Lɛ Wi Prez Krays, di Wɔndaful Kiŋ!

1, 2. Wetin mek Sam 45 rili impɔtant to wi?

INSAY Sam 45, dɛn tɔk bɔt wan wɔndaful kiŋ we de go fɛt wɔ fɔ wetin tru ɛn fɔ wetin rayt; i de go fɔ win in ɛnimi dɛn. Afta i win di las wɔ, i go mared wan fayn uman. Ɔlman go no dis kiŋ ɛn prez am, ivin di wan dɛn we nɔ bɔn yet. Na dat na di men tin we Sam 45 de tɔk bɔt.

² Bɔt Sam 45 nɔto jɔs ɛni fayn stori we gɛt fayn ɛndin. Di tin dɛn we i tɔk bɔt gɛt sɔntin fɔ du wit wi. I gɛt sɔntin fɔ du wit wi layf naw, ɛn wi layf tumara bambay. Naw, lɛ wi tɔk bɔt ɔl di vas dɛn we de insay dis Sam, ɛn lɛ wi tink gud wan bɔt wetin i de tɔk bɔt.

3, 4. (a) Wetin na di “fayn, fayn tin dɛn” we wi fɔ tink bɔt? Wetin dis fɔ mek wi want fɔ du? (b) Aw wisɛf gɛt ‘siŋ fɔ wan kiŋ’? Aw wi tan lɛk “pɔsin we in wok na fɔ rayt”?

³ Rid Sam 45:1. Di pɔsin we rayt dis Sam bin de “tink” bɔt sɔm “fayn, fayn tin dɛn” bɔt wan kiŋ. Di tin dɛn we i bin de tink bɔt mek i gladi, so i mek wan siŋ fɔ di kiŋ jɔs lɛk “pɔsin we in wok na fɔ rayt.”

⁴ We wi tide? Di gud nyus bɔt Gɔd in Kiŋdɔm na fayn tin we wi fɔ tink bɔt. Dis mɛsej we wi de prich bin rili “fayn” insay 1914. Frɔm da tɛm de, wi lɛf fɔ tɔk bɔt wan Kiŋdɔm we gɛt fɔ kam, ɛn bigin tɔk bɔt wan Kiŋdɔm we dɔn bigin rul na ɛvin. Dis mɛsej na di “Gud Nyuz bɔt wɛn Gɔd go rul di wɔl.” Wi de prich bɔt am “so dat ɔlman go gɛt di chans fɔ yɛri ɛn biliv di Gud Nyuz.” (Mat. 24:14) I go fayn mek wi go de tink gud wan bɔt dis mɛsej bɔt Gɔd in Kiŋdɔm. Ɛn wi fɔ de prich di gud nyus bɔt Gɔd in Kiŋdɔm wit zil. Jɔs lɛk di pɔsin we rayt Sam 45, wisɛf gɛt ‘siŋ fɔ wan kiŋ’ ɛn dis Kiŋ na Jizɔs Krays. Wi kin tɛl pipul dɛn se i dɔn bi Kiŋ na Gɔd in Kiŋdɔm. Apat frɔm dat, wi want mek ɔlman, frɔm di wan dɛn we de rul te go to di wan dɛn we dɛn de rul, put dɛnsɛf ɔnda dis kiŋ. (Sam 2:1, 2, 4-12) Wisɛf de mek siŋ lɛk “pɔsin we in wok na fɔ rayt.” Aw wi de du dat? Wi de du dat bay we wi de yuz di Baybul gud gud wan we wi de prich.

 5. (a) Wetin mek wi go se Jizɔs bin “fayn”? (b) Aw wi no se ‘di Kiŋ sabi tɔk to pɔsin’? Aw wi go falamakata in ɛgzampul?

