlo mog kela tea vixim ami chintʼtat tednam ami pasun tancho mog korunk fuddem sortat. (1 Ju. 4:10) Toxench, Jezu amchea modlea dor eklea pasot melo, hem ami vollkhon ghetat tednam, tanche pasot amcho mog anikui vaddtta. Apostl Paulun hem vollkhon ghetlem, ani Galasiekarank chitt boroitana tannem aplem upkariponn dakhoun dilem. Tannem mhunnttlem: ‘Tor Kristan mhozo mog kela ani mhoje khatir apnnakuch somorpun dila.’ (Gal. 2:20) Jezuche soddvonne udexim Jehovan amkam aplim ixttam zaunk tache lagim voddun haddleant. (Ju. 6:44) Tor Jehovan amchea bhitor kitem tori borem polloilam, ani amkam aplim ixttam korun gheunk ek vhodd mol farik kelam, hem zannam zalʼlean amchem kalliz bhoron ieta nhoi! Toxench, Jehova ani Jezu pasot amcho mog anikui vaddtta nhoi! Tor ami amkanch vicharum-ia: ‘Jehovan ani Jezun mhaka dakhoilʼlea mogak lagon hanv kitem korunk fuddem sortam?’ Ami Jehova ani Jezucho mog kortat dekhun ami dusreankui mog dakhounk fuddem sortat.​—2 Kor. 5:14, 15; 6:1, 2. w23.01 28 ¶6-7

‘Ekchitan tachi bhoktiʼ korunk amkam modot korunk lagon Jehova uzar korta tem sogleam-von mhotvachem sadhon mhunnttlear, tachem Utor Bible. Jehova Devan Bible-ant zaiteo vostu oxe toren boroileat ki teo fokot khaltea kallzachea munxankuch somzotat. (Luk. 10:21) Sonvsarbhor aslolo lok Bible vachta. Punn fokot khaltea kallzachea munxankuch tachi khori somzonni melltta, ani tantunt sanglam tem tim apnnaitat. (2 Kor. 3:15, 16) Bible-antlean amkam Jehovachi zannvai dison ieta. Jehova aplem Utor aplea lokank fokot ek zomo zaunuch nhoi, punn amkam dor ekleak xikounk ani bhuzvonn diunk uzar korta. Ami Jehovachem Utor vachtat tednam taka amchi dor ekleachi kitli kallji asa tem amkam dison ieta. (Iz. 30:21) Udharonnak, amkam Bible-antlem ek vers mellot jem vachlea uprant tem amcheach pasot boroilʼlem mhunn amkam disonk xokta. Oxem tumkam ghoddlam kai? Hoi, Bible-ant boroilam tem lakʼkhamnim lokank faideak poddtta. Tor amchea svotachea gorzank atam faideak poddtta toslich mahiti tantunt koxi asonk xokta? Hachem fokot ekuch karonn asa. Tem mhunnttlear, Bible-acho Boroupi, Jehovak sogleam poros chodd zannvai asa.​—2 Tim. 3:16, 17. w23.02 4-5 ¶8-10

Khorim Kristanvam zalolean ami Jehovacho khub mog kortat. Hea pasot ami tachea sevent amchem boreantlem-borem diunk sodhtat. Tor ami oxem kortolim zalear ami tache sevent dhei dovrunk zai. Zoxem, Kristi gunn vaddovop, faideak poddttat tosleo kola xikop ani dusreanchi seva korunk anik vatto sodhop. Tor ami Jehovache sevent vaddavoll korop vo dhei dovrop kiteak gorjechem? Mukhel zaun, ami amchea sorginchea Bapak, Jehovak khuxal korunk sodhtat. Karonn ami amchi tank ani kola tache sevent uzar kortat tednam Jehova khuxal zata. Tea bhair, ami Jehovache sevent anik vaddavoll kortat tednam ami amchea bhav-bhoinnank anik chodd modot korunk pavtat. (1 Tes. 4:9, 10) Tor ami zaitea vorsam thaun sotant asum vo sotant novim asum, ami sogleamnim Jehovache sevent vaddavoll korunk zata. w22.04 22 ¶1-2

Beginuch hea sonvsarache sogle sorkar, Vorixtt Babilonacho, tem mhunnttlear, sonvsarantlea soglea khottea dhormancho nas kortole. Ani hi vhodd sontapachi survat zaun astoli. Tor tea vellar anikui zaito lok Jehovachi seva korunk lagtolo oxem kai? Na. Prokasovnni odheai 6-ant sanglam toxem Jehovachi seva korinant te lok, dongrachea khoddpamnim lipon ravtole. Tem mhunnttlear, te sonvsarantle rajki fuddari ani veapar-dhondo kortoleam lagim modot magtole. Tor te Jehovachea Rajeak tenko diunche nant dekhun Jehova tankam aple virodhi mhunn lekhtolo. (Luk. 11:23; Prok. 6:15-17) Punn vhodd sontapachea kotthin vellar, fokot Jehovachech sevok soglea lokam poros veglle astole. Karonn fokot tech Jehovachi bhokti kortole ani ‘savzakʼ tenko diunche nant.​—Prok. 13:14-17. w22.05 16-17 ¶8-9

