Yisaya
21 Nsango ya kotɛmɛla esobe ya mbu:*+
Ezali koya lokola mopɛpɛ ya makasi oyo ezali kokɔmba na sudi,
Euti na esobe, na mokili ya nsɔmɔ.+
2 Bayebisi ngai emonaneli moko ya mpasi:
Mokosi azali kosala makambo na bokosi,
Mobebisi azali kobebisa.
Ee Elame, matá! Ee Media,+ zingá!
Nakosala ete kolelalela nyonso oyo azalaki kobimisela bato esila.+
3 Yango wana nazali komitungisa mingi.*+
Mpasi makasi ekangi ngai,
Lokola mpasi ya mwasi oyo azali kobota.
Natungisami mingi mpenza, yango wana nazali koyoka te;
Nabulungani mpenza, yango wana nazali komona te.
4 Motema na ngai elɛmbi; nalɛngi na nsɔmɔ.
Mpokwa liboso molili ekɔta, oyo nazalaki kolinga, ezali kolɛngisa ngai.
5 Bátya biloko na mesa, bábongisa bakiti!
Bálya mpe bámɛla!+
Bótɛlɛma, bino bankumu, bótya nguba mafuta!
6 Mpo talá oyo Yehova alobi na ngai:
“Kende, tyá mokɛngɛli mpe yebisá ye aloba makambo oyo azali komona.”
7 Mpe namonaki likalo ya etumba ná farasa mibale oyo bakangisi esika moko,
Likalo ya etumba ya bampunda,
Mpe likalo ya etumba ya bakamela.
Atalaki mpenza na likebi, na likebi mpenza.
8 Bongo abelelaki lokola nkɔsi:
“Ee Yehova, na moi nazali kaka kotɛlɛma na linɔ́ngi ya mosɛnzɛli,
Mpe butu nyonso natɛlɛmaka na esika na ngai ya kokɛngɛla.+
9 Talá oyo ezali koya:
Mibali bazali koya na likalo moko ya etumba ná farasa* mibale oyo bakangisi esika moko!”+
Bongo alobaki na mongongo makasi ete:
“Akwei! Babilone akwei,+
Mpe bikeko* nyonso ya banzambe na ye ebukani, elali na mabele!”+
10 Ee bato na ngai, baoyo batutami ndenge batutaka blé.
Biloko* ya esika na ngai ya kotutatuta mbuma,+
Nayebisi bino makambo oyo nayoki epai ya Yehova ya mampinga, Nzambe ya Yisraele.
Moto moko azali kobelela ngai uta na Seire:+
“Sinzili, ntɔngɔ ekotana ntango nini?
Sinzili, ntɔngɔ ekotana ntango nini?”
12 Sinzili alobaki:
“Ntɔngɔ ekotana, butu mpe ekoya.
Soki bolingi kotuna, bótuna.
Bóya lisusu!”
13 Nsango ya kotɛmɛla mokili patatalu oyo ekauká:
Bokolala na zamba na butu, na mokili patatalu oyo ekauká,
Ee bino milɔngɔ ya bato ya Dedane oyo bozali koleka.+
14 Bóya na mai mpo na kokutana na moto oyo azali na mposa ya mai,
Bino bato oyo bofandi na mokili ya Tema,+
Bóya na limpa mpo na moto oyo azali kokima.
15 Mpo bakimi mipanga, mopanga oyo euti na libenga na yango,
Mpo na litimbo oyo egumbami, mpo na etumba oyo eyei ndongo.
16 Mpo talá oyo Yehova alobi na ngai: “Liboso ete mbula moko ekoka, lokola bambula ya mosali oyo azwaka lifuti,* nkembo nyonso ya Kedare+ ekosuka mpenza. 17 Motángo ya bato ya litimbo, ya babundi-bitumba ya Kedare, oyo bakotikala ekokóma moke, mpo Yehova, Nzambe ya Yisraele, alobi yango.”