Jeremia

44 Izao no hafatra nampitaina tamin’i Jeremia, ho an’ny Jiosy rehetra nipetraka tatỳ Ejipta,+ dia ireo nipetraka tao Migdola,+ Tapanesa,+ Nofa,*+ ary Patrosa:+ 2 “Izao no lazain’i Jehovah Tompon’ny tafika, Andriamanitry ny Israely: ‘Efa hitanareo ny loza rehetra nataoko tamin’i Jerosalema+ sy ny tanàna rehetra any Joda. Rava tanteraka izy ireo ankehitriny, sady tsy misy mponina.+ 3 Nanao zava-dratsy mantsy izy ireo mba hampahatezitra ahy. Nandeha nanao sorona+ izy ireo ary nanompo andriamani-kafa tsy fantany, sady tsy fantatrareo no tsy fantatry ny razambenareo.+ 4 Nirahiko tany aminareo foana ny mpaminany mpanompoko rehetra. Imbetsaka aho no* naniraka azy ireny tany aminareo mba hiteny hoe: “Aza dia manao an’izao zava-maharikoriko halako izao re ianareo e!”+ 5 Tsy nihaino anefa izy ireo na nanongilan-tsofina ka tsy niala tamin’ny ratsy fanaony, fa mbola nanao sorona ho an’ny andriamani-kafa ihany.+ 6 Koa nanampatra ny hatezerako sy ny fahavinirako aho, ka nandoro an’ireo tanànan’i Joda sy ny lalan’i Jerosalema izany. Dia rava tanteraka sy ngazana ireo, araka ny hita amin’izao.’+

7 “Ary izao no lazain’i Jehovah Andriamanitry ny tafika, Andriamanitry ny Israely: ‘Nahoana ianareo no mitady loza,* ka ho ringana daholo ny lehilahy sy ny vehivavy ary ny ankizy sy ny zaza ao Joda, dia tsy hisy hiangana ianareo? 8 Fa maninona ianareo no mampahatezitra ahy amin’ny zavatra ataonareo, ka manao sorona ho an’ireo andriamani-kafa atỳ Ejipta, izay toerana nalehanareo mba honenana? Ho ringana ianareo, ary ny anaranareo no hampiasain’ny firenena rehetra eny ambonin’ny tany rehefa manozona izy ireo.+ 9 Hadinonareo angaha ny ratsy nataon’ny razambenareo sy nataon’ireo mpanjakan’ny Joda+ sy ny vadiny,+ ary ny ratsy nataonareo sy ny vadinareo,+ tao Joda sy teny amin’ny lalan’i Jerosalema? 10 Mbola tsy manetry tena* ihany izy ireo hatramin’izao na matahotra.+ Mbola tsy arahin’izy ireo koa ny lalàna sy fitsipika nomeko anareo sy ny razambenareo.’+

11 “Koa izao no lazain’i Jehovah Tompon’ny tafika, Andriamanitry ny Israely: ‘Tapa-kevitra ny hahatonga loza aminareo aho, mba handringanana ny Joda rehetra. 12 Ary halaiko ireo sisa amin’ny Joda, dia ireo tapa-kevitra ny ho atỳ Ejipta mba hipetraka atỳ, ka ho ripaka atỳ Ejipta+ izy rehetra. Ho fatin’ny sabatra sy ho ripaky ny mosary izy ireo, hatramin’ny kely indrindra ka hatramin’ny lehibe indrindra. Ho fatin’ny sabatra sy ny mosary tokoa izy ireo. Dia hanozona azy ireo ny olona ary hihorohoro mahita an’izay hanjo azy. Hanala baraka sy handatsa azy ireo koa izy ireny.+ 13 Hosaziko ireo mipetraka atỳ Ejipta, toy ny nanasaziako an’i Jerosalema ka namelezako azy tamin’ny sabatra sy ny mosary ary ny areti-mandringana.+ 14 Dia tsy hisy ho afa-mandositra na hisy hiangana ny sisa amin’ny Joda, izay nandeha nipetraka atỳ Ejipta. Te hiverina mafy hipetraka any Joda izy ireo, nefa tsy ho tafaverina any, afa-tsy olona vitsy.’”