Devache lok, fokot Devachea ‘Rajeachea xubhvortomanaʼ vixinch porgott korinant punn tim anikui kitem tori porgottʼttat. (Mt. 24:14) Prokasovnni odheai 8 te 10-nt, Devachem Raj nakartat tea lokank kitem ghoddttolem tem ainz kolloitat. Tor ainzachea hea kamank pasun Devacho lok tenko ditat. Koxem? Tim ‘korve ani ujeakʼ sor keloli zoddttechi khobor porgottʼttat. Tem mhunnttlear, Soitanachea sonvsarachea veg-vegllea bhagank Dev kitem kortolo tem tim sangtat. (Prok. 8:7, 13) Toxench, hea sonvsaracho xevott lagim pavla ani lokamnim aplem jivit bodolʼlem zalear, Devachea ragachea disak tim salvar zatolim, hem-ui tim tankam kolloitat. (Zef. 2:2, 3) Punn lokank hi khobor aikonk naka. Ani vhodd sontapa vellar hi khobor anikui khor zatoli ani lok amcher anikui ragar zatolo. Tea pasot, ho sondex tankam diunk amkam dhirachi goroz asa.​—Prok. 16:21. w22.05 7 ¶18-19

Chintat, eke Kristi zoddpeak beginuch ek bhurgo zolmuncho asa. Bhurgeank vaddounche vixim tannim hache poilim zaitim bhaxonnam aikoleant astolim. Punn tankam bhurgim zatat tednam tea totvancho tim anik chodd valor korunk lagtat. Karonn aplea bhurgeank vaddounchi hi vhodd zobabdari purnn korunk tim him totvam apnnaitolim. Hantuntlean ami kitem xiktat? Amchi poristhiti bodolta toxi, poilim ami zannam aslolim totvam amkam chodd valorachim zaunk xoktat. Taka lagon, adlea tempar Israelit razank sanglolem toxem, Jehovache Sakxi aplea ‘akʼkhea jivitant vo jivitbhorʼ Devachem Utor vachtat ani tacher niall kortat. (D.S. 17:19) Avoi-bapaimno, tumkam ek vhoddli zobabdari asa. Ti mhunnttlear, tumchea bhurgeank Jehova Deva vixim xikounk. Punn tumi tumchea bhurgeank fokot Jehova Deva vixim gineanuch diunk sodhinant. Tumi tankam Jehovacho mog korunk xikounk sodhtat. w22.05 26 ¶2-3

Ami kelʼlea patkak lagon fokot vaitt dislearuch puro na. Ami khorench poschatap kela mhunn ami amchea kornneamnim dakhounk zai. Karonn apunn bhogxitolo kai na tem tharaitana, eka munxan aplem jivit bodolʼlam kai na, tem Jehova polloita. Jivit bodlop mhunnttlear, apli vaitt vatt soddun divop ani Jehovak manvota tea pormonnem jievop. (Iz. 55:7) Tor ek munis aplem jivit bodolta tednam to Jehova chintʼta tea toren chintunk proitn korta. (Rom. 12:2; Ef. 4:23) Toxench, aplem vaitt chintop ani vagnnuk soddun diunk to nichov korta. (Kol. 3:7-9) Hem khorem, ki Jezuchea bolidanacher bhavarth dovorlolean, Jehova amkam amchea patkanchem bhogsonnem diunk toiar asa. Punn ami amchem jivit bodlunk khorench proitn kortat mhunn to polloita tednanch to amkam bhogxita.​—1 Ju. 1:7. w22.06 6 ¶16-17

Adanv ani Eve Jehovachea add gelim tednam thaun munis munxak tras korta. (Up. 8:9) Udharonnak, odhikar aslole thodde munis dusrea munxank tras kortat, kirmi kortat te khub vaitt kamam kortat. Toxench, iskolantlim thoddim bhurgim dusrea bhurgeank loz kortat vo tankam dhomkaitat. Itlench nhoi, punn thoddim zannam apleach familichea sodoxiam sangata khub krur toren vagtat. Hea karonnank lagon aiz munis munxak bhieta. Tor hea bhiranticho Soitan koso faido gheta? Soitan munxachi bhirant uzar korun amchem porgottnnechem kam, toxench Jehovak lagon ami kortat tim her kamam bond korunk sodhta. Soitan sorkari odhikariank amchea kamacher bondi haddunk ani amkam dhumallo diunk uzar korta. (Luk. 21:12) Soitanachea sonvsarant zaito lok Jehovachea Sakxeam vixim fotti sangtat. Ani je lok heo fotti sot mhunn mantat, te amchim fokanam kortat vo amcher akromonn pasun kortat. (Mt. 10:36) Tor hem soglem polloun ami ojap zatat kai? Na. Karonn poilea xekddeant pasun Soitanan oxench kelʼlem.​—Itihas 5:27, 28, 40. w22.06 16-17 ¶10-11

