Ohabolana

11 Maharikoriko an’i Jehovah ny mizana mandainga,*

Fa mahafaly azy kosa ny vatomizana marina.*+

 2 Ho afa-baraka izay lasa manambony tena,*+

Fa izay manetry tena* no hendry.+

 3 Manao izay mahitsy foana ny olona tsy mivadika,+

Fa haringana kosa ny mpivadika satria zatra mametsifetsy.+

 4 Tsy hisy hilana azy ny harena* amin’ny andro fahatezerana,*+

Fa ny fahamarinana kosa no hamonjy ny olona tsy ho faty.+

 5 Ny fahamarinan’ny tsy misy tsiny no mahatonga azy hanaraka lala-mahitsy,

Fa ny ratsy fanahy kosa ho lavo satria manao ratsy.+

 6 Ny fahamarinan’ny olo-mahitsy no hamonjy azy,+

Fa ho voafandriky ny faniriany kosa ny mpivadika.+

 7 Foana ny fanantenan’ny ratsy fanahy rehefa maty izy,

Ary foana koa ny zavatra nantenainy hoe ho vitany amin’ny heriny.+

 8 Vonjena amin’ny fahoriana ny olo-marina,

Ka ny ratsy fanahy indray no iharan’izany.+

 9 Mitondra loza ho an’ny namany ny tenin’ny mpivadi-pinoana,*

Fa ny olo-marina kosa vonjena satria manana fahalalana.+

10 Faly ny ao an-tanàna noho ny toetra tsaran’ny olo-marina,

Ary mihoby ny olona rehefa maty ny ratsy fanahy.+

11 Lasa mandroso* ny tanàna noho ny tsodranon’ny olo-mahitsy,+

Fa rava kosa ilay izy noho ny tenin’ny ratsy fanahy.+

12 Manambanimbany* ny namany ny olona tsy ampy saina,*

Fa mangina kosa ny olona mahay mandinika tsara.+

13 Mandehandeha mamoaka tsiambaratelo ny mpanendrikendrika,+

Fa mitana tsiambaratelo* kosa ny olona mendri-pitokisana.*

14 Hijaly ny vahoaka raha tsy mahazo tari-dalana tsara,*

Fa hahomby kosa izay ataony* raha maro ny mpanolo-tsaina.*+

15 Tsy maintsy hahita loza izay miantoka olona* mindram-bola raha tsy fantany akory ilay olona,+

Fa hilamin-tsaina kosa izay tsy mety* mifandray tanana mba hiantoka olona.

16 Mahazo voninahitra ny vehivavy mahafinaritra,*+

Fa mandroba harena ny olona tsy misy antra.

17 Manao soa amin’ny tenany ny olona tsara fanahy,*+

Fa mampidi-kizo ny tenany* kosa ny olona tia mampijaly.+

18 Tsy tena karama no azon’ny ratsy fanahy,+

Fa tena valisoa kosa no azon’izay mamafy fahamarinana.+

19 Hahazo fiainana ny olona miezaka manao ny marina,+

Fa ho faty izay tsy mieritreritra afa-tsy ny hanao ratsy.

20 Maharikoriko an’i Jehovah ny olona fetsifetsy,*+

Fa mahafinaritra azy kosa izay mandeha tsy misy tsiny.+

21 Matokia* fa tsy maintsy ho voasazy ny olon-dratsy,+

Fa ho afa-mandositra kosa ny zanaky ny olo-marina.

22 Hoatran’ny kavim-bolamena eo amin’ny oron-kisoa

Ny vehivavy tsara tarehy nefa tsy misaina.

23 Mitondra soa ny fanirian’ny olo-marina,+

Fa mampahatezitra kosa ny zavatra antenain’ny ratsy fanahy.

24 Misy tia manome* nefa vao mainka mihamanana,+

Fa misy tsy mahafoy manome zavatra tokony homena, nefa lasa mihamahantra.+

25 Handeha tsara ny fiainan’izay* tia manome,+

Ary izay manome rano* dia homena rano koa.+

26 Hozonin’ny olona izay tsy mety mivarotra vokatra,

Fa homeny tsodrano kosa izay manaiky hivarotra vokatra.

27 Izay mazoto manao soa dia ankasitrahan’ny olona,+

Fa izay mitetika ny hanao ratsy kosa tsy maintsy hiharan’izay ratsy noeritreretiny ihany.+

28 Ho lavo izay matoky ny harenany,+

Fa handrobona toy ny hazo midoroboka kosa ny olo-marina.+

29 Hisambo-drivotra izay mampidi-kizo* ny ankohonany,+

Ary ho mpanompon’izay manana fo hendry ny tsisy saina.

30 Toy ny hazon’aina ny vokatry ny ataon’ny olo-marina,+

Ary hendry izay maharesy lahatra olona.+

31 Raha ny olo-marina eto an-tany aza mahazo ny valin’ny nataony,

Koa mainka fa ny ratsy fanahy sy ny mpanota!+