15 Namaly an’i Jeremia ny lehilahy rehetra izay nahalala fa nanao sorona ho an’ny andriamani-kafa ny vadiny, sy ny vehivavy rehetra nitsangana teo, izay tena be dia be, ary ny vahoaka manontolo nipetraka tatỳ Ejipta,+ tao Patrosa.+ Hoy izy ireo taminy: 16 “Tsy hihaino ny teny nolazainao taminay izahay, na dia nolazainao tamin’ny anaran’i Jehovah aza izany. 17 Izay teny rehetra efa nolazainay ihany no hotanterahinay: Hanao sorona ho an’ny Mpanjakavavin’ny Lanitra* izahay, ary handraraka fanatitra zava-pisotro ho azy,+ hoatran’ny efa nataonay sy nataon’ny razambenay, sy ny mpanjakanay, ary ny andriananay tao amin’ireo tanànan’i Joda sy teny amin’ny lalan’i Jerosalema. Voky hanina sy niadana izahay tamin’izany, ary tsy nisy loza nanjo anay mihitsy. 18 Fa hatramin’ny tsy nanaovanay sorona ho an’ny Mpanjakavavin’ny Lanitra* sy tsy nandrarahanay fanatitra zava-pisotro ho azy intsony, dia tsy manana na inona na inona izahay sady ripaky ny sabatra sy ny mosary.”

19 Hoy koa ireo vehivavy: “Angaha moa izahay tsy efa nangataka alalana tamin’ny vadinay, rehefa nanao sorona ho an’ny Mpanjakavavin’ny Lanitra,* sy nandraraka fanatitra zava-pisotro ho azy? Nangataka alalana izahay vao nanao mofo mitovy bika amin’ilay andriamanibavy mba hatao fanatitra, sy nandraraka fanatitra zava-pisotro ho azy.”

20 Dia hoy i Jeremia tamin’ny vahoaka manontolo, izany hoe ireo lehilahy sy ny vadiny avy ary ny olona rehetra niresaka taminy: 21 “Tsaroan’i Jehovah sady tsy afaka ao an-tsainy* ny sorona nataonareo sy nataon’ny razambenareo, sy ny mpanjakanareo, sy ny andriananareo, ary ny vahoaka tao amin’ireo tanànan’i Joda sy teny amin’ny lalan’i Jerosalema!+ 22 Koa tsy zakan’i Jehovah intsony tamin’ny farany ireo zavatra ratsy sy maharikoriko fanaonareo. Dia rava ny taninareo sady tsy misy mponina intsony, ka nahatonga ny olona hihorohoro sy hampiasa ny anarany rehefa manozona, toy ny amin’izao andro izao.+ 23 Tonga aminareo izao loza izao ankehitriny, satria nanao an’ireny sorona ireny ianareo ary nanota tamin’i Jehovah. Tsy nankatò ny tenin’i Jehovah ianareo, sady tsy nanaraka ny lalàny sy ny fitsipiny ary ny fampahatsiahivany.”+

24 Hoy ihany i Jeremia tamin’ny vahoaka manontolo sy ny vehivavy rehetra: “Henoy ny tenin’i Jehovah, ry Joda rehetra atỳ Ejipta! 25 Izao no lazain’i Jehovah Tompon’ny tafika, Andriamanitry ny Israely: ‘Notanterahinareo sy ny vadinareo izay nolazainareo. Niteny mantsy ianareo hoe: “Tsy maintsy hefainay ny voady nataonay, dia ny hanao sorona ho an’ny Mpanjakavavin’ny Lanitra* sy ny handraraka fanatitra zava-pisotro ho azy.”+ Hanefa ny voadinareo tokoa ianareo vehivavy, ary hanatanteraka ny voadinareo.’

26 “Koa henoy ny tenin’i Jehovah, ry Joda rehetra mipetraka atỳ Ejipta: ‘“Mianiana amin’ny anarako be voninahitra aho”, hoy i Jehovah, “fa tsy hisy olona avy any Joda hianiana amin’ny anarako intsony+ eran’i Ejipta, ka hilaza hoe: ‘Raha mbola velona koa i Jehovah Tompo Fara Tampony!’+ 27 Manara-maso azy ireo aho mba hahatonga loza aminy fa tsy soa.+ Ho ripaky ny sabatra sy ny mosary ny olona rehetra avy any Joda atỳ Ejipta, mandra-pahafongany.+ 28 Vitsy kely sisa no tsy ho ripaky ny sabatra sy ho tafaverina any Joda.+ Dia ho fantatry ny sisa rehetra amin’ny Joda, izay tonga nipetraka atỳ Ejipta, hoe ny tenin’iza no marina: Ny teniko sa ny tenin-dry zareo!”’”

29 “‘Homeko famantarana ianareo’, hoy i Jehovah, ‘mba hahalalanareo fa hosaziko eto amin’ity toerana ity ianareo. Ho fantatrareo amin’izay fa tsy maintsy ho tanteraka ny teniko hoe hahita loza ianareo. 30 Izao no lazain’i Jehovah: “Hatolotro eo an-tanan’ny fahavalony sy ireo mitady hamono azy* i Farao Hofra, mpanjakan’i Ejipta, tahaka ny nanolorako an’i Zedekia mpanjakan’ny Joda teo an-tanan’i Nebokadnezara* mpanjakan’i Babylona, izay fahavalony sady nitady hamono azy.”’”*+