⁵ Rid Sam 45:2. Di Baybul nɔ tɔk plɛnti bɔt aw Jizɔs fayn. Bɔt bikɔs Jizɔs na pafɛkt pɔsin, wi shɔ se i rili “fayn.” Wan tin we mek Jizɔs fayn na dat, i bin fetful to Jiova, ɛn i bin tinap tranga wan fɔ du wetin rayt. Wan ɔda tin we mek Jizɔs fayn na dat, i bin “sabi tɔk” to pipul dɛn we i bin de prich bɔt Gɔd in Kiŋdɔm. (Lyuk 4:22; Jɔn 7:46) Wi fɔ tray fɔ falamakata Jizɔs in ɛgzampul we wi de du di prichin wok, ɛn wi fɔ tray fɔ tɔk to pipul dɛn di kayn we we go mek dɛn gladi fɔ yɛri wetin wi de tɛl dɛn.—Kɔl. 4:6.

 6. Aw Gɔd bin blɛs Jizɔs “fɔ layf”?

⁶ Jiova bin de blɛs Jizɔs we i bin de prich, ɛn leta i bin gi Jizɔs layf bak. Gɔd du ɔl dɛn tin ya fɔ Jizɔs bikɔs Jizɔs bin de sav am wit ɔl in at. Di apɔsul Pɔl bin rayt se: “[Jizɔs] gri fɔ du ɔl wetin Gɔd tɛl am fɔ du, fɔ day sɛf. . . . Fɔseka dat, Gɔd mek i sidɔm na ples we sho se nain impɔtant pas ɔl ɛn i gi am nem we sho se i impɔtant pas ɔl. So fɔ ɔna Jizɔs, ɔl dɛn wan we de na ɛvin, ɔl dɛn wan we de na dis wɔl ɛn ɔl dɛn wan we de ɔnda dis wɔl, go nil dɔŋ bifo am, ɛn tɔk se Jizɔs na di Masta, ɛn ɔlman go prez Gɔd we na wi Papa.” (Fil. 2:8-11) Jiova blɛs Jizɔs “fɔ layf” bay we i mek i rayz frɔm di grev ɛn mek i nɔ day igen.—Rom 6:9.

 7. Aw Jizɔs de ɔp pas in “kɔmpin kiŋ dɛn”?

⁷ Rid Sam 45:6, 7. Bikɔs Jizɔs lɛk fɔ du tin di rayt we ɛn et ɛnitin we go briŋ badnem to in Papa, na dat mek Jiova anɔynt am fɔ bi Kiŋ na in Kiŋdɔm. Jizɔs ‘de ɔp pas ɔl in kɔmpin kiŋ dɛn’ we kɔmɔt na Devid in famili. Aw i de ɔp pas dɛn? Wan we na dat, na Jiova insɛf bin anɔynt am. Di ɔda we na dat, Jiova bin anɔynt am fɔ bi Kiŋ ɛn Ay Prist. (Sam 2:2; Ibru 5:5, 6) Apat frɔm dat, Jiova nɔ bin anɔynt Jizɔs wit ɔyl bɔt na wit oli spirit, ɛn Jizɔs nɔ go de na di wɔl we i de rul, bɔt na ɛvin i go de.

 8. Wetin mek na Jizɔs gɛt di rayt fɔ rul? Wetin mek wi shɔ se Jizɔs go rul tret wan?

⁸ Insay 1914, Jiova mek in Pikin bi Kiŋ na ɛvin. Jizɔs go rul tret ɛn fia wan bikɔs di stik we i ol fɔ rul de sho dat. Na Jizɔs gɛt di rayt fɔ rul bikɔs na ‘Gɔd put am fɔ rul.’ Apat frɔm dat, Jizɔs in rul go de “sote go.” Wi fɔ gladi fɔ sav ɛn de ɔnda di Kiŋ we Gɔd dɔn pik fɔ rul wi.

9, 10. (a) Ustɛm Krays ol in wɛpɔn, ɛn wetin fɔs i yuz am fɔ du? (b) Wetin bak Krays gɛt fɔ yuz in wɛpɔn fɔ du?

⁹ Rid Sam 45:3. Jiova tɛl in Kiŋ mek i ‘nɔ fɔgɛt fɔ ol in wɛpɔn.’ Wetin dat min? I min se Jiova dɔn gi Jizɔs di pawa fɔ fɛt ɔl di wan dɛn we nɔ want fɔ mek Gɔd rul dɛn. (Sam 110:2) Krays na “tɔf man” bikɔs in na Kiŋ we nɔbɔdi nɔ ebul win pan wɔ. Di fɔs tɛm we i ol in wɛpɔn na bin insay 1914 we i fɛt Setan ɛn in dɛbul dɛn, ɛn pul dɛn kɔmɔt na ɛvin; dɔn i ib dɛn dɔŋ na di wɔl.—Rɛv. 12:7-9.

