Luka

7 Vava kafokwele vova mambu kwa nkangu, okotele muna Kafanau. 2 Ntaudi mosi a mfidi a makesa, ona ketoma zolanga, oyelele, se kefwa. 3 Vava kawidi nsangu mu kuma kia Yesu, otumini akuluntu a Ayuda bandodokela keza vuluza ntaudi andi. 4 Balueke kwa Yesu, bayantikidi kundodokela, bavovele vo: “Umfwene kikilu wamvangila edi kalombele, 5 kadi zula kieto kezolanga, yandi watunga e sambilu dieto.” 6 O Yesu wele yau. Kansi vava kafinama vana nzo, o mfidi a makesa otumini akundi andi bamvovesa vo: “E Mfumu, kuyivangi mpasi ko, kadi kiafwana ko kimana wakota kuna nsi a nludi ame. 7 I kuma ngindulwidi vo omono kibeni kifwene kwiza koko wina ko. Vova kaka e diambu, o ntaudi ame kasasuka. 8 Kadi omono mpe kunsi a wisa ngina, ngina mpe ye makesa ituminanga, avo mpovele kwa mosi vo, ‘Wenda!’ wele, kwa wankaka vo, ‘Wiza!’ wizidi, ye kwa ntaudi ame vo, ‘Vanga edi!’ ovangidi dio.” 9 Yesu vava kawidi mambu mama, osivikidi muntu ndioyo, ovilukidi kwa ndonga ina inlende, ovovele vo: “Inuvovese vo, kana nkutu muna Isaele, kiasolwele muntu ko una ye lukwikilu lwanene nze lwalu.” 10 Awana batumwa vava bavutukidi kuna nzo, bawene o ntaudi osasukidi.

11 Ke vavioka kolo ko, wele muna vata dia Naini, alongoki andi bele yandi kumosi ye ndong’ayingi. 12 Una kafinama vana vitu dia vata, tala, o fwa kunatwanga, i mwana mosi kaka wa nkento wafwilwa yakala. E ndong’ayingi y’esi vata bakala yandi. 13 O Mfumu vava kamwene, umfwididi e nkenda, umvovese vo: “Yambul’o dila.” 14 Wizidi finama kipoyo kia mvumbi, oviakene kio, anati baningamene. I bosi, ovovele vo: “E toko, ivovese vo, telama!” 15 O mvumbi ovumbukidi, oyantikidi o vova. Yesu umvene kwa ngudi andi. 16 Awonso babakamene kwa wonga, bakembelele Nzambi, oku vo: “Ngunza anene obundumukini ova twina,” “O Nzambi ovutwidi e sungididi kiandi kwa nkangu andi.” 17 E nsangu zandi zazi zimwangane muna Yuda yawonso ye muna zunga kiawonso.

18 Alongoki a Yoane bansamunwini mambu mama mawonso. 19 O Yoane obokele alongoki andi wole, ubatumini kuna kwa Mfumu, bayuvula vo: “Ongeye i Ndiona okwiza, yovo wankaka tuvingila?” 20 Vava banluakidi, bavovele vo: “O Yoane wa Mvubi ututumini kwa ngeye, twayuvula vo: ‘Ongeye i Ndiona okwiza, yovo wankaka tuvingila?’” 21 Muna ntangwa yayina, wantu ayingi kawukidi muna mayela ye yimbevo yangolo yo vaikisa mianda miambi ye mpofo zingi kamwesese. 22 Ubavutwidi vo: “Nwenda samuna kwa Yoane oma numwene yo wá: Ampofo bamwene, mbevo za malu zidiete, akwa wazi baveleleso, afwa-matu bawidi, mafwa mafulukidi, asukami besamunwinwanga e nsangu zambote. 23 Nkwa nsambu ona olembi tá sakuba mu kuma kiame.”

