Owalọ lẹ

21 To whenue mí ko dovivẹnu bo klan sọn yé go, mí súnhún bo kùnhún tlọlọ bosọ wá Kọsi, podọ to aihọngbè mí yì Lodu, enẹgodo mí tọ́n sọn finẹ yì Patala. 2 To whenue mí mọ tọjihun de he to didasa jei Fenike, mí biọ ohún lọ mẹ bo yì. 3 To whenue mí mọ lopo Kiplu tọn hlan to aganu, mí gbọn apá bo jo e do amiyọn mẹ* bosọ yì Silia bo gọ̀hún do Tile, yèdọ fihe tọjihun lọ dona de agbàn etọn lẹ do. 4 Mí dín devi lẹ mọ bo gbọṣi finẹ na azán ṣinawe. Ṣigba, na nuhe gbigbọ wiwe dehia wutu, yé dọna Paulu pludopludo dọ afọ etọn ni ma jẹ Jelusalẹm blo.+ 5 Enẹwutu, to whenue azán he mí na yizan to finẹ lọ lẹ ko pé, mí tọ́nyi bo bẹ gbejizọnlin mítọn jẹeji, ṣigba yemẹpo, to pọmẹ hẹ yọnnu lẹ po ovi lẹ po, plan mí kakajẹ gbonu tòdaho lọ tọn. Mí sọ jẹklo do huto bo hodẹ̀ 6 bosọ dọ e yì whedenu na ode awetọ. Enẹgodo, mí yì biọ tọjihun lọ mẹ bọ yewlẹ lẹkọyi whé.

7 Enẹgodo, mí dotana gbejizọnlin gbọn tọji he mí bẹsọn Tile lọ bo wá Ptolẹmai, mí sọ dọnudo mẹmẹsunnu lẹ bo nọ finẹ hẹ yé na azán dopo. 8 To aihọngbè, mí tọ́nyi bo wá Sesalea, mí sọ biọ owhé Filipi wẹndagbe-jlatọ* lọ tọn gbè, mẹhe yin dopo to sunnu ṣinawe lọ lẹ mẹ,*+ mí sọ nọ e dè. 9 Dawe ehe tindo viyọnnu ẹnẹ he ma ko wlealọ,* he sọ nọ dọ dọdai.+ 10 Ṣigba, to whenue mí ko gbọṣi finẹ na azán delẹ godo, yẹwhegán de he nọ yin Agabu+ jẹte wá sọn Jude. 11 Ewọ wá mí dè bo yí gbànnú Paulu tọn bo blá afọ po alọ edetiti tọn lẹ po bosọ dọmọ: “Le wẹ gbigbọ wiwe dọ, ‘Dawe he tọn gbànnú ehe yin wẹ Ju lẹ na blá to aliho ehe mẹ to Jelusalẹm+ bo na ze e do alọmẹ na omẹ akọta lẹ tọn.’”+ 12 Todin, whenue mí sè ehe, míwlẹ po mẹhe nọ nọ̀ finẹ lẹ po jẹ vivẹ̀ ẹ ji ma nado hẹji yì Jelusalẹm. 13 To whenẹnu, Paulu gblọn dọmọ: “Etẹwutu mì do to avivi bo to tintẹnpọn nado de gbemima ṣie pò?* Mì gbọ e ni họnwun na mì dọ, yẹn ko wleawufo e ma yin nado yin biblá kẹdẹ gba ṣigba nado kú ga to Jelusalẹm na oyín Oklunọ Jesu tọn wutu.”+ 14 To whenue e ma sọgan yin linlẹndiọna, mí masọ glọnalina ẹn ba,* mí sọ dọmọ: “Na ojlo Jehovah* tọn ni yin wiwà.”

15 Todin, to azán ehelẹ godo, mí wleawuna gbejizọnlin lọ bo dedo Jelusalẹm. 16 Delẹ to devi lẹ mẹ sọn Sesalea hodo mí yì ga bo plan mí wá owhé Mnasọni Kiplunu lọ tọn gbè, mẹhe yin dopo to devi tintan lẹ mẹ, na finẹ wẹ mí na nọ taidi jonọ. 17 To whenue mí jẹ Jelusalẹm, mẹmẹsunnu lẹ yí ayajẹ do yí mí. 18 Ṣigba, to aihọngbè, Paulu hodo mí yì Jakọbu dè,+ mẹho lẹpo sọ tin to finẹ. 19 E sọ dọnudo yé bo jẹ zẹẹmẹ basi ji to gigọ́ mẹ gando nuhe Jiwheyẹwhe wà to akọta lẹ ṣẹnṣẹn gbọn lizọnyizọn etọn gblamẹ lẹ go.