¹⁰ Dat na bin jɔs di fɔs wɔ we di Kiŋ win. I go gɛt fɔ “win ɔda wa dɛn” bak. (Rɛv. 6:2) Jiova gɛt fɔ yuz in Kiŋ fɔ pul Setan, in dɛbul dɛn, ɛn ɔltin we Setan gɛt na di wɔl. Di fɔs tin we di Kiŋ go pul, na Babilɔn we ɔlman no; dat na ɔl di lay lay rilijɔn dɛn we de na di wɔl. Jiova go yuz di wan dɛn we de rul na di wɔl, fɔ pul dis wikɛd “uman we [de] liv fri layf” we na Babilɔn we ɔlman no. (Rɛv. 17:16, 17) Afta dat, di Kiŋ go fɛt ɔl di wan dɛn we Setan de yuz fɔ rul di wɔl, ɛn pul dɛn kɔmɔt kpatakpata. Krays we na di ‘enjɛl we de gyad di ol we nɔ gɛt bɔtɔm,’ go dɔn fɔ win in wɔ dɛn bay we i go put Setan ɛn in debul dɛn insay dis ol. (Rɛv. 9:1, 11; 20:1-3) Lɛ wi si aw Sam 45 sho aw ɔl dis go apin.

11. Aw Krays de fɛt “fɔ wetin tru”?

¹¹ Rid Sam 45:4 (NW). Di wɔ dɛn we di Kiŋ de fɛt nɔto fɔ pul land na pipul dɛn an ɔ fɔ fos pipul dɛn fɔ de ɔnda in kɔntrol. Bɔt i de fɛt dis wɔ fɔ gud rizin. I de fɛt “fɔ wetin tru, fɔ wetin ɔmbul, ɛn fɔ wetin rayt.” Wetin na dis tru we i de fɛt fɔ? Di tru we i de fɛt fɔ na bɔt Jiova in rayt fɔ rul di wan ol wɔl. Setan bin chalenj Jiova in rayt fɔ rul we i bin tɔn agens Gɔd. Frɔm da tɛm de, di dɛbul dɛn ɛn sɔm pipul dɛn dɔn de tray tranga wan fɔ mek pipul dɛn biliv se Jiova nɔ gɛt rayt fɔ rul. Ɛn di tɛm dɔn rich fɔ mek di Kiŋ we Jiova dɔn anɔynt, kam fɔ sho klia wan di tru bɔt Jiova in rayt fɔ rul.

12. Aw di Kiŋ de fɛt “fɔ wetin ɔmbul”?

¹² Di Kiŋ de fɛt bak “fɔ wetin ɔmbul.” As Gɔd in wangren Pikin, i dɔn sho se i rili ɔmbul bay we i put insɛf ɔnda in Papa bikɔs i no se na in gɛt rayt fɔ rul di wan ol wɔl. (Ayz. 50:4, 5; Jɔn 5:19) Ɔl di wan dɛn we de ɔnda di Kiŋ fɔ falamakata in ɛgzampul. Dɛn fɔ no se na Jiova gɛt di rayt fɔ rul ɛn put dɛnsɛf ɔnda am pan ɛnitin we dɛn de du. Na di wan dɛn nɔmɔ we de du dat go de na di nyu wɔl we Gɔd dɔn prɔmis.—Zɛk. 14:16, 17.

13. Aw Krays de fɛt “fɔ wetin rayt”?

¹³ Krays de fɛt bak “fɔ wetin rayt.” Di Kiŋ de fɛt fɔ sho wi di tin dɛn we Jiova want wi fɔ du, ɛn di tin dɛn we i nɔ want wi fɔ du. (Rom 3:21; Dit. 32:4) We Ayzaya bin de tɔk bɔt di Kiŋ we na Jizɔs Krays, i se: “A de tɛl una, wan kiŋ go rul we go waka tret na PAPA GƆD in yay.” (Ayz. 32:1) We Jizɔs go de rul, i go briŋ “nyu ɛvin” ɛn “nyu wɔl,” usay “ɔlman go de du wetin rayt.” (2 Pit. 3:13) Ɔlman we go de na da nyu wɔl de go de liv dɛn layf di we aw Jiova want.—Ayz. 11:1-5.

14. Aw Krays go du “pawaful tin dɛn”? (Luk di pikchɔ nia dis atikul in taytul.)

¹⁴ As di Kiŋ de go fɔ fɛt, i ol in wɛpɔn. (Sam 45:3) Bɔt di tɛm dɔn rich fɔ mek i bigin yuz am. Di pɔsin we rayt dis Sam tɔk se di Kiŋ go ‘yuz in trɛnk fɔ sho se i kin du pawaful tin dɛn.’ (Sam 45:4) We Jizɔs Krays de go fɔ fɛt Jiova in wɔ we na Amagɛdɔn, i go du “pawaful tin dɛn” fɔ pul di wan dɛn we na in ɛnimi dɛn. Wi nɔ no yet wetin i go yuz fɔ pul dɛn. Bɔt di tin we i go du, go mek ɔl di wan dɛn we nɔ de gri fɔ put dɛnsɛf ɔnda di Kiŋ, fred. (Rid Sam 2:11, 12.) We Jizɔs bin de tɔk bɔt di tɛm we di wɔl go dɔn, i bin se pipul dɛn go “fent bikɔs dɛn de fred di bad tin dɛn we de kam bi na [di] wɔl, di pawa dɛn we de na di klawd go muf kɔmɔt na di ples we dɛn bin de.” I tɔk bak se: “Da tɛm de, ɔlman go si we Mɔtalman Pikin de kɔmɔt na [di] klawd ɛn kam na [di] wɔl wit pawa ɛn brayt brayt layt go de shayn rawnd am.”—Lyuk 21:26, 27.

15, 16. Udat dɛn go bi “dɛn soja man na ɛvin” we go jɔyn Krays fɔ fɛt?

¹⁵ We di apɔsul Jɔn bin de tɔk bɔt we di Kiŋ go de kam “wit pawa ɛn brayt brayt layt,” na dis i se: “A si wan domɔt na ɛvin opin, a si wan wayt ɔs tinap de, di pɔsin we bin de rayd am bin nem ‘Di wan we fit fɔ trɔs ɛn di wan we de tɔk tru.’ I de jɔj tret ɔltɛm, ɛn wɛn i de fɛt sɛf na wa, i tret. Dɛn soja man na ɛvin bin de fala am, dɛnsɛf bin de rayd wayt ɔs ɛn dɛn bin wɛr klin wayt linin klos. I bin ol wan sɔd nain mɔt, we i go tek fɛt ɛn win ɔl dɛn neshɔn we nɔ de fala am. Na ayɛn staf i go tek rul dɛn, ɛn i go mas mas dɛn greps na di say we dɛn de mas dɛn fɔ pul dɛn wata, we go sho se Gɔd, we gɛt pawa pas ɔl, vɛks bad bad wan.”—Rɛv. 19:11, 14, 15.

¹⁶ Udat dɛn go bi “dɛn soja man na ɛvin” we go jɔyn Krays fɔ fɛt? Di tɛm we Jizɔs bin ol in wɛpɔn fɔ pul Setan ɛn in dɛbul dɛn kɔmɔt na ɛvin, na in ɛn “in enjɛl dɛn” bin du am. (Rɛv. 12:7-9) So i go rili mek sɛns if wi se we Krays go fɛt Amagɛdɔn, di enjɛl dɛn go jɔyn am bak fɔ du dat. Ɔda pipul dɛn bak go jɔyn dɛn? Jizɔs bin prɔmis in brɔda dɛn we Gɔd dɔn anɔynt, se: “Dɛn pipul we stil tinap traŋa afta Setan dɔn tray dɛn, ɛn we stil de du dɛn tin we a tɛl dɛn fɔ du, te a kam bak, a go gi dɛn pawa oba ɔl dɛn neshɔn na dis wɔl, jɛs lɛkɛ we mi Papa dɔn gi misɛf pawa oba dɛn. Dɛn go tek lɔŋ ayɛn lɛkɛ di wan we chif de ol, rul oba dɛn neshɔn ya ɛn dɛn go skata dɛn pispis lɛkɛ kɔntri pɔt we pɔsin ib dɔŋ.” (Rɛv. 2:26, 27) So Krays in brɔda dɛn we Gɔd dɔn anɔynt ɛn we go dɔn de na ɛvin da tɛm de, dɛnsɛf go bi sojaman dɛn na ɛvin. Dɛn go de wit Jizɔs we i de du “pawaful tin dɛn.”

17. (a) Wetin di wayt ɔs we Krays de rayd, min? (b) Wetin di sɔd ɛn di bo min?

¹⁷ Rid Sam 45:5. Di Baybul tɔk se di Kiŋ de rayd wan wayt ɔs. Dis min se i go fɛt wan wɔ we fayn na Jiova in yay. (Rɛv. 6:2; 19:11) Apat frɔm di sɔd we i ol, i ol bak wan bo na in an. Na dis di Baybul se: “A tɔn luk, na de a si wan wayt ɔs. Di pɔsin we de rayd am, ol wan bo nain an fɔ fɛt, dɛn gi am krawn fɔ wɛr nain ed. I rayd in ɔs go, i dɔn win wan wa ɛn i de go fɔ win ɔda wa dɛn.” Dis sɔd ɛn bo we Krays ol na in an, min di tin we i go yuz fɔ kil ɔl in ɛnimi dɛn.

18. Aw Krays go ‘win in ɛnimi dɛn’?

¹⁸ Di pɔsin we rayt Sam 45 se di Kiŋ go ‘win in ɛnimi dɛn’ ɛn ‘dɛn neshɔn dɛn ɔl go kam fɔdɔm bifo am.’ Di wan dɛn we go day go plɛnti ɛn dɛn go de ɔlsay na di wɔl. Jɛrimaya bin tɔk se: “Di wan dɛn we PAPA GƆD go kil da de de, go kɔmɔt frɔm wan say na di wɔl to di ɔda.” (Jɛr. 25:33) Di apɔsul Jɔn bin tɔk dis sem tin. I se: “Dɛn a si wan enjɛl tinap na di say we di san de, de ala kɔl ɔl dɛn bɔd we de flay ɔp ɔp, ɛn tɛl dɛn se, ‘Una kam gɛda fɔ it di big it we Gɔd dɔn mek; una kam it dɛn chif, dɛn kapten, ɛn dɛn bigman dɛn bɔdi. Una kam it dɛn ɔs dɛn bɔdi, ɛn dɛn wan we de rayd dɛn, dɛnsɛf yon; una kam it dɛn slev ɛn dɛn fri man dɛn bɔdi ɛn dɛn bigman ɛn dɛn pikin yon.’”—Rɛv. 19:17, 18.

19. Aw Krays go “kɔntinyu fɔ win” ɛn dɔn fɔ win in wɔ dɛn?

¹⁹ Afta Krays go dɔn pul ɔl di bad bad tin dɛn we Setan dɔn put na di wɔl, i go yuz di pawa we i gɛt ɛn ‘kɔntinyu fɔ win ɔl in wɔ dɛn.’ (Sam 45:4) I go dɔn fɔ win in wɔ dɛn bay we i go trowe Setan ɛn in dɛbul dɛn insay wan ol we nɔ gɛt bɔtɔm. I go mek dɛn de de te di Wan Tawzin Ia Rul dɔn. (Rɛv. 20:2, 3) Da tɛm de, Setan ɛn in dɛbul dɛn nɔ go ebul du natin igen to di pipul dɛn we go de na di wɔl, ɛn ɔlman go de ɔnda di pawaful ɛn wɔndaful Kiŋ. Bɔt bifo dɛn go dɔn mek ɔlsay na di wɔl bi Paradays, sɔntin go apin we go mek dɛn gladi pasmak fɔ dɛn Kiŋ ɛn di wan dɛn we go rul wit am na ɛvin. Na da wɔndaful tin de wi go tɔk bɔt na di nɛks atikul.