Nitivontponnache vatter cholonk xiktolim tim ‘zaitimʼ konn? Hea munxam modem, jivont zatolim tim, toxench Armageddona thaun salvar zatolim tim ani ghoddie tankam novea sonvsarant zolmotolim tim bhurgim mellon astolim. 1,000 vorsanchea xevott meren, prithumer jietat tim soglim poripurnn zatolim. Ek munis poripurnn asa dekhun taka sasnachem jivit mellttolench oxem kai? Hea prosnacho zobab zannam zaunk, Adanv ani Eve vixim chintat. Tim poripurnn aslim. Tori astana sasnachem jivit melloun gheunk, tannim Jehovachi adnea pallunk zai asli. Punn dukhachem mhunnttlear, tannim toxem korunk na. (Rom. 5:12) 1,000 vorsam somptat toxim prithumer aslolim soglim munxam poripurnn zatolim. Punn poripurnn zalolim soglinch munxam Jehovachea utrak pallo ditolim? Vo thoddim zannam Adanv ani Eve bhaxen poripurnn asonui ovisvaxi zatolim? Hea vixim ami fuddem polloum-ia. Hea prosnanche zobab amkam magiruch kollttolem. w22.09 22-23 ¶12-14

Aiz sonvsarant poristhiti khub bigoddlea. Familim modem mog unno zala. Lok chodd ani chodd ragixtt ani apsvarthi zait asa. Odhikareancher visvas dovrunk zaiteank kotthin zata. Tor hem soglem polloun, fuddarak borem zatolem mhunn manunk tumkam ghoddie kotthin zaunk puro. Punn khorem mhunnttlear, hi poristhiti polloitana fuddarak borem zatolench mhunn amchi khatri ghott zata. Karonn aiz lok, Bible-ant ‘nimannea disamʼ vixim sanglolem toxech vagtat. (2 Tim. 3:1-5) Hi bhasaunni purnn zata ti ami pollounk xoktat, ani amkam puravo melltta ki Devachea Rajeacho Raza, Jezu Kristan, apli razvottki suru kelea. Punn, hi tor fokot ekuch bhasaunni. Khorem mhunttlear, sogleo bhasaunneo, eka vhoddlea chitrache veg-veglle bhag koxe zaun asat. Tem akʼkhem chitr polloilearuch, tem koslem chitr tem amkam somzota. Teach bhaxen, heo sogleo bhasaunneo sangata mellon obheas kelearuch, khoincheo bhasaunneo poilim ghoddleo, aiz ghoddttat ani fuddarak ghoddttoleo tem amkam spoxtt kollon ieta. w22.07 2-3 ¶1-2

COVID-19 pidde vellar mittingek koxem hajir zaunchem ani porgottnni koxi korchi, hea vixim amkam borem margdorxon mellʼllem. Ani hea pasot, video-conferencing sadhonam uzar korun ami rokddinch sobhechea mittingenk, sorkitt zomatink ani odhivexonank hajir zaunk laglim. Toxench, ami chitti boroun ani fon-a udexim porgottnni korunk laglim. Ani Jehovan amchea hea vavracher khub besanv ghatlem. Karonn zaitea xakhamnim porgottnnarancho ankddo vaddlo. Punn amchea modlea thoddea zannank, hea pidde vixim songotton amkam chodduch chotrai dovrunk laita oxem ghoddie dislem zait. Tori astana, amkam mellʼllolem margdorxon khorench xanneponnachem aslem mhunn amkam kollon ailem. Ani Jezu aplea pattlavdarank mogall toren margdorxon dita hea vixim ami niall kortat tednam, fuddarak kitem-i zaum, Jehova ani Jezu sodanch amchea sangata astole mhunn amkam khatri melltta.​—Heb. 13:5, 6. w22.07 13 ¶15-16

Jehovachi vakhannʼnni korchea sangata, amchea magnneamnim ami Jehovachim kitlim upkari asat tem ami taka sangonk zata. Karonn Jehovan amchea pasot ojapacheo vostu rochleat. Zoxem, veg-vegllea rongachim sobit fulam, tore-torechem ruchik jevonn ani amkam khuxal korunk mogall ixttam pasun dileant. Tea bhair, ami khuxal zaunk Jehovan anikui zaiteo vostu dileat. (St. 104:12-15, 24) Ani sogleam-von mhotvachem mhunnttlear, amcho bhavarth ghott korunk Jehova amkam zaitem margdorxon dita. Toxench fuddara pasot tannem amkam ek ekdom boro bhorvonso dovorla. Hea soglea karonnank lagon, ami sodanch Jehovache khub upkari asat. Punn thodde pavtti, ami Jehovachim kitlim upkari asat tem taka sangonk ami sompeponnim visronk xoktat. Tor oxem zaina zaunk ami kitem korunk zata? Ami Jehova lagim kitem-kitem maglam tem ami boroun dovrunk zata. Uprant, Jehovan amchea magnneancho koso zobab dila tem ami pollounk zata, ani tea pasot magnneant tache upkar attounk zata.​—Kol. 3:15. w22.07 22-23 ¶8-9

