ન્યાયાધીશો

૧૩ યહોવાની નજરમાં જે ખરાબ હતું, એ ઇઝરાયેલીઓએ ફરીથી કર્યું.+ એટલે યહોવાએ તેઓને ૪૦ વર્ષ સુધી પલિસ્તીઓના હાથમાં સોંપી દીધા.+

૨ એ સમયે સોરાહમાં+ દાનના કુટુંબનો+ એક માણસ હતો, જેનું નામ માનોઆહ+ હતું. તેની પત્ની વાંઝણી હોવાથી તેને કોઈ બાળક ન હતું.+ ૩ એક દિવસે યહોવાના દૂતે માનોઆહની પત્ની પાસે આવીને કહ્યું: “ખરું કે હમણાં તને કોઈ બાળક નથી, પણ તું ચોક્કસ ગર્ભવતી થઈશ અને દીકરાને જન્મ આપીશ.+ ૪ ધ્યાન રાખજે, દ્રાક્ષદારૂ કે કોઈ પણ પ્રકારનો શરાબ પીતી નહિ.+ કોઈ અશુદ્ધ વસ્તુ ખાતી નહિ.+ ૫ તું ચોક્કસ ગર્ભવતી થઈશ અને દીકરાને જન્મ આપીશ. તેના વાળ કદી કાપવા નહિ,+ કેમ કે તે જન્મથી* જ ઈશ્વર માટે નાઝીરી* થશે. તે ઇઝરાયેલીઓને પલિસ્તીઓના હાથમાંથી બચાવશે.”+

૬ પછી તે પોતાના પતિ પાસે ગઈ અને કહ્યું: “સાચા ઈશ્વરના એક માણસ મારી પાસે આવ્યા હતા. તે ઈશ્વરના દૂત જેવા પ્રભાવશાળી દેખાતા હતા. મેં પૂછ્યું નહિ કે તે ક્યાંના છે અને તેમણે પણ પોતાનું નામ જણાવ્યું નહિ.+ ૭ તેમણે મને કહ્યું: ‘તું ચોક્કસ ગર્ભવતી થઈશ અને દીકરાને જન્મ આપીશ. હવેથી તું દ્રાક્ષદારૂ કે કોઈ પણ પ્રકારનો શરાબ પીતી નહિ. કોઈ અશુદ્ધ વસ્તુ ખાતી નહિ, કેમ કે તે બાળક જન્મથી* છેક મરણ સુધી ઈશ્વર માટે નાઝીરી થશે.’”

૮ માનોઆહે યહોવાને વિનંતી કરી: “હે યહોવા, તમે જે માણસને* મોકલ્યા હતા, તેમને કૃપા કરીને ફરીથી મોકલો, જેથી તે અમને જણાવે કે જન્મ થનાર બાળકનો ઉછેર કઈ રીતે કરવો.” ૯ સાચા ઈશ્વરે તેની વિનંતી સાંભળી અને તેમનો દૂત ફરીથી તેઓને મળવા આવ્યો. એ સમયે માનોઆહની પત્ની ખેતરમાં હતી, પણ તેનો પતિ ત્યાં ન હતો. ૧૦ તે દોડીને પોતાના પતિ પાસે ગઈ અને કહ્યું: “જુઓ! જે માણસ પેલા દિવસે મારી પાસે આવ્યા હતા, તે ફરીથી આવ્યા છે.”+

૧૧ માનોઆહ પોતાની પત્ની સાથે ગયો. તેણે એ માણસ પાસે આવીને પૂછ્યું: “મારી પત્ની સાથે વાત કરનાર શું તમે છો?” તેણે કહ્યું: “હા.” ૧૨ માનોઆહે કહ્યું: “તમારા કહેવા પ્રમાણે થાઓ! અમને કહો કે બાળકનું જીવન કેવું હશે અને તે કેવાં કામ કરશે?”+ ૧૩ યહોવાના દૂતે માનોઆહને કહ્યું: “મેં તારી પત્નીને જે વિશે કહ્યું છે, એનાથી તેણે દૂર રહેવું.+ ૧૪ તેણે દ્રાક્ષમાંથી બનેલું કંઈ ખાવું નહિ, દ્રાક્ષદારૂ અથવા કોઈ પણ પ્રકારનો શરાબ પીવો નહિ,+ કોઈ અશુદ્ધ વસ્તુ ખાવી નહિ.+ મેં તેને જે જે આજ્ઞા આપી છે એ સર્વ તેણે પાળવી.”

૧૫ માનોઆહે યહોવાના દૂતને વિનંતી કરી: “થોડો સમય રોકાઈ જાઓ, અમે તમારા માટે બકરીનું બચ્ચું રાંધી લાવીએ.”+ ૧૬ યહોવાના દૂતે માનોઆહને કહ્યું: “હું રોકાઈ જાઉં તોપણ કંઈ ખાઈશ નહિ. તારે અગ્‍નિ-અર્પણ ચઢાવવું હોય તો યહોવાને ચઢાવ.” માનોઆહ જાણતો ન હતો કે તે યહોવાનો દૂત છે. ૧૭ માનોઆહે યહોવાના દૂતને કહ્યું: “તમારું નામ જણાવો,+ જેથી તમારી વાત સાચી પડે ત્યારે અમે તમારું સન્માન કરીએ.” ૧૮ પણ યહોવાના દૂતે કહ્યું: “મારું નામ ન પૂછીશ, કેમ કે એ તો અજાયબ છે!”

૧૯ એ પછી માનોઆહે એક મોટા પથ્થર પર બકરીનું બચ્ચું અને અનાજ-અર્પણ* યહોવાને ચઢાવ્યાં. માનોઆહ અને તેની પત્નીના દેખતા ઈશ્વરે એક ચમત્કાર કર્યો. ૨૦ પથ્થરની વેદીમાંથી અગ્‍નિની જ્વાળાઓ ઊંચે ચઢતી હતી. યહોવાનો દૂત એ જ્વાળાઓમાં થઈને આકાશમાં ચઢી ગયો. એ બધું માનોઆહ અને તેની પત્નીએ નજરોનજર જોયું. તેઓએ તરત જ ભૂમિ પર માથું ટેકવીને નમન કર્યું. ૨૧ તેઓને યહોવાનો દૂત ફરીથી દેખાયો નહિ. માનોઆહને ખ્યાલ આવ્યો કે એ તો યહોવાનો દૂત હતો.+ ૨૨ માનોઆહે પોતાની પત્નીને કહ્યું: “આપણે ચોક્કસ મરવાના છીએ, કેમ કે આપણે ઈશ્વરને જોયા છે!”+ ૨૩ તેની પત્નીએ કહ્યું: “યહોવા આપણને મારી નાખવાના હોત તો, તેમણે આપણા હાથે અગ્‍નિ-અર્પણ અને અનાજ-અર્પણ સ્વીકાર્યાં ન હોત.+ તેમણે આપણને એ બધું દેખાડ્યું ન હોત અને કંઈ કહ્યું પણ ન હોત.”

૨૪ સમય જતાં, માનોઆહની પત્નીએ એક દીકરાને જન્મ આપ્યો અને તેનું નામ સામસૂન પાડ્યું.+ તે મોટો થતો ગયો તેમ યહોવાનો આશીર્વાદ તેના પર હતો. ૨૫ પછી સોરાહ અને એશ્તાઓલની+ વચ્ચે માહનેહ-દાન+ નામની જગ્યાએ, યહોવાની શક્તિ સામસૂન પર આવી.*+