Mokanda ya misato ya Yoane
1 Ngai mokóló,* nakomeli Gayusi, ndeko ya bolingo, oyo nalingaka mpenza.
2 Ndeko ya bolingo, nazali kobondela ete makambo nyonso ekoba kozala malamu epai na yo mpe ozala na nzoto malamu, kaka ndenge ozali* sikoyo. 3 Mpo nasepelaki mingi mpenza ntango bandeko bayaki mpe bapesaki litatoli mpo na solo oyo ozali na yango, mpo ozali kokoba kotambola na kati ya solo.+ 4 Nazali na esengo monene* te koleka oyo: ete nayokaka bazali koloba ete bana na ngai bazali kokoba kotambola na kati ya solo.+
5 Ndeko ya bolingo, ozali komonisa bosembo na yo na oyo ozali kosala mpo na bandeko, atako bazali bapaya mpo na yo.+ 6 Bapesi litatoli mpo na bolingo na yo liboso ya lisangá. Nasɛngi yo ozongisa bango na nzela na bango na ndenge oyo ebongi na Nzambe.+ 7 Mpo ezali mpo na nkombo na ye nde babimaki, mpe bazwi eloko te+ epai ya bato ya bikólo. 8 Na yango, tosengeli komonisela bato ya ndenge wana ezaleli ya koyamba bapaya,+ mpo tókóma baninga ya mosala na kati ya solo.+
9 Nakomelaki lisangá mwa makambo, kasi Diotrefese, oyo alingaka kozwa esika ya liboso na kati na bango,+ azalaka ata na limemya moke te mpo na makambo oyo tolobaka.+ 10 Yango wana soki nayei, nakoyebisa misala oyo azali kosala na ndenge azali kopanza bansango ya lokuta mpo na biso.*+ Asuki kaka wana te, aboyaka koyamba bandeko+ na limemya, mpe baoyo balingi koyamba bango, alukaka kopekisa bango mpe kobwaka bango libándá ya lisangá.
11 Ndeko ya bolingo, komekola oyo ezali mabe te, mekolá nde oyo ezali malamu.+ Moto oyo asalaka malamu auti na Nzambe.+ Moto oyo asalaka mabe amoná Nzambe te.+ 12 Bandeko nyonso balobi malamu mpo na Demetriusi; solo yango moko mpe epesi litatoli yango. Kutu, biso mpe tozali kopesa litatoli mpo na ye, mpe oyebi ete litatoli oyo tozali kopesa ezali solo.
13 Nazalaki na makambo mingi ya kokomela yo, kasi nalingi te kokoba kokomela yo na ekomeli mpe na mai ya mokanda. 14 Kasi nazali na elikya ya komona yo mosika te, mpe tokosolola mpenza boye na miso.
Kimya ezala na yo.
Baninga oyo bazali awa batindeli yo mbote. Pesá mpe baninga kuna mbote na ngai, moto na moto na nkombo na ye.