Ami sota vixim obheas kelearuch puro kai? Na. Amkam purnn toren faido zaunk ami xiktat tea sota pormonnem ami jieunk zai. Tem mhunnttlear, ami xiktat tem amchea jivitant apnnaunk zai. Oxem kelearuch amkam khori khuxalkai mellttoli. (Jak. 1:25) Punn ami sota pormonnem jietat mhunn ami koxi khatri korun gheunk zata? Hea vixim eka bhavan sanglem ki, ami xiktat tem ami koxem apnnailam ani ami khoim sudharnni korchi goroz asa, tea vixim ami svotachi choukoxi korunk zai. Heach vixim apostl Paulun oxem mhunnttlem: “Kitem-i zaum, ami aiz porian pavleanv thoim thaun teach rostean fuddem vochum-ia.” (Filp. 3:16) ‘Sota pormonnem cholot ravonkʼ ami amchean zata tem soglem kortat tednam amkam kitlo faido zata tea vixim chintat! Ami bore toren jieunk xiktat, toxench Jehovak ani amchea bhav-bhoinnank pasun ami khub khuxalkai haddttat. (Mho. 27:11; 3 Juanv 4) Khorench, sotacho mog korunk ani tea pormonnem jieunk amche lagim kitlim borim karonnam asat nhoi! w22.08 18-19 ¶16-18

Apunn Jehova ani Jezucho mog kortat mhunn vhoddilamnim koxem dakhounk zata? Ek mhotvachi vatt mhunnttlear, Jezuchea xellianchi kallji gheun. (1 Ped. 5:1, 2.) Jezuk pasun hench zai aslem mhunn tannem apostl Pedruk spoxtt ritin dakhoilem. Jezuk tin pavtti nakarlea uprant, apunn Jezucho kitlo mog korta tem dakhounk Pedru axetalo. Tor jivont zalea uprant, Jezun Pedruk vicharlem: “Simanv, Juanvachea puta, tum mhozo mog korta?” Hea vellar, apunn aplea dhoniacho kitlo mog korta tem dakhoun diunk, Pedru kitem-i korunk toiar aslo mhunn ami khatri dovrunk zata. Jezun taka mhunnttlem: “Mhojea dhakttea menddranchi kallji ghe.” (Ju. 21:15-17) Ani jivitbhor Pedrun Jezuchea menddranchim kallji ghetli ani hea toren apunn Jezucho mog korta mhunn tannem dakhoilem. Vhoddilamno, Jezun Pedruk mhunnttlolim utram tumkam khub mhotvachim asat mhunn tumi koxem dakhounk zata? Tumi Jehova ani Jezucho kitlo mog kortat tem dakhounk tumi gonvlli bhett korunk zata, ani seva bond kelolea porgottnnarank porot Jehovachi seva korunk modot korunk tumi anik chodd vavr korunk zata.​—Ez. 34:11,12. w23.01 29 ¶10-11

Tumchi poristhiti vo oddchonn konnuch somzonk xokona, oslem chukichem chintop pois korat. Karonn tumi oxem chintlem zalear tumi tumcheo vaitt vondovnneo kednanch pois korunk xokchimnant mhunn tumkam disonk puro. Punn Bible-ant oxem sanglam: “Kosli-i tallnni aili zalear, ti sosunk To tumkam boll ditolo ani oxem tantlim bhair sorunk To tumkam vatt dakhoitolo.” Tor tumchea monant porot-porot vaitt vondovnneo ietat zalear pasun, tumi Jehovak visvaxi ravonk xoktat. Ani Jehovache modotin, tumi tea vaitt vondovnnecher tabo dovrunk xoktat. Sodanch ugddas dovrat: Opurnn aslolean, amchea monant ietat teo vaitt vondovnneo ami addaunk xokonant. Punn vaitt vondovnneo ietat tednam ami teo rokddeoch pois korunk zatat. Oxench Juzen kelem. Potifarachi bail taka tallnnent ghalunk sodhtali tednam to rokddoch thoinchean dhanvon gelo. (Ut. 39:12) Tor vaitt vondovnneank tumcher tabo cholounk dium nakat! w23.01 12-13 ¶16-17