20 To whenue yé sè ehe, yé jẹ gigopana Jiwheyẹwhe ji, amọ́ yé dọna ẹn dọmọ: “Mẹmẹsunnu E, pọ́n fọtọ́n susu yisenọ lẹ tọn he tin to Ju lẹ ṣẹnṣẹn, yemẹpo wẹ sọ yin zohunhunnọ na Osẹ́n lọ.+ 21 Ṣigba, yé ko sè nuhe yin didọ gbayipe gando gowe lọ dọ hiẹ ko to atẹṣiṣi sọta Mose plọn Ju lẹpo to akọta lẹ ṣẹnṣẹn bo to didọna yé ma nado gboadà na ovi yetọn lẹ kavi hodo aṣa he hẹnai lẹ.+ 22 To whelọnu lo, etẹwẹ dona yin wiwà gando ehe go? E họnwun dọ yé na sè dọ hiẹ ko wá. 23 Enẹwutu, wà nuhe mí jlo na dọna we ehe: Mí tindo sunnu ẹnẹ he ko dopà de. 24 Plan omẹ ehelẹ hẹn bo klọ́ dewe wé to aṣa-liho po yé po bosọ penukundo akuẹzinzan yetọn lẹ go, na yé nido sọgan whlẹ́ ota yetọn. Gbọnmọ dali, mẹlẹpo na yọnẹn dọ nugbo depope ma tin to nuhe yin didọ gbayipe gando gowe na yé lọ mẹ, ṣigba dọ hiẹ to zọnlin jijlọ zìn, bọ hiẹ lọsu to Osẹ́n lọ yìn ga.+ 25 Na nuhe dù yisenọ he wá sọn akọta lẹ mẹ lẹ, mí ko do nudide mítọn hlan yé gbọn wekanhlanmẹ gblamẹ dọ yé dona nọla na nuhe yin yíyí do sanvọ́ hlan boṣiọ lẹ,+ na ohùn,+ na nuhe yin kọslona hù* lẹ+ podọ na fẹnnuwiwa zanhẹmẹ tọn.”*+

26 To whenẹnu, Paulu plan sunnu lọ lẹ to azán awetọ gbè bọ ewọ po yé po klọ́ yede wé to aṣa-liho,+ e sọ yì tẹmpli mẹ nado dọ whenue azán klọ́we to aṣa-liho tọn lọ lẹ na wá vivọnu bọ avọ́nunina lọ na yin nina na dopodopo yetọn.

27 Todin, to whenue azán ṣinawe lọ lẹ ko dibla wá vivọnu, dile Ju he wá sọn Asia lẹ mọ ẹn to tẹmpli mẹ, yé hẹn gbẹtọgun lọ lẹpo fọnadán, yé sọ wle e 28 bo to awhádo dọmọ: “Omẹ Islaeli tọn lẹ emi, mì gọalọ! Dawe lọ he to mẹlẹpo plọn to filẹpo sọta omẹ mítọn lẹ po Osẹ́n mítọn po gọna nọtẹn ehe die. Gbọnvona enẹ, e tlẹ hẹn Glẹkinu lẹ biọ tẹmpli mẹ bo ko hẹn ofi wiwe ehe flu.”+ 29 Na yé ko mọ Tlofimu+ Efesunu lọ po e po to tòdaho lọ mẹ wayi bo lẹndọ Paulu ko plan ẹn biọ tẹmpli mẹ. 30 Tòdaho lọ pete sọ biọ bẹwlu mẹ, bọ gbẹtọ lẹ họ̀nwezun pli dopọ bo wle Paulu bosọ dọ̀n ẹn jẹgbonu tẹmpli lọ tọn, podọ to afọdopolọji, ohọ̀n lọ lẹ yin súsú. 31 Dile yé to dindin nado hù i, awhàngán daho* awhànfun-gbẹ́ lọ tọn sè dọ Jelusalẹm pete ko biọ bẹwlu mẹ; 32 podọ to afọdopolọji, ewọ bẹ awhànfuntọ lẹ po awhàngán* lẹ po bo họ̀nwezun yì yé dè. To whenue yé sọnukunmọ awhàngán daho lọ po awhànfuntọ lẹ po, yé doalọtena Paulu hihò.

33 To whenẹnu, awhàngán daho lọ dọnsẹpọ bo wle e bosọ degbe dọ ewọ ni yin biblá po gẹdẹ awe po;+ e sọ kàn mẹhe ewọ yin po nuhe e wà po sè. 34 Ṣigba, delẹ to gbẹtọgun lọ mẹ jẹ awhádo ji bo to nude dọ, mẹdevo lẹ sọ to nudevo dọ. Enẹwutu, to whenue ewọ lọsu ma penugo nado sè hójọhó de na zingidi lọ wutu, e degbe dọ e ni yin hinhẹnwa opá awhànfuntọ lẹ tọn mẹ. 35 Ṣigba, to whenue e jẹ pèkán lọ ji, awhànfuntọ lẹ dona ze e, na zingidi gbẹtọgun lọ tọn wutu, 36 na gbẹtọgun de to hihodo yé mapote bo to awhádo dọmọ: “De e sẹ̀ sọn aimẹ!”

37 To whenue e ko dibla yin pinplan biọ opá awhànfuntọ lẹ tọn lọ mẹ, Paulu dọna awhàngán daho lọ dọmọ: “Be n’sọgan dọho de na we ya?” Ewọ dọmọ: “A nọ do Glẹkigbe wẹ? 38 Be e ma yin hiẹ wẹ Egiptinu lọ, mẹhe fọ́n gufinfọn de dote to ojlẹ de mẹ wayi bo plan sunnu hlọnhutọ 4000 yì danfafa ji ya?” 39 To whenẹnu, Paulu dọmọ: “Na nugbo tọn, Ju de wẹ yẹn,+ sọn Talsu+ Silisia tọn, tòvi tòdaho he diyin de tọn. Enẹwutu, yẹn vẹ̀ we, nagbè mi nado dọhona gbẹtọ lọ lẹ.” 40 To whenue e ko nagbè e, Paulu ṣite to pèkán lọ ji bo mìalọ hlan gbẹtọ lọ lẹ. To whenue mẹlẹpo ko nabọẹ, e dọhona yé to Heblugbe mẹ,+ bo dọmọ: