LEKSION 15
Asino ni Jesus?
Ni Jesus ti maysa kadagiti kasikatan a tao iti historia. Ngem naganna laeng ti ammo ti adu a tattao maipapan kenkuana. Agduduma met ti opinion ti adu a tattao no asino a talaga ni Jesus. Ania ti ibaga ti Biblia maipapan kenkuana?
1. Asino ni Jesus?
Ni Jesus ket maysa a mannakabalin nga espiritu idiay langit. Inaramid isuna ni Jehova a Dios sakbay ti amin a dadduma pay a parsua. Gapu iti dayta, isu ket naawagan kas “ti inauna iti amin a parsua.” (Colosas 1:15) Awagan ti Biblia ni Jesus kas ti ‘bugbugtong nga Anak’ ti Dios gapu ta isu laeng ti direkta a pinarsua ni Jehova. (Juan 3:16) Nakipagtrabaho ni Jesus iti Amana a ni Jehova iti panangaramid iti amin a dadduma pay a banag. (Basaen ti Proverbio 8:30.) Agingga ita, nadekket latta ti relasion ni Jesus ken ni Jehova. Simamatalek a nagserbi kas pannakangiwat ti Dios, “ti Sao,” a nangidanon kadagiti mensahe ken instruksion ti Dios.—Juan 1:14.
2. Apay nga immay ni Jesus ditoy daga?
Agarup 2,000 a tawenen ti napalabas, nangaramid ni Jehova iti milagro. Inusarna ti nasantuan nga espirituna a mangyakar iti biag ni Jesus manipud langit iti aanakan ti agtutubo a birhen a babai nga agnagan Maria. Gapu iti dayta, nayanak ni Jesus kas tao. (Basaen ti Lucas 1:34, 35.) Immay ni Jesus ditoy daga kas ti naikari a Mesias, wenno Kristo, ken tapno isalakanna dagiti tattao.a Natungpal kenkuana ti amin a padto iti Biblia maipapan iti Mesias, isu a nailasin dagiti tattao a ni Jesus “ti Kristo, ti Anak ti sibibiag a Dios.”—Mateo 16:16.
3. Ayan itan ni Jesus?
Idi natay ni Jesus kas tao, napagungar kas espiritu ken nagsubli idiay langit. Idiay langit, ni Jesus ket “intan-ok ti Dios iti nangatngato a posision.” (Filipos 2:9) Ita, nagdakkel ti autoridad ni Jesus. Isu ti maikadua ken Jehova a kangatuan.
AMMUEM TI AD-ADU PAY
Adalem ti ad-adu pay no asino a talaga ni Jesus ken no apay a nakaim-importante nga adalen ti maipapan kenkuana.
4. Ni Jesus ket saan a Mannakabalin-amin a Dios
Isursuro ti Biblia nga uray no mannakabalin nga espiritu a parsua ni Jesus idiay langit, agtultulnog iti Diosna ken Amana, ni Jehova. Apay a maibagatayo a kasta? I-play ti VIDEO tapno maammuam ti isursuro ti Biblia no apay a naiduma ni Jesus iti mannakabalin-amin a Dios.
Makatulong dagiti sumaganad a teksto tapno maawatantayo no ania ti relasion ni Jehova ken ni Jesus. Basaen ti tunggal teksto, sa pagsaritaan dagiti sumaruno a saludsod.
Basaen ti Lucas 1:30-32.
Ania ti imbaga ti anghel a relasion ni Jesus ken ni Jehova a Dios, “ti Kangatuan”?
Basaen ti Mateo 3:16, 17.
Idi nabautisaran ni Jesus, ania ti nangngegna manipud langit?
Makimboses ngata iti dayta?
Basaen ti Juan 14:28.
Asino ti in-inauna ken dakdakkel ti autoridadna? Ti ama wenno ti anak?
Ania ti ipakita ti panangawag ni Jesus ken Jehova iti Ama?
Basaen ti Juan 12:49.
Pinanunot kadi ni Jesus nga agpadada iti Amana? Ania ti makunam?
5. Dagiti ebidensia a ni Jesus ti Mesias
Makita iti Biblia ti adu a padto a makatulong kadagiti tattao tapno mailasinda ti Mesias—ti pinili ti Dios a mangisalakan kadagiti tattao. I-play ti VIDEO tapno maammuam ti dadduma a padto a natungpal ken Jesus idi immay ditoy daga.
Basaen dagiti sumaganad a padto ti Biblia, sa pagsaritaan dagitoy a saludsod:
Basaen ti Mikias 5:2 tapno maammuam ti pakayanakan ti Mesias.b
Natungpal kadi daytoy a padto maipapan iti nakayanakan ni Jesus?—Mateo 2:1.
Basaen ti Salmo 34:20 ken Zacarias 12:10 tapno makitam dagiti detalye dagiti padto maipapan iti ipapatay ti Mesias.
Natungpal kadi dagitoy a padto?—Juan 19:33-37.
Panagkunam, nasaksakbay kadi nga implano ni Jesus a matungpal dagitoy a padto?
Para kenka, ania ti ipakita daytoy maipapan ken Jesus?
6. Pagimbagantayo no adalentayo ti maipapan ken Jesus
Ipakita ti Biblia a nagpateg nga adalentayo ti maipapan ken Jesus ken ti kayat ti Dios nga aramidenna. Basaen ti Juan 14:6 ken 17:3, sa pagsaritaan daytoy a saludsod:
Apay a napateg nga adalentayo ti maipapan ken Jesus?
Linuktan ni Jesus ti dalan tapno agbalintayo a gayyem ti Dios. Insurona ti kinapudno maipapan ken Jehova, ken babaen kenkuana, maaddaantayo iti agnanayon a biag
KUNA TI DADDUMA: “Saan a mamati dagiti Saksi ni Jehova ken Jesus.”
Ania ti isungbatmo?
SUMARIO
Ni Jesus ket maysa a mannakabalin nga espiritu. Isu ti Anak ti Dios ken ti Mesias.
Rebiu
Apay a naawagan ni Jesus kas “ti inauna iti amin a parsua”?
Ania ti inaramid ni Jesus sakbay nga immay ditoy daga?
Kasanotayo nga ammo a ni Jesus ti Mesias?
AGDISKOBREKA PAY
Ammuem ti ad-adu pay maipapan iti papel ni Jesus kas ti Mesias.
“Paneknekan Kadi Dagiti Padto Maipapan iti Mesias a ni Jesus ti Mesias?” (Artikulo iti website)
Ammuem no isursuro ti Biblia a ti panangpataud ti Dios ken Jesus ket kas iti panangpataud dagiti tattao iti annak.
“Apay a ni Jesus ket Maawagan iti Anak ti Dios?” (Artikulo iti website)
Kitaem no apay a saan nga isursuro ti Biblia ti Trinidad.
Basaem no kasano a nagbalbaliw ti biag ti maysa a babai idi inadalna ti ibagbaga ti Biblia maipapan ken Jesus.
“Ilawlawag ti Maysa a Babai a Judio No Apay a Binaliwanna ti Pammatina” (Agriingkayo!, Mayo 2013)
a Mailawlawag iti Leksion 26 ken 27 no apay a kasapulan dagiti tattao ti maisalakan ken no kasano nga isalakannatayo ni Jesus.