Jehovak aslolo ek khas gunn mhunnttlear, to ek neai korpi Dev. (D.S. 32:4) Ek neai korpi munis, chodd korun bhedbhav korina. Ani Jehova kednanch bhedbhav korina. (D.I. 10:34, 35) Ani hem amkam, Bible borounk jeo bhaso uzar keleo, tantuntlean kollon ieta. Xevottachea kallar “khorem ginean khub vaddttolem” ani zaitea lokank tachi somzonni mellttoli mhunn Jehovan bhas dilʼli. (Dan. 12:4, NW) Aiz zaitea lokank Bible-achi somzonni mellonk modot zalea ti ek vatt mhunnttlear, Bible ani Bible-acher adarit prokaxonam bhaxantor keleant, chhapleant ani zaitea lokank vanttleant. Atam meren Jehovachea lokamnim, Bible-acho akʼkho vo thoddo bhag 240-am poros chodd bhasamnim bhaxantor kela, ani lokank to funkott mellonk xokta. Hea karonnak lagon, xevott ieunchea poilim soglea raxttrachea lokank, “Rajeachi bori khobor” xikonk melltta. (Mt. 24:14) Jehova ek neai korpi Dev zalolean, to zata titlea lokank, Bible vachun aplea vixim zannam zaunk ek sondhi diunk sodhta. Karonn to amcho sogleancho khub mog korta. w23.02 5 ¶11-12

Tumi nitivontponnacho mog kortat mhunn kainch dubhav na. Punn opurnn zalolean, ami chotur nant zalear borea ani vaitta vixim, ami hea sonvsarachem chintop apnnaunk xoktat. (Iz. 5:20) Ek nitivont munis ekdom gorvixtt asta, to dusreanchi nit korta, ani apunn dusream poros boro mhunn to chintʼta, oxem zaitea lokank disonk puro. Punn osle gunn Devak matui avoddnant. Toxench, Jezu hea prithumer aslo tednam borea ani vaitta vixim aple svotache dorje tharaupi dhormik fuddareanchi vagnnuk ekdom chukichi asli mhunn tannem sanglem. (Up. 7:16; Lukas 16:15) Khorem mhunnttlear, ek nitivont munis apunn dusream poros boro mhunn kednanch chintina. Tachea bodlek, ek nitivont munis Jehovache nodren sarkem tench korta. Tor ek munis Jehovachea dorjeam pormonnem jieta tednam to ‘nitivontʼ mhunn Bible dakhoita. w22.08 27 ¶3-5

Jezuchea xisamnim pasun zaiteo chuki keleo. Tori astana, Jezun tancher visvas dovrop bond korunk na. (Ju. 15: 16) Ek pavtti, Jakob ani Juanvan, Jezu lagim tachea Rajeant tankam ek khas podvi di mhunn vinoti keli tednam, te svarthak lagon Devachi seva kortat mhunn Jezu tancher dubhavunk na vo tannem tankam aple apostl mhunn nakarunk nant. (Mk. 10:35-40) Toxench, Jezuk dhorun vhelo tea ratik, tache sogle apostl taka soddun gele. (Mt. 26:56) Tori astana, Jezun tancher visvas dovorlo. To tanchim unnemponnam bore bhaxen zannam aslo. Tori punn, “tannem sopurnnaien tancho mog korun dakhoilo.” (Ju. 13:1) Koso? Jivont zalea uprant, Jezun aplea 11 visvaxi apostlank, xis korchem kam ani aplea moladik xellianchi kallji gheunchi ek vhodd zobabdari dili. (Mt. 28:19, 20; Ju. 21:15-17) Ani Jezuchea xisamnim moro porian visvaxi ravon, te visvas dovorpa sarke munis asle mhunn dakhoun dilem. Jezun, opurnn munxancher visvas dovorpa vixim ek borem udharonn dovorlem. w22.09 6 ¶12

Jehova amcho khub mog korta ani to amkam modot korunk sodanch toiar asa mhunn amkam khatri asa zalear Soitan amkam bhieunk xokchona. Oxich khatri, Stotr 118 boroilʼlea stotrkarak asli. Taka khub trasancho fuddo korunk poddlo. Udharonnak, tache khub dusman asle ani tantuntlea thoddea zannank vhodd podvi asli (vers 9, 10). Toxench, thodde pavtti to khub dobhava khala aslo (vers 13). Tea bhair, taka Jehova koddlean pasun khor xist mellʼlli (vers 18). Tori astana, tea stotrkaran oxem mhunnttlem: “Sorvespor mhojea bhagak asa: tor kosli bhirant?” Jehova koddlean taka xist mellʼlli tem khorem. Tori punn, aplo sorgincho Bap aplo mog korta ani apunn kosle-i poristhitint aslear pasun, apleak modot korunk to sodanch toiar asa mhunn tea stotrkarak khatri asli. (St. 118:29) Jehova amcho mog korta mhunn amkam khatri asonk zai. Hi khatri aslear ami tin torecheo bhirant pois korunk pavtolim. (1) amcheo familicheo gorzo purnn korunk xokchimnant mhunn asloli bhirant, (2) munxachi bhirant, ani (3) mornnachi bhirant. w22.06 15 ¶3-4

