2 Piere

3 Bampangi ya mono ke zolaka mingi, yai mukanda ya zole ya mono ke sonikila beno, mpi na kati na yo, bonso na mukanda na mono ya ntete, mono ke yibusa+ beno mambu sambu mono sikimisa mayele na beno ya kuyindula mbote, 2 sambu beno yibuka mambu yina bambikudi ya santu tubaka ntama* mpi nsiku ya Mfumu mpi Ngulusi, yina bantumwa na beno zabisaka beno. 3 Ntete-ntete, beno zaba nde na bilumbu ya nsuka, bantu ya ke sekaka ta kwisa ti kuseka na bo, mpi bo ta salaka mambu na kulanda banzala na bo mosi+ 4 mpi bo ta tubaka nde: “Wapi kukala na yandi yina yandi silaka?+ Ya kieleka, katuka kilumbu yina ba-nkaka na beto me fwaka,* mambu yonso kele kaka mutindu yo vandaka katuka luyantiku ya lugangu.”+

5 Sambu bo ke tula ve dikebi na luzolo yonso nde tuka ntama zulu mpi ntoto ya ngolo yina basikaka na masa mpi na kati ya masa na nsadisa ya ndinga ya Nzambi vandaka;+ 6 mpi na nzila na yo, nsi-ntoto ya ntangu yina fwaka ntangu yo fulukaka na masa.+ 7 Kansi, na nzila ya ndinga yina mosi, zulu mpi ntoto ya ntangu yai, bo me bumba yo sambu na kufwa yo na tiya mpi bo ke tanina yo tii na kilumbu ya kusambisa mpi ya lufwa ya bantu yina ke vwezaka Nzambi.+

8 Kansi, bampangi ya mono ke zolaka mingi, beno vila ve diambu yai, nde na meso ya Yehowa* kilumbu mosi kele bonso bamvula funda mpi bamvula funda kele bonso kilumbu mosi.+ 9 Yehowa* ke sukinina ve na kulungisa lusilu na yandi,+ mutindu bantu ya nkaka ke yindulaka, kansi yandi ke monisila beno ntima ya nda, sambu yandi ke zola ve nde ata muntu mosi kufwa, kansi yandi ke zola nde bantu yonso kubalula ntima.+ 10 Kansi, kilumbu ya Yehowa*+ ta kwisa bonso muyibi;+ na kilumbu yina zulu ta luta+ nswalu ti makelele ya ngolo, kansi sambu bima na yo ta kuma tiya kibeni, yo ta kuma bonso masa, mpi ntoto ti bisalu yina kele na kati na yo ta monana pwelele.*+

11 Sambu bima yai yonso fwete kuma bonso masa na mutindu yai, beno tadila mutindu ya bantu yina beno fwete vanda. Beno fwete vanda bantu ya bikalulu ya santu mpi kusala bisalu ya ke monisa kukangama na Nzambi, 12 na ntangu beno ke vingila mpi ke yibuka ntangu yonso* kilumbu* ya Yehowa,*+ na ntangu yina zulu ta fwa+ na tiya, mpi tiya ya ngolo ta kumisa bima na yo masa-masa! 13 Kansi, na kutadila lusilu na yandi,+ beto ke vingila zulu ya mpa mpi ntoto ya mpa, mpi na kati na yo lunungu ta vanda.+

14 Yo yina, bampangi ya mono ke zolaka mingi, sambu beno ke vingila mambu yai, beno sala ngolo kibeni sambu nsuka-nsuka yandi kwisa kukuta beno kukonda ditono, kukonda mvindu, mpi na ngemba.+ 15 Diaka, beno tadila ntima ya nda ya Mfumu na beto nde yo ke tendula luguluku, kaka mutindu mpangi na beto Polo ya beto ke zolaka mingi sonikilaka beno mpi na kuwakana ti mayele yina bo me pesaka yandi,+ 16 yandi tubilaka mambu yai mutindu yandi ke salaka yo na mikanda na yandi yonso. Kansi, mambu ya nkaka na kati na yo kele mpasi na kubakisa, mpi bantu ya me zaba kima ve* mpi bantu yina kele na ngolo ve ke balulaka mambu yina mutindu ya nkaka, mutindu bo ke salaka mpi na mambu ya nkaka ya kele na Masonuku, sambu na lufwa na bo mosi.

17 Yo yina, beno bampangi ya mono ke zolaka mingi, sambu beno me zaba mambu yai na ntwala, beno keba sambu bantu yina ke fwaka nsiku kuvidisa beno ve nzila na kifu na bo mpi beno vanda diaka ve ngolo.+ 18 Kansi, beno landa kuyela na ntima ya mbote ya nene mpi na nzayilu ya Mfumu mpi Ngulusi na beto Yezu Kristu. Nkembo kuvanda na yandi bubu yai mpi mvula na mvula. Amen.