Owalọ lẹ

15 Todin, sunnu delẹ wá sọn Jude bo jẹ mẹmẹsunnu lẹ plọn ji dọmọ: “Eyin mìwlẹ ma gboadà sọgbe hẹ aṣa Mose tọn,+ mì ma sọgan yin whinwhlẹngán.” 2 Ṣigba, to whenue Paulu po Balnaba po ko tindo gbemanọpọ po nudindọn de po hẹ yé jẹ obá de mẹ godo, tito yin bibasina Paulu po Balnaba po gọna mẹdevo delẹ nado hẹji yì apọsteli po mẹho lẹ po dè to Jelusalẹm+ gando whẹho* ehe go.

3 Enẹwutu, to whenue agun lọ ko yìn yé vude to gbejizọnlin yetọn mẹ godo, sunnu ehelẹ zindonukọn gbọn Fenike po Samalia po, bo to zẹẹmẹ basi to gigọ́ mẹ gando lehe omẹ akọta lẹ tọn to lilẹhlan Jiwheyẹwhe dè do go bosọ to ayajẹ daho hẹnwa na mẹmẹsunnu lẹpo. 4 To whenue yé jẹ Jelusalẹm, agun lọ po apọsteli lẹ po gọna mẹho lẹ yí yé po homẹdagbe po, yé sọ na linlin nususu he Jiwheyẹwhe ko basi gbọn yé gblamẹ lẹ tọn. 5 Ṣigba, delẹ to hagbẹ sinsẹ̀n klandovo Falesi lẹ tọn mẹ he ko lẹzun yisenọ lẹ fọnṣite sọn aisinnu yetọn lẹ ji bo dọmọ: “Dandan wẹ dọ yè ni gboadà na yé bo degbena yé nado yìn Osẹ́n Mose tọn.”+

6 Enẹwutu, apọsteli lẹ po mẹho lẹ po pli dopọ nado dọhodo whẹho ehe ji. 7 To hodọdopọ sinsinyẹn* susu godo, Pita fọ́n bo dọna yé dọmọ: “Mì mẹmẹsunnu lẹ emi, mì yọnẹn ganji dọ Jiwheyẹwhe ko de mi to ṣẹnṣẹn mìtọn sọn bẹjẹeji na omẹ akọta lẹ tọn nido sè ohó wẹndagbe lọ tọn sọn onù ṣie mẹ bo yise.+ 8 Podọ Jiwheyẹwhe, mẹhe nọ yọ́n ninọmẹ ahun mẹ tọn,+ dekunnu gbọn gbigbọ wiwe lọ nina yé dali,+ kẹdẹdile e basi na mílọsu do ga. 9 Ewọ masọ do vogbingbọn depope hia to míwlẹ po yé po ṣẹnṣẹn,+ ṣigba e lẹ̀ ahun yetọn wé gbọn yise yetọn dali.+ 10 Enẹwutu, todin, naegbọn mì do to Jiwheyẹwhe whlepọn gbọn zẹgẹ+ he tọgbo mítọn lẹ kavi mílọsu ma penugo nado hẹn lẹ zizedo kọ̀ji na devi lẹ dali?+ 11 To vogbingbọn mẹ, mí yise dọ gbọn nukundagbe majẹhẹ Oklunọ Jesu tọn gblamẹ+ wẹ mí yin whinwhlẹngán, dile e yin do na yewlẹ.”+

12 To whenẹnu, pipli lọ pete nabọẹ, yé sọ jẹ todoaina Balnaba po Paulu po ji dile yé to linlin ohia po nujiawu* susu he Jiwheyẹwhe ko basi gbọn yé gblamẹ to akọta lẹ ṣẹnṣẹn po tọn na. 13 Whenue yé ko dọho fó, Jakọbu gblọn dọmọ: “Mì mẹmẹsunnu lẹ emi, mì sè ohó ṣie. 14 Simeọni+ ko basi zẹẹmẹ hezeheze gando lehe Jiwheyẹwhe to tintan whenu lẹ́ ayidonugo etọn hlan akọta lẹ nado de gbẹtọ lẹ sọn yé mẹ na oyín etọn do go.+ 15 Podọ ohó Yẹwhegán lẹ tọn sọgbe hẹ ehe, kẹdẹdile e ko yin kinkandai do dọ: 16 ‘To onú ehelẹ godo, yẹn na lẹkọwa bo na ze gòhọ* Davidi tọn he to hihọ́ lọ ṣite; yẹn nasọ vọ́ gbakija etọn lẹ gbá bo vọ́ ẹ jlado, 17 na pipotọ gbẹtọ lọ lẹ tọn nido sọgan dín Jehovah* vẹkuvẹku, to pọmẹ hẹ gbẹtọ akọta lẹpo tọn, he nọ yin yiylọ gbọn oyín ṣie dali lẹ, wẹ Jehovah* dọ, mẹhe to onú ehelẹ basi,+ 18 he yin yinyọnẹn sọn hohowhenu.’+ 19 Enẹwutu, nudide ṣie* wẹ yindọ mí ni ma dotukla omẹ akọta lẹ tọn he to lilẹhlan Jiwheyẹwhe dè lẹ blo,+ 20 ṣigba nado kanwehlan yé nado nọla na nuhe yin hinhẹnflu gbọn boṣiọ lẹ dali lẹ,+ na fẹnnuwiwa zanhẹmẹ tọn,*+ na nuhe yin kọslona hù* lẹ podọ na ohùn.+ 21 Na sọn ojlẹ hohowhenu tọn lẹ mẹ wẹ kandai Mose tọn lẹ ko tindo mẹhe to yẹwheho yetọn dọ to tòdaho de mẹ jẹ tòdaho de mẹ, na kandai etọn lẹ nọ yin hihia daga to sinagọgu lẹ mẹ to gbọjẹzan dopodopo gbè.”+