Ami amchea jivitant Jehovachi bhokti poilea zagear dovrunk zai. Jehova amcho Rochnnar dekhun ami fokot tachich bhokti korunk zai. (Prok. 4:11; 14:6, 7) Tor Jehovak manvota tea toren, tem mhunnttlear, “atmean ani sotan” tachi bhokti korunk ami sogleam-von chodd mhotv diunk zai. (Ju. 4:23, 24) Hacho orth, Jehovache povitr xoktechea modotin, Bible-antlea sotam pormonnem ami tachi bhokti korunk zai. Tor amchea kamank addkholl asa vo bondi aslolea zageacher ami ravtat zalear pasun, ami Jehovachi bhokti poilea zagear dovrunk zai. Sodʼdheak amchea 100-am poros chodd bhav-bhoinnank, tim fokot Jehovachim Sakxi mhunn bondkhonnint ghatleant. Tori astana, magnnem korunk, Devachea Utracho obheas korunk ani dusreank Jehova Dev ani tachea Rajea vixim sangonk, tim khuxalkaien apleachean zata tem soglem kortat. Tor amkam dhumallo sosunk poddtta vo lok amche vixim vaitt uloita tednam tem sosunk Jehova amkam modot korta, ani fuddarak to amkam inam ditolo mhunn ugddas dovorlolean ami khuxal ravonk xoktat.​—1 Ped. 4:14. w22.10 9 ¶13

Mhonnʼnneo pustokant amkam zaite solʼle mellttat, je apnnailear ami ek borem jivit jieunk xoktat. Tantuntlea don solʼleancher dhean dium-ia. Poilo mhunnttlear, tumche lagim asa tantunuch dhadoxi ravat. Mhonnʼnneo 23:4, 5-ant ho solʼlo dita: “Girest zaunk fugar zaum nakai . . . Tuka mellunk xokonant, tea dovlotincher nodor ghalunaka kiteak, ghonni bhaxen tankam pakhotte futtʼtole ani teo ontrollant uddun vetoleo.” Tori astana, aiz girest toxench gorib lok, poixe zoddchea vixim chodduch usko kortat. Ani poixe zoddunk, thodde pavtti tim oslim kamam kortat, jea vorvim tanchem nanv, heram sangata tanchem natem ani tanchi bholaiki pasun tim piddʼddear kortat. (Mho. 28:20; 1 Tim. 6:9, 10) Dusro mhunnttlear, ulounchea poilim chintat. Ami chotur nant zalear, amchea utramnim ami dusreank dukhounk xoktat. Hea vixim Mhonnʼnneo 12:18 sangta: “Ovichari utram torvari bhaxen toptat, punn, xanneanchi jib pekovnni haddta.” Tor ami dusreancheo chaddio korinant tednam ami tanchea sangata ek borem natem samballunk pavtolim.​—Mho. 20:19. w22.10 21 ¶14; 22 ¶16-17

Ezekielan porgottunk zai aslo to sondex, tannem purnn toren somzon, to manun gheunchi goroz asli. Oxem kelearuch, to dhiran porgottnni korunk pavtolo aslo. Uprant kitem tori ojapachem ghoddlem. Tem mhunnttlear, to kovllo “mhonva itlo godd” aslo mhunn Ezekielak kollon ailem. (Ez. 3:3) Hacho orth, Jehovacho provadi zaun tachi seva korunk apleak ek vhodd man mellʼllo mhunn Ezekielak ekdom borem dislem. (St. 19:8-11) Ani Jehovan taka aplo provadi mhunn vinchun kaddlo dekhun Ezekiel khub upkari aslo. Uprant Jehovan Ezekielak sanglem: “Sogllim Mhojim utram chit diun aik ani ghott monant dhor.” (Ez. 3:10) Tor Jehovan Ezekielak, kovlleant boroilʼlem aslem tem ugddas dovrunk ani tacher niall korunk sanglem. Oxem kelolean, Ezekielacho bhavarth anikui ghott zalo. Toxench, to lokank porgottcho aslo to khor sondex, to somzonk ani manun gheunk pavlo. (Ez. 3:11) Hea vorvim, Ezekiel porgottnnechem kam suru korunk ani tem somposor korit ravonk pavlo. w22.11 6 ¶12-14

Songottnnent zatat tea bodlavank lagon amchea visvaxiponnachi porikxa zata tednam ami kitem korunk zata? Songottnnent zatat tea bodlavank purnn toren tenko diat. Israelitkaram oronneant aslim tednam Kohatit lokank ek khas zobabdari asli. Ti mhunnttlear, Israelitkaram eka zagear thaun dusrea zagear voitalim tednam thoddea Kohatit Levitank sogleam mukhar Arkpett ubarun vhoronk sondhi asli. (Lok. 3:29, 31; 10:33; Josh. 3:2-4) Punn Israelitkar Bhasailʼlea Desant gelea uprant, tankam porot-porot Arkpett eka zagear thaun dusrea zagear vhoronk poddonasli. Tea pasot, Kohatitanchim kamam bodolʼlim. (1 It. 6:31-33; 26:1, 24) Punn tanchem kam bodolʼlem dekhun Kohatit Levit gunngunnle, vo adim te khas zobabdari samballttale dekhun atam pasun tankam ek khas kam zai oxem tannim sanglem mhunn Bible-ant khoinch songonk na. Tor ami kitem xiktat? Jehovache songottnnent bodlav zatat tednam, ani thoddea bodlavancho amchea kamacher probhav poddtta tednam pasun, ami purnn kallzan taka tenko diunk zai, ani ami kortat tea khoinchea-i kamant khuxal asonk zai. Ami ugddas dovrunk zai ki Jehova, amchea kamacher adarit amkam moladik mhunn lekhina, punn ami tachem aikotat tednam ami taka chodd valorachim zatat. w22.11 23 ¶10-11

Onesiforan apostl Pauluk soddun diunk na. Tachea bodlek, tannem Pauluk sodhun kaddlo ani tachea gorzam pormonnem taka modot korunk, apleachean zata tem soglem kelem. Oxem korunk tannem aplo jiv pasun dhokeant ghatlo. Hantuntlean ami kitem xiktat? Amchea bhavank dhumallo sosunk poddtta tednam ami bhieun fattim sorchem nhoi. Tachea bodlek, ami tanche pasot ulounk toiar asonk zai, ani tankam tenko diunk ani modot korunk amchean zata tem soglem korunk zai. (Mho. 17:17) Karonn amchea bhavank amchea mogachi ani modotichi goroz asa. Russia-ntlea amchea bhav-bhoinnank bondkhonnint ghatlim tednam her bhav-bhoinnamnim tankam koxi modot keli tea vixim chintat. Tantuntlea thoddea bhav-bhoinnanchi korttachi kes choltali tednam zaitim bhav-bhoinnam tankam tenko diunk korttant ailim. Hantuntlean ami kitem xiktat? Amchea songottnnent fuddakar ghetolea bhavanchim nanvam piddʼddear kortat, tankam bondkhonnint ghaltat, vo tankam dhumallo ditat tednam ami bhieunk zaina. Punn ami tanchea pasot magnnem korunk zai, tanchea familichea sodoxianchi kallji gheunk zai, ani tankam her vattamnim modot korun tenko diunk zai.​—D.I. 12:5; 2 Kor. 1:10, 11. w22.11 17 ¶11-12

Bhav-bhoinnank, Bible-antlean urba diunchi ani niraxi zaleant tankam bhuzvonn diunchi zobabdari vhoddilank asa. (1 Ped. 5:2) Ek odruxtt zata tednam sogleant poilim dor ek bhav ani bhoinn surokxit asa ani tankam jevonn, ravonk ek zago ani nhesonk kopdde asat mhunn vhoddilamnim khatri korun gheunk zai. Punn odruxttak sampoddloleank, odruxtt zaun zaite mhoine uprant pasun, Bible-antlean urba diunchi ani her modotichi goroz asta. (Ju. 21:15) Hea vixim Xakha Somitint kam korpi bhav Harold, zo odruxttak sampoddlolea zaitea bhav-bhoinnank mellʼlla, to oxem sangta: “Tea bhav-bhoinnank, tankam kitem ghoddlem tantuntlean bhair soronk khub vell lagonk puro. Tim atam asat te poristhitint tim jieunk proitn kortat astolim. Punn tannim aplea mogacheank mornnant sanddleant zalear vo tankam moladik aslolem kitem tori tannim hogddailam zalear vo tim morpachinch vanchleat zalear, tem soglem khub temp porian tanchea monant uronk puro. Teo ghoddnneo tankam porot ugddas ieunk puro ani tea pasot tim ekdom niraxi zaunk puro. Punn tankam oxem bhogta dekhun tankam unno bhavarth asa oxem nhoi. Karonn oxem konnakui bhogonk xokta.” Tor “Dukhest astoleam borabor dukhest zaiat” ho solʼlo vhoddil ugddas dovortat.”​—Rom. 12:15. w22.12 22 ¶1; 24-25 ¶10-11

Vaitt vondovnneo pois korun sarkem tem korunk, Jehova udarponnan amkam apli povitr xokti dita. Ami Devachea Utracho obheas kortat tednam ami Devache povitr xoktek amcher kam korunk ditat. Toxench, ami mittingek hajir zatat tednam pasun amkam Devachi povitr xokti melltta. Thoim amcheach bhaxen, sarkem tem korunk khub vavr kortat tea bhav-bhoinnam sangata ami vell sarunk zata. Ani oxem kelolean amkam urba mellttoli. (Heb. 10:24, 25; 13:7) Tea bhair, ami Jehova lagim kallzantlean magnnem kortat, ani amchi oskotai pois korunk modot kor mhunn vinoti kortat tednam to aplea povitr xokte udexim amche vaitt vondovnne add zhuzot ravonk amkam ghott kortolo. Ami heo sogleo vostu kortat tednam vaitt vondovnneo apxinch nanch zauncheo nant tem khorem, punn tancher tabo dovrunk amkam modot zatoli. Jehova sangata amchi ixttagot ghott korunk modot kortat tim kamam korunk suru kelea uprant, ami tim korit ravonk zai. Teach borabor, sarkem tem korunk amchi itsa ami vaddoit ravonk zai. w23.01 11 ¶13-14

