Magalata

6 Mizwale, mutu niha ka fosa a si ka ziba kale cwalo, mina ba ba hulile kwa moya mu like ku mu sikulula ka moya o bunolo. Kono u tokomele, kakuli ni wena u ka suhana wa likwa. 2 Mu zwelepili ku lwalisana mishimbo, mi ka nzila yeo mu taleleze mulao wa Kreste. 3 Kakuli haiba mutu ufi kamba ufi a nahana kuli ki se siñwi kono imi yena haki se siñwi, wa ipuma. 4 Kono mutu ni mutu a tatube likezo za hae, mi fo, u ka fumana libaka la ku itumba ka za hae a nosi, mi isi ka ku ibapanya ku yo muñwi. 5 Kakuli mutu ni mutu u ka itwalela mulwalo wa hae.

6 Hape mutu kaufela ya lutwa linzwi ka mulomo a abane mwa lika kaufela ze nde ni mutu ya mu luta tuto yeo.

7 Mu si ke mwa ipuma: Mulimu ha pumiwi. Kakuli kaufela sa cala mutu, ki sona hape sa ka kutula; 8 kakuli ya cala ka ku ya ka nama ya hae u ka kutula ku bola mwa nama ya hae, kono ya cala ka ku ya ka moya u ka kutula bupilo bo bu sa feli ku ona. 9 Kamukwaocwalo lu si ke lwa katala ku eza ze nde, kakuli lu ka kutula ka nako ya teñi haiba lu sa zwafi. 10 Cwalehe, ha lu sa na ni kolo, lu eze ze nde kwa batu kaufela, kono sihulu kwa banabahabo luna mwa tumelo.

11 Ha mu bone butuna bwa litaku ze ni mi ñolezi ka lizoho la ka tota.

12 Kaufela ba ba bata ku tabisa batu mwa nama ki bona ba ba lika ku mi hapeleza ku kena mwa mupato, kono se ba ezeza cwalo ki ku pima ku nyandiswa kabakala kota ya linyando ya Kreste, yena Jesu. 13 Kakuli nihaiba bona ba ba kena mwa mupato ha ba mameli Mulao, kono ba bata kuli mina mu kene mwa mupato kuli ba kone ku fumana libaka la ku itumba ka mina. 14 Kono ha ni bati ku itumba ni kamuta, kwandaa ku itumba ka kota ya linyando ya Mulenaa luna Jesu Kreste, yo ka yena lifasi li kokotezwi, ka ku ya ka mubonelo wa ka, mi ni na ni kokotezwi, ka ku ya ka mubonelo wa lifasi. 15 Kakuli ku kena mwa mupato haki se siñwi nihaiba ku sa kena mwa mupato haki se siñwi, kono sa butokwa ki ku ba pupo ye nca. 16 Mi haike kaufela ba ba zamaya ka mukwa o swanela ka mulao wo wa muzamao, ba be ni kozo ni muhau, ee, ku be cwalo ku Isilaele wa Mulimu.

17 Ku zwa cwale ku si ke kwa ba ni ya ni kataza, kakuli ni na ni maswayo a ku ba mutangaa Jesu fa mubili wa ka.

18 Sishemo sa Mulenaa luna Jesu Kreste si be ni moya o mu bonisa, mizwale. Amen.