22 To whenẹnu, apọsteli lẹ po mẹho lẹ po gọna agun lọ pete basi nudide nado do sunnu dide lẹ hlan sọn yé mẹ yì Antioku to pọmẹ hẹ Paulu po Balnaba po; mẹhe yé dohlan lẹ wẹ Juda he sọ nọ yin Balsaba po Sila+ po, yèdọ sunnu nukundeji lẹ to mẹmẹsunnu lẹ ṣẹnṣẹn. 23 Yé kàn ehe bo dohlan gbọn yewlẹ gblamẹ dọmọ:

“Sọn mẹmẹsunnu mìtọn lẹ, yèdọ apọsteli lẹ po mẹho lẹ po dè, hlan mẹmẹsunnu he to Antioku,+ Silia po Silisia po lẹ, he wá sọn akọta lẹ mẹ lẹ: Mí dọnudo mì! 24 To whenuena mí sè dọ mẹdelẹ sọn ṣẹnṣẹn mítọn ko yí nuhe yé dọ lẹ do dotukla mì+ bo to tintẹnpọn nado hù mì* sudo, dile mí ma tlẹ na yé anademẹ depope, 25 mí ko wá gbèta dopo kọ̀n nado de sunnu delẹ bo do yé hlan mì to pọmẹ hẹ mẹyiwanna mítọn lẹ, Balnaba po Paulu po, 26 yèdọ sunnu he ko ze ogbẹ̀* yetọn jo na oyín Oklunọ mítọn Jesu Klisti tọn wutu lẹ.+ 27 Enẹwutu wẹ mí do Juda po Sila po hlan, na yé nido sọgan yí onù do na linlin nudopolọ tọn ga.+ 28 Na gbigbọ wiwe+ po mílọsu po mọdọ e yọ́n ma nado vọ́ doagban pinpẹn na mì, adavo nuhe yin dandan tọn ehelẹ: 29 nado nọla na nuhe yin yíyí do sanvọ́ hlan boṣiọ lẹ,+ na ohùn,+ na nuhe yin kọslona hù* lẹ+ podọ na fẹnnuwiwa zanhẹmẹ tọn.*+ Eyin mì yí sọwhiwhe do whlá mìde sọn onú ehelẹ mẹ, mì na nọ jijọho mẹ. Mì nọ dagbe!”*

30 Enẹwutu, to whenue omẹ ehelẹ yin didohlan, yé jẹte yì Antioku, yé sọ pli mẹhe to pipli lọ mẹ lẹpo bo ze wekanhlanmẹ lọ na yé. 31 To whenue yé hia ẹ, yé jaya na tulinamẹ lọ wutu. 32 Podọ Juda po Sila po, na yelọsu yin yẹwhegán lẹ wutu, yé yí togunmẹho susu do na tuli mẹmẹsunnu lẹ bo hẹn yé lodo.+ 33 To whenue yé ko nọ finẹ na ojlẹ de godo, mẹmẹsunnu lọ lẹ do yé hlan to jijọho mẹ yì mẹhe ko do yé hlan lẹ dè. 34 *—— 35 Ṣigba, Paulu po Balnaba po gbọṣi Antioku bo to mẹplọn bosọ to wẹndagbe ohó Jehovah* tọn lá to pọmẹ hẹ mẹdevo lẹ.

36 To azán delẹ godo, Paulu dọna Balnaba dọmọ: “Todin, gbọ mí ni lẹkọyi* bo dla mẹmẹsunnu lẹ pọ́n to tòdaho he mẹ mí ko lá ohó Jehovah* tọn te lẹpo nado pọ́n lehe yé te do.”+ 37 Balnaba magbe nado plan Johanu hẹn, mẹhe sọ nọ yin Malku.+ 38 Ṣigba, Paulu mọdọ e ma jẹ nado plan ewọ hẹn gba, na e mọdọ e ko jo yé do to Pamfilia bo ma hodo yé to azọ́n lọ mẹ.+ 39 Na ehe wutu, wiwọ́ sinsinyẹn de wá aimẹ, sọmọ bọ yé klan sọn yedelẹ go; Balnaba+ sọ plan Malku hẹn bo do tọjihun yì Kiplu. 40 Paulu de Sila, podọ to whenue mẹmẹsunnu lẹ ko ze e do alọmẹ na nukundagbe majẹhẹ Jehovah* tọn godo, e tọ́nyi.+ 41 Ewọ sọ jugbọn Silia po Silisia po bo to agun lẹ hẹn lodo.