Amchea bholaikechi kallji gheunk ami kitem korunk zai vo ami kitem khaunk zai, tea vixim Bible-ant ek list diunk na tem khorem. Tori astana, hea vixim Jehovak koxem dista tem amkam Bible-antlean kollon ieta. Udharonnak, amchea jivak boreak poddonant tosleo “vaitt vostu pois korunk” Jehova amkam urba dita. (Up. 11:10, NW) Bible-ant, ami chodd jevchem nhoi vo bebdikai korchi nhoi mhunn sanglam. Karonn oxem kelear, amchi bholaiki bigddonk xokta ani ami amcho jiv pasun hogddaunk xoktat. (Mho. 23:20) Tor ami kitem ani kitlem khatolim ani pietolim tea vixim ami svotacher tabo dovorlolo Jehovak zai. (1 Kor. 9:25) Ami amchi chintpachi tank uzar korun, Jehovan amkam dilʼlea jivitachea dennea pasot upkari asat mhunn dakhounk zata. (St. 119:99, 100; Mho. 2:11) Udharonnak, ami kitem khatolim tea vixim ami xanneponnan nirnnoi ghetat. Umkench kitem tori amkam khub avoddtta, punn tem khailear amchi bholaiki bigoddttoli mhunn ami zannant zalear ami tem khavop pois kortat. Toxench ami favo titli nhid ghetat, sodanch exercise kortat, ani amchi kudd ani ghor nitoll dovortat tednam ami amchi chintpachi tank bore bhaxen uzar kortat mhunn dakhoun ditat. w23.02 21 ¶6-7

Bible vachtana amkam moladik theve koxe mellonk xoktat? Hea vixim 2 Timotak 3:16, 17-nt, kitem sanglam tem polloiat. Thoim, “sogllem Povitr Pustok” (1) xikounn diunk, (2) chuki kaddun dakhounk, (3) nittaier haddunk, ani (4) xist diunk “upkarta” mhunn sanglam. Ami choddxe pavtti uzar korinant tea Bible-antlea pustokantlean pasun amkam he charui faide mellonk xoktat. Tumi vachtat ti umkich ghoddnni, Jehova, tacho udʼdhex vo tannem dilʼlea totvam vixim kitem xikoita tea vixim bariksannen chintat. Toxench, tim versam chuki kaddun dakhounk koxim upkartolim tem polloiat. Oxem korunk, him versam vaitt sobhav vollkhonk ani pois korunk, toxench Jehovak visvaxi ravonk tumkam koxim modot kortolim tacher dhean diat. Tea bhair, chukichem chintop nittaier haddunk, zoxem amkam porgottnnent melltta tea konnui ekleachem chintop chukichem asa zalear tem sarkem korunk tim versam amkam koxim modot korunk xoktat tea vixim bariksannen chintat. Toxench, Jehova chintʼta tea pormonnem chintunk tea versantlean amkam koxi xist melltta tem polloiat. He charui faide ugddas dovorlolean tumkam moladik theve mellttole, jea udexim tumchea Bible vachpantlean tumkam anikui faido mellttolo. w23.02 11-12 ¶11

Jezun raj korunk kednam suru kelem tem ami zannam zaunk xoktat kai? Daniel pustokant sanglolea eke bhasaunnent, Jezu sat kallanchea xevottak raj korunk suru kortolo mhunn sanglam. Tor he sat kall mhunnttlear kitem? (Dan. 4:7-14) ‘Sat vorsam vo kallʼ mhunnttlear 2,520 vorsam. Ho kall 607 K.X.A.-ant, Babilonkaramnim Jerusalem-achem nisonntton kelem, ani Davidachea sonstintlea nimannea Razak kaddun uddoilo tednam suru zalem. Ani 1914 K.X.-ant, “raza zaunk hokʼk aslolo” Jezuk, Jehovan aplea Rajeacho Raza kelo tednam to kall somplo. (Ez. 21:25-27, NW.) Hea bhasaunne vixim zannam zalolean amkam koso faido zata? ‘Sat kallamʼ vixim aslolea bhasaunnentlean amkam khatri melltta ki Jehova apleo bhasaunneo sarkea vellar purnn kortoloch. Zoxem, apunn eka umkeach vellar Jezuk aplea Rajeacho Raza kortolo mhunn Jehovan tharailʼlem. Ani to vell ailo tednam tannem toxench kelem. Teach bhaxen, aplea tharailʼlea vellar Jehova apleo herui bhasaunneo purnn kortolo mhunn amkam khatri melltta. Tor Jehovacho dis “chodd lambai korinastana” ietoloch.​—Hab. 2:3. w22.07 3 ¶3-5