24 Ana batumwa kwa Yoane, vava bayenda, Yesu oyantikidi samunwina ndonga oma ma Yoane vo: “Nki nwele tala kuna makanga? E tutu divuembeswa kwa tembw’e? 25 Ozevo, nki nwele tala? Muntu ovuete mvuatu miantalu e? Kadi, ana bavuete mvuatu miantalu yo zingila muna umvuama, kuna lûmbu lwa ntinu i bena. 26 Ozevo, nki nwele tala? Ngunz’e? Elo, inuvovese vo, oyandi osundidi kikilu ngunza. 27 Diasonama mu kuma kiandi vo: ‘Ntwikidi ntumw’ame ku ntwal’aku,* ona okukubikila e nzila oku ntwal’aku.’ 28 Inuvovese vo, vana vena awana bawutwa kw’akento, ke vena mosi ko osundidi Yoane o nene, kansi ndiona wandwelo muna Kintinu kia Nzambi unsundidi o nene.” 29 (Una nkangu awonso ye avakulwisi a mpaku bawidi wo, balungisi Nzambi, kadi mu mvub’a Yoane bavubilwa. 30 Kansi, Afarisi ye alongi a Nsiku, babembola luludiku lwa Nzambi muna diambu diau, wau balembi vubwa kwa yandi.)

31 “Aki nani ndenda tezanesa ye wantu a mbandu yayi? Aki nani bafwananene yau? 32 Bena nze aleke bavuende vana zandu bebokaziananga, oku vo: ‘Tunusikidi matutu, yeno kenukini; tunubongele mbembo, yeno kenudidi.’ 33 Diau dimosi mpe, Yoane wa Mvubi wizidi, yandi kadie mbolo, ngatu nua vinyu, oyeno nuvovele vo: ‘Nkuya kena wau.’ 34 Mwan’a muntu wizidi, odidi, onuini, oyeno nuvovele vo: ‘Tala o nkwa loko dia madia, nduvu a vinyu, nkundi wa avakulwisi a mpaku ye asumuki!’ 35 Kansi ngangu olungisilu muna wan’andi* awonsono.”

36 Mfarisi mosi undodokele kenda dia yandi. Wele muna nzo a Mfarisi, ovuende kuna meza. 37 Nkento mosi wakala muna vata, wazayakana vo nsumuki, vava kazeye wo vo Yesu odianga muna nzo a Mfarisi, onete mbwat’a mazi mansunga. 38 Otelamene kuna nima, kuna kafididi malu mandi, odididi, oyantikidi yondeleka o malu mandi muna mansanga, yo kungunwina mo muna nsuki zandi. Ofibulwidi mpe malu mandi, okusidi mo o mazi mansunga. 39 O Mfarisi, ona wambokelesa, vava kamwene wo, ovovele muna ntim’andi vo: “Muntu ndioyu, kele vo ngunza, nga ozeye wo vo nkento ndioyu umviakane, nsumuki.” 40 Kansi, o Yesu umvutwidi vo: “E Simone, diambu ngina diau nzolele kusamunwina.” Ovovele vo: “E Nlongi, vova kwaku!”

41 “Nsompeki mosi wakala ye mindia-mfuka miole; omosi, mfuk’a 500 za denali kakala yau, kansi wankaka 50. 42 Wau ke bena y’eki bafuta ko, ubayambulwidi zo yau wole. Nga nani otoma kunzola vana bena?” 43 Simone ovutwidi vo: “Muna ngindu zame, ndiona kayambulwila nzimbu zayingi.” Umvovese vo: “Otomene vutula.” 44 Ovilukidi kwa nkento, ovovele kwa Simone vo: “Omwene nkento ndioyu e? Nkotele omu nzo aku; ngeye kumpani maza ma sukula malu. Kansi oyandi, muna mansanga i kayondelekele malu mame, yo kungunwina mo muna nsuki zandi. 45 Ngeye kumfibidi ko, kansi oyandi, tukamena kakotele mo, kayambwidi fibulula malu mame ko. 46 Ngeye kukusi ntu ame mazi, kansi oyandi mazi mansunga kakusidi mu malu mame. 47 Muna kuma kiaki isamunwini vo, o masumu mandi kana una vo mayingi,* malolokelo, e kuma kadi, zola kwingi kazolele. Kansi ona ololokelo ndolok’akete, nzol’akete kaka kazolele.” 48 I bosi ovovele kwa nkento vo: “O masumu maku malolokelo.” 49 Awana bavuende yandi kuna meza bayantikidi vovaziana vo: “Nani ndioyu, ololokanga masumu?” 50 Ovovele kwa nkento vo: “Lukwikilu luaku luvulwizi; wendela kuna